Kachepahai Asai Aklong Ahok Alam (1)

Monit akhei, Sobar puanpin si kaphangnodaklo, Arnam ave pusi pima chinironglo, lapen Arnam aphan karchoji sangkok anlo. Kecheng ahut, Adam lapen Eve aphan pinchongdet pen, Jehovah anong-athang lapen ahakhi anke kaike doverlo. Bonta la phangnodak aphi ke, monit laso anong-athang lapen ahakhi pangbodetlo, athe anuttin tame Arnam abirudhe thurlo lapen Alangliphan angton pen man-peng kipiji ingtonkoklo. Pini arni kachepahai asai ke kadokave ahakhi doan lapen kadokave anong doan kachevanthuji aphanlo, lapen kadokave amonit atum Arnam aphan kaparchothuji pulo, laso ajok pima kasorjontang angbong hakhi kedoji aphanlo; laso angdeng along lahenlo sai keklempon nangji. Koson si, chenam ta monit akhei aphan kachepahai unpo? Bangso angdeng along lamthe akerap asai pen si monit aphan aningparochop unpo; kangpu pen, kangsai, ado kipi, lapen kangjinsosepin ahirjuno akerap pen alangphan kapachehodaidet an kevan, monit kachedandong aot kapangthek lapen alang kachekhangpik akangsai pen ajok alang tame monit akhei akangthirthepik lapen aketerpik kachiniji aphan mene, lapen lasi lahei ahormu ke’enpon pen Arnam kangthirpet akun kekhang’idunlo. Lake lahei alamthe pen si jasemetpet pima monit aphan kachepahailo lapen angton pen kapakroilo. Lamthe anke kapadusi monit akhei aphan kachepahaipon abidilo, lapen kadokave komatma Arnam kachepahai kedengdun anke Alangli lamthe pen akanghon lapen akangsai dengvek nangji. Pini kaningjeponbom ke chenam si kachepahaiponbomlo. Lapen koson si monit atum kacherap-chetodun nangpo? Lahei alamthe koson si kecho lapen kijun nangjima pu kachini pen, lapen lahei doan aphuthak kachinidam kelong penlo. Atheke koson si monit atum aphan kachepahaiji pu asonlo, lake kopine latum amethang amat le keklem kethekji kalilo. Nang keklem thekji ke, lahei alamthe kecho lapen kijun pen ajok, nang kahenodak lapen keterbung, nang kachedandong lapen nang akangthirthedet, lapen Arnam angno keklobup chichini longpo. Jongsi, Arnam aningkehang longdet pen aphi, nang ke asai ateng klempon thekpo, lapen jongsi nang ke kelangdammek dolo lapen ke lahei alamthe aphan angton pen chehodaidet unlo, lapen nangmethang ke thangnat kachongvaivelo pulote, nangphan ke chepahai tanglo – lapen lake lahei alamthe pen ajok si angthek longlo. Kopi apot si monit akhei atum hakhi chepangbodetlo? Athema inutnat tame Arnam aphan kroikrelo, athema Arnam ke monit atum aning arlo adim avedetlo. Monit akhei aphan kachepahai ke monit akhei akekroi kevanthuvoilo. Monit atum kaiketa kangtingsu apirthe along si kekatdun ketong ningkehang do, latum ke penang an aningkethe birtilo, alangtum mohut aphan si akenangji dopiklo, lapen penang an ninghang aling abatpik akenangji si dolo. Latum anke kaiketa ok aningkehang aphan si mathalo, ok apharman si sik-dangpilo, lapen Arnam aphan kekroi akrong ahin kiriji ke ninghanghelo. Alangtum aning ke Sobar si thipontheilo, latum ke alangtum Arnam aphan man-peng kipi anta chepangbotheilo, lapen latum anke Sobar along si cheraphetlo. Bonta monit ke Arnam si sorjonlo. Lasi, monit ke hakhi chepangbodetlo, atheke alang Arnam anong-athang pangbodetlo. Monit akhei aphan kachepahai pu akemangdam ke monit atum Arnam aphan man-peng kipi anong-athang kapadothuji pulo. Lake lason le ningje tame: Ladak penang an amonit atum komatma chethe kiriredet an; jongsi ajahak komatma chethe kiri atum anle do sitame, latum anke chikip isi aphai atum anchotlo. Monit atum alangtum mohut aphan ansi mathadamthiplo lapen chethe aphan ke thangnat ardi ta pipedetlo. Ajahak atum ke Arnam abirudhe thurlo lapen khangdunlo, Alangliphan anung pen Alangliphan ingsailo, lapen ahok ateng asai klemklelo. Lahei amonit atum anke non amat ke langkranglo; nonmat aphan ke, lahei kachedandong titi sopo doan aphan thangnat ta vivelo, bonta mohut along ke nang kangting along so do nangpo, chiru nangpo lapen aso chingkritpo. Nang katheang anam kesopik alam mathathelo nang kerengdunbom ahut anke, bonta nang laso anam kesopik alam pima ephong nang le