Arnam Along Ok Akedoivet Kedo

Arnam monit arje ason kacheparjancheng ahut ke pirthe athak ningkan thomkep ra kethom ra achitim dolo, lapen Alangli sai keklem ke ningkan kethom anvet. Alangli sai keklembom ahut, lapen Alangli sai pangchengche aphrang, Alangli monit ateng si do-thaklo; Alangli ningkan thomkep ra kethom angbong monit ateng si do-thaklo. Ningkan kethom ra achitim angbong, Arnam monit ason kacheparjan Abang Alangli helo pu chepaklangdaklo. Alangli sai keklem pangchengche aphrang ke, monit jongjong asonsi Alangli dolo lapen chepaklanglo, lapen Alangli ingthir’et pu chepaklangkle, lapen Alangli sai keklem pangcheng peme ansi Alangli ingthir’et pu pachinilo. Ningkan ingkoi ra sirkep an Alangli pirthe kedo’un ke monit jongjong, monit asopo, monit a’ok pensi dolo, lapen Alangli sai keklem lake Alangli arta ningkan ingkoi ra sirkep aphi pensi pangcheng pemelo. “Monit ason kacheparjan” lake Arnam monit aok along kacheklang henlo; Arnam monit akhei angbong sai keklem ke monit araje mumang ateng pensi klemlo. Lasi, Arnam jongsi monit ason cheparjanji pulote, Alangli monit a’ok ason cheplangdet nanglang, monit aot-adur ateng; lake kenangsotnei asailo. Arnam monit ason kacheparjan athe ke monit ateng kerengji lapen sai keklemji aphan, lapen Arnam Alangli akedoivet pensi monit ason cheparjanlo, lapen monit ason planglo. Alangli monit ason kacheparjan lapen asai keklem ingkung hini an thakme. Isi lake Alangli pirthe athak sai pangchengche aphrang kereng achethe. Alangli monit jongjong ateng si monit ahemtun along bochelo, lapen monit asonthot cheplang si, monit atum kibi aron-atang heihui kroi pemelo, monit atum akenang ateng (kecho-kijun, pe-ri kachingthang, mek kejang, hem rit) pensi dolo, monit ateng kechoklimle, lapen monit aning angthin ateng si dolo. Ehin pen pudam lote, Alangli kereng aphrangsi angkung along ke Alangli akangthir’et a’ot pen kali si monit jongjong ateng do-thaklo, lapen monit atum keklem-kedam ateng Alangli klemlo. Puthot Alangli kereng hini angkung lake, Alangli sai keklem kapangcheng ason si do-thaklo. Alangli monit jongjong asonsi do-thaklo tema, lapen monit a’ok pen si rengbomlo, lapen manghumeme aot pen Alangli dode. Bonta, Alangli sai ajoine ingthirvet pensi Alangli do-thaklo, lapen laso ahut ke Alangli kangthir’et asai monit a’ot-adur pen klem nangkok ajoine si Monit ason cheparjanlo, pima Alangli sai keklem kepangchengji aphan Alanglilong a’ot do peme lapen apun chok pemelo. Lasi, Alangli akereng ingkung hini abang ke monit a’ot-adur ateng si Alangli sai klemlo, lapen Alangli chethe ke monit jongjong a’ot lapen ingthirjir a’ot do rappetlo. La kopi apot loma pulote, Alangli kereng aphrangsi angkung ahut, Alangli monit jongjong ason kereng lapen kedo-kethak athe ke, Alangli kangthir’et asai keklemji aphan archak un’elang pu ajoine, lapen Alangli arta do’o’elang ajoine; Alangli nangthe-nangding ansi, lapen Alangli sai angdeng cheparpu unlo pu ansi, Alangli keklem nangji asai an klem unji. Alangli monit a’ok ateng pen, the-ding nangji lapen arta do nangji apotsi, kechengsi Alangli kereng angkung ke monit jongjong ateng si planglo lapen puthot Alangli akereng hini angkung abang ke, Alangli monit a’ok ateng pen langdam pusita sai keklem kapangchengji apun-achak chok pemelo, lasi Arnam monit arje ason kacheparjan ke ingkung hini – monit lapen karjong kangthir ateng pensi renglo. Arnam monit ason kacheparjan Abang jongsi, ha kahache ahut pen sai keklem pangchengphit lapen kamanghumeme asai ta keklem pangchengphit pulote, Alangli monit ason kereng akedoivet ke checharchedetpo; monit akhei le ave te ok ta avedetji, lapen monit ativi jongsi ave te monit kalilo. Laso ajok si, Arnam monit a’ok ason keplang ke laso akacheparjan Abang aphan Arnam akhi-adat kapinchong ason benlo. Pudamlo pulote, “Arnam monit a’ok ason kacheparjan ahut ke Alangli ingthir’et akarjong binonglo, lapen monit ason kali,” pu alamthe ke kachobei lapen kaheno alamthelo, kopima laso alamthe ke klangkle, lapen Arnam monit ason kacheparjan aron karkan asonlo. Alangli sai keklem pangchengdet aphi ta, Alangli karjong kangthir pen plengset si do-thaklo bonta monit a’ok pensi do-thaklo; halaso ahut lake, Alangli monit a’ok pensi kangthir’et asai keklemji aphan si monit arje cheparjanlo. Lasi Alangli monit ateng pen si kangthir’et asai klem’ilo. Alangli pirthe a’ok kali, bonta kangthir’et akarjong si sai klemlo, bonta Alangli karjong kangthir ke pirthe a’ok arlo si dojoi ason ben si planglo; Alangli akedoivet ke, Alangli sai keklem pirthe aok pen kali bonta karjong kangthir pensi klemlo. Bonta, asai keklemvoi abang ke pirthe a’ok pen henlo. Alangli, ke monit bonta