Kosonsi Arnam Aphan Alang Kamathathap Angkang Kibipikok Amonit le Arnam Kacheklangdak Kedeng Unpo?

Arnam asai ke kaiketa aphrang dambom, lapen Arnam asai akemang le chelarlelang pusitame, Alangli keklem adichi ke kaiketa chelarbom, ladak kipudamji puke Arnam aphan kekroi atum ta chelarvoi, latum ta. Arnam koan si sai keklem, hala ansi monit atum Arnam aphan kachini ingthimpo. Kachinglitjot kachelar ta dobom, latalo, Arnam asai athengno monit akun along. Bonsitame, Arnam asai ke jut un’epin si kachelarvoi apot si hala Karjong Kangthir aphan