Kadokave Ason ta Arnam Alam pen Ajok si Longlo

Arnam ke kai keprek asonthot si lam kaningje lapen sai keklem amo pachetonlo lapen aove keprek aling si, Alangli lam ta kaningje papreklo. Arnam ke aron ateng pen damde, lapen isivet asai klem lemdet lapu kali, mate kedamtang alam pen apot kachingtungdam lapu ave; laso a’Arnam ke kaike ta akimi lapen akeban Abang kalilo, lapen arnivang ta lam akimi si ningjelo. Nang ta lason thakthak si pini keklemvek nangji asai ke pini angbong keklem petangvek nangji; monit atum keklemvek nangji asai ke lapuson helo. Keklem kedam kacharli an ta non akai along kedobom Arnam alam lapen akatheang angbong si klem nangji. Arnam ke aron ateng sai keklem abang kali, lapen Alangli gian lapen adak-atur kachepaklangdakji aphan ke kaprek ason pen ta lam ningje. Alangli Karjong anat pen si kaningje ma, mate monit aphan ma, mate kaprek abangphu aphan ma lale akenangsot kali – Arnam ke kaike ta Arnam lo, lapen Alangli monit aning kamatha ason ben le lam ningje pu sita Alangli ke Arnam kali pu nang pu un’e. Arnam kaprek kaprek ason pen lam kaningje ajok ajahak amonit atum akekroi ta prekdak ason dolo. Lason amonit atum ke Arnam aphan kachinine atumlo, lapen Alangli sai amo an kachinine atumlo. Arnam jongsi isi amo pen si lam ningjechot pulote, Arnam pen ajok monit atum aron semarmedet jima? Monit aphan Arnam lason pacheplang longji ma? Arnam ajat amo pen le lam ningje pu sitame, Alangli keklem pakejoinaknelo. Arnam jongsi Karjong amo anat alam si ningjechot pulote, Alangli pen nang cheraphet unji ma? Lasi, ahut pen ke, akaprek amonit ason lam ningje si Alangli lam itum aphan nangpedorlo lapen ahok anat nangjalo. Ajat ason le Arnam klem sita choklim. Thihek pen pudamji pulote, ajat ason ta Arnam si klemlo, lapen nang akaprek ke mathathap nangnelo. Alangli ke Arnam lo, lapen ajat amo pen le lam ningjedam sitame, Alangli ke kaiketa Arnam lo. Lake kahili un’epin ahok alamlo. Alang ajat le klem sitame, Alangli ke Arnam verlo, lapen Alangli kopima lake chelar un’elo. Pitor ke Arnam aphan chinghonpik lapen aning doan pen si Arnam aphan chinghonlo, bonta Arnam ke alangphan Hemphu lapen Kapejok Abang pu amek pen le kelang kali, kopima monit aot ke laso atenglo, lapen lake chelar un’elo. Arnam sai keklembom ahut, Alangli komentune ta aron ateng pen damketke, bonta Alangli sai amo ale kedoji aphan lapen monit atum Alangliphan ansose kachini muchotji aphan akaprek kaprek atovar pensi sai klemlo. Alangli sai keklem asontin ta monit atum Alangliphan ansose kachiniji, lapen monit aphan kepachoklimji si klemlo. Ajat atovar pen le Alangli sai keklem pangcheng sita, asontin ta monit aphan ale kevan lapen kepachoklimji si klemlo. Esonbak asai amo jongsi ajir dingpik an klemlo pulote, lake monit aphan ansose Alangliphan kekroi kepathirji aphanlo. Lasi, nang ning arlo asap ta kamatha kithirthe avedet nangpo. Lahei ke Arnam asai keklem amo saidelo, lapen nangtum kroivek nangpo.