Arnam lo puta pudam’un, kopima Arnam ke pirthe monit a’ok arlo si nangrenglo, monit araje mumang pen bochelo lapen Arnam araje ason pen ta bochelo. Kopima Alangli ke monit a’ok ason kaboche a’Arnam lo, Alangli ke kapinchongtang amonit aphuthak kethenei Abanglo, lapen Arnam asai keklem’un amonit atum aphuthak si dolo. Lasi, monit ason ben keplang atum an aphuthak, lapen monit a’ot ason kedo-kethak atum an aphuthak, Alangli anchot si monit ason kacheparjan a’Arnam chotlo. Lahei atum monit a’ot ason si do-thaklo sitame, kapinchongtang amonit atum anke monit a’ot pen anpar akaprek ajat ta ave, bonta Arnam monit ason kacheparjan Abang ke prekdaklo: Alangli pirthe aok along monit a’ot anchot kali si, lapen anpar, ingthir’etlo. Alangli monit a’ot ason kedo-kethak ke athak langphrui pensi chechar chotlo, bonta Alangli ke ingthir’et pu kachiniji aphan sungpik. Kopima, Alangli monit apun choklim ansi Alangli akangthir a’ot chepaklangji, lapen monit kamatha ason si manghumeme anpin lapu kali, lapen monit atum aphan kachecharji aphan sungkrung chenamlo. Pini arni anta, Arnam monit ason kacheparjan Abang akedoivet monit atum kachecharji aphan akisung thepiklang. La an akiding alamthe ne ningjedet aphi sitame, nangtum angbong ke’ongdung atum ke kamanghu pangtarloklang pusi ne mathadam. Bonta, laso alam ke kamathadam joike: Arnam monit ason cheplanglo, Alangli akedoivet ke monit araje lapen kangthir’et araje kachingvui henlo. Laso akachingvui aphan ke Arnam Amena amat, pirthe athak a’Arnam pusi pupo.

Jisu pirthe athak kereng lake monit jongjong achethe ason si renglo. Alangli monit jongjong ason si monit kedo aot ateng si dolo. Alangli jakong – Alangli sai keklem lapen lam kaningje, keso kepame lapen hi’i kiphlung, lahei kamanghu meme asai keklem ke – Alangli sai pangchengchetik anke, ke’ongdung asai ke cheklangdak lapu kali. Alangli arta ningkan ingkoi ra sirkep plengple aphrang, Alangli sai keklem pangchengche aphrang pen langdam lote, Alangli monit a’ot ateng si do-thaklo pu cheklangdaklo. Laso ajok, lapen Alangli sai keklem pangchengchelang ajok, Alangliphan monit jongjong pu pen anpar ajat ta theklongledetlo – lapen halaso malom ke, ajahak atum ke Alangli ke Joseph asopo pusi tinlo. Alangli ke monit jongjong asopo pusi monit atum tindamlo, lapen Alangli ke Arnam monit araje kachepharlo aBanglo pu kethan’iji atovar avedetlo; lapen, Alangli sai klembom ahut, Alangli kamanghumeme asai ake’ongpi klemlo, bonta ake’ongpi amonit atum ke Joseph asopo pusi puthiplo, kopima Alangli ke kapejok aBanglo bonta pirthe angno ke monit arje ason si cheparjanlo. Monit a’ot-adur ateng kedo-kethak lapen Alangli sai keklem, la hini ta kechengsi monit ason kacheparjan angkung alam kapachekokji si manlo, lapen Arnam ahokpet pen monit ason cheplang’etlo, lapen monit jongjong ateng si do-thaklo pu kapeklangji aphanlo. Alangli sai pangchengche aphrang monit a’ot-adur ateng kedo-kethak lake Alangli ta monit jongjonglo pu angtheklo, kopima, monit araje mumang pen si kamanghumeme asai ta klemlo, keso pemelo. Alangli kamanghumeme asai keklem’un ajakong dokok athe lake Arnam ajakong Alangli phuthak dokok ajoklo, lapen Alangli raje aphan Arnam akarjong pensi pindenglo. Alangli lahei ajakong kedo lake Arnam akarjong pen ajoklo, bonta Alangli monit kalidetlo lapu kali. Keso kapeme lapen hi’i kiphlung asai lake Alangli sai keklem amo along keklem nangji asailo, lapen monit araje arlo kachepatujoi akarjong kangthir sai keklemlo, lapen Alangli ajat angthek le paklang sita mate Alangli jakong jonghe chepaklang sita, Alangli monit a’ok ason si renglo lapen monitlo. Alangli thengparpan athak apran chipidet pen kithurthu ahut anke, Alangli monit ason si do-thaklo. Kangjinso kipi, keso kapeme, lapen hi’i aphan kiphlung asai anke Alangli sai amolo, lapen lahei asai ke monit araje pen si Alangli klemlo. Alangli thengparpan athak thithe aphrang ke, ajat asai le Alangli klem sita pirthe aok pen Alangli che’o’e. Alangli amat si Arnam lo, Arnam asai la amat klemlo, bonta Alangli ke Arnam monit ason kacheparjan Abang ajok si, Alangli cho-junlo, pe-ri chepindenglo, lapen monit ateng si ok akenang ason ta dolo, ok akar’i dolo, lapen monit aning kamatha ateng si mathalo. Lahei anke Alangli ta monitlo pu angthek kachibilo, lapen Arnam monit ason kacheparjan ke, monit a’ot-adur binong pu angtheklo, lapen kamanghu meme asai kali. Alangli sai lake Arnam monit ason kacheparjan abang keklem nangji asai kapetang henlo, lapen monit ason kacheparjan Abang keklem nangji asai kapepleng henlo. Arnam monit ason arje kachepharlo aBang asai ke, monit jongjong a’ok pen Arnam asai kacheklem’i henlo; lake, Arnam monit araje pen