Arnam Bangkethom Doma?

Jisu pirthe athak vang pen monit ason cheplangji pu chekokdet pen aphi, monit atum lason kroilo: Po inutvet le sining athak kedo kali, bonta Sopo, lapen Karjong Kangthir amat ta lo. Lake monit atum kekroithip alamlo, sining athak lason a’Arnam do: bangkethom pen inut a’Arnam: Po, Sopo lapen Karjong Kangthir. Monit atum anke lason si kroilo: Arnam ke inutpet a’Arnam lo, bonta bangkethom planglo, monit atum aning arlo pen kekroithip alamlo lake Po, Sopo lapen Karjong Kangthir do pu henlo. Po jongsi ave pulote, Arnam ke plenglim kali. Lason thakthak si, Sopo lapen Karjong Kangthir le jongsi ave pulote, Po Arnam ta plenglim kalilo. La bangkethom pen si Arnam Inutpet cheplanglo. Latum kekroidam ke, Po inutpet chot bonta Sopo le ave pute banghini ta Arnam kalilo. Po, Sopo lapen Karjong Kangthir la bang kethom chelangpet anchot si Arnam plang unchotlo. Nonke, kekroi asong atum anta, lapen nangtum angbong kekroi atum anta, lasi kroilo. Bonta, laso alam ahokpet loma kalima, lake badu ta thanthekthelo, kopima nangtum anta Arnam aphuthak klardak aphan kachiniji kali si kamanghu anghun along si dobomlo. Monit atum kekroidam alam ke lalo sitame, laso alam ahokpetma kalima ke nangtum chinine, kopima nangtum ke dhorom alam pen apot raki ahormu ason si nangnirhetlo. Dhorom atum kethan alam pen apot nangtum kroithip ongchotlo, lapen laso abikar ke nangtum abang arlo nanglut pemelo. Nangtum lahei kaphere meme alam along jangdunlutlo, kopima bangkethom pen Inutpet a’Arnam ke ave. Lake, Po lapen Sopo lapen Karjong Kangthir ke avelo. Lahei ke monit atum kekroidam alam anchot. Aove ove anta, monit atum Bangkethom pen Inutpet a’Arnam aphan si kroithiplo, bonta lahei ke monit atum kekroidamthap alamlo, lapen monit atum si pinchonglo, bonta badu ta la theklonglelo. La an aningkan angbong sita, Baibel alam kapangtakthek atum Bangkethom pen Inutpet a’Arnam alam aphuthak kethan pangtaklo, bonta Bangkethom pen Inutpet a’Arnam alam pen apot non anta klardak kali, lapen monit atum laso alam pen apot manghulo. Kethedung amonit atum sita laso alam aputhak kethan paklardak thek abang ave; kethan kapangtak alam anta loh along ketok pen penang an lamthe pangrumlo, sita inutnat amonit ta laso alam pen ajok chinidak lapu ave. Pima, monit atum aning arlo pen kamatha aBangkethom pen Inutpet a’Arnam puke ave. Kopima badu ta Arnam ke koson ma pu theklonglelang, lapen badu amonit ta sining athak Arnam ahem dam pen nat si Arnam kedoma lapen ove suri koan si “Arnam aHem” along kedoma mate Arnam bang koan cheparjanthekma pu pu kelang damji ajakong ave. Lasi kelang kapangthek nangji ke lason pen henlo: Po arani lapen Sopo arani, lapen Karjong Kangthir arani; anuttin ta nang cheklangreplo; lapen lason si Latum chethakreplo, lapen lason si isipet Latum planglo. Bonta, la an aningkan angbong pen sitame, monit atum laso alam aputhak ahok alam chininelang. Lake monit atum aning kamatha alam chot, kopi ma inutnat amonit ta siningdam pen kelang kakuruk asai klem pen kekroi asong atum angno Arnam Bangkethom pen Inut alam ahokpet kethan abang avelang. Latum aning kamatha alam pensi ningje chotlo, kopima inutnat amonit ta sining angsong arlu pen chevangthu si “karju patini aloh” monit angno chevan si Bangkethom pen Inutpet a’Arnam alam kachiniji aphan kar’i akekroi asong atum aphan ahok alam nang kethan abang dolo lapu kali. Kalang, lahei alam aphan kekroi pen apot monit aphan akoi pino, kopima, monit aphan kapinchong ahut kopi apot si Po Arnam aSopo Jisu aphan Alanglilong kepadunji si chevanvedetlo? Ha kecheng ahut pen ta, ajat ason ta Jehovah amen pensi ajat ason ta planglo pu asonte, mesenji apotlo. Pudamlo pulote, Po Arnam ta pirthe kithip cheng ahut Alangli Sopo lapen Karjong Kangthir penpen sai klem rappet nangji apotlo. Alangtum klem rappet asonte, isivet si plangpo kalima? Kecheng lapen kijut ahut anta, Jehovah Inutnat si dochotlo lapen Kanghon-Kangjinso Akai ahut Jisu amen ave, mate Alangliphan Jehovah pusi hangbomlang asonte, monit atum akisung aphuthak Alangli pajokje detjima? Lasi, lahei ke Jehovah aphan akoi asap ta pinolo; jongsi puji pulote Karjong Kangthir si kechokche pu loma, kopima ningkan suri suri angbong Jehovah amen pen, Jisu amen pen lapen Karjong Kangthir amen pen sai klem aret, lapen monit atum aphan Arnam binong komat loma pu pamanghu aret ke. Karjong jongsi akaprek araje chepharlole pen pen sai klem te, lapen