kangting ajo along kedolo pulote chichinipo, lapen nang ke laso ahut ningcheopikpo. Nang nonke domesenlo, bonta arnisi vangji nang ningkacheoipik ahut dopo. Halaso arni nangkele ahut, lapen kangting nangsunlo lapen katheang ke avedet tanglo pulote, halaso ahut ningkachiruidun ke derpikpo. Lake athema nang nonpu ta pini arni asai aphan chinidundelang pima nang ke non kedobom apor aphan kachehokdunji thekthedetlo. Somindar adangpi sai keklem kepangchenglo te, asontin tame Ne pini arni kaningje apot an ahok kacheman pu aphanlo, penang an amonit atum ke alangtum aphu che’otpo lapen ningrunhup pen chiru-charnappo. Lapen laso keklem along, tangte latum kangting along kachiru lapen aso kachingkrit pen klo tanglo kalima? Kadokave komatma ahokpet chethe kiri lapen kechoklim atum aphan anke akerap enmelo, lason si kachedandong titi sopo doan komatma asai ke’en’ino atum aphan anke kangting along si paklotheipo. Latum aphan ke Karjong Kangthir asai pen sorplotpo, lapen ajat tame keman thekji puke un’edetpo. Lasi latum tangte aningkidukpik pen chirupo, atheke adai-areng kepho along jangdun nangkoklo. Jongsi nang le laso asai angdeng along chokdunvetlo pute, lapen nang le nang chethe along the-ding pemelo, anke nang asai ke’enji atheng manpo. Jongsi nang ke atheng kalilang pulote, jonghe le nang ke adunthu asai angdeng aphan toi tanglo tame, nangphan ke asai ke’enji apun kalilang – laso apor ahut nang ke jonghele nang methang aphan nang athang pamanji ninghang ta avarsai longledetpo. Arnam ke nangche’o’etpo; konat si nang kedam pen pima non nangthengno kedo ason ajat avarsai kelongdampo? Konat si nang kedamthek pen pima Arnam ahin pen salajong nangkepador kelongdamji aphan? Laso ahut anke, Arnam ahin pen salajong ningjejelo lapen Alangli se chipipelo; kadokave nang keklem thekji ke pima pini arni kaningjekang alam doan kaporhi anchotlo – koson si tangte kachinidamji aphan unpo joike pen? Koson si mohut along chethe ke pini arni pen anpar akemepo? Halaso apor ahut, tangte nang kachiru lapen nang so kachingkrit pen nang kithi thekthe kisung chechak nangnejima? Non si nangphan hirjume anke kipi pajirponlo, bonta nang ke lahei doan pen ningarongchipiji thekthedetlo; nang ke hirjume plengset along si dolo, tebonta nang ke thangta chichininelo. Laso angthek ke pima nang kisung kepho nangjivek abanglo! Pini arni, ajahak amonit atum ke khanglo, ajahak ke chedandonglo, ajahak ke klemthap-klemprulo. Ne nangphan langplotlo, bonta nang mathari pima Ne ke thangta nangtum keklem-kedam chininedet puke. Nangtum akedoivet Ne thangnat ta nangchinidunde puhe? Kopi athe si Ne birudhe kithurverlo? Nang Arnam aphan kekroidun ke chethe kiridun pen nang mena apharman hirjume kelongji aphanma? Lake nang mena apharman le pima nang akekroi kalima? Nonjong kedobom along, Ne ke kachepahai asai keklempon ke kaningje pen anchotlo, lapen ephong le laso kachepahai asai kepajutlo tangte, nang akijut tame chenam-chenumlo. Ne nangphan angton pen kethan nangji dolangma?

Pini arni kachepahai asai ke chenam ta kopima monit kijut ahut kephoji alam aphan si jongdamlo. Kopi apot si Ne kaningje pima pini arni ado kipi lapen akangsai anke kijut arni ahut thedung inghoi kelok athengno akangsai pulo? Nang la theklonglema? Kopi apot si kachepahai asai ke kepadusi angdeng pulo? Lake tangte klardak pen kopuson ajat akijut si monit atum doan kachetongjima pu kepaklang kalima? Lake tangte anuttin aphan tame, kachepahai asai along ado kipi lapen kangsaibom ahut, alangtum ahok alir patheklongji lapen anke laso aphi alangtum aot-adur ateng pen kethakvetvetji aphan kalima? Monit akhei aphan kachepahai asai pu kaningje alar mute, pima lake kopuson ajat akijut si anuttin abangphu tame aot-adur ateng pen kephojima pu kapaklangpon pusi kaningje kemethuji mene. Lake monit atum apap apot kangsailo lapen anke prekjam ajat abangphu atum kepaklanglo, laso pen ke latum doan kaheno loma mate akangthirpet loma ingvaiponpo. Kachepahai asai aphi ke, kemesen aphan anong’e kapajirpon lapen kaheno an aphan adai-areng