44. Cov Hnub Uas Kuv Raug Kaws

Nyob rau lub Xya Hli xyoo 2006 ntawd, kuv tau txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm. Kuv tus txiv mas yeej txhawb, thiab nws txais tos tej nus thiab tej viv ncaus uas tuaj rau hauv wb tsev yam sov siab so xwb. Tab sis tom qab thaum nws hnov tias cov ntseeg Vajtswv Tus Uas Muaj Hwj Chim Loj Kawg Nkaus yuav raug ntes no, ces nws thiaj li nug kuv tus txheeb ze txog qhov ntawd, tus uas ua hauj lwm rau hauv lub chaws hais plaub, tom qab ntawd los tsev thiab ces txawm hais rau kuv tias, “Koj tus txheeb ze hais tias tsoom fwv tab tom rhuav tshem txoj kev ntseeg, tshwj xeeb mas yog cov ntseeg Vajtswv Tus Uas Muaj Hwj Chim Loj Kawg Nkaus no. Thiab yog ib lub tsev twg muaj ib tug ntseeg ces yuav cuam tshuam rau lawv tsev neeg ntawd tag nrho. Tsis txhob raws Vajtswv Tus Uas Muaj Hwj Chim Loj Kawg Nkaus qab ntxiv lawm—cia li mus rau pawg ntseeg Peb-Tus Kheej.” Thaum pom tias kuv tus txiv tsis to taub tej xwm txheej ntawm txoj kev ntseeg li, ces kuv thiaj li qhia rau nws tias, “Pawg Ntseeg Peb-Tus Kheej ntawd raug tsim tsa los ntawm Tsoom Fwv Koom Tsham xwb. Lawv muab kev hlub lub teb chaws los tso ua ntej, ces mam li yog Vajtswv. Lawv pom tias Tsoom Fwv zoo dua Vajtswv, thiab qhov ntawd tsis muaj txoj kev ntseeg. Kuv tsis mus rau Peb-Tus Kheej.” Nws thiaj li teb yam tsis muaj qab hau kiag li tias, “Kuv paub tias qhov ntseeg Vajtswv Tus Uas Muaj Hwj Chim Loj Kawg Nkaus ntawd yog ib qho zoo, tab sis koj yuav tsum tau saib rau qhov xwm txheej kom tseeb tseeb. Tam sim no nws yog Tsoom Fwv Koom Tsham kav lawm, yog li wb tej hauj lwm yuav tsis raug thaj tsob yog tias koj pheej tuav koj txoj kev ntseeg. Koj puas txaus siab tso koj txoj hauj lwm hauv tsev kho mob tseg? Thiab wb muaj ib qho nqi tsev, thiab wb tim tsum nyiaj los tu wb tus ntxhais. Peb yuav ua neej tau li cas yog tsis muaj nyiaj? Yog tias koj raug rau txiav txim mus kaw lawm, ces tib neeg yuav thuam kuv thiab wb tus ntxhais cov phooj ywg kawm ntawv ua ke yuav luag nws. Koj yuav tsum xav txog wb thiab! Muab koj txoj kev ntseeg tso tseg.” Kuv paub tias yeej zam tsis dhau tias kuv tus txiv, uas yog ib tug tsis ntseeg, yeej yuav muaj qee qhov kev txhawj xeeb, yog li kuv thiaj li hais rau nws tias, “Tsoom Fwv Koom Tsham tsis ntseeg tias muaj Vajtswv thiab yeej ib txwm tsim txom cov ntseeg. Kuv yuav tsis tso kuv txoj kev ntseeg Vajtswv tseg li vim yog nws txoj kev tsim txom xwb. Koj tsis paub tias cov neeg tais caus yeej nkag tsis tau mus rau hauv lub nceeg vaj saum ntuj ceeb tsheej li no lod? Tam sim no tej kev puas tsuaj tab tom loj zuj zus tuaj, thiab Vajtswv Tus Uas Muaj Hwj Chim Loj Kawg Nkaus uas yog tus Cawm Seej twb nthuav ntau qhov tseeb tawm lawm thiab tab tom ua tes hauj lwm txiav txim ntawm tiam kawg. Qhov no yog los ntxuav tib kom neeg dawb huv thiab los cawm kom tib neeg dim plaws kom peb thiaj li nyob dhau tej kev puas tsuaj thiab raug coj mus rau hauv Vajtswv lub nceeg vaj. Qhov no yog lub cib fim uas ib sim neej tsuas muaj ib zaug xwb! Qhov muaj kev ntseeg ntawd txhais tau tias yog qhov raug kev txom nyem thiab raug kev phom sij ib ntus, tab sis peb tau txais qhov tseeb thiab raug cawm dim plaws. Qhov no thiaj li yog qhov tseem ceeb tshaj plaws.” Nws teb hais tias, “Qhov nkag mus rau Vajtswv lub nceeg vaj mas yog ib txoj kev deb heev. Qhov ua ib lub neej zoo mas thiaj li yog qhov ua kom muaj qab hau tshaj plaws. Kuv tsis quav ntsej txog qhov yuav tshwm sim rau yav tom ntej, thiab kuv tsis xav txog qhov ntawd li.” Tom qab ntawd, thaum pom tias kuv tseem mus koom tej kev sib txoos ua ke thiab ua ib teg dej num, ces nws txawm pib nrog kuv sib cav heev, thiab nws hais tias, “Qhov ib txwm ntshai mas tsis muaj kev yuav ua lub neej tau li. Yog tias koj pheej tuav koj txoj kev ntseeg, ces peb tsev neeg yuav tawg.” Kuv thiaj li xav tias yog kuv tseem xyaum ua raws kuv txoj kev ntseeg ntxiv, ntshe wb lub neej yuav tawg. Kuv tus ntxhais nyuam qhuav muaj cuaj xyoos xwb, thiab qhov tsis muaj ib tse neeg kom txhij vog yuav ua rau nws mob siab heev! Nyob rau lub sij hawm ntawd kuv yeej tsis xav plam kuv tsev neeg li, tab sis yog tias kuv tus txiv pheej tav kuv txoj kev ntseeg, ces kuv yuav ua kuv tes dej num tau li cas? Kuv tus ntxhais, kuv tsev neeg, thiab Vajtswv—kuv tsis tau npaj txhij yuav tso ib tug twg tseg li. Thaum uas kuv muaj kev cov nyom ntawd, ces kuv thiaj li nco txog Tswv Yexus cov lus tias: “Tus uas hlub niam hlub txiv dua li hlub Kuv tsis tsim nyog ua Kuv tug: thiab tus uas hlub tub hlub ntxhais dua li hlub Kuv tsis tsim nyog ua Kuv tug. Thiab tus uas tsis kwv nws tus ntoo khaub lig thiab raws Kuv qab, tsis tsim nyog ua Kuv tug” (Mathai 10:37–38). Kuv thiaj li xav txog txhua tus neeg dawb huv ntawm txhua tiam uas tau tso txhua yam tseg los tshaj tawm txoj moo zoo thiab ua tiav Vajtswv txoj lus txib. Vim tias kuv xyiv fab rau qhov txhawb los ntawm qhov tseeb heev, ces kuv yuav tsum tau xav txog Vajtswv txoj kev xav. Kuv yuav tso tsis tau kuv txoj kev ntseeg thiab kuv tes dej num tseg tsuas yog kom kuv tsev neeg nyob nyab xeeb xwb. Vajtswv tau yug los ua neeg thiab los rau hauv lub ntiaj teb los cawm peb kom dim plaws los ntawm Ntxwgnyoog lub zog, los tiv tus poj zaj liab ploog txoj kev caum raws, tej lus paj lus cua thiab txoj kev teem txim ntau heev thiab lub ntiaj teb ntawm sab kab li kev cai ntseeg txoj kev tsis kam lees yuav thiab iab liam, thiab nthuav ntau qhov tseeb tawm los txhawb thiab yug peb ntsiag to. Vajtswv txog kev hlub tib neej mas kawg nkaus li! Kuv xyiv fab heev los ntawm Vajtswv, txhua lub sij hawm thaum saib kuv tsev neeg thiab kuv tus ntxhais muaj nqis mas, yeej tsis xav txog qhov yuav pauj Vajtswv txoj kev hlub li. Kuv lub siab txawj xav nyob qhov twg no? Thaum xav li no lawm mas, zoo li kuv tshuav Vajtswv nqi ntau heev thiab txiav txim siab tias txawm kuv tus txiv tav kuv kev li cas los xij, kuv yuav raws Vajtswv qab thiab tshaj tawm txoj moo zoo ua tim khawv rau Vajtswv.

