Khristo pen Kachemesen Thekthe Atum ke Arnam Aphan Kekhamkhe Atum Chenamlo

Kadokave amonit ta Jisu apharman arjap ingtung, lapen kadokave ta Alanglilong dodun ingtung. Ne matha un’e komatne akorte mate ingjir tame Jisu aphan kelang ingtungte mate dodun ingtungte puke. Nangtum Jisu aphan theklongle aphrang – nangtum Arnam nangcheparjan abang aphan theklongle aphrang – nangtum prekjam dopik alamthe kekroidamji si angring do, pulonang, Jisu araje aphuthak, Alangli lam kaningje a’ot, Alangli kerengdunbom a’ot, lapen dopiklang. Bonta nangtum ephong le Alangliphan kethelong lote, nangtum kamatha prapjin pen chelarphitji. Kopi apotlo lake? Nangtum chini ingtung ma? Monit atum nangpalangkaiji pu kamatha, lake ahok lohe – bonta hala pen apar, Khristo atiri ke monit pen kachelar aling lidunde. Nangtum Khristo ke kithi un’e abang mate thek-reset abang putong matha, bonta majok ta Alangliphan thangbakbe monit sita kangthir’et atiri kedo abang pu mathathe. Lason amat si, penang an ajo-adap ta Arnam aphan kar’i atum ke ahokpet Arnam ahotur pinak, lapen latum ke Alangli pen dorap thekthe. Lake monit atum ahin pen kechokdamde kalima? Non tame nangtum ke nangtum along kedo kekroi lapen ning keklar anta Khristo apharman karjap unji aphan dorpo pusi kamatha, bonta Ne nangtum ansose asai pen keklem ason kachepadoji aphan nangpulo! Athe ke kedamtang ahut, nonhut, lapen mohut, Jisu pen kachetongtang angbong pen penang an atum ke un’edetlo mate un’epo; latum kadokave ta Pharisees adeng si keklem. Nangtum un’edet athe kopilo? Jongdamklok lote lake nangtum kamatha along inut the-dinglen lapen ro meme Arnam kedo apot. Bonta ahokpet alam ke monit kemang ateng kali. Khristo ke the-dinglen kali pu anchot kali, bonta Alangli atheng bihek; Alangli ke monit pu anchot kali, bonta Alangli ke prekjek ason kave amonit; Alangli Siningrengme arlu un’e pu anchot kali; bonta Alangli pirthe along ta ninghang aling kedam jokvan kali. Lapen lason tangdet apot si, monit atum Alangliphan kaprek thangbakbe amonit atum aphan ateng si kethekdam; alangtum Alanglilong kedodun ahut Alangliphan thangnat aron kave ateng si kivipon, lapen Alangliphan chererepin pensi kachingki, lapuan angbong ta “ahokpet Khristo” kevangji aphan kachonghong. Nangtum hala thangbakbe amonit aphan kevangtang aKhristo aphan le dengnoi, lapen thangbakbe amonit aphan Alangli lamthe. Lason ajok si, nangtum Khristo along thangnat longdundedetlo, lapen laso alar ke nangmethang aketer ingthilim pen katheang along chepaklang.

