Sining Pirthe Adang’an aphan Arnam Alammthe – Ingkung 8
Ne kepaklang alam doan lahei kangtonpon lote, lapen Ne kangsai kijut angdeng ledam lote, laso apor ahut henlo kadokave Ne monit atum paklangtheiji lapen pachoklimpo. Ne somindar pirthe adang atok-ano tame halahei komatma Ne kemathadam pen kacheton lapen ke Ne asai ke’enji aphan apun-achak kedo atum aphan sangsepin pen ridamlo. Komat si thur ra Ne pen kejalangrappet thekji? Monit atum Nephan akanghon ke masapsovet henlo, lapen alangtum Nephan akekroi along tame jinsomeme bipik khangjang. Jongsi Ne le monit atum akeboidet along Ne lamthe kangtangkring pen therdundutde pu asonte, latum ke ane chepathekloipo lapen mepik si chitindampo, cheparokadongpo lapen ahir dojotjot alam pen si chevanpo, atheke latum anke thekpetlo lapen pirthe alam aphuthak doan angton kachinithei asonlo. Halahei komatma kedamtang ahut Nephan “athikdut” atum, lapen halahei komatma pini arni Ne thengno “karjapkluk” atum angbong, komatlo nonpu ta cheparokadong pen kaningjehai abang kedo? Komat si joijoi pen alangtum mena mohut kephodamji apot ningcheparongjoi kavelo? Ne le monit atum aphan jasemet paklangdakde ahut, latum nahok tame chepatu athai ave lapen anke katherak pen si aduk dopratlo. Kopuan sose si chemanpo jongsi Ne le akaprek ahin pen ningjedamlo pulote? Monit atum ansose kethe muchot apreng dolang pu akamatha dopo, kroidampo pima latum aphan thangnat ta peme un’elo, lapen ke alangtum kacheroktoktedet si ketok chipraphetpo. Monit atum ningkethe duredet ahut, Khristo kepangri arat akardom arki nangdopo, atheke, monit atum ningje tanglo, “anghoi along kedo bang throksi aKarjong atum sai keklem kepangcheng apor ahutlo.” Ahin kaprek pen langdam lote, lahenlo Khristo kepangri arat achethe pirthe along jasemet kepangcheng ahutlo; lake Ne kangthirjir menmen si asai ateng keklemponphitji ahutlo (phu tarlok along “kisik-kedangbom” thangnat avelo). Kadokave amonit atum tame ketong pen si dolo, latum amangmun pen kithurthu mate keprangthudak ason puvoiphit tame, lapen, laso mek keprangthu along, amethang aphan lason kephodam along si chemanghuhak pen chelongdamlo. Kedamtang ahut, Ne mondoli kikim alam aphuthak ongdung ningjelo; Ne penang kachepatujoi alam paklangponlo, bonta halaso asai akangtui an keledam ahut, lake menmen pen si nangjutkoklo. Khristo kepangri arat kikim-kerang ke, tebontame, cheprekdak. Karjong plengset ahavar along aron kachedan le kijutsi angdeng kele ahut anchot si Ne sai akimi pirthe athak pangchengponpo. Lake pudam lote, kadokave amonit atum an kachiruithuji dokdok ahut si pima Ne akimi asai jasemet kepangcheng lapen kangthurpon anchotlo. Khristo kepangri arat kikim-kerang lapen mondoli kikim-kerang angbong akacheprek kedo ke pima mondoli kikim-kerang along, Ne monit atheng pima karjong kangthir plengset kecharipon pen ajok si sai klemlo; Ne monit atum aban asema pen jasemet langdam pemelo, alangtum keter’eng amena ale aphuthak paklangdaklo lapen alangtum akedoivet pachichinidaklo. Laso apot si, latum anke amethang aphan laso ateng pen chichinidamlo, lapen lasi anke alangtum aning arlo lapen alangtum alamthe along kroiponlo. Khristo kepangri arat kikim-kerang along, Ne karjong plengset akangthir pen ajok si asai klemphitlo, lapen monit kadokave aphan tame kopima Nelong kedo lapen komatma pu Ne lamthe aphan alangtum kachinidam along’e athak pen si pachinidam longlo, kepadusi ke latum aphan Ne atheke ok kachepharlo aphuthak akachinidam palonglo. Lasi kadokave monit akhei atum keklardakde a’Arnam aphan akiridam jutkoklo, lapen lasi latum tame alangtum aning arlo adim chakchedetlo atheke sining hemrengme Arnam ajoine penlo; lake pima, Ne monit akhei aphan Ne ok nangchepharlotang ahut Ne keklempon asai amo doan pachini longlo, lapen lasi Ne pirthe athak apor anke pajutponpo.