Tom qab ntawd, Tsoom Fwv Koom Tsham Suav caij tsum pawg ntseeg heev tuaj thiab kuv tus txiv tawm tsam heev tuaj. Nyob rau lub qab xyoo 2007 ntawd, Tsoom Fwv Koom Tsham Suav tawm tsam txoj kev ntseeg thiab rhuav tshem cov pawg ntseeg hnyav heev kom tswj hwm tau kev ruaj ntseg rau Aus Lees Piv. Muaj ob peb tug nus thiab viv ncaus raug ntes lawm. Muaj ib tag kis nyob rau lub Cuaj Hlis thaum kuv npaj txhij yuav tawm mus tshaj tawm txoj moo zoo ntawd, ces kuv tus txiv thiaj li tav kuv kev thiab tsis pub kuv tawm mus, hu kuv tus nus hlob tuaj, thiab hais tias, “Ob peb hnub dhau los no tus txheeb ze hais tias Tsoom Fwv Koom Tsham tab tom npaj neeg coob heev los ntes cov ntseeg Vajtswv Tus Uas Muaj Hwj Chim Loj Kawg Nkaus. Thaum raug ntes lawm, ces lawv yuav raug rau txim. Koj yuav tsum tau tso koj txoj kev ntseeg tseg.” Thiab kuv tus nus kuj hais rau kuv tias, “Kuv paub tias txoj kev ntseeg yog ib qho zoo, tab sis Tsoom Fwv tsis tso cai rau ntseeg. Ib txhais caj npab yeej nyom tsis tau ib txhais ncej qab, yog li yog koj yuav tsum ntseeg xwb xwb li, ces cia li ntseeg nyob rau hauv tsev xwb. Txhob tawm mus tshaj tawm txoj moo zoo lawm. Yog tias koj raug ntes ne yuav ua li cas no?” Kuv thiaj qhia rau nkawv tias, “Kuv paub tias neb xav kom kuv tau qhov zoo tshaj plaws xwb, tab sis qhov muaj txoj kev ntseeg thiab qhov qhia txoj moo zoo yog qhov tsim nyog ua lawm, kom thiaj li muaj tib neeg raug Vajtswv cawm dim ntxiv. Qhov no yog txoj kev ua zoo tshaj plaws. Yog tias kuv tso txoj kev qhia txoj moo zoo tseg es los tiv thaiv kuv tus kheej xwb, ces qhov ntawd tsis yog siab nqaim heev lod?” Kuj ceeb tag li tias, thaum cov lus ntawd tawm ntawm kuv lub qhov ncauj mus lawm, ces kuv tus txiv txawm txhos caug ntua rau ntawm kuv xub ntiag. Nws hais tias, “Kuv thov koj thiab. Vim muaj wb lub neej, vim muaj wb tus me nyuam, ces tso koj txoj kev ntseeg tseg. Yog tias koj pheej tuav koj txoj kev ntseeg, ces wb tus ntxhais yuav tsis tau mus kawm ntawv qib siab los sis nrhiav tau hauj lwm zoo ua li. Nws lub neej yav tom ntej yuav puas tsuaj! Nws tsuas yog wb tib tug me nyuam xwb—koj yuav tsum xav txog nws! Yog tias koj raug ntes lawm ces tib neeg yuav hais tsis zoo rau kuv. Kuv yuav ua neej li ntawd tau li cas?” Thaum pom kuv tus txiv ua li ntawd, ces kuv tsis paub yuav ua li cas li lawm. Nws ib txwm muaj nws txoj kev khav, tab sis thaum ntawd nws txhos caug ntua thov kuv rau ntawm kuv tus nus xub ntiag. Thaum pom nws zoo li ntawd, ces kuv thiaj li xav tias qhov pheej tuav rawv kuv txoj kev ntseeg mas yuav haj yam ua rau nws mob siab ntxiv. Thiab yuav ua li cas yog tias Tsoom Fwv tsis pub kuv tus ntxhais mus kawm ntawv qib siab lawm es nws nrhiav tsis tau ib txoj hauj lwm zoo ua vim kuv txoj kev ntseeg ne? Txawm kuv tus nus hlob kiag los yeej tawm tsam kuv txoj kev ntseeg thiab, yog li yog kuv tsev neeg paub tias kuv tus txiv thiab kuv tsis sib haum vim yog kuv txoj kev ntseeg no, ntshe lawv yuav tav kuv kev thiab. Qhov ntawd yuav ua rau kuv raws Vajtswv qab nyuaj zog. Tab sis yog tias kuv yeem swb rau kuv tus txiv thiab qhia rau nws tias kuv yuav tso kuv txoj kev ntseeg tseg, ces qhov ntawd yuav yog ntxeev siab rau Vajtswv. Thaum kuv xav txog qhov ntawd mas kuv yim ntxhov siab, yog li kuv thiaj li thov Vajtswv twj ywm, thov kom Vajtswv tsom kwm kuv lub siab. Ces kiag thaum ntawd, txawm muaj ib zaj lus ntawm Vajtswv cov lus tshwm los rau hauv siab: “Nyob rau txhua kauj ruam ntawm tes dej num uas Vajtswv ua rau hauv tib neeg, sab nraud ces nws tshwm muaj kev sib tshuam mus los ntawm tib neeg, li uas yog yug ntawm tib neeg tej kev npaj los sis los ntawm tib neeg txoj kev sib cuam tshuam. Tab sis nyob rau tom qab, txhua kauj ruam ntawm tes dej num, thiab txhua yam uas tshwm sim, yog ib lo lus twv los ntawm Ntxwgnyoog rau ntawm Vajtswv xub ntiag, thiab cheem tsum tib neeg tuav lawv tej lus tim khawv khov kho rau Vajtswv” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Txoj Kev Hlub Vajtswv Xwb Thiaj Yog Txoj Kev Ntseeg Vajtswv Tiag). Nyob rau sab nraud