Pini kopi si kaningje ma lake ahok anat kedam atovarlo – sining anat karlu kali, mate recho atum ason det kapangri kali; la kaningjetang alam anke ahok atovar anat si kedam mate kilutlo. La pen anpar sai kechoklim ke avelo, lapen recho ason rat kapangri alam kaningje lake sai amo kali. Monit atum ke kacharli kangtung aning hangpik, lapen pini arni anta alang mena kekroi ateng pensi Arnam asai ta punbomlang. Arnam asai keklem kaprek kaprek ason theklonglok aphi ta, Arnam asai kopima non anta chininelang, lapen kamanghumeme asai lapen angthek aphan ribomlang, lapen Arnam alam ateng pen chekoklo ma chekokke ma ribomlang. Lake manghumeme akilu lapen kachinine kalima? Arnam alam ateng pen kachekok ason nang theklongle pute, Alangli ke Arnam lo pu nang kroi langma? Pini arni, mondoli along ke’ongdung amonit atum ke lason angthek lapen kamanghumeme ason aphan si chonghong phronglo. Arnam alam ketoktang apot jongsi chekok bomlo pulote, Alangli ke Arnam lo pusi pulo; lapen Arnam alam jongsi chekok ke pulote, Alangli ke Arnam kalilo. Tangte, Arnam kaningjetang alam chekokbom apot si, Alangliphan kroibom loma, mate Alangli ke ahokpet Arnam lo pusi kekroilo? Monit atum Arnam aphan kekroi aron chepechok nangji! Nang jongsi Arnam alam kachekok theklongledet pulote, nang Alanglilong pen katjuipo – lake Arnam aphan kekroi loma? Nang jongsi Arnam aphan kroilo tangte, ajat ason ta Arnam akangjinso arideng hodaidet nangji lapen Arnam asai an kroipet nangji. Aron barim aloh along Arnam kaningje ason ake’ongpi do – tangte kolo abang si nang mek hini pen kachekok nang ketheklonglo? Tangte, lahei alam kachekok nang theklongledet pen apot Jehova ke Arnam kali pu nang pudet haima? Ajahak atum ke Arnam alam kachekok ketheklongle pen apot, kekatji aning hanglo. Kekat kangtung atum kat tame; latum aphan badu ta khang dunde! Klem langlang tame. Kat thek ma thekthe ma kat langlangtha. Nang katphit sita, nangchirui thuvekji. Arnam ke Alangli lam pen si nang phuthak nangcharilo, lapen nang jongsi mondoli lapen Arnam alam aphan che’o tekangji pu sita, nang kerengji atovar si avedetji. Nang jongsi kroi ingtungte pulote, klem langlang tame – puan damjui ta longji pusi nang kamatha ma? Arnam akarjong si nang phuthak charilo. Nang kat un’e. Lake Arnam kachari ahukum aronlo! Ajahak amonit atum jongsi klem ingtung pulote, klem ra asat chelang tame! Laso amonit ke Arnam kali pu nang ningje ra, Alangli ingno pap klem pen Alangli kopi si klemji ma nang asat langtha. Lapen ajok nang ok ke thithedet tahai lapen nang methang kecho a’an lapen kachingthang ape-ari longlok tahai, bonta nangphu pen archak un’e detji; pima nang matha sungpikji lapen nangduk dopikji; lapen lapen anpar kisung ke avedetji. Monit atum aning kamatha aduk kedo lapen kisung chechak un’e – ok aduk kedo ke chechak undet tahai, bonta, ajir kidingklui akamatha kisung lapen akachenek ke chechak un’e. Pini arni nang ajat angthek lapen kamanghumeme ason theklongledet tahai, bonta majok ta kekatphitji ajakong ave, pima Arnam si Alangli lam aphuthak jakong do. Matha un’e, checharche, ahokpet alam nangkele pu ta ave – bonta monit atum kat un’e. Tangte lahei ke Arnam keklem asai kalima Monit aphan chethe kipiji si pini arni Arnam pirthe vanglo. Monit atum kamatha ateng pen, Arnam lapen monit angbong kachemesenji aphan angthek pen lapen kamanghumeme asai kapeklang pen monit aphan bei’i’e. Chethe aphan mathathedet, bonta Arnam kepaklang angthek lapen kamanghu meme asai kepaklangji aphan kamatha’e atum ke, Pharisee atumlo! Lapen Jisu aphan thengparpan athak kesak ke Pharisi atumlo. Nang kachechar angkang ateng pen si Arnam ajakong kethe ta kipun pulote, lapen Alangli lam chekokchot Alangliphan kroichot, lapen kekroi kethirthe lapen Arnam aphan kaningje pinrem pulote, nang Alangliphan thengparpan athak sakbomlo kalima? Lason amonit atum ke alangtum keklem nangji asai aphan mathakranglo, lapen karengme aphan amek kethe atumlo!

Ehin anat langdamlo pulote, monit atum angbong kechokche kethenei ke Arnam sai keklem amo kachini dunde helo. Monit atum aning arlo kachekrongkre ave, bonta aning kamatha kithir avedet. Monit atum chekrongkre pupe, bonta kalanglo puta puthipthe. Monit atum jongsi Arnam sai keklem amo chini peme pulote, latum katjuijedetji. Lapen non eson kechokche kethedung ke, monit atum kechoklim pu kopi ason ma chinine. Pini arni, monit atum anta Arnam alam pensi chepho’etlo; laso ajok, non ephrang ke kemanghumeme angthek lapen asai aphan ketheklongji si matha nangnelo. Ne nangtum aphan nangthan daklo: non kedobom angdeng ke, Arnam alam anchot si nang chechar chotji, lapen ahakhi le avedet sita, Arnam achethe pen ajok monit aphan pakeng’un. Laso asai ke Ningkan suri keplengtang aRecho Arat pen asailo, lapen nang jongsi laso