Kachelar Thekthe A’ot Kedo ke Arnam pen Kachelang Un’e Kedolo

Suri-suri kachopanglim aningkan pen aphi, monit ke thiklak lapen lubuilo; alang ke Arnam aphan kekhamkhe ahi’i mandetlo, monit Arnam aphan kekhamkhe akun phurkimo alo along ta birti ponset anpinlo, lapen monit amena ta alang kekhamkhe aphuthak than pajirmi peme thekthe – athe monit aphan ke Sobar si phalangnodetlo, lapen Sobar si tovar padamthap pen alang kopu si pangno nangji ma chininelo. Pini anta, monit ke manghubom: Arnam aphan thek’long lote monit ke, Alangliphan chongthuipo, lapen alang Arnam aphan thek’longle lote, Alangliphan chongthui lethot lipo. Ajahak atum ke lapu ta do, Arnam ahirjuno lapen Arnam aning kithi thekdundet aphi ta, Alangliphan chongthuibom. Lapen lasi ne pulo monit along kachini ajakong keklemvek nangji asai chepangbo’etlo, lapen monit me-heno kamatha ajakong, lasonthot si, ahokpet asai chepangbo’etlo. Ne kethek’long amonit ke monit apindeng pen kedo amarat, alang ke abit kekhorpik aphurui, lapen alang nemek athengno jonghele kangjinsothek abang pu chepaklang bor’i sitame, ne alangphan jinso thekthe, athe ke monit along aki’ik lapen akelok, ahok lapen ahokhe, angbong kacheprek kachini ave. Monit atum kachini ajakong ke pu amat thiklak’lo, bontame nonta hirjume kelongji ar’ibomlang; alanglong monit a’ot ke therak meme anpin bonta alang recho ason kachari ajakong kelong ingtungbomlang. Alang komat arecho si man thekpo, lapuson kachini ajakong pen anvet ke? Koson si alang lapuson monit a’ot penle inghoi athak kangnipo? Monit ahokpet ta therak amek ave! Alang ke angthin kethebui kahenotang abang! Nangtum angbong hirjume kelong kangtung atum, ne nangpinkhatji ke loji rinoi lapen kelangnodak nangmethang amohor chelangtha – nangtum along recho keman’ime ason doma? Nangtum along hirjume kelongji abangphu araje doma? Nangtum a’ot along asapbak ta kachekirla avelang lapen hala ahokpet aphan asai pen klemklelang, bonta nangtum kevangji arni kemepikji aphan si kemang. Nangtum nangmethang aphan si kechokche alamm chepakroibom! Lapuson akangthirthe alongri along kahache, monit atum hamphang arideng pen kasa’ur nang ahir dosak’lo, alangphan recho atum akun pen abe cheponlo, lapen alangphan ke “kangtuiving angdeng kacharli adim” along ta kethantang. Kapaphihup kamatha, kachopanglim akun, kai aphuthak kamathadam kangdai, kerengji aphan kamathadam kememe, pirthe kedodun thangnat ador kave, lapen kerengdun adichi lapen ajutang kelangno – lahei kadokave ason ta monit aning arlo lutlo, lapen ahir dojot an alang me-heno kamatha ajakong aphan tengkheng lapen phalangnolo. Angthek ke, monit ke ansose Arnam pen kahelo, lapen ansose Alangliphan khamkhe un muchot. Arni nangdam’ong monit akun ta nanghenobomlo, lapen amena aning kehang pensi Arnam ajoine kadokave chipi’etji pu abang inut ta ave, amethang aning kehang pen Arnam aphan kekroiji abang inut ta ave, mate, anparta, inut ta ave Arnam do pu kiriji abang. Alar ke, Sobar kachari arlo si, monit thangnat klemkle bonta karengme si kiri, amethang aphan inghan alongri along a’ok a’ot langno along chehodai si. Alangtum ahok alamm karjulong ahut anta, kangting along kedo atum asai keklem aphan matha abang anta ave, mate alangtum Arnam do pu kekroi tangdet aphi ta Alangliphan kiriji ahin aning vunghik puta ave. Kosonsi lapuan akun kelangno amonit akhei ke kejok unpo? Kosonsi lapuan kasa’ur amonit akhei le katheang along kedo thekpo?

