Arnam Aphan Kachinine Kedoan Amonit Atum Henlo Arnam Aphan Kekhamkhe Amonit Atumlo

Arnam asai kemangdam kedengdun thekji aphan, angthek ke monit along Alangli sai pachunlo, lapen kopima abinong’et Alangli ninghang ta monit apharmanlo: lahenlo kopima anuttin-abangphutin ta Arnam aphiphi kidun atum an kelongvek nangji. Non malom ke Arnam asai kachinidunde henlo kopima monit atum along kadure. Monit atum aphan Arnam keklemtang asai amo doan, Arnam keklem asai angton pen, lapen kopima abinong’et Arnam aningkehang monit apharman, pirthe kapinchong pen nonpu apor ahut an – laheihui ahormu doan henlo monit atum kachininelang lapen chodeng pememelang. Dhoromi apirthe angkangpi along le laso akadure ketheklongchot lapu kali, bonta Arnam aphan kekroitang atum doan angbong antalo. Arnam aphan ahokpet pen nang ketheklong arni nangkele ahut, nang chenam si Alangli akethek-kere kerodunthek ahut, Arnam asai amo keklemtang doan nang ketheklong ahut, Arnam kopima lapen koson pu nang kapangthekthek ahut – Alanglilong akeongpik amung, kethek-kere, manghumeme ason, lapen Alangli monit atum along sai keklemtang kedoan nang ketheklong ahut – tangte laso ahut si nang Arnam aphan akekroi kelong unpon pemepo. Arnam ke kadokave kepangrompet lapen kadokave akeongpik amung kedo abang pulo, tangte kopuson pen si Alangli kadokave kepangrompetlo, lapen kopuson pen si Alangli ke akeongpik amung kedo abanglo? Nang jongsi la chinidamde pulote, Arnam aphan nang akekroi dolo pu nanghok un’edetlang. Kopi apot si Ne ningjelo pima dhoromi apirthe along halahei atum ke Arnam aphan kekroi atum kali bonta kaheno keklem atumlo, hi’i pen kachingbarpet abanglo? Latum ke kaheno keklem atumlo pu Ne kaningje ke, lake athema latum Arnam aningkehang chinidamdelang lapen ke Alangli akethek-kere theklongledetlo. Arnam ajat apor ahut tame latum aphan Alangli sai paklangkledetlo. Latum amek checharche; Arnam asai amo latum ke theklongle, latum aphan ke Arnam ke’otanglo, lapen latum aphan ke Arnam kelana lapen keraikom angton pen si langkranglo, Karjong Kangthir asai keklem ke parnonedet ta choklo. Arnam pen keklem asai kali pu atum doan ke kaheno keklem atumlo lapen Arnam pen kachedan atum saidelo. Arnam aphan kachedandong atum pu Ne kipudam ke hala Arnam aphan kachininedet atum, alangtum angtur pen Arnam aphan kachoro atumlo tebonta Alangliphan chininedetlang, Arnam aphiphi si dundun atumlo tebonta Alangli lam arju ingtungte, lapen Arnam akangjinso along ningarong kachipi atumlo tebonta Alangli pharman ke karjapji thekthe. Arnam asai akemangdam kachinidun kavepin pen mate monit along Arnam asai keklem kachinidam kavepin pulote, alang Arnam aninghang along chetokdun un’edetji, mate Arnam apharman alang arjapdun un’edetji. Kopi apot si Arnam aro aphan monit kekhamkhema puke, ihin pen ke, alang kahenodak aot-adur apotlo, lapen ihin anatthu abang ke, Arnam aphan kapangkreve kedo lapen Arnam keklem asai athepi alam lapen monit aphan Alangli ningkehang aphuthak kachinidam kadurepik apotlo. La pasonni