asai pangthek thekthe pulote, nang ok aini si chingkoi buppo; asat angbong nang klo si, lapen kapherememenei ke, nang ke Sobar aban plangdetpo. Arnam pirthe kevang ke Alangli lam kapachetakji aphan; lapen nang ke’otbom ta Arnam alamlo, nang ketheklong ason an ta Arnam alam lo, nang karju long ta Arnam alamlo, nang kekroibom ta Arnam alam helo, nang kepho kachetong ason anta Arnam alamlo, lapen Alangli lam along Arnam kedodun ke monit aphan kepachoklimji aphanlo. Alangli thangnat angthek lapen kamanghumeme asai ta paklangkle, lapen kedamtang Jisu keklemtang asai Alangli klemthu voivelo. Alangtum ke Arnam lo, lapen ok pensi manlo sita, Alangtum asai keklem amo cheprekjamlo. Jisu pirthe kevang ahut, Alangli ta penang an Arnam asai klemlo lapen ajahak alam ningjelo – bonta Alangli kepaplenglim asai ke kopilo? Alangli kepaplenglim asai ke thengparpan athak nang kithi helo. Alangli monit ason cheparjan si, pappi ason chekrong si monit akhei an aphan pejoklo, lapen monit akhei apap ajoine si Alangli pap alar charkli detlo. Alangli keklem kapangthimlim asai ke la helo. Alangli pen ajok mo aphi kevangji atum aphan thengparpan atovar peklang tekanglo. Jisu kevang ke, pap pen kapejokji aphan si Alangli kevang. Alangli monit akhei aphan an pejoklo, lapen monit atum along sining arat abirta keme vanpilo, lapen, lapen anpar, sining arat kedamji atovar alang vanlo. “Itum thengparpan atovar suding si dam nangji, lapen thengparpan ajoine si emena charklidet nangji,” pusi aphi kevang atum anke ningje rintilo. Ahoklo, kecheng ahut ke, Jisu sitame ajahak asai klemlo lapen monit aphan aning kapachiruiji lapen apap kachekobirji aphan lam sitame ningjelo. Bonta, Alangli keklemji asai binong lake thengparpan athak kithi helo, lapen ningkan kethom ra chiklo jonthrok Alangli birta keme kapachetak ke laso aphi thengparpan athak kithiji aphan kachisiklo. Abatai ke’ongdung Jisu Arnam kardom ke thengparpan athak kithi alam aphan ta ardomlo. Alangli monit ason kereng lapen ningkan thomkep ra kethom ra ebeng Alangli pirthe athak kereng ke thengparpan athak kisung kachechak asai kepachunji aphanlo; lahei ke Alangli laso asai kepatang unji aphan jakong kipidun asonlo, lapen laso ajok thengparpan athak kisung kachechak arpu Arnam Alangliphan pidetlo. Tangte pini Arnam monit ason kacheplang pen kopi ason si kichunpo? Pini arni, Arnam malomso aphan monit ason cheplang si “Lam ke monit ason planglo,” pu ketoktang kapachekokji si laso alam pen ajok monit aphan kepachoklimji, lapen laso alam pen ajok monit aphan kepadengji lapen lam aphan kangsirji si la klemlo. Alangli lam pen ajok ale lapen chethe kelongji aphan; Alangli lam along Alangli sai keklem ason-amung nang theklonglo. Arnam alang lam pen ajok si nangphan nang ingsirlo, lapen ajok, nang jongsi kisung pho lote, lata Arnam alam pen ajoklo. Pini arni, Arnam ke hakhi pen le sai keklem kali, bonta lamthe pen. Alangli lam nang phuthak vangdet ansi Karjong Kangthir nang ning arlo sai klem thekji lapen ansi nang kisung sita phoji lapen kerengme sita phoji. Arnam alam pen anchot si nang ahokpet kopima chiniji, lapen Arnam alam anchot si nangphan nang pachoklim unji. Lasi, jonghe pu sita nang laso alam chinivek nangji: kijutpo dokdok ahut Arnam keklem asai ke Alangli lam pen ajok anuttin amonit aphan kepachoklimji lapen monit aphan keja dunji si klemlo. Alangli sai keklem anta lam pensi klemlo; Alangli ahakhi pen ajok nangphan ado nangpipe. Penang an aphong ajahak atum Arnam aphan deng molo. Arnam ke nangphan nang pasiksakse, nang ok aphan ado nangpipe, lapen thangnat akisung ta nang phophe – bonta Alangli lam nang phuthak kevang pen, lapen nangphan nang kangsirji pupen ke, nang chechak un’e detlo. Lason kali ma? Sai keklem atum an arni ahut ke, monit aphan aling kave ahilik arlo si Arnam pevar toilo. Tangte monit atum aling kave ahilik arlo chenam si janglo ma? Bonta monit aphan lam pen kangsirbom ahut si, monit atum aling kave ahilik arlo lutdamlo. Lasi, kijut arni nangle dokdok ahut, Arnam monit ason kacheplang ke, ajat ason pen ta lam pen si kepachunji aphan klemlo. Alangli lam along anchot si Alangli kopi ason ma theklongji; Alangli lam along si Alangli ke amena si Arnam lo pu theklongchotji. Arnam pirthe athak ok ason arje pen kevang ahut, Alangli ajat asai ta klemkle bonta lam si ningjechotlo – lasi ahakhi aphan akenang avedetlo; pima lam pen anta choktanglo. Kopima Alangli adak-atur lapen Alangli lam ajakong kethe pen monit aphan kapetheklongji, lapen monit aphan cheklangklepin pen Alangli lam an monit aphan kachinipetji ajakong kipiji si Alangli ar’i pamelo. Alangli kopima lapen Alanglilong kopi si kedoma ajat ta Alangli lam along si dopetlo. Alangli gian lapen Alangli akeme ason anta Alangli lam along si dolo. Laso along pen