Jisu pen chetongte aphrang, nang’ot ingthimlim pen chekirlalo pusi, nang ke Khristo aphan ingthirjir pen kekroi abang, nang pen apar ke majok ta Khristo ahirjume kelongji apun ave pu matha tahai – lapen, penang an atovar along kedam tangdet, ongdung asai keklem tangdet, lapen penang an angthek kepaklang tangdet apot si, nang chenam-chenum ta recho aphutup kelong atum angbong pen inutpo. Sitame isi ahok alam nang chininedet tahai dolang: inut amonit along chongthui-chopanglim a’ot lapen alangli kekhamkhe ahir lapen kekroikre doan ta mo Khristo aphan ketheklong arni ahut si cheklangji, lapen halaso ahut kacheklang kekhamkhe lapen kekroikre ke kacheklang ke kaprek pen mute ansose ahir ketan lapen ingthimlim pensi cheklangpo. Laso athe ke monit Khristo ke monit Asopo – inut kadokave amonit ason a’ot kedo abangphu Asopo – Alangliphan monit atum archoche lapen man pipe. Athe ke monit atum kekhamkhe a’ot katheang along kevanji lapen lapuan pajirmi pen aphan si Arnam ta abang a’ok along kedo. Lasi Ne pudetji Khristo kevang pen monit atum along kedoan kekhamkhe a’ot phurlaplo lapen monit atum akun aphan kengset anat parjang ponlo. Laso aphan si pulo “inglong aber teke kepha” lapen “kethoi aphan angthor arlo pen kepha.” Nang Arnam aphan ning ingthirjir pen si kekroi pu chematha hailang ma? Nang Arnam aphan alam kekroi chenam pu chematha hailang ma? Nanglong kekhamkhe a’ot ave pu chematha hailang ma? Ajahak atum pupo: “Arnam nephan varmon kimi along nangkangthur aling, ne thangnat ningjeje pensi chehodaipo, lapen anparta ne Arnam aphuthak thangnat kamathadamthap ave.” Ajahak atum puji: “Arnam nephan nangkepek asai doan ta ne jakong doan pensi klem lapen ne mantune ta cherere pupe.” Lason pulote, Ne nangtumphan nang arjuji: Khristo adung kedodun ahut nangtum Alangli pen chingbardun thekji ma? Lapen komentu ansi chepangbardun unji? Arnisi? Ni ni? Ghonta isi? Ghonta hini? Nangtum akekroi ta choro meme tahai mene, bonta nangtum along ning kithir ahin abang do’o kalidet. Ephong jongsi nang ahokpet Khristo pen kedoraplo pulote, nangtum methang aphan choklim pu kachipu ason lapen mena aphan ardi kachipi doan ta nanglam lapen nangsai pensi cheklang’etji, echet aphi echet, lapen lasonthot si nang chepatujoi akemang ason, nang kekroikreji kamatha lapen ning keplengple ta amethang si cheklangdetji. Kijutsi, nang ning kasedeng nangbatbompo, mo nang Khristo pen chetontedet an lang pen me ateng, lapen laso aphi ke nang’ot ingthimlim pen cheklangdakpo. Halaso apor ahut, nang kamatha ason dipbom un’elo, nang kakhinde, tame, amethang si nangtetpo, lapen nang honjat kave monit a’ot ta ingthimlim pen cheklangpo. Laso ahut anta, sitame, nang methang kekhamkhe a’ot chekubirbe, lapuson aKhristo ke monit atum kedengji kejoike kali pu kroi si, monit aphan Alangli apar hangdet pu matha pen, lapen nang methang aphan ingthimlim chipidetji jongsi Alangli inut chinkimechet aKhristo pu asonte. Nangtum kachematha ke nangtum kekhamkhe choklim, nangtum Alangliphan kechedan ke Alangli nangtum aphan apar nangtoidet ahut chot pu. Mantune ta nangtum chemathathe nangtum Khristo aphan Arnam pu atheng pen langle puke, nangtum Alangliphan kekroiji akemang duredet puke. Alar ke, ingthin chepathebui pen Khristo nang kemang ateng pensi sai keklemji pusi pasik’rong, lapen Alangli nang kamatha kachetonte esonbak asai keklem lote, Alangli ke Arnam kali monit pusi nang ke kroidunpo. Alangliphan lapuson kachedan abang nangtum angbong do’e’e puhe? Komatlo hala, lapuan aphi, lale nangtum kekroi he? Lapen koson pensi nangtum kiri?

