Arnam Asai Kelangdammek (1)
John ke Jisu apharman ningkan throksi sai klempilo, lapen Jisu nangkele ahut anke atovar aphrang pen thopi’etlo. Laso aphrangjong, sining arat abirta keme John kapachethangpon ateng pen longri adangpi tame arjulonglo, laso ajok lake Judea adangpi an ingdanglo, anuttin tame alangphan ke kamontri abang pusi hanglo. Laso apor ahut, Herod Recho ke John aphan kapathiji aninghanglo, tebonta alang haihedetlo, athe monit atum John aphan aman-apeng kehok ingtuipik, lapen Herod pherelo pima jongsi alang John aphan pathilotlo te latum anke alang abirudhe si thurlo. John keklemtang asai anke jongjung amonit atum angbong angkurpi otthiplo, lapen alang Jihudi atum aphan kekroi atum pamanlo. Ningkan throksi aphan ke alang Jisu apharman tovar thopilo, pima Jisu le Alangli birta keme asai keklem kapangcheng ahut puan aporlo. Laso athe si, John ke kadokave kamontri atum angbong pen aketheneilo. Lake John aphan bengchek aphi anchot si pima Jisu ke Alangli sai keklem pangcheng binonglo. John aphrang, inutnat kamontri abang ta komatma Arnam apharman tovar kethopikang puke avelang, athema Jisu vangve aphrangjong, Arnam ke ok nangchepharlolepinlang. Lasi, kadokave kamontri atum doan angbong pen John ahut an, alang anchot henlo Arnam ok nangcheparje apharman tovar kethopi abanglo, lapen lason pen si, John ke aBan aRon lapen Akimi aRon Alo along kethenei kamontri abang mandetlo. John sining arat abirta keme kapangdang ke Jisu baptisom en’elang ningkan throksi aphrang penlo, tebonta alang ke, ajat punon, nonpu tame kamontri abang anchotlo. Alang keklem lapen kaningje ke kardomhem arlo anchot kalilo, bonta laso pen angtan rongsopi lapen rong ajo alonglo. Lason alang klemponlo, ahoklo, Jihudi adet amonit atum angbong, jongdamvet pen hala komatma keboidet atum. Mantune si John ke hamphang along athak aman kedo amonit atum along pen chetong chotlo, lapen alang ke Judea along jongjung amonit atum angbong birta keme kapangdangji aphan pu anchotlo. Lake pima pulote Hemphu Jisu apharman kemesen amonit atum aphan kisikpilo, lapen Alangli sai keklemji aphan kemesen adim kisikpilo. John ason kamontri abang ke tovar thopilo, Hemphu Jisu anke Alangli thengparpan atovar ahin jasemet suisepin si Alangli nangkele pen ke chengphitlo. Arnam le ok nangchepharlo pen Alangli sai keklemji ahut, Alangli thangnat ta monit kangvai asai ke klem nangnelo, lapen mate Alangli ke salajong si monit aphan ri nangnelo, mate sai keklemji adim anta rinangnelo. Alangli lason asai Alangli kevang ahut klemklelo; Alangli vangve aphrang pen si kemesen amonit atum aphan Alangli pharman sikpikoi tanglo. John ke Jisu Alangli sai pangchengche aphrang pen si laso asai patangtheilo, athe Arnam ok nangcheparje abang Alangli sai keklemji aphan nangkele ahut, Alangli ke halahei komatma Alangliphan arjidingklui pen kachonghongprong atum aphan longphitlo. Jisu kevang ke monit asai kapachoklimji aphan kalilo. Alangli kevang ke pima Alangli keklempon nangji birta keme asai kapachethang henlo; akaprek asontin ke Alangli pen thangnat kacherap avelo. John kevang ahut, alang thangnat klemkle bonta kardomhem lapen Jihudi atum angbong isi adilung hala komatma sining arat abirta keme kedengtang atum pen vandetlo, atheke pima latum Hemphu Jisu asai keklemji ajaton chemanji meme pulo. John ningkan throksi an sai klemlo, atheke pudam lote alang ningkan throksi an birta keme pachethanglo. Alang sai ahut, John ke penang an manghumeme asai klemklelo, athe alang asai