Dhorom Asai Along Kedamtang Kaheno Ason An Che’o Nangji

Pirthe sining along Alangli sai keklemcheng ahut pen ta, Alangli sai keklempiji aphan ke ongdung lapen prekjam amonit atum aphan Arnam ingvailo. Alangli ning kehang kachepaplengji lapen pirthe athak sai keklem kapechun pemeji aphan si Alangli ar’ilo; Alangli ning kehang lake Alangli sai keklempiji aphan monit kangvai helo. Anuttin amonit ta Arnam asai klempiji pulote Alangli ning kehang ason chinivek nangji. Lahai asai pen ajok Arnam ajakong kethe lapen akethek kere monit amek angden cheklangdaklo. Arnam pirthe kevang ke Alangli sai kacheklemji, monit atum pen kachelangji aphan lapen monit atum Alangli keklem asai ketheklong pemeji aphan. Pini nangtum, laso asanchom amonit atum, sai keklemvoi lapen kapedorphlup’un a’Arnam aphan kekroi ke nangtum abaha keme binonglo. Lake nangtum aphuthak kalakha un’epin ahirjume lo; ahokpet alam, Arnam si nangtum aphan nang pethe-pedinglo. Alangli sai kapeklemji aphan monit kangvai ta Alangli mena aron pen si ingvailo. Arnam asai keklem lake, monit atum kamatha ason, monit aning kehang pen anchot lapu kali. Pini, nangtum theklonglo, monit atum Arnam asai keklem lake Arnam lapen Karjong Kangthir kachejadun, lapen ahokpet ason kiri atum. Arnam asai keklem atum aphan laheihui henlo masapso kithikpon.

Arnam asai keklem lake kejoike asai kali. Kahenodak a’ot-adur kachelar thekthe atum ke Arnam asai komentune ta klem un’e. Nangtum kereng akun jongsi Arnam alam penta nang lar un’e pulote, nangtum hi’i aning angthin si thaplo, nangtum ning kehangchot pensi Arnam asai klemlo, lapen nang sai keklem ke Hi-i aning angthin ason si klemlo. Nangtum mena akereng achethe ateng pen, lapen nangtum aning kehang ateng pen si Arnam asai klemlo. Laso aphuthak, nang keklem kangtung asai anta Arnam aning doklo pusi nang mathalo, lapen nang keklem kangtungte asai anke Arnam aning kedokde asai lo pusi nang mathabom; lapen nang ning kehang aling si klembomlo. Lason pulote Arnam asai keklem pu pu unji ma? Pima nang kereng achethe thangnat ta akacheprek avedetlo, bonta nang sai keklem pen ansose nang ning nangpangtanglo, lapen nang ahok’he akereng ansose thirthu muchotpo, lapen nang Arnam asai keklem ta nang mena aning ingthin ateng si klempo. Lake monit atum keklem pen kelong asonlo. Monit atum kereng achethe ke lason henlo. Lason amonit atum ke Pharisee lapen dhorom akeja atum pen isivetlo. Alanglitum amek prang si aning chiruire te, ahok’he aKhristo ason cheplang si mo kijut arni cheparjanji, lapen monit atum aphan kachongthui atum plangji. Ahok’he aKhristo lapen monit atum aphan kachobei atum ke lason amonit atum along pensi klangji. Arnam asai keklem atum jongsi amena aning ingthin keja aling lapen aning kehang aling klemlo pulote, alangtum aphan ke turchorji komentune thangnat puthekthe. Monit atum akero kar’i ajoine alang Arnam keklem ajak kiding along pen kachini, kepho kachetong ason an Arnam asai klem’ibom, alam ningjebom lapen lahai alam pen si rat aphan aning perungbom, cheparoka-aning cheruire, keklem kechokche apot dia chohanghe, man kar’i-latum ke Arnam amek angden pen klobupji. Latum ke Paul ason, akethe angdeng along kedo pu kachekrong lapen kethek kachepeklang atumlo. Lason atum aphan ke Arnam komentune ta pechoklimledetji. Lason asai keklem lake Arnam asai keklem abe kethur ason mandet. Monit atum ke aban aphan si aning do’eji. Kedamtang ason lapen kedamtang apor aphan si aning do’eji. Lake sai keklem along kethedung arambeng-ramphanlo. Nangtum jongsi lahai ason chevarchor un’e te, nanglikai isi nangliphan nang pethihoi ason si mandetji. Nang Arnam asai keklem nang keng chinglokpet an kat sita, nang duk dopik sita, lapen Arnam amen pen nang pran damjui sita Arnam nangliphan nangdengde detji. Bonta alar ke, nang ke kaheno asai keklem abang pusi nangliphan nangpu detji.