mas saib zoo li nws yog tsev neeg uas tav kuv kev ntag, tab sis qhov tseeb tiag ces nws yog Ntxwgnyoog sim kuv xwb. Qhov muaj txoj kev ntseeg thiab ua ib teg dej num ntawd ces yog kuv taug txoj kev yog lawm. Ntxwgnyoog siv kuv tsev neeg los tav kuv kev thiab ua kom kuv ntxeev siab rau Vajtswv. Kuv yuav poob tsis tau rau nws tej kev ntxias dag, tab sis kuv yuav tsum tau tuav kuv tej lus tim khawv kom khov kho thiab ua kom nws txaj muag. Thaum xav li ntawd lawm, ces kuv thiaj li hais khov kho rau nkawv tias, “Vajtswv kav txhua yam. Nws npaj peb tes hauj lwm thiab peb lub neej yav tom ntej, thiab Tsoom Fwv Koom Tsham txiav txim tsis tau. Qhov muaj ntau lub teb chaws thiab ntau cov nom tswv tshwm tuaj thiab poob mus ntawd yog nyob rau hauv Vajtswv ob txhais tes, cia rau ib leeg xwb. Neb yeej paub tias kuv muaj mob heev ua ntej los ua ib tug ntseeg, thiab kuv ntshe kuv twb tuag ntev lawm yog tias tsis yog vim muaj Vajtswv. Vajtswv muab txoj sia no rau kuv thiab kuv xyiv fab heev rau Nws. Qhov tsis muaj txoj kev ntseeg los sis tsis ua ib teg dej num mas yuav yog qhov tsis txawj xav li. Kuv puas tseem yog tib neeg? Kuv txoj sia puas muaj qab hau dab tsi?” Kuv tus nus thiaj li hnya pauv thiab hais yam tsis muaj kev cia siab kiag li tias, “Yeej muaj tseeb tias koj zoo tuaj lawm tom qab los ua ib tug ntseeg, tab sis tam sim no peb ua neej raws li Tsoom Fwv Koom Tsham xwb, thiab lawv ntes cov ntseeg. Qhov tawm mus qhia txoj moo zoo tsis yog qhov muab koj tus kheej tso rau txoj kev phom sij lod?” Kuv tus txiv tsis pom zoo li. Tab sis kuv pheej tuav rawv kuv txoj kev ntseeg txawm nkawv hais li cas los xij. Thaum pom tias kuv yeej tsis ua ywj fab ywj fwj li, ces nkawv thiaj li tas zog siv tej tswv yim phem los tav kuv kev. Muaj ib hnub thaj tsam li ib hlis tom qab ntawd thaum kuv mus sib txoos los txog tsev, ces kuv tus txiv txawm los rau ntawm kuv, rho ob tawg ncuav rau kuv, thiab hais npau taws npleev tias, “Tsoom fwv tab tom ntes cov ntseeg yam vwm ntsuav, tab sis koj tseem mus sib txoos thiab, tuav rawv koj txoj kev ntseeg! Kuv twb hwm koj los tau ntau lub xyoo no lawm, yeej tsis tau tsa tes ntaus koj li. Koj tus nus thiab tus nyab hais tias kuv ywj koj dhau lawm ces kuv yuav tsum tau tswj koj, ua kom ntseeg tau tias koj tuav tsis tau koj txoj kev ntseeg lawm.” Kuv ceeb tag li uas pom li ntawd los ntawm nws, ces kuv cia li ntsia ntsoov nws yam ceeb tag li. Nws tsis muaj cuab kav ntsia kuv li, ces nws thiaj li nyo hau thiab hais tias, “Kuv yeej tsis xav ntaus koj li. Kuv tsis xav kom koj mag kaw vim koj txoj kev ntseeg, qhov no yog qhov zoo rau koj tus kheej.” Thaum hnov nws piav li no mas chim siab heev. Kuv tus txiv yeej ib txwm ua zoo rau kuv heev, tab sis nws dhau los ua ib yam cuab yeej rau Tsoom Fwv Koom Tsham lawm, ntshai tsam raug tsim txom. Nws thiaj li tas zog ua txhua yam kom kuv ntxeev siab rau Vajtswv. Qhov ntawd zoo rau kuv tus kheej li cas? Tom qab ntawd nws haj tseem tsis mus ua hauj lwm li lawm thiab, thaum pom tias kuv txiav txim siab los tuav kuv txoj kev ntseeg lawm. Nws raws kuv qab mus rau txhua qhov chaw, thiab yeej tsis pub kuv nyeem Vajtswv cov lus, mus koom tej kev sib txoos ua ke, los sis ua kuv tes dej num li. Tom qab ntawd mas muaj hauj lwm ua ntau heev nyob rau hauv pawg ntseeg, tab sis kuv raug nws kaw rau hauv tsev, thiab ua tsis tau ib teg dej num li. Kuv thiaj li qhia rau nws tias nws yuav tsum txhob txwv kuv txoj kev ntseeg. Kuv hais tias, “Yav tas los thaum koj tseem txhawb kuv txoj kev ntseeg, koj tsis pom tias Vajtswv tej koob hmoov ntau heev li lod? Koj twb yuav luag ua tsheb sib nraus ntau zaus, tab sis Vajtswv tiv thaiv koj los ntawm tej ntawd xwb. Koj tawm tsam Vajtswv tau li cas, tom qab Nws twb muab txoj hmoov hlub thiab tej koob hmoov rau wb lawm?” Nws teb hais tias, “Yav tas los mas koj txoj kev ntseeg muaj txiaj ntsig, tab sis txhua yam tau hloov lawm. Tsuav yog koj yog ib tug ntseeg ces Tsoom Fwv yuav tsis tso koj mus li, thiab peb tsev neeg yuav raug kev txom nyem thiab. Peb yuav tsum muaj