Chethe Along Kevang Angbong pen Nang ta Kalangloma?

Nang jongsi kemesen amonit abang ason le kerengdun longlo lapen nangphan pachoklim tanglo, nang mo kevangji alam kethanmek thekthedetji meme, mate menmen kachinidam un’edet alam heihui doan tame, nang ke rengdunbomji lapen monit araje si cheklangpo. Monit aphan Arnam pinchonglo, bonta laso aphi monit aphan Sobar phangnodetlo, lason si monit atum ke “kithitang amonit” chemanlo. Lasi, nang chelardet aphi anke, nang ke laheihui “kithitang amonit” atum ason kalidetlo. Lake Arnam si kaningje alamlo pima monit atum akarjong parengthulo lapen latum aphan mahang pathekthumilo, lapen monit atum akarjong mahangthekthumi si, latum chethe along along vanglongji. Ne le “kithitang amonit” atum alam ningje lote, hala akarjong kave kithitang arpum atum aphan si kejongdamlo, latum along akarjong ta kithidunlot amonit atum aphan si pulo. Monit atum akarjong along le masapsobak atur turbor dolo te, monit atum chethe along vang tanglo. Chethe along kevangtang amonit atum aphan jongdamde aphrang le kangthir’et abang amonit alam kachethan ahut, Sobar aninghang aling kedodunnang atum bonta Sobar aphan haithudetlo. China along kangvaitang amonit atum kaheno keklem chenam lapen kesung aningkarengnodun kavepin aduk kanghoi lapen thedung ake’er dragon api akachongthui pen chechak nanglo, laso ajok latum aphan aphu tarlok phangno’etlo lapen majersobak anta kerengji aphan aningkethe pavepinlo. Laso apot si, alangtum akarjong kithurthu aphan ke alangtum akenangsotnei pen si pangcheng nangkokpo: Masap masap pen, alangtum akenangsot along, alangtum akarjong aphan ingthurvek nangpo. Latum le mo arnisi chethe along vanglo tangte, kebeng-kephan anpar ke avedetpo, lapen ajat ason tame paphrangji joikepo. Nonmat ke, la kechun un’e si dobomlang. Ongdung amonit atum akereng ke penang an kapherememe akamathadam aphan si kechengsi vandet titi henlo; latum aphan kithi atomon angkang si perponthiplo, lapen latum along keongdung ason akadure do’olang. Ajahak amonit atum kaningje alamthe along ta kithi si ponlo, alangtum akeklem along ta kithi si ponlo, lapen chenam si asontin tame latum akai kereng along kithi aphan si aphrangsi vandet titilo. Jongsi, pini arni, monit atum Arnam alammo rat aphan pachini asonte, latum laso asai pachun un’edetji, athema latum chethe along vanglong pememelang, lapen nangtum angbong akeongdungpi ke kithitang si do. Pini, ajahak amonit atum kopi apot si Arnam ajahak angthek chepaklangkle lapen kamanghumeme asai klem ra Alangli tongsekot pen Gentiles atum angbong Alangli sai pangdangdedetlo pu akarju dolo. Kithitang atum ke Arnam alammo than thekthedetji; lake chenam ta kerengbom atum anchot si klem unji, lapen bontame pini arni ongdung amonit atum ke “kithitang amonit” saide; penang an amonit atum ke kithi kiphunghet along si dolo, Sobar aninghang aling kapaklemtoi along si do, lapen kehaiji aphan long un’edetlo. Lason pulo tangte, kopuson si latum Arnam alammo kethan thekpo? Kopuson si latum birta keme asai kapangdang thekpo?