si Arnam lam kaningje aron kaprek kaprek ason nangphan nang patheklonglo. La an apor angbong Arnam sai keklem ke aron, kepaklang, lapen monit aphan kepakengji aphan. Inut amonit aphan alang hirjuno piji pulote parjangtangte, lapen Alangli la klem sita, lam pensi Alangli hirjuno piji. Lasi, Arnam monit ason kacheparjan akai ahut, Arnam aphan hi’i kiplung lapen keso kepame asai ketheklongji le bor’i rinon, lapen angthek ketheklongji le ri nangnelo – la thangnat ta ale avelo! Lahei angthek pen monit aphan pachoklim thekthe! Pudam pulote: pini arni, ahokpet monit ason kacheparjan a’Arnam sai klemkle; Alangli lam si ningje chot. Lake ahok alamlo! Alangli lam pensi nangphan nang kepachoklimji aphan klemlo, lapen nangphan an nang kipi lapen lang nangkipi ta alam pensi ningjelo. Sai keklemji aphan ta Alangli lam pensi klemlo, lapen nangphan ahok alam nangkapachiniji aphan sai keklem alar lam si ningjelo. Nang jongsi Arnam lason asai keklem along kelang pangthekdun un pulote, kahingno kevangji aphan sungkrungpo. Kahingno ason aphan kamatha aphan te, akeme aphan anchot si nang matha nangji – la kopima pulote, Arnam alam an chekok non chekokkedet non sita, lapen hakhi kevangji angthek do non ave non sita, Arnam ke monit aphan Alangli lam pensi chethe pilo, lapen kadokave anpar angthek kethe ke la henlo; lapen lake, sap kethengtang angthek binonglo. Arnam aphan kachiniji kemenei angthek ke la helo, lapen lake kaprek angthek anpar kethenei angtheklo. Lahei alam pen anchot si monit aphan pechoklim unji.

Recho Arat Akai arni kecheng pen anke, Arnam lam kaningje pangchenglo. Mo ephrang akai ke, lahei alam pejo pen pleng’etji, lapen halaso ahut, monit atum chethe anatthu theponbompo. Arnam amena alam pen monit atum akechokche a’ot kapeklang ke ahok, lapen akenangsot binong, lapen Alangli lam pen anchot si monit atum akekroi kepachoklimji aphan asai klemlo, pima pini arni akai lake Lamthe Akai lo, lapen ladak along monit akekroi, akachechak lapen akachelang do nangji. Arnam monit ason kacheparjan ahut kijutpo malom monit aphuthak Alangli lam pen ajok si pi lapen pajirlo. Monit arje ason kacheparjan abang lam kaningje tangdet ansi isi pa isi nang chekok bompo. Alangli lam ningjevoi ahut ke, Alangli lam chekokkelo, bonta Alangli monit keman angdeng ansi do pulote, Alangli lam chekok un’e detji. La kopi apot loma pulote, monit atum Arnam aphan Karjong ason kali bonta monit ason kapathek longji aphanlo; lapen Arnam koson ma pu monit aphan amek hini pen kepatheklong dakji aphanlo. Mo Alangli sai keklem jutdet lote, lapen pirthe athak along Alangli kaningje nangji alam an ningje tangdet lote, Alangli lam isi pen isi chekok’etpo. Non ke Arnam alam isi pen isi kachekokji akai kalilang, kopima Alangli lam kaningje tangtelang. Lasi, Arnam pirthe athak lam kaningjebom nang theklong pulote, Alangli lam kachekokji le nang inghong nangnelo; bonta Arnam jongsi Alangli lam kaningje ington lote, lapen pirthe athak Alangli sai jutdet lote, Alangli lam doan kachekokji pangchengpo. Alangli pirthe athak kaningje alam doan, eson pen ke, chethe apharman, lapen non eson abang ke, kethanmek – mo aphi keplangji alam kethanmek, mo aphi keklemji ason, lapen keplengplelang ason apot kethanmek helo. Jisu alam kaningje along ta kethanmek dolo. Ehin pen lote, Alangli chethe pilo, lapen ehin pen lote, Alangli kethanmek alam ningjelo. Pini arni ke, lam kaningje lapen sai keklem ephongvet dam rappetpelo kopima monit amek angden la hini angbong kacheprek thepiklo lapen la Arnam si klemlo. Lasi, Arnam sai keklem jutdet lote, Alangli lam anta chekok’etpo, lapen hakhi ke lam tangdet si vangpo pule pudet sita melo. Kijut arni ahut ke, Arnam monit arje ason ben si lam pen ajok si sai klemji, lapen lamthe asai keklem ahut, Alangli lam ansi ningjechotji, lapen akaprek aphan mathathedetpo. Arnam sai keklem amo chelar lote, Alangli lam chekok pangchengpo. Pini arni ke, lamthe pensi nangphan nang kepachoklimji asai klemlo; pirthe adang an Alangli nong chethangdet lote, Alangli sai amo kijutlo – lam kaningje nangji anta ningje tang’etpo, lapen lam anta ahakhi mate asai chepharlo etpo. Kijutpo dokdok ahut Arnam pirthe athak kevang lake Alangli lamthe aphuthak sai keklemji aphan, lapen ajok monit akhei atum Alangliphan chinipo, lapen monit akhei atum Alangli kopi ma kachini’etji aphan, lapen Alangli gian lapen Alangli keklem akemesen asai an ketheklongji aphan. Recho kapangri akai ahut, Arnam Alangli lamthe pen si monit akhei aphan paremlo. Non ephrang ke, Alangli lam adhoromtin along, ahavartin along, adettin along lapen arotin along ta vang’etpo. Arnam lamthe pensi paremlo, Alangli lamthe aman lapen ajakong thetan pu monit aphan kepatheklongji aphan – lasi, pini arni, nangtum Arnam alam ansi theklongchotlo.