lub neej ua.” Vim tsis xav kom muaj feem xyuam, ces tom qab ntawd nws thiaj li hais kom wb sib nrauj. Lub sij hawm ntawd mas kuv ntshai heev, tab sis kuv ntxub tus zaj loj liab ploog tshaj txhua yam. Nws pheej caij tsuj kuv thiab tsa tes ntaus kuv, ces tom qab ntawd nws hais kom sib nrauj. Txhua yam ntawd yog los ntawm Tsoom Fwv Koom Tsham txoj kev caij tsuj los xwb. Kuv nco txog zaj lus no los ntawm Vajtswv cov lus los tias: “Tam sim no yog lub sij hawm: Tib neeg twb yeej sau zog lawv lub zog los ua ke ntev los lawm, lawv tau muab tag nrho lawv tej zog no thiab them txhua tus nqi rau qhov no, los mus dua rhe lub ntsej muag phem phem ntawm tus dab no thiab cia tib neeg, cov uas tau raug ua rau dig muag lawm, thiab cov uas tau tiv txhua yam kev mob kev ntsaj thiab kev txom nyem, kom sawv tseem hauv lawv lub lav mob los thiab tig kiag lawv lub nrab qaum rau tus dab phem laus laus no. Vim li cas ho yuav tsim tej kev tav kev uas tua tsis tshab no rau Vajtswv tes hauj lwm? Vim li cas ho siv ntau yam kev ntxias dag uas sib txawv los dag Vajtswv cov neeg? Qhov kev ywj pheej tiag thiab tej cai thiab tej yam tib neeg nyiam uas raug kev cai ntawd nyob qhov twg? Txoj kev ncaj ncees nyob qhov twg? Txoj kev kaj siab nyob qhov twg? Kev sov siab ntawd nyob qhov twg? Vim li cas ho siv tej tswv yim ntxias dag los dag Vajtswv cov neeg?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Tsoom fwv yog ib tug dab tawm tsawm Vajtswv, ntxub Vajtswv. Tsoom fwv ntes thiab tsim txom cov ntseeg los tav kev thiab rhuav tshem Vajtswv tes hauj lwm. Nws tsim txhua hom lus paj lus cua los iab liam Vajtswv tes hauj lwm thiab dag tib neeg kom lawv los kuj tawm tsam Vajtswv thiab raug puas tsuaj rau thaum kawg. Tsoom Fwv tseem cuam tshuam ntau tiam neeg thiab, kom tag nrho ib tsev neeg raug rhuav tshem los ntawm ib tug neeg txoj kev ntseeg thiab. Thaum xub thawj mas kuv tsev neeg yeej txhawb nqa kuv txoj kev ntseeg, tab sis Tsoom Fwv txoj kev tsim txom thiab tej lus paj lus cua ua rau lawv yuam kev, yog li lawv thiaj li koom siab, tawm tsam Vajtswv lawm. Tsoom Fwv mas lim hiam tshaj li! Kuv thiaj li xav txog lwm zaj lus ntawm Vajtswv cov lus tias: “Raws li ib tug neeg dog dig, thiab tus uas nrhiav txoj kev hlub Vajtswv, to taub qhov tseeb txog lub teb chaws kom dhau los ua ib tug neeg ntawm Vajtswv cov neeg yog nej lub neej yav tom ntej uas tseeb tiag, thiab lub neej uas muaj nuj nqis thiab tseem ceeb tshaj plaws; tsis muaj leej twg tau txais koob hmoov ntau dua nej lawm. Vim li cas Kuv thiaj hais li no? Vim hais tias cov neeg uas tsis ntseeg Vajtswv ua neej nyob rau sab cev nqaij daim tawv xwb, thiab lawv ua neej nyob rau Ntxwgnyoog, tiam sis hnub no nej ua neej nyob rau Vajtswv, thiab ua neej nyob kom tau ua raws li Vajtswv lub siab nyiam. Twb yog vim li ntawd Kuv thiaj li hais tias nej lub neej yog qhov tseem ceeb tshaj plaws. Tsuas yog pab pawg neeg no xwb, uas tau raug xaiv los ntawm Vajtswv lawm, thiaj li muaj peev xwm ua lub neej uas tseem ceeb tshaj plaws: Tsis muaj leej twg hauv ntiaj teb no uas muaj peev xwm ua lub neej uas muaj nuj nqis thiab muaj txiaj ntsig zoo li no li lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Ua Raws Li Nws Cov Hneev Taw). Thaum xav txog Vajtswv cov lus kuv thiaj li paub. Tam sim no kuv twb lees txais Vajtswv tes hauj lwm ntawm tiam kawg lawm. Kuv tuaj yeem xyiv fab heev rau txoj kev txhawb thiab txoj kev yug los ntawm Nws cov lus, ua kuv tes dej num li ib tug uas raug tsim tawm los, thiab pab tib neeg los nyob rau ntawm Vajtswv xub ntiag thiab tau txais Nws txoj kev cawm dim coob ntxiv. Qhov no yog qhov ncaj ncees tshaj plaws, qhov muaj nqi tshaj plaws lawm. Kuv yuav tso tsis tau kuv txoj kev ntseeg thiab kuv tes dej num tseg es los tiv thaiv kuv tsev neeg xwb. Kuv yuav tsum raws Vajtswv qab mus kom txog ntua thaum kawg, txawm tias nws yuav ua rau sib nrauj los xij. Yog li, kuv thiaj li hais rau kuv tus txiv tias, “Kuv txiav txim siab mus taug txoj kev no lawm. Vim koj pheej hais kom sib nrauj, ces kuv pom zoo.”

