Sining Pirthe Adang’an aphan Arnam Alammthe – Ingkung 12

Nihang anatthu pen sining kabirlak ahut, atheke pima Ne lamthe kaningje kecheng aporchit ahutlo – bangso sining kabirlak ahut, sining lapen pirthe angton tame theangplinlo, lapen chiklolongso kedoan along kachelarphun ason nangchemanlo. Angton monit akhei tame asai patang peme asonthot si dolo. Nihang anatthu pen laso atur nangkeapvong akatheang arum along, kadokave monit akhei doan tame alangtum abinong’et arpum cheklangtheilo, alangtum amek pariro’etlo, kopi si keklemji thekthedetlo, lapen koson si alangtum aketer aot-adur kepatuji thekthe muchotlo. Latum anke hala marat-mareng atum ason pima Ne katheang atur pen katjuilo lapen inglong alongku arlo chepachongdamlo – tebonta inutnat tame latum angbong Ne katheang atur angbong pen chepatu un’elo. Kadokave monit atum doan ke manghupronglo, kadokave ta chonghongdinglo, kadokave ta cholangpronglo; Ne katheang atur nangkele pen, kadokave laso arni latum kachehok amahang nangtheklo, lapen lasonthot si kadokave laso arni latum ahirjuno anta amahang nangtheklo. Lahinhin akamathadam kedo ke kachethandakji sungpik khangjang; methang adai kechokche apot ningchirui amekkri langroi manlo, lapen ke laso atarthui along si inglangpondetlo, menmen si konatlone kepon theklongledetlo. Puthot ephong, Ne kadokave monit akhei aphuthak arni patebokthulo, puthot ephong monit akhei aphan ingthurthulo, monit akhei aphan akaprek akimi kecheng pithulo. Ne ning katharun lapen, Ne ningkatharun arki ateng pen, inglong heihui tame chehokjoklo, lang heihui tame ningarong pen kanlo, lapen lang atarthui ke arlong athak chingthudamlo. Ne ning arlo kopi si kedoma kachethandamji sungkrunglo. Ne ke kadokave keterbung ahormu doan Ne kelangpangching arum si amepun selamdetji ninghanglo; Ne ke kadokave athikpetpedet asomar doan aphan Ne mek athengno pen pavirdetji si ninghanglo, kerengbom along anpar ke arjipadingdelo. Ne ke dragon ke’er thepo kedo adim along anchot le akimi kepangchengthu kalilo, Ne ke somindar adangpi si akimi asai aphan kengkam chejorpon tanglo. Prapjin pen, pirthe adang the-bi kedoan tame Ne kepangri arat si chemantheipo; prapjin pen, pirthe adang the-bi kedoan tame Ne kepangri arat ajoine kerengbomji kaike aphan chingtonkokpo, athema Ne ke haitanglo, athema Ne ke kehaidong kachehokjok pen si vangtanglo. Dragon ke’er thepo le Ne kemang along kapasiksakdunji pu asontin akemathadamthek abidi pen chitingkrup dolo, pirthe athak along Ne sai kepapreidetji aningkethe dolo, bonta Ne si laso kahenodak abidi langno pen ajoine ningrunhupji puloma? Tangte Ne si laso kapaphere ajoine pen okchunghur si ningkethe chepangbodetpo puloma? Sining lapen pirthe along esonnat ahormu sitame pima Ne ri hongni along keotthip kalidet puke avelo; kopuan si laso ahok dragon ke’er thepo pulo, laso abidi pen pima Nephan kephangnodunji pu kabor’ipon? Tangte laso aphan sitame Ne rideng ninghang ateng pen katervarmedetji ajaton kalilangma?