Arnam lam kaningje aron non akai mute Aron Akai ahut kaningje pen cheprekdaklo, lapen, la anchot kali si, Kanghon-Kangjinso Akai ahut kaningje alam ta prekdaklo. Kanghon-Kangjinso Akai ahut, Arnam Alangli lam pen apot ajat asai ta klem’i’e, bonta monit aphan kepajokji si thengparpan athak kisung kachechak alam si thanchot. Baibel along ke kopi athe si Jisu aphan thengparpan athak kisung pachechak nangkok ma, lapen Alangli thengparpan athak kachechak ahut kisung kachechak ko’an aduk doma, lapen koson si monit ta Arnam apharman koson pen si thengparpan athak kisung kachechak nangji ma lahei alam si tokchotlo. Halaso akai ahut ke, ajat asai le Arnam klem sita, thengparpan athak kisung kachechak alam aphuthak si klemlo. Recho Arat Akai arni ke, monit ason kacheparjan a’Arnam angho pen lam ningje si Alangphan kekroi atum aphan an haidetlo. Lake “Lam monit ason kacheparjan” helo; Arnam ke kijut arni leji dokdok ahut si lahei asai cheklemlo, lapen lake Alangli lam pirthe amonit ason kacheparjan alam aphuthak kepachunji si Alangli klemlo. Alangli ke Lam si ningje chotlo, lapen angthek keplang ason ajat ta ave. Lake Lam monit ason kacheparjan ahokpet alam ke la henlo. Arnam monit ason kacheparjan Abang lam ningje lote, lam along kachekokdam, lapen Lam monit kacheplang helo. “Kechengsi ahut Lam dolo, Lamm Arnam along dolo, lapen Lam monit nangcheplanglo.” Lake (Lam monit along kachepeklang alamthelo) mo kijutpo dokdok arni Arnam kepachunji asai angdenglo, lapen Alangli sai amo angbong kirip angdenglo, lapen ajok Arnam ke pirthe athak Alangli Lam monit along kepajumputji si klemlo. La pini keklemtang asai, non kevangji arni anta lasi klempo, lapen laso asai ke Arnam si pachunpo, monit atum kedam paduji adim, kejokji atum an, lapen kithiji atum an, lapen akaprek ason – lapen mo kijut ahut kepachun nangji asai an tokjir tanglo, lapen lahei ke Lam monit nang kacheplang along ahokpet kepachunji asailo. Aron along ketoktang lapen kisiktang alam kapangdak tang an, komatmat aphan si kepavirjima, lapen komat atum si kesang adim kilut jima – lahei ason pleng’et nangji. Laso asai ke Arnam ok kachepharlotang abang kijut arni kepaplengji asailo. Arnam kisikpi amonit atum konat si leji ma, lapen Arnam kisikpipe amonit atum konat si lejima, Alangli rat lapen Alangli somar aphan koson pen si kethakji ma, mo ephrang Israel aphuthak kopi plangji ma, Ijip aphuthak kopi plangjima – lahei alam Alangli si monit aphan than pachinilo lapen lahei alam isi pen isi chekok’etji. Arnam sai keklem ingtonte si paprap bomlo. Aove ove anta keklemji asai amo, lapen kijut arni ahut Arnam ok kachepharlotang abang kopi si klemji ma, Alangli sai amo kopi si kedengji ma, lahei alam Arnam monit angno kepaklangji aphan Lam pensi sai deng’ilo lapen lahei ke Lam monit keplangji aphuthak kepachunji si jasemet klemlo.