ke tovar kethopichot; alang asai ke kisik-kedangpi aphan anchot. Kadokave akaprek asai anke, Jisu ahin pen si keklemponji asai saidelo, alangphan ke kacherap avelo; alang ke monit aphan alang pap lapen kachekobirji si hangchotlo, lapen monit atum aphan baptisom kipi henlo, laso ajok latum kejok kelongji aphan. Alang akimi asai klemponlo lapen pima monit aphrang ahut kedamdepin atovar ingpuponlo puvoiphit tame, nonpu ta alang ke Jisu aphan si tovar thopilo. Alang ke kamontri abang anchot pima kisik-kedangpi asai klemponlo, lapen alang ke Jisu apharman asai ke klempi thekthelo. Jisu le sining arat abirta keme kapachethang asai keklemcheng abang kali puvoiphit tame, lapen Alangli ke pima John kedam paphrang atovar si angthun dunlo puvoiphit tame, nonpu ta komatma Alangli sai keklempidetji pu inutnat ta un’elo, lapen lake John asai pen athaklo. Jisu ke Alangli mena atovar sik-dang un’edetlo; Alangli sai ke Arnam apharman adular si jasemet klempiponlo. Lapen lasi, koan aningkan si John sai klemloma pule pudam sitame, alang ke nonpu ta kamontri abanglo, lapen nonpu ta tovar kethopi abang inutlo. Jisu ningkan kethom sai keklempon ke John ningkan throksi asai keklem aphan litjetlo, athe Alangli sai keklem atiri ke chingbarbelo. Jisu le Alangli birta keme asai keklem kapangcheng ahut, atheke John asai keklem ingtondet pen aphi ahut an, John ke Hemphu Jisu ke’enponji amonit atum lapen adim an dorplup sik-danglo, lapen lahei anke Hemphu Jisu aphan ningkan kethom asai keklem’iji ke chokvetlo. Lasi, John asai patangdet pen aphijong ke, Hemphu Jisu Alangli mena asai pangchengphitlo, lapen John kaningjetang kedo’an alam ke ihin bikoklo. Lake athema John keklemtang asai anke kachelar kedoji aphan ajoine anchotlo, lapen alang alamthe anke chethe alamthe kalilo pima monit aphan akimi akachingthur ahin japonpelo; kapadusi ke, alang lamthe anke malomsonat ke’enpon aphan anchotlo.
Laso asai pima Jisu keklempon ke mekbin ason lapu kalilo; laso keklem aphan ke ason-amung nangkok, lapen la kadokave tame jongjong mesen ason-amung aron-atang ateng pen si klembom-dambomlo. Kapadusi chiklo jonthrok Alangli rengbom ahut, Jisu chinidam pemelo Alangli laso asai keklemji aphan si kevanglo, lapen Alangli chechinilo thengparpan athak apran kachipiji aphan si kevanglo. Alangliphan pathithe aphrang, Jisu sangsepin pen Po Arnam aphan cho’ardomlo, lason si Alangli Gethesemane Abiri along batai kethom an ardomlo. Alangliphan baptisma pidet pen aphi, Jisu ke Alangli birta keme asai pachethangponlo athe ningkan kethom ra ebeng an, lapen Alangli sai keklem peme ke ningkan hini ra ebeng an dolo. Kechengsi aningkan ahut, Alangliphan ke Sobar si akoi piponlo, monit atum pasiksaklo, lapen monit asat kelang along phonangkoklo. Alangli penang an asat pen ke chepahaidetlo, Alangli sai keklemponbom ahut. Kapadusi chiklo jonthrok along, Jisu aphan thengparpan athak apran ke’enji aphrangjong ahut, Pitor pulo Alangli henlo kerengver Arnam Asopo binonglo, pima Alangli ke Khristolo. Laso aphi ansi Alangli sai kadokave atum chiniponlo, lapen laso aphi ansi Alangli angthek ke rat aphan cheklangponlo. Laso aphi, Jisu Alangli risangho atum aphan pulo pima Alangliphan ke thengparpan athak apran enpo atheke monit apharman ajok, lapen pima nithom aphi ke Alangli puthot thurthupo; pima Alangli pap pen kapajok asai keklemponji aphan si vanglo, lapen Alangli henlo Kapajok Abang. Kapadusi chiklo jonthrok ahut anchot si Alangli angthek lapen asai Alangli keklemji akemang