Khristo si Kepadusi Arni Ahut an Monit Aphan Kijut Un’epin Chethe Atovar Pajirthekchotji

Chethe atovar ke kopine madu tame kelongpet unji lapu kali, mate lake kopine anuttin ta kelong kejoikeji ason kali. Lake athema chethe ke Arnam pen si vang unchotji, lake pudam lote, Arnam anchotsi chethe akenangsot ke cheparideng ponlo, lapen chethe atovar tame Arnam Amethang along amat si dolo. Lapen lasi Arnam along si chethe atiri, lapen kaike kilidung kerengver chethe alang alangsun tame dochotlo. Pirthe pinchong tangdet pen aphi, kerengver chethe pen kacherap aphuthak ongdung asai Arnam klem’olo, monit aphan chethe kevanpi asai pima klempik’lo, lapen thedung anam chipidetlo pima monit atum chethe longdunji meme pu aphan. Lake athema Arnam Amethang amat si kijut un’epin achethelo, lapen Arnam Amethang amat si monit atum laso pen chethe kelongdunji atovarlo. Arnam ke monit aning along pen amat si cheterekrelo, lapen kadokave apor ahut tame monit angbong si Alangli dodunlo. Alangli pen henlo monit atum kerengdun longbom ajakonglo, monit atum kedobom angkurpi chenamlo, alpen mahang thekdet pen monit atum kerengbom kangchoklong kabirtilo. Alangli monit aphan mahang pathekthumilo, lapen alang asontin kacheparjanpon along tame alangphaan pathirthip pen parengdun longlo. Alangli jakong lapen Alanglilong kedo kemep un’edet chethe aboi apot choropik’lo, monit ke ove aphi ove do’an tame dodun longlo, laso along ke Arnam achethe ajakong henlo monit kerenglongbom akenangsot kachikidamlo, lapen laso pen ajok Arnam ke anam chipidetlo pima majok jongjung amonit tame lason anam ke tutepinlang. Arnam achethe ajakong ke ajat ajakong aphan ta hailap unlo; anpartame, lake ajat ajakong aphan tame palittheilo. Alangli achethe ke kaike rengver, Alangli ajakong ke thepik khangjang, lapen Alangli chethe ajakong aphan ke ajat pinchongtang api mate hotur ajakong atum antame paremdet un’elo. Arnam achethe ajakong ke dover lapen ajat apor mate adim along sitame keklar’et kemepik adak-atur pen pathe’anglo. Sining lapen pirthe ke thedung akachelar do tahai meme, bonta Arnam achethe ke kai apar kai ta chelar un’elo. Kadokave ahormu tame ave’et tahai, bonta Arnam achethe ke nonputame doverji, athe Arnam henlo kadokave ahormu kedo’ibom atirilo lapen alangtum kerengbom angkurpilo. Monit achethe ke Arnam along pen si nangplanglo, siningrengme kedokok ke athema Arnam ajoinelo, lapen pirthe kerengbom ke Arnam achethe ajakong along pen si nangchemanlo. Ajat ahormu pima kangtangrak kacheparideng do’an tame Arnam chepahemphupon ajakong aphan ke chohai un’elo, lapen thangnat ahormu ta pima kangtangrak pu sitame Arnam kachepahemphupon angkang aphan ke chepajok un’elo. Lason pen si, latum komat atum loma pu langlepin pen, anuttin tame Arnam kacheraipon angkang arum chehodaivek nangji, anuttin tame Arnam ahukum ateng si rengdunvek nangji, lapen inutnat ta Alangli rideng pen chepajok un’e.

Ahok ta kopima nang non kar’idam ke chethe kelongji aphan, mate lasonsi nang kar’idam ke ahok kelongdunji aphan. Ajat alam putame, nang ninghang ke Arnam aphan kiri henlo, halaso a’Arnam aphan si rilo pima nang charchung meji, lapen komatma nangphan kijut un’epin achethe nangpi thekji. Jongsi nang le kijut un’epin achethe kelongji si ninghanglo, nang ke kechengsi laso kijut un’epin achethe atiri aphuthak chinivek nangjilang lapen Arnam konat si kedolo pu kecheng chinidamvek nangjilang. Ne ke nangthan tangdetlo pima Arnam achethe anchotsi kachelar un’edet kedo, lapen Arnam anchotsi chethe atovar cheparidenglo. Alangli chethe ke chelar un’edetlo apot si, lake lasi kaiketa rengverlo; Arnam si chethe atovar dochot apot si, Arnam Amethang ke lasi kerengver achethe atovarlo. Lasonsi, nang aphrangsi ke Arnam konat si kedo, lapen kosonsi laso kijut un’epin achethe atovar kelongdunjima chinidamvek nangjilang. Nonke tangte itum laheihui pasonni alam aphuthak le paprekjam pen kachingrum pado lonang.