Wb thiaj li mus rau Lub Chaws Saib Xyuas Kev Ncaj Ncees Rau Pem Xeem mus ua cov txheej txheem nyob rau hnub ntawd. Thaum kuv tab tom yuav kos npe rau daim ntawv, ces kuv tus nus thiab tus nyab txawm nkag los, muab kuv cab kiag mus rau hauv nkawv lub tsheb tsis hais ib lo lus li thiab coj kuv mus rau nkawv qhov chaws ua lag luam. Kuv txiv twb nyob rau tod lawm, ces nws tsa tes los ntaus kuv thaum nws pom kuv. Cov neeg ua hauj lwm nyob rau tod thiaj li khiav los cheem nws. Nws nthe kuv npau taws npleev tias, “Kuv xav tias tsoom fwv txhawb koj txoj kev ntseeg no. Kuv yeej tsis paub tias koj yuav raug ntes thiab koj tsev neeg yuav raug cuam tshuam li. Koj ntseeg tsis tau tus Vajtswv no mus ntxiv lawm nawb, thiab yog tias koj ntseeg, ces kuv yuav tsis lees yuav koj lawm.” Thaum pom tias nws npau taws heev lawm, ces kuv thiaj li hais rau nws tias, “Txiv, peb yog Vajtswv tsim thiab Nws kav tag nrho txhua yam. Tib neeg yuav tsum ntseeg Vajtswv thiab pe hawm Nws. Tsoom Fwv Koom Tsham Suav tsis ntseeg tias muaj ib tug Vajtswv. Lawv tawm tsam Nws yam npau taws heev thiab twb raug Nws rau txim lawm. Vim li cas hauv Teb Chaws Suav thiaj li muaj tej kev puas tsuaj loj ua luaj? Twb vim yog Tsoom Fwv tawm tsam Vajtswv thiab tsim txom cov ntseeg ntag. Peb yuav muaj ib txoj kev cia siab twg yog tias peb tsis muaj txoj kev ntseeg lawm?” Kuv twb hais tsis tau tag, ces kuv tus nus twb nug kuv nrov nrov lawm tias, “Yog tias koj txoj kev ntseeg ua rau plam koj tsev neeg, koj puas tseem xav ntseeg?” Kuv thiaj li hais khov kho tias, “Kuv txoj kev ntseeg tsis txhaum dab tsi. Nws xav tau txoj kev sib nrauj no—kuv tsis yog tus tawm ntawm tsev neeg no mus.” Kuv tus nus thiaj li nthe npau taws npleev tias, “Kuv tus phooj ywg uas ua hauj lwm rau tsoom fwv hais tias tsoom fwv tau tshaj tawm ib daim ntawv qhia tias cov ntseeg Vajtswv Tus Uas Muaj Hwj Chim Loj Kawg Nkaus yog lub hom phiaj rhuav tshem tseem ceeb. Nws hais kom peb saib ntsoov koj thiab txwv koj kom txhob ntseeg kom peb thiaj li tsis muaj feem xyuam nrog koj.” Thaum hais li no, ces nws tsawv nkaus ib tug nplawm xyoob ntaus kuv ob lub qhov muag thaum hais tias, “Kuv mam li qhia koj vim tsis pom qhov tshwm sim kiag!” Thaum pom kuv tsev neeg coj li ntawd rau kuv mas mob siab heev. Kuv thiaj li siv tag nrho kuv lub zog los nriaj kom dim ntawm lawv txhais xib teg thiab khiav tawm mus lawm. Thaum taug kev rov qab los tsev, ces kuv tsuas quaj li quaj xwb. Kuv hnov tag kev cia siab thiab twm zeej heev li thiab kuv tsis paub tias xyov yuav taug txoj kev no li cas li lawm. Thaum quaj quaj ntawd, kuv thiaj li thov Vajtswv tias, “Au Vajtswv, tam sim no tag nrho kuv tsev neeg tawm tsam kuv, tav kuv kev, hais rau kuv tias tsis pub kuv ntseeg lawm no. Qhov ntawd mas nyuaj heev rau kuv. Vajtswv, thov coj kuv kev to taub Koj txoj kev xav thiab paub tias yuav mus kom dhau qhov xwm txheej no li cas os.” Tom qab thov Vajtswv lawm kuv thiaj li xav txog ib zaj lus ntawm Vajtswv cov lus. “Tej zaum nej txhua tus nco cov lus no: ‘Rau qhov peb txoj kev txom nyem me me no, uas tsuas yog ib nyuag pliag xwb, ua hauj lwm rau peb kom tau lub yeeb koob uas zoo tshaj plaws thiab nyob mus ib txhis.’ Nej txhua tus yeej tau hnov cov lus no ua ntej lawm, tab sis nej tsis muaj ib tug nkag siab lawv lub ntsiab tseeb. Hnub no, nej paub meej tias lawv qhov tseeb tseem ceeb tiag. Cov lus no Vajtswv yuav ua kom tiav nyob rau hauv tiam kawg, thiab yuav ua kom tiav rau cov neeg raug tus zaj loj liab ploog ntaus tsim txom nyob hauv daim av uas nws chev. Tus zaj loj liab ploog tsim txom Vajtswv thiab yog Vajtswv tus yeeb ncuab, thiab ces, nyob thaj av no, cov uas ntseeg Vajtswv yog cov raug rau kev poob ntsej muag thiab kev caij tsuj, thiab qhov tau los ces yog cov lus no tshwm sim nyob hauv nej, pab neeg no. Vim tias, nws nqis tes mus rau ntawm thaj av uas tawm tsam Vajtswv, tag nrho Vajtswv tes dej num ntsib kev cuam tshuam loj heev, thiab siv sij hawm ntev mas Nws cov lus thiaj tiav; vim li ntawd, neeg lim hloov kom zoo dua los ntawm Vajtswv cov lus, uas kuj yog ib qhov ntawm kev txom nyem. Nws yog ib qho nyuaj kawg nkaus rau Vajtswv ua Nws tes dej num nyob ntawm thaj av uas tus zaj loj liab ploog nyob tab sis nws yog los ntawm txoj kev nyuaj no uas Vajtswv ua ib theem ntawm Nws tes dej num, ua kom Nws txoj kev thoob tsib thiab txoj kev ua uas muaj hwj huaj loj tshwm tuaj, thiab siv lub cib fim no los ua kom pab neeg no muaj txhua yam txhij” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm Puas Yooj Yim Npaum Li Tib Neeg Xav?). Los ntawm Vajtswv cov lus kuv thiaj li to taub tias Vajtswv ua hauj lwm rau hauv tus zaj loj liab ploog lub teb chaws nyob rau tiam kawg, qhov uas Nws raug tawm tsam tshaj plaws, peb cov uas raws Nws qab ntawd mas yeej yuav raug caij tsuj thiab raug tsis lees paub. Vajtswv ua li no kom peb thiaj li yuav pom tus zaj loj liab nploog thiab nws txoj kev phem, lub ntsiab tseeb uas tawm tsam-Vajtswv ntawd tseeb, kom txhob raug nws dag ntxiv lawm. Nws kuj yog ua kom peb txoj kev ntseeg zoo tiav log thiab kom peb thiaj li yuav paub vam khom rau Vajtswv los ntawm txoj kev nyuaj, ces peb thiaj li yuav raws tau Vajtswv qab yam tsis raug Ntxwgnyoog lub hwj chim rub rov qab, es thiaj li muaj txoj kev ntseeg tiag. Tab sis tom qab tiv kev txom nyem me ntsis ces kuv txawm xav tias qhov muaj txoj kev ntseeg mas nyuaj heev. Kuv thiaj li ua lub neej xav phem thiab xav khiav kom dim ntawm qhov xwm txheej ntawd. Kuv tsis muaj kev ntseeg hlo li. Thaum ntsib tej teeb meem ntawd, ces kuv yuav tsum tau lees txais tej teeb meem ntawd los ntawm Vajtswv los, thov Vajtswv thiab nrhiav qhov tseeb, thiab ua tim khawv rau Vajtswv. Qhov ntawd yog qhov kuv yuav tsum tau ua raws li yog ib tug uas raug tsim tawm los. Thaum kuv to taub Vajtswv txoj kev xav lawm ces kuv thiaj li tsis hnov nyuaj siab lawm. Tom qab ntawd kuv thiaj li paub tias kuv tus txiv tsis xav sib nrauj, tab sis nws tham txog qhov ntawd rau kuv tsev neeg ces lawv thiaj li xav tias lawv yuav yuam kom kuv tso kuv txoj kev ntseeg tseg li ntawd xwb.

