Sining Pirthe Adang’an aphan Arnam Alammthe – Ingkung 10

Khristo Kepangri Arat Akai ke, ajatnon, hako apor ahut pen kachepreklo. Lake monit atum koson si keklem-kedam loma pu mathadamdelo; alar ke, Ne pirthe athak vang si salajong ahin pen Ne sai nangcheklemponlo, atheke kopine pima monit atum longdam un’e mate pachundam un’e. Koan aningkan pen lone, pirthe sorjondet pen aphi anke, mondoli kikim-kerang aphuthak asai ansi klemchotlo, bonta Khristo kepangri arat kikim-kerang alam ke arjulongle. Ne le laso alam Ne mena angho pen ningjelo puvoiphit tame, komatne laso akedoivet aphuthak chinidam doma? Ne ephong bangso apirthe monit atum along vanglo lapen alangtum akiduk-kisung chomatlonglo lapen thekdun longlo, bonta lason keklempon ke Ne ok nangchepharlo akemang kepachunpon kalipin penlo. Ephong le Khristo kepangri arat kikim-kerang pangchengdetlo tangte, Ne ok nangchepharlo tame Ne birta keme asai keklempon kepangcheng pemelo; pima lake, Recho kepangri arat along Alangli jakong kethe kepangripon kepangcheng binonglo. Laso pen lake cheklangdaklo pima monit atum apirthe along Khristo kepangri arat nangkisun – lamthe pen kachepaklangponchot pen chehelopik anlo – lake abinong’et asai atenglo; lahenlo “ahok asai ateng keklempon” pu eson aphar alamjorlo. Monit atum Ne sai keklempon esonnat tame theklonglelang, mate latum Ne lam kaningjepon doan esonnat tame arjulonglelang. Latum Ne sai keklem theklonglo pu sitame, kopilo tangte latum kelongdamji? Lapen latum Ne lam kaningje arjudun longlo tame, kopilo latum kachinidamji? Pirthe adang the-bi, anuttin tame Ne kangjinso lapen akanghon thekparpik angbong si dolo, bonta lason si kadokave monit akhei doan Ne kangsai aber si dopetlo, lapen lasonthot si Ne asat kelang phodamveklo. Ne monit atum aphan ingjinsopiklo lapen inghonparpik anlo, latum le penang an angdeng kadokave ta henotheilo pu ahut tame; Ne latum aphan ado kipi lakhadampetlo, latum le Ne inghoi athengno kadokave ta chehodaidetlo pu sitamelo. Tebonta, tangte komatne madu amonit tame pima Ne ketoitang akeso-kisung lapen kepacharklepon angbong kedode dolangma? Penang an amonit atum anke katheangji aphan kangting along si ripangtarlo, lapen penang an atum ke alangtum asat kepho pen ajok si keso-kisung chechak nangbomlo. Job tame kekroi do, bonta alang ke amethang aphan kachepajokji akrong le kiri kalima? Ne monit atum asat kevang pen kephodam ahut arjapthip unlo puvoiphit tame, tangte komatne doma, kaningje ase pathethepin pen, aklong’et pen akekroi dolo? Tangte lake pima monit atum alangtum aning arlo kahonthedam chebirtibom ahut si alangtum akekroi ase chepado kalilangma? Monit atum angbong komatma asat kevang ahut arjapthip mate komatma choklim pen chepeduk si kachehodaidun puke avepinlang. Jongsi Ne le bangso apirthe aphan Ne arje chepatute pen langledet pu aosnte, angton monit akhei anke Ne kelang kepangching akar arum si klotheipo, athe Ne monit akhei along thangnat hanghe.