doan Alangli chepaklangponlo. La sitame Arnam apor ahut henlo, lapen lapen lason henlo asai keklempon nangjilo. Laso apor ahut, Jisu asai ephar anke aBan aRon Alo ateng penlo, lason thakthak si Moses ahut aRon atenglo lapen Jehovah alamthe Aron Akai ahut ateng penlo. Lahei kadokave ason an, Jisu ke Alangli sai ephar ansi klem-iponlo. Alangli monit atum aphan pachethanglo lapen latum aphan synagogues along pen thanlo, lapen Alangli aBan aRon aloh along kamontri atum kethanmek ateng pen enponsi Pharisi atum aphan ingcheklo atheke latum Alangliphan hotur si chekamlo, lapen ketok kangthir aloh angdeng along alam enpon si alangtum athikpet kalidet apot paklanglo lapen latum aphan pinrem’i’lo. Athe latum ke kopima Jisu keklemtang an langdunseletlo; atheke, Jisu asai akeongpi ke ketok kangthir angdeng along angdeng along aron pen le keklem kali, lapen, anpar tame, kopima Alangli kethan anke alangtum mena alamthe doan pen akangtuilo, lapen ketok kangthir aloh along angdeng kamontri atum kethanmektang alam pen anpar ingtuimunak lo. Jisu keklem asai ke monit aphan pap pen kapajokji apharman anchotlo lapen thengparpan athak pran kachipi henlo, lasi Alangli ke ansose alamthe kaningje pen madu amonit aphan tame kacheraidetji pu akenang avelo. Akeongpi kopima Alangli monit aphan kethan anke ketok kangthir aloh angdeng along alamthe pen si ke’enpon saidelo, lapen jongsi Alangli sai ke ketok kangthir aloh l angdeng aphan anta litjetjedet pu sitame, Alangli ke thengparpan athak apran kachipidet asai keklem chepachun unlo. Alangli ke lamthe asai apot lapu kalilo, mate monit akhei aphan kacheraidetji pu ajoine aphan lapu ta kalilo, bonta monit akhei aphan pap pen kapajokji aphan ajoine asai si klemlo. Alangli ke monit akhei apharman pap athok-ajir si cheman’ilo, lapen monit akhei apharman alamthe atiri lapu le cheparjan kalilo. Alangli Jihudi akhei kali det atum asai ke klemklelo, athe lake monit aphan kacheraidetji asai pinaklo, bonta thengparpan athak apran kachipi asai ke, pima hala komatma Arnam do pu kekroi atum an angbong si asai klemponlo. Alangli sai le ketok kangthir angdeng along’e athak si klemponlo puvoiphit tame, lapen Alangli ke pima atheke abarim kamontri atum pen kethanmek alam jasemet Pharisi atum aphan kapinrem’iji ateng pen si klem’I’lo tame, la’an ta thengparpan athak pran kachipi asai ke klem’i patanglonglo. Jongsi pini arni asai le nonpu ta Baibel aphar along ketokpon aban kamontri atum kethandammek alam ateng pen si klemponji pulote, lake nangtum aphan cheraidet un’edetpo, athe ketok kangthir Aloh along ke thangnat ta athikpet kavedet lapen nangtum Chinese amonit atum apap alam ketokpon avedet, lapen nangtum apap aphurkimo sitame avelo. Lasi, jongsi laso asai ke nonpu Baibel along ateng otthipbomlang lepute, nangtum ke chingthurthelo. Baibel along ke Israel asor atum aphurkimo ansi tokchotlo, atheke nangtum anke keme mate kaheno pu kapatiniji aphan chokchelo, mate nangtum aphan ingsainolo. Mathadamtha pima Ne le nangtum aphan Israel asor atum aphurkimo ateng pen ingsailo pulote – nangtum nonpu ta pini arni ason Nephi nangdunjilang puhe? Nangtum chinilo koan nangtum akisungji? Jongsi thangnat alamthe tame laso angdeng ahut ningjeje pulote, lake kacheraidetji asai keklemponji aphan un’edet khangjangpo. Athema Ne kevang ke thengparpan athak kesakdetji aphan kali, Ne ke pima Baibel along pen akaprek alamthe ningjevek nangji, laso ajok nangtum aphan cheraidetlongji meme. Jisu keklemtang asai anke aBan aRon