Pini pen pangcheng si, Arnam ke dhorom kamathathap kavepin atum aphansi pachoklimpo, komatma alangtum amena aban aphan kache’o aning kehang, lapen komatma ning-kebihek pen Arnam aphan kekroi. Alangli komatma Arnam alammthe aphan kachor’i atum aphansi pachoklimvekpo. Lahai amonit atumke arjapthersi Arnam aphan klempi nangji. Arnam along jut un’epin lapen pleng un’epin akethek’kere do. Arnam akamanghu meme asai lapen alam along ale ke’endunji aphan ansose ke’ongdung amonit aphai atum chonghongdinglang. Laso ateng pulote, kekroi keplakver atum, akethe kachetin atum, lapen amena akun kachevar thekthe atum ke lahai akimi keplang ason deng un’e detji. Lason amonit atum aphan ke Karjong Kangthir ta pachoklim un’e. Inut amonit jongsi kekroiji aphan chisikse te, lapen Arnam alam aphan ing’it’e te, akimi ason latum komentune ta deng un’e detji; latum ansose lam arjuje bomji, resakjakji lapen kechokche anat si suichokpo. Arnam asai keklembom ahut, Alangliphan ahokpet pen kanghon lapen akimi atur kedeng’un atum aphan si Arnam rung pangtuiji, bonta akethe pu kachekrong dhorom akeja atum aphan Alangli pejutkokji; kachelardun thekthe amonit atum inutnat aphan ta Alangli ar’i’e. Nangtum ta lahai amonit atum ason man ingtungdukma? Nangtum aning kehang aling si sai klemloma, mate Arnam aning kehang aling si klemlo? Lahai alam nangtum mena chechinivek nangji. Nang mondoli keja abang ma, mate Arnam kapinchongmi kechoklim a’oso thi’i ma? Nang keklem asai an angbong pen koan si Karjong Kangthir nang chedon dunlo ma? Son koanbak si Arnam kimo meme asai nang keklemlo? Nang keklem ajak kiding pen nang kereng achethe kachikirla chetheklongloma? Lahai kadokave aphuthak nang klardak loma? Nang jongsi kekroi peme abang pulote, nang aban dhorom aron akekroi heihui chibikok si, memuchot akimi atovar pen Arnam asai klemji. Non ta keklemji aphan derdelang. Kekroi aron barim monit akai arjon aphan pevirdet thek. Lapen ajok Arnam pen chehelo si amena aning kehang aling klemji. Nang jongsi lahai che’o’e pulote nang kerengji achethe kimi along rambeng-ramphan ason si cheplangdetji. Alangli sai keklem mesen atum aphan ansi Arnam ke pemesenji lapen ardi pichotji. Nang jongsi Arnam akangsai lapen akangchek deng peme lote, jongsi nang keklem aban adhorom lapen aron-atang aphan achar chibi thek, lapen nang kekroi aron barim pen non kachethanbom Arnam alam pangbarbe lote, nangphuthak ning kethe dolang. Bonta jongsi nang aban ason an che’o’e ra, jongsi birti palorlobom pulote, nanglike kejokji atovar si avelo. Lason amonit atum aphan Arnam kimomedetji. Nang jongsi kemesen amonit kemanji ar’i pulote, aban ason an che’othek nangji. Kedamtang keklem asai le choklo pusita, jongsi lake Arnam asai lo pusitame, nang lahai aphan ke che’o thekvek nangji lapen kacheot’thip ington nangpo. Karjong Kangthir si nang kapaklemtoi asai pule nang matha sita che’othek nangji. Nang laso aphan ot’thip nangne. Arnam kar’i ke la helo. Ajat ason ta chepami nangpo. Arnam asai lapen alam along, kedamtang alam an Alangli mathabombelo, aban ketoktang alam apot Alangli phurthu kirlalelo; Arnam ke Arnam lo pima kaike ta akimiver lapen mentune ta ban be, lapen Alangli Mena alam kedamtang apot ke mathalemdetdelo-lapen Arnam ke aron ke’otkri abang kali pu klangdaklo. Lasi jongsi nang, kereng amonit ason, kaike ta kedamtang ason aphansi rip’ling bomlang pulote, jongsi nang kapedam jui ji aphan ninghanghe, lapen kengsetsi lahai aphan aformula ason si klemponlo, bonta Arnam ke kedamtang keklem ason pen akimi ason klem’i’e, tangte, nang lamthe lapen nang sai keklem chokchedetlo kalima? Nang Arnam ahotur cheplangdetlo kalima? Aban ason ajoine pen nang kai chephangnodakpo ma? Lahai aban ason si nangphan Arnam asai along kekhamkhe abangphu peman po—lapuson ajat amonit si nang keman kangtung ma? Nang jongsi lason nang ning hanghe pulote, prapjin pen nang kopi si keklembom ma che’onon lapen chetevar ra, akimi asai pangchengnon. Nang kedamtang keklem apot Arnam kimo melo.