kepapho asai vangpo. Monit atum komatma kekroidun peme – kachepahai asai angton chok peme – latum anke somindar adangpi Arnam asai adunthu angdeng kapachethangji along si bipo; kachepahai asai along kephodunde atum anke akangting along si bipo lapen ke kivir si chetongpo. Lasi monit aphan anke ajat ateng si thakvetpo, kaheno keklem atum doan ke kaheno adilung alonglo, katheang arni atur anpar ke longlelo, lapen akangthirpet atum anke akeme adilung alonglo, katheang longpo lapen katheang atur along si kaike doverpo. Kedoan ahormu aphan tame kijutji tebokhetlo; monit akijutdam ke alang amek angno paklangdak pemelo, lapen doan ahormu tame ajat ateng pen si thakvetvetpo. Koson, tangte, monit atum aphan kisungpik ajat ateng pen kethakvetji along kachepajokdun unji? Ajattin amonit atum prekjam akijut anke kadokave ahormu tame kijutji tebokhetlo puan si pangdakpo, lapen laso kepachunji ke kachepahai asai somindar adangpi (kadokave kachepahai asai pen chengloklo, nonjong kedobom asai penpenlo) along keklem ahutlo. Kadokave monit akhei akijutdam kepaklangji ke kangsai anghoi athengno si klempo, ado kipi ponbom ahutlo, lapen kijut arni ahut kachepahai asai keklempon alonglo. Monit atum aphan aot-adur ateng pen kethakvetvet ke monit atum alangtum abinong’et atheng along kacheruithu kali, athe monit aphan kasorjon kecheng apor ahut, ejatvet amonit si halaso ahut ke dolo, kethak puke pinso lapen arloso puanvetlo. Halaso ahut ke prekjam ajat ateng amonit atum ave. Lake aphithu penang an aningkan suri phangnodet aphi ansi pima prekjam monit atum aphan kethakpon nangdokoklo, ajahak atum ke keterbung hi’i aber dodunlo, ajahak atum ke kapahi’ipik kaheno aber si dolo, lapen ajahak atum halahei komatma chethe atovar kiridun anke, Jakongtheparpik kepangripon aber si dolo. Lason pen anchot si pajo pen monit atum angbong kethakvetvet doan nangdolo, lapen lason pen ansi monit atum angbong monit kethedung ahemtun arlo prekjam ajat ateng kethakvetvet dolo. Monit atum kadokave tame “po” akaprek pen si vanglo; lake pima anuttin tame Jakongtheparpik kepangri aber si angton pen dotheilo pu kalilo, athe monit ke chedandong pinak. Kangthirpet akangsai ke abangphutin ajat aphan tame ahok amena kosonma paklanglo, thangnat ta kapatu avelo. Anuttin sitame alangtum ahok arje katheang along patheklonglo. Laso along, monit ke anpar abinong’et ateng ason ke kalidetlo, alang aphusar-phisar abinong’et asonthot ke mantune pen ave’etlo, athema Adam lapen Eve kelakha un’edet aso-asu aphan koan lone arjikiding pen Sobar beng’etlo, anpar ke sining angsong arni aphan chininelo, lapen athema monit atum aphan anke asontin doan Sobar abi pen si pajumputlo. Lasi, monit atum ke alangtum kechokvet kijut keledam adim dolo. Anpar tame, lake alangtum prekjam abi kijumput ateng pen kalilo pima latum aphan anke ajat ateng pen thakvetvetlo, atheke latum doan aphan pini arni kachepahaipon koan angdeng pen si langdampo. Monit akijutdam ke kopine pima pirthe kasorjon kecheng ahut pen le kepathikpondet lapu kalilo. Lake athema kecheng ahut along, halaso ahut ke ejatvet si dolo, atheke “monit akhei” pusi pangrumpet pen hoklo, lapen monit aphan kecheng ahut ke Sobar phangnonelang, lapen monit atum anke kadokave ta Arnam akatheang along si dolo, kangtingkuk puke masap ta latum aphuthak kloklelo. Bonta monit aphan Sobar phangnodet pen aphi, kadokave ajat doan monit atum angbong pirthe adang the-bi si ingdangdetlo – prekjam ajat doan monit atum komatma “monit akhei” pu pangrumpet pen kipu ahemtum along pen kevang atum pima pinso lapen arloso ansi kasorjonpon. Latum anke kadokave tame alangtum aphusar-phisar atum si alangtum kebanpik aphusar-phisar atum pen pachehelotoilo – monit akhei atheke pinso lapen arloso kedoan (pima lake, Adam lapen Eve abinong’et, alangtum kebanpik aphusar-phisar henlo). Halaso ahut, Israel asor an henlo monit atum komatma pirthe athak along Jehovah kachejapon. Angton Israel along pen keprekjam ajat amonit atum komatma nangkeplang anke (abinong’et hemtun isi akur along