Monit akun kachelar kecheng ke alangtum atiri agian pen lapen alangtum kamatha along kachelar pen, kedo-kethak a’ot, lapen kamatha keplengple akelangdampar – kenangsot akachelar pen. Lapuson pensi monit a’ot along kachelar vang unji. Monit kahingno a’ot angkur kethur’i ke Sobar kachongthui, kephalangno lapen abikar penlo. Monit aphanke Sobar si rip’hetlo lapen cherai’krim lo, lapen alang sung nanglo hala Sobar pen alang kamatha, kamatha adichi, aning arlo pen kelangmek ajakong lapen kachini ajakong along kahenoparpik kepapho pen. Lake thihek pen pudam lote monit along kenangsotnei ason an along Sobar kapachehodun ajoine, lapen lahei ke Arnam kasorjon ateng kalipin khangjang, la monit le Arnam aphan kekhamkhe lapen ahok aphan deng un’e. Lasi, monit akun along kachekirla kecheng nangji ke alang kamatha along pen, ning arlo pen kelangmek ajakong along, lapen kachini ajakong along lasi alang Arnam aphan kachini lapen ahokpet aphuthak kachini aphan ta kirlapo. Hala kadokave pen kasa’urnei alongri along kahache atum si Arnam kopiloma pu kachinine kilitchotlang, mate Arnam aphan kekroi puke kopiloma pu. Monit atum ko’an si kasa’ur hala’an si alangtum Arnam do pu kachinidam kijum, lapen hala’an kadurepo alangtum kamatha ajakong along aning arlo pen kelamgmek ajakong. Monit along kekhamkhe lapen kachedan a’ot nangketet adim ke Sobar arideng lang kasa’ur. Sobar kapasa’ur ajoine monit along me-heno kachini ajakong ke thiklak’lo; alang ke kun langno manlo, alang kamunthi ta kivir ahin, lapen alang kapaphihup ason si atarlok along thekdam. Sobar arideng alang sa’ur’e aphrang, monit amethang si Arnam aphi kidun lapen Alangli lammthe karjulongpen kekroi. Alang mena amat si kachini ajakong lapen me-heno kelang ajakong kachepame, lapen monit a’ot ahin mepik. Sobar arideng sa’urdet aphi, monit along abinong kachini ajakong, me-heno kelang ajakong, lapen monit a’ot abang luthong lapen Sobar si patekok’lap. Lasi, alang Arnam aphan kekroi lapen kanghon chepangbolaplo. Monit along kachini ajakong memedet nangmanlo, alang akun ta marat ativi cheplanglo, lapen alang Arnam aphan kekhamkhe ansose inglumtet lapen ahir ketan si nangmanlo. Bonta monit non anta laso alamm chinine mate pangthek thekthelang, lapen thangbakbe si kekhamkhe lapen mek pen checharchepin si kachesong. Monit akun ke alang kachini ajakong, aning arlo pen kelangmek lapen me-heno kelangdam alammthe kachepaklang pensi cheklang; atheke alang kachini ajakong lapen aning arlo pen kelangmek ajakong ta memedet, lapen alang me-heno kejong ajakong ta lubup khangjang, lasi alang akun ke Arnam aphan kekhamkhe anchotlo. Jongsi monit atum kachini ajakong lapen aning arlo pen kelangmek ajakong le kirla un’elo, tangte alang akun ta chelar thekji puke alamm amat si vangvelo, sonthot si Arnam akemang pen kachingbedun ta lo. Jongsi monit atum kachini ajakong le meme, tangte alang Arnam aphan ru-thai thekthe lapen alang ke Arnam pen sai ke’enji apun kalilo. “Mesen kachini ajakong” pu kipudam ke Arnam ketoi asai keklem lapen kachongthuithe, Arnam aphan kar’i, ingthimlim pen Arnam anat kachingbe, lapen Arnam ahin mesen pu kamatha. La kipudam ke ning lapen aphu Arnam ahin isivet kedo, lapen Arnam ningkehang penle Arnam aphan kekhamkhe kali. Kachini ajakong preksi kedo puke lapu kali. Sobar arideng si monit kasa’ur tangdet apot, alang Arnam aphuthak prekjam kamathadam ason chevanlo, lapen alang Arnam aphan kekroithip lapen kar’i avedetlo. Monit aningkehang pen si Arnam aphuthak kekhamkhe lapen kangsai alammthe ningjepo, lapen, anparta, Alangli nung sorsapo. Monit atum Arnam aning pen pinrem dunpo, Alangli ke Arnam pu chini pememepin si; monit atum Arnam aphan kekroiji aningkehang ave, lapen thangbakbe si thekdakde pen Alanglilong kehang lapen kachoningri. Lapuson amonit – kachini ajakong prekdak kedo – atum ke alangtum amethang along kahenodak a’ot kachichini mate kekhamkhe a’ot aphuthak chepangthek thekthe. Jongsi monit atum amethang aphan le chechini thekthe, tangte latum amena along kachini ajakong chelongchom anvet; non anta amena komat loma pu kachichine thekthe atum anke Arnam aphan kekhamkhe atumlo, lapen ansose kijum si latum along kachini ajakonglo.