Alang sai kangthir klemlo lapen Sobar aphan peremlo. Raje kachepharlo lake Arnam aKarjong ok kacheplang henlo, lake, Arnam monit aok planglo; lapen la monit a’ok pen keklem asai ke Karjong asailo, lapen pirthe monit a’ok pensi la peplenglo, lapen pirthe monit a’ok pensi klemlo. Arnam monit a’ok keman Abang pen anpar majok ta Arnam monit ason kacheparjan aBang asai peplengpi un’e; lake, Arnam monit a’ok kacheparjan aBang, monit jongjong kacheplang aBang – Alangli pen anpar – badu ta kangthir’et asai klem thekthelo. Jongsi, Alangli kevang paphrangcheng ahut, ningkan ingkoi ra sirkep an angbong Arnam jongsi monit araje ason cheparjanje pulote – lapen jongsi Alangli kahache pen kamanghumeme asai klemphit pu asonte, lapen sining arat alam Alangli ningje thekdet pulote, Alangli pirthe athak akengpak nang kachibi pen jongsi pirthe ason doan aphan chedan un’et pulote, anuttin amonit aning kamatha jongsi pangthek un’et pulote – lason amonit atum aphan ke monit jongjong pu ke pu un’edetji, lapen lason araje mumang lapen aok aphan ke monit araje mumang lapen monit a’ok puke pu un’edetji. Kapejok aBang jongsi lason si planglo pulote, Arnam monit ason kacheparjan akedoivet abang ke ingbodetpo. Alangli monit araje mumang pen do-thaklo pulote Arnam monit araje ason kacheparjan aBanglo pu angtheklo; lapen monit atum kethe kiding ason si Alangli ta ok anatthu the-dinglo apot si Alangli ke monit jongjong pu ansose chepaklangdaklo; lapen anpar, Alangli sai keklem pen ajok Alangli ke Arnam Alamlo, Arnam aKarjong lo, lapen si ok planglo pu angthek klangdaklo. Alangli sai along akenang dokok ajok si Arnam monit ason cheplanglo; ihin pen pudamlo pulote, laso angkung asai ke pirthe a’ok pen keklem nangji asailo, lapen monit araje mumang, a’ot-adur pensi kapechokvek nangji asailo. Lake “Lam ok cheplanglo” kopima “Lam ok along si dolo,” pu ketoktang alam kapeplengji aphanlo, lapen lake Arnam batai hini aphong monit ason kacheparjan alam aphuthak chekok pemelo. Jisu ke akai arjon ta kamanghumeme asailok si keklem, Alangli sai keklem kecheng pen ha kijut an monit pu angthek Alanglilong ave, monit akar’i lapen aning kehang lapen monit ason aning kamatha Alanglilong ave, monit aning kamatha along kapachetondunji aphan monit kereng achethe ason Alangliphan akenang ave pusi monit atum kroidam tahai. Alanglilong ke kamanghumeme aning angthin pensi plengset, kaike ta ingtangklong pusi latum mathalo. Alangli ke Arnam lo apot si, monit atum kereng lapen aning kamatha ason Alangli klem nangnelo, monit jongjong atum ansi, lapen monit binong atum ansi monit aning kamatha lapen kedo-kedam ason klemnangchot pusi latum mathalo. Lahei ke monit aning arlo kamatha lapen kaboche alamlo, lapen lahei aning kamatha lapen kaboche alam ke Arnam sai keklemji pu kemang asai pen chetontelo. Monit jongjong atum aning kamatha ke monit atum kamatha angkang ansi ledam unchot lapen matha thekchot; lapen monit a’ok sai keklem ta monit jongjong keklem asai si klem thekchotji; lapen ok pen keklem asai pen si monit a’ot-adur ateng pen kereng pangthimlim unji. Lason monit a’ot adur ateng pen sai keklem si Arnam monit ason kacheplang athe pleng unji. Monit ason kacheparjan aBang jongsi monit arangvo pensi kasonsechot, bonta monit ason mathathe pulote, monit kenangji ason Alanglilong avedetpo, monit apun-achak ateng kedo thekji ke aphi alamlo. Tangte, monit ason mathathepin, bonta monit arangvo ason kacheparjanchot pulote, Arnam monit ason kacheparjan aBang keklem nangji asai koson si pachun thekpo? Monit jongjong aning kamatha pulote monit akereng apun-achak ateng si matha dunji; aning kamatha jongsi apunpe pulote, monit puke pupedetpo. Ehin pen pudamlo pulote, monit ason aning mathathe pulote lake akeso do pu aphanlo, lapen inut Kapejok aBang jongsi dhorom kangthir pen plengsetlo bonta monit a’ot-adur Alanglilong avedet pulote Arnam monit ason kacheparjan aBanglo puke pu un’e detji. Tangte Arnam monit ason kacheparjan aBang monit a’ot-adur avedet pu kosonsi plang unji ma? Tangte Khristo along monit a’ot-adur ave pu kipu ke kachobei alamlo kalima? Monit atum keklem-kedam asai anke monit atum aning kamatha angkang ansi klemchotji. La jongsi ave te, monit atum keklem-kedam bang apunpepinpo; akelok lapen aki’ik, keme lapen kaheno akacheprek anta latum phar thekthe detji; lapen latum along monit kereng nangji a’ot-adur lapen aning-angthin avedetji. Lason thakthak si, Arnam monit ason kacheparjan aBang jongsi monit jongjong ason aning mathathe pulote, Alangli ke monit apun choklimlo pu un’edetpo. Lapen monit akamatha ateng matha thekthe pulote sai kangthir Alangli pechun thekthedetji. Alangli monit atum keklem-kedam