pen) Jehovah kapinkhat pen chingbodetlo. Lahei abarim amonit atum, angton pen ta pirthe athak amonit atum aphuthak mathakranglo, lasonthot si alangtum aphusar-phisar atum latum kejongdam ahoi angkang along kedodamji aphan chidunkrilo, atheke pini arni nonjong ahut anta angthun dokoklo. Lasi latum tangte koson si latum Jehovah pen kachehelo alam mathakrang si dobomma, lapen koson si latum aphan pini arni an ta angton prekjam keterbung ahi’i lapen karjong langno atum kaphangnoloma. Halahei komatma keongparpik kahenotang lapen pini arni an bikar kijumput atum anke – halahei komatma kepadusi ke kejok un’edetji atumlo – thangnat chongvai athai avedet si alangtum aphusar-phisar ateng kachidunthu anchotlo, keterbung ahi’i si atheke latum aphan phangnodaklo. Hala komatma kepadusi kepajokmeji atum anke monit akhei atum kechokvet kijut keledam nangji adim si lepo, atheke kijut ahut ke kejoktang lapen kehaitang atum aphan si adim thikpivetlo. Asontin tame kadokave hala komatma kejokji atum an kepapjokji si klemlo – bonta monit atum aphan komatma bang aphan kematha thekthedet lapen kepame un’edet anke, alangtum kachongvai ke ado kipi karnuknek aherang arlo alangtum aphusar-phisar aphiphi kidun anchotlo. Nang akijut ke kecheng arni pen si pathikvet tanglo lapen non si kepaklanglang puke pima nang mathadetri. Jongsi nang lason si mathalo tangte, nang chetengnedetlo pima kechengcheng monit akhei aphan kasorjonpon ahut, thangnat ta kapahi’ipik sobar ajat ke sorjonje kalima? Tangte nang chetengnedetlo pima Adam lapen Eve aphan kasorjon ke isi amonit akhei anchotlo (atheke pinso lapen arloso ansi sorjon chotlo) kalima? Nang jongsi kecheng ahut pen ta Sobar aso-asu pu asonte, pima monit aphan Jehovah kasorjon ahut kipudamji ke Alangli sobar akhei adilung si Alangli kasorjon along kejokdunlo pupoma? Lapuson Alangli kopine klemdetjima? Alangli monit aphan kasorjon ke Alangli hakhi apharmanlo; Alangli monit aphan kasorjon ke Alangli anong-athang apharman pulo. Kopi athe si Alangli chinilor pen Sobar aso-asu ajat kapinchong pen Alangliphan abirudhe pathurji? Koson si Jehovah le lason asai keklempoma? Jongsi Alangli klemdetlo pute, komat si ningjeji pima Alangli ke kangthirpet a’Arnam pu? Ne lason non kaningje pima ajahak nangtum ke kijut ahut Sobar abe si dunpo, laso kipudam athe ke nang kecheng ahut pen ta Sobar abelo pu aphan kali; alar ke, laso kipudam ke nang kejang puan si karnuklo pima jongsi Arnam le kapajokji bor’ipon sitame, nang ke nonpu ta pima pap pen kejok longledetjilang. Akaprek thangnat ta chongvai athai avelo bonta Sobar pen nangphan pachingbar anchotlo. Lake athema nang ke pap kepajok pen athak si dokoklo, athema Arnam le nangphan kangthirthedet apotlo lapen chinidamlor pen nang lekha ke Sobar amung ateng kapathikvet kali lapen anke nangphan Sobar pen pangbardet si chinilor pen nangphan kisung pachechakji pu kalilo. Lake kachepahai asai along ahokpet aklong alam kalilo. Jongsi lahenlo kopima nang akekroi tangte nang akachinidam ke ihin aphar anchot anvetlo! Kijutsi angdeng kachepahai ke monit atum aphan kapajok henlo, lapen ke alangtum kijut alam kepaklang henlo. Lake monit atum kahenodak apot kangsai pen ajok kachepachini aphanlo, lason si latum aphan ningpachirui toilo, pathurtoilo, lapen chethe pariduntoilo lapen monit akai akechok atovar paduntoilo. Lake kamanghuvong aning lapen kachini kanglen amonit atum aphan kangthurji pulo, lapen kangsai pen ajok, alangtum kachedandong aot kepaklangji aphanlo. Tebontame, jongsi monit atum le nonpu ta ningchirui thekthelang, nonpu ta monit akai akechok atovar kiridun thekthelang lapen lahei kahenodak an che’obup thekthelang tangte, latum anke kejokji aphan un’edetpo, lapen Sobar si chomosoidet khangjangpo. Lason henlo Arnam kachepahai akenangsot ardi: monit atum aphan kapajok, lapen alangtum kijut an kepaklangpon. Kemesen akijutdam, kaheno akijutdam – lahei doan ta angton kachepahai asai pen si paklangpo. Monit atum kejokji mate hirjuno kephoji anke kachepahai asai ahut si angton pen paklangtheipo.