Monit along kasa’ur a’ot kacheklang ke kaprek along penle kethenei kali bonta monit atum along kiluboi keme-heno kelang ajakong, alang kachongthui-chobai akun, lapen alang kachini ajakong kememe; jongsi monit along me-heno kachini ajakong lapen kachini ajakong le puthot chok’lim cheman un, tangte alang inut Arnam athengno apun kechok abang chemanthupo. Lake monit along keme-heno ajakong kaike ta kithiklak apot si, lapen monit atum kachini ajakong, lale mantune ta kemesen kalidet, kaike ansose kilubom ajoine si monit along kekhamkhe a’ot Arnam ahin batbomlo, lapuanpinlo alang Jisu aphan thengparpan along sak’lo lapen alanghem kachedamji arni kijut apor anta Arnam puthot nanghachethu puta kroikre, lapen Arnam a’ok aphan kapinrem, lapen Arnam a’ok aphan kelangrem. Jongsi monit along kaprek le kalita monit a’ot le do ason te, alang Arnam a’ok pen kahachethu aphan la anset aning hohedetji apot; jongsi alanglong asapbak le kachini ajakong do asonte, Arnam a’ok pen kahache abang aphan la anset cheneknedetji apot; jongsi alanglong asapbak le keme-heno kelang ajakong do asonte, alang Arnam a’ok pen kahache abang aphan lapuson le “akero kipi” kalidetji apot. Arnam akai ahut kedodun amonit atum ok chemandet, bonta alangphan Arnam bangso avarsai kipi aphuthak choro ta thekthe, lapen alar ke Arnam kevang aphuthak kapinrem, mate Arnam amen kachevang pu alamm dengdethip, lapen ke thek’lorsi bangso aphuthak kekhamkhe lapen karju selet. Monit atum Arnam aphan koson si kedengma pu langdamde pinpen, Arnam, thihek pen, kaiketa ningchepading pensi Alanglisai cheklembom – monit atum le masapbak ta Alangliphan dengde pusitame, lapen thek’lorlepin pen choningri sitame. Monit akun ke thetan an kaheno cheman tanglo, alang kachini ajakong ta thetan akilu chemanlo, lapen alang me-heno kelang ajakong ta kapahi’i abang pen sakni khangjanglo lapen ajir dingklui penlo monit atum me-heno pu kamatha ajakong binong kali kacheman. Monit atum Arnam amen kachevang abang lapuan monit akhei aphan chethe kipi lapen kanghon apharman kachoro detle kethekthe kali, alangphan ahokpet kipi apot Arnam aphan aning kejangje ta dolo; laso athe ke monit abang Arnam aphan aning kejangje’i ahok ason aphan asap ta ningdokde. Monit ke Arnam amen kachevang athengno alangmena akai kachipi anvetle kethekthe kali, bonta alang ke Alanglilong pen keplakvi akanghon ta chongsipthek, lapen monit atum Arnam aphan kipipen phant dorjon akethe asut chehangpo. Lapuson kelang lapen kachini amonit atum ke lahei ke kethe’o alamm kali pusi matha, lapen alangtum methang aphan Arnam apharman chepangdang’olo pusi chemathabom, lapen Arnam alangtum aphan kipi jum’ongchotlang pu. Lapuson amonit ta do, Nephan harlung isi alang nangpi pen, ari nangchodeng si Ne alangtum aphan gakhir harlung hini anam kitu nangji pu nanghang, kalite, Nephan ningve isi kut nangpek si, Ne dopik aningve apharman anam tu nangji pusi nanghang. Lapuson monit a’ot lapen keme-heno kamatha ajakong pen ke, kosonsi nangtum chethe kelongji pu mathabom? Kopi anset katherakthek akaheno amonit lo nangtum ke! Lapuson monit a’ot monit along lapen lapuson me-heno kamatha ajakong monit along ke Arnam amen kachevang abang aphan, kachepachong adim avepin pen, longri adang padamthap aret titi athelo. Ahokpet pen me-heno kamatha ajakong lapen monit a’ot kedo atum ardom lapen ning kangthimlim pen Arnam amen kachevang aphan sai klempi nangpo Alangli koan asai nangkeklempi loma apot kali, bonta Alangli thangnat asai nangklempi nangne apot tamelo. Lahenlo hala kachini ajakong kemesen atum keklem nangji asailo, lapen lake monit keklem nangji adenglo. Ajahak amonit atum ke Arnam aphan sai keklempi along ta kachechaknang ason padorut titi: Latum Alangliphan Arnam loma monit ma pu thangnat