თავი 75

ყველაფერი შესრულდება ჩემი სიტყვების წარმოთქმისთანავე, უმცირესი შეცდომის გარეშე. ამიერიდან ყველა დაფარული საიდუმლოება აღარ იქნება დაბინდული ან დამალული და გაგიმჟღავნდებათ — ჩემო საყვარელო ძეებო. ჩემში დაგანახვებ კიდევ უფრო დიდ ნიშნებსა და სასწაულებს და კიდევ უფრო დიდ საიდუმლოებებს. ეს ყველაფერი უეჭველად გაგაოცებთ, უკეთ შეგაცნობინებთ ჩემს თავს, როგორც ყოვლისშემძლე ღმერთს და საშუალებას მოგცემთ, ამაში ჩემი სიბრძნე დააფასოთ. დღეს თქვენ პირისპირ დგახართ ერთადერთი ჭეშმარიტი ღმერთის წინაშე, რომელიც ადამიანებს სამყაროს შექმნიდან მოყოლებული არასოდეს უნახავთ, და ჩემში განსაკუთრებული არაფერია. მე თქვენთან ერთად ვჭამ, ვცხოვრობ, ვლაპარაკობ, ვიცინი და ყოველთვის თქვენში ვცხოვრობ, ამავე დროს კი თქვენ შორისაც ვმოძრაობ. მათთვის, ვისაც არ სწამს, ან ვისაც საკუთარი მძიმე წარმოდგენები აქვს, ეს დამაბრკოლებელი ფაქტორია. ეს არის ჩემი სიბრძნე. ასევე ზოგიერთ ადამიანს გავუმჟღავნებ ისეთ რამეებს, რაც ჩემმა ნორმალურმა ადამიანობამ არ იცის, მაგრამ ეს არ ნიშნავს, რომ მე თვით ღმერთი არ ვარ. პირიქით, ეს გარემოება საკმარისია იმის დასამტკიცებლად, რომ მე ყოვლისშემძლე ღმერთი ვარ. მათთვის, ვისაც სწამს, ამ გარემოებას გადამწყვეტი მნიშვნელობა აქვს, და სწორედ ამის გამო არიან ჩემში ასი პროცენტით დარწმუნებულნი. ზედმეტად ნუ აღელდებით; მე ყველაფერს სათითაოდ გაგიმჟღავნებთ.

თქვენთვის მე ღია ვარ და არა დაფარული. თუმცა არამორწმუნეებისთვის — მათთვის, ვინც ვერაგია, ვინც გარკვეულ დონემდე გახრწნილია სატანის მიერ — კვლავაც დაფარული დავრჩები. თუმცა, როდესაც ადრე ვლაპარაკობდი უთვალავი ხალხისთვის ჩემი თავის გამჟღავნებაზე, ვგულისხმობდი ჩემს სამართლიანობას, განკითხვასა და დიდებულებას, რათა მათ იმით, რასაც საბოლოოდ მიიღებენ, იცოდნენ, რომ მე ვმართავ სამყაროსა და ყოველივეს. გაბედულად იმოქმედეთ! უბრალოდ თავები მაღლა გეჭიროთ! ნუ შეგეშინდებათ: მე — თქვენი მამა — აქ ვარ, რათა მხარში დაგიდგეთ და თქვენ არ დაიტანჯებით. სანამ ხშირად ლოცულობთ და მევედრებით ჩემ წინაშე, მე მთელ რწმენას გიბოძებთ. ხელისუფლებაში მყოფნი გარეგნულად შეიძლება სასტიკებად ჩანდნენ, მაგრამ ნუ შეგეშინდებათ, რადგან ეს იმის გამოა, რომ თქვენ მცირე რწმენა გაქვთ. სანამ თქვენი რწმენა იზრდება, თქვენთვის ყველაფერი ადვილი იქნება. იხარეთ და იხტუნეთ გულის წადილისამებრ! ყველაფერი თქვენ ფეხქვეშაა და ჩემ ხელთაა. განა აღსრულება ან განადგურება ჩემი ერთი სიტყვით არ წყდება?

ისინი, ვისაც ახლა ვიყენებ, თითოეული დიდი ხნის წინ ჩემ მიერ ცალ-ცალკე იყო დამტკიცებული. ანუ პირმშო ძეთა ჯგუფში მყოფი ადამიანები უკვე განსაზღვრულნი არიან — განსაზღვრულნი იმ დროიდან მოყოლებული, როცა სამყარო შევქმენი. ამის შეცვლა არავის შეუძლია და ყველაფერი ჩემს ბრძანებას უნდა დაემორჩილოს. ვერცერთი ადამიანი ამას ვერ გააკეთებს; ეს ყველაფერი ჩემი მოწყობებია. ჩემთან ყველაფერი მტკიცე და უსაფრთხო იქნება; ჩემთან ყველაფერი შესაფერისად და სათანადოდ გაკეთდება, უმცირესი ძალისხმევის დახარჯვის გარეშე. მე ვლაპარაკობ და ეს მყარდება; მე ვლაპარაკობ და ეს სრულდება. საერთაშორისო არასტაბილურობის პირობებში რატომ არ ჩქარობთ თქვენი წვრთნის დაწყებას? როდემდე დაელოდებით? იმ დღეს ხომ არ ელოდებით, როცა უცხოელები ჩინეთს მოაწყდებიან თქვენთან შესახვედრად? შეიძლება ადრე ცოტათი აყოვნებდით, მაგრამ საკუთარი თავის განებივრებას ვეღარ გააგრძელებთ! ჩემო ძეებო! გაითვალისწინეთ ჩემი ზედმიწევნით ნაფიქრი განზრახვები! ისინი, ვინც ხშირად მომეახლებიან, ყველაფერს მოიპოვებენ. ნუთუ არ მენდობით?