Kijusi arni anke kadokave ahormu aphan kachepahai pen ajok ajat ateng pen kethakvetvet ahut henlo. Kachepahai puke kijutsi arni asailo; akaprek ahin pen pulote, anuttin abangphu aphan apap apot kangsai ke kijutsi arni ahut asai pulo. Kali pute, koson si monit atum aphan kethakvetvetpo? Kethakvetvet asai ke pima nangtum angbong si keklempon ke lason asai somindar adang kepangchenglo. Laso aphi, halahei alongritin lapen kadokave amonit atum doan tame kachepahai sai along phodunvek nangpo. Laso kipudam ke kasorjon along anuttin abangphu tame ajat ateng pen thakvetvetpo, kangsai anghoi athengno vang si ingsai ponpo. Madu abangphu lapen ajat ahormu tame laso ado kipi lapen kangsai akisung pen ke chepajok un’elo, mate madu abangphu mate ahormu tame ajat ateng pen kethakvetvet dopo; anuttin abangphu aphan sita thakvetvetpo, athe kadokave akijut nangtebok bomlo, lapen doan pima sining angsong lapen pirthe athak an tame laso kepajutji along an letanglo. Koson si monit le kijutsi arni monit akhei kedo pen chepajok unpo? Lapen lasi, koan arjikiding si nangtum athikpetpedet asai keklembom unjilang? Nang theklonglema pima nangtum kijutsi arni anke chekok dapprangpo? Koson si halahei komatma Arnam aphan man-peng kipi lapen Alangliphan kenangji atum an le Arnam akangthirpet kacheklangpon arni kethekdun longledetpo? Koson si latum kijutsi anong’e akeme apot kelongledetpo? Tangte nang inut komatma kemesen keklem abang, mate inut komatma kaheno keklem abangma? Tangte nang inut komatma kangthirpet akangsai kedeng abang lapen anke kekroidun, mate nang ke inut komatma kangthirpet akangsai dengdunlo lapen anke hirjuno kelong abang? Nang ke kangsai anghoi athengno katheang along kedo abangma, mate nang ke Meherang aakangtingkuk angbong si kedo abanglo? Tangte nang ke nangmethang amat komatma nang kijutdam ahut nong’e kelong abang mate adai kepho nangji abanglo pu klardak pen chichinima? Tangte nang ke inut komatma klardak lapen arnukkrung pen chinidamlo pima Arnam ke akangthirpet abang? Lason si kopipilo nang akeklem-kedam lapen nangning arlo ke? Pini arni Ne nangphan chepahaidet pen, nang chenam ta Nephan nangjima athe ke nang’ot-nangdur akeme mate akaheno kachethanji aphan? Kopuan si nang Nephan kachipidetlo? Kopuan akarnuk si nang Nephan archolo? Nang nangmethang amat ta koson si nang Nephan kivi loma klardak chichininema? Nang si madu pen tame chini muchotpo atheke kopi akijutdam si nang kapadusi ke kachetongji! Ahoklo, Ne nangphan thanlo: Ne ke monit akhei aphan sorjonlo, lapen Ne nangphan sorjonlo, bonta Ne ke nangtum aphan Sobar arideng ke pipelo; mate Ne chinidamlor pen ke nangtum Nephan kachedandong mate kekhangdet pen laso apot Ne adai nangke’enji puke pinchongchelo. Lahei kadokave akivir lapen kapasung doan ke athema nangtum aning arlo anke ingtang’ong lapen nangtum akeklem-kedam tame pinrem meme ongchot apot kalima? Lasi laso akijutdam nangtum kachetongji ke nangtum methang amat si chithikponlo? Nangtum si madu pen anpar ta chinipo, nang ning arlo koson si nangtum kijutdamji? Ne monit atum aphan kachepahai athe ke latum aphan chepaklanglo, lapen nangphan pap pen kapajokji akemesen aphanlo. Lake nangphan kaheno kapaklemtoiji kalilo, mate lake nangphan meherang akivir along kepadamtoiji binong lapu kalilo. Apor nangle lote, kadokave nang thedung akisung, nang kachiru lapen aso kachingkrit anta – lahei doan ke athema nang pap apot kalima? Lasi, nang mena akeme mate nang mena akaheno ajoine si nangphan mesen akangsai kelong kalima? Tangte lake kopima nang akijutdamji apot kemenei angthek kalilangma?

Pini arni, Ne Arnam kangvaitang amonit atum China along sai keklem ke kadokave alangtum kachedandong akun an kepangdak lapen alangtum aketer-ke’er doan pachiniji aphanlo, lapen Ne kaningje nangji asontin aphan kaningjepon athepi chipiponlo. Laso aphi, Ne adunthu angdeng somindar adangpi kachepahai asai keklempon ahut, Ne nangtum aphan Ne akangsai akerap pen somindar adang kangthirthedet anuttin aphan ingsaipo, athe nangtum monit atum anke monit akhei angbong kachedandong aot apharman bangphu atumlo. Hala komatma kachejor thekthedet anke kekhang lapen kerapdun ajaton ansi pemanchotpo, lason si hala komatma kachejorthek atum aphan anke asai enponpo. Kopi apot si Ne kaningje pima hala komatma kachejordun thekthedet anke kekhangdun ason si chemanpo pulo? Lake athema Ne non kaningje alamthe lapen asai doan ta nangtum aphrang alam si jongdamlo, lapen athema nangtum anke monit akhei angbong pen kachedandong anujokpi lapen apharman bangphu si chemanlo. Aphithu, Ne lahei alamthe nangtum aphan kachepahai apot pima akaprek adet along ponpo lapen hadak amonit atum aphan kachepahaiji si lahei enponpo, tebonta nang ke lahei longdundedetpo. Tangte lake pima nangphan kekhang kalilangma? Kadokave monit akhei kahenodak akun, monit kachedandong asai keklem, lapen monit keterbung arje lapen arpum – lahei anke nangtum aphan kachepahaipon alamthe along si pini arni angton pen tokpontheilo. Ne anke lahei alamthe akerap pen adettin amonit atum aphan lapen asongtin doan aphan chepahaiponpo, athema nangtum anke akamathadam hako ateng si dobomlang. Tebontame, Ne nangtum aphan chinilor pen