Alo pen ingtui muchot angdeng pu aphan anchotlo; lake isi akai kapangchengji aphan si enponlo, lapen pima halaso akai kejaponji aphanlo. Kopi apot si Alangli pulo, “Ne kevang ke kedotang aron kephangnoji aphan kali, bonta aron kapachunji aphanlo”? Tebonta Alangli sai along akeongpi pima aron ateng keklembom lapen Israel aso atum aBan aRon Alo along ahukum kekroibom ateng pen cheprekpiklang, athe Alangli kevang ke aron abe kidunji aphan kali, bonta kapachunji aphan pulo. Laso kapachunponji ason-amung along ke penang asai ateng keklempon alam do: Alangli sai ke ansose si asai ateng lapen ahok klembom, lapen anpartame, lake ansose si reng’et, lapen ke aron ateng kekroidun pangtar lapu kalidet. Israel asor atum Kesang arni rimrema? Jisu kevang ahut, Alangli Kesang arni rimredetlo, athe Alangli pulo pima monit Asopo ke Kesang arni aHemphu lo, lapen Kesang arni aHemphu nangkele ahut, Alangli ke Alangli ninghang aling si klempo. Alangli ke aBan aRon Aloh along aron kapachunji si vanglo lapen aron kelarji aphanlo. Kadokave pima pini arni keklemtang anke non kedobom aphuthak atenglo, tebonta lake nonpu ta Aron Akai along Jehovah asai anujokpi athak si dolo, lapen lake laso angkangpi abat damdelo. Nang de kachelanaji aphan, lapen beisa keklemkledetji aphan, langdam sinang – lahei anke aBan aRon Aloh ahut aron kalilangma? Pini arni, kopima nangtum akenangji ke Hukum Kep along kedo alam anchot kalilo, bonta pima aphrang kevangtang aban ahukum lapen aron doan pen akangtui muchot si kenangpo. Tebonta laso kipudam ke halahei kopima kevangtang anke pavetheipo pu kalilo, athe Arnam asai angdengtin keklempon ke kedamtang keklempontang angdeng anujok athak pen si klemponbomlo. Laso ajok si atheke Jehovah aphan Israel along klanglo, lason si monit atum athok-ajir kipiji aphan akenang dokoklo, alangtum apei-apo aphan man pachipilo, kumlin pardomdedetlo, bang aphan tengkhengri mate hirjuno piri pulo, beisi klemri pulo, duma mongri lapen hor junri pulo, lapen kithitang ahormu chori mate vi junrinon pulo – lake tangte pini arni anta nangtum keklembom anujok chemanmelang puhe? Lake kedamtang ahut anujok athak pen si pima pini arni antame asai klemponbom vangbomlo. Kedamtang ahut aron anke anpar chethanponpelo lapen nangphan akimi akehang si padolo tame, lahei aron anke, kapavedetji puke helopik alamlo, alar ke akangtui angdeng ansi dothukoklo. Pudam lonang pima lahei anke kavelo puke pima kedamtang akai ke abantanglo, anchot ta kali ajahak ahukum anke pima nang kai apar kai sitame man-peng chipivek nangkokji. Kedamtang ahut ahukum anke asai ateng pen klempontheilo, monit abang arpum ason si cheman’etlo, lapen lahei ahukum along anke keprekjek ardi kipidun muchot nangji akenang avelo lason si “Duma mongri,” lapen “Hor junri,” lapen dopiklang. Laso anujok athak pen, akimi ahukum anke nangtum pini arni akenangji ateng pen pathikponlo, nangtum aman angdeng ateng penlo, lapen pini arni asai atengthot penlo. Bangso ketoi ahukum akimi akai aphan kipudam ke aban akai ahut ahukum doan kaphangnothei lapu kalilo, bonta latum aphan laso anujok athak akangtui kebatthulo, monit asai amo keklem ansose kapaplenglim kapamanji aphanlo, lapen ansose nonhut ahok ateng pen pachingbarji pulo. Jongsi pini arni, nangtum anke aBan aRon Alo ahut aron an Israel asor atum asonthot le kekroidun ahukum doan ateng si abe kidun akenang do pulote, lapen jongsi nangtum anke Jehovah kapathiktang aron kedoan ning arlo chibithei akenang do pulote, pima nangtum kachelarji