Nang jongsi ahokpet kijut un’epin chethe atovar kelongji ninghang do, lapen jongsi nang le laso kiridun along ningcherotkut pen pulote, laso akarju aphrangsi nangthak paphrangtha: Pini arni Arnam konatlo? Chenam si nang kethakdunji ke, “Arnam ke sining angsong si kedolo, ahoklo – Alangli ke nang hem along ke dodelo, mate Alangli doji puhe?” Chenam si nang ke pudunji tahai pima Arnam ke ahokpet ta kadokave ahormu anglum si dolo. Mate nang ke ningje tahai Arnam kedo ke anuttin amonit aning arlo, mate pima Arnam kedo ke karjong plengset apirthe along. Ne la asontin tame patepekpelo, bonta Ne laso alam aphuthak paklardak nangkokji. Lake kaningje choklim kalilang pima Arnam ke monit aning arlo si dolo puke, tebontame angton chokchedetlo pu kali. Lake athema, Arnam aphan kekroi atum angbong, komatmatma kekroi ahokpet atum do’an lapen komatmatma kekroi kapachobei atum do, komatmatma Arnam kedengpon lapen komatmatma Alangli kedengdedet atum dolo, komatmatma Alangliphan ningkapangsam atum lapen komatmatma Alangli kelangselet atum dolo, lapen komatmatma Alangli kapachoklim atum lapen komatmatma Alangli kapavir atum tame dolo. Lapen lasi Ne pulo pima Arnam ke ajahak amonit atum aning along si bonta dolo, lapen laheihui amonit atum do’an ke komatmatma Arnam aphan ahokpet kekroi theklor atumlo, komatmatma Arnam kedengpon atumlo, komatmat Alangliphan ningpangsan atumlo, lapen komatmatma Alangli kapachoklim atumlo. Latum do’an ke komatma Arnam si chejapon atumlo. Latum do’an aphan ke Arnam si chejapon tangdetlo apot, latum do’an ke komatma Arnam kijut un’epin chethe atovar ketheklong lapen karjulongtang amonit atum saidelo. Komatmatma Arnam aphan akekroi ke ahokpet kalidet, komatmatma Arnam kedengponpedet atum doan, komatmatma Arnam aphan kachongthui atum, komatmatma Arnam pen kapavirdetji atum an – latum do’an aphan ke Arnam panone jokjelo, chethe atovar kalipin pen kedo nangkokji atumlo, lapen Arnam konat si kedoloma kachininepin pen kedo nangkokji atumlo. Alar ke, komatmatma alangtum aning arlo kerengver a’Arnam si dolo konatma Alangli kedo nangji adim. Latum do’an ke komatma Arnam ahin pen kijut un’epin chethe atovar kipipon amonit atum saidelo, lapen latum do’an ke komatma Arnam aphiphi kidun atumlo. Nonke nang tangte chinilo konat si Arnam kedo? Arnam ke monit aning along lapen monit arep-arei ahin along si dodunlo. Alangli ke karjong plengset apirthe along, lapen kadokave ahormu athak anchot le kedo kali, bonta ansose si monit atum kedo apirthe along si dodunlo. Lapen lasi kijut arni nangkele ke akimi ahavar Arnam asai keklem angdeng along pen si enponlo. Arnam si kachepahemphupon ajakong cheparidenglo kadokave somindar adang along ahormu do’an apharman, lapen Alangli henlo alang ning along monit atum kachiki’idam abanglo, lapen anpartame, Alangli ke monit anglum si dodunlo. Lason pen anchotsi Alangli monit akhei aphan chethe atovar vanpi thekji, lapen monit atum aphan chethe atovar along ponthekji. Arnam pirthe along kevang, lapen monit anglum kedodun ke, laso pen ajok monit atum chethe atovar longdunji meme pulo, lapen laso pen monit atum renglongji meme pulo. Lasonthakthak si, Arnam somindar along kadokave ahormu aphan ta hokum pilo, laso pen ajok latum Alangli monit anglum kisik-kedang asai along jalangdunji meme pulo. Lapen lasi, jongsi nang le pima Arnam ke siningrengme along lapen monit aning arlo si do pu akekroi kethan alam aphan si dengdunchotlo pute, tebonta monit anglum Arnam kerengdunbom ahokpet alam aphan ke chorodun thekthedetlo, tangte nang ke chethe longdunde chenamlo, lapen ahok atovar tame longdundeveklo.