nangke’orupji aphan klemklelo; jongsi nang le nang keklem-kedam along patikukdetlo lapen anke nangphan kepame un’edet chemandet lote, nang ke tangte kerapdun’i ajaton lapen kekhangdun si cheman chotpo kalima? Ne aphrang ta pulo pima Ne gian ke Sobar abidi langno ateng pen si klemponlo. Kopi apot si Ne lason kaningjelo? Tangte kopima Ne nonjong arni kaningje lapen keklempon ahok alam kalilangma? Jongsi nang le chejordun thekthelo, jongsi nang le choklimlelo bonta alar ke adai phonanglo pulote, nang ke kekhang le kacheman kalilangma? Nang ke tahailo nang apor ahut mesen si chechakponlo, bonta nang ke nonpu ta thangnat chininelang; nang ke chethe aphuthak asontin tame chinidamdepinlang. Nangphan le ado kipi lapen kangsai pho’etlo puvoiphit tame, nang ke angton pen chelarlepinlang, lapen aklong’et ke, nang chethe longdundelang. Nang sai aphan asat kelangji apor nangkele ahut, nang ke mede kithurvur ason lapen ansose kethedung asat kepho asatlang si chomatpo. Laso ame ke nang angton abang arpum aphan amepun pachemandetpo. Komatma chethe cheparidengdedetlang atum anke, komatne masapso tame ingthirjir aser arlo ave pulote, komatne nonpu ta aban kahenodak akun atengthot si dobomlang, lapen komatne kemesen asai klem thekthepin pen kekhangdun puke, koson si nangphan pavirvedetpo? Komatne pima sika isi pen anta anam kavedet abang aphan kachepahai asai keklempon ale kopi dopo, komatne pima chethe cheparidengdedet abang? Halaso apor nangkele ahut, nangtum arni ke halahei Noah lapen Sodom pen anpar akisung si plangpo! Nang akardom ke nangphan ajat ta akeme chemanmelo. Kopuson si nang aphi ke kachevangpo lapen akimi ningkachirui si kepangchengpo, pap kepajok asai tangdet ahut aphi anke? Pap kapajok asai ephong le angton patangdet anlote, anpar thangnat ta avelo; kopima kedoji ke hala komatma kaheno atum aphan an adai kipi kecheng anchotlo. Nang khanglo, nang chedandonglo, lapen nang ke pima nang kachini kaheno an asai klemlo. Tangte nang ke arsikjik an adai kepho nangji abang kalilangma? Pini arni Ne nangphan laso alam ningjeponlo. Jongsi nang le karjuje si chongvailo tangte, mo aphi nanglong kivir kevang ahut ke, nangphan derpikpo jongsi nang halaso ahut si ningkachirui kecheng lapen kekroidun kechengdun pulote kalima? Pini arni Ne nangphan eson avarsai nangpilo ningkachiruiji aphan, bonta nang ke keklemji ninghanghedetlo. Koan si nang kachonghongji ki’unpo? Ado kipi arni ahut anma? Pini arni Ne nangphan kedamtang ahut kechokche adai ningchibibelo; Ne nangphan aphong aphong diya tanglo, nang kaheno ahin pen chirui sin nang akeme ahin ansi langchotlo, athema kedoan Ne nonjong alamthe lapen asai anke nangphan kepajokji pulo lapen Nelong thangnat ta kahenodak akemang nang phuthak avelo. Tebonta nang kilutdunji aphan chedondelo; nang akeheno pen ke akeme than thekthelo lapen kachingkimepik aphan koson si kachoroji chininelo. Lason amonit atum ke ado kipi arni lapen kechokvet akangsai aphan le kachonghongding anchot kalilangma?

Moses le arlong along thengder pen, lapen Jehovah pen kipi ajok lang menmen nangkili, pima lake alang kekroi ajoinelo. David le Nephan nangkero pen ari kedo akum kardeng ahut, Jehovah – alang aning along ningkarong si plengsetlo – pima lake alang kekroi ajoinelo. Job le inglong isi adang abiresak kalana adim kangbodet lapen kachethan un’edet akhi-adat, lapen alang abang arpum le kekru’ang karklokbok kebanghet keman, pima lake alang kekroi ajoinelo. Ne se jongsi alang karjulong pulo tangte, Jehovah, lapen Ne nongthe adak-atur le theklong lote, Jehovah, athema lake alang kekroi ajoinelo. Jisu Khristo along Pitor le abe kidunthek ke alang kekroi aber si dolo. Pima alangphan thengparpan along Nephan ajoine gojal chesak nangji aphan lapen nongtheklong kai alammo kipi tame alang kekroi aber si dolo. Adak-atur pen keklarchen Arnam asopo araje aphan John le ketheklong ahut tame, lake alang kekroi aber si dolo. Kijutsi arni kemanji apharman alang kethekdamlong ahut tame, lake alang kekroi aber si dolo. Kopi apot si Gentiles alongri amulukpi atum kedoan Ne kapaklang alam kelongdun loma pu atheke, lapen monit atum angbong Ne sai keklemji aphan Ne ok ason kevangthu alam kapachini’ilong ke, alangtum akekroi ajoinelo. Ne kesodak alamthe kephodun atum kedoan ke tebonta alangtum mena si ningkangsamvanlo, lapen kejoktang atum anke – alangtum la keklem ke alangtum akekroi pen apot kalima? Monit atum ongdung longlo athema alangtum akekroi ajoine, lapen lake kaiketa hirjume pu kalilo. Pima David ason thakthak aningkarong lapen kachehok ajat ke latum longdundedet tahai mene, mate Moses aphan Jehovah kipi alang kilidung ason kalidet tahaiji. Langdam sinang, Job aphan ke Jehovah si pahirjumelo athema alang akekroi apot, bonta alang ke kisungpik chechaknanglo. Nang le hirjume longlo mate kivir chechak nanglo pu tame, sonni ta hirjume plengchen akepho asonlo. Kekroi penpete, nang ke laso kachepahai asai longdun un’edetji, Jehovah asai amo nang mek angden pini arni kepaklangpon ketheklongji ke aphi alamlo. Nang ke thek ta thekdun longledetji, nang ke long ta longdundedetji. Lahei kisung-keboi, lahei kivir-kephangno, lapen kedoan akangsai – jongsi lahei nanglong nangklokle