Chehoknon, Kadokave Amonit tame!

Ne akatheang along, monit atum katheang atur thekthu longlo. Ne lammthe along, monit atum pima latum kachehok’idam ahormu longdamlo. Ne Nihang anatthu pen si vanglo, Ne Nihang anatthu si kabochelo. Ne nongthe cheklangdak ahut, kadokave adet doan tame tur’angpo, katheang arlo si vanpetpo, kangtingkuk along majok ta dodelo. Khristo arat along, Arnam amonit atum kedo achethe ke pima kalakha un’edet aningkarong si dolo. Monit atum akai kapahirjume pen lang heihui ningkarong kekanlo, inglong doan monit atum penpen Nelong ki’ik un’edet apot chehok’ilo. Kadokave amonit tame chitingkruplo, chepeduklo, alangtum Ne rat arlo asotdut chepaklangponlo. Khristo arat along, kachedandong ke avelo, kekhangthip anpar avelo; sining lapen pirthe tame lahinhin angbong chikilo, monit lapen Ne tame kamatha akarsikjik pen chetebokhetlo, chethe kedokjin ningkarong parpik pen ajok, lahinhin charchung seroilo…. Laso apor ahut, Ne chethe sining hemrengme along pangcheng pemelo. Sobar kepasiksak anpar ke avelo, lapen monit atum kesang along lutdunlo. Somindar adangpi, Ne kangvaitang amonit atum Ne nongthe arlo si dolo, kepangbar un’edet ahirjume si plengsetlo, monit atum angbong le monit atum kedo kali, bonta monit atum Arnam pen kedo asonlo. Kadokave monit akhei doan tame Sobar kephangno pen chetonglo, lapen chethe akeho lapen akedok ardi kavenei anta jun longlo. Nonke, Ne katheang along renglo, koson si chehokhedet unji? Koson si laso akemepik apor thangbakbe kache’obupji lapen kapachiruijui kivipo? Monit atum! Nang ning arlo lunjir lunnon lapen Nephan ningkarong pen kannon! Nang adai kave aning ingthurnon lapen Nephan la nangpajirdetnon! Cheng nang thipnon lapen Nephan nang ning arong chipinon! Ne akachehok somindar adangpi pen ajok atur patheangplinlo! Monit atum aphan Ne nongtheklong arje chepaklangponlo! Ne ase kethe pen hangpo! Ne somindar adang aphan palitplotpo! Monit atum angbong Ne kacharipon cheng’etlo! Nephan monit atum rung pangtui’etlo! Ne athak sining kilir along patelanglo lapen monit atum Ne pen si kengkam chejor rappetlo. Ne monit atum anglum si damlo lapen Ne monit atum Nephan nangkomchenlo! Monit atum aning arlo kachehok dolo, alangtum alunjir pen somindar paklemhurlo, sining angsong panghangringlo! Somindar anpar ke ar’e kebangthip apot oplulelo; anpar ke inghan avelo, anpar ke lang keter pangrumrelo. Somindar adang kangthir amonit atum! Ne kelangchari aber nang ahokpet abang arpum nang chetheklonglo. Nang ke keter-ke’er kebangthip amonit kalidetlo, bonta charkletang arlongso akangthirjir sangho asonlo, nang ke Ne kachinghonei atumlo, nang ke angton Ne kachehokjok atumlo! Asontin ahormu doan tame chethe along chevangthu tanglo! Kangthirjir sangho atum anke sining hemrengme along Nephan kiru-kethaiji si chedamthu tanglo, Ne kepangrom kanghon’op along lutdun tanglo, anpar ke chiruredetlo, anpar ke ningriredetlo, amethang amat si Nephan chehodaidetlo, Ne hem along chevangthu tanglo, lapen alangtum ahem arong along latum Nephan akanghon chingtontelo! Kai apar kai sitame chelarledetpo! Konatlo ningkiduk! Konatnatlo mekkri anke! Konatlo ok kedo! Pirthe ke virdetji, tebonta sining ke kaike dobomji. Kadokave amonit aphan Ne cheklanglo, lapen Nephan kadokave amonit ta kero pilo. Laso akai, laso alon akeme, kachinidundedet apor kecheng ahut pen kijut an tame, lake chelarlelo. Lahenlo Khristo arat akai lo.