Arnam Aphan Nang Ahokpet Kekroidun Abang loma?
Ningkan isi mate hini abat sose tahaipo nang Arnam aphan kekroi aloti along kengkam kachejorduntang, lapen chenam ta laheihui aningkan esek nang kai along kesung doan tame nang chechaknangpik’lo meme; mate kesung chechak nang’o’edet tahailo meme, lapen alar ke kangjinso si dorplup longlo. Lapusondet tahai meme nang kesung ta chechak jokplot lapen kangjinso ta longledetlo, bonta kemesensedet akai si bochedun nanglo. Tebonsita, nonpu anta nang Arnam aphi-phi kidunbom abang, laso apot si Arnam aphi-phi kidun aphuthak le ili chingrum lonang. Chenam si, lahei alam kelang atum ne nangtum doan aphan ningpachibitoilang pima Arnam alam ke Alangliphan kero lapen kekroidun atum aphan si than-paklangchot, tebonta Alangliphan latum kero pinon mate pipenon lason amonit atum doan aphan kali. Nang jongsi Arnam ke mulukpi aphan si kachingki pule kroilo te, pirthe along kedoan amonit atum aphan pulote, nanglong Arnam alam heihui ke thangnat akachelar avelo. Laso apot si, nang laheihui alam doan ning arlo nangning chibi’et nangji, lapen laheihui doan pen nang methang aphan kaike chepahelorinon. Ajat alam tame, itum ahem along kopisi kacheplangbom ma laso apot le chethannang.
Nonke nangtum doan tame ahokpet pen Arnam aphan kekroi pu alam ke chinipetlo. Arnam aphan kekroi alamjor ke ne le aphrang kaningjetang nangtum joike pen kilutdun aphuthak henlo. Pini ke prekdak: Pini ke, Arnam aphan nangtum akekroi kenangsotnei aphuthak si ne kangsirji ningkehang. Ahokpetlo, kahenodak akrong pen lake nangtum aphan kejaponlo; jongsi ne le lason klemkledet pute, nangtum ahokpet araje nangtum chichininedet khangjangpo, lapen kaiketa nangtum dhoromi lapen kekroi thirklong abang pusi cheparoka’ibompo. Ne jongsi nangtum aning aklong aketer kedoan pangdakdedet pulote, nangtum abangphutin tame nang mena aphu along chikupdong si nang methang aphan anongkethe pu chibi’etpo pule lake pudet tame henonelo. Nangtum mena aphan ardi kachipipik lapen kacheparoka aot-adur ajoine nangtum methang along kedo kemesen akangsaithek alam aphan chechongthuidetpo, Khristo aphan si chedandongpo lapen chekakdakpo, lapen nangtum along aketer doan kapangdak ke, nangtum kamathadam doan, kar’idam, thangbakbe akele aningkehangdun, lapen ale aphan kihungpik amek heihui thengno van pen pachini longlo. Lapen laso aphi tame nangtum akai dingpi Arnam asai aphan ningkehangdunpik aphuthak si thangbakbe nangtum lam ningje padingbomlang, lapen Khristo bangso ahok alam ke kaningjetang arjidingpik anlo tebonta lasi puthot ruidunthu lethotlo. Lahenlo nangtum “akekroi” – nangtum “akekroi ke kangthirthe.” Monit atum aphan ne arsikjik pen si isi angdeng kaike padolo. Jongsi nang akachingkime le kopine kemangdam lapen ale kelong nangji aphan pusi doronglo pulote, ne ke nangtum bangso kachingkime pen ke nangnelo, pima alangtum akemangdam pen si Nephan kachongthui lapen ale kelong’iji si Nephan kenangji pu atum aphan ne langseletpik. Nephan kaike ta choklim kachingkimesen amonit atum le cheman asonte pusi ne ningkehanglo, lapen nepharman si ajat tame keklemdetji – lapen angthek kachepaklangji aphan – ethenat: kekroi. Nephan nangpachehokjokji pura masapso alamthe pen keklem kabor’i apot ke ne nangtum aphan ale nangpavelo, pima ne ke kaike ta nangtum aphan athikdut pen si nanglangbom, lapen lasi nangtum doan tame Nephan ahokpet akekroi pen le do asonte pusi ningkehanglo. Kekroi alam jongsi nangle lote, penang an atum Arnam aphiphi si dunlo pusi chemathatha athe ke latum kekroi dolo, lapen lason akesung-keboi chechakchedetji si dokoklo. Lasi