Kechoklim Karjong Akai Aphuthak

Arnam aphan kekroi along kechoklim karjong akai akenangsot, lake Arnam alamthe kachinilongji lapen ahokpet along kilut longji aphan atirilo. Nangtum non keklembom kardom asai, Arnam adung kapatebokbom asai, karcho alun kilun, kero, kamunthi parsik, lapen Arnam alam aphuthak arsikjit kamatha asai doan isi “kechoklim karjong akai” chenam un ma? Nangtum angbong majok ta chiniji meme kali. Isi kechoklim karjong akai ke lapuson kardom asai, karcho alun kilun, mondoli asai keklemdun, lapen Arnam amen enpen kecho-kijun along anvet le ahoi kijutkok kali. Bonsitame, lake isi akimi lapen kerengsap karjong akai pen kerengdun si parlopon. Akenangsot alam abang ke nang kopisi keklem pu kali, bonta nang keklem pen kopi athe si kacheklem. Ongdung atum kitin ke isi kachoklim karjong akai kachepaman aphan ke ardomvek, karcho alun lunvek, Arnam amen enpen si chovek-junvek mate Alanglilam aphuthak arsikjit pen kamathadam dovek nangji, lahei asai pen kopine angthek mate ahokpet kachini anat japon-japonpe puke langdamde. Lahei amonit atum ke angthek aphan mathathe si alon kachipi asai aphan ansi apor chipi; lahei ke dhorom ajutang along kedo atum, mondoli along le kedo kali, lapen longri amonit pu kachipu longji a’ot ke ansose si kijumlo. Alangtum kardom, karcho, lapen Arnam amen pen kecho-kijun ke asai ke aron kekroi pu chot, keklem bor’i lapen apor ateng kachingbedun aphan, ningkehang lapen ning aklong pen kar’i kali. Lahei amonit atum jonghele lun mate ardom, latum kachepaduk ke angthek klangkle, athe latum kopisi keklem ma lake dhorom ajutang lapen aron anchot; alangtum ahokpet le Arnam alamthe asai keklem kali. Latum ke alangtum kopisi keklem loma along si chemathalok, lapen latum Arnam alamthe aphan aron pusi kapinchong. Lapuson amonit atum ke Arnam alam aphan ahokpet asai keklem along vanve, lapen latum ke a’ok aphan si kachepadomechot, lapen anut kaprek atum nangpalangdun lonang pusi klemchot. Dhorom aron lapen ajutang doan ta monit along pensi keplang saide; Arnam along pen le lahei kevang kali. Arnam ke ajat aron ta kroikre lapen Alangphaan ajat aron ta beng un’e. Alar ke, Alangli arnivang ta akimi ason klem, keklemvek nangji ason kapachun. Kethom-Methang Amondoli along amonit atum ason, amethang aphan arnivang ta adap mondoli asai along kedodun, arnikangsam ahut kardomdam lapen choche aphrang ning chingduk, lapen ajat ason along ta kachoro – kopuan le latum klem koan ajak aphan le klem sitame, latum Karjong Kangthir asai longle. Monit atum aron angbong le dodun lapen methang aphan keklem aron along cherakthip ahut, Karjong Kangthir ke sai klem thekthe, athe ke alangtum aning ke aron lapen monit atum akemang pensi plengthiplo. Lasi, Arnam ke chejokdun si alangtum along sai klemdun thekthedetlo, lapen alangtum lapuson aron arlo dundunbom anvetpo. Lapuson amonit atum ke bonsitame Arnam pen kero long un’e.