matha damde, lapen amena kachechak lapen kehang ason ansi ning chibiding, lapen amethang kar’i ason kachepedorji aphansi ridunchot. Nangtum Nephan an nangkitunpi ahut, nangtum kiru’kethai anam nanghangji, nangtum Nepharman nangkatpi lote, kekat anam nanghangji, Nephan sai nangklempi lote keklem anam nanghangji, Ne pe-ri nangchokpi lote kechok anam nanghangji, nangtum mondoli apharman pidun lote kachepaplengji anam nanghangji, nangtum ningje lote kaningje anam nanghangji, nangtum kitap pi lote keron anam nanghangji, lapen nangtum tok lote ketok anam nanghangji. Ne kachetonglong atum tangte Nelong nong’e ta nanghangset, lapen hala ahem ketoitang atum tangte alangtum anong kaphalangno apot anta anam nanghang; achor kachirire atum kachepangri anam nanghangpo, mate alangtum kapariso apor kachepadam anam; vo kapathi atum kiphi-kangthan anam nanghangji, an karnu atum karnu anam nanghangji, lapen han ki’up atum anta bangso anam nanghangji, sonthot si…. Lahenlo nangtum along kethepik lapen kangtangpik monit a’ot, lapen lahei henlo nangtum along kar’ompoipi me-heno kelang ajakong kapinkhat. Nangtum kachini ajakong ke konatlo? Ne nangthanpo nangtum aphan! Nangtum lasonle dambomte, Ne nangtum anglum sai keklem ingtonkokpo. Ne monit apindeng pen kedo marat ahur anglum sai klemkle, kelokbong araje pen anem kave aning kachibi amonit apharman Ne chepasungse, Ne lapuson asapbak ta kejokji aphan angring kave amarat ahur apharman kisung chechakche. Ne nangtum aphan nangkapanung arni henlo, nangtum kithiji arni, hala henlo nangtum along kangting kevangji arni, lapen nangtum aphan katheang nangkatengneji arni. Ne nangtum aphan nangthanlang, marat penta adim kangdai asong! Nelammthe lapen sai ta angdeng-ahoi do, lapen nangtum monit a’ot lapen me-heno kangsai ajakong kosonsi dobom ma pen, Ne anpar ke thangnat asai klemklelo, athe nangtum me-heno kelang ajakong dure ongchotlo, nangtum Nephan kisung nangpapho ongchotlo, lapen nangtum kehainer a’ot Nephan anta nangpatherak memelo. Monit a’ot me-heno kelang ajakong lapuan kadure amonit atum ke mantune ta kejokji avarsai longle; Ne lapuson kachoro thekthe lapen ning aro kave abang aphan mantune ta dengde. Mo Nepharman arni nangle lote, Nelong kedo kikrupik amede nangpavepo amutpi si hala arnisi ahut hala lamm karjuje asomar atum le Nening nangkapathi, Ne kijut un’e aduk inghoipo adai asonben hala Nephan nangpinrem amarat atum along lapen Nephan nangke’o atum, Ne Nening kithi ame kaiketa pakar’etji si kaiji hala lamm karjuje asomar atum lale ephong Nepen dorappet lapen chorappet bonta Nephan nangkroikredet, hala le Nephan nangpatherak lapen nangchongthui atum. Nephan ning nangpathi atum aphan an Ne adai patuji, Ne ningkithi kangthilim Ne paruveji halahei marat atum aphan lale ahut isi Nedung nang arjap dunsi Ne pen chingbarchom kemanji aphan kemang bonta Nephan ardomde lapen nangkroikre; Ne monit atumphan ketheng’i angchin abeng halahei amarat atum along si klopo lale ahut isi Nelong kanghon lapen kalahon kelong lapen ahut isi Ne kethan kamanghumeme ason along ning nangcheparongdun lapen ahut isi Nelong pen hormu akarengme nangcho’endun aphan kabor’i atum. Nedim kacheraiji kabor’i atum aphan ne diya un’e; Nelong pen an lapen pe-ri nangchothi ponji atumphan Ne lole. Athe nonke, nangtum kesung pen jokvan le donoi lapen Nelong nangkehang angdeng palitbomnon. Mo Ne ningkithi arni nangle lote, nangtum Nelong pen anpar ke thangnat ta nanghanghelo; Ne nangtum aphan nangmena ning hangtik an “ningcheparong” apor nangpipo, Ne nangtum amahang longle anat nangtevarpo anpar ke nangtum mantune ta thurthu un’elo! Der-prap tame, Ne nangtum bangso apreng “nangchitu” po – lapen Ne ningthelo nangtum chepaningding pen halabangso arni aphan chonghongpo.