Khristo kepangri arat kikim-kerang ke karjong plengset ahavar aphan si jasemet jongdamlo. Lake pima, karjong plengset ahavar aron kachedan angdeng ke kadokave Ne monit atum angbong ingdeiplang pen pachinidaklo, lapen lake pima mondoli along anchot aphan le kepaklangji dorplup anchot kalilo, bonta lake lapen ansose si Khristo Kepangri Arat Akai along antalo, anuttin abangphu tame kaiketa ron kachedan pen si dolo. Alangtum aok-abang dolo pu tame, karjong plengset ahavar ke jasemet paklangdaklo, lapen latum karjong plengset ahavar achethe pen kacheraphet nangdolo. Lasi, nangtum le kekroi thirklong pangchenglo te, nang ke Ne sai adunthu aphar aphan chisik-chedang pemevek nangpo. Nang ke nang ning aklong’et pen si angton chipithei nangpo; lason anchot pen si nang Ne ning aphan pangsam unji. Ne thangnat ta langdamdelo kopima mondoli along kedamtang ahut kacheman puke; pini arni, lake Khristo kepangri arat along si dolo. Ne kemangdam along, Sobar ke, doan along, akengkamtin along aharchi nangdunkrilo lapen, Ne gian aphan kebeng-kephanji pulo, kaiketa akrong lapen abidi chorivunglo Ne abinong’et akemang kepasiksakdunji aphan si bor’ibomlo. Tebonta Ne laso kahenodak abidi langno along chingbedundet unjima? Sining angsong lapen pirthe athak asontin tame Nephan si ru-thailo; Sobar kahenodak abidi langno ke cheprekdundaklo pu unjima? Lake Ne gian konatma kachichupon klardaklo; lake klardaklo pima atheke Ne sai amo aphuthak kemanghumemepiklo, lapen lake Ne angton kisik-kedang akemangdam aron-atang keklempon henlo. Khristo kepangri arat kikim-kerangbom akai ahut, nonpu ta Ne Sobar kahenodak abidi langno langplotplelang, bonta Ne keklemvek nangji asai cheklembomlang. Somindar lapen kadokave ahormu angbong, Nephan kebeng-kephan pusi Sobar asai amo keklem aphan chongvailo. Tangte lake Ne kethek-kere gian kachepaklangpon kalilangma? Tangte lake klardak pen pima atheke Ne sai aphuthak kemanghumemepik kalima? Khristo Kepangri Arat Akai along kilutdun ajaimek ahut, kadokave sining angsong lapen pirthe athak ahormu doan tame chenam si chelartheipo, lapen latum ningarong chipipo lapen chehokpo. Tangte nangtum akapreklang puhe? Komat aning arlo si pijo alang akedokpik ason kavedetlo? Komat si ningkarong kachehok pachondakdedet doji? Komat si ningarongchen pen kekan abang kavedetji? Komat si kero alamthe kaningje abang avedetji?
Ne la athak kaningjetang lapen kachethantang kedoan aphuthak akemang lapen keplang atiri nang nepdun thekloma, mate nang longlelang? Jongsi Ne laso alam nangarjuje pulote, akeongpi amonit atum kekroidamji Ne ke thangbakbe kaningje padingthaplok pupo, lapen Ne lamthe atiri aphuthak chinidam un’edetpo. Jongsi nangtum lahei mathadam parsikdamlo pulote, nang lahei akenangsot do pu chinidampo. Nang lahei kaporhidam pemeji aphan klem pemepo: Koloso Ne lamthe heihui si nangphan ale kevangvelo? Koloso heihui si nang kai kachingthurdunji aphan akemelo? Koloa bang si karjong plengset ahavar ahok aphuthak kaningjedamdelo? Akeongpi amonit atum kekroidam ke Ne lamthe along thangnat ajir mate ajor ta ave pulo, pima lahei ke kethan kapajirmi lapen kangsirdam jumpik pulo. Tangte Ne lamthe chenam ta puan si ahokhe lapen kachinidamdakji un’ema? Nangtum ahokpet Ne lamthe aphan chipidetloma? Nang ahokpet Ne lamthe dengloma? Nang lahei doan kijui ahormu pusi kehok kalima? Nang lahei doan nang aketer arjan keklangkledetji aphan kebang ape ason le ke’en kalima? Laso kethepik apirthe along, komat si Nephan salajong ahin pen kangsirdam dolo? Komat si salajong ahin pen Ne Karjong alamthe karjulonglo? Penang an amonit atum checharchepin pen si akangting along rilo; penang an atum ke soluk-sodak angbong tame ardomlo; penang an atum, ingchirlo lapen chunglo, ningkethe pen cholanglo; lapen penang an atum ke Sobar si bengthiplo; tebonta penang an atum ke kopunat si chetevar nangjima chini, penang an atum ke Nephan alangtum ningkarong angbong chongthuilo, penang an atum ke chororedetlo, lapen penang an atum ke Sobar kahenodak abidi langno aphan si chepebidunheklo. Komatlo nangtum angbong Job ke? Komatlo Pitor ke? Kopi apot si Job aphan Ne parnolemdetlo? Kopi apot si Ne penang an apor tame Pitor aphan parnoverlo? Nangtum kopima Ne nangtum aphan ningkethe kedo alam kelongdam doloma? Nang lason ahormu aphuthak kamathadam keparsik apor chipipik nangjilang.
