Baibel Alam Aphuthak (3)
Baibel along kabirtipon kadokave alam amat le Arnam pen jongjung kaningje’et kali. Baibel ke kedamtang Arnam asai ingdeng hini alam kapangrumdun anchot, laso along pen ephar abang ke kapachethang atum kethanmek alam, lapen ephar abang ke Arnam pen akai-akai arjon asai ke’enpon pame amonit atum kachetongnang lapen agian kachetok. Monit atum kachetongnang ason ke monit kamathamek lapen agian pen si kachingvuitang, lapen lake isi kekhang un’e ason. Keongdung Baibel angkung along ke monit kamatha, monit ihin anat ardi kipivong, lapen monit atum keklardakde kachinidam saide. Ahoklo tema, keongdung alamthe ke Karjong Kangthir kapaklar lapen kapatheang angthek saidelo, lapen lahei ke akechok kachinidamlo – bonsitame lahei ke angton pen amat si ahokpet aphan kachepaklang kechoklo puke pudam un’edet. Alangtum kopine esonbak aphuthak kamathadam ke methang jongjung kachetonglong ason pen kelong agian pen anpar thangnat kali, mate Karjong Kangthir kapatheang pen. Kapachethang atum kethanmek alam ke Arnam si kapinkhat: Isaiah, Daniel, Ezra, Jeremiah, lapen Ezekial atum kethanmek alam heihui ke Karjong Kangthir kapinkhat pen si vangphitlo; lahei amonit atum ke thek-kere, alangtum kethanmek ajakong kedo Akarjong longloklo, lapen alangtum kadokave ta Kachejok Abarim Alo ahut kapachethang abang saide. Aron Akai ahut, lahei amonit atum, Jehovah pen ningkirung kelongtang atum, ongdung kethanmek alam ningje, lahei Jehovah pen si kapinkhat ason saide. Lapen kopipot si Jehovah alangtum along sai keklemlo? Atheke Israel arat aphan ke Arnam kangvaitang pinak, lapen alangtum angbong si kapachethang asai klem nangkokji; laso ajoine pen si kapachethang atum lapuson kapatujoi alam klangdak pen kedengdun longlo. Ahokpet pen ke, alangtum methang amat ke alangtum aphan Arnam kapaklang ason chinidunde. Karjong Kangthir si alangtum angho akerap pen ningje mo aphrang kevangji akai ahut monit atum lahei ahormu aphan kachini thekji aphan pusi, lapen halahei ke abinong’et pen ta Arnam Akarjong asailo, Karjong Kangthir asailo pu patheklong nang pu, lapen monit along pen le kevang kali, lapen alangtum aphan Karjong Kangthir asai aphuthak klardak pen kapatini. Kanghon-Kangjinso Akai ahut, Jisu Amethang amat si alangtum alar sai keklemlo, lapen lasi monit atum anpar ke kethanmek alam ningjejedetlo. Lasi Jisu ke kapachethang abang loma? Jisu ke, chenam ta, kapachethang abanglo, bonta Alangli ke arisangho atum asai ta klemthek – Alangli alam kevangji alam aphuthak ningjethek lapen longri adang the-bi tame alam ningjedamthek lapen thanthek. Sitame Alangli keklem asai lapen Alangli kacheparjan angthek abang ke isvet kalidet. Alangli kadokave monit akhei aphan kapajokji aphan si kevang, monit aphan alang pap pen kapajokji aphan; Alangli ke kethanmek abanglo, lapen kacharlidun abang, bonta lahei pen athak ke Alangli Khristolo. Kethanmek akuru ke aphrang kevangji alam aphuthak ningjeji, bonta lapuson kethanmek abang ke Khristolo pu pudam un’e. Halaso apor ahut, aphrang kevangji akai alam Jisu kaningje dopik, lapen lasi pumelo Jisu ke inut kethanmek abanglo, bonta Alangli ke kethanmek abanglo lapen Khristo kalilo puke ladak pu un’e. Laso atheke Alangli ke sai angdeng doan along ta Arnam Amethang aphan si kacheparjan, lapen Alangli angthek tame Isaiah along kachepado angthek pen ke cheprekdak: Alangli amutpi pen ke kapajokji aphan si kevang, lapen Alangli monit akai along kenangji ason tame paplengdun, lapen Arnam Akarjong nahok kechak avepin pen Alanglilong vangphitlo. Alangli keklem asai along, Arnam Akarjong pen ning kacharlidun mate Jehovah pen kapinkhat pu ave. Alar ke, Akarjong kechaklok avepin pen si sai klemphitlo – lake lapuan tame Jisu henlo laso kapachethang abang pu kapaklangji aphan dorpluplo. Alangli keklem tekang asai ke kapajok asai, laso pen adunthu kevang ke aphrang kevangji alam kethanmek. Alangli ke kethanmek akuru, inut kacharlidun abang, bonta halaso pen athak ke Alangli ke kapajok abang. Aphrang kevangji akai alam kethan atum ke, lason ahut, aphrang alam kethanmek ansi thekchot, lapen kaprek asai keklem pen Arnam Akarjong aphan cheparjanpiji ajakong duredet. Atheke monit atum aphrang mantune ta keklemklelang asai Jisu keklem dopik an ajoine si, Alangli ke Isaiah atum asonson pen ke cheprekdundaklo. Ajahak amonit atum pini alangroiso aphan kedengde puke lake alangtum aphan isi akasiksak padokok apot. Alangtum kipu: “Kachejok Abarim Alo along ongdung kapachethang abangphu atum ongdung alamthe ningjelo – tangte kopi si alangtum ke Arnam kacheman aok-avi kalidet? Pini arni a’Arnam lamthe ningje – lapuanvet pen ta Alangli ke Arnam Monit Cheparje abanglo pu kapatini aphan chokloma? Nang Baibel aphan ta ro-archoche, mate nang porhihe – tangte nang kopi ahin kelangdam Alangli ke Arnam si monit nangcheparje abanglo pu kipudamlo? Nang kipu alangtum ke Karjong Kangthir pen si kapinkhatlo pu, lapen laso angdeng asai ke Arnam jongjung pen amat si asai kedeng pusi nang kekroi – bonta nang laso aphan kopi si atiri ke’enlo? Nang ke pini arni Arnam alamthe aphan si kamatha ardi kachipidun, lapen nang ke Baibel aphan dengdetlo ason, lapen laphan ihin koiroklo.” Lapen lasi bang kipu nang ke kapachethangthap lapen bang kekroikre alam si kekroi pulo.
Jongsi nang kijut arni malom Arnam asai ahakhi chepadodun ingtung, pulote nang Baibel arlo kedo atomo, Baibel keman atiri lapen keman’i ason kopipi do chini nangji. Pini arni, monit atum Baibel henlo Arnam, lapen Arnam henlo Baibel pusi kekroi. Lasi, lapenpen si, alangtum ke kekroithu ke Baibel along kedo alamthe kedo anta Arnam alamthe anvetlo, lapen lahei ke Arnam si kaningje saidelo. Arnam aphan kekroi atum ke lapuan ta mathalo, hala Kachejok Abarim Alo lapen Kachejok Akimi Alo along pak throk-kep-ra throk alo monit ahin pen si ketok saidelo pusitame, halahei doan ta Arnam aningkirung pen si kipi saide, lapen doan ta Karjong Kangthir kaningje alam kabirti saidelo. Lahenlo monit atum kachini kechokdamde adim ke, lapen lake abinong’et ason pen amutpi amat si cheton damde. Abinong’et ke, aphrang kevangji alam kethanmek alo pen anparta, Abarim aron Alo along kedo ongdung ason ke phurkimo alamthe kabirti saide. Akimi aron Alo along ajahak alamthe ketok ason ke monit kachetonglong ason pen si kevang, lapen ajahak ke Karjong Kangthir kapatheang ason pen; hala Paul alamthe ketok, langdam sinang, inut amonit asai pen nangkethur si, alangtum kadokave ta Karjong Kangthir kapatheang angthek saidelo, lapen halahei doan ta mondoli along si ketok, lapen halahei ke mondoli along kedo korte lapen ingjir atum apharman kachoningri padikrim lapen ningkapathe alamthe saide. Halahei doan ta Karjong Kangthir pen si kaningje saide – Paul