ateng pen klem-dam thekthedetji, pirthe athak monit atum angbong kerengdunthek ke aphi alamlo. Laso ajok, Arnam monit ason kachepharlo kopi athe ma, lapen Arnam monit ason kacheplang akedoivet ke komentune pen ingbo’etpo. Alangli monit ason kacheparjan lake monit a’ok pen sai kangthir keklemji aphan; Alangli monit ason aning kamatha pen ajok si monit a’ot-adur ateng pen klem-damlo lapen sai anta cheklembomlo. Alangli pirthe monit a’ok pen Arnam asai keklemji aphan ajoine si monit ason thakthak akamatha Alanglilong dolo. La monit keplang pen jongsi monit jongjong ason ason kamatha ajakong ave pulote, Arnam pirthe a’ok pen ajok pirthe athak sai klemkledetji apotlo, lapen Alangli keklemji asai anta pleng un’edetji apotlo. Monit ason kacheparjan a’Arnam monit aning kamatha ateng si mathalo tema, bonta Alangli sai ke monit aning kamatha ateng aketer pen si plengsetlo lapu kali; Alangli monit jongjong aning kamatha ateng pensi sai klemlo, monit a’ot-adur ateng kedo kethakji aphan pu kachisiktang ateng pen, bonta monit aning kamatha ateng pensi klemji lapu kali. Alangli ok pen aning kamatha ingtuipik sitame, Alangli sai amo ke kamatha lapen kapathedam pen pahenodaklo lapu kali. Ehin pen pudamlo pulote, Alangli sai keklem ke monit akamatha penle keklem kali, bonta monit ason cheplangsi Alangli kamatha lake kangthir’et pensi plengsetlo. Alangli keklem asai anke Alangli kapeplengvek nangji asai saidelo, lapen isinat ta Alangli phu pen mathavong asai kali saidelo. Bisar alam, keso aphan kapeme, hi’i aphan kiphlung, lapen thengparpan athak apran kachipi lake Alangli monit aning ason kamatha ajok si planglo lapu kali, lapen monit ason aning kamatha abang pu ason te laso asai papleng un’e. Lason thakthak si, pini arni kacheraidetji asai along sitame, Arnam monit ason kacheparjan aBang si klem nangpo, bonta lake monit aning kehang pen keklem asai kali, lake Alangli akangthir’et a’ot pensi laso asai pechun nangji, pima laso asai ke monit a’ok pen keklem kapechun’un asai kali. Laso ajok si, Arnam monit ason kacheparjan aBang ke monit aning kamatha ason ben man nangkok, monit a’ot-adur ason Alanglilong do nangkok lapen apun choklim nangkok. Lake Arnam monit ason kacheparjan aBang asai akedoivetlo, amonit ason kacheparjan akedoivet arajelo.

Jisu sai keklem pangchengche aphrang, monit jongjong ason si Alangli renglo. Majok ta Alangli ke Arnam lo pu than thekthe, majok ta Alangli ke monit araje ason kacheparjan a’Arnam lo pu chinine; monit jongjong pusi monit atum Alangliphan chinichot. Alangli monit jongjong ateng kedo-kethak, lake Arnam monit ason cheparjanlo, lapen Kanghon-Kangjinso aKai ke monit ason kacheparjan aBang asai lapen Karjong asai kali pu cheklangdaklo. Arnam aKarjong ke monit a’ok pen cheraphetlo, lapen Arnam arje kachepharlo akai ahut ke, Karjong asai an Alangli ok pensi klempo pu angtheklo. Monit jongjong ason aKhristo pulote Karjong pen keplengset, monit jongjong a’ot-adur pen kasonse, apun kechoklim lapen monit aning ason kamatha amonitlo. “Ahok Kacheman” pulote Arnam monit kacheplang helo, Karjong ok kacheman; lapen joike pen pudamlo pulote, Arnam jongsi Amena monit jongjong araje ason renglo pulote, lapen laso pen ajok Alangli sai kangthir klem’ilo pulote – kacheman mate kacheparjan puke lahenlo. Arnam monit ason kacheparjancheng ahut, Alangli keso aphan kapeme lapen hi’i kiphlung asai klemkledet ta chok, kopima Alangli sai ke monit aphan pap pen kelang henlo. Monit akhei aphan pap pen kapejokji aphan, Alangli ning kiding lapen kangjinsothek pen plengset nangkok. Alangliphan thengparpan athak pathithe aphrang Alangli keklem asai lake keso aphan kapeme lapen hi’i kiphlung henlo, lapen lahei asai lake monit aphan pap pen lapen kahijim meme ason pen kapejokji aphan pu kethanmek angtheklo. Kopima halaso ahut ke Kanghon-Kangjinso aKai lo, lapen keso atum aphan kapeme asai ke Alangli klem nangkoklo, laso pen ajok kamanghu meme asai ta klemlo, lapen lahei ke kangjinso akai ahut kapeklang nangji asonlo – kopima kangjinso akai ahut lake kangjinso kipi, ning kangsam, ning karong lapen hirjume kipi pen keplengset nangji akai lo, lahei ke monit atum Jisu aphan kekroi angtheklo. Pudamlo pulote, keso atum aphan kapeme, hi’i atum aphan kiphlung, lapen monit atum aphan kangjinso kapeklang ke Kanghon-Kangjinso aKai ahut Jisu monit a’ot pen keklem un asailo, lapen lahei ke Alangli ok along Karjong asai keklemlo. Bonta Alangli lason asai keklem ahut, Alangli monit ateng si renglo, lapen monit ason akereng pen anpar akaprek ke chepharloledetlo. Alangli keso heihui le pame sita, monit aot-adur pen si Alangli bochelo, lapen monit jongjong ateng si do-thaklo. Arnam monit