Khristo Ahokpet Pen si Kangsai Asai Klemlo

Kijut arni nanglepo dokdok ahut asai lake monit atum aphan keme-kaheno kethak aporlo, lapen Arnam kisiktang ason kiripji aporlo, kopima apor lapen arni nang tebok tanglo lapen Arnam a’arni nangle tanglo. Arnam arat along kedo dunlong atum aphan – Alangliphan ha kijut arni anta kekroithip atum aphan anke – Arnam Amethang akai along chevanthulo. Bonta, Arnam Amethang akai arni nanglele aphrang, Arnam asai ke monit atum keklem asai kelangchari kali, mate monit achethe aphan kelangchari asai kali, bonta monit lam karjuje ajok kangsaiji aphan, kopima, Alangli Recho anghoi angno kevang atum aphan anke Arnam pen pangthir ponpo. Arnam anghoi athengno kevang atum anke pini arni anta Alangli kengkam suding kidun atumlo, laso ajok si, anuttin amonit atum ta Arnam asai angdeng kirip along kedeng atum anke Arnam kapangthirji asai keklemji ajaton planglo. Ehin pen pudam lote, Arnam asai keklem angdeng kirip ahut Alangliphan kedeng atum anke Arnam akangsaiji ajaton plangpo.

Arnam ahem along kangsaicheng ahut kaningje alam, “kangsai” pu alamthe lake kijut arni ahut Alangli inghoi angno kevang atum aphan kangsai henlo. Ajahak amonit atum kekroidam ke, mo kijut arni nangle lote, ha sining angsong kechopi adim sikpo, lapen pe akelokkling lim si, laso ahut, Arnam amena anghoi athak chingni si suri suri amonit atum Alangli ingno kengphu patongruipo, anuttin amonit apap alang paklangdakpo lapen komat si sining arludun longji lapen komat aphan si meherang along kevarji Alangli ingsaipo pu kamatha atum dopik. Monit atum ajat le matha pu setame, Arnam sai keklem ason anke ingdi un’e. Monit atum kamatha lake ajat ta kali bonta aning kepaklimthap puchot; lahei ke monit atarlok pen kevang alamlo, lapen lake alang karjulong lapen ketheklong an apot pangrumpet pen si planglo. Lasi Ne ke pudetji, jonghe le kamatha pangchothek seta, lahei ke kihi arjan alir atenglo, lapen Arnam asai keklem amo along thangnat ta amo vangvedetji. Kopima, monit aphan ke Sobar chongthui’etlo, lasi koson si Arnam aning kamatha alam chini dunpo? Monit atum kekroidam ke Arnam kangsai asai keklem ke ahir ingtangpik lapen manghumemeji pusi monit ke tinlo. Kangsai asai ke Arnam si klemji apot, ahir ingtangpik pensi laso asai pachunji, lapen monit atum matha un’epin an, lapen arki sining anta umphlup si pirthe aphan hijuktutji; kali pulote, koson si Arnam akangsai pu keman thekpo? Pusi monit atum kekroi. Latum kekroi lake, lake kangsai asai pinak apotsi, Arnam ke ahir-asang lapen aman kethepik pensi sai klemji, lapen kangsai kepho atum anke mekkri-meklang pen kehang charbu si kengphu patongrui pen nang ingjinsotha pusi kachoningri hangjoji. Lason emek renglor pen ketheklong lake ardi dojotji, lapen ening nang parungphomji…. Kadokave atum kamatha ke Arnam kangsai asai keklem lake kamanghumeme asai pensi plengsetji. Bonta, Arnam monit angbong kangsai asai kecheng ajir dingpik anlo, bonta nang ke kelakpik mek kejangjoi akerengme si dolo pu nang chechini loma? Tangte Arnam ke kangsai asai pangcheng pamelo pu nang kachinidun ahut anke, Arnam ke pirthe kimi pinchong’etpo kali ma? Halaso ahut ke, nang ke chethe kopi ason ma ansi chini chotpo tahailo, bonta, Arnam ke nangphan nang ingjinsosepin pen si nang phuthak kangsai vanpo, lapen nang ke nang mek kejang karsik angbong pen si, meherang jangdamlutpo. Halaso ahut anlote Arnam sai keklem amo pajut’etlo pu nang chinipinpo.