Nangtum kaiketa Khristo aphan kelangji ninghang, bonta nangtum lapuson kangtuiving akemang chibiri pusi ne nangpuji; majok ta Khristo aphan langme, bonta ne puji nangtum angbong majok ta Khristo aphan kelangji apun ave. Athe ke monit a’ot ke hi’i, kasedeng, lapen kekhamkhe pensi plengtirlo, nang’ot si nangphan phalangnopo lapen thipin an pinrempo. Inut akorte (mate ingjir) pen nang kachepho ke nang’ot pacheklang’o’edet tahai, bonta Khristo pen nang kachepho ke thangbakbe ason kali. Ajat apor sitame, nangkemang angkur chejar tahai, nang kasedeng amek vang tahai, lapen nang kekhamkhe a’ot pathe tahai. Kosonsi lapuson amonit a’ot penle nang Khristo pen kachepho thekpo? Nang ahokpet pen Alangliphan arnivang ta ajat apor sitame Alangliphan Arnam pu hok thekma? Nang ahokpet pen Arnam aphan chehodai chenamjima? Nangtum ke nangning arlo kedo kethe-keding Arnam aphan si si Jehovah ason kardom hapu ketheklonglor Khristo aphan ke monit pusi kehok. Nang kachini ajakong ke apar memedet lapen nangtum monit a’ot apar apun kave! Nangtum ke kaike amat Khristo aphan Arnam pupen kachikiji a’ot avedet; ahut pen anvet, nangtum ning vanglet ahutsi, Alangliphan riphet si lapen Alangliphan Arnam pu hok pen kardom. Lasi Ne kipulo nangtum ke Arnam aphan kekroi abang kali, bonta Khristo aphan kachedan isi keklemrap adilung. Anut kaprek aphan kanghon pon amonit aphan anta kachituthu, laso aphi ta Khristo, matma nangtum anglum lapuan asai keklem tangdet abang, ke monit akanghon ta longle mate alang kachehodai lapen anam ta longle. Lake kopine ningduk meme alam kalima?

Tahai mene nang Arnam aphan kekroi lapuan aningkan angbong, nang majok aphan ta hirjuno pipe mate kechokche asai klemkle, sitame nang Khristo pen kachelang ahut, nang ahok alam ningje thekthe, mate Khristo alamthe arjuje, Ne nangthekdun longlo nang henlo pirthe adang pen kaphere memenai lapen kapaheno riroknai abangphu. Nang nangdon-rap, jirpi-jirpo, piso (penan), son atum lapen sopi atum lapen po-pei atum aphan ke romeme an nang’ot keme lapen methang aphan chepidet tahai mene, lapen mantune ta anut kaprek pen ale cho’en’e, bonta jongsi nang Khristo pen chemesen pen dorap thekthe, jongsi chemesen pen nang Alangli pen chingki-chethan thekthe, tangte nangdung kedo abang aphan kepajokji aphan nangmethang along kedo ason chepadam’et sitame mate nangpo, nangpei, lapen hem along abangphu doan aphan kelang-kalana pangching sitame, Ne pudetji nang ke non anta henodak abang jilang, lapen anpar ta inut kachongthui akher thekser abang. Bang pen chemesen mate eson-sonni akeme asai klemlo pu alingle nang Khristo pen dorappet thekji pu chematha nangne. Nang nang aphan kerap kangtung a’ottong nangphan Siningrengme ahirjume nangselam pipo pu nang chematha ma? Asapbak akeme asai keklemtong nang kekroi adularlo putong matha ma nang? Inutbak ta nangtum angbong pen ke asai nangpaklem si nangpangthirji pu kachechakji abang ave, lapen nangtum kadokave ta Khristo along monit keme a’ot kedengji ning hanghe, laso alam chibikok si kaike ta Arnam aphan kekroi pu amuri chibutkong. La nangtum ason akekroi ke chelonchit alar kachehui vanpo. Ningkamatha pen ketheklongthap lapen Khristo aphan kelangji pu kemang ingtonnoi, athe nangtum ke atheng