ason kacheparjan akai ahut Karjong keklem nangji asai an monit araje pensi klemlo pu ne kipudam athe ke, Alangli ajat asai le klem sitame, Alangli pirthe monit a’ok pensi klemlo. Bonta Alangli sai keklem pen ajok, Alangliphan ke pirthe a’ok pen bocheveklo pu monit atum tin damde, kopima Alangli pirthe a’ok pen ajok si kamanghumeme asai klemlo, lapen ahut pen ke pirthe a’ok pen kapepleng un’e asai ta Alangli klem undet titi ajok. Kalang, lahei ke Alangli keklem nangji asai klembom ahut keplang alamlo, bisar alam Sobar Alangliphan ni phlikep an asat kelang lapen inglong angsong Alangli raje kachepharlo heihui keplang aphuthak alam. Lasi, Jisu pen ajok Arnam monit ason kacheparjan asai chun pamemelang, bonta ajahak ansi chunchotlang. Alangli sai keklem pangchengche aphrang monit ason ben kedo-kethak lahei ke ajat ahin pen le langdam sita thangnat akeprekjek ave. Alangli sai keklem pangchengdet aphi anke, monit ason kereng lake arangvo chot asonlo. Alangli sai ke kangthir’et asai si kapeklang apot si, monit aok keklem’un ajakong pen litchotlo. Kopima, Arnam monit keplang ke monit aok-avi binong pen ke cheprekdaklo. Kalang, Alangli ok kereng nangji aphan kecho-kijun ahormu, pe-ri, mek kejang, hem-rit, lapen kadokave amonit atum kenangji ason anke Alangliphan ta akenangsotlo, lapen monit ason si Alangli mathalo, bonta Alangli sai keklem ke prekdak lapen manghumeme pu anchotlo. Alam abang ke, Alangli ajat le klem sitame, Alangli monit jongjong ason si do-thaklo, lapen lason si Alangli sai cheklembom ahut ta, Alangli kachini’un ajakong ta apun choklimlo, Alangli ning kamatha anta klardak, lapen monit jongjong pen anpar klarmulo. Arnam monit ason kacheparjan aBang pulote lason aning kamatha lapen kachini’un ajakong do nangji, kopi asai kangthir keklem along Alangli pirthe monit araje, kachini’un ajakong plenglim lapen aning kamatha klardak aning pensi klem nangji – ansi Alangli monit araje pen sai kangthir klem peme thekji. Jisu ningkan thomkep ra kethom an ajak pirthe kedo’un angbong, Alangli monit a’ok lapen araje pensi dothiplo, bonta Alangli ningkan kethom ra achitim angbong Alangli sai kacheklem ajok, Alangli ke ajakong thepik lapen, aphrang pen prekdak lapen manghu meme pusi monit atum mathalo. Ahokpet ke, Jisu, Alangli sai keklem pangchengche aphrang lapen pangchengdet sita monit a’ot-adur ateng si do-thaklo; Alangli akai arjon ta monit ateng si dolo, bonta sai keklem pangchengche aphrang lapen pangchengdet angbong akacheprek kedokok ajok si, la ingdeng hini angbong Alangli ok along akacheprek alam klanglo. Monit atum ajat le matha pu sita, Monit ason kacheparjan a’Arnam ke Amena ateng si chedothiplo, akai isi monit ateng do si, monit a’ot-adur pen araje pensi plengsetlo. Alangli sai klemnon klemklenon sita, Alangli pirthe monit ason kedo-kethak alam aphuthak ke, papreidak un’elo, kopima monit aok akedoivet ke a’ot-adur henlo. Jisu Alangli sai keklem pangchengche aphrang, Alangli ot-adur ke monit jongjong ateng si dothaklo, lapen monit atum keklem kedam ateng pen klem damlo; Alangli asapsonat ta prekjek ason dode lapen kamanghumeme asai ta klemkle. Halaso ahut ke, Alangli Arnam aphan kardom aBang inut amonit jongjong ason chotlo, Alangli kihung ason ke ahokpetlo, lapen kadokave anpar ta ahok muchotlo. Laso ajok si Alangli monit aot-adur pensi plengsetlo pu cheklangdaklo. Kopima Alangli sai keklem pangchengche aphrang ke ajat asai ta klemkledetlo, lapen majok ta Alangliphan pangthek un’e, Alangli ke kaprek amonit atum pen prekdaklo pu majok ta than thekthe, kopima, Alangli kamanghumeme asai isinat ta klemkle, lapen Arnam keklemji pu asai isinat ta pechunche. Bonta, Alangli sai keklem pangchengdet aphi anke, monit arangvo pen reng’i chotlo lapen monit ateng si dobomlang, bonta Alangli Arnam keklemji asai pangcheng’etlo, Khristo keklem nangji kapangcheng lapen monit jongjong atum, monit a’ok-avi pen kapepleng un’e asai pangcheng’etlo apot si, monit jongjong aot Alanglilong ave lapen Alangli ke monit binong kali, bonta monit apun kechoklimle aBanglo pusi monit atum pu rintilo. Bonta lason akachini ke kechokche thektiklo, kopima monit atum Arnam monit ason kacheparjan kopi athema chininedetlo. Monit atum kachinidam kechokchedet ke Arnam monit ason kacheplang asai ke kangthir’et asailo, lapen monit jongjong a’raje along si paklanglo pu alamthe pen ajoklo. Arnam ke pirthe monit aok pensi chepindenglo, Alangli pirthe a’ok arlo si dolo, lapen Alangli monit a’ok pen ajok Alangli sai keklem’i ke monit a’ot-adur ateng kedo kethak along si chepatujoilo. Laso ajoine si, Arnam ke kangthir pen plengsetlo lapen monit aning-angthin ke avelo pusi monit atum kroithiplo.