Khristo kepangri arat aphan kardom arki nangdolo pute – atheke sining kangder batai throksi ahutlo – laso arki sining lapen pirthe ta arjuplotlo, sining lapen pirthe ta palinglanglo lapen monit atum anuttin aningkoiso aphan paklemhirlo. Khristo kepangri arat alunjir dragon ke’er thepo alongri along arong-aje pen ingthurponpo, pima Ne laso adet phangnodak tanglo lapen Ne kepangri arat ahavar si kimtanglo pu angtheklo. Lapen anpar akenangsotnei, Ne kepangri arat ke pirthe athak tame kimpon tanglo. Laso apor ahut, Ne tekala atum aphan pirthe athak adettin along anuttin ketoi pangchenglo laso ajok latum Ne somar, Ne monit atum aphan kividamji mene pulo; lake puthot Ne sai angdeng akenangji doan kelongdamji aphan penpenlo. Tebontame, Ne salajong si konatma dragon ke’er thepo kekokhet adim along damlo, lapen laso pen chedanlo. Ephong le monit akhei doan Nephan ok along nangchinilo lapen ke Ne sai amo ok along nangtheklonglo pulote, dragon ke’er thepo chobeibei chepindeng ke aduk-abet si chemanpo lapen virdet si nahok ta theklonglelo. Ne kepangri arat atum, nang dragon ke’er thepo aphan areppi antame langselet tangdetlo apot, nang Ne ning aphan nang sai keklem pen pangsamvek nangpo, lapen lason pen si dragon aphuthak katherak vanpo. Tangte nangtum ahokpet si pima dragon ke’er thepo aphan ke langselet meme pu chemathadam doloma? Nang ahokpet si pima lake Recho kepangri arat ahoturlo pu mathadam loma? Nangtum chenam ta pima nang Ne pharman kemepik ahakhi chechak theklo pu akekroi doloma? Nang tangte chenam si pima nang dragon ke’er thepo aphan paremdet unpo pu ningchetheklong doloma? Lahenlo kopima Ne nangtum aphan karju; kadokave Ne akenangji ke nangtum laso akengkam an kachejorthek henlo. Nangtum lason keklemji thekpoma? Nang laso asai pachundam unpo pu pima akekroi nang doloma? Kopilo chenam ta monit atum keklem thekji kedo? Tangte lake pima Ne Methang amat le cheklemdet ta chokji kalima? Kopi apot si pima Ne salajong si atheke ron kachedanji adim along kevanglo pu kaningjelo? Kopima Ne kenangji ke nangtum akekroi, nangtum asai amo kali. Monit atum anke kadokave tame Ne lamthe aphan kedengdun kenglep pajoike pen un’edetlo, lapen alar ke lahei doan aphan amek arset pen langprui anchotlo. Tangte lake nangphan nang akemang kepachun along kerap doloma? Lason ateng pen si nang Nephan nangchinidam loma? Ahok chethan lote, pirthe athak amonit doan, Nephan inutnat tame nanglangsapji un’elo, lapen inutnat tame Ne lamthe akangthir lapen aketer kavepin alamjor longdam thekthelo. Ne laso apot si pirthe athak pachinimekmedet asai keklempon along pathikdetlo, laso ajok Ne akemangdam kelongji aphan lapen monit atum aning arlo Ne methang ahokpet arjan kibithipji aphan. Lason pen si, Ne monit atum aphuthak atheke kapahanchathap alam ajakong keberthip akai pajutponkokpo.

