Nang Chinima? Monit Atum Angbong Arnam Thedung Ason Klemtanglo

Kai abarim damtanglo, lapen kai akimi vangtanglo. Aningkan ningkan lapen arni arni, Arnam sai klempiklo. Alangli pirthe athak vanglo lapen chedamthulo. Lason si aove ove ta ave chiruibomlo. Pini arni, kedamtang arni ason si, keklem nangji asai an, Arnam klembomlo, aphrang asonsi, Alangli keklem ketangte ason an klembomlo, lapen pini arni anta Alangli sanglongledetlo. Pirthe kapinchong ahut pen pini arni anta, Arnam sai keklem ason dopik khangjanglo. Tangte aphrang pen mute non si Arnam sai klemmu pu nang chinima, lapen aphrang pen mute Alangli sai keklem angkang non si themuchotlo pu nang chinima? Lasi Arnam monit angbong kethedung asai klemlo pu Ne pulo. Arnam keklem asai an ke kenangsot saidelo, Arnam aphan lapen monit aphan sita, kopima Alangli keklem asai asontin ta monit pen cheraphet saide.

Arnam asai keklem amo ke mek pen checharche lapen ot longle – pirthe atum ketheklong ke aphi alamlo – tangte koson si la kethedung ason plangpo? Koson aphan si kethedung ason pu kipupo? Ahok, badu ta lake kali pu un’e, Arnam sai keklem ason an ke, lake kethedung ason plangvekpo, tangte Arnam keklem asai aphan ne kopi apot si lason puchotlo? Arnam sai keklem ason thepiklo pule ne pulote, la monit atum kamatha un’epin ason pensi plengsetlo. Lahei aphuthak chethan dam sinang.

Jisu chainong aroi arlo si hachelo lapen Alangliphan monit atum kedeng kangtungte akai ahut si Alangli hachelo, bonta, Alangliphan pirthe khang un’e, lapen Arnam akanghon arideng do si ningkan thomkep ra kethom monit atum angbong rengdunlo. La an ajak kiding angbong, pirthe athak akeho-kiphik lapen pirthe akiduk-kisung an Alangli chomat longlo. Alangli monit akhei aphan kapejokji si thengparpan athak kithi anghor akethepi inghor nanglo. Sobar arideng kedo apappi atum aphan an Alangli langdetlo, laso aphi Alangli kithurthutang arpum ha Alangli kesang adim chedamthulo. Non ke Arnam asai kimi pangcheng tanglo, lapen kai akimi ta pangcheng tanglo. Kapejokji asai keklem pangchengji aphan pap pen kejoktang atum aphan anke Arnam Amethang ahem along cheponlo. Non adihu ke, kedamtang apor pen mute kejok kelongji asai keklem arsikchetlo. Monit aphan amena akereng kachelarji aphan Karjong Kangthir le sai keklemji kali, lapen Jisu le monit atum angbong nang cheklang pen lahei asai keklemji lapu kali. Tangte kadokave apar asai kaprek pensi laso asai pachunpoma. Mate, inut Arnam ason kacheparjan Abang si lahei asai Amena klempo. Alangli monit aphan sai kimi anat keponji si lason klemlo. Tangte la kethedung ason si klemlo kalima? Arnam laso asai keklem ke monit pen mate kethanmek ateng pensi klemlo lapu kali; bonta, Arnam amena amat si la klemlo. Lake ason kethedung asai kali lapen monit aphan ning arong van thekthe pu ajahak atum pu tahai. Bonta Ne nang aphan nangpulang Arnam asai keklem amo ke la anchot kali, bonta la pen anpar akethelang lapen ansose ahir ingtanglang.