Lasi apor phangnotap nangnelo, lapen lahei hijimmeme lapen langseletmeme alam aphuthak chethan nangnelo. Laso alar kangsai kopi asonlo lale itum chethan lonang. “Kangsai” pu alamthe kopi loma pulote, lake Jehovah alongtin adim along kaningje alamthe lapen Pharisi atum aphan Jisu kangchek’i alamthe pusi nang mathaji. La an akaheno angbong seta, lahei alamthe ke monit aphuthak Arnam kangsai kevan alamthe kali; bonta lake kaprek kaprek atovar pen lapen kaprek kaprek ason pen Arnam kaningjedam alam. Lahei alam ke Khristo le ha kijut apor ahut monit aphan kangsai ahut kaningje alam lapu kali. Kijut arni aKhristo ahok alamm ake’ongpi pangrum si monit aphan than paklarji, monit aot-adur kepaklangji, lapen monit alamm lapen asai kethakji. Lahei alammthe lake ahok alammthe prekjam prekjam do, bisar alamm monit keklem nangji asai, monit atum koson pensi Arnam ahukum kekroi nangji ma, koson si monit atum Arnam aphan kekroithipjima, kosonsi monit apun-achak ateng lapen kosonji Arnam agian lapen aot-adur ateng kereng thekjima pu henlo lapen do’olang. Lahei alammthe ke monit aot-adur lapen kachongthui aning-angthin aphan si jonglo. Laso angbong pen, monit aot kapeklang lake koson si Arnam aphan monit kedengmo ma lapen koson si monit ke Sobar a’arje si kacheparjanma alamm si ningjelo. Arnam kangsai asai kedeng ahut, ethe-theni alamm pen chot si monit aot-adur alamm Alangli jongchotche; bonta ajir kiding an apharman Alangli monit aphan adai an paklangdak si, keklem nangji an klem si, ingchei pameji. Lahei akapachetak, keklem asai, lapen kangpoi asai ke lammthe champlang pen lar un’e, bonta ahok pen si unji bonta lake monit along kedo jumpik chenamlo. Lason keklem aron aphan si kangsai pulo; lapen lason aron pen ingsaidet ansi monit atum ingsamchetpo lapen Arnam aphan kachehodaiji aning hangpo, lapen Arnam along pen ahokpet agian longpo. Kangsai asai pen kopi si plangloma pulote monit atum Arnam koson ma ahokpet pen kachini ajakong dolo lapen monit atum amena keklem kechokche apot chechinilo. Kangsai asai keklem pen ajok monit atum Arnam aning kehang ason kopima, Arnam sai keklem kopi aphan ma, lapen Alangliphan kachini un’epin lapen kamanghumeme ason an chini longlo. Laso pen ajok monit aphan ta amena kamatha kaheno lapen kachobei apot chechinilo, lapen monit aning arlo koan ter ma chechinilo. Lahei kachechini ke kangsai asai kepho ajoklo, kopima laso asai keklem athe lake Arnam aphan kekroi atum an aphan Alangli anatthu pen kevang ahok, tovar lapen chethe alamm kachiniji aphanlo. Laso asai ke Arnam pen keklempon kangsai asailo. Laso ahok alamm nang jongsi kenangsot alamm pu tin ingtungte pulote, nang jongsi kachepaheloji aphan pen anpar akaprek ta mathathedet lote, lapen laso alamm aphan patip ponpepin pen atovar kimi nang chiri lote, nang ke inut pappi aketheneilo pusi Ne nangpu detji. Nang Arnam aphan chikiklong abanglo, bonta ahok atovar lapen Arnam aning kehang ason kopima nang jongsi rire pulote, lapen Arnam pen kachetebokhet atovar aphan jongsi nang inghon thekthe pulote, nang ke inut kangsai pen kachepajok bor’i abanglo pusi Ne nangphan nangpudetji, lapen nang ke inut kelokbong recho anghoi pen nang kekatjui kachongthuithek lapen amo kevangve abang pusi nangpudetji. Alangli mek angden pen nang kekat bor’i atum aphan Arnam langdingdedetji. Lason amonit atum ke ansose ahir kangtangrak ado kephoji atumlo. Arnam angno vang pen kangsai kephotang, lapen kapangthirtang amonit atum anke, jut un’epin akai an Arnam kapangri adet along dodun longji. Kalang, lake non kevangji arni keplangji alammlo.