ke Karjong Kangthir apharman ningjepi un’e, lapen alang ke inut kapachethang abang puta kali, ansose si kavelang alang ke John ason aphrang kevangji alam kethekdam puke. Alang lamthe doan ta Ephesus, Philadelphia, Galatia, lapen kaprek amondoli atum aphan si ketokpi. Lapen lahenlo si, Akimi aron Alo along Paul alamthe doan ke mondoli atum aphan Paul ketokpi alamthe saide, lapen Karjong Kangthir pen ningkirung alamthe kali, mate halahei ke Karjong Kangthir le kaningjephit alamthe pu tame kali. Halahei ke alang sai klembom apor ahut mondoli atum apharman ketokpi thangbakbe choningri padikrim, ning kapadome, lapen ning kapathe alamthe anchot. Lasi, lapenpen si, halahei ke halaso apor ahut Paul keklem asai aphuthak kabirtilo. Halahei ke Hemphu along kedo akorte lapen ingjir atum aphan an si ketokpi, atheke mo mondoli along kedo akorte lapen ingjir atum halaso apor ahut alang kapinkhat alam ateng klemji mene lapen Hemphu Jisu kapinchong kachikubir ahokpet aron ateng pen kroiji mene pu aphan. Ajat abidi pen tame Paul ke, halaso apor amondoli punon mate aphrang kevangji apor amondoli punon, alang ketok ahormu heihui si cho lapen jun nangji puke pupe, mate alang lamthe doan ke Arnam pen si kevanglo pu tame pupe. Halaso apor ahut mondoli atum kachetongnang akeme-kaheno ateng si, alang korte lapen ingjir atum pen kachingki, lapen alangtum aphan choningri kapadikrim, lapen alangtum along kekroi ahin ningparunglo, lapen alang thangbakbe monit atum aphan aning kachevangthu lapen choningri padikrim anchot. Alang lamthe ke amethang arpu ateng si atiri ke’en lapen alang monit atum aphan lahei alamthe pen si archak kipidun. Halaso apor ahut alang mondoli aphan kekroipik abangphu asai si denglo, alang ke Hemphu Jisu ahin pen asai ke’enpon asai choklem abang, lapen lasi alang mondoli arpu deng nangpo, lapen mondoli along kedo asai klem nangpo, alang mondoli along kedo korte lapen ingjir atum kopi kisung-keboi kephobom loma aphuthak ingchapdam nangpo – lapen laso ajoine si, alang Hemphu along kedo akorte lapen ingjir doan apharman ningperung lamthe ketokpilo. Alang kaningje ke monit aphan kechoklim gian kapabat lapen mesen anchot, lapen lake Arnam aphan cheparjan thekthe. Lake isi kaheno kilitparpik kachinidamlo, lapen isi kethedung kachongthui a’otlo, atheke monit atum monit kachetonglong alam lapen monit ketok alamthe aphan si mondoli aphan Karjong Kangthir kethan alam pu kehok puke! Lake jatsemet Paul le mondoli apharman ketokpi alamthe langdam lote ahokpetlo, atheke alang lamthe amokha ke korte lapen ingjir atum aphan halaso apor ahut mondoli along kachetongnang keme-kaheno aphuthak si atiri ke’endam, lapen korte lapen ingjir atum aphan Hemphu along kedo aning keparung aphan, atheke alangtum Hemphu Jisu akanghon-kangjinso palongnang pu aphan. Alang lamthe amokha ke halaso apor akorte lapen ingjir atum aphan kangthurji pu aphan. Lake pudet tame lake alang mena arpulo, lapen lake alangphan Karjong Kangthir pen kepek arpulo; athe kadokave aphi, alang ke halaso apor ahut amondoli aphan keja abang inut kekroi abangphu, lale mondoli apharman ning kirung alamthe ketokpi lapen alangtum aphan kachoningri padikrim – hala henlo alang arpulo. Alang angthek ke inut kekroi abang ateng anvet, lapen alang ke Arnam pen nangketoi inut kekroi abang mate kacharlidun abang anchot; alang ke kapachethang abang