ason, pangrumpet pen, Arnam aphan monit atum kedengde aphurkimo cheklang’ilo. Ajat kahenodak asema kekroi along Arnam aphan khamkhe un’e athema lason kekhamkhe kedo ke alangtum aot-adur along amatlo, pima lahei atum koan lone aningkan pen akekroi Arnam aphan kekhamkhe pu angthek ke alangtum Alangliphan kapanung apotlo, alangtum kahenodak akun along pabat dunlo. Arnam ok cheplangple aphrang ahut apor, Arnam aphan inut amonit kekhamkhe kali-kalang pu kalakha’i ke sining angsong Arnam pen kapathiktang ahukum alang chibima chibibema pu penlo. Langdam sinang, Aron Akai ahut, komatmat ma Jehovah aron kedengde atum doan ke Arnam aphan kekhamkhe atum pusi hokdetlo; matmat ma Jehovah aphan kipitang adan kanghu, mate matmat ma Jehovah abe kedo atum aphan kachesongdun atum doan ke, Arnam aphan si kekhamkhe atum pu hokdetlo lapen arlong kevar penlok si pathipo; matmat ma api-apo aphan man-peng kachipipe, lapen matmat ma anut kaprek aphan kapasung lapen jirjuno kipi pulote, lake aron kedengdedet abanglo pusi hokdetlo. Lapen kadokave komat ma Jehovah aron kedengde atum doan ke Alangli birudhe karjap pusi hokdetlo. Lason ke Kangjinso Akai ahut anke pavedetlo, komatmat ma Jisu abirudhe karjap atum doan ke Arnam aphan si karjap abang pusi hoklo, lapen matmat ma Jisu kepabar alamthe heihui kedengdunde atum doan ke Arnam abirudhe si karjap pu hoklo. Non apor ahut, Arnam aphan kekhamkhe pu kehokdam ke ansose kechok muchot lapen ansose keklemverbom si chemanlo. Arnam tame ok kacheplangplelang apor ahut tangte, monit atum Arnam aphan kekhamkhe kali-kalang pu kalakhadam ke ketheklongledet sining angsong a’Arnam aphan ro-archo lapen angsong kelang doma avema pupen henlo. Halaso apor ahut Arnam aphan kekhamkhe pu kipudam ke chenam si keklemverbom ason kalidet, pima monit ke Arnam aphan theklongle, mate Arnam ke kopuson arje lone alang chinidamde, mate Alangli kosontong sai klem lone lapen ningje lone. Arnam kopusonjima puke monit atum mathadam un’e, lapen Arnam aphan alang kekroidam ke kamanghu ason, athema Arnam ke monit angno nonpu ta nangcheklangklelang. Laso apot si, monit atum kopuson si alang kamathadam amang along Arnam aphan kekroidam do tame, Arnam ke monit aphan pinremre mate alang akehang paongpikpe si pinchong, athema monit ke Arnam aphan angton si theklongledetlo. Arnam le ok chemandet lote lapen monit atum angbong sai nangklem lote, Alangliphan kadokave ta theklongpo lapen Alangli lamthe heihui arjulongpo, lapen Alangli ok abang arpum along pen Arnam keklempon asai amo doan ta thekpon longpo. Halaso apor ahut ke, doan monit atum akamathadam ingjir’etpo. Arnam ok kecheplangtang ahut matmat ma kethekdunlong atum aphan ke, latum aphan pinremredetpo jongsi Alangliphan kekroiji latum kachisik dote, tebonta chinilor pen Alangli birudhe karjap atum doan aphan ke Arnam pen kachedan atum pusi hokdetpo. Lason amonit atum ke Khristo aphan kedengde atumlo, aningkehang ateng pen Arnam abirudhe karjap ahotur atumlo. Komatmat ma Arnam aphuthak kamathadam ke dolo puvoiphit tame