Aphrang ne ningjelo “Kadokave matmat ma angthek lapen kemanghumeme asai aphan chotonlok atum aphan ke o’bupji; lapen lahei amonit atum aphan ke kepachoklim amonit pinchongchelo.” Ne lam kaningje ajat dopiklo, bonta monit atum lahei alam thangnat ta chinine, lapen, non angdeng an nanglerok aphi ta, angthek lapen kamanghumeme asai aphan rivungbomlang. Tangte, angthek lapen kemanghumeme asai pen anpar Arnam aphan nang akekroi ajat ta avedetlo ma, mate chethe kelongji aphan si kroilo ma? Jisu ta ke’ongdung alam ningjelo, lapen ejahak alam ke non anta plengplelang. Tangte, Jisu ke Arnam kali pusi nang puji ma? Arnam ke Alangli phan Kepajok Abang lapen Arnam kachinghonnei aSopo pusi chipulo. Nang laso alam apot kroikrethipji ma? Pini arni, Arnam Lam si ningje chotlo, lapen nang jongsi laso alam arju thekthe pulote, nang karjap thirthedetji. Tangte nang Alangphan kekroi ke Alangli ke Arnam lo pu apot ma mate Alangli Lam kaningje ason an kepleng, keplengple aphuthak si dolo? Angthek lapen kamanghu meme ason aphan nang kroi ma, mate Arnam aphan si nang kekroilo? Pini arni Alangli ajat angthek lapen kamanghumeme ason ta paklangkledetlo – tangte Alangli Arnam chenam loma? Alangli kaningje alam an chekokkedet pu sita, Alangli chenam si Arnam loma? Tangte, Alangli lam kaningjetang an chekok loma chekokkema pu pen si Arnam ke ahokpet ma kalima pu nang kelang’i ma? Kopi apot si ajahak amonit atum ke Arnam aphan kroikre aphrang Alangli lam kachekokji aphan rirok ma? Lason pulote latum Alangphan chininedetlo kalima? Lason aning angthin kedo atum ke Arnam aphan kedeng kangtungte atumlo. Lahei atum ke alangtum kamatha aling si Arnam ajakong ta lakhapo; Arnam alam jongsi chekoklo pulote, latum Alangphan kroipo, lapen kalidet pulote, Alangphan latum dengdelo; lapen kaike ta angthek lapen kamanghu meme ason aphan si rivungpo. Tangte lahai amonit atum ke non akai aPharisee atum kali ma? Nang karjap pathir thekma thekthema ke nang Ahok Arnam aphan chini ma chininema alinglo – lake ahokpet alamlo. Nang ning arlo Arnam alam koan si kapaklong longma, la ansi Arnam aphan kachini un ajakong do muchotpo, lapen la ansi asat kelang kevang ahut ta nang karjap thirpo. Nang ko’an ma angthek lapen kamanghu meme ason aphan kirivung, la ansi nang karjap thirthepo, lapen asat vanglote nang klobuppo. Angthek lapen kamanghu meme ason ke nang puta kali; bonta Arnam aphan kachini peme helo chethe. Ajahak amonit atum ke Arnam sai keklem pen ajok kelong nangji ason kopima chinine. Latum ke kamanghu pensi arni chepadamlo, lapen Arnam sai kacheklem amo along kacharli dunji molo. Lahei atum Arnam aphi kidun ke, Arnam alangtum aning kehang ason kepaplengpiji aphanchot, lapen alangtum kekroi kopi ma la ansi latum chini ingtung chotji. Arnam alam jongsi chekok pulote chethe atovar anat hungdunji, bonta Alangli lam jongsi chekokke pulote, chethe atovar anat kihung dunji aphan un’elo pusi latum ningjepo. Monit atum kamatha ke Arnam aphan kekroi pulote angthek lapen kamanghu meme asai kethek longji lapen sining ahem kidun longji aphan pu helo. Arnam aphan kekroi pulote ahokpet aphan kiri, chethe aphan lapen Arnam echethe nang kacheparideng longji aphan si kihungdun pu majok amonit ta ningjeje. Tangte lahei pen anpar ador kedo akihung ason kopi si dolang? Arnam agian lapen Arnam aning kehang ason kopima lahei aphan kihunghe abang ke Arnam aphan kekroikre atumlo; lapen lahei atum ke Arnam angno kahingnopik atumlo!