Pini arni, Ne ke dragon ke’er thepo adet along anchot le kevang kalilo, Ne ke angton somindar adangpi tame kachetongdamji si chetevarlo, sining lapen pirthe angkangpi tame patihurnutji aphanlo. Tangte Ne kangsai kephodundedetji pu nahok tame elongbak dojima? Tangte pima Ne kephangnodakji aber kedodedet pu adim nanghok tame elongbak dojima? Nahok le Ne dam tame, Ne “kephangnodakji achili” kadokave keprekjam rik tekanglo. Atheke Ne sai keklempon la eson akrong pulo, lapen lake monit akhei aphan kepajok asai kali pu honthedamji athai avelo, lapen kopima Ne latum aphan kepajirpon anke nonpu ta eson akanghon dothiplang. Nephan nangkepachini lapen Nephan nangkepatheklongji aphan ansose akeongpi amonit atum dolang asonte pusi ar’idamlo, lapen lason pen si, Arnam aphan man-peng pilo komatma latum penang an aningkan pen ketheklongledet bonta komatna, nonjong ke, ahokpet. Athe kopi ajoinelo Ne bangso apirthe kasorjon? Kopi apot, monit atum henodak pen aphi, Ne latum aphan angton pen pavirthei kalilangma? Kopi athe si angton monit akhei kedoan tame kivirdet nangji angbong le doronglo? Kopilo Ne ok kachepharlo pen akemangdam? Ne sai Ne le kacheklemponbom ahut, monit akhei doan akethor le kachomatlongchot kalilo, bonta akedok ta longdamlo. Pirthe along amonit kedoan angbong pen, komat si Ne kangjinso angbong kedodelo? Jongsi Ne le monit atum aphan khi-dat ahirjume pajirjedet pu asonte, komat si laso apirthe along puanpin akeongpi aningkarong chipi longji? Tangte Ne monit atumlo pu pima nangtum aphan nang adim kapachedotoi ke kapahirjumelo kalilangma? Nang ke Ne monit atum kalidet asonte, bonta alar ke asai keklem atum anchot, nangtum ke tangte Ne kepahirjume angbong le kedoji kalilangma? Nangtum angbong inutnat sitame Ne lamthe keplang atiri chinidam un’elo. Monit akhei – latum aphuthak pima Ne kehodaitang aman-apeng akhi kachobirti pen anpar, lasi penang an latum, “sai keklem atum” pu amen kachelonglok pen, alangtum aning arlo ningkangsamse si birtilo, lapen lasi penang an atum, “Ne monit atum” pu amen kachelong pen, alangtum aning arlo Nephan akanghon si pangcholo. Inutnat tame Nephan nangchongthuiji bor’i nangne; Ne mek hini pen angton theklongpet! Nangtum angbong komatlo aninghang ateng kelongdam, komatlo nangtum angbong pen keplenglim athikpet kachipithek peme? Jongsi Khristo kepangri arat aphan kardom arki avedetlang pulote, nangtum ahokpet si kijut ahut anta chehodaidet thekjima? Kopuson amonit atum si keklem lapen kemathadam kethekji, lapen kopuan akahelo latum damthekji – lahei kadokave alam anke Ne aphrang arjidingklui pen si pathikdammek’etlo.

Akeongdung amonit atum ke Ne akatheang atur kekarbor along Ne arje mumang aphan denglo. Akeongdung amonit atum ke, Ne ningkepathe pen ningrunglo, kiridam along aphrang ahin kedam ketong pen amethang damlo. Ne monit atum aphan Sobar ajakong pen katengkheng ahut, Ne latum aphan cheraikomdunji si dolo; alangtum akai-achethe along Sobar abidi pen kephangno-kepavir kevan ahut, kaphere keremdet apot kachiruijui si Ne nangtoilo, ephong damtanglo te vangthuthelo. Pirthe athak, kadokave hi’i akarjong ajat doan tame kaiketa kesangji adim si chorivungvanglo, lapen ke jutjepin pen monit karlitang arpum aphan pima kechodetji si chorivungvanglo. Ne monit atum! Nang Ne kelana lapen keraikom angkang si dovek nangpo. Methang aningkangsam along dodetrinon! Kaiketa ahir tanrak aot chibiri! Ne hemtun along nang athikdut aot si nang chibi nangji, lapen laso athikdut pen si nang hala hi’isarpo kachomosoi abidi abirudhe thur si chedandun unji. Aling pen sitame nang ke kedamtang along asonthot ke nang choklemrinon, Ne thengno eson asai klemponpo lapen Ne nung ke