Alangli lam karjuji aphan chisikding pulote pinremredetpo. Arnam monit aphan kapinrem ke monit abang akemangdam lapen keklem ateng penchot, alang kamathadam lapen abidi pen apot ke kaliveklo. Alangli jongsi monit aphan alang akamathadam lapen abidi heihui pen si kapinremji pulote, Arnam aningkithi arijak pen inutnat abangphu ta chepajokplot un’edetji. Komatmat ma ninghang pen si ok kachepharlotang a’Arnam abirudhe karjap aphan ke ado padopo pima alangtum hukum kekroikredet apot. Arnam abirudhe ninghang aling pen karjap laheihui amonit atum aphan kelangdam ateng, alangtum kekhamkhe aro chenam ta Arnam aphan latum akamathadam kedo pen si, laso ajok latum keklem asai chemandet si Arnam asai aphan pasiksakdunlo. Laheihui amonit atum chinilor si Arnam asai aphan khanglo lapen phangnodunlo. Latum Arnam aphuthak akamathadam le kedochot lapu kali, bonta latum Alangli sai along kapasiksakdun titi asai ta klemdundun, lapen laso ajoine si lapuson amonit atum ke kapinrem phovek nangkoklo. Komatmat ma ninghang ateng pen Arnam keklem asai along kapasiksakdun kali atum aphan ke pappi pu pinremrelo, athema latum ke ninghang ateng pen kroi unji lapen kapasiksakdun lapen kapatoradun asai klemdundedetpo. Lapuson amonit atum aphan ke pinremredetji. Tebonta, monit atum Arnam asai penang an aningkan pen kachiniduntanglo, jongsi latum Arnam aphuthak akamathadam padobomlang lapen ok kachepharlotang a’Arnam asai keklem chinidunde si dobomlang tangte, lapen jongsi, Alangli sai penang an aningkan pen latum chiniduntanglo puvoiphit tame, latum along Arnam aphuthak akamathadam doverbompo lapen Alangliphan kachiniji aphan kevangji nonpu un’elang, tangte latum jongsi kapasiksakdun amo le klemdundedet pu tame, alangtum aning ke chenam ta Arnam aphuthak prekjam akamathadam pen si plengsetlang, lapen jongsi laheihui akamathadam klardak pen cheklangkle tame, lason amonit atum doan ke Arnam asai along ajat aling pen ta cherapdun meme kalidetlo. Latum ke Arnam apharman birta keme kapachethangji ta un’elo lapen Alangli pharman ta arjappi thekthelo. Lason amonit atum ke thangnat aphan ta akeme avelo lapen kiludet atumlo. Athema latum ke Arnam aphan chininelo lapen anpar ta Alangli phuthak alangtum akamathadam kache’o angton pen thekthedet si dobomlo, latum aphan ke laso apot si pinremdetpo. Lake lapu le pu tame: lake thangtheji pima kekroi akimilang atum Arnam aphuthak akamathadam kachibi kedo mate Alangliphan ajat tame kachinine, bonta penang an aningkan pen Arnam aphan kekroitang atum doan lapen Alangli sai kachinidun longtang peme, lason amonit atum le akamathadam doverlang puke lake thangnat kalilo kechokchelo, lapen Arnam aphuthak thangnat ta kachininepin pen kedo abang aphan lake akejumpik si chemanlang. Athema lake latum aphan kapinrem ke kemesen angdeng lapu kalidetlo. Laheihui aphu kaheno amonit atum ke keter-ke’erlo; latum ke Arnam aphan kekhamkhedun keongneinei atumlo lapen Arnam akangjinso kelong ta thangnat ale pavepinlo. Kijut ahut ke lason amonit kedoan atum aphan pavirtheipo!