Tangte Arnam aphan kekroi puke kosonma pu nangtum nonke chinilo ma? Arnam aphan kekroi pulote angthek lapen kamanghumeme ason kiri helo ma? Sining kidun longji aphan ma? Arnam aphan kekroi puke kejoike asai kali. Dhorom aphan kiripthip atum aphan ke pavedet nangpo; keso kepame lapen hi’i kiphlung, angthek lapen kamanghumeme ason aphan kacholangding, Arnam akangjinso aphan kar’i pangtar, ok aning kehang ateng pen ning arong, ning kangsam kar’i – lahei ke dhorom atum ke’ot aronlo, lapen lahei keklem ke kekroi ta kengset kalidet asonlo. Pini arni Arnam aphan kekroi peme puke koson aphanlo? Lake, Arnam alam nang methang achethe ason ben an kedeng lapen Alangphan kachinghon thek pameji aphan Alangli lam kachini peme helo. Pudamlo pulote: Arnam aphan kekroi pulote Alangli lam karju, Alangphan kanghon lapen Arnam kithiptang ajaton atum keklem nangji ason keklem helo. Arnam aphan kekroi akemangdam ke la helo. Arnam akedoivet aphuthak kachiniji, Arnam kopi apot si kangduk kardom meme atheng ma, lapen koson si, Alangli kithip ajat atum aphan, kejok atovar sikpi si kepachoklim aot kipi ma – lahei helo Arnam aphan kekroi pulote kachini nangji akenangsot ason. Arnam aphan kekroi pulote ahokpet ke ok aning kehang pen kache’o si Arnam aphan kachinghon helo; kereng jongjong pen Arnam anat kachetevar; lapen Sobar arideng pen tet si Arnam akanghon lapen kerai arideng kedo; ok aning kehang anpar Arnam aning kehang ason keklem; nang ning doan Arnam nang kacherailong, Arnam nang kepakeng asai keklemji ahut kachechakding, lapen kahenodak Sobar a’ot pen kachepajok helo. Arnam aphan kekroi lake Arnam ajakong lapen anong nang phuthak kachepahemphu longji aphan, lapen ajok nang Arnam aning kehang ateng keklem, Arnam kemang ason kapechun, lapen Sobar angno Arnam apharman hakhi ason karjappiji aphan. Arnam aphan kekroi puke angthek lapen kamanghu meme ason ketheklongji aphan rivung puke kalidet nangji, lapen nang methang ok aning kehang aling puta kalidet nangji. Bonta, Arnam aphan kachiniji pu kiri lapen kihung abang nangji, lapen Arnam ahukum karju, lapen, Pitor ason, kithi anta Alangliphan kroithip nangji. Arnam aphan kekroi pu kemang peme ason ke la helo. Inut amonit Arnam aphan kachiniji lapen Aning kapangsamji aphan Arnam alam cho lapen junlo. Arnam alam kecho lapen kijun pen Arnam aphan ansose kachini ajakong longlo, lapen ajok Alangphan ahukum ta arjupo. Arnam aphan chini muchot ansi Alangphan nang inghon thekji, lapen Arnam aphan kachinghon along monit atum kemang nangji ta la helo. Nang Arnam aphan kekroi un ahut, kaike ta angthek lapen kamanghu meme ason aphan si munthirong pulote, nang kamathadam akekroi ke chokche pu aphanlo. Arnam aphan kekroi pulote Arnam alam ahok achethe ason kedeng peme helo. Arnam aning kehang kepaplengpi lake Alangli ingho pen nang kebar alam an asai keklem charli lapen nang ning arlo pen keklempi helo. Arnam aphan kekroi ahut, Arnam nang kepakeng meme aot kedoji aphan bor’i nangji, Arnam aphan chehodaidet nangji, lapen Arnam ahukum kroi peme nangji. Nang jongsi Arnam ahukum pasimumepin pen kroi un lote, Arnam aning kehang ason kopima mathathip lote, Pitor aning angthin ason man un lote, lapen Pitor aot-adur ason akeme pu Arnam kipudam ason dolo pulote, halaso ahut ke Arnam aphan nang akekroi apun-achak kichun pemelo, lapen Arnam nang phuthak nang cheparideng long tanglo pu cheklang dakpo.

Arnam sai keklem ke pirthe adang ta pachetangpet. Alangphan kekroi atum anke Alangli lam deng nangji, lapen Alangli lam cho lapen jun nangji; Arnam kemanghumeme ason lapen angthek kepaklang pen ajok Arnam majok aphan ta ale long’i’e. Lapu an arni pen ta, Arnam monit aphan kepakeng ke Alangli Lam pen anchot. Lasi, kamanghu meme ason lapen angthek aphan nangtum matha’e nangne, bonta Arnam nang phuthak nang kepakengji aot kemanji le bor’inon. Aron Barim along Aron Akai arni, Arnam ajahak aLamm ningjelo, lapen Kanghon-Kangjinso Akai arni ahut, Jisu, sitame, ke’ongdung aLamm ningjelo. Jisu penang an alam ningjedet aphi, penang an aphi asangho atum Jisu pen kepathiktang aron ke’otthipji si japonlo lapen ajat ason ta Jisu kaningjetang alam ateng si pho lapen chetonglo. Kijut arni ahut ke, monit aphan lamm pensi pakenglo. Alangli angthek lapen kamanghumeme asai penle monit aphan kachenek lapen abe kachesanpon kali; lahei penke Arnam ajakong horang ahokpet kalidet asonpo. Arnam jongsi angthek lapen kamanghumeme asai paklangchot lepute, Arnam ajakong ahokpet kalidetpo, lapen ajok monit aphan pachoklim un’edetpo. Arnam monit aphan kepachoklim ke angthek lapen kamanghumeme ason pen kali, bonta lamm pensi