tangte, Jehovah asai amo pini arni nang thekdun longji puhe? Pini arni, lake kekroi ajoinelo pima nangphan kachepahai asai longlo, lapen lake laso kachepahaidet ajoine pen si pima nang ke Jehovah asontin asai amo aphan kekroidun longlo. Lake athema kekroi ajoine pen anchotlo pima nang lason ado kipi lapen akangsai kelongdun. Laso ado kipi lapen akangsai pen ajok, nangphan ke chepahaidetlo lapen pachoklimlo. Lapuson ado kipi lapen akangsai penpete nang ke pini arni longdundelo, nang akekroi ke thangnat ale avedetpo, athema nang ke Arnam aphan chininelo; koanma nang Alangliphan kroilo pu sitame, nang akekroi ke bonta kangthaidang kachethan pima asai ateng kithirthip kavedet si chemanpo. Lake nang laso kachepahai asai longdundet pen aphi anchot si, laso asai atheke nangphan athikpet abang angton kapeman, pima nang akekroi ahokpet kacheman, lapen chiki meme, lapen nang ning tame Arnam ahin chingbedunlo. Jongsi nang le thedung akangsai lapen ahirjuno chechaknnag tame athema laso alamthe “kekroi” pu ajoinelo, nang ajatnon ahok akekroi do lapen nang akechokpet longdunlo, ansose akeme, lapen ansose anam kesodak ahormu. Lake athema kangsai asai keklembom along anchot si pima nang Arnam kasorjon kepadusi keledam adim ketheklonglo; lake laso akangsai alonglo pima nang Kapinchong Abang aphan kanghon nangji pu theklonglo; lake lason kachepahai asai alonglo pima nang Arnam aphang ketheklonglo; lake laso kachepahai alonglo pima nang plenglim pen monit achethe aphuthak kachinidam; lake laso kachepahai alonglo pima nang monit achethe akechok atovar kelongdun lapen “monit” pu ahok alamjor kachinidamlo; lake laso kachepahai alonglo pima nang Jakongtheparpik abang kangthirpet akun lapen Alangli akemepik ason, anong-athang kethepik arpum kethekdamlong; lake laso kachepahai asai alonglo pima nang monit keplang atiri lapen kadokave monit akhei “kerengver aphurkimo” kachinidamlong; lake laso kachepahai alonglo pima nang monit akhei aphusar-phisar lapen monit akhei kahenodak nangkeplang atiri chinidamlo; lake laso kachepahai alonglo pima nang ningkarong lapen ningkangsam lason thakthak si jutjepin ado kipi, kapakeng, lapen Alangli kasorjon amonit akhei aphan Kapinchong Abang kedengdedet alamthe longlo; lake laso kachepahai asai alonglo pima nang hirjume kelong, lason thakthak si keso-kisung tame pima monit pholo…. Tangte lake kadokave ta nang masapso akekroi ajoine kalima? Lapen nang akekroi lahei ahormu longdamdet pen aphi thechet kalilangma? Tangte nang akeongpik aphant longlo kalima? Arnam alam karjulong lapen Arnam gian ketheklong anchot kali, bonta nang ke salajong si Alangli sai asontin tame chomatdun longlo. Nang ningjeji pima jongsi nanglong kekroi avedet te, nang ke lason ajat ado kipi mate lason ajat akangsai longledet tahaiji mene. Bonta nang chinidam nangji pima kekroi avete, nang ke lason ajat ado kipi mate lason ajat Jakongtheparpik Abang pen akelame kelongdundedet anchot kali, bonta nang ke kaike tame Kapinchong Abang pen kachetong longji pu avarsai keme chepangbodundetpo. Nang ke monit akhei keplang atiri chinidundelo lapen monit achethe akenangsot alam longdamdedetpo. Jongsi nang bang arpum le thilot lapen nang karjong dam’etlo pu tame, nang ke nonpu ta Kapinchong Abang asai amo angton ta chinidundelo, nang ke pima Kapinchong Abang puan kethedung asai pirthe athak Alangli monit akhei sorjondet aphi keklempon pu alam ta chininelo. Alangli kasorjon amonit akhei abangphu ateng pen lote, nang ke tangte lason ateng pen kangting along chininepin si keklodunji aphan ninghangjima, lapen kai apar kai akisung chechakjima? Jongsi nang le nangmethang aphan pini arni ado kipi lapen kangsai pen chepaprekdaklo te, tangte kopilo nang las open kachetong’iji? Nang kamathadam ke pima nonjong akangsai pen chepaprekdaklo pulote, nang ke laso kisungkrung akai pen jokplot unpo puloma? Lake ahok kalilo pima jongsi nang “laso adim” pen cheterek lote, kopima nang kachetongji ke kisungpik mate kachenek-kaholo hi’isarpo atum pen keklem si phopo? Nang ke kachechak un’edet ajo lapen anarlo si chetongpo tahailo? Nang kamatha ke pima nang laso pini arni akangsai pen jokplotlo pulote, nang ke kaiketa pima mohut kachenek aphan haidetlo puloma? Nangphrang ke kopitong kevangpone? Tangte lake chenam ta Shangri-La ason pima nang ningkethedam doma? Nang kemathadam ke nang pima non ahok alam pen kekatjui pen anta nang kai apar kai ado kipi pen jokplot unlo puloma? Pini arni aphi lote, nang tangte lason ajat avarsai lapen lason ajat ahirjume puthot longdamthujilangma? Tangte nang lahei doan nanglong kivir-kephangno nangle lote longdamjima? Tangte nang lahei doan kadokave monit akhei kesengdam along kilut lote thekdam longjima? Nang nonjong ningkarong achethe lapen pima monsam pen kedo kibihek nang hemtun isi – lahei ke tangte nang mohut kai apar kai kijut keledam adular cheman unjima? Jongsi nanglong ahok akekroi do, lapen jongsi nang le athema nang akekroi apot thedung ason longdunlo tangte, lahei kadokave ke nang kopima – kasorjon abang – kelong nangji lapen ke kopima nanglong kedo nangji ha kecheng adim along. Nang akekroi lapen chethe aphan lason kachepahai pen anpar akenangsotnei ale akaprek avelo.