Kangsai asai keklem lake Arnam asai binonglo, lasi lake Arnam Amethang amat si keklempon nangji asailo; lapen Alangli lar monit keklempi me asai kali. Kopima, kangsai lake monit akhei aphan ahok pen keparem asailo, lapen Arnam monit ason nang cheparjan si monit angbong nang cheklang pen laso asai keklemji pu alam amat si avelo. La kopima pulote, mo kijut arni anke, Khristo pirthe adang amonit atum aphan ahok alam pensi pachethangji lapen ahok alam an latum aphan pachiniji. Lake Arnam pen keklem kangsai asai lo. Ajahak amonit atum ke Arnam puthot phongni aphong monit ason nang kacheparjanthuji aphan aning’oilo, kopima Arnam ke monit aok ason nang cheparjan si kangsai asai klemji pu kroimolo. Bonseta, Ne nangphan nang kethanji lake Arnam asai keklem lake monit kamatha angkang pen helopik chenamlang, lapen monit aning arlo pen kedengji aphan sungpik khangjanglo. Pima monit atum ke pirthe athak along ingki ason benlo, lapen Arnam lake Inut kethenei lapen pirthe sining paplengset Abang asonlo; monit aning arlo ke ingki kapangreng alang nemthu alangteng asonlo, lapen Arnam aning kamatha pen sai keklem amo anke Arnam agian athe kelong asonlo. Monit atum ke kaiketa Arnam pen kapachingbarji bor’ilo, seta komat si mo kijut ahut keremjima ke kachini tanglo. Ser pen anpar nangtum anam somu pu nangtum chemathari pusi Ne nangtum aphan nangpuji. Kaprek atum jongsi Arnam akangsai aphan deng’un pulote, kopi apot si nang deng un’e detlo? Halatum pen ko’an akangtui adim si nang karjaplo? Kaprek atum jongsi ahok angno aphu ingkupdi’un pulote, nang kopi apot si un’e detlo? Arnam sai keklem ahir ke kekhang’un abang ave. Nang “kachipi” ajoine pen kangsai asai puthot klemthuthelo, lapen laso a varsai keme nanglong pen litplot pulote nang ning kache’oi pensi plengsetji. Nang jongsi Ne lam arju dorde pulote, hala sining angsong arecho anghoi kelok aphan nang phuthak nang kangsaiji le chonghongdingnon! Israel aso atum an Jisu aphan dengmolo lapen chekrongkrelo, bonta Jisu pirthe monit akhei aphan kejok kevan alam lake pirthe adang ta chethangphluplo. Tangte la hako pen Arnam kaselam ahokpet arjanlo kalima? Nang jongsi Jisu aphan sining nang keponji aphan chonghongbomlang pulote, nang ke aning kangtang’oi kithitang athenglong achet^[a] asonlo. Lason kekroi kachekrongchot, lapen ahok aphan kroimo si hirjume aphan kachohangchot amonit aphan ke Jisu nang dengdedetji. Lason thakthak si, nangphan meherang along nangvarchui si ningkan suri suri an me nang kepachoji aphan ta nang ingjinsosedetji.