kalidet, mate aphrang kevangji alam kethanmek abang ta kalidet. Alangphaan ke, alang mena asai lapen korte lapen ingjir atum akai henlo doan ason pen akenangsotnei. Lahenlo si, alang ke Karjong Kangthir apharman ningjepi thekthe. Alang lamthe ke Karjong Kangthir alamthe kali, ansose si kalichotlang halahei aphan Arnam alamthe pu kipu unji ke, athe Paul ke Arnam kasorjon pen keman abang anchot, lapen Arnam monit nangcheparjethu puke kali chenamlo. Alang angthek ke Jisu pen isvet kali. Jisu alamthe ke Karjong Kangthir alamthelo, halahei ke Arnam alamthelo, athe Alangli angthek ke Khristo angthek amatlo – Arnam Asopo. Koson si Paul ke Alangli pen kachingbar abang keman unpo? Jongsi monit atum Paul ketok alamthe mate kaningje alamthe ason aphan le Karjong Kangthir alamthe pu hokdet, lapen alangtum aphan Arnam pusi kardom, tangte lake pudet melo alangtum akele kelangremlo puke. Alam kangtang penle ningjedam lote, lahei ke tangte thangbakbe kachonthuichot kalima? Lapen kosonsi monit atum alang kabirti ningpathe alamthe lapen kaningje alamthe aphan lahei si lo kangthir, mate siningrengme kedo alo pu tin amat kangkuppo? Arnam alamthe ke thangnat aron-atang avepin pen lapu amat monit atum ningje thekjima? Kosonsi monit atum le Arnam apharman kaningjepi unpo? Lapen lasi, nang kopilo puji – alang mondoli aphan ketokpi ning kirung alamthe ke amethang jongjung aning alam pen keterdet un’edetjima? Kosonsi halahei monit aning kamatha abidi pen keterdet un’edetpo? Alang mondoli aphan ning kirung alam ketokpi puke amethang jongjung kachetongtang lapen amethang jongjung agian pen. Asat aphan langtha, Galatian amondoli aphan Paul lamthe toklo laso along ke eson kejongvet kamathadam do, lapen Peter abang akaprek tokthulo, halaso along kaprek kethekdam dothulo. Latum angbong pen kolo abang si Karjong Kangthir pen kevanglo? Majok ta jongthip pen than thekthe. Lahenlo si, kipu unji ke la hini ta girja aphan ketang arpu anchot, sitame alangtum ketok alamthe isi arpum kacheparjan do, alangtum korte lapen ingjir atum aphan kenangji ason kipi lapen karchak aphan cheparjan, lapen mondoli ahin alangtum arpu antalo, lapen alangtum kacheparjan ke monit asai anchot – alangtum ke ingthimlim pen ke Karjong Kangthir pen kali. Jongsi nangle alang lamthe ke Karjong Kangthir alamthelo pusi puji pulote, nang ta kamatha klardak abang kalilo, lapen nang ke kachongthui along keklodunbom abanglo! Paul along ketok alamthe lapen kaprek ketok alamthe Kachejok Akimi Alo along kaparlopon ke ansose kimi muchot nongjong karjong aphuthak ardi kipi abangphu atum kachetonglong alam kabirti pen kachetok: Halahei ke Watchman Nee alo pen si chingbarchit mate Lawrence kachetonglong alamthe, lapen sonsi kaprek do’olang. Lake thangbakbe nonhetjong karjong aphan ardi kipi abangphu atum alo ke Kachejok Akimi Alo along pangrum ponpelang pu aphan anchot, bonsitame lahei amonit atum atiri ke isivetlo: Lahei amonit atum henlo Karjong Kangthir ahin penpen ephong apor ahut asai ke’enpon atumlo, lapen alangtum ke Arnam aphan cheparjanphit thekthe.