Jisu amen pen sai klemkle asonte, lapen monit atum Alangliphan papho longle lapen theklongle pute, lapen sining kangreng ase ason si arju longchotlo pulote, lason si monit aphan ale domuchotpo lapu kalima? Tangte non kopi si keklempo? Kopima inglong kangtui koanma, talo ajam koan thema la ansi monit atum aning kamatha lapen ning kethe dolo lapen pini arani a’Arnam ke chechak un’e tanglo lapen kanahok thedunglo. Kedamtang ahut ke Jehovah ansi dochotlo, Jisu, lapen la banghini angbong Karjong Kangthir dolo, lapen laso pen ajok monit atum koson si laso ateng kekroipo ma pusi manghudinglo, lapen nonke Jakong kethe Abang non inut dothukoklo, lapen la ta Arnam angbong pen inutlo pusi chekronglo. Alangli komat lapen kosonlo lapen koloso abang aBangkethom pen Inutpet a’Arnam along si kacherapdun pen ningkan koan lone kachepatujoilo? Koson si monit atum la kelangdingpo? Arnam bangkethom pen inutpet pu alam penta monit aphan kethan apor enpik an, tangte nonke “bangphli angbong pen inutpet a’Arnam” pusi dokoklo. Tangte la koson si than pajirmipo? Nang than pajirmi thekjima? Korte lapen ingjir atum! Tangte nangtum pini arni anta lason a’Arnam aphan koson si kroibomlo? Nangtum aphan nang choro memelo. Arnam bangkethom pen inutpet pu alam pen anta kachechak padikrimlo; tangte koson si nangtum la bangphli pen Inutpet a’Arnam pu alam pen apot nangtum kekroi kithirthip theklo? Nangtum aphan damnon pusi nangtoilo, bonta nangtum dammolo. La koan matha un’epin alamlo! Nangtum ke prekdak chadilo! Inut amonit Arnam bangphli aphan kroidetlo, bonta ajat ta plangpledetlo; tangte la kamanghumeme asailo pu nangtum mathathema? Nangtum kamanghumeme asai klemthekpiklo pu ne nangtum aphan nangpupe! Ne nangtum aphan nangpulang, ahokpet ke, bangkethom pen inutpet a’Arnam ke pirthe athak nahok ta avelo. Arnam ke aPo ta avelo, aSopo ta avelo, lapen Arnam pen aSopo chelangpet pen Karjong Kangthir aphan sai kepavang puke aphi alamlo. Lahei alam ke kekroithaplo lapen pirthe athak laso apot avelo! Bonta lahei kekroithap apot ta keklang adim do lapen angkur avepin lapu kali, kopima nangtum aning kamatha pangkrekre, lapen nangtum aning kamatha ke athe ave te mathathe. La anchot kali si, la mesen lapen kengset, lapen Sobar aphan anta haidet’un. Bonta, kachingjinso memenei ke lahei alam ke lam akejoi lapen ahok kali! Nangtum ahokpet alam kopi ma theklonglelang; lapen nangtum ke kamathathap lapen kekroithap pen plengsetlo, lapen kilu atum aphan kepakroidetji lapen latum aphuthak kedoji si tomo semarthaplo, lapen nangtum lam than thekser pu rat atum kepakroiji si klemlo. La ahokpet loma? Monit atum kereng nangji lason henloma? Lahei ke chokchepiklo! Ethenat alam ta mesense! La an aningkan angbong, Arnam aphan lason si nangtum thakdaklo, lapen aove ove anta lapu si thakbomlo, la anlo, Arnam bang kethom paplangdet ansi klemlo. Lapen, nonke Arnam inutpet kasemarji aphan un’e tanglo, kopima nangtum Alangliphan kethak pa’ongpik anlo! Der’o’e ahut Ne le sai klemkle asonte, koan ajir kiding an nangtum lason klemjine thangnat ta puthekthe! Arnam aphan jongsi lason thakdak titilo pulote, kosonsi Alangli nangtum a’Arnam pu manbompo? Nangtum Arnam aphan chini unjilangma? Alangli ke nangtum a’Arnam lo pu nang chekrong si Alanglilong chedamthuji ma? Neli jongsi nangle derchet ason te, nangtum ke “Po lapen sopo,” Jehovah lapen Jisu, aphan Israel adet toiphit si, netum si Arnam angbong pen inutlo pu chipudetji apotlo. Bonta kopai alam, nonke kijut aporlo lapen, non apor henlo ajir dingklui pen Neli kanghong aporlo, lapen Neli labangso asai angdeng klemdet ansi Arnam aphan nangtum kethaktot asai ingtonji. La jongsi kali pulote, nangtum ke angsong arlukrak si, Sobar aphan anta kangduk kardom adovan athak batkokji. Nangtum keklem kangtung asai ke la henlo! Lake Arnam aphan nangtum kethak abidilo! Nangtum non ephrang ta klembomlang ma? Ne nangtum aphan nang arjulang: Arnam bang koan dolo? Kolo Abang a’Arnam si nangphan kejok vanpo? Kechengsi a’Arnam ma, adunthu aBang ma, mate bangkethom aBang la nangtum kardomver aBang aphan si nang kekroi ma? La an angbong pen kolo aBang aphan si nangtum kroibomlo? Po ma? Mate Sopo ma? Mate Karjong ma? Komat aBang aphan si nang kekroi ma nang chethantha. Nang lam pen ke nang Arnam aphan kroilo pu sita, nangtum nang mena aning kamatha aphan si kroilo! Bonta, nangtum aning arlo ke “Bangkethom” pu aphai dokoklo! Tangte nang la chedondejima?