Lason apor ahut, karjong pensi Arnam sai nang keklemji aphan vanglo, bonta jongjong asonsi vanglo. Lapen anpar, Arnam araje kacheparjan phurun hini abang anchot kali si, laso aok pen ajok Arnam puthot monit araje ason nang cheparjanthulo. Kaprek atum pen keprekjek ason Alangliphan ajat ta theklongle, bonta Alanglilong pen ajok kedamtang karjulonglelang ahok alam chini dunji. La pirthe aok chot pensi Arnam along pen kevang ahok an ke chepaklang’ilo, lapen kijut arani malom Arnam asai klem’ilo, lapen monit atum kachiniji aphan la monit araje pensi Arnam a’ot-adur paklang’ilo. Nang Sining athak kedo a’Arnam aphan thek’long ingtunpik’lo kalima? Nang Sining athak kedo a’Arnam aphan chini ingtungpik’lo kalima? Monit akhei atum keledamji adim nang theklong ingtungpiklo kalima? Alangli lahei kapatu alam nangthan’etpo – majok amonit ta nangkethanthepinlang akapatujoi alam, lapen nang kachini un’epin ahok alam ta Alangli nangthanji. Alangli ke nang sining arat kidunji ahapchulo lapen kai kimi along nang kevan abanglo. Monit a’ok chotlo bonta lakha un’epin kamanghumeme ajakong Alanglilong dolo. Alangli sai keklem ason nang arjuthekthedet tahai, bonta Alangli kemangdam asai amo lapen keklem kethekdunlong anta, Alangli ke, monit atum kekroidam, pirthe monit a’ok chotlo lapu kali. Kopima Arnam asai an ke Alangli pen si paklanglo lapen kijut apor ahut monit akhei aphan Arnam kanghon anta Alangli pensi klemlo. Alangli se kethe sining longle klemhur le nang arju longle sita, lapen Alangli mek me ade kekar ason le nang theklongledet sita, lapen Alangli nangphan ingchin achin pen nang kepakengji asai klemkle sita, Arnam ke aning thidet bonta monit akhei aphan chinghonpik pu Alanglilong pen nang arju longlo; Arnam a’ot-adur keme lapen Alangli gian nang theklonglo, lapen, la anchot kali si, Arnam monit akhei aphan matha’e pu chinilo. Kijut apor ahut Arnam sai keklem amo lake, sining athak kedo a’Arnam pirthe athak monit atum angbong kerengdun monit aphan kepatheklong, lapen monit Arnam aphan kapachini, ahukum kekroi, aman kipi, lapen kanghon henlo. Laso ajok si puthot batai hini aphong Alangli pirthe a’ok ason rengthulo. Pini arni monit atum ketheklong a’Arnam ke monit ason thakthak, anokan, amek hini, lapen monit jongjong a’Arnam chot sita, ha kijut ahut ke, laso amonit jongsi ave te, pirthe lapen sining kachelar ason dopikji pu nangtum aphan Arnam nangpaklangji, sining ingtingkukji, pirthe athak ta huriseiji, lapen monit akhei atum keso lapen kangchir angbong si doji. Monit ason keplang Abang jongsi kijut arni ahut nangtum aphan nangpajokje pute, aphrang pensi monit akhei aphan ha meherang along Arnam pevirkoipo pu Alangli nangtum aphan nangpaklangji; la monit aok jongsi ave pulote, nangtum doan ta jut un’epin apappi, lapen kithi arpum si cheplangdetpo. Nangtum kachinivek nangji alam ke, monit a’ok kacheparjan Abang jongsi ave pulote, monit akhei doan ta kachepajok un’epin akisung phopo lapen kijut arni ahut Arnam ado kipi ahut monit atum chepajok thekthedetji. Monit ason keplang Abang jongsi non anta amahang thekthelang pulote, nangtum renglongle sita nangtum parengtha pusi choningriji lapen thi thekthedet sita kithi aphan si chohangji; monit ason keplang abang jongsi ave pulote, nangtum ke komentune ta ahok aphan longlelo lapen Arnam anghoi angno pini nangleledetji, bonta nangtum pap pen apot Arnam arideng pen ado pho nangkokpo. Nangtum chini loma, Arnam jongsi ok plangple te, majok ta kejok longledetji; lapen Monit ason keplang Abang jongsi vangve pulote, ove barim akai arni komentune pensi Arnam pajutkokpo kalima? Tangte, nangtum non anta Arnam monit arje ason kacheparjan Abang aphan dengdedet langma? Monit jongjong arideng pen nangtum koan lone ale longlo, tangte kopi apot si nangtum Alangliphan ning arong pen deng ingtungte detlo?