Ne monit atum apirthe along ok nangchepharlo ahut, monit akhei doan ke Ne kapinkhat arum si vangtanglo, mathadamdepin pen pini arni anlo lapen Nephan kachinidam tame mathakrang pen nanglelo. Bonta, pima ephrang kachetongji atovar koson si kedamjima puke, inutnat tame mathadamletle, inutnat tame chinine – lapen latum aphan kopu ahin anatthu si laso atovar keponjima puke madu tame chinine ongchotlo. Jakongtheparpik Abang latum aphan kelangdun pangching pen anchot si bangso atovar kijut an madu tame dunthekji; Nihang anatthu sining kabirlak akapinkhat pen si madu tame Ne kepangri arat ahavar along keponji aphan pima laso ahoi kapkrak unji. Monit atum angbong, inutnat tame komatma Ne arje ketheklong abang avelang, komatma Nihang anatthu asining kabirlak ketheklong abang; tangte koan si akijumjilang Ne inghoi pen lam kaningjepon doan inutbak ta karjudunlong atum? Ahokpetlo, hako akai ahut pen, inutnat amonit sitame Ne bangphu pen jasemet chephosap pu avepinlang; pini arni acnhot, nonke pima Ne pirthe along vang tanglo, Nephan monit atum ketheklongji avarsai pen klemponlo. Bonta non anta, monit atum nonpu Nephan chininelang, latum Ne arje cholangding chotlo lapen Ne se arjulong chotlo tebonta Ne alamjor ke chinidamdepinlo. Kadokave monit atum doan ke lasonlo. Ne monit atum angbong pen inut tangdet, nangtum Ne arje ketheklong ahut arsikjik kacheparokadam ason kamatha avema? Lapen nang Nephan kachininedet ajok athema nang kachetherak’it ason chemathadamdema? Ne ke monit atum anglum si damlo lapen Ne ke monit atum angbong si dolo, athe Ne ke ok cheman tanglo lapen Ne ke monit atum apirthe along si vangtanglo. Ne akemangdam ke Ne ok aphan monit akhei atum nangpalangprong lonang puanchot kali; ansose akenangsotnei dolang, lake monit akhei atum Nephan pachininang pulo. Kopilo ansose kedolang, Ne ok nangchepharlo pen ajok monit akhei alangtum apap doan Ne pangdakpo; Ne si Ne ok nangchepharlo pen ajok, dragon ke’er thepo aphan paremdetpo lapen laso ahokhe kapachobei pavirkok khangjangpo.

Monit atum pima pirthe along kedothip anke chiklolongso koanma keong lason thakthaklo puvoiphit tame, Ne latum aphan kadokave koanma keklardak Ne mena aripak ateng si chinidamlo. Lapen, monit atum le pima Nephan “kanghon” anke kelakha un’edet talo along asangtimili asonlo puvoiphit tame, Nehin pen masapso ansi ingvai chotji: hala komatma katheangdang atur kiridun atum, komatma hala Nephan “kanghon” pu pen akaprek atum doan. Ne ke monit aphan ajakong lakhadamdelo, mate Ne ke alangphan ajakong hotdamdelo; alar ke, Ne alanglong kedolor ajakong ateng pen si monit aphan kehang padolo, lapen lasi kopima Ne akenangji anke Nephan chingkimesen pen komatma kiri abangphu henlo, pima Ne akemangdam monit atum aphan kangvaiji along chunji mene pulo. Inglong along akeongpi ok kevan kecho amarat dopik, bonta latum doan tame Ne thengno ke biresak ason thakthak si chingkimesenlo; bangso atarthui arlo kachinidam un’edet kachepatujoi ason dolo, bonta latum amethang aphan Ne thengno ke pirthe athak kadokave ahormu keklardak ason si cheplanglo; sining lapen pirthe athak ahavar along ke pima monit paledam un’elo, tebonta Ne ke halahei kepaledam un’edet ahavar along si ninghang aling damlo. Monit ke katheang atur along Nephan pangthekthepinlang, bonta Nephan kangtingkuk apirthe along ansi theklong chotlo. Tangte nangtum anke pini arni akai ahut kepho asonthot kalilangma? Lake dragon ke’er thepo kephangno asai kangtonponji pu henlo pima Ne sai ok along pen keklemponji kechenglo. Dragon ke’er thepo le ahokpet arpum kechengsi apharman kacheklang ahut lote, Ne men aphan Ne hakhi dopo. Ne le monit akhei atum atovar along kengkam kachejor ahut, esonnat api mate inutnat abangphu tame menmen thiriktet si cheroktok ason ave, lapen lasi Ne monit atum apirthe along ok nangchepharlo pen kevang ahut, majok ta nangchininedetlo. Bonta, Ne ok nangchepharlo along, Ne sai Ne kacheklempon pangchenglo, monit akhei amek pranglo lapen ke alangtum Ne kangrengkrung ase kethe ajok mangmun pen thiriktetlo, lapen laso ahut pen anke, latum Ne kapinkhat arum si alangtum akai chepangchenglo. Ne monit atum angbong, Ne akimi asai puthot ephong pangchengthulo. Ne sai pirthe athak keklempon ke patang pememelang pu ningje tangdet pen paklanglo pima Ne monit atum komat aphanma Ne kaningjedam anke halahei Ne ning arlo Ne akenangji saidelo, bonta ajat punon, Ne latum angbong pen ajahak aphan ingvailo. Lake laso along pen si thekdaklo pima Ne ke Ne monit atum aphan Arnam ok chepharlotang aphan kapachini anchot kali, bonta latum aphan kecham pangthirlo. Ne kepangripon ketoi aron karsikjik ajok, akeongpi aphai amonit atum anke nonpu tame Ne kepavirdetji akisung along si dobomlang. Nangmethang pen amat le asontin asai nang cheklemponpe lote, nang mena abang chepadojoiji aphan – nang lason klemkletik anke, nang ke pima Ne kelangselet lapen kevartang ajaton si chenam ta chemandetpo, meherang along si damnangpo, Paul le Ne rideng pen ado kipi kephonangkok ason, atheke nahok ta chepajokji athai avelo. Nangtum Ne lamthe along pen kopine longdam doloma? Aphrang ason, lake Ne ninghang ateng penlo mondoli kecham pangthirji aphan, Ne kenangji amonit atum aphan kepangthirjirji, athema Ne henlo Arnam Amethang, komatma kangthirnei lapen thangnat aketer-ke’er kavedet abang. Ne kardomhem mukak alir ason kacheprekjam anchot le Ne pinchongji kali, bonta aketer pavepin akangthi si pemanpo, arlo sitame athak ateng pen pachingbarpo. Ne kedobom along, nangtum, kadokave tame, kedamtang arni ahut kopi si nang keklem loma chemathadamthu nangji, lapen pini arni nang Nephan choklim ningkepangsam Ne ning arlo nangpi thekjima thekthema cheparai nangji.