Arnam Amethang si chethelo, lapen ahoklo, lapen Alangli chethe lapen ahok ke do rappetlo. Komatmatma laso ahok kelongledet atum do’an ke chethe sitame longdundelo. Thangnat ahok akethan-kimundun, kacherapdun, lapen hukum kipipon ave pulote, nang ke ahi pen ketok alam, kekroidam aphan akethan, lapen, kadokave anpar, kithi si longdunrongpo. Arnam achethe ke kaiketa rengver, lapen Alangli ahok lapen chethe ke do rappetlo. Jongsi nang laso ahok atiri ridun thekthedetlo, tangte nang ke chethe kachingthur pen kemeji aphan longdundelo; jongsi nang le chethe ketoi ahukum alam longdundedetlo, tangte nanglong ke chenam si ahok avelo, lapen kahemandam lapen kamunthidamthap alam pen akaprek ke, angton nang bang arpum along thangnat ta avelo bonta nang ok – nang kanemthuprung abang aok anchotpo. Chininon lothui along alamthe aphan ke chethe pu lakhakhe, phurkimo along ketokpon alam do’an ke ahoklo pu hokdet un’e, lapen kedamtang ahut alamrai do’an pen ke nonjong ahut Arnam kaningjepon alamthe saidelo pu pachetondam un’e. Arnam pirthe along kevang pen Alangli kaningjetang alam do’an aphan anchotji lapen monit anglum kedo pen si ahok, chethe lapen Arnam aninghang atenglo puji, lapen Alangli nonjong keklem akrong ateng pen. Jongsi nang le pini arni kedamtang akai ahut Arnam kaningjepontang alam kabirti heihui pen si pachetondamlo pute, lake nang phurkimo ritarlip abang si pachemanpo, lapen nangphan kechoklim pen kipumeji ke inut phurkimo ason-amung kethekser abang pulo. Lake athema nang ke kaiketa kedamtang apor ahut Arnam pima keklemtang ason kepangthekdam apot si kroichotlo, Alangli monit anglum sai keklempontang adim pen Arnam aharchi kachetekang aphan ansi kroichotlo, lapen hako ahut Alangli phiphi kidun atum aphan pima Arnam kipipon ateng ansi kroidamchotlo. Nang ke Arnam pini arni keklem ahin aphan ke kroidundedetlo, pini arni Arnam anongtheklong kacheklang aphan ke kroidundedetlo, lapen non ahut Arnam kethandam ahok atovar along ke kroidundedetlo. Lapen lasi nang ke komatma narlo amang kaheman abang chenam-chenumlo athe ahok alam pen ke masap ta akachepho avedetlo. Jongsi non nang le nonpu pima monit aphan chethe kipithekthedetji alamthe along si otdunthiplang lepute, nang ke ningkethe kavedet kithitang athenglong achet,^[a] athe nang ke hako pen akekroidam ateng do’ongchotlo, angthin theongchotlo, ahok along mathadunkrang ongchotlo!