Phurun kethom asai keklem ahut ta Bangkethom pu ateng pensi klemlo pulote, Arnam bang kethom dokoklo lapen anuttin ta sai keklem cheprekjamlo. Nangtum angbong pen komatne abang jongsi Bangkethom a’Arnam dovek pulote, la Bangkethom pen Inutpet a’Arnam alam aphuthak nang than pajirmijima? Po kangthir kopilo? Sopo pu kopilo? Lapen Karjong Kangthir ke kopilo? Jehovah ke tangte Po Kangthir loma? Jisu ke Alangli sopo loma? Tangte Karjong Kangthir ke kopilo? Tangte Po ke Karjong kalima? Tangte Jisu asai keklem an ke Karjong Kangthir asailo kalima? Lapen, Jisu asai keklempi ason si Po Arnam asai ta Karjong Kangthir si klempilo kalima? Arnam koan akarjong si Alangli rideng dopo? Nang kipu ateng ke, Bangkethom a’Arnam lake, Po, Sopo lapen Karjong Kangthir ke inutpetlo; lapulo pulote, karjong kethom dokoklo, lapen karjong kethom dokoklo pulote, Arnam ta bangkethom dokoklo. Lapu pulote, Arnam inutpet lake ahokpet puke avedetlo; tangte koson si lason a’Arnam ke Arnam apun-achak ateng kedopo? Nang jongsi Arnam inutpet pulote, koson si Alangli aSopo kedopo lapen Alangli Po keplang unpo? Lahei ke nang ning kamatha alamlo kalima? Arnam ke inutpet, Alangli Inutpet si Arnam chotlo, lapen Arnam akarjong ta inutpetlo, Baibel along ketok ateng pen “Arnam ke inutpet lapen Karjong Kangthir ta inutpetlo.” Po lapen Sopo do pu nang koanma ningje sita, Arnam ke inutpetlo, lapen Po Arnam, Sopo lapen Karjong Kangthir alam aphuthak nangtum kekroi lake Karjong Kangthir alam aphuthak along si dolo. Ethe pen pudam pulote, Arnam ke Karjonglo, bonta Alangli monit ason cheplang si monit atum angbong nang rengdunlo, lapen kadokave aphuthak si dolo. Alangli Karjong ke ajat ason pen ta pangromlaplo lapen nahok ta do. Alangli monit aok arlo ta dothek lapen sining athak ta dotheklo. Arnam ke inutpet lapen ahokpet pu kadokave amonit atum ta pulo apot si, Arnam ke inutpetlo, badu ta thak un’elo! Arnam ke inutpet aKarjong lo, lapen Alangli inutpetlo; lapen lake Arnam aKarjong lo. Nang kipu atenglo pulote, Po, Sopo, lapen Karjong Kangthir, tangte la Arnam bangkethomlo kalima? Karjong Kangthir le isi asonlo, Sopo le isilo lapen Po le isi asonlo. Alanglitum cheprekjamlo, ason ta cheprekjamlo, lasi koson si latum inutpet a’Arnam along kacherap dunthekpo? Karjong Kangthir ke Karjonglo; lake monit atum aphan karjuthekji joikelo. Lapulo pulote, Po si Karjong ahokpetlo. Alangli pirthe athak vangvepinlang lapen monit ason cheplangplepinlang; Alangli ke monit atum aning arlo ke Jehovah Arnam kethelo, lapen Alangli ke Karjong ta Karjonglo. Tangte, Alangli pen Karjong Kangthir angbong kacherap kopilo? La Po lapen Sopo angbong kacherap henlo ma? Mate, Karjong Kangthir lapen Po aKarjong angbong kacherap doloma? Mate la bangkethom akarjong isipet loma? Mate, Karjong Kangthir ke Arnam amar loma? Koson si la kethan kapangtakpo? Lapen, Sopo lapen Karjong Kangthir angbong kopi si kacherap kedolo? Karjong hini angbong akacherap ma mate monit lapen Karjong angbong si kacherap kedolo? Lahei alam henlo kachini un’epin ason ke! Latum jongsi Karjong isinat pulote, bang kethom alam amat si klang nangnelo, kopima Latum isinat akarjonglo. Latum jongsi prekjam aKarjong pulote, Alanglitum akarjong ajakong cheprekjampo, lapen latum isivet ke plang thekthelo. La po, Sopo lapen Karjong Kangthir alam ke prekdak chenamlo! La pen ajok Arnam aphan thakdak si bangkethom an pinchonglo, anuttin ta akarjong lapen ajakong chedoreplo; tangte Alangliphan koson si Arnam inutpet lapen Karjong isipet pu kipu unpo? Nephan nangthantha, sining, pirthe lapen la pirthe athak ahormu an kasonse abang ke Po loma, Sopo loma, mate Karjong Kangthirlo? Ajahak atum ke Latum sonse rappet pusi kachethan. Tangte monit aphan komat si Pap pen kepajoklo? Karjong Kangthir ma, mate Sopo ma mate Po lo? Ajahak atum ke Sopo si monit aphan pap pen pejoklo. Tangte Sopo ke kopi asonlo? Tangte la Sopo ke Arnam aKarjong kacheparjan aBanglo kalima? Kapinchongtang amonit atum kamatha penke Arnam monit ason kacheparjan aBang ke Sining athak