Monit ke Ne ok along Nephan nangchininedetlo; anpar sitame, alang ke alang methang pima ok abang arpum along kedo aphan anta chichininedetlo. Penang an aningkan tame, monit atum ke Nephan chongthuibomlo, Nephan ke angtan pen kahumridam abang pusi hokbomlo. Penang an apor tame, latum ke Nephan “alangtum ahem anghap” chingkir si angtan bilo; penang an apor ke, latum Ne thengno si arjaplo, Nephan thangnat ardi pipelo; penang apor ke latum Nephan akaprek amonit atum angbong kache’o pangdaklo; penang an apor ke, latum hi’isarpo athengno si Nephan patepekdetlo; lapen penang apor ke, latum Nephan alangtum kesoithap angho pen tengkhenglo. Tebonta Ne ke monit akeboidet doan ningchibibedetlo, mate Ne amat ta, alang athikpetpedet aphuthak, so alar so puke hanghedetlo. Kadokave Ne keklempon ke alang kesodet aphan dovai pidunlo, laso ajok alang keme un’edetji akeso kemedetji aphan, lason pen alang ok-pran chelongthuji aphanlo, pima alang Nephan nangchiniji mene pulo. Tangte Ne sai keklempon anke monit akhei kereng longji apharman, monit akhei aphan chethe kipithuji pu ajoine kalilangma? Penang an aphong Ne pirthe amonit atum along vanglo, bonta monit atum ke, athema Ne mena jongjung abangphu pen si bangso apirthe along vanglo apot, Nephan thangnat ardi pipedetlo; alar ke, anuttin sitame alang si kechok chekronglo lapen amethang aphan si akrong chirireplo. Latum chinidamchomlo pima sining arum kedo asontin atovar tame Ne rideng pen si vanglo! Latum chinidamchomlo pima sining arum kedo asontin ahormu tame Ne kehoktang ateng si dolo! Komat abang si nangtum angbong pen alangtum aning arlo ningkangsamse birtihaiji? Nangtum angbong komat abang si ingdaiplang pen kepajut keledam kehaiji? Ne ke joijoi pen Ne sai aphuthak monit atum angbong cheklembomlo – lahenlo. Jongsi, Ne ok nangchepharlo apor ahut, Ne monit akeboidet doan aphan diya un’edet asonte, kadokave monit akhei ke, Ne ok nangchepharlo ajoine pen anchot si, alangtum akereset pen pherekrangpo, laso ajoine ke Meherang along klo’etpo. Lake athema Ne Methang aphan chepabihek lapen Methang aphan chepatujoi pen pima monit atum kivir pen jokplotlo, Ne ado kipi pen ajok kejok chetong longlo, lapen, lason pen si, pini arni nanglelo. Pini arni an koson si nangkele loma matha parsik nangji, nangtum tangte penap ansose pima nangkeleji aphan chehokjok nangneloma?

There 8, 1992