Kachejok Akimi Alo along kedo Matthew Kapachethang Alam ke Jisu ahemtun aphan si kabirti. Kecheng ahut, la kipu ke Jisu ke Abraham lapen David asu, lapen Joseph asopo amatlo; adunthu ladak puthulo Jisu ke Karjong Kangthir pen si nangkeplang, lapen kangthir’et abangphi along pensi mahang nangkethek – laso ateng pulote Alangli ke Joseph asopo kalilo mate Abraham lapen David asu kalilo. Labangso hemtun keplang-kephi alammo, ajat le punon, Jisu aphan Joseph pen pachephoji tokling. Adunthu ke, laso hemtun keplang alammo kopuson pen si Jisu amahang nangkethekma pu alam birtiponlo. Ladak kipu ke Jisu ke Karjong Kangthir pen ajok si nangkeplang, Alangli kangthir’et abangphi along si mahang nangkethek, lapen Joseph asopo puke kali. Sitame halaso hemtun keplang alammo along ke klardaklo Jisu ke Joseph asopolo, ladak phlipkep-hini akai alam kabirti do. La Joseph akai an keledam ahut, ladak prapjin pen kipudam do Joseph ke Mary apenanlo pu, lahei alamthe kipi ke Jisu ke Abraham pen si nangkeplang asulo pu angthek kipiji aphanlo. Lake chetonte aret ason kalidetdema? Halaso hemtun keplang alammo along ke Joseph aphu-aphi alam klardak pen kabirtipon do, lake Joseph ahemtun alammo chenamveklo, bonta Matthew ke lake Jisu ahemtun alammo pusi kipu ardi kipilok. Ladak tangte Jisu ke Karjong Kangthir pen si keplang pu alam aphan kekroikre aret kalima? Lahenlo si, la Matthew kaselam hemtun alammo ke monit abidi pen le keplang kalima? Lake ingnekchoiri meme! Lason henlo nang laso alo ke amutpi amat le Karjong Kangthir pen kevang kali pu kachini thekji. Lapuson ta do, ajat le pu sita, ajahak amonit atum kamatha Arnam ke pirthe along si ahemtun keplang alammo do nangji, laso kamatha angthek ateng si alangtum Jisu aphan Abraham aphlikep-hini akai asolo pusi kehoklo. Lake abinong’et pen ingnekchoi meme chenam! Pirthe along nanglerok aphi le, kosonsi Arnam le ahemtun keplang alammo kedopo? Jongsi nangle Arnam ta ahemtun keplang alammo do pusi puji pulote, nang Alangliphan tame Arnam kasorjon ason angbong le kapachingbardun kalima? Atheke Arnam ke pirthe along kedo abang kali, Alangli ke kasorjon abang Hemphu, lapen Alangli le ok-vi pen si kedo sitame, Alangli monit ateng atiri pen kali. Kosonsi nang Arnam aphan le Arnam kasorjon pen keman ason atum pen kapangbardam unpo? Abraham ke Arnam aphan cheparjan un’e; alang ke halaso apor ahut Jehovah asai keklem kerap ke’enpon abanglo, alang ke Jehovah pen kedeng sai keklem abang anchot, lapen alang ke Israel arat angbong pen inutlo. Kosonsi alang Jisu ahemtun along atirim keman unpo?
Komat si Jisu ahemtun keplang alammo ketoklo? Jisu Amethang si ketokdet puhe? Jisu jongjung si alangtum aphan, “Ne hemtun keplang alammo” toktha pu kipuloma? Lake Jisu aphan thengparpan along sakdet aphi Matthew si kabirtichot. Halaso apor ahut, Jisu ahin pen Alanglilong kachelangdun atum kachini un’e asai keklem dopik, lapen lahei aphuthak thangnat than pajirmi pipe. Alangli damjui aphi, arisangho atum prekjam adim kapachethang lapen keklem nangchenglo, lapen halabango angdeng asai ajoine, alangtum ningperung alamthe lapen kapachethang alo ketok chenglo. Kachejok Akimi Alo along kedo kapachethang alo ke Jisu aphan thengparpan along apran endet pen ningkan ingkoi lapen thomkep aphi ansi kabirtithu. Laso aphrang, Israel adet amonit atum Kachejok Abarim Alo ansi kaporhichot. Ladak kipuji puke, Kanghon-Kangjinso Akai kecheng ahut monit atum Kachejok Abarim Alo si kaporhi. Kachejok Akimi Alo ke Kanghon-Kangjinso Akai ahut ansi nangkeklang. Jisu sai klembom ahut ke Kachejok Akimi Alo avelang; Alangli kithi pen burthudet lapen siningrengme arludet aphi si monit atum Alangli sai