Khristo Arat Alunjir

Muluk keongpi atum Nephan chehoklo, muluk keongpi atum Nephan rolo; kadokave angho pen tame inutpet ahok Arnam amen si barlo, kadokave amonit tame alangtum amek chingpu si Ne sai amo langlo. Khristo arat pirthe amonit atum aphuthak nangsunlo, Ne abangphu ta ingchoklong lapen ongparpiklo. Kopuson si laso along ke chehokhedetpo? Komat si ningkarong pen kankedetpo? Oh, Zion! Nang kehaidong atarpangthek chirunglo Nephan kachehok’iji aphan! Nang nongtheklong kehaidong alunjir pen Ne kangthir amen pachethangji si lunlo! Kadokave sorjontang ahormu doan pirthe jutjetik anlo! Nangmethang aphan checham pangthir paprapnon pima nangphan ke Ne pharman athok-ajir pacheman tahailo! Sining angsong achiklopi-chiklolongso doan! Nang mena adim along chiruithu seraknon Ne jakong kethepik sining angsong along paklangji aphan! Ne no pirthe athak amonit atum ase aphan chipidetlo, komatma alangtum kijut un’e akanghon lapen aman-apeng kipi Nephan lunjir along dunglo! Pini arni an, kadokave kasorjon ahormu doan chethe along chevangthulo, Ne pirthe amonit atum along chevangthulo. Labangso apor ahut, labangso akeklem along, kedoan amir tame chekhang un’epin pen papuplanlo, kedoan avotek-voso tame isinat ase pen lunlo, kedoan ahormu tame chehokjok pen chonprolo! Khristo arat akardom kachipi ase along, Sobar arat anke remdetlo, Khristo arat kabirlakchen alunjir angtong along virduntheilo, anpar thur thekthedetlo!

Komat si pirthe athak kithurthuji lapen chekhangthip unji? Pirthe athak Ne nangkisun pen, Ne me kepacho vanlo, ningkithi vanlo, kadokave ajaton aphan kivir-kephangno vanlo. Pirthe arat an nonke Ne rat si cheman tanglo! Athak sining angsong, inghun ruhumlo lapen oplulo; aber sining angsong, langbi lapen langroi doan thurlo lapen chehokjok pen chihijuktot si keprangset ate’ot dolo. Kesangjoi amarat doan alangtum angthor pen nangtetlo, lapen kadokave amonit tame alangtum karamthi pen Ne ingthurlo. Muluk akeongpi amonit atum kachonghongprong arni nanglechitlo! Latum Nephan akijumenei alunjir heihui si nangpanongpilo!

Labangso akemepik apor ahut, labangso kachehokparpik apor ahut,

kero kepajir si nahok bithe ta arki dolo, sining hemrengme lapen pirthe athak along. Komat si laso along ningarongchenchedetpo?

Komat aning si theang’edetpo? Komat si laso arjan along chiruredetpo?

Laso asining ke hako asining kalidetlo, nonke Khristo arat kachepahemphu asininglo.

Laso apirthe ke hako apirthe kalidetlo, nonke kangthir alongle si cheman tanglo.

Arvethepi hamdet pen aphi, keterbung abarim apirthe anke angton pen akimi pemandetlo.

Inglong doan ta chelarlo … lang heihui ta chelarlo …

Monit atum tame chelarlo … kadokave ahormu doan ta chelarlo….

Ah, laso kangsamri anglong doan! Thurnon lapen Nepharman kannon!

Ah, laso kedothing alang doan! Kejokvan pen lidungnon!

Nang monit atum kaheman amang doan! Nangmethang aphan chingthurnon lapen chingbaidunnon!

Ne kevanglo … Ne henlo Recho….

Kadokave monit akhei doan alangtum mena amek pen Ne raje theklongpo, alangtum mena ano pen Ne se arjulongpo,

amethang aphan Khristo arat achethe pen rengdunpo….

Koan akedokjin … koan akemeparpik….

Tengne un’epin … katengneji aphan kali….

Ne ningkithi amede kithur along, thedung dragon ke’er sungnanglo;

Ne adak-atur pen akangsai along, hi’isarpo anke alangtum ahok-ahak arpum cheklanglo;

Ne kehaijai alamthe along, monit atum angton ta chetherak’itlo, lapen amethang aphan nahok ta chepatu athai avedetlo.

Latum hako alam chemathadamlo, koson si latum Nephan kapatherak lapen kangnekchoiloma.

Latum amethang aphan ane kachepatheoi kavedet pu apor ke avelo, latum Nephan kapatepekdundedet pu apor ke avelo.

Pini arni, komat si kachirure bang dolo? Komat si ningrengnone abang dolo?

Somindar adangpi nahok tame kachiru-charnap si plengsetlo …

Kachehokjok akero ase pen si plengsetlo … kangnek ase si lengjinjanlo….

Kelakha un’edet aningkarong … kepangbarnodak aningkarong….

Arve kejang alang amu keklo … herai athan kachihijir kardikklui achet….

Monit atum aklong’et, ningkarong lapen ningkeoi si dorappetlo … ajahak atum kangnek …

Ajahak atum kachiru … lapen ajahak atum kachehok….

Anuttin tame chetengthei asonlo … lake barla vangbarbar ahut arve lapen inghun ason loma,

barla ahut amr kapapu chingdatri loma, ningkreng vangjirjir ahut kerot puloma,

mate ningkrengpi ahut ar’e lapen herai akangsamjet loma, inutnat ta chinine….

Sining angsong anghun along ke patelangchenlo, pirthe athak talopi alang ke atarthuilo.

Sopo atum alangtum aphang pajap-pajaplo … monit atum alangtum akeng kekan paklemlo….

Tekela atum anke sai klembomlo … tekela atum anke nangvibomlo….

Pirthe athak amonit doan ke angton ta sai keklem tihurnutlo, lapen kadokave ahormu pirthe athak chanri-chanjailo.