a’Arnam aphan ke Po pusi hanglo. Tangte, Jisu ke Karjong Kangthir pen inghu si pirthe athak hachelo pu nang chininema? Alanglilong Karjong Kangthir dolo; nang ajat le ningje sita, Alangli ke Sining athak a’Arnam pen isipetlo, kopima Alangli ke Arnam aKarjong kacheparjan aBanglo. Sopo pu alam apot ke ahok kalilo. La inutpet aKarjong si ajat ason ta klem pachun’etlo; Arnam Alangli amat, lapen, Arnam aKarjong si Alangli sai pachunlo. Tangte Arnam aKarjong komatlo? La Karjong Kangthir kalima? Tangte Jisu asai kacheklem along Karjong Kangthir le keklem kalima? Karjong Kangthir (lake, Arnam aKarjong) jongsi laso asai pachunche te, Alangli sai ke Arnam asailo pu paklang unjima? Sining athak a’Arnam aphan Jisu kardom’un ahut Po pu kehang ke, Alangli monit aok pen ajok si hanglo, kopima Arnam aKarjong monit jongjong ason cheparjanlo lapen monit a’ok ateng si dolo. Alangli ok arlo le Arnam aKarjong bochelo pu sita, angtan ke monit araje pen si Alangli pirthe athak dolo; pudamlo pulote, Alangli ke “monit aSopo” si cheplangdetlo lapen lake monit anchot kali Jisu Alangli mena amat ta chipulo. Monit aSopo pu pen ajok, Alangli ke inut monitlo (pinso arloso pu sita, arangvo si monit chotlo) monit jongjong ahemtun along si hache damlo. Lasi, Jisu sining athak a’Arnam aphan Po pu kehang ke nangtum le Alangliphan Po pu kehang asonthotlo; Alangli monit pu pen ajok si hanglo. Jisu nang kethan tekang aHemphu aKardom nangtum aning dolang bo? “Sining athak kedo netum a Po….” Alangli Sining athak a’Arnam aphan Po pusi kadokave amonit aphan pahangtoilo. Lapen, Alangli ta Po pusi kehanglo apot si, Alangli nangtum kadokave karjap adim pen arjap si nang kapachingbardun joklo. Nangtum ta Sining athak a’Arnam aphan Po pu kehang ke, Jisu nangtum kadokave pen nang kapachingbardun apotlo, lapen pirthe athak Arnam kangvaitang amonit (lake, Arnam aSopo). Nangtum jongsi Arnam aphan Po pu hanglo pulote, nangtum kapinchongtang amonit apotlo kalima? Jisu pirthe athak ajakong thepiklo sita, thengparpan athak thithe aphrang ke, Alangli monit asopo chotlo lapen Karjong Kangthir (lake, Arnam lo) pen kerai Abang chotlo, lapen pirthe athak inut kapinchongtang amonit asonlo, kopima Alangli sai keklem pachunchelang. Lasi, Alangli sining athak a’Arnam aphan Po pu kehang ke hukum kekroi lapen kachepabi angtheklo. Alangli Arnam aphan (lake, sining a Karjong aphan) lason kehang pen ajok, Alangli sining athak Arnam aKarjong aSopo lo pu tokdaklo lapu kali. Alangli kachecharmek atovar cheprekdak puchotlo, bonta Alangli ke kaprek amonitlo lapu kali. Lasi, kaprek kaprek amonit aphai pu alam ke chobeilo! Alangliphan thengparpan athak sakse aphrang ke, Jisu ke monit aSopo lo lapen pirthe a’ok ateng pensi Alangli renglo, lapen Karjong aphuthak kachepahemphuji ajakong avelo. Laso ajok si Alangli monit a’ot-adur ateng pensi Po Arnam aning kehang ateng paplenglo. Lake Alangli Gethsemane abiri along phongthom kardom atenglo: “Ne ning kehang kali, bonta Nangli ning kehang aling paplang nang.” Alangliphan thengparpan athak sakse aphrang, Alangli Jihudi atum aRecho planglo; Alangli Kepajok Abanglo, monit aSopo, bonta kehai’i aok kali. Lasi, kapinchongtang amonit aning kamatha ateng pensi, Alangli Arnam aphan Po pu hanglo. Bonta, Arnam aphan Po pu kehang abang aling si Arnam aSopo lo lapu kali. Lason pulote, Jisu monit aphan Hemphu aKardom kethan ahut si kadokave ta Arnam aSopo manlappo kalima? Nangtum jongsi la kroi ingtungte pulote, nephan nangthantha, nangtum komat aphan si Po pu kehanglo? Nangtum jongsi Jisu aphan si kipudam pulote, Jisu aPo aphan monit atum koson si hangpo? Jisu chedamjui aphi, Po lapen Sopo alam lapu amat si jutdetlo. Laso alam ke Jisu monit ason kacheparjan esek ansi dochotlo; lasi, ajat le punon pu sita, Arnam aphan nangtum Po pu hanglo te, kapinchong aBang Arnam lapen kapinchongtang amonit atum an angbong chephokloklo. La Bangkethom pen Inutpet Po, Sopo lapen Karjong Kangthir pu alam ke karjap adim avedetlo, lake ahok kali lapen aove ove anta theklongle lapen lake ave!