Arnam Alangli monit ason kacheparjancheng ahut ke, raje kacheparjan asai chepaplengplelang; Alangli isi angdeng lake Arnam monit a’ok pen kapeplengvek nangji asai ansi paplengchotlo. Lasi, monit ason kacheparjan asai kachepechunji aphan ke, Arnam puthot monit a’ok along nang chiruithu tanglo, lake, Arnam alam monit jongjong lapen monit a’ok arlo kapelutji aphan, laso ajok Alangli pirthe a’ok pen keklem kapetangtelang asai kapetangji aphan. Pudamlo pulote, puthot ok ason kacheparjan abang kechengsi ahut pen ansose doivetthu muchotlo, lapen aphrang pen mute non si monit apun choklim muchotlo, bonta non abang ke monit binong asonlo. Laso ajok si, non aphi kacheparjan abangphu ke aphrang kacheparjan Abang pen anpar kisung phomuchotpo, bonta lahei akisung ke Alangli pirthe a’ok pen sai keklem ajoklo, lapen kachobei amonit atum ason akisung kepho pen chinglitlepinlo. Lapen Alangli ok lapen aot-adur ta la pensi vanglo. Kopima, Alangli sai keklem anta monit keklem ateng si klemlo apot si, laso aok ke ansose kisung chechak nangkokpo. Pirthe a’ok apun-achak koan si kechoklim ma, la an si Alangli sai along kisung phopo. Arnam asai ke pirthe monit a’ok pensi klemlo, lapen prekjek pen le keklem kali. Kopima Alangli ok ke monit ateng si plenglimlo lapen monit aphan kapejokji si arpu en nangkokpo, laso ajok prekjek kamanghumeme a’ok pen mute Alangli si ansose kisung phothu muchotpo – lapen kisung anta Alangli ok ke plenglim pu along pensi nangklanglo. La monit ason kacheparjan banghini atum Alanglitum asai keklem ahut kisung kepho kachetong angbong, inut ke ok anat kacheparjan akedoivet theklonglo. Monit apun ason ko’an si kechoklim ma, la an si Alangli sai kacheklem ahut kisung phopo, monit atum aning koan si kamatha kahenoma, la ansi Alangli phuthak pherememelo. Bonta, monit aok apun koan si kechoklim ma, la ansi monit araje mumang lapen kachini’un ajakong ta kedolo, lapen la ansi Arnam monit a’ok pen sai keklemji aphan kichun ajakong dopo. Thengparpan athak kapathi aBang ke Jisu henlo, Alangli pran pen ajok pap alar charklidetlo; monit a’ok lapen a’ot-adur pen ajok si Sobar aphan peremdetlo lapen thengparpan pen ajok monit aphan pejoklo. Lason thakthak si non batai hini aphong Arnam monit ason kacheparjan Abang ta sobar aphan kaperem asai klemlo. Monit ason apun choklim abang ansi kehai aron chedan haichotji lapen hakhi ason arjapkluk haichotji. Lake pudamlo pulote, Arnam monit ason kacheparjan pen ajok si monit atum kehai aron kachedan ale longchotji, lapen prekjek akamanghumeme asai pen lapen kapeklang pen kali. Arnam monit ason kacheparjan abang asai ke lam kaningje henlo, lapen monit aphan aning cheraidet si pachoklimpo; ehin pen pudam lote, karjong asai ke monit si cheplanglo, lapen monit keklem nangji asai ke, lam kaningje henlo, lapen ajok monit aning arlo cheraidet si, paklangdakpo, pechoklimpo lapen monit a’ot an pavirdetpo. Lasi kachepahai asai keklem pensi Arnam monit ason kacheparjan asai pleng pemepo. Pap pen kapejok asai lake monit ason kacheparjancheng ahut asailo; bonta ok pen kachepahai asai keklem abang si monit kacheparjan asai anke pachun pamepo. Pangthek damlo pulote inut ke pinso inut ke arloso, lake Arnam monit ason kacheparjan apun kapechoklo, lake Arnam aphan monit atum kamathatap kepavirji aphanlo: Arnam ke pinso lapen arloso ta man thek, lapen akedoivetnei ke, Arnam ke pinso ta kali arloso ta kalilo. Alangli pinso lapen arloso aphan ta pinchonglo, lapen Alangli ingno ke pinso-arloso pu keplak avelo. Laso asai angkung ke, Arnam kamanghumeme asai klemkle, lapen lam kaningje pensi sai angdeng pachunji. La kopi apot loma pulote, non adihu Arnam monit ason kacheparjan abang asai keklem ke keso aphan kepame, hi-i kiplung lapu kali, bonta lam pen ajok monit aphan keparem, la kopi loma pulote ok ason kacheparjan abang nonke lam kaningje pensi monit aphan parempo, bonta keso aphan kepame lapen hi-i kiplung asai pen kali. Alangli monit aot-adur pen ke kamanghumeme asai keklemji aphan kali, keso aphan kepameji kali lapen hi-i aphan kiplungji kali, bonta lam kethanji, lasi non batai hini aphong monit ason kacheparjan abang ke kecheng ahut kacheparjan aBang anpar ansose monit jongjong ason cheplanglo. Monit ason kacheparjan lake kachobai asai kali pu monit atum chinilo; bonta non aphong kacheparjan abang ke Jisu kacheparjan ason pen prekdaklo, lapen latum isivet kalilo. Jisu ke monit a’ot-adur, lapen monit jongjong ason cheplanglo, bonta Alangli ke kamanghumeme asai klem thekdetlo. Non aphong kacheparjan abang ke, monit amek pen kamanghumeme asai keklemthek longledetji, keso ta pememe