Madu tame Arnam asai akemangdam aphan kachinine atum doan ke Alangliphan kekhamkhedun atumlo, lapen madunon Arnam asai akemangdam alam chinilo tebonta Arnam aphan ningkapangsamji akar’i nonpu ta kave atum aphan ke Arnam abirudhe binong pusi hokdetpo. Ajahak atum do thedungdung kardomhem along Baibel porhiji lapen arni kangthim ta ningjekongji, tebonta inutnat ta Arnam asai akemangdam alam latum angbong chini vangve. Latum angbong pen inutnat ta Arnam aphan chininedetlo; Arnam aninghang ateng pen kachekroidundet abang ke anpar ta kave kijumneilo. Latum doan ke ardi amatsi avedetlo, kangthirthe amonit atumlo, anuttin ta Arnam aphan kaningjedun si karjap chepangtuilo. Alangli tarpangthek latum cheponkri pu sitame latum Arnam aphan chenam’et si khamkhelo. Arnam aphan kekroi pu ke chipubom, nonpu ta latum monit a’ok chobom lapen avi junbomlo. Lapuson amonit doan ke hi-i saiselo atheke monit akarjong si chodetlo, komatmat ma ahok atovar along kengkam kachejorji kabor’i atum aphan kapasiksakdun bor’idet titi ahi’i atum saidelo, lapen matmat ma Arnam aphan kiri atum along kekhangdun kapatikung arlong si chemandunlo. Latum kacheklang ke “aron-atang mesen” tahaiji, bonta kopuson si alangtum aphiphi kidun atum ke latum madu ta kalilo Khristo aphan kedengde atumlo pima Arnam abirudhe kaparjapji si monit aphan japonbomlo pu kachiniji? Kopuson si alangtum aphiphi kidun atum latum ke kereng’ak ahi-i saidelo pima monit akarjong kechoji kirivung si chepeduklo pu kachiniji? Halahei komatmat ma Arnam athengno kangtuiving akehoi angdeng kedo atum doan henlo monit angbong pen kaheno keongnei atumlo, tebonta hala kachepebihek atum doan ke man-peng kelong ongneiji atumlo. Lapen matmat si latum Arnam asai keklem kachini pu kachitin lapen komatmat ma, anparta, Alangliphan latum langsap pen pu tame bang aphan Arnam asai keklem aphuthak thedung kethan kapachini thedung kapaklarthek – laheihui atum monit angbong pen kethekthenei atumlo. Lason amonit atum ke Arnam alammo pen kalipinlo, mena ale aphan si klem lapen ane chepathe si plenglim. Komatmat ma Arnam aphuthak akachini latum along jumpiklang pu kekroidam kedo, Alangli aphuthak chenam si charlilong peme lapen klem long pemelo puvoiphit tame, lason atum aphan henlo Alangli kachinghonei. Lason amonit atum anchot si ahokpet alammo do lapen Arnam pen kapachoklimji chenam un peme. Komatmat ma Arnam aninghang alam kachinidunde atum doan ke Arnam pen kachedan atumlo; matmat si Arnam aningkehang alam chinilo lapen tebonta ahokpet keklemkledet atum ke Arnam pen kachedan atumlo; matmat ma Arnam alam heihui cho lapen junlo, lapen tebonta Arnam alam akenangsot aphan si chekroidundelo pu atum anke, Arnam pen kachedandong atumlo; matmat si kachepharlotang a’Arnam aphuthak kamathadamthap kedo, lapen anparta kachesongdutji si aning dodongver atum ke, Arnam pen kachedan atumlo; lapen madunon Arnam aphan kachini un’edet mate Alangli pharman hakhi chipi un’edet atum anke Arnam pen kachedan abanglo. Lasi, Ne nangtum aphan choningri padikrimlo: Nangtum jongsi kekroi do binonglo si laso atovar nang kedamtheklo tangte dunbomnon. Bonta nangtum jongsi Arnam aphan kekhamkhedun pen che’o’edet pulote, paderdepin pen nangtum aphan kemenei ke kache’o henlo. Kali pulote, nangphan asonson pherememe akisung kephodetji themuchot kemanji dokok tahaiji, athema nangtum aot-adur ke henodak khangjanglo. Kekroithip mate athikdut, mate kangthir’et lapen ahok aphan kangchir aning, mate Arnam aphan kanghon kedo, nanglong masapsonat ta ave mate avepin. Lake lason le ningjedet ta melo atheke Arnam angno nangtum angdeng ke phu kaheno prunjin-prunjam etlo. Nang kopisi keotthipji ma nang la otthip thekthedetlo, lapen ke kopisi kaningjeji ma lata ningje thekthedetlo. Kopisi nang keklemji along kachisikdam, la nang keklem along chisik thekthedetlo; lapen kopi ason si nang kapachunji puloma, nang lata kapachunji un’edetlo. Nanglong kekroithip, keme-kaheno kethakthek, athikdut, mate keklemji pu alamrai ke’en avedetlo. Nangphan kapachechaktoi nangji akiduk-kisung tame nang chechakchedetlo. Thekdak alamlo, nangtum doan ke angton pen si kelongdunji