Pini arni, nang chinidam nangji kopima Arnam halahei komatma kachepahaitang atum aphan an karju, kopima Alangli halahei komatma kechoklimtang doan atum aphan akamathadam, lapen kopima nang nonjong apor ahut kilutdun akenangji. Ajahak ahormu ke nang masapso anle chinidam anta chokji. Nang ajahak Arnam kachepatujoi akachethan-chemum anke kangsirdun nangnelo; lahei anke chethe aphan akerap lapuan ave, lapen lahei ke menmen langprui anta choklo. Nang kachepatujoi alam porhi theklo lason si Adam lapen Eve kachepatujoi alam: Adam lapen Eve halaso apor ahut kopusonlo, lapen kopi asai si pini arni Arnam keklemji pulo. Nang chinidamvek nangji pima monit aphan kachepahai lapen kepachoklim along, Arnam aningkehang ke Adam lapen Eve ahut ason monit kachiruithu nangji pulo. Nangning along, nang kechoklim aphuthak angdeng koanma pu mesen alam abidi dovek nangji pima Arnam akemang ateng kachepalongdunji pu aphan, lapen anke nang la kelongji le chitingkrupnon. Laso kejongdam ke nang asai keklemlo, lapen lake kopine nang chinidamvek nangji. Lake nangphan dorphluplo lahei alam aphuthak Arnam alamthe ateng pen kilut dunji aphan kiridun nangji. Nang la porhidam lote “monit akhei kachingthur aphurkimo suri kep aningkan aphrang alam,” nang kachiniji si bor’ilo, lapen lasi nang kortemar lapen ingjirmar penpen alamthak kelongji si kiri bor’ilo. “Arnam monit akhei kachingthur alam kaningje ke ningkan suri throk aphrang alamlo, kalima? Kopilo tangte la suri kep aningkan aphrang alam aphuthak?” Kopi ale dolang laso akarju aphuthak alamthak kiridam kabor’i? Arnam Amethang le suri kep aningkan apharman mate suri suri aningkan apharman sai klem tanglo pu tame – Alangli chenam ta nangphan laso alam kapachiniji akenang doma? Lake kopine pima nang atheke kasorjon api ateng pen, kachinidam nangji akenang ave. Nangmethang aphan masapso lason ajat kachingki dengdunnon lapen lake kelangdammek saidelo puke kachinidamji aphan bor’idun nangnelo. Nang kacheroktok nangji ke kopima nang pini arni kilutdun nangji lapen kachini nangji henlo, lapen anke nang la keotdunthip akenangji henlo. Lason pen anchot si nangphan chepahai peme longpo. La athak alam porhidamdet aphi, nanglong tame kemesen akamatha dovek nangpo: Arnam ke akar’ipik pen si dolo, Alangli itum aphan kachepahaipo pulo lapen anong-athang lapen ahakhi longji pulo, laso koson si itum Alangli pen kajalangdun nangpo? Kopilo itum keklem nangji atheke Alangli plenglim pen kachepahaiji lapen Alangli ahakhi kemandunji aphan? Kopilo itum keklem nangji atheke Arnam anong-athang kachepalongji? Kopilo itum keklem nangji atheke amethang aphan Arnam kepangri arum lapen Sobar akeja aber kedodundedetji aphan? Lahelo kopima monit atum kamathadam nangji alam. Nangtum anuttin tame Arnam kachepahai akenangsot aphuthak klardak nangji. Lahenlo nangtum arpulo. Laso keklardak alam longdamdet pen aphi ansi nang kilutdun longji, laso asai angdeng nang chinidampo, lapen nang plenglim pen athikpet chemanpo. Kali pulote, nangtum anke ahok athikpet atum chemandun un’elo.