Muaj ib hnub tsis ntev tom qab ntawd, kuv tus txiv txawm hais tias nws yuav thauj kuv mus kav khw no, tab sis kiag tam sim ntawd nws cia li tsav tsheb mus rau ntawm txoj kev loj, ces mus ncaj nraim rau tom lub tsev kho neeg puas hlwb lawm. Nws coj kuv mus rau hauv chav tshuaj xyuas kab mob thiab hais rau tus kws kho mob tias, “Nws ntseeg Vajtswv Tus Uas Muaj Hwj Chim Loj Kawg Nkaus thiab tau tshaj tawm txoj moo zoo lawm. Koj yuav tsum tau muab nws kaw thiab cia nws nyob nrug deb ntawm lwm cov ntseeg. Ib yam li kev txiav yeeb txiv tshuaj ntag. Thaum nws tsis muaj txoj kev ntseeg thiab yuav tsis tshaj tawm txoj moo zoo lawm ces mam tso nws tawm.” Kuv ntshai heev thaum kuv hnov nws hais li ntawd. Nws muab kuv tso nyob nrog cov neeg puas hlwb kom kuv txhob ntseeg Vajtswv no. Qhov raug kaw nyob rau tod yuav ua rau ib tug neeg vwm tau! Kuv thiaj li hais rau tus kws kho mob kiag tam sim ntawd tias, “Kuv kuj yog ib tug kws kho mob thiab. Xub ntsuaj xyuas kuv lub hlwb ua ntej tso kom paub meej tias seb kuv puas tsim nyog raug txais nkag rau hauv tsev kho mob tso.” Ces kuv thiaj li ua tib zoo piav qhia rau tus kws kho mob ntawd txog qhov kuv tau saib xyuas tag nrho peb tsev neeg tej teeb meem li cas los tau ntau lub xyoo dhau los no lawm. Tom qab hnov kuv piav lawm, ces tus kws kho mob ntawd txawm hais rau kuv tus txiv tias, “Nws tsis puas hlwb, peb yuav tsis txais nws. Yog koj pheej hais tias yuav tso nws nyob rau ntawm no no, ces peb yuav tsis thaj tsob nws txoj kev nyab xeeb.” Kuv tus txiv pheej hais kom tus kws kho mob ntawd coj kuv mus. Kuv thiaj li hais, “Yog koj pheej hais kom muab kuv kaw li no, ces kuv yuav tua kom kuv tuag rau ntawm no.” Ntshai tsam nws tau thaj tsob ces tus kws kho mob ntawd thiaj li tsis muaj cuab kav txais kuv nyob. Ua tsis tau li cas lawm, ces kuv tus txiv thiaj li coj kuv rov los tsev.

Thaum ntawd kuv thiaj li pom tseeb los ntawm qhov tshwm sim ntawd los tias kuv tus txiv hais tias yuav ua txhua yam rau kuv, tab sis qhov ntawd yog cuav xwb. Nws tiv thaiv nws tus kheej tej kev ntshaw xwb, ua rau kuv mob siab thiab ua rau kuv txaj muag zaum tas zaum thiab. Nws haj tseem xav muab kuv xa mus nkag tsev kho neeg puas hlwb thiab. Nws mas muaj peev xwm ua txhua yam los txwv kuv kom kuv txhob ntseeg. Nws nrog Tsoom Fwv tawm tsam Vajtswv, uas ua pov thawj qhia tias nws kuj nyiam qhov phem, qhuas lub hwj chim, thiab ntxub qhov tseeb thiab. Vajtswv cov lus hais tias, “Cov ntseeg thiab cov tsis ntseeg ces tsis sib haum; tsis li ntawd xwb, lawv tseem sib tawm tsam ib leeg rau ib leeg thiab” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke). Wb nyias muaj nyiam txoj kev lawm. Kuv thiaj li tag kev cia siab nrho rau nws thiab tsis sib nrauj tsuas yog vim wb tus me nyuam xwb. Tom qab mus tim tsev kho neeg puas hlwb los txog tsev lawm, ces nws yeej nrog kuv sib cav los sis cem kuv, thiab pheej hais kom kuv tso kuv txoj kev ntseeg tseg tas li. Tshwj xeeb mas yog thaum Aus Lees Piv los yuav txog, kuv tus txheeb ze hais tias tsoom fwv mas tsi ntsees ntes cov ntseeg Vajtswv Tus Uas Muaj Hwj Chim Loj Kawg Nkaus xwb, lawv raug rau txim hnyav heev, thiab tsis muaj leej twg yuav xuas nyiaj tso tau lawv tawm li. Kuv tus txiv pheej saib kuv ntxiv thiab raws kuv tis tis lawm. Nws muab kuv kaw rau hauv tsev tau 11 hnub nkaus. Nyob rau hauv tsev kuv tsis muaj kev xyaum ua raws kuv txoj kev ntseeg li—kuv yuav tsum tau tawm mus xyaum ua raws kuv txoj kev ntseeg thiab ua ib teg dej num. Tab sis kuv yeej ua tsis tau ib siab ncaim kuv tus ntxhais mus li. Yog tias kuv ncaim mus, ces nws yuav nyuaj heev rau kuv tus ntxhais! Yog tias kuv tsis nyob ntawm nws ib sab ces tsis muaj leej twg saib xyuas nws lawm, nyob tsam nws xyaum ua tej yam tsis zoo ne? Kuv tauv tsis tau kuv cov kua muag thaum kuv xav txog qhov ntawd. Cuag nkaus li kuv mus txog rau qhov nyuaj siab tiag tiag lawm, ces kuv thiaj li xav txog ib zaj lus ntawm Vajtswv cov lus. “Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. Koj yuav tsum tsis txhob muab qhov tseeb cuam pov tseg es tsuav kom tau lub neej thaj yeeb lug nrog tsev neeg xwb, thiab koj yuav tsum tsis txhob poob koj lub meej mom thiab txoj kev ncaj ncees rau tej qho kev zoo siab ib nyuag pliag xwb. Koj yuav tsum nrhiav tag nrho tej uas zoo nkauj thiab zoo, thiab koj yuav tsum nrhiav ib txoj kev hauv lub neej uas muaj qab hau dua. Yog koj ua lub neej qias vuab tsuab, thiab tsis nrhiav ib qho hom phiaj li, tsis yog koj nkim koj lub neej los? Koj yuav tau dab tsi los ntawm ib lub neej zoo li ntawd? Koj yuav tsum muab tag nrho tej kev kaj siab ntawm cev nqaij daim tawv tso pov tseg es kom tau ib qho tseeb, thiab yuav tsum tsis txhob muab tag nrho qhov tseeb cuam pov tseg es kom tau ib qho kev kaj siab me me nkaus xwb. Cov neeg zoo li no ces yeej tsis muaj kev ncaj ncees thiab lub meej mom li; qhov uas muaj lawv nyob ntawd ces tsis muaj nuj nqis dab tsi li!