aphan duredetlo: Nangtum chetherakrema tangte lason kerengdunbomlang? Nangtum aphan Ne nangpaklemtoilang athe ke kaike aphan kesang le nangmek kaselokjok si nang ke kemepo, laso pen nangtum apharman Arnam pamatha kisung lapen nangtum ajoine keduk kachechak pen pajoknang. Nangtum Arnam aphan kroilo lapen tebonta Alangli ningkehang chininedetlo; Arnam alamthe doan cho lapen junlo lapen tebonta monit atum aphan Arnam kopisi akehang doma lake chibidam thekthedetlo. Arnam aphan nang kroilo lapen tebonta Alangliphan chininedetlo, lapen nang ke kemangdam avedet apot kachepedukji athai ave si rengbomlo, akenangsot kavepin pen, ajor kavepin pen. Monit pusi nang rengdunbomlo lapen tebonta keme-kaheno kethak thekthe, athikdut abang, mate kroi meme atheng heihui masapso aphant anta avedetlo – tangte nangtum nangmethang aphan monit pu chipulangma? Arnam aphan nang kroilo lapen tebonta Alangliphan chongthuilo; kopisi keonglang ke, Arnam atangka nang cho’enlo lapen Alangliphan kapanong adan heihui chodunlaplo. Lapen tebonta, kijut apor ahut anta Arnam kamunthidam alam nang masapsonat ta kachekroidun pu kachekpaklangji un’edet chenamlo mate Alangliphan masapso ta keme-kaheno akethak avedetlo. Arnam akenangji masapsovet anta nang chodengdun thekthedetlo. Nonpu anta nangtum nangmethang aphan monit pu chipubomlang ma? Arnam pen nangkepador a’an si chobom lapen Alangli pen nangphan kipi achethe si che’enbom, Alangli akangjinso pen chehokbom, tebonta, kapajut ahut ke, masapsonat ta Arnam aphuthak nang chininedetlo. Alar ke, Arnam aphan kekhamkhedun pen anpar ke akeme ason thangnat ta kave si chemanronglo. Tangte methan pen anpar la aber amarat api nang keman kalilang puhe? Marat angbong ta, nangtum pen anpar bang aphan kepasung aot kedo ke avelo bo?

Halahei dhorom akurusar lapen akesarsar atum kangtui apulpit along arjapdam si bang aphan kethanthan atum doan ke Arnam pen kachedan atumlo lapen Sobar pen si pajirporaplo; tangte la nangtum angbong pen kangtui apulpit along karjapdam pen bang aphan kethanthan damde atum ke kethedung Arnam pen kachedan atum kalilangma? Nangtum doan ke tangte, latum pen ongmuchot, Sobar pen bidi kanglim keklem atum kalima? Komatmatma Arnam asai akemangdam alam kachininedet atum doan ke Arnam aningkehangdam kopusonma chekroidun thekthelo. Chenam si, pima komatmat si Alangli sai keklem kemangdam alam kachinidun pen Arnam aningkehang kopuson ma kachekroidun thekthedetji lake lapu kali. Arnam keklem asai ke akechokche amat si ave; alar ke, lake monit atum aningkehang si akechokchedet kedo. Tangte halahei kahenodak amonit atum ninghang aling si Arnam aphan khamkhedun ke halahei dhorom akurusar lapen akesarsar atum pen anpar kisung kephomemeji lapen bang aphan kapasungji atum kalilangma? Penang an atum henlo Arnam aphan kekhamkhe, bonta halatum angbong along penang an prekjam akrong pen si latum Arnam aphan khamkhelo. Kekroi atum tame kadokave prekjam-prekjam kedo tangkok le, lasonthot si Arnam aphan kekhamkhe ta prekjam-prekjam akrong pen si kadokave klemlo, anuttin ta chingbarpetpelo. Halahei atum angbong inutnat tame Arnam asai akemangdam alam kapangthekdun thekthedet chenam atum doan ke jokjedetji. Kedamtang arni ahut kopuson pen si monit atum Arnam aphan kekhamkhema, monit atum le Arnam asai akemangdam aphuthak chinidunlo lapen Arnam aphan ningpangsamji si kachepeduk apor chipi, Arnam alang aban apap doan angton pen pangthirthei si paklarpo. Monit atum ahok aphan ribomtik lapen laso ahok ateng klembomtik ke, alang kopima keklemtang apot Arnam aning chibidedetji. Anparta, Arnam alangphan kangsaiji ke monit atum laso ahok ateng keklempon pen si langdamji. Lake Arnam kangthir’et kechoklim acholo. Aphrang monit atum Arnam aphan theklonglo lapen Alangli sai chomatlong tanglo, kopuson si monit atum Arnam aphan keklem ma la kali, Alangli aning arlo chibibe. Tebonta, monit atum Arnam aphan ketheklong pen lapen Alangli sai kachomatlongtang pen ke, kadokave monit atum asai amo lapen keklem-kedam doan tame Arnam palut si aningkan ningkan birtivetpo, pima monit atum Arnam aphan theklonglo lapen Alangli sai angbong si rengdunlo.