Kechoklim karjong akai lake Arnam athengno kedodun. Kardom ahut, inut abangphu Arnam athengno ining aphan padojoi un, lapen kardom pen, inut abangphu Karjong Kangthir akeklar chohanglong, Arnam alamthe chini un, lapen Arnam akemang chini un. Arnam amen enpen kecho-kijun pen, monit atum non amat Arnam asai aphuthak ansose klardak lapen plenglim kachini longji. Alangtum sai keklemji aphan akimi atovar ta longji, lapen akeban along nirhethelo; alangtum kopima keklemji lake akai along kethe-kechandun aphanpo. Kardom ahin ke, lake ethe-theni karjumesen alam kaningje mate Arnam athengno ningcheparun pen choropiklo pu kachepaklang asai anchot kali; alar, laso akemang ke methang aphan karjong asai ke’enji aphan kacheseke, ning aphan Arnam athengno kapadomjoi apor kipi, methang aphan ajat ason along ta Arnam akeja kirithekji aphan kacheseke, athe ke ning aphan arni kimi-adap kimi ahut atur kimi along kevanthek, lapen inut abangphu dojoije mate seletlepik lapen akengkam Arnam alam asai kevan ahin kachebidun un. Ongdung abangphu atum non malom ke kardom adichi ahin si kamatha parsik, bonta alangtum labangso asai keklem ke ahokpet kepalong lapen akai kachepachan aphan kali. Ladak henlo alangtum kechokche atovar kedamrong titi. Ajahak atur kimi kedengthek atum do, bonta alangtum kardom adichi chelarle. Alangtum pini arni Arnam alamthe kedeng dunji aphan ta alangtum aphrang pen akeban dhorom akemang si chevandet titi, lasi alangtum kelongji ke dhorom alir pen kachinglukung abidi si longpo; lapu amat le alangtum pini atur kedengji kali. Angthek asonben, alangtum keklem ason ke ingthirthedet; lahei ahom kimi pen kevang akeban keklem ason-amunglo. Alangtum jonghe le klem peme sitame, alangtum ke kacheparjan chotlo. Arnam ke monit aphan arnivang ta akimi asai kepaklemji aphan japonbom, akenang ke arnivang ta akimi ephrang kevangji aphuthak alamthe kamunthi lapen kachinithek, lapen halahei banthum lapen ruilemdet kalidet si akenang. Nang jongsi Arnam aphan aningkan ong’o pen kekroi do, bonta nang keklem adichi asap ta kachelar ave, lapen jongsi nang non anta angtan kacheklang ason aphuthak si ning chepalangno lapen sai chepadorut, non anta Arnam alamthe kachini pameji aphan nanglong Alangli athengno kedojoi aning avelang pulote, nang thangnat ta longdundelo. Arnam asai kimi kedengji ahut, nang jongsi keklemji aphan prekjek adichi selamle, nang keklem along akimi adichi ave, lapen ajat ahin ta akimi kachini ridamde, bonta alar ke akeban alongsi ripling lapen akimi atur durepik ansi longchot, nang sai keklem adichi chelarlepin pen, pulo tangte lapuson amonit atum ke laso aroi along amen aphan si dochotlo; ahokpet ke, latum ke Karjong Kangthir alangroi angtan kedo dhoromi aPharisee atumlo.

Isi kechoklim karjong akai kedodun aphan, inut abangphu akimi atur dengdunthek nangji lapen ahokpet Arnam alamthe ridun nangji. Anuttin ta ahokpet ason thekdak nangji, ajat ason along ta keklem atovar chiri nangji, arnivang ta Arnam alamthe porhi pen akimi karju ason palong nangji, lapen methang along kaduredet ason chekubir nangji athe ke kar’i kedo lapen kirirok inut abangphu kangthimlim aphan haidet un aning kelongji aphan, lapen kaike ta Arnam athengno kedojoi thekji aphan, harnukpik an aphi kachirui aphan kaphere. Lapuson kar’i kedo, kirirok aning kedo abangphu, kaike amat kilut longji avarsai kirirok abangphu, karjong akai atovar hokpet along si dolo. Karjong Kangthir pen aning kirung kedo atum doan, ansose akeme keman kangtung atum, Arnam arideng pen kechoklim kachepaman kangtung atum, Arnam alamthe ansose akarnuk pen kachini kangtung kedo, keprekdak mate manghumeme ahin dunde si ahokpet anam si kiri, Arnam akemang aphan ahokpet pen kamatha, chenam-chenum pen kilutdunlong ke alangtum kachetonglong ason an ansose ahokpet lapen ingthirvet, kangthaidang alamthe lapen aron kirire mate manghumeme ason kelongji aphan rire, kethedung abangphu aphan ardomde – lahei atum henlo kechoklim karjong akai kilut. Ajat asai le alangtum klem aling ta akai along kethe-kechandun longji aphan lapen kaike akimi lapen karjong pen rengsap, lapen latum ke kaiketa prangset pensi kilutdun ahovang long. Pudet lonang, anchoche aphrang kardom ke atoi pen ajok; bonta, lahei henlo Arnam angno aning kedojoi apor, Alangliphan kachoro un, Alangli pharman kereng kangtung lapen alangtum along apor dolang Alangli rideng kachipi aphan ningkehang, lapen Alangli pharman amethang aphan chepakam ingtung. Jongsi Arnam athengno alangtum aning dojoi thekthe, latum an sedetji bonta kacheseke ingtonte. Lason keklem ke aron kekroi kali; bonta, lake Arnam alamthe asai pen kapaklanglo. Ajahak amonit atum ke an choche aphrang kardom kachepaklang titi, ingthirpik apun pen kijui’ichot, antame alangtum aning along ke alangtum matha, “Ne kopi apot si la keklem nangji? Ardom nangnedet asonte mepikji, kalima? Ne ardomdet aphi tame kadokave ason ta cheprekpre, lasi kopipot ne lapuson chepasung nangji?” Lason amonit atum henlo aron kekroi ke. Angho penke latum ningjeji Arnam aphan aning pangsam ingtung pu, bonta alangtum aning ke Arnam athengno kali. Lason kardom asai keklem pen, latum akemang ke methang aphan Arnam athengno kachepadojoiji aphan kachesekeji kali; bonta kaprek abangphu atum nangpalangdunnang pusi kardom. Latum ke arlo angtan penta kacheparjan atumlo, dhorom aPastor ason si bang apharman ke ardompithek bonta methang aphan ke kilutdun avarsai chepalong thekthe. Lason amonit atum ke choklim pen, manghu nangnepinpen dhorom asaiphulo! Arnivang pu asonsi, Arnam ke akimi ason ningje lapen klem, bonta nang ke arnivang ta aron si kekroichot, Arnam aphan kachongthui lapen angdung ateng kilidun; tangte nang Arnam aphan kedengde abang kalima? Jongsi nang aron kroi lapen Arnam aphan dengde pulote kosonsi ahirjume kelongji? Nangphan Arnam nangphlungpleji ma?