penta bi’ong, lapuan pinlo Alangliphan ketheklongji apun anta avelang. Mo nanglong kedo kekhamkhe a’ot pen nang jokpeme lote, lapen Khristo pen chemesenlo, halaso apor ahut Arnam amethang amat si nangthengno cheklangpo. Jongsi nang chepangthirthepin lapen kangsai chechakchepin penle Arnam aphan kelangji aphan dam, pulote nang Arnam pen kachedan abang chemanvekpo lapen kivirji theklorlo. Monit a’ot aphrang pen amat si Arnam aphan kedeng ingtungte, athe ke monit kedoan ta Sobar a’ot langno pensi paklem bor’i. Jongsi amethang a’ot langno angbong pen monit amethang aphan Arnam pen chepapho ingtung, laso along pen ke thangnat ta vangve puke theklorlo; alang lamthe lapen asai si alang ot langno aphan ajat angdeng along ta paklangdakpo, lapen Arnam pen kachepho ahut alang kekhamkhe a’ot ajat ahin pen ta klangvekpo. Chininepin pen, monit atum Khristo aphan khamkhe aphan vangpo, Khristo aphan kachongthuiji aphan, lapen Khristo aphan kitiji aphan; laso cheplang lote, monit ke ansose kithirthe angdeng along si dopo lapen, laso angthun dambom pulote, alang adai kepho nangji ahormu mandetpo.

Ajahak atum kroi tahai, jongsi Arnam pen kachepho la an kaphere meme, pulote Arnam aphan asap achar kibi si kemepo pu. Lapuson amonit atum kopisi kelong jilang? Latum Arnam aphan ning klarsap pen kroi thekji ma? Chethandaklo, Arnam pen kachepho ke sungpik – bonta lake monit atum a’ot kaheno apot, Arnam le alang pen kachepadon thekthe apot kali. Methang aphan ahokpet pen kachichini aphan ansose jakong kachipi si nangtum aphan kemeji. Kopisi nangtum Arnam pen nangkelangpon chepalongledet? Kopisi nangtum akun ke Alangli pen kachetonte aret? Kopisi nangtum alam kaningje Alangliphan aning pathiver? Nangtum asapbak le kekroi kachepaklang anta, nangtum mena aphan kachero alun chilunkongpo, lapen nangtum kacheto apharman anam chohangpo; asapsobak lam karju kachepaklang anta kaprek atum aphan langroppo, lapen achitso asai kepachun anta Arnam aphan man-peng pipelo. Arnam aphan kedengji apharman, nangtum tangka, nong’e, lapen kero chohangpo. Hiki isi-hini kipiji aphan ta nangtum nangning soset; hiki kep pilo te nang hirjume aphan mangpo lapen man-peng kethe nangpapiji si ar’ipo. Nangtum ason monit a’ot ahokpet pen ta karju pen bang aphan aning padonodet. Nang lamthe lapen sai along kopine ro meme ason doma? Arpu kacheklem lapen kacheklemkle atum; kejapon lapen aphi kidun atum; Arnam aphan kedeng lapen kedengde atum; dan kipi lapen kipipe atum; prosarok lapen alam kedengdun atum; lapen dopiklang: lapuson amonit atum methang aphan si kachero. Nangtum aphan lahei ingnekmeme kalima? Nangtum Arnam aphan kekroi do pu chini pame sitame, nangtum Arnam pen dorappet thekthe. Nang kachini ajakong lapuan kadurelo nonke nangmethang aphan kachekhang anta un’edetlo pu nangtum chemathathe ma? Lapuson kachini ajakong pen ke kosonsi nang Arnam aphan kachini apun kemanpo? Lapuson apor ahut methang apharman chepherere ma nangtum? Nangtum akun lapuan si kaheno tanglo nangtum Arnam pen dorappet thekthelo. Lason tangdet apot si, nangtum akekroi ingnekmeme kalima? Nangtum akekroi ke therakrap meme kalima? Kosonsi nang nangphrang kevangji akai kapatebokdunpo? Kosonsi nang kedamji atovar kachongvai thekpo?