Kecheng aloh along ketok apot keongdung amonit atum chini tahaiji: “Monit aphan itum araje asonthot pinchong lonang, Itum aning kehang ateng pen.” Arnam kipu “Itum” lapen “Itum aRaje” lapen puthot “Itum” pu phongni an kipu; lapen Alangli “Itum” pu kaningje lake Arnam inutpet kali pu aphanlo. Laso ateng pensi, monit atum ke inutpet kali pu alam pinchong si, ladak pen amat si Po, Sopo lapen Karjong Kangthir pu alam pavanglo. Tangte, Po ke kosonlo? Sopo ke kosonlo? Lapen Karjong Kangthir ke kosonlo? Mate, pini arni amonit atum araje ke la Bangkethom atum araje pangrumpet si kapinchong loma? Tangte, monit atum araje lake Po, Sopo lapen Karjong Kangthir pen chinglit loma? Kolo aBang a’Arnam araje pensi monit atum kachinglitlo? Lasi, monit aning kamatha ke plenglim kali lapen chokchelo! Lake Arnam inutpet aphan akeongpi a’Arnam ason kethak mandetpo. Moses Kecheng aloh ketok ahut ke, monit aphan pinchongdet aphi si Arnam pirthe pinchonglo. Kecheng ahut ke, pirthe keplangcheng ahut ke, Moses ke avelang. Lapen, ajir dingklui aphi si Moses Baibel toklo, tangte, koson si Sining athak kedo a’Arnam si la kaningjelo pu kipu thekpo? Arnam koson si pirthe kapinchong ma Moses ke asap ta chini dunde. Baibel along ketok Kachejok Abarim Aloh along ke, Po, Sopo lapen Karjong Kangthir alam tokponpe, bonta inutpet a’Arnam, Jehovah Israel along sai keklem alamthe si tokchotlo. Aove kachelar aling si Alangli men ta larlo, bonta amen kachelar pu aling le amonit ta kachelar lapu kali. Jongsi lapu pulote, Arnam ongpikpo kalima? Aron barim along ketok anke Jehovah keklem asai saidelo, Aron Akai Arnam Amena amat kapangcheng asailo. Lahei ke Arnam asailo, lapen, Alangli hukum kipitang ateng si, dothiplo. Ajat apor ahut sita Jehovah ke Ne henlo Polo lapen sai keklemji si vanglo pu ningjeje, lapen Alangli Sopo pirthe vangsi monit aphan pap pen pajokji pu alam kethanmek pu ave. Jisu kevang ahut anke, Arnam monit aphan pap pen kepajokji si monit ason cheparjanlo pusi pulo, Sopo si kevang pu alam kali. Kopima, ove ke chinglitle lapen Arnam Amena asai keklem ta cheprekjamlo, lapen Alangli apor kacheprek ason si sai ta pachun nangkoklo. Lason si, Alangli Amena aphan kachipu amen ta prekjamlo. Monit atum kekroi ke Jehovah ke Jisu aPo lo, bonta Jisu Amena amat lason ningjeje, alangli kipu: “Netum ke komentune ta Po lapen Sopo pu nang paprekpre; Ne lapen sining athak Ne po ke isinatlo. Po Nelong dolo lapen Ne Alanglilong dolo; monit atum Sopo aphan theklong lote, latum sining athak kedo Po aphan si theklonglo.” Lahei alam pudet aphi ke, Po lapen Sopo sita, Latum Karjong isinatlo, lapen kaprek kaprek amonit kethakdam pu avelo. Monit kethan pangtakji aphan bor’ilo pulote, inutpet kali bangphu cheprekjam pu alam pen ajok sungkrung binonglo, lapen Po, Sopo lapen Karjong Kangthir atum akacherap alam ta sungkrunglo. Monit atum jongsi bangphu cheprekjam pu alam ningje lote, la Arnam aphan ketheklong ason si kapinchonglo kalima? Monit atum aning kamatha ateng pensi kecheng, adun lapen puthot adunthu pu angdeng thakdak anlo, lahei ke monit atum aning kamatha alamlo, lapen lakhadam meme alam kalilo, lapen lake plenglim kalilo. “Arnam bang koan do?” pule nang alangphan arju lote, Arnam ke Bangkethom pen Inutpet, Po, Sopo lapen Karjong Kangthir: ahokpet a’Arnam henlo puan si alang pupo. Lapen nang jongsi “Po ke komatlo?” pu arju lote, alang nang kethakji ke: “Po ke sining athak Arnam aKarjong; lapen sining aHemphu lo,” pusi nang thakpo. “Tangte Jehovah ke Karjong ma?” Alang pupo: “Kalang!” Nang jongsi “Sopo ke komatlo?” pu arjulo te, Sopo ke Jisu henlo pusi nang thakpo. “Tangte Jisu atomo ke kosonlo? Komentu si Alangli kevanglo?” Alangli pupo: “Jisu ke Karjong Kangthir pen ajok inghu si Mary pen ajok pirthe