Jongsi lahei katherakrap meme amonit atum ahokpet amena kangtuiving akemang che’o pen Arnam along nangchiruithek, tangte latum kejok longji avarsai dolang; jongsi monit atum Arnam aphan kiri aning dovek, tangte alangphan Arnam o’tekangke. Monit atum Arnam aphan kelong thekthe ke Arnam aningkangduk apot kali, mate Arnam le monit atum along kedodun kangtungte apot kali, bonta athe ke monit atum Arnam aphan long ingtungte, lapen atheke monit atum tongsekot pen Arnam aphan long nangji pu rire. Kosonsi inut Arnam aphan ahopket kiri abang aphan Arnam hirjuno kipipo? Kosonsi inut kachini ajakong lapen me-heno kelang ajakong kemepik abang aphan Arnam hirjuno kipipo? Kosonsi inut Arnam aphan ahokpet kardom lapen asai keklempi abang aphan le Alangli ningkithi pen kekar ame kechopo? Kosonsi inut Arnam alamm karju pen ning cheparong abang aphan le Arnam ahem pen kiturchorpo? Kosonsi inut Arnam aphan kanghon aning chepapleng un’e abang le Arnam kipi adai pen kedo nangpo? Kosonsi inut Arnam apharman amena along kedoan ason che’olap un abang aphan le thangnat ave pen ke’opo? Monit ke Arnam aphan ridun ingtungte, alanglong kedo ason Arnam apharman kapanong pakam ingtungte, lapen akai kangthim kachepaduk Arnam aphan panong aning hanghe; alar ke, alang kipu ke Arnam kedam helo ongchetlo, Arnam aphuthak lit’ong te monit kamatha pen chememe. Lapuson amonit a’ot pen, jongsi nangtum kachepaduk along ningchepamesen sitame nangtum Arnam nangkedeng chepalong thekthelo, pudam lote nangtum Arnam aphan rire pu alamm. Nangtum chininema nangtum ke monit akhei along apun kechokche ahormu pu? Nangtum chininema nangtum pen anpar kelangmememe monit a’ot avelo pu? Nangtum chininema kaprek atum nangphan man nangkipiji aphan kopi amen pensi nangkehang? Hala Arnam aphan ahokpet pen kanghon atum nangphan kethoi apo, kethoi api kethoi aso, lapen kethoi asu pusi nangkehang; nangtum kethoi pen nangkeplang akhei lo, lapen nangmena angthek chichini nangji lapen mantune ta laso alamm chetengne nangne. Laso akethe ason lang pu chematha nangne: Nangtum henlo monit-kalidet akhei angbong pen akun kahenonei. Nangtum laso angbong pen esonbak ta chininema? Nangtum angbong sai keklem pen ne koan kaphere meme asai kedeng lone nangtum chinima? Jongsi nangtum kachini ajakong puthot chemethuthe, lapen nangtum me-heno kejong ajakong puthot sai cheklemthupeme thekthe, tangte nangtum mantune ta “kethoi” pu amen chepakak thekthelo, mantune ta hirjuno arni pen chepajok un’elo lapen mantune ta adai kepho arni pen jok un’elo. Nangtum kahache ta kelangmememe pi, eson anam kave ahormu. Nangtum ke nang’ot penta isi kethoi ahur, isi hormu ban lapen bun angsom, lapen, nangtum ason kali si, methang aphan plakvi akanghon kepalongji aphan Neke sai klemkle, bonta sai kenangsot apot si keklem. Jongsi nangtum lapuson si dambom, tangte Ne nesai ingtonkokpo, lapen nangtum aphuthak mantune ta sai klemthuthelo; laso alar ke, akaprek nephan ning nangkapangsam asanchom along si Neke Nesai cheterekthupo, lapen lason si nangtumphan Ne kijut kave apor aphan nang’o tekangpo, athe ke Nephan nangkelangselet atum aphan Ne kelang ning hanghe. Laso apot si, nangtum Nepen nangchejudun thekjima, mate Nepen kachelang seletji?