akaprek asai klemthupo; jongsi nang lason si klemlo tangte, nang ke pap pen kejokji un’edet khangjangpo. Laheihui alamthe Ne nangthanpik khangjanglo kalima? Lake klardaklo athema monit akhei aban asema ke chelar un’elo pima Ne kaiketa monit atum aphan ning kapachibithutoi thanver nangkok. Chepa’aini ra seletdetrinon! Kadokave pima Ne kaningje ke nangtum kijut keledamji kechokvetji apharman si klemlo! Kopima Sobar kenangji keklardak ke kechokche lapen keterbung adim henlo; ansose ningkethe athai kave kepajok un’edet lapen ansose si nang ke heno muchotlo, kachehodaidetji aphan kekhang kepatoite, anke ansose si hala kangthirthedet akarjong ke amethang aphan nanglong ajat avarsai pen tame kilutji abidi longpo. Jongsi nang le laso alam athepi an longdamlo pulote, nangtum athikpet ke thangnat ta kali bonta kepasimuprung anchotlo, ajat punon tame thangnat ahok asai ateng avelo, lapen kangthirthedet akarjong anke nangtum kacheparaipon apot juilutpo lapen lake Ne sai along kepasiksakdun aphan amo kevangvedet lapen kapahi’ipik abidi langno si nangchelarpo. Ladak pen, nangphan ajat apor ahut tame Ne nangchepahaidetji unlo. Madu tame laso alam ardi aphuthak chinidamdelo; monit atum kadokave ta kopima latum karjulong an ano kangthong si chemandet, lapen ke cheroktok puke masapsonat ta avelo. Ne ningdolang ke hako kedamtang ahut kopi si keklemloma pu kali; tangte nang chenam nonpu tame Nephan chonghongding si non ephong “katengne” pen nangphan ansose ingjinsothunon puloma? Monit atum Nephan khamkhelo puvoiphit tame, Ne ke latum abirudhe thurthelo, athe latum anke aman angdeng bipik khangjang, lapen lasi Ne latum aphan akangtui akehangdam abat ta avelo. Kadokave Ne akenangji ke pima latum henonedet nangji, lapen pima latum chekhang si chehodai nangji. Chenam ta lake nangtum ajakong pen abat si laso eson akenangji kachepalongdam nangji kedo kali, kalima? Akeongpi amonit atum anke Nephan si chonghonglo ansose latum aphan alangtum amek kepangkrangji aphan kemanghumeme ason kepaklangji aphan. Tebontame, nang la kadokave sining angsong kemanghumeme doan chinidamlo sitame, ahokpet kopilo nang laso akachinidam pen keklem unji? Lake nang Nephan akanghon pabatchetpoma? Lake nang Nephan akanghon chingthur muchotpoma? Ne monit atum aphan ajakong hotdamdelo, mate Ne latum aphuthak ing’arpler pen akangsai along ta palelelo. Jongsi lahei anke monit atum abinong’et kepho ason kali pulote, Ne latum aphan lapuson kejoike pen amen pachikup longledetji. Kedamtang ahut alam chemathadam lonang: Batai koan si Ne nangtum aphan nongno kejothap dolo? Batai koan si Ne nangtum ajakong aphan kehotdam dolo? Batai koan si Ne nangtum aphuthak nangtum abinong’et kephodam ateng kalipin pen kelangdamlo? Batai koan si Ne lam kaningje doan nangtum aning aklong’et aphan kachepahai un’edet dolo? Batai koan si Ne kaningjetang an nangtum aklong’et karjudunthek ari along kepaphodamdedet dolo? Nangtum angbong komatlo Ne lamthe phererepin lapen klemhurhepin pen kaporhilo, phere’itlo pima Ne ke nangphan karnuknei aherang along si turchorpo? Komat si Ne lamthe pen asat kachechakche abang dolo? Ne lam kaningje along si kachepahemphu tame dolo, bonta lake athe monit atum aphuthak pajoike akangsai kevan’iji pu kali; alar ke, alangtum abinong’et kephodamji heihui ateng pen mathapemelo, Ne latum aphan Ne lamthe arlo kedotang alamjor kaiketa pacheklangbomlo. Ahok alam along, tangte komatne Ne lamthe along Ne kijut un’edet ajakong aphan pangthekdam thekloma? Tangte komatne atheke Ne lamthe kapinchong doan kangthirnei aser kelongdamthek doloma? Koan alamthe si Ne kaningjetang dolo? Komatne lahei doan chobirtidunvet abang doloma?

There 3, 1992