Monit atum ahokpet Arnam along kopi doma lapen do pu theklongdet pen, Alangli jakong pen arpu kethe alang ketheklong aphi, lapen alang Arnam asai alam ahokpet kachinilong an, aban akun monit along pen chelardet aphi ke, tangte monit along pen angton si alang Arnam aphan kekhamkhe titi kachedandong akun avedet tanglo. Lake lapu le ningjedet ta henone pima ahut isi apor anuttin tame Arnam aphan khamkhelo lapen abangphutin tame ahut isi apor ke Arnam pen kachedanji si arjaplo. Tebonta, nang jongsi ninghang peme pen ok kachepharlotang a’Arnam alam arju, lapen laso ahut pen si Arnam aning aphan kapangsam ke nang kekroithip, nang keklemji pu ahok ateng keklempon, nang arpu ateng keklemji pu keklem, lapen nang kacheparai ateng pen keotthip henlo, tangte lake nang inutlo Arnam aphan ningkapangsamji pu ajok mena kachedandong aot kapavirji ninghang abang lapen Arnam kapachoklim unji abang si chemanpo. Tangte nang nangmena kechokche apot angthin chepathe si chelangleloma lapen nangmena kachekobirji aphan anta kamatha avedetloma, tangte nang kachedandong aot dothipver si Arnam pen kajalang rappetji aphan masapso ta kamathadam avedetloma, lapute lason ke ane kachepathe’oi lapen kachelar thekthedet abanglo pima nang ke chenam si ado phovekpo lapen Arnam pen kapachoklimji pu angbong pen inut abang ta kalidetvekpo. Lason abang ke, pini ta nang Arnam ahoturlo lapen penap tame nang Arnam ahotur si dopo, lapen laso arni anpar ta Arnam ahotur si nang dobompo; kaike ta Arnam pen kachedanji abang lapen Arnam ahotur si chemanpo. Lasonlo pulo tangte, kopuson pen si Arnam nangphan nangpajokplot kethekpo? Lake monit atum asema along si dolo Arnam aphan kekhamkhe ke, bonta monit atum Arnam aphan kekhamkheji akemangdam “chepatujoi abidi” riredetvek nangji athema lake alang asema kachelarji ke thedung keklem papleng un’e asailo. Lason jongsi alam kemanlo tangte, derdepin aphrangjong si nang laso ahin pen kedamjui akemeji, pupete mohut nangphan akangchekji ansose pherememe si mandetji, lapen ke nang ahir kedosak asema nangtetpo lapen laphan langchari un’edetpo, mo kijut ahut an nang ok abang arpum aphan Arnam pavirvetik ke. Nang Arnam aphan kekroi ke hirjume kelongji aphan; bonta jongsi mo kijut ahut an kopai langno nangphorong pulote, lake ante katherakmeme kaliji puhe? Ne nnagtum aphan choningri padikrimlo, nang akaprek abidi kaselam si kemepo. Arnam aphan kekroi pen anpar ke nang ajat le klem tame akeme amat si avelo: Chenam ta lake atovar isinat anchotlo kedo lapu kalidetji. Nang jongsi ahok aphan riredet pulo tangte nang rengdunbom si dobomjilang ma? Lapuson ke nang kopi apot si Arnam pen kephodetji le kedo nangjima?