lapen hi’i ta plungpledetji, talo athak ta damde, lapen ni phlikep an an kihum puta avedetji…. Alangli Jisu keklem asonthot ke klemkledetji, bonta, Jisu ason alangli ok ke prekdaklo pu aphan kali, bonta keso atum aphan kepame lapen hi’i kiplung ke Alangli keklem nangji asai kali. Alangli sai keklemji patepekpe lapen amena asai ta chephangnone. Alangli lam kethan pensi monit aphan aning pachelarji apot si, Alangli kamanghumeme asai klem ma klemklema puke lang nangnelo, kopima Alangli ke raje kacheparjan asai kepajutji abanglo. Pini arni nang ketheklong Arnam ason kacheparjan abang ke monit binonglo, lapen Alanglilong keprekjek ason thangnat ta avelo. Alangli kaprek amonit asonsi a’ok ta rengnolo lapen kecho-kijun, pe-ri akenang ta dolo; Alangli ke monit binonglo. Non apor ahut jongsi, monit ason kacheparjan abang kemanghumeme asai klemlo, keso pamelo, hi-i plunglo, mate lamthe isi penta apran armut undetlo pulote, Alangli kachepahaiji lapen monit aning kelarji asai koson si klem unpo? Koson si kekroikre adet amonit atum along sai keklem longpo? Keso atum aphan kepame lapen hi’i aphan kiplung ke Kanghon-Kangjinso Akai ahut asailo, lapen lake monit aphan pap pen kepajok asai keklem kechengsi asailo, lapen non ke Arnam monit aphan pap pen pajok etlo apot si, lahei asai Alangli klemklelo. Mo kijut apor ahut jongsi, “Arnam” Jisu araje asonthot nang cheklanglo pulote, keso ta pamedet, hi’i ta plungdet, lapen monit ajoine thengparpan athak ta sakthudet pulote, la “Arnam” ke Baibel along ketoktang ateng pen chinglitpiklo pulote monit atum kekroiji aphan joipikji, bonta lake Arnam aKarjong pen keklem asai kalidetji lapen karjong langno keklem asailo. Kopima, Arnam ke keklemtang asai ke puthot klemthu voivelo. Lasi, Arnam batai hini aphong monit ason kacheparjan ke aprang abang pen prekchetlo. Kijut arani ahut ke, Arnam monit araje pensi monit aphan aning larphitji. Alangli keso pamemelo, monit ajoine thengparpan athak thithelo, bonta monit araje pen lam si thanchotpo, lapen monit araje pensi monit aphan aning larpo. Lake Arnam monit ason kacheparjan binong abanglo; lapen lason amonit si Arnam monit araje pen keklemji asai pachun unchotji.

Non apor ahut Arnam monit ason kacheparjan abang kisung chechakbomlo mate sai cheklembomlo sita, Alangli kacheparjan nangkok alam aputhak asai kepatangji si klemlo. Arnam ke batai hini ansi raje cheparjan unchotji. Kechengsi ke pinso, lapen non adunthu ke arloso, laso pen ajok Arnam monit ason kacheparjan asai monit aning arlo jut pamelo; la anchot kali si, la kacheparjan banghini atum ta Arnam asai monit a’ok pen keklem nangji asai pachun etlo. Kechengsi ke, Arnam monit ason kacheparjan Abang monit ason cheparjan si sai chepatanglo. Non aphong abang ta, Alangli monit ason cheparjanlo, bonta kacheparjan athe kopima abang ke prekdaklo: arnukchet, lapen alangli sai keklem ingchingchetlo. Non aphong Arnam puthot monit ason kacheparjan ke monit kacheparjan kopi athe ma pu aphuthak sai nang kepajutji aphan. Arnam jongsi sai angkung an pajutlap lote, monit ason kacheparjan nangkok athe, lake, Arnam pirthe monit araje pen sai keklem, lata jut pamepo, lapen laso aphi lote monit araje pen sai klemklelo. Pudamlo pulote, non pen anparke Arnam puthot sai kepachunji aphan monit ason cheparjan thuthelo. Monit aphan kepajokji lapen monit akhei aphan apun kepachoklimji si Arnam monit ason cheparjan chotpo. Sai keklemji aphan monit ason kacheparjan ke, Alangli ke monit, monit jongjong – bonta pirthe athak recho cholong lapen sobar aphan paremdet’un, monit aphan pap pen pajok’un lapen monit aphan aning pachelarphit’un pu Sobar aphan chepaklanglo! Sobar kemangdam ke monit aning arlo kachobai alam kethapji aphan, bonta Arnam asai ke monit aphan kepajokji si klemlo. Sobar ke monit aphan aling kave aherang along si benglo, bonta Arnam ke pajoklo. Sobar ke alangphan ardom nangji pulo, bonta Arnam ke ajakong pen Alangli rat pacheplanglo, kopima Alangli ke pirthe kithip aHemphu lo. Lahei asai ke Arnam monit ason kacheparjan batai hini pensi pleng unlo. Akedoivet pen langdam lote, Alangli ke pirthe aok lapen kangthir akachelang angtheklo, lapen monit jongjong ason planglo. Lasi, Arnam monit ason kacheparjan Abang jongsi ave pulote, Arnam ta monit aphan kepajokji asai pleng un’e detji apotlo, lapen Alangli ok along jongsi monit a’ot ateng dode pulote, Alangli pirthe aok pen sai keklem asapsonat ta chun un’edet jilang. Arnam monit ason kacheparjan akedoivet ke Alanglilong monit aot-adur dovek nangji; kali pulote Arnam monit kacheparjan pen keklemji pu kemang asai pen kachetonte thedung binongpo.