Arnam asai amo lake nang kachini unji kali. Nang jongsi nang kachongvai ason choklim loma kali ma pu chechini pameme pulote, Arnam asai keklem chun unma un’ema nang chininedetji, tangte la monit ason kacheplang Abang nangphan ale nangvanpima nangvanpipema nang kopi apot si asat chelangledetlo, lapen Arnam ahokpet pen sai kethedung klemlo pu nang mathathedetlo? Bonta, Ne nang aphan nang pulang, Noah arni ke, monit atum kecho-kijun amei, chepachor-cheparup asai keklem la an si kahenolo Arnam amek pen langdun un’edet anlo, laso ajok langthepi nangtoi si monit akhei aphan pevirkoklo, lapen Noah ahemtun pen bang nerkep lapen pirthe athak kereng api doan echorchor ansi rengchotlo. Kijut arni ahut ke, bonta, Arnam kapejok amonit atum ke Alangliphan ha kijut ahut anta kekroithip atum aphan anchot. Hako akai arni ahut batai hini ta kachobei kaheno keplengset lapen Arnam ta lang un’edet anlo, lapen halaso akai arni ahut batai hini sitame monit akhei atum chobeilo lapen Arnam ke netum aHemphu lo pu chekrongkrelo, lason atum aphan si Noah arni ta Arnam pevirchotlo. Batai hini aove ahut ta monit akhei atum Arnam aphan aning pa’oipiklo, bonta Arnam monit atum aphan non anta ning chepaningdingbomlo. Kopi apotlo? Kopi apot si lasonlo pu nangtum mathathema? Nangtum jongsi chinine binong pulote, Ne nangtum aphan nangthanpo. Kijut apor ahut monit aphan Arnam kangjinso ke Noah arni amonit pen anpar non amonit atum memuchot pu alam apot kali, lapen Arnam anat aning chiruilo pu apot ta kali, lapen non akai apirthe athak kethek-kere kepaphrang’ong amat Arnam ta phangno un’edetlo lapu kali. Bonta, kijut apor ahut isi asanchom amonit atum angbong Arnam sai keklemji dolo, lapen lapen Arnam monit ason kacheparjan ahut Alangli laso asai Amethang pen keklemji aning hanglo. La anchot kali si, Arnam lahei amonit atum aphan kangvai athe lake kejok ajaton kasemar’iji aphan lapen Alangli sai keklem amo along pen athe kelong pu angthek paman si, latum aphan kai kimi along kevanji klemlo. Lasi, ajat non pu sita, mo kijut apor ahut Alangli monit ason kacheparjan asai keklemji aphan si Arnam lahei asai klem nanglo. Pini an nangtum nangkelerok ke la monit ajoinelo. Arnam monit a’ok ason plang si monit ason kereng ajoine si pini arni nangtum kereng avarsai longlo. Lahai kemesen ason an kelongdun lake la monit jongjong kacheparjan Abang ajoinelo. La anchot kali, bonta ha kijut ke, adettin ta laso amonit aphan ardomji, lapen laso amonit aphan akero pisi alam ta arjuji, kopima Alangli kevan ahok, chethe, lapen tovar monit akhei aphan pejoklo, monit lapen Arnam angbong kachememe aphai ing’arlo, latum angbong chetebokchetlo, lapen monit lapen Arnam angbong akacherap atovar ingpulo. Lapen, Alangli si Arnam along pen anong akethe ta longlo. Tangte monit jongjong pu sita nang akardom lapen kelongji a’ot Alanglilong avedet loma? Lason amonit jongjong aphan Khristo kemanji aot avedet loma? Tangte monit jongjongchot ajok Alangli monit atum angbong Arnam aot-adur paklangpo kalima? Tangte, monit akhei aphan kisung pen kapejok Abang, nangtum akanghon lapen nangtum Alangli pen kacheraphet pen kedoji a’ot avedet loma? Nangtum jongsi ahok aphan lapen Alangli ingho pen kebar alam an dengmolo lapen Alangli nangtum angbong nang kerengdun ahut langremlo pulote, mo kijut ahut nangtum kopi si plangpo?

Kijut apor ahut Arnam sai keklem ason an ke laso aMonit pen ajok si klemlo. Ajat ason ta Alangli nang phuthak si nangpipo, lapen la anchot kali si, nang phuthak kopi si klem nangjima anta Alangli keklem ajakong dolo. Tangte, lason amonit ke nangtum aning pen kamathadam amonit ateng: amen en meme amonit ta kali lapen Alangli pen kepaklang ahok alam ke itum kroimeme alam kali, lapen Alangli sai keklem kelangdun penta kroi meme kali pu loma? Alangli ahok pen nangphan nang kebei aphan dordelang ma? Alangli keklem tang ahakhi pen apot Alangli nangphan bei un-e langma? Mate Alangli nang kejapon atovar ke nangtum dam meme atovar kali puma? Ajat alam ta ningjedet lapen asai deng’et aphi anta, kopi athe si nangtum Alangliphan langseletlo lapen nangtum arideng pen phlungjui si kedo chepahelovinglo? Ahok alam kaningje abang Alangli henlo, Ahok alam kapedor abang Alangli henlo, lapen kedam nangji atovar nangtum aphan nangkipi abang ta Alangli henlo. Tangte nangtum lahei ahok alam angbong Arnam sai keklem angthek thek’longledetlo kalima? Jisu le sai klemkle pulote, monit atum thengparpan angsong pen nangsun thekthe, bonta pini ason le monit ason nang cheparjanje pulote, thengparpan angsong pen nang kisun atum an ke kai kimi along kilutdunji aphan Arnam along pen hukum long un’edetji. Laso amonit jongsi vangve pulote, Arnam ahokpet araje kosonma nangtum thek’longledetji, lapen kelangji a’ot ta avedetji, kopima nangtum ke komentune pen kaphangno’et nangpo ajaton saidelo. Arnam batai hini aphong monit ason nang kacheparjan ajok si, Arnam nangtum apap an diya tanglo lapen nangtum aphan nang ingjinsolo. Ajat non sita, kirip alamthe ne nangtum aphan nang kethan nangji alamthe ke lahei henlo: Laso amonit, Arnam araje ason kacheparjan abang ke, nangtum aphan akenangsot binonglo. Lake Arnam monit atum angbong thedung asai keklemtang asonlo.