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Tom qab nyeem Vajtswv cov lus lawm, ces kuv thiaj li rov xav txog ntau lub xyoo ntawm kuv txoj kev ntseeg. Ntxwgnyoog yeej ib txwm siv kuv cov txheeb ze los caij tsuj thiab tab kaum kuv, los ua kom kuv tawm mus thiab ntxeev siab rau Vajtswv. Kuv nrog kuv tsev neeg nyob, tab sis kuv tsis zoo siab thiab kuv tus txiv yuav tsis pub kuv nyeem Vajtswv cov lus los sis qhia txoj moo zoo thiab ua kuv tes dej num. Qhov ua neej li ntawd mas mob siab heev. Vajtswv npaj kom kuv los yug nyob rau tiam kawg thiab lees txais Nws txoj moo zoo kom kuv thiaj li yuav nrhiav tau qhov tseeb, tau txais Vajtswv txoj kev cawm dim, thiab ua kuv tes dej num li yog ib tug uas raug tsim tawm los. Qhov ntawd yog qhov uas kuv yuav tsum tau caum. Kuv thiaj li xav txog Vajtswv cov lus tias: “Tib neeg txoj hmoo ces yog Vajtswv ob txhais tes tswj. Koj tsis muaj peev xwm yuav tswj tau koj tus kheej: Txawm hais tias tib neeg mas yeej tsuas maj nroos thiab ua ub ua no rau lawv tus kheej tag mus li xwb, los lawv yeej tsis muaj peev xwm yuav tswj tau lawv tus kheej li. Yog koj muaj cuab kav paub tau koj tus kheej tej yam uas yuav tshwm sim tom ntej, yog koj muaj cuab kav tswj tau koj tus kheej txoj hmoo, es ua koj puas tseem yuav yog ib tug uas raug tsim tawm mas?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Rov Tsim Kho Tib Neeg lub Neej Raws Li Ib Txwm Muaj thiab Coj Lawv mus rau ib Txoj Hau Kev Kawg Uas Zoo Kawg Nkaus). Nws muaj tseeb. Rau txhua tus neeg uas los rau hauv lub ntiaj teb no, Vajtswv twb txiav txim siab los ntev lawm tias peb yuav taug txoj kev twg thiab peb yuav raug kev txom nyem npaum li cas. Ib tug pab tsis tau ib tug li. Kuv yug tau kuv tus ntxhais, tab sis nws txoj sia yog nyob rau hauv Vajtswv ob txhais tes. Vajtswv yeej txiav txim siab los ntev lawm tias nws yuav raug kev txom nyem npaum li cas thiab nws yuav raug foom koob hmoov rau npaum li cas lawm. Txawm tias kuv nyob ntawm nws ib sab los xij, kuv yuav ris tsis tau nws ib txoj kev txom nyem twg rau nws li. Kuv haj tseem twb tswj tsis tau kuv tus kheej txoj hmoo, yog li kuv yuav tswj nws txoj hmoo tau li cas? Kuv yuav tsum tau cia li tso kuv tus ntxhais rau Vajtswv thiab zwm rau Nws txoj cai xwb. Ces muaj ib hnub, thaum kuv tus txiv tsaug zog lawm kuv thiaj li nyiag khiav tawm hauv tsev mus lawm.

Ua rau kuv ceeb tag li, tsuas yog tom qab kuv tawm hauv tsev mus tau ob lub lim tiam xwb, ces muaj ib tug thawj coj hais rau kuv tias kuv tus txiv niaj hnub tsim teeb meem rau tej nus thiab tej viv ncau thiab hais tias yog kuv tsis rov qab mus, ces nws yuav muab lawv qhia tawm mus rau tub ceev xwm. Kuv yuav tsum tau rov qab mus tsev kom lawv thiaj li tsis raug teeb meem. Lub sij hawm ntawd, kuv tus txiv txawm zov kuv zoo tshaj qub. Nws muab kuv kaw rau sab hauv thiab nyob nrug kuv li ob peb fiv xwb. Nws muab lub qhov rooj xauv sab nraud thiab muab tus yawm sij zais lawm thiab. Nws yuav raws kuv qab thiab zov kuv, txawm yog thaum kuv ua noj los sis siv chav dej los xij li. Nws nta This Vis cia, thaum sawv ntxov mus txog thaum tsaus ntuj, thiab niaj hnub yuam kom kuv nrog nws saib xov xwm thiab cov yeeb yaj kiab hlub teb chaws, thiab nws hais tias nws xav muab kuv ntxuav hlwb. Kuv tus txiv hais tias kuv tus txheeb ze qhia rau nws kom txhob muab ib lub hwv tsam rau kuv thov Vajtswv los sis nyeem Vajtswv cov lus li. Nws yuav tsum muab qhov nyob hauv This Vis rau kev saib Kom kuv tsis muaj hwv tsam los xav txog txoj kev ntseeg li, ces qhov ntawd thiaj li yog qhov ua kom kuv tso txoj kev ntseeg tseg. Nws kuj qhia rau kuv thiab tias nws yuav tsis pub kuv muaj kev kaj siab li, vim lub sij hawm kuv thov Vajtswv ntawd, ces kuv tus Vajtswv yuav muab ib txoj kev rau kuv tawm, ces kuv yuav mus koom tej kev sib txoos ua ke thiab tshaj tawm txoj moo zoo dua. Kuv thiaj li hais rau nws yam npau taws npleev tias, “Kuv muaj kev ywj pheej ntawm sab kev ntseeg. Vim li cas koj thiaj li ua raws li Tsoom Fwv, caij tsuj kuv thiab txwv kuv tus kheej txoj kev ywj pheej? Koj twb xyiv fab heev rau Vajtswv txoj hmoov hlub los ntawm kuv txoj kev ntseeg, thiab koj twb pom tej Vajtswv ua lawm. Tam sim no koj ho tav kuv kev thiab caij tsuj kuv. Qhov ntawd tsis yog tsuas caij tsuj kuv xwb tab sis nws yog tawm tsam Vajtswv thiab!” Kuv ceeb tag li thaum nws nthe tuaj tias, “Kuv tab tom tawm tsam Vajtswv, yog li kom Nws los rau txim rau kuv nawb!” Kuv ceeb tag li thaum hnov nws hais li ntawd. Nws hais li ntawd tau li cas? Nws tsis muaj laj thawj hlo li. Ces yog li, nws thiaj li muab kuv kaw tau thaj tsam li ib lub lim tiam ntxiv, yeej tawm tsis tau hauv tsev mus li. Kuv nyeem tsis tau Vajtswv cov lus, mus koom tsis tau tej kev sib txoos ua ke, los sis ua tsis tau kuv tes dej num li. Kuv ua lub neej nyuaj siab ntsuav—kuv tsis qab los noj mov thiab pw tsis tsaug zog li. Lub sij hawm ntawd mas kuv mob siab heev, ces kuv thiaj li xav tias txhua tus nyias ua nyias tes dej num tab sis kuv tus txiv muab kuv kaw rau hauv tsev thiab haj tseem thov tsis tau Vajtswv li thiab. Yog tias pheej zoo li ntawd, ces tsis yog kuv yuav nrug deb ntawm Vajtswv zuj zus mus xwb lod? Kuv cov neeg hauv tsev puav leej tuaj kuv tus txiv tog, caij tsuj kuv, ces kuv yuav uv tsis tau qhov ntawd ntxiv lawm. Kuv yim xav txog qhov ntawd ces kuv yim chim, thiab kuv haj yam hnov twm zeej thiab tsis muaj kev cia siab li.

