Khristo Pen Kachemesenji Atovar si Nang Chiri nangji

Monit atum angbong Ne keongdung asai klempon tanglo, halaso apor ahut Ne penang an alamthe tame ningjeponlo. Laheihui alamthe kedoan ke monit atum kejok kelongji apharmanveklo lapen lasi monit atum Ne pen kachemesen kethekji aphan pusi ningjeponlo. Tebonta, pirthe along Ne pen kachemesen ke ajahak amonit atum aphan si longponchotlo, lapen lasi Ne pulo monit atum Ne lamthe rimvetvedet – lake athema monit atum Ne pen kachemesen kalidetlo. Lapuson pen si, Ne keklem ke thangbakbe kali athe ke monit atum Nephan karcho thekji aphan; kenangsotnei ke, lake lasi monit atum Ne pen kachemesen thekji aphanlo. Monit atum aphan phangnodaklo lapen Sobar apham along si donanglo. Kadokave amonit atum tame ok pen si dolo, mena apharman aphan si rengdunlo, lapen komatmat si Ne pen kachemesenji puke latum angbong pen inutnat anta avedetlo. Hala komatmat si Ne pen kachemesenlo pu latum kaningje atum, bonta lason amonit atum ke kachininepin akumlin aphan si archolo. Ne men aphan akangthir pu latum nangchoro puvoiphit sitame, Nelong pen akacheprek ahin akrong si latum damronglo, lapen alangtum alamthe along mena ale aphan lapen mena kachepindak si plengsetlo. Lake pipotma, angkur ke, latum Nephan khamkhelo lapen Ne pen chemesensedetlo. Arnivang ta, Baibel along latum Nephan nangriverlo lapen “kechokmeme” angdeng si latum matha pememe pen jutjepin porhilo lapen ketok alo pujirverlo. Latum Ne pen kachemesenji aphan kopusonma mate Nephan nangkachedan ke kopi aphanma pu chininedetlo. Latum thangbakbe si ketok alo porhithaplo. Baibel arlo along, latum kachinine Arnam aphan si kroidunlo pima latum theklonglepinlang, lapen laphan theklongledetji, lapen alangtum kerengmesenji aphan si chorilo. Latum Ne kedo aphan ke Baibel angkang arlo an si kroidamchotlo, lapen Nephan Baibel pen si pachingbarlo; Baibel le avete Ne ta avelo, lapen Ne le avete Baibel ta avelo. Ne kedo mate sai amo keklem aphan latum ardi pipedetlo, bonta ketok alo along asontin alamthe aphan si arsikjik apor chipilo lapen prekjek munthilo. Penang an atum akekroidam ke Ne ninghang keklemji pu ketok alo along kethanmek avete Ne thangnat ta klem nangne pulo. Latum ketok alo aphan si akele akenangsot pu ardi chipilo. Lake lason le ningjedet ta melo athe latum lamthe lapen kethan alam aphan si akele ardi kipi pen langlo, anpar tame latum Baibel angdeng heihui enpon si Ne kaningje alam aphan linlo lapen Nephan nangpinrem’ilo. Kopima latum akiri ke Ne pen kachemesenji aphan akrong kalipinlo mate ahok pen kachemesenji akrong ta kalilo, bonta Baibel along alamthe heihui pen si kachemesenji akronglo, lapen latum akekroidam ke Baibel pen kachingbarbedet ason anke, aron kekroi kalipinlo, Ne sai kalilo. Tangte lason amonit atum ke adeng kacheklemvet titi Pharisi aso-asu kalilang puhe? Jew aPharisee atum ke Moses aron pen enpon si Jisu aphan pinrem’ilo. Halaso apor ahut Jisu pen latum kachemesenji aphan rirepinlo, bonta athikpet pen si kido along ketok aron kroidunlo, anpar tame – Kejok alo barim along aron kedengdedet apot lapen Kepajokthek abang kalidet pu Alangphan ingchekdet pen – latum kapadusi ke adai kavepin Jisu aphan thengparpan athak saklo. Kopilo alangtum along kedo aot-adur ke? Tangte lake latum ahok pen kachemesenji aphan kiri akrong kalidetlang kalima? Latum ke ketok alo along asontin alamthe aphan si akele chemeronglo tebonta Ne ninghang mate Ne sai angdeng lapen adichi aphan hinhin ta ardi pipedetlo. Latum ke ahok aphan kiri amonit atum kalidetlo, bonta lamthe aphan keot arsikjik amonit atum pinaklo; latum ke Arnam aphan kekroi amonit atum kalidetlo, bonta Baibel aphan kekroi amonit atum si manlo. Chenam ta, latum ke Baibel aphan kelang-kelana atumlo. Baibel aningkehang ateng keraikomvetji pu aphan, Baibel aman-apeng kapathirverji aphan, lapen Baibel akeme alam keraivetji aphan, latum thengparpan athak kangjinsothek Jisu aphan sakdetlo. Lake latum Baibel aphan keraikomvetji aphan ajoine puloma, lapen monit atum aning along Baibel alamthe asontin doan isi man-peng angdeng kalanavetji apot ajoinelo. Lasi alangtum mohut aphan latum che’obupji ninghanglo lapen Jisu aphan kelangrem apap si chehodailo, ketok alo along ateng kethan pen akeja aphan dengdepin, pathilotlo. Tangte latum doan ke ketok alo along alamthe asontin ateng ban kedo kalilang puhe?

Lapen nonlom amonit atum ke kosonlo ante? Ahok nangkethanji aphan si Jisu vanglo, tebonta latum ke bangso apirthe pen si Alangphan plunglo pima lake latum sining hemrengme kilutdun longji lapen kangjinso kelongji aphanlo. Latum tangte Baibel akenang aphan keraikomji pu ajoine pen ahok kevang aphan ke angtong pen amat si dengdedetlo, lapen ok kachemanthu si thengparpan athak puthot latum Khristo aphan saklo pima laso pen Baibel kijut un’epin kedover longji aphan si siklo. Kopuson si monit atum Ne akejok kelongpo puanpin alang ning kapasungji kemon’e lapen alang asema ke Nephan nangkelangset ason pinak? Ne monit anglum si dolo, tebonta Ne kedo alam monit atum nangchininedetlo. Monit aphan Ne akatheang atur dolo te, alang ke Ne do pu nonpu ta panungkuk bomlang. Ne le monit aphan ningkithi pangchenglo te, thedung ajakong pen si Nephan nanglangplotlo. Monit kiri ke lamthe pen kachemesenji aphan lapen Baibel pen kachemesenji aphan, tebonta inutnat amonit tame ahok pen kachemesenji aphan akerong kiri Nedung inutnat amonit ta nangpatebokbe. Monit atum Nephan sining hemrengme athak si nanglanglo lapen Ne sining hemrengme along kedo aphan si jasemet kamatha apor chipilo, tebonta Ne ok keman ahut ke madu ta nangmathathedetlo, pima Ne monit anglum kedodun ke thangbakbe akenang avepin asonlo. Komatmat ma Baibel along alamthe pen si kachemesenji pu kiri anchot atum lapen matmat si kachininepin Arnam pen le kachemesenji pu kiri atum doan ke Ne mek angden kahenoneilo. Lake pima latum karcho ke athema kithitang alamthe saise, lapen kidipjoi kabirtitang ason-amung le kipithek a’Arnam pulote; kopima latum karcho a’Arnam ke Alang methang si monit atum arideng jakong chepidetpo – laso a’Arnam ke ladak ave. Kopilo, tangte, lason amonit atum Nelong pen kelongji? Monit atum lamthe heihui aphan si akele chepabi ronglo. Komatmat ma Ne pen kachedan atum, kachekhang kavepin Nelong nangchohang atum, ahok aphan kanghon kavedet atum, Nephan kachesongdutji atum doan – koson si latum le Ne pen kachemesenji kethekpo?