hachelo.” Tangte Alangli bang ke Karjonglo kalima? Alangli sai anta Karjong Kangthir pen ajok si klemlo kalima? Jehovah ke Karjonglo, lapen Jisu abang ta kalanglo. Non kijut arani ahut ke, ajat le punon sita Karjong si sai klembomlo; tangte Latum koson si cheprekjam poma? Arnam aKarjong si Karjong asai kaprek atovar pen keklem kalima? Lason pulote, Latum angbong bangphu cheprekdak pu kalidetji. Jisu ke Karjong Kangthir pen ajok si inghulo, lapen ningbibepin pen, Alangli sai ke Karjong Kangthir asai binonglo. Kechengsi adihu Jehovah pen sai keklem ahut ke, Alangli monit ta cheparjanje lapen monit angno ta cheklangkle. Lasi monit atum Alangli raje theklonglepinlo. Alangli koanma ajakongthe lapen ardi dopik pu sita, Alangli ke Karjonglo, monit aphan kapinchong aBang Arnam Amena amatlo. Lake, Alangli ke Arnam aKarjong lo. Alangli monit atum aphan inghun athak pen kangki ahut, Alangli ke Karjonglo. Badu ta Alangli raje theklongle; Kangjinso Arani ahut Arnam aKarjong monit ason cheparjan si Judea ahavar cheklanglo, laso ahut ansi Arnam araje Jihudi ason kacheparjan aBang aphan theklonglo. Jehovah aning kamatha koson lone chini un’e. Bonta, Alangli ke Karjong Kangthir pen ajok si inghulo, lake, Jehovah aKarjong pen ajok si inghulo, lapen Jisu kahache lake Arnam aKarjong pen keplengset amumang pensi hachelo. Jisu aphuthak Karjong Kangthir vothung ason nang kisun monit atum ketheklong ahut; Jisu aphuthak karjong pu anchot kali si, Karjong Kangthir si nangsunlo. Tangte, Jisu aKarjong ke Karjong Kangthir pen thakdak unlangma? Jisu jongsi Jisu inut aSopo, lapen Karjong kangthir ke kaprek abangphu Karjong Kangthirlo pulote, koson si latum isivet keplang unpo? Lason pulote sai keklem pachun un’edetji. Jisu along kedo aKarjong, sining athak aKarjong, lapen Jehovah aKarjong latum ke isivetlo. La aphan Karjong Kangthir, Arnam aKarjong, phant throksi an kangtang aKarjong, lapen kechoklim aKarjong pule hang sitame. Arnam aKarjong ke ke’ongdung asai klem’un. Alangli pirthe pinchong unlo lapen lang kethe pen ajok pirthe pajutlo; Alangli monit akhei aphan pap pen pajok’lo, la anchot kali si, monit aphan haidet si phangnodet’an unlo. Lahei asai ke Arnam amena amat keklem asailo lapen Arnam alar badu amonit ta laso asai kelem un abang avelo. Alangli Karjong aphan Jehovah lapen Jisu, lapen ke Jakong kethe aBang pule hang sita chok. Alangli ke Hemphu, lapen Kepajok aBanglo. Alangli ke monit asopo ta cheplang unlo. Alangli sining athak lapen pirthe athak ta dolo; Alangli ke ha pirthe sining angsong si dolo lapen muluk angbong ta dolo. Alangli inutpet anchotsi sining lapen pirthe aHemphu lo! Ha pirthe kapinchong ahut pen non an, lahei asai ke Arnam aKarjong Amena amat si klemlo. Sining athak asai lapen monit aok pen kepachun asai anta Alangli Karjong pensi klemlo. Sining lapen pirthe athak along kereng api do’an ta, Alangli jakong kethe aripak athak si dolo; lapen lahei asai ke Arnam Amena pen anpar majok ta Alangli dular klem’un abang avelo. Ha sining athak ta, Alangli ke Karjong lapen Arnam Amena amatlo; monit atum angbong ta, Alangli ke monit ason cheplang si Arnam ason cheplanglo. Alangliphan jat pharo suri amen pen le hang sitame, Alangli ke Alangli mena amatlo lapen Alangli sai anke Alangli Karjong pen keklem asai saidelo. Thengparpan athak kithi pen monit aphan pap pen kepajok lake Alangli Karjong pen keklem kepachun asailo, lapen kijut apor ahut adettin lapen ahavartin along Alangli birta kapachetak la ta Alangli sailo. Ahuttin ta, Arnam aphan ke jakong kethe aBang inutpet ahokpet a’Arnam lapen apun kechoklim aBang pusi hang unchotji. Bangphu kaprek pu alamm amat si ave, Po, Sopo, lapen Karjong Kangthir pu alamm ke aphi alammlo. Sining lapen pirthe athak ta Arnam ke inutpetlo!