aphan puke thangnat ta chunchedetpo. Jongsi nang le halahei ajahak ahukum an rimdunchot nangji mate akeongpi aron ning arlo chibikoi nangji pulote, nangtum aban asema anke arnukkrung pen thirthippo, lapen angkur kiphurjokji aphan thangnat atovar tame avedetpo. Lasi nangtum ke kaheno abatpik chemanpo, lapen nangtum inutnat tame athikpet kachemanji avedetpo. Lake pudam lote pima ajahak joike ahukum mate kalakha un’edet aron doan pen nangtum Jehovah asai amo kachinidun aphan nangkerapdunji un’elo. Nangtum ke Israel akhei atum pen isinat kalidet: Aron ateng abe kidun lapen hokum doan ningkachibi pen, latum anke Jehovah asai amo thekdun longlo lapen alangtum akangduk-kardom Alangliphan inutpet si chipi longlo. Bonta nangtum anke lason ke longdun un’elo, lapen aBan aRon Aloh akai along ajahak ahukum anke nangtum aphan nangning kapachipidetji mate nangtum aphan keraikomji pu un’edetji anchot ta kali, bonta alar ke nangtum aphan parsikjikjelo, lapen ke nangphan Meherang akarnuk along si paklopo. Athe Ne sai ke kacheraidetji asai pinak, lapen lake nangtum athikpet kavedet lapen nang aban asema an aphan si kemangdamlo. Jehovah lapen Jisu kaningje alamthe anke pini arni akangsai karsikpik alamthe pen aberpik ansi dolang. Lapuson arsikjik alamthe penpete, lake nangtum “kethek-reset atum” aphan cheraidetji un’elo, athe komatma ningkan suri sose athikpet kavedet si dolo. Aban aron Alo along aron ke alangtum ajakong nangtum along hako pen si chingbodetlo, lapen pini arni akangsai ke aban aron do’an pen ansose si kapherememe dolang. Kopima nangtum aphan akemeneiji ke kangsai henlo, lapen ardi kavedet aron akebeng kalilo, athe nangtum anke kechengsilang amonit akhei kalidetlo, bonta pima ningkan suri sose pen kaphangnotang amonit akhei pinaklo. Kopima monit non kelongdam nangji ke pini arni kedobom ahok angdeng ateng pen kapachetondun henlo, nonjong kedobom arni amonit akethek aboi lapen abinong’et aman angdeng ateng pen henlo, lapen lake pima nang aron ateng abe kidun nangji akenang avelo. Lake lason ajok pima nang aban asema along kachelar chethekdam longji meme pulo, lapen laso pen pima nang kamunthidamthap alam an kevartheiji meme pulo. Nang mathama lahei ahukum anke aron saidelo? Lahei anke, pudammelo, monit jongjong kemesen akenangji saidelo. Lahei anke aron kalilo pima nang abe dunvek nangnelo. Duma mongdetri pu ahukum langdam sinang – lake aron puma? Lake aron kalilo! Lake kemesen monit atheng aphan akenangji pulo; lake tame aron kali, bonta kopine angton monit akhei aphan akehang ason padolo. Pini arni, krehini mate pu’an ahukum tame pima kapathiktang anta lake aron kalilo; lahei anke kopima jongjung kemesen monit atheng kelong’iji pu aphan akenanglo. Monit atum kedamtang ahut ke lason ahormu cheparidengdelo mate chininelo, lapen lasi monit atum anke pini arni si lahei kelong nangji akenang dolo, lapen lason ahormu aphan anke aron pu lakha ponpelo. Hukum puan ke aron pen isinat kalilo. Laso aron pima Ne kaningje anke katalon ajaimek aphan si jongdamlo, keklem nangjitang mate kedotang ateng pen kapacheprekdun lapen monit atum kechokchedet asai keklemponlo; lahei anke aron-atang pima monit aphan thangnat akerap avelo, alangphan thangnat ale avelo; lahei anke pima thangnat lamjor kavedet asai amo si klem-dambomlo. Lahenlo aron pu angtheklo, lapen lason aron ke hekjokvek si kenangpo, athe lahei ke monit aphan thangnat ale kerap avelo. Lake pima atheke monit aphan ale kedo lasi pima asai along klemponvek nangpo.