Muaj ib hmo thaum kuv tus txiv tsaug zog lawm, ces kuv txawm thov Vajtswv twj ywm. Thov tias, “Vajtswv, kuv tus txiv muab kuv kaw rau hauv tsev thiab kuv nyeem tsis tau Koj cov lus li. Kuv qaug zog heev li lawm. Au Vajtswv, kuv lub siab mas me heev lawm, thov muab txoj kev ntseeg thiab lub zog rau kuv lau.” Tom qab thov lawm, kuv thiaj li xav txog ib zaj ntawm Nws cov lus. “Cov neeg uas Vajtswv hais txog tias yog ‘cov neeg muaj yeej’ yog cov neeg uas tseem muaj peev xwm ua tim khawv thiab tswj lawv txoj kev ruaj siab tau li qhov qub thiab muab kev fij ncaj ncees rau Vajtswv thaum nyob rau hauv Ntxwgnyoog txoj kev haub ntxias thiab thaum raug Ntxwgnyoog cuam tshuam, lawv nrhiav pom lawv tus kheej tias nyob rau hauv txoj kev tsaus ntuj. Yog koj tseem muaj peev xwm ua tau lub siab dawb huv rau ntawm Vajtswv xub ntiag thiab tuav tau koj txoj kev hlub tiag rau Vajtswv li qhov qub, txawm yuav muaj dab tsi los xij, koj yeej tseem ua tim khawv rau ntawm Vajtswv xub ntiag, thiab qho no yog yam uas Vajtswv hais txog kev ua ‘tib tug neeg muaj yeej’” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Tuav Koj Txoj Kev Mob Siab rau Vajtswv). Vajtswv cov lus qhia rau kuv tias nyob rau tiam kawg Nws xav tsim kom tiav ib pawg kov yeej, thiab nyob rau hauv Ntxwgnyoog tej kev tawm tsam thiab txoj kev tsim txom ntawd, kom lawv thiaj li tsis swb rau txoj kev caij tsuj ntawm lub zog phem, tab sis yuav tuav tau lawv txoj kev ntseeg thiab txoj kev mob siab rau Vajtswv. Kuv thiaj li tsis nyuaj siab thaum kuv to taub Vajtswv tej kev xav lawm. Kuv thiaj li npaj txhij los zwm thiab kawm kom paub lawm. Txawm tias kuv tus txiv thaiv thiab caij tsuj kuv li cas los xij, kuv yuav sawv khov kho thiab ua kom Vajtswv txaus siab. Tom qab ntawd, thaum kuv tus txiv tsaug zog lawm, ces kuv yuav xav txog Vajtswv cov lus, thov Vajtswv los sis hu nkauj qhuas Vajtswv twj ywm rau kuv tus kheej, thiab qhov ntawd ua rau kuv muaj qee qhov kev xyiv fab. Nyob rau hnub kaum cuaj ntawm kuv txoj kev raug ntes rau hauv tsev, ces kuv tus txiv yuav mob taub hau, mob plab, mob nraub qaum thaum nws nrog kuv sib cav. Nws yim npau taws ces qhov ntawd yim mob, txog rau qhov nws quaj heev li lawm. Nws tsis muaj cuab kav nrog kuv sib cav ntxiv li lawm. Ces nws tag tswv yim lawm, nws thiaj li hais tias, “Kuv uv tsis tau li lawm! Kuv twb muab koj kaw los tau ntev npaum no lawm, tab sis koj haj yam muaj zog zuj zus tuaj xwb. Kuv ho yog tus vwm lawm.” Hnub tom qab ntawd, nws muab kuv kaw rau hauv tsev ces nws mus ua hauj lwm lawm. Kuv ho cia li mus nrhiav tau tus yawm sij thiab ua tsaug ntau ntau rau Vajtswv tias thaum kawg kuv tau mus koom tej kev sib txoos ua ke lawm. Qhov ntawd yeej yog Vajtswv qhib kev tiag tiag li.

Tom qab ntawd ces kuv tus txiv tsis saib kuv nruj lawm. Lub sij hawm uas nws nyaum heev ntawd mas, nws muaj mob thiab nws lub caj pas ua rau mob nws heev. Muaj ib hnub nyob rau lub Peb Hlis xyoo 2012 ntawd, nws hais rau kuv tias, “Txhua lub xyoo los no kuv xav kom koj xaiv peb tsev neeg thiab koj txoj kev ntseeg. Koj tsis tau tso koj txoj kev ntseeg tseg li. Cia wb muab qhov no xaus rau hnub no. Muaj ob txoj kev nyob rau ntawm koj xub ntiag. Yog tias koj nyob rau hauv lub tsev no, ces koj raws tsis tau Vajtswv qab, thiab yog tias koj raws Vajtswv qab, ces koj rov qab los tsis tau rau hauv lub tsev no lawm.” Kuv thiaj li hais khov kho rau nws tias, “Kuv twb xaiv txoj kev raws Vajtswv qab lawm, yog li kuv yeej yuav tsis tig ntawm qhov ntawd rov qab los li lawm.” Ces kuv txawm ntim kuv lub hnab thiab tawm hauv tsev mus lawm. Kuv ua Vajtswv Tus Uas Muaj Hwj Chim Loj Kawg Nkaus tsaug!