Pitor ke Nephan penang an aningkan aphan kroithiplo, tebonta alang kasedengkak ave mate thangnat kesorsar avelo; Job tame alang ason chepangbardun un’e, lapen, aovetin sitame, kangthirjir sangho atum doan Pitor ason kemandunji helopiklang. Alang Nephan kachiniji kiri anchot kali, bonta Sobar le kahenodak abidi langno kisikbom apor ahut tame alang Nephan kachiniji si vanglo. Penang an aningkan aphan laso ajok Pitor ke Nephan ru-thai longlo, kaiketa Ne akar’idam ateng pen si pachetonlo, lapen laso athe si, alangphan ke Sobar pasungji un’edetlo. Pitor tame Job akekroi pen si charliponlo, tebonta klardak pen Job kisung kephoji alam theklongdaklo. Job ke akekroi mepiklo puvoiphit tame, alang ke karjong plengset ahavar aphuthak kachinidam duredetlo, lasi alang penang an alamthe pulo pima ahok asai ateng pen chetontepin; lake pima Job akachinidam ke ingdeihek lapen kechoklim ahin ledamdepin pusi cheklanglo. Laso apot si, Pitor ke kaiketa karjong akamatha kelongji aphan si ardi chipisiplo, lapen kaiketa karjong plengset ahavar akemeparpik aphuthak kelangji si parsikjik pen dolo. Laso ajok si, alang ke kopine Ne ningkehangdam ateng kelongdamthek anchot kali, bonta Sobar kahenodak abidi langno apahuthak masapso ardi dojot kachinidam dolo. Lake athema, alang Nephan akachinidam ke aovetin tame bang pen anpar themulo.
Pitor kachomatdamlong ateng pen, lake kelangji sungkrungkrelo pima jongsi monit atum Nephan kachiniji ningkehang dolote, latum alangtum akarjong along kelang chepangchingdam pemeji si ardi chipivek nangpo. Ne arjujelo pima nang Ne pharman le penang an aphant ke abat “apor chipidet” puke; lake adunthu le klempon ta chokji. Jongsi nang le Nephan chinilo pulote, kadokave akekroi, akanghon lapen athikpet atheke nang kaningjedam anke bonta kehemandam saidelo; lahei anke angpip saide, lapen nang ke chenam-chenum si komatne hala komatma Ne thengno ke cheparokadonglo bonta amethang aphan amat kachininepin abang si chemanpo. Lason along, nang ke puthot ephong Sobar apham along chingnanglipo lapen nangmethang aphan chepajokplot thekthelo; nang ke kai apar kai kisung kephoji asopo lapen kivirdet nangji ajaton si chemanpo. Tebontame, jongsi nang le Ne lamthe aphuthak ingsamklak lapen langpeme lepute, nang ke theklor si Nephan patepeklo. Lake ahoklo, lapen nangphan akemeji ke karjong plengset ahavar anghap pen ajok pima Ne ado kipitang penang an lapen keprekjam akarjong aphan langponnon. Koloso abang si Ne lamthe pen kachetongtang anke ainihak, lamemedet lapen kedengdundedet kedolo? Kolo si latum angbong pen Ne lamthe aphuthak kedengdedet dolo? Kolo si latum angbong pen Ne lamthe along akechokche kiri bor’idamdedet dolo? Kolo si latum angbong pen Ne lamthe aphan ke “kacheraikom arisim” atheke amethang “cheraikom” aphan ke’en’edet dolo? Latum Ne lamthe athepi aphan atheke Nephan kachini’iji puke en’edetlo, bonta kijui’iji ahormu ason si pamandetlo. Laso along, latum tangte Nephan thekdak si kekhang kalilangma? Komatmatlo Ne lamthe anke? Komatlo Ne Karjong? Ne nangtum aphan lason akarju penang aphong arjuponlo, tebonta nangtum lahei aphuthak akangtui lapen keklardak aklong’et alam longdam loma? Nang ke tangte ahokpet lahei chomatdam longloma? Ne puthot non aphong nangphan ningpachibitoilo: Jongsi nang le Ne lamthe chininedetlo, mate lahei dengdedetlo, mate asai ateng pen klemkledetlo pulote, nang ke Ne ado kipi ajaton kemandetvekji abanglo! Nang ke chenam ta Sobar kepavir atum si chemanpo!
Thangthang 29, 1992