Arnam sai keklem kepachun angkung ke ningkan suri throk anlo lapen sai keklem amo keprekjam ateng si ove kethom an thaklo: kechengsi aove lake Kachejok Abarim Alo ahut Aron Akai; adunthu lake Kanghon-Kangjinso Akai; lapen puthot ingdeng kethom lake Khristo Kepangri Arat Akai. Akaitin ta kaprek kaprek amen pensi bochelo. Lake, sai keklem amo cheprekjam apotlo, lake, sai amo akenang prekjam apotlo. Kechengsi akai ahut Aron Akai lake Israel ahavar along si planglo, puthot akai ahut lake monit aphan pap pen kepajok asai kepachun ha Judea adet along. Monit aphan pap pen kepajokji aphan, Jisu Karjong Kangthir pen ajok inghu si Sopo ipumpet nangplanglo. Lahei ke sai angkung along akenang dokok ajok si planglo. Kijutsi akai ahut ke, Arnam Alangli sai amo pathe muchot si kekroikrelang adet aphan anta kepaleji aning hanglo, halatum angbong Alangli men anong ketheji aphan. Ahok alam kachiniji si monit aphan Alangli keja ponji aning hanglo. Lahei asai lake inutpet aKarjong pensi klemlo. Alangli kaprek amo penle sai pangcheng sita, sai angkung lapen keklem aron anke isivetlo. Latum keklem asai amo lapen angkung an nang lang dun pame lote, angton pen ta Karjong inutpet si la pachunlo pu nang chiniji. Bonta, ajahak atum pu tahai: “Po ke Po lo; Sopo ke Sopo amatlo; lapen Karjong Kangthir ke Karjong Kangthir amatlo, lapen mo kijut ke, Latum isivet plangpo.” Tangte koson si nang Latum aphan isivet kepaplangpo? Koson si Po lapen Karjong Kangthir isivet keplang unpo? Latum jongsi bangphu hinilo pulote, ajat pen sita cherappet unji, tangte latum bangphu hini dokokpo kalima? Latum aphan isivet kepamanji alam nang ningje lote, bangphu hini aphan pangrumrappet si isi abangphu kasemarji kalima? Tangte latum isivet chepa’ok’e aphrang ke bangphu hinilo kalima? Akarjongtin ta amena ason choklim do, lapen Karjong hini ke isivet pinchong un’e. Karjong ke hormu-hortar lapen pirthe athak ajaton ason kali. Monit atum ketheklong ateng pen, Po lake inut aKarjong lo, Sopo lake kaprek, lapen Karjong Kangthir ta akaprek, lapen lang aharlung kethom ason si la Karjong kethom ta chingvui si isi cheplangdetpo pusi mathalo. Tangte la kethom ke isivet pensi planglo kalima? Lake kechokche thektik akethan pangtak alamlo! La Arnam aphan thakdaklo kalima? Koson si Po, Sopo lapen Karjong Kangthir bangkethom pen inut paplang unpo? Latum Bangkethom ta cheprekjamlo kalima? “Tangte Jisu ke Alangli Sopolo pu Arnam ningjeje ma?” pu kipu atum ta dopik. Jisu ke Arnam aSopo lo, Alangliphan aning chingsampiklo – lake Arnam amena amat si ningjelo. Lake Arnam amena amat asakhi ason che’enlo, bonta kaprek atovar pensi klemlo, lake sining athak aKarjong si Amena amat kacheparjan aBang aphan ahakhi cholo. Jisu ke Alangli amat kacheparjan aBanglo, lapen sining athak Alangli Sopo kali. Nang arju thekloma? Jisu alamthe, “Ne ke Po along si dolo, lapen Po Nelong si dolo,” pu alamthe lake Latum ke isivet aKarjong lo pu aphanlo kalima? Lapen pirthe athak nang kacheparjan ajok si latum aphan pirthe lapen sining pen ajok thakdaklo kalima? Ahokpet ke, Latum isinatlo; ajat le punon, Arnam Amena aphan amat hakhi che’endetlo. Kai kachelar pen ajok, sai keklem nangji ason kedopik ajok, lapen Alangli sai keklem amo kemangdam prekjam ajok, monit atum Alangliphan kehang amen anta preklaplo. Alangli kechengsi asai amo nang keklem ahut ke, Alangliphan Jehovah, Isreal atum aphan kivi aBang pu ansi hangchotlo. Puthot asai angdeng ahut ke, Arnam monit ason kacheparjan aBang aphan Hemphu, lapen Kepajok aBang pusi hanglo. Bonta halaso ahut, sining athak aKarjong ke Alangli ke Ne kachinghonnei aSopo lo pu ningjelo bonta Arnam aSopo Po ipumpet puke ningjejedetlo. Koson si Arnam aSopo inutpet anchotlo? Tangte Arnam monit ason cheplangpledetjima? Alangli monit ason kacheparjan aBang apot si, Alangliphan Arnam aSopo kachinghonnei aBang pulo, lapen ajok, Po lapen Sopo angbong akachelang nangdolo. Lake sining pen pirthe angbong chepredak ajoine chotlo. Jisu ke pirthe monit a’ok ason ben si Arnam aphan ardomlo. Alangli monit araje ason chipindenglo apot si, monit asonthot si Alangli ningjelo: “Ne rangvo ke kapinchongtang amonit asonlo. Ne monit ason cheparjan si pirthe athak vanglo, nonke Ne sining athak pen kedo chehelovinglo.” Laso ajoine si, Po Arnam aphan monit