Arnam Monit kachemantang abang ke Khristo pulo, lapen lasi Khristo ke pima laso ahok monit atum aphan kipithek abang ke Arnam pulo. Ladak ke thangnat ta abat alamm pu avelo, athe Alangli si Arnam akenangsot alamm cheparidenglo, lapen Arnam akun tame cheparidenglo, lapen Alangli sai along kethek-kere tame dolo, lahei ke pima monit atum longdun un’edetji. Komatmatma amethang aphan Khristo pu kachipu atum, tebonta Arnam ason asai klem thekthedet, do’an ta kachongthui atumlo. Khristo ke pirthe along Arnam kachepaklang’i anchot kali, bonta Alangli sai keklempon lapen Alangli sai monit anglum kapatangpon ahut Arnam si ke’envet a’ok chenamlo. Laso a’ok ke madu amonit tame panglarplot un’eveklo, bonta laso a’ok ke pima Arnam asai pirthe along ke chekroi peme pen chechaklo, lapen Arnam akun si chethandamlo, lapen Arnam apharman cheklang pemelo, lapen monit aphan chethe pilo. Keprap mate keder tame, komatmatma kadokave Khristo pu kachekrongchot atum anke klovekpo, athe latum le Khristo pu chekrong puvoiphit tame, latum ke Khristo akenangsot ardi inutnat ta cheparideng movelo. Lapen lasi, Ne pulo pima Khristo ahokpet kedo keklang ke monit atum than-pachini thekthe, bonta lake Arnam Amethang si thakji lapen ingvaiji. Lason pen si, nang jongsi ahokpet chethe atovar kiridunji ninghang do, nang aphrangsi ke pirthe along kevang pen pima Alangli monit aphan chethe atovar pi tanglo pu alam chorovek nangjilang, lapen nang lake mo kijut arni an pima Alangli pirthe along kevang ke monit aphan chethe atovar kepajirji aphanlo pu chorovek nangjilang. Lake kedamtang kalilo; lake pini arni si chemanpo.

Kepadusi arni ahut aKhristo chethe vanlo, lapen kachechak’un lapen kai apar kai kedover ahok atovar ta vanlo. Laso ahok ke monit atum chethe kelongdunji atovarlo, lapen lake monit atum Arnam aphan kachiniji lapen Arnam pen kedeng’iji atovar anchotlo. Jongsi nang le kepadusi arni ahut Khristo pen kipipon chethe atovar ridundedetlo, tangte nang ke Jisu ahin pen kedengpon ke longdundevek si plangpo, lapen sininghemrengme Khristo arat adonri kilutdun longji aphan atheng kalidetvekpo, athe nang ke phurkimo kethan aling lapen aphatek along kedo atum saidelo. Komatmatma aron-atang si kacheraivet, ahi pen ketok alamthe lapen phurkimo ari si kekokhet atum kedoan ke chethe longdundeveklo mate kachelarledet chethe atovar longdundeveklo. Lake athema kadokave latum along kilu’ut alang si dolo pima la ningkan suri-suri anta pusi dothiplo alar ke pima anghoi pen nangkilipon chethe alang kalidetlo. Komatmatma chethe alang pen kapadorplup kalidet atum anke kaike sitame kithitang arpum ason si dopo, Sobar kijui-kapathu ahormu asonpo, lapen Meherang asomar atumlo. Kosonsi, tangte, latum Arnam aphan ketheklongji? Jongsi nang le aban ateng dothipverjisi bor’ironglo, latum do’an ke ajat ta kachelarledet ephong ateng kedoverji si bor’ironglo, lapen latum do’an non kedobom angdeng kachelarji aphan bor’i’edetlo lapen phurkimo che’o’edetlo, tangte nang ke kaiketa Arnam abirudhe kalilangma? Arnam asai angdeng do’an ta angkang the’o lapen ingtangrak, lang atarthui ason lapen sining kabirlak ason – tebonta nang ke kivirji aphan si ingnilun pen chonghonglo, nang kiludet si do’iverlo lapen thangnat ta klemklelo. Lason pen ke, kosonsi nangphan le komatma Meresak aso akengbot kangthumdunkri abang pu kehokpo? Kosonsi nang ke komatma nang kachiki a’Arnam ke kaiketa akimi lapen ban un’pu laso Arnam aphan than paklar thekpo? Lapen kosonsi nang ake’etjong alothui alamthe pen le nangphan akimi akai along an kepon thekpo? Kosonsi latum le nang Arnam asai angdeng kiridam nangchejapon thekpo? Lapen kosonsi latum le nangphan siningrengme along an kepon thekpo? Kopima nang rideng along kedo nang ke’otpon ahi pen ketok alam ke pima malomso akerengme nangpiji, bonta ahokpet la chethe ke nangkipiji thekthelo. Arnam alam nang kaporhidam ke nang de aphan pamesen anchotji lapen ke kethek-kere alam kalidet pima nang monit achethe aphuthak kachiniji akerap longle, kechoklimji atovar ta pima nangphan kachejaponji thektheneilang. Tangte laso keklardak kachinidamdedet pen ajok nangphan pamathadam parsiksedet loma? Tangte la nangphan pachininelangma kemanghumeme aklong kedo alam apot? Nang ke nang jongjung si methang aphan sining kidun ra Arnam pen kachetongdamji pu thekloma? Arnam le vangvedet sitame, nang ke Arnam pen sining angsong hemtun isi aningarong kachipidamji methang aphan chepondun thekpoma? Non anta nang ke nonpu mang kahemanlokma? Ne pinkhatlo, tangte, pima nang mang kahemandam ington nangpo lapen non komat si sai keklem loma langdun nangpo – komat si non ahut monit aphan kepadusi arni kapajokji asai keklembom loma langdun ra pangtheknon. Jongsi nang le langdunde, nang ke ahok kaiketa longdundelo, lapen chethe sitame longdundeveklo.