Komatmat ma kangting angbong kedodun nangbomlang atum anke kithi angbong si kedodun atumlo, Sobar kacheparidengdet atum saidelo. Arnam kapajok lapen akangsai lapen Arnam akangchek longdunde tangte, monit atum kithi ahin kachingbedun pen chepajok un’e; latum kerenglang pu cheplang un’e. Lahei “kithitang amonit” atum Arnam alammo than thekthe, lapen Arnam latum aphan asai tame enponpe, Arnam arat arlo masapso ta lutdun longle. Kereng atum alammo si Arnam ke akenangji, kithi atum kali, lapen Alangli akepha ta kereng atum aphan, kithi aphan kali, Alangli sai kapaklemji aphan. “Kithitang” pu anke Arnam aphan kejongdun lapen kachesongdut atumlo; latum ke akarjong kangsamklak atumlo lapen Arnam alam heihui ke chinidamdelo; latum ke ahokpet aphan keklem-kedam along kacharliponpe atumlo lapen Arnam along masapso ta kachepebihek ave, lapen latum ke Sobar arideng kedodunnang atum saidelo lapen Sobar si phangno’etlo. Kithitang puke amena si ahokpet aphan kachekroidunde kedo pen si chepaklangdaklo, Arnam aphan si kachesongdundut pen kedo, lapen ardi kachepavedet, kapalangseletmeme, kapasungji kemon’e, kaheno ahir ketanrak, ahokhe lapen pajo pen kisungnei kepaphodet kedo henlo. Lason amonit atum le jongsi Arnam alam heihui cho lapen junlo tame; latum reng’ak putame, latum ke lapu damchot anatlo, achethe kache’en kithi arpumlo. Kithitang atum anke Arnam aphan angton pen aningpangsam un’e, Alanglilong athikdut pen kedoji tame durepik anlang. Latum ke kapachobei si thekchotlo, Alangliphan si nongno kejothap, lapen Alangliphan kachongthui, lapen latum akerengbom along latum aphrangsi ke Sobar a’ot-adur si athak cheklanglo. Jongsi monit atum kereng’et abang si kacheman kangtung do lapen Arnam alammo kethanji ninghang, lapen Arnam pen akehokpon long nangji tangte, latum Arnam kepajok chodengvek nangji; latum ning arongchen pen Alangli akangsai lapen akangchek along chipidetvek nangpo lapen chehokjok pen Arnam akarche chekroidunvek nangpo lapen Alangliphan si kapachejalong peman nangpo. Lapuson klemdet ansi latum kacharlipon along Arnam pen akenangji kedoan ahokpet heihui klempon thekpo, lapen lasonsi Arnam akejok latum longdunpo lapen chenam si kereng’et atum plangpo. Arnam si kereng’et atum aphan ke pajoklo; latum aphan Arnam si ingsailo lapen ingcheklo, latum ke amena si kachipidundetji ninghanglo lapen Arnam apharman apran kachipidetji ta ningaronglo, lapen latum ning arongchen pen si alangtum akai dingpi Arnam aphan chipidetpo. Arnam alammo kereng’et atum thandet aphi ansi Sobar ke chetherak nangji; Arnam abirta keme asai keklem ke kereng’et atum si pachethang thekchotji, kereng’et atum anchot si Arnam aning ar’iji, lapen kereng’et atum ansi ahokpet amonit. Abinong’et ke Arnam akapinchong amonit reng’et, bonta Sobar kahenodak ajoine monit kithi angbong si donanglo lapen Sobar aninghang aling keklem along si donanglo, lapen lasi, lapuson pen si, monit atum karjong kavedet akithitang chemanlo, latum ke hotur si chemandetlo pima Arnam abe kidun atum kalidetlo, latum ke Sobar kapakan’i ahormu chemandetlo, lapen latum ke Sobar arideng kachingnangchek si donanglo. Arnam pen kapinchong kedoan kereng’et amonit atum kithitang amonit atum si chemanlo, lapen lasi Arnam ta Alangli alammo chepangbochoklo, lapen Alangli kapinchongvek amonit akhei Alangli pangbodetlo lapen la anchot henlo Alangli achethe ahormu kedo. Arnam jongsi Alangli alammo che’enthudetji lapen Alangli rideng pen kapinchongvek atum doan aphan che’enthuji bonta latum aphan Sobar si cheparideng’et, tangte halatum aphan Alangli chethe pithu pen latum kereng’et atum ason pacheman nangkokpo, lapen Alangli halatum aphan pame-pachokthu pen latum Alangli katheang along kedodunlongji aphanlo. Kithitang atum doan ke akarjong kavetanglo, komatmat ma kangsamklak ta kilitpik lapen Arnam abe kali atumlo. Latum ke chenam ta Arnam aphan kachinine atum binonglo. Laheihui amonit atum ke masapsobak anta Arnam alam karjuji akamathadam avelo; latum ke Alangliphan kachesongji si richotlo lapen Alangliphan jongdunlo lapen masapsonat ta kachepebi avelo. Kereng’et atum doan ke akarjong hachethumi tanglo, Arnam alam arjudun thekji, lapen Arnam along kachepebi pen si doji. Ahok si latum along dopetji, lapen alammo antalo, lapenthu laheihui amonit atum anchot si Arnam aphan ningpangsamji Alanglihem along amat. Komatmat ma chethe along kevang atum aphan Arnam pajok, Arnam