kabirtithu. La ansi halaso ahut Birta keme Phli anke dolo, laso abat puke Paul lapen Peter ketok ningperung alamthe, lapenpen Kapaklang Alo. Jisu siningrengme arludet pen ningkan pharo kethom anbak aphi, aphi kevang akai atum lahei kabirti alam ingvai si pangrumlo, lapen laso aphi ansi Baibel along Kachejok Akimi Alo kevanglo. Laso asai tangdet aphi ansi Kachejok Akimi Alo nangkedolo; laso aphrang ke la avedetlang. Arnam si lahei kadokave keklemlo, lapen Paul lapen kaprek kekroidun atum ke prekjam adim kedo amondoli atum apharman ningperung alamthe ketok dopik khangjanglo. Latum aphi amonit atum alangtum ketok ningperung alamthe pangrumdetlo, lapen Patmos atalom along John ketheklong kethenei amang aphan kabirtidun tame pabatdunthulo, halaso along lale kijutsi arni malom asai aphan Arnam than tekangmeklo. Monit atum laso angthun selamdunlo, lale pini arni kaningje alamthe pen cheprekdak. Pini arni kabirti alamthe lake Arnam asai angdeng ateng pen; pini arni monit atum kopisi keklembom lake Arnam jongjung keklem keklemtang asai, lapen Alangli jongjung kaningjetang alamthe. Nang – monit akhei – kachejokdunji akenang ave; lahei alamthe, lale Karjong pensi kechak avepin pen vangphit, lahei ke angdeng-angdeng si kisiklo, lapen lake monit kaselam akisik-kedang pen cheprekdak. Alangtum kopisi kabirtidun, lake pudet’un, halahei ke alangtum kacharlidunlong angdeng lapen monit kamatha’un ajakong ateng. Alangtum kabirtidun ke monit atum kachetonglong alam, lapen anuttin amat si kabirti lapen kachiniji aphan methang abidi dorep, lapen anuttin kabirti si prekdak. Lahenlo si, jongsi nang Baibel aphan Arnam ason si ardom pulote nang ke akele kachininepik lapen kilupik abanglo! Kopi si nang pini arni a’Arnam asai kiri nangkoklo? Arnam keklem asai anchotlo monit aphan nangkerai unji ke. Baibel ke monit aphan nangrai thekthe, monit atum laphan suri-suri aphong porhidet tahai mene lapen aphi ta masapbak alangtum along kachelar avedet tahai, lapen jongsi nang Baibel aphan ardom pulote nang ke mantune ta Karjong Kangthir asai chepalong thekthelo. Israel along Arnam asai ingdeng hini ta Baibel along si tok pen kabirtipon do, lapen laso kabirti angbong kedo Israel along kedoan amen, lapen Israel along keman ason doan; “Jisu” amen anta Israel asor amen. Jongsi pini ta nang Baibel porhibom pulote, nang ke mei along kachingvai ateng le kekroi kalima? Baibel Kachejok Akimi Alo along ketok birtipon ke Judea along aphuthak alam. Abinong’et ketok ke Greek lapen Hebrew pen ta do, lapen Alangliphan kehang-kachini’i amen lapen halaso apor ahut Jisu alamthe doan ta monit atum alam along pen si kevang. Alangliphan thengparpan along kesak ahut, Jisu pulo: “Eli, Eli, lama sabachthani?” atheke “Ne Arnam, ne Arnam, kopi athe si nang nephan obuploma?” Lake Hebrew kalima? Lake thangbakbe Jisu ke Judea along si amen kevang ajoinelo, bonta lake Jisu ke Jewish pule ahakhi kipi kali. Pini arni, China along Arnam ke ok-vi nangcheman’etlo, lapen lasi Alangli kaningje ason doan ta honthe athai avepin pen Chinese atumlo. Bonsitame lake Baibel along pen lamlar keklem a Chinese alam pen pangbardam un’e, atheke lahei alamthe nangkeplang adim cheprekjam: Isi ke monit atum kabirtidun Hebrew pen si kevang, lapen isi abang ke nahok chakloklepin Karjong kaningjephit pen si kevang. Koson si ladak thangnat kacheprek kavedet unpo?