monit aphan aho’or pilo lapen vilo, laso aphi monit atum Arnam aphan chini muchotlo lapen alamm arju pamelo. Alangli kemanglor pen keklem asai lapen Alangli kaningje alamm ke la helo. Arnam monit aphan kepachoklimji aphan ke angthek kepaklang lapen kamanghumeme ason kepaklang pen kali – Alangli lamm pensi thanlo, lapen monit aphan kepachoklimji aphan kaprek kaprek abidi penta klemlo. Monit aphan kangsir, kangchek, kakolom, mate lamm kepador anta, monit aphan kepachoklimji aphan, lapen Alangli sai aphuthak monit aphan ansose kapachiniji aphan, lapen Arnam agian lapen akeme monit angno kapachiniji aphan kaprek atovar pen si Alangli lamm ningjelo. Arnam mo kijut arni kai kepajut ahut jongsi choklim mantanglo pulote, angthek lapen kamanghumeme ason aphan kethek longji a’ot dopo. Arnam ajat ason le klem sita, nang jongsi Alangli phuthak chini’olo lapen Alangli lam kroi unlo pulote, angthek lapen kamanghu meme ason nang theklongji, pima, Arnam ko’an ahokpet ma pu nang mathathedetji. Halaso ahut ke, nang ke ahok kave thektik lapen Arnam aphan kroithip thekthedetlo – tangte laso ateng pulote, angthek lapen kamanghumeme ason ketheklongji a’ot nang doloma? Arnam angthek lapen kamanghumeme ason kepaklang lake, monit aphan ado kipi ahut, lapen kai kachelar ahut, lapen, la anchot kali si, kai kepajut ahut. Arnam jongsi kai ateng sai keklem angthun pen dam lote, Alangli ajat angthek lapen kamanghumeme ason ta paklangkle. Angthek kepaklang lapen kamanghumeme ason kepaklang ke Arnam aphan ke kejoike asai asonlo, bonta lake Arnam asai angbong akenangsotnei kali, lapen Arnam keklemji asai amo angbong kemanglor ason ta kali. Monit jongsi angthek lapen kamanghumeme ason peklanglo pulote, lapen Arnam akarjong le jongsi monit angno cheklangji pulote, kadokave amonit atum ta Arnam aphan kroi’etji kalima? Aphrang ta ne ningjelo kehaitang abitung atum Nihang anat pensi vanglo, lapen la kehaitang atum kisung parpik angbong pensi vanglo. Lahei alamm kopi aphan si kipudamlo? Lake, kelongtang amonit atum ke kangsai lapen ado kipi phodet pen, lapen kepakeng, kakolom, lapen prekjam akangsir ason an chechak’et pensi hukum arju pemelo. Latum akekroi ke alamm chot lapen checharphri pu kalidetlo, bonta ahokpetlo. Latum ke ajat angthek lapen kamanghumeme ason ta thek’longle, lapen keprekjek alamm lapen aron-atang alamm heihui ningjeje, mate kamatha pangchingche; bonta latum ke ahokpet, latum along Arnam alamm dolo, lapen Arnam ke ahokpet pu alamm latum chini peme. Tangte lahei adilung atum ke Arnam ajakong kethe aphan thangta kalidet ason paman un kalima? Kijut arni malom Arnam keklem asai ke ahokpet keklem asailo. Jisu arni ke, Alangli monit aphan kepachoklimji le kevang kali, bonta monit aphan kepajokji aphan, lasi Alangli phiphi monit atum kidunji aphan Alangli penang an kamanghumeme asai klemlo. Kopima Alangli ke thengparpan athak nang kithiji aphan anvet si vanglo, lapen angthek kepaklang ke Alangli sai keklem amo along ave. Lahei angthek lapen kamanghumeme asai lake Alangli sai keklem ansose kichunji aphan si klemlo; lahei asai ke abat keklem asailo, lapen isi aove apharman asai kalidetlo. Aron Barim along Aron Akai ahut, Arnam ajahak angthek lapen kamanghumeme ason paklanglo – bonta pini arni Arnam keklem asai ke ahokpet asailo, lapen nonke Alangli angthek lapen kamanghumeme asai paklangklelo. Alangli jongsi angthek lapen kamanghumeme asai paklanglo pulote, Alangli sai binong ke amo vangvedetpo, lapen Alangli ajat asai ta klem un’edetpo. Arnam jongsi lam pen anchot kali si, angthek pen lapen kamanghumeme asai pen monit aphan pachoklimji pu ningje pulote, tangte monit atum Alangphan ahokpet pen kroilo ma kroikre ma thang akeprek avedetlo kalima? Lasi, Arnam ke lason asai ke klemkle. Monit atum angbong dhorom alam pathe ongchot; lasi monit aning arlo pen dhorom alam lapen keprekjek ason monit aning arlo pen kepabarji lapen Arnam ke ahokpet pu monit aphan kapachinijisi Arnam kijut arni ahut vanglo. Alangli kevang ke alamchot lapen kroi meme kali a’Arnam pu araje kepavirji si vanglo – ehin pen pudamlo pulote, lason a’Arnam araje ke ave. Lasi, non mamat nangphan ador kesonei ason lake ahokpet aphuthak kachini helo! Ahok ke ajat aphan ta hai’et unlo. Tangte, pini arni nang ko’an ahokpetlo? Arnam pen angthek lapen kamanghumeme asai keklem apot ma? Karjong langno atum ta angthek lapen kamanghumeme ason paklangthek; tangte latum Arnam loma? Monit Arnam aphan kekroi lake, ahokpet aphan si rilo, lapen angthek lapen kamanghumeme asai anpar chethe aphan si hungdunlo. Arnam aphan kadokave komatmat ma kekroi atum akemangdam ke la nangji.