Arnam asai kangdang prappik tanglo, halahei dhorom along kinirling abangphu atum aphan adhoromtin lapen aphaitin along pen var’et lapen ‘‘kachethangplup atum’’ girja asai ansose ang-ang kilit lapen kachepahelobom, nangtum angbong pen aron kekroi along aning kacheparong “kethekser” atum aphan nangpachekakdunbom. Arnam asai ke majok aphan ta inghonghe, majok alam ta langle, lapen mantune ta klem haihe ave; majok aphan ta laso along sanponpe. Jongsi nang chingbedun un’e, tangte nangphan ta nangkoiphitpo, nang koan aningkan pen le kroi punoi thang alam avelo. Nang koanbak pakleng le pakleng sitame, jongsi nangle aron kroi, pulote nangphan ta nangsorplotpo. Lapuson amonit atum aphan asapbak methang pen kacheroktok kedoji aphan lapen kengkam isi aphi cheponji aphan si ne puji; nang aphrang akeban adichi ateng dobom nangnelo. Anut kaprek atum aphan nangmena keklem ateng si Arnam alamthe asai pen kapaklem pen, nangmethang aphan kachepachethang kali ma nang? Jongsi, nang kopima keklem along, aron along dothip lapen monit atum aphan mondoli asai kedengji aphan kapinkhat lapen kaiketa anut kaprek atum aphan ajat ason ta nang keklem ateng si kapaklemtoi, pulote nang ke aro-arim kethak kalima? Nang mondoli arlo ta asonchom kaselamdun kalima? Kopusi, tangte, nang Arnam akemang chinidun pu kachepangdak araje kedolang? Kopi a’ot si nangdichi pen anut kaprek aphan kechoklim paman un pu nangpinchonglo? Jongsi nang lapu si monit aphan japonbom pulote nang alangtum aphan dhorom ajutang anat le kepon kalima? Kechoklim karjong akai kedo atum ke arnivang ta karjong aphan akejokvan chepalong, lapen latum ke Arnam asai Alangli ningkehang ateng an jokvan pensi klem. Lahei amonit atum aphan ke, kardom ke aron mate adichi kali; arnivang ta, alangtum atur kimi along chingbedun un. Langdam sinang, monit atum methang aning aphan Arnam athengno kedojoi thekji aphan seke chipi, lapen alangtumphan majok ta pasiksak un’e. Majok amonit, ajat amei, mate ason ta alangtum kechoklim karjong akai along adui-ahoi pidun thekthe. Lapuson aseke akemang ke angthek kelongji aphan; lake monit atum aron kapakroiji pu aphan kali. Bangso asai ke aron kekroi aphan kali, bonta lake monit akai along kapathe-pachanji aphan. Jongsi nang lahei asai aphan kekroi nangji aron asonben si langbom pulote nangkai ke mantune ta chelar un’elo. Nang ta anut kaprek atum asai ason along si chijudun tahai, bonta bang ke kijut ahut Karjong Kangthir asai along pachingbardun undetpo, nangphan abang ke Karjong Kangthir alangroi along pen nangpavirdetpo. Nang nangmethang aphan kachechongthui kalima? Lahei alamthe akemang ke monit atum Arnam athengno aning aphan kachepadomjoi thekji aphan, aning Arnam ahin kachepangno aphan, athe ke alangtum along Arnam asai along thangnat kekhamkhe kapavedetji lapen athe kapathe longji aphan.