ჩემი საქმის ტემპი ელვის გაელვებას ჰგავს, მაგრამ ნამდვილად არა ქუხილის გრგვინვას. გესმით ამ სიტყვების ჭეშმარიტი მნიშვნელობა? თქვენ უნდა შეძლოთ ჩემთან უკეთ თანამშრომლობა და ჩემი განზრახვების გათვალისწინება. თქვენ გსურთ კურთხევების მიღება, მაგრამ ტანჯვისაც გეშინიათ; განა ეს თქვენს ორჭოფობაზე არ მეტყველებს? ნება მომეცი, გითხრა! თუ დღეს ადამიანს კურთხევების მიღება სურს, მაგრამ ამისთვის ყველა მსხვერპლს არ გაიღებს, მაშინ ყველაფერი, რასაც მიიღებს, სასჯელი და ჩემი განკითხვა იქნება. თუმცა ისინი, ვინც ყველა მსხვერპლს გაიღებენ, ყოველივეში მშვიდობას განიცდიან და ყველაფერი უხვად ექნებათ; ეს ყველაფერი ჩემი კურთხევები იქნება. დღეს გადაუდებლად საჭიროა, რომ გქონდეთ რწმენა და საზღაური გადაიხადოთ. არასწორად ნუ გაიგებთ ჩემს განზრახვებს. ყველაფერი შესრულდება და თქვენ ამას საკუთარი თვალით იხილავთ და პირადად განიცდით. ჩემთან ერთი ცრუ სიტყვაც და ერთი ტყუილიც კი არ არსებობს; ყველაფერი, რასაც ვამბობ, სრულიად ჭეშმარიტია, მაგრამ სიბრძნეს მოკლებული არ არის. ნახევრად ნუ ირწმუნებთ და ნახევრად ნუ დაეჭვდებით. მე ვარ ის, ვინც თქვენ შორის ყველაფერს აღასრულებს, და ასევე მე ვარ ის, ვინც განსჯის და პასუხს აგებინებს მათ, ვინც ბოროტებას სჩადის. მე მიყვარხართ და სრულგყოფთ. მათთვის კი მე სრულიად საპირისპირო ვარ: სიძულვილი და განადგურება — ყოველგვარი დათმობისა და კვალის დატოვების გარეშე. ჩემი სიუხვე არის ყველაფერში, რასაც ვამბობ და ვაკეთებ. სათითაოდ გამოიკვლიეთ ეს? ზოგი სიტყვა ბევრჯერ მითქვამს, მაშ, რატომ ვერ სწვდებით მათში ჩადებულ ჩემს აზრს? მას შემდეგ, რაც ჩემს სიტყვებს წაიკითხავთ, ყველაფერი ისე იქნება, როგორც უნდა იყოს? მერე ყველაფერი შესრულდება? თქვენ არანაირი განზრახვა არ გაქვთ, გაითვალისწინოთ ჩემი გული. რატომ ვამბობ, რომ მე ვარ სრული ხელმწიფების მქონე, ყოვლადბრძენი, ერთადერთი ჭეშმარიტი ღმერთი, რომელიც ადამიანთა გულის სიღრმეებს ხედავს? ნუთუ ჯერ კიდევ ვერ ხვდებით ამ სიტყვების მნიშვნელობას? დაიმახსოვრე ყოველი სიტყვა, რომელსაც გამოვყოფდი? ნამდვილად იქცა ისინი იმ პრინციპებად, რომლებითაც მოქმედებ?

მე ყოველივეზე მაღლა ვდგავარ და მთელ სამყაროს ვაკვირდები. ჩემს დიდ ძალასა და სრულ სიბრძნეს წარმოვაჩენ უთვალავი ერისა და ხალხის წინაშე. ახლა მხოლოდ სიამოვნებისკენ ნუ ისწრაფვით. როცა მსოფლიოს ყველა ერი გაერთიანდება, რა აღარ იქნება თქვენი? თუმცა ახლა არაფერს მოგაკლებთ, არც იმას დავუშვებ, რომ იტანჯოთ. ირწმუნეთ, რომ მე ყოვლისშემძლე ღმერთი ვარ! ყველაფერი აღსრულდება და სულ უფრო და უფრო უკეთესი გახდება! ჩემო პირმშო ძეებო! ყველა კურთხევა თქვენზე მოვა! თქვენ ამ კურთხევებით უსასრულოდ და ამოუწურავად, მდიდრულად და უხვად, სრულად და მთლიანად დატკბებით!