ason ben ansi choardom unchotlo. Lake alang sai angdenglo, lapen lake Arnam aKarjong monit ason kacheparjan aBang keklem nangji asonlo. Alangli Po aphan monit a’ot-adur pen kardom pen ajok si Alangli ke Arnam kali puke pu un’e. Alangliphan Arnam kachinghonnei aSopo pule pu sita, Alangli ke Arnam amatlo, kopima Alangli ke Karjong sita monit ason kacheparjan aBanglo, lapen Alangli bang lake Karjong binonglo. Alangli ke Arnam lo, tangte kopi athe si Alangli Arnam aphan ardombomlo pu monit atum manghupik. Bonta lake Alangli ke Arnam sita monit ason kacheparjan aBang, monit arangvo along kereng, lapen sining athak aKarjong kalilo. Monit atum ketheklong ason si, Po, Sopo, lapen Karjong Kangthir latum anta Arnam lo. La bangkethom pen inutpet keplang aBang aphan si ahokpet a’Arnam puke pu unchotji, lapen, lason si, Alangli jakong ke thepik binonglo. Lason pen ajok si Alangli ke phant throksi an ajakong kethe aKarjong lo pusi ajahak atum ke pulo. Sopo Alangli vangdet pen kardom, lake Karjong aphan si Alangli ardomlo. Ahokpet ke, Alangli monit a’ot-adur pen si ardomlo. Kopima pirthe arangvo ke ingthimlim le, Alangli ingthimlimlo lapu kali lapen Alangli monit ason kacheparjan pen ajok kechoklimle adim dopik, lapen Alangli monit arangvo pen ajok sai amo keklem ahut kisung phopiklo. Laso ajok si Alangli thengparpan athak apran chipipe aphrang Po Arnam angno batai kethom an choardomlo, lapen laso aphrang ta keongdung abatai ardomlo. Alangli sangho atum angno ta ardomlo; inglong angsong ta Inutpet ta ardomlo; telong angsong ta ardomlo; muluk atum angbong ta ardomlo; him kebeng ahut ta ardomlo; lapen bang aphan hirjume kipi ahut ta ardomlo; kopi apot si Alangli ardom chotlo? Alangli ke Karjong aphan si ardomlo; Alangli Karjong, sining athak a’Arnam angno si ardomlo, pirthe amonit a’ot-adur ateng pen. Lasi monit amek pen kelangdam ateng ke, Jisu ke Alangli sai klembom ahut si Sopo planglo. Laso asai angdeng ahut, bonta, Alangli Arnam aphan ardomde. La kopi apotlo? Lake Alangli kevan lam pen sai planglo, lapen lam pen ajok kangsai lapen ado kipi ta planglo. Alangli kardomji akenang avedetlo, lapen Alangli sai lake lam kaningjeji aphanlo. Alangliphan thengparpan athak sakselo, lapen jakong horang kedo amonit atum pen ajok alangli chetevarvelo. Alangli sai cheklemvetlo. Jisu Arnam aphan kardom ahut, Alangli Po Arnam aphan si ardomlo sining arat nang kisunji aphan, kopima Po aning kehang ateng sai kepachunji aphan, lapen sai angdeng nang keleji aphan. Laso akai ahut ke, sining arat nangsun’etlo, tangte Alangli ardombom nanglangma? Alangli sai lake kai kepajutji aphan, lapen kai akimi avelo, lasi mo kai akimi aphan Alangli ardom nangjima? La ale ave tanglo!

Monit atum kethan kapangtak along kachekroikre dopik khangjang. Kalang, lahei ke monit atum a’ot-adurlo; kelang pangchingchepin sita, lahei alam ke chok pamelo pusi nangtum kroilo. Tangte Arnam lake Bangkethom pen inutpet pu ke monit aning kamatha alam chot pu nang chiniloma? Monit atum agian ke plenglim lapen choklimlo lapu kali. Ladak angbong kangthirthe, lapen monit atum aning kamatha aphar keongdung doveklo; la pen ajok kapinchong amar chot atum ke Arnam asai aphuthak kethan pangtakji aphan klem un’e pu chepaklangdaklo. Monit aning arlo pleng ongchotlo, lake kamatha lapen kachinidam pensi vanglo, lapen ahok alam pen chehililo. Nang kachinidam alam pen ajok Arnam asai aphan ingsai unma? Jehovah asai amo pen ajok nang kopine thedung ason longloma? Nang inut monit jongjong abang lahei checharlap loma, mate Arnam Amena amat si kijut un’e apar akijut un’e aphan kachechardamlo? Mate kedamtang kijut un’e akai lapen non kevangji a kijut un’e akai an nang si kachecharma mate Arnam si la kachecharma? Nang la kopi si pujima? Arnam aputhak kethan kapangtakji aot nanglong doma? Kopunat atovar pensi nang kethan pangtakji? Nang Arnam ma? Sining lapen pirthe, la kedoan amar ta Arnam si pinchonglo. Nang le lahai asai keklem kali, tangte kopi apot si nang chokchepin alam le kethan pangtak aretlo? Nonke, bangkethom a’Arnam aphan nang kroilangma? Lason pen ajok anghor ardikhup ason nang mathathema? Nangphan akemenai ke nang Arnam inutpet aphan kekroi henlo, bangkethom aphan kali. Arjangtang pen kekroi henlo kemenai, kopima Hemphu anghor ke arjangtang.