ne nangphan nangarjulang: Nang jongsi Arnam do pu akekroi dolote, kopi apot si nang Alangliphan aman-peng pipedetlo? Nang jongsi Arnam do pu akekroi dolote, nangning along masapsobak anta kopi apot si Alangliphan kaphere avedetlo? Khristo ke Arnam amethang asonthot nangkacheparje abanglo pu nang deng tanglo, tangte kopi apot si Alangliphan ale kapavedet pen le ke’otpringlang? Kopi apot si Alangliphan ardi kipidet pen le nang doronglo? Kopi apot si Alangliphan paklangdak pen kangsai nangpo? Kopi apot si Alangli akeklem-kedam along kaita nang kachepetu pen langcharidunverlo? Kopi apot si Alangli akisik-kedang along nang chepidundet klemkledetlo? Kopi apot si Alangli lam heihui ateng pen nang klem dundedetlo? Kopi apot si Alangliphan adan-adi heihui Alanglilong pen kithidun lapen kachonghudun bor’i nangpo? Kopi apot si Khristo adim along pen le nang lam kaningje nangpo? Kopi apot si Alangli sai lapen Alangli lam doan chok-chokche pu nang kangsaidun nangpo? Kopi apot si Alangliphan Alangli nung pen phererepin ra kiputhap aret keklem hailo? Laheihui pen kaprek atum angbong nangtum akekroi kachepaklang lapu henloma?
Khristo aphan kekroi dunde puke la nangtum alam lapen aot-adur doan pen si kacheklangdak amung saidelo. Kekroikre pu asontin along kacheklangdak ke la nangtum kedoan akamathadam lapen akemang heihui along saidelo. Nangtum kelang kapangching aot along antame Khristo aphan kekroi dunde si dolo. Masapsap aportin along tame, nangtum anuttin abangphutin ta kekroikre amung si chibi-chepangrum pemelo pule lake pudet sita choklo. Lake tangte athe ke, doan apor ahut tame, Khristo aphan kachongthuidet apot kapherememe ang-ang along si nangtum dolo, pipotma nangtum abang arpum along kilidung avi along ke Arnam nangkacheparje aphan kekroikre si kedo cheklang pemelo. Laso apot si, ne ningjelang la Arnam aphan kekroidun aloti along nangtum akengbot kachibidun ke chenam si kapachobei saidelo; Arnam aphan kekroidun aloti along nangtum akengkam kachejordun ahut, nang keng longle athak thirthip pen nang chibidun pememe detlo – lapu klem nangjitang pusi nang kedunchotlo. Khristo alam nangtum angton pen kroi pememelang lapen tongsekot pen bangso alam ateng keklemdunphitji ajakong ta un’elang. Lahenlo nangtum Khristo aphan kekroi kavelang pu athe keklang. Alangliphan kaiketa akaprek akamatha pen kedorong titi ajoine si nangtum Alangliphan akekroi kave’i tame eson athe manlo. Khristo keklem asai along kai amat ta kekroidunphit thekthedet, Khristo kethan alam doan tame kangthongjong ano along si palerong, Khristo pen asontin asai le klempon ta kejongdunrong lapen bangso asai along choklim pen kachinidun thekji aphan ki’un’edet, kopima ajat akethan le nang longdun tame nanglong halabangso kaprek kamathadunrong titi apot kache’oji akesung dokok, lapen lasonsi do’olang – laheihui henlo nangtum aning arlo kekroikre amung kachingvuikung kedo. Khristo asai along le nangtum chingbedun tame lapen kaike ta paphidunhuphe tame, nangtum aning along kachedandundong si kepangvui ongmunaklo. Arnam aphan nang akekroi along laso kachedandundong ke kangthirthe asonlo. Chenam ta laso alam aphuthak nangtum chemathathelang, bonta nang jongsi aklong pen nang akamathadam alam chepangthek thekthelang lepute, hala kivirdet nangji atum angbong pen nang ta kephodunvek abang si plangpo, pima Arnam ke Alangliphan ahokpet pen kekroi atum aphan anchot si pachoklimji, Alangliphan kaita kekroidunphit thekthe atum aphan kali, lapen akejumnei ta Alangli henlo Arnam lo pu kekroi longlepinlang atum kekroimorem pen Alangli phiphi kedunnangkok atum doan.