Tangte, non ke kangsai kopilo lapen ahok pu kopilo nang chiniloma? Nang jongsi chinilo pulote, nang phuthak nang kapangsai longji le chehodai peme non pusi Ne nang choningrilo, kali pulote Arnam nangphan nang kirung pangtuiji avarsai nang longledetji lapen Alangli kapangri arat along nang ponpedetji. Kapangsai longji aphan denglo bonta alangtum aphuthak kapangthir asai klem longledet pu atum ke, alangtum aphuthak ingsaibom ahut kekat atumlo, lapen latum aphan ke jut un’epin an Arnam langselet si dengdedetji. Latum ke Pharisi atum anpar apap ongmu lapen ahir ingtangmulo, kopima latum Arnam aphan chobeilo lapen abe kithur atumlo. Sai keklemji aphan anta a’ot kave amonit atum ke ado kepho ahir tanpikji, lapen jutjepin akai an si ado ta phoji. Alam pen kekroi kachepaklang bonta Alangphan kachongthui atum aphan ke Arnam langdingde. Lason amonit atum ke achethe, akarjong lapen a’ok aphuthak ta aduk piji. Tangte lake Arnam Alangli ahokpet aot kachepaklanglo kalima? Tangte la monit aphan kangsai athe ke, alang dai do’an kepaklangdakji aphan kalima? Ajat akahingno asai klempet amonit atum aphan kangsai apor ahut ha karjong langno keplengset adim si Arnam toiji, lapen lahei amonit atum aok aphan karjong langno atum aninghang an pacheneklong si, latum a’ok kithi arpum angnimhaiji. Latum aphan kachelonnei ado kipi ke lahenlo. Kekroi kachekrongchot, kachekrongchot asangho atum, lapen Alangli sai keklem kachekrongchot amonit atum aphan Arnam alangtum keklem apap doan isi pen isi tok si, mo apor nangle lote, Alangli latum aphan kangthirthe akarjong along toiphit si, latum kaiketa kerengthu longledetji lapen kathe’ang ketheklongledetji si, latum aok aphan kangthirthe akarjong atum aninghang an pachenek longji. Arnam asai keklem kachekrongchot kachobei atum malomso klempo lapen ha kijut an keklem kithirthe atum aphan anke, latum kahingno atum abe anat kengkam kachejordunji lapen kahingno atum ason thakthak kemanji si latum aphan kahingno atum abitung along si Arnam jok dunrutji; lapen mo kijut ahut ke latum aphan Arnam pavirdetji. Khristo aphan kekroikrepin amonit atum aphan lapen Alangli sai aphan ajakong asap ta chepadamdepin atum aphan ke Arnam achar bikok si marek ta tintedetji lapen mo kai kachelar ahut latum aphan Alangli pavirklungji. Pirthe athak latum avedetpo, Arnam arat anat kilut dunlongji ke aphi alamlo. Arnam angno ahokpet pen dodepinlang, bonta asai jokje pen Alangli pen chetong nangkok pu atum aphan ke, Alangli rat aphan sai keklempi atum abutung along si amen bi dunpo. Lason atum ke kereng longji aphai jumhekji, lapen latum angbong ake’ongdung atum ke Alangli sai keklemji aphan a’ot kave atum pen si vir raprapji. Ha kijut ahut ke, Arnam ason thakthak aning kamatha atum aphan, Arnam amonit lapen asomar atum, lapen kurusar keplangji aphan hako pen Arnam kangvaitang amonit atum an aphan si Alangli rat along ponchotji. Lahei amonit atum ke Arnam asai keklem kangsir angtheklo. Lapen Arnam pen kisikpon abitung ke’ongdung along amen kethap lapen kalakhano amonit atum aphan ke, kekroikrelang atum abitung along si lakha pondetpo – lapen alar kopi si phopoma ke nangtum chini pemelo. Ne nangtum aphan nang kethan nangji alam anke nangthan’etlo; nangtum kachongvai atovar ke nangtum aning kehang si kachongvailo. Nangtum kachini nangji alam ke lahenlo: Arnam sai keklem ke Alanglilong kidun paphi dunhup atum aphan ke inghong ponpe, lapen halaso ahut Arnam ahokpet a’ot adur badu amonit aphan ta ingjinsosedetji.

Kapachini:

a. Kithitang athenglong achet: isi Chinese alambeng, athe ke “kerap un’edet” pu aphan.