Kopi apot si Arnam monit ason kacheparjan asai Jisu pen ajok plenglim kalilang pu ne kipu damlo? Atheke Lam monit ason kacheplang ingthimlimle detlo. Jisu sai keklem ke pirthe a’ok pen isinat angdeng ansi pachun chotlo; Alangli monit aphan pap pen kepajok asai ansi klemchotlo, bonta monit aphan Alangliphan kepakroipetji asai klemkledetlo. Laso ajoine si, kijut apor ahut Arnam non ephong monit ason cheparjanthulo. Laso asai angkung ke pirthe monit a’ok pensi klemlo; lapen monit a’ot-adur pensi klemlo, monit pen cheprekjek pu kalidet abang si keklemlo. Ihin pen pudam lote, Arnam ke monit binong ason si cheplangdetlo; Alangli ke Arnam lo, bonta monit binong, ok binong, sai keklem Abanglo. Monit amek pen kachechar ke monit binong lapen thangnat akeprekjek ta avelo, monit jongjongchot bonta sining alam an ningje theklap, kamanghumeme asai klemkle lapen paklangkle, ihum ahem thepi along isi adhorom atum arlo alam aphuthak ahok alam kethanpi ke aphi alamlo. Monit atum angno ke, batai hini aphong Arnam ason kacheparjan abang ke aphrang kacheparjan Abang pen cheprekdak binonglo, la anlo, latum angbong thangnat ta kachinglit avedetlo, lapen aphrangsi Abang keklem asai non aphi ke theklongle detlo. Batai hini aphong monit ason kacheparjan abang ke aphrangsi aphong kacheparjan aBang pen cheprekdak pu sitame, latum kevang adim prekdaklo lapu kali. Latum kevang adim isivet ma kalima puke Alangtum pirthe a’ok pen sai keklem pensi cheklangdaklo, lapen Alangtum arangvo pen kali. Phurun kethom an Arnam sai keklem angbong, Arnam batai hini an monit ason cheparjanlo, lapen batai hini ta Arnam kai akimi ingpulo, sai akimi klemlo; lapen la batai hini monit ason kacheparjan ta isivetlo. La banghini atum ta elongvet adim pensi vanglo pu monit amek pen pangthek un’elo. Lake monit amek pen lapen monit aning pen kamatha un ajakong ave. Alanglitum araje akedoivet aphan lang lote, Alanglitum ke isinatlo, pima Alanglitum isinat aKarjong pensi vanglo. Alanglitum elongvet adim pensi vangloma kalima pu kapangthekdam ke Alanglitum kahache adim kelang pen kali, bonta Alanglitum sai kangthir keklem kepaklang pen. Batai hini aphong monit ason kacheparjan abang ke Jisu keklem asai anke klemkle, kopima kachingrum atum along le Arnam asai kachiriphet lapu kali, bonta abataitin ta tovar kimi ingpu bomlo. Batai hini aphong kacheparjan abang ke monit aning arlo aphrangsi kacheparjan Abang alam kethan kaparnukthu mate kapatengneji aphan lapu kali, bonta pachingbar si kepachoklim asai klemji, lapen Arnam aphan ansose kachiniji aphan si monit along sai klemji, lapen monit aning arlo aron-atang kedoan kepavirji aphan, lapen Arnam aphan monit atum kitintap araje monit aning arlo pen kevarji aphan. Arnam sai keklem amo angkungtin along monit aphan Alangli phuthak kachinilapji aphan monit atum along jakong ave; angkungtin ta asapsap si chini unchotlo, angton pen kali. Arnam amena aot-adur plenglim lapen choklim pensi chepaklanglo sitame, monit atum kachini un ajakong jumhek ajok, Arnam aphan alang kachini ta plengpledetlo. Arnam a’ot-adur koan ahir ingtang ma puke monit atum alam penke ningje’i move; tangte, koson si ingkung isivet angbong le Arnam aphuthak kachinipet unpo? Alangli pirthe monit araje pensi sai klemlo lapen monit a’ot-adur pensi chepabinlo, lapen Alangli kangthir’et ason kachepaklang pensi monit atum Alangliphan chini unchotlo, Alangli monit arangvo pen apot kali. Arnam monit ason kacheplang ke Alangli sai keklem pen ajok Alangliphan kapachiniji aphan, lapen ingdeng hini asai amo ta chinglitledetlo. Lason pen ajok si Arnam monit araje pen sai keklem aphuthak chini pame longpo, lapen isivet araje aphan chini chot pu kalidetpo. Monit ason kacheparjan atum banghini ta cheprekdak pu sitame, Alanglitum akedoivet, Alanglitum asai kepangcheng adim, anta isivetlo; Angkung cheprekjam asai keklemji si latum dolo lapen Alanglitum keklang aove ta cheprekjamlo. Ajat le pu sita, Arnam monit ason kacheparjan atum akedoivet lapen keplang adim isivetlo – lake ahokpetlo lapen badu ta chekrongkredet un’elo.