Ahok along ajahak amonit atum ke chehok dunde, kijumnei ta kangsaidun henlo. Adular ke, latum jakong lapen keplang along si chehoklo; lason amonit ke jakong kachorivung atumlo. Latum akiri ke jasemet pirthe along koloso asong atum si ardi kedo mate aphai keong muchotma, lapen latum akiri ke pastor lapen thanbang kacharlitang adim pen kevang atum aphan anchotlo. Ahok atovar aphan latum dengdunlo puvoiphit tame, latum ke kekroi pabenghoilang; alangtum doan aning lapen kamatha aphu latum kachipidetji aphan un’elang, Arnam aphan alangtum angho pen kaningje si chekhorotchot, bonta amek doan ke thedung pastor lapen thanbang atum aphan si ardi pi ronglo, lapen Khristo aphan ke puthot kelangthuji anta latum klemkledetlo. Alangtum aning ke man-peng, keplang-kiphi lapen anong-athang aphan ansi pathirthiplo. Latum akamatha laso akarju pen angtan si bikoklo pima la ardi kavedet abangphu tame penang ason-amung cheparidengdun unji, ale kavememe abang tame monit aphan pachoklim unji. Latum akamatha ke laso akarju pen angtan si bikoklo pima laheihui aduk kemantang lapen kangjirtang abui along arpum doan ke Arnam kangvaitang amonit atumlo puke. Latum kekroidam ke jongsi lapuson amonit atum anke Arnam kepajokvanji ahormu saidelo pu asonte, pirthe lapen sining ta arum kedo si nangchelarphitpo, lapen kedoan amonit atum tame amena aphan chingnekchoi rongpo. Latum akekroidam ke jongsi ardi kavedet atum aphan le Arnam ingvai si kapachoklimji pulote, halahei thedung amonit atum ke Arnam pusi amethang chemandetpo. Alangtum akamathadam alam ke kekroikre aketer pen si dolo; kekroidun kali pen anpar akeong, latum doan ke ingcham ason ale kavedet api atumlo. Pima latum ke kangtui angdeng, man-peng, lapen jakong heihui aphan anchot si ardi pilo, lapen latum ke thedung asong lapen dhorom kachingrum atum aphan si man-peng pichotlo. Khristo pen kejapon atum aphan ke latum masapso ta choro ponpedetlo; latum ke kachongthuidet atum si chemanlo pima Khristo aphan, ahok lapen chethe aphan si alangtum chesongji si chisiklo.
Kopima nang akar’idam ke Khristo kachipebihek apot kali, bonta halahei nong chethangklong pen kedo kapachobei akivibang atum aphan. Nang ke Khristo akemesen mate kangcho alam anke kachinghon pen aman chipipedetlo, bonta halahei pirthe along akahijim memepik pen kachilungthutbung kedo kangthirthe amonit atum aphan. Alangli phu anta kachibiji adim kavedet kesungpik kachechaknang Khristo aphan ke nang ingneklo, bonta adan-adi doan kachonghudundet titi kithitang arpum atum aphan si nang ke ar’idunlo lapen mek-no langno mate kangri-kangkrang pen si rengdunlo. Nang ke Khristo along kesung kachechakdunji ninghanghedetlo, bonta kapherememe Khristo aphan kekroikredet adilung atum aphangkor along nang mena aphan kacheharvakdunlok si ningarong ronglo, tebonta latum ke ok pen, lamthe heihui lapen nangkachepahemphu anchotlo nangphan nangkipiji. Nonpu anta, alangtum ahin anatthu si nangning ke abe dunbomlang, alangtum nangkepalupon along. Lapen anpar ta nang ke kaiketa isi akamatha si chibikoklang ajoine Khristo asai doan ke longdun sita kejoiji aphan sungkrunglang lapen kedengji aphan nang akar’idam ave. Laso apot si ne ningjelang nanglong Khristo aphan kachoroji akekroi duredet. Pini arni anta Alangli phiphi kedunbom athe ke nang kaprek atovar kavedet ajoine puchotlo. Kai amat ta kangtuiving arjan angthun si nangning along parjapdongverlo; alangtum alam lapen asai nang tengne un’edetlo, lapen alangtum nangkebai alam doan lapen arideng pen chepajok un’edetlo. Latum ke, nangning along si dokoklo, kai amat ta akethenei lapen kai amat ta akemenei abanglo. Tebonta pini arni lason ke Khristo aphan kalidetlo. Alangli ke kai amat ta nangning along ale kavenei si manlo, lapen kai amat arsikkrung aman-apeng kelongji abang kalidet si vilo. Pima Alangli ke ardi kedo abang puke helovinglo, abe kidunmeme anta masapso ta avedetlo, lapen kangtuivingji ta helopik alamlo.
Ajat ahut pu tame, ne pulang pima ahok aphan ardi kipipedet atum doan ke kerkoikrelang atumlo lapen ahok aphan kachongthui atumlo. Khristo pen ajok kedeng kelongji puke lason amonit atum long un’elo. Koan si nangning aklong along akekroikre kedoma pu non ke nang chepangthekloma, lapen Khristo aphan kelangselet nanglong koan doma? Ne nangphan arsikjik pen nangtoilang lasi: Ahok atovar aphan si nang kangvaiduntangdetlo apot, nangning aklong’et pen nangmena aphan lale apor chipi pemenon; kapangvuikung akamatha lapen ningkerunhup pen ke nang do nangnelo. Arnam ke bangso apirthe apharman ta kali mate madu amonit aphan ta kali pusi nang kachini nangji ke lahenlo, bonta Alangliphan ahokpet pen kekroidun atum aphan anchot, Alangliphan kero-karcho atum doan aphan, lapen Alangliphan kachipidet lapen kachepebidunhek atum aphan anchotlo.
Pini ke, nangtum along ongdung kekroikre pensi plengset dolang. Nangtum methang aphan kelang chepangchingtha, lapen nang akethak tame chenam si nang longpo. Nang le ahokpet akethak longlo pulote, Arnam aphan kekroi abang kali pu nang mena chichini si nang cheningjedetpo, bonta madu tame mena ale aphan kekroichot, Arnam aphan karbokthap alam kaningje, lapen Alangliphan kachongthui, lapen Alanglilong athikdut pen kedo kalidet atum anke chichininelo. Laso aphi si Khristo ke monit kali, bonta Arnam pu nang chini unpo. Lason arni le nanglerok te, Khristo aphan nang man-peng pipo, pherepo lapen ahokpet kachinghon dopo. Nonjong ahut, phant thomkep ansi nangtum aning along akekroi dochotlang, anpar phant throksikep anke kamanghu pen si plengsetlo. Ajat tame Khristo keklem lapen kaningje alam anke aron damlim pen si Alangli phuthak kamathameme lapen kachiniji meme anta nangphan nangpilo, kamathadam lapen abidi kipidam doan ta nangtum Alangliphan kekroikredet along pen si archok chemanlo. Sining athak kedo ketheklongledet a’Arnam aphan anchot si nangtum ar’ilo lapen pherelo, lapen pirthe along kedo kereng’et Khristo aphan ke kachoro ardi pipedetlo. La tangte nangtum akekroikre kalilang puhe? Hako kedamtang ahut thangnat asai keklemkledet a’Arnam aphan anchot si nangtum chorilo, bonta non kedobom Khristo aphan ke chepathengno haihedetlo. Lahei kadokave “kekroi” puloma, nangtum aning along kai amat ta kapangvuikung, bangso akekroi ke pini arni Khristo aphan akekroidam kalilo. Nangtum aphan ne chenam si nahok atovar pen ta nangchikidam un’e, pima nangtum along ongdung kekroikre si plengset, ongdung kangthirthe si nangtum slong plengset lapen laphan ingthan si thakdakvek nangji. Laheihui akangthirthe kedo angthek ke nangtum kekroi kave binonglang pu cheklangdaklo; Khristo aphan nangtum kedengdedetji pu angthek latum kachethanlo, lapen latum ke Khristo aphan kachongthuidet atum pusi nanghokdetpo. Khristo aphan kachinidun akethek nangtum aphan kachitebinkuk ahormu si latum plangpo, nangtum aphan Khristo kelongji pen akechaknap si manpo, Khristo pen kajalang kacherapji nangtum along akesunglo, lapen nangtum aphan Khristo nangkechakchedetji pu kacheklang peme angtheklo. Nangtum akai along asontin tame non ke kachelangthu pemeji apor binonglo! Lason keklem thekdet lote ajat atovar pen tame kemanghumeme ale nangtum aphan dopo!