Komatmatma Khristo kaningjetang ahok alam aphan chikikepin pen chethe kelongji aphan kar’idam kedo atum anke pirthe along amo vangvenei atumlo, lapen komatmatma Khristo pen kevan chethe atovar kedengdundedet atum anke kamanghu along si ingbo’etlo. Lapen lasi Ne pulo pima komatmat si kepadusi arni Khristo aphan kedengdundedet atum anke kai apar kai sitame Arnam aphan chongthuilo. Khristo ke kepadusi arni ahut Arnam kepangri alongri along monit atum kelutdunji adonrilo, lapen Alangli adung-arei madu tame paledam longledetji. Khristo penpete inutnat aphan tame Arnam pachoklim klemkledetji meme. Nang Arnam aphan kroilo, lapen lasi nang Alangli lam dengdunvek nangpo lapen Alangli keja atovar kroidun nangpo. Nang hirjume kelongchotji aphan ke mathathedet nangji pima ahok kedeng longledet ahut anke lapen chethe ketoi ahukum alam dengdun thekthedetlang ahut anke. Khristo kepadusi arni ahut ansi vanglo laso pen ajok komatmatma Alangliphan ahokpet pen kekroi atum anke chethe pajirponji tahailo. Alangli sai kea the aban akai kapajutji ajoine lapen akimi kilutji aphanlo, lapen Alangli sai ke kadokave ta komatmatma akimi akai along kilutdunji do’an atum keponvek nangji atovarlo. Nang jongsi Alangliphan choro thekthedetlo, lapen alar ke pinremlo, nongno jolo, mate Alangliphan aduk inghoidetlo, tangte nang ke kai apar kai mekecho nangjivek abanglo lapen Arnam kepangri alongri arlo ke kaike aphan lutdun longleveklo. Athe laso aphan ke Khristo Amethang si Karjong Kangthir akethanponlo, Arnam akethan alamlo, komatma Inut Alangli sai pirthe along kapaklemji aphan Arnam kepekpon abanglo. Lapen lasi Ne pulo pima jongsi nang le kadokave athe ke Khristo kepadusi arni keklemtang do’an dengdun thekthedetlo, tangte nang ke Karjong Kangthir aphan si nongno jolo. Komatmatma Karjong Kangthir aphan nongno kejo atum do’an ado kepho nangji ke kadokave tame methang si chichini’etlo. Ne nangphan nangthanlo pima jongsi nang le kepadusi arni Khristo aphan khanglo, jongsi nang le kepadusi arni Khristo aphan patepekdunlo, nang dular inutnat sitame kesung kachechakpi nangji puke avedetpo. Anpartame, laso arni pen lote nang ke Arnam pen kedeng kelongji aphan aphong kaprek avarsai avedetpo; jongsi nang ke kechokche pen methang chepekeng bor’ilo pu sitame, nang ke puthot aphong Arnam arje thekdun longledetpo. Athe kopima nang kekhang ke monit kali, kopima nang kapatepek abang ke keboidet amonit kalidet, bonta lake Khristo. Nang tangte chinilo kopima laso mo kephodamji alam ke? Nang ke kibihek akechokche le keklemdet kalilo, bonta kahenodak asai langno si keklemponlo. Lapen lasi Ne anuttin aphan tame parelo ahok angno ke nang soni chepaklangri pulo, mate thangbakbe jongdunthapdetri, athe laso ahok si nangphan chethe nangvanpi thekchotji, lapen la ahok pen anpar ke nang mahangthekthumiji lapen puthot Arnam arje kelangji aphan avarsai kipi thekthedetji.

Kapachini:

a. Kithitang athenglong achet: isi Chinese alambeng, athe ke “kerap un’edet” pu aphan.