akejok ketheklong atum, Arnam along kachepbihek pen kedothek lapen Arnam aphan kiri aninghang atum. Arnam monit ason nangkacheparje lapen Alangli nangkacheklang alam kekroi atum aphan Alangli pajok. Ajahak amonit atum chethe along vangji, lapen ajahak atum ke vangvedetji; lason kachemanji ke alangtum aot-adur pen ajok pajok unjima un’ema puchotlo. Penang an amonit atum Arnam alam heihui arjulongpiklo tebonta Arnam aningkehang chinidundelang, lapen nonpu anta lahei doan keklem-kedam along chipidun thekthelang. Lason amonit atum ke ahok pen kerengdunji thekthelo lapen chinilor si Arnam keklem asai along chejokdunpo. Arnam aphan latum ke ajat asai ta klempi thekthelo, latum ke Alangliphan ajat ta chipidet un’elo, lapen latum ke joijoi pen mondoli atangka padam’etlo lapen Arnam ahem along akejoi pen chodunlo. Laheihui amonit atum ke kithitanglo lapen latum ke jok un’edetpo. Alangli sai angbong kedo atum an aphan si Arnam ke pajokji, bonta ajahak amonit atum ke Alangli kepajok longdundet detpo; masapso aphai atum anchot si Alangli kejok longdunji, pima ongdung amonit atum ke kithitangdetlo, lason si latum aphan pajok un’edet anlo. Latum aphan ke Sobar si angton pen phangnodet khangjanglo, lapen latum ke alangtum aot-adur bang aphan kapasunglokji si dolo. Masapso aphai amonit atum anta Arnam alam angton pen karjuji un’edetlo. Latum doan ke ha kecheng pen Arnam aphan kekroi thirklong atum kalidetlo, mate kecheng ahut pen Arnam aphan si kanghon kipivet atum kalidetlo; tebonta, latum ke Arnam along athikdut kedodun ta Alangli kehai’un asai keklem ajoine puchotlo, latum Arnam aphan kelang ke Alangli kangtuiving akanghon apot, alangtum akun along kachelar kedo ta Arnam ahokpet kangthirjir akun ajoinelo, lapen latum Arnam aphan kachinidun ke Alangli sai ajoklo, kacheklangdak lapen kejoike Alangli keklem asai apotlo. Lapuson asai Arnam klemkledet ason te, laheihui amonit atum jonghele me sitame, latum doan ke Sobar si chemanjilang, latum ke kithitang si dojilang, lapen latum ke kithi si dovekjilang. Laheihui amonit atum pini arni Arnam akejok kelong ke chenam ta latum Arnam pen kajalang rappetji aningkehang kedo apotveklo.

Arnam along alangtum kachepebihek ajoine, kereng’et atum ke Arnam si cheparidengponpo lapen Alangli alamchak heihui angbong si dopo, lapen alangtum Arnam abe kidundet ajoine ke, kithitang atum aphan ke Arnam langseletpo lapen varchorpo lapen Alangli adai ke’en lapen hirjuno angbong si donangpo. Lahenlo Arnam kangthirjir akun ke, madu amonit ta lake lar un’elo. Alangtum amena akiri pen ajok, monit atum Arnam akedeng longdunlo lapen katheang along rengdunlo; alangtum keresakjak abidi ajoine pen, monit atum aphan Arnam ahirjuno pilo lapen adai ke’en along si klodunlo; athema alangtum kahenodak sai keklem apot, monit atum aphan Arnam si adai enlo, lapen alangtum akar’i lapen kachepebi apot, monit atum Arnam ahirjume doan longlo. Arnam ke ahok ingthirjir: kereng’et atum aphan Alangli ahirjume pilo, lapen kithitang atum aphan ke hirjuno pilo laso pen ajok latum ke kaiketa kithi angbong si dolo lapen Arnam akatheang along ke dodun longlelo. Kereng’et atum aphan Arnam si Alangli rat along cheponji lapen Alangli ahirjume along antalo, Alangli pen kaike kedo longverji aphan. Bonta kithitang atum aphan ke, Alangli halatum aphan turchor si lapen kijut un’epin kithi along halatum aphan paklodetpo; latum ke Alangli kapavir ason-amung saidelo lapen kaiketa Sobar ahormu si manpo. Arnam ke madu aphan ta kangsai pachingbarpet. Komatmat ma Arnam aphan ahokpet kiri atum doan ke Arnam ahem along si dodun longpo, lapen komatmat ma Arnam alam kapatepek lapen Alangli pen chingbardunde atum doan ke Alangli adai ke’en angbong chenam si phodunvekpo. Chenam ta nang ke ok along Arnam keklem asai athik chininelang – bonta mo arnisi, Arnam a’ok-abang ke monit atum akejut thikdamvetveji; alar ke, Alangli Karjong ke monit atum keledamji adim aphan si sikpipo, lapen laso ahut ansi monit atum Arnam abang arpum lapen Alangli akarjong ke isinatlo pu chinipinpo, Alangli aok-abang kaheno klem un’e, lapen anpar ta Alangli Karjong ke kaheno klemthu un’e muchotlang. Kapadusi ke, Alangli rat kemandun pen chethe keongduntang atum aphan anke Alangli cheponpo; ephong abat mate pajumchetji lapu kalipinlo. Tebonta kithitang atum aphan ke, chethe along kevangvelang atum doan, latum aphan ke Sobar kapachobai along si vardunchorpo.