Komatmat ma Ne pen kachedan atum latum ke Ne pen kachemesenji un’elo. Lason si komat ma ahok aphan kachinghon kavedet atum angbong ta lasonlo. Komatmat ma Nephan kachesongji atum ke lapu an sose si Ne pen chedanthupo lapen Ne pen chemesensedetpo. Ne pen kachemesensedet atum kedoan aphan ke Ne hi-i arideng si hodaidet tanglo, lapen hi-I atum kaphangnoji si latum aphan Ne akejoi pen pidetlo, alangtum kaphangnoji pu kapachiniji si latum aphan akejoi pen jakong pidetlo, lapen padusi ke latum aphan kapahenodakji si hi-i atum arideng hodaidetlo. Nephan bang koan atum si karcho ma pu mathaletle, lake pima pulote, Nephan bang koan atum si kekroi doma pu mathaletle. Ne akamathadam kedo ke bang koan atum si Ne pen kachemesen kedoma pu henlo. Lake pipotma pulote komatmat si Ne pen kachemesensedet atum doan ke hi-i saidelo pima Nephan chongthuilo; latum ke Ne hotur saidelo, lapen Ne hotur atum aphan ke Ne hem along “man-peng anghoi” Ne pipedetpo. Komatmat ma Ne pen kachemsen atum doan ke Nephan jutjetik nangru-thaipo Ne hem along, lapen matmat ma Ne birudhe kithur atum ke Ne kijut un’epin ado kipi si chechak nangpo. Komatmat ma Baibel alam heihui si chemathachot atum lapen ahok aphan ta mathathe mate Ne kengbot tame kirire atum doan – latum ke Ne pen si chedanlo, pima Nephan Baibel along ateng si nanglakhalo, Baibel along an si Nephan nangbilo, lapen ke lasi Nephan akele nongno nangjothaplo. Kopuson si lason amonit atum Nedung vang unji? Ne sai amo aphan latum masap ta ardi pipe, mate Ne ninghang aphan, mate la ahok aphan, bonta alar ke lamthe aphan si lut’itlo – lamthe ke kithi vanlo. Kopuson si lason amonit atum Ne pen kachemesen thekpo?

Ne penang an alamthe ningje tanglo, lapen ne ningkehang lapen akun alam ta chethanlo, tebonta laso aphi, monit atum nonpu ta Nephan nangchinindetlo lapen Nephan kroikredetlo. Mate, lake lapu ta ningjeme, monit atum nonpu ta Ne kethan alam arjujedetlo. Komatmat ma Baibel arlo an kedo, komatmat ma aron angbong an kedo, matmat si thengparpan athak kedo, kethan-kacheja ateng matmat si kedoma, Ne pini arni keklem angbong matmat si kedoma – latum angbong pen komatlo Ne pen kachemesen kedo? Nangtum ke hirjume lapen nong’e kelongji aphan si mathachotlo, bonta Ne pen kopuson si ahokpet kachemesenji ma, mate Ne pen kachedandedetji aphan kopuson si nang methang aphan kachekhang unji puke kamathaji apor chipipe. Nangtum aphan lasonji pu Ne mathathe, pima Ne kedoan nangtum aphan nangpi’etlo, tebonta nangtum along pen Ne ke masapso si longchotlo. Nangtum kapachobei, nangtum ane chepathe, nangtum mek kelangno, nangtum kekhang kavedet kar’ithap, nangtum kachongthui, nangtum athikdut kave – Ne nangkelang pen laheihui kopu si chepajok unji? Nephan nangtum ke nangmathakranglo, nangtum Nephan pachobeidetlo, nangtum Nephan patheraklo, nangtum Nephan chongthuilo, nangtum Nephan alar huilo lapen Nephan nangthi bor’ilo athok-ajir aphan – kopuson si Ne ado kipi pen lason kaheno ason kejok unji? Lahei kedoan kechokche keklem pen ke Nephan kelangselet kachedan pu nangtum angthek cheklanglo lapen nangtum Ne pen chemesense puta angthek klangdaklo. Ne pen chemesen pemelo pusi anuttin ta nangtum ke nangtum methang aphan kroidamlo, bonta jongsi lason pulote, tangte la kekroikre un’e angthek keklang ke mat atum aphanlo? Nangtum kekroidam ke nangtum methang aphan athikdut binong si dolo lapen Ne ingno chepebihek pulo. Nangtum kamatha ke nang aning kemesen chenam, kangjinsothek peme, lapen Nephan si angton apor chipilo. Nangtum kamatha ke Nephan akele si nangtum sai klempilo. Bonta lahei ason nangtum ephongbak nangtum keklem along paroponlo ma? Ne ningjelang nangtum ke mena ale apharman si plengset, mek kethe pen si plengset, kamathakrang pen si plengset; Nephan mekbin pen nangchongthui’i doan ke keresakjak plengsetlo, lapen nanglong kelangselet aning lapen kelangselet adichi si plengsetlo. Nangtum kachepabihek ke masapsonat, nangtum athikdut ke malomsonat, lapen nangtum keme-kaheno kethakthek ke kadure thepiklang. Nangtum aning along kaheno ason si plengset dolang, lapen nang akeheno pen madu tame jokjelang, Ne amat tame. Nangtum mena asomar aphan ajoine Nephan nangturchorlo, mate nang penan, mate nang mena aphan kachethikvet apot. Nephan nangkelangji alar ke, nang nangtum ahemtun, nangtum asomar, nangtum aman-apeng, nangtum mohut, lapen nangtum mena karengmesenji aphan si chelanalo. Komentu si nangtum Nephan ephongbak nang lam lapen keklem pen kachematha dolo? Kangsamjet arni tame, nangtum aning ke nang somar ahin si dolo, nang penan, nang piso, mate nang pei-po. Kesoluk arni tame, Ne ke nangtum aning kamatha along adim ave, theklorlo. Nang mena adeng kacheklembom ahut, nang ke nang mena ninghang aphan, nang mena jongjung akerai aphan, nang don-rap atum doan aphan si chemathalo. Nephan puke kopilo nang ephongbak keklem? Nephan lapen Ne sai aphan, aling tame, komentu si aphongbak nang mena aphan apor chipilo? Ne pen kachemesen puke nanglong konatlo angthek kedo ke? Nephan ahokpet pen chepabihek puke chenam ta konatlo? Nephan ke athikdut pu nanglong chenam ta konatlo? Komentu si nang ning kamatha ke Nelong pen hirjume kelongji aphanchot pu kalilo? Nangtum kiludet lapen nephan chongthuilo, nangtum ahok pen si jui’ilo, ahok kedo aphan ke nang dipjoilo, lapen ahok pu akenangsot alam aphan chongthuidetlo. Lapuson le nangtum Ne birudhe kithur ke mohut kopilo nangkanghong? Kachinine Arnam pen si thangbakbe nangtum kachemesenji rilo, lapen kachinine akekroi si thangbakbe rilo, tebonta nang ke Khristo pen chemesenselang. Tangte nangtum akechokchedet apot kahenodak aphan asonthot ado kephophedet jilang puhe? Laso apor ahut, nangtum chichinipo madu tame Khristo pen chemesensepinlang atum anke ningkithi arni pen chepajok un’e, lapen Khristo abirudhe kithur atum doan aphan ke kopuson ado si kipijima nangtum theklongpo. Laso arni le nangkele lote, nangtum amang Arnam aphan kekroi apot ahirjume kelonglo lapen sining hemrengme kidun longlo pu heihui doan ke chingjephunpo. Lake lason kalidetpo, chenam ta, komatmat ma Khristo pen kachemesen atum doan ke. Latum le kopuan lone chepangbolo tame, kisung-keboi koan lone latum chechak nanglo tame, latum ke Ne monit akhei aphan kithikpitang akhi-adat doan ke longpo. Kapadusi ke, nangtum chinipo pima Ne inutnat si kechoklim Arnam, lapen athe monit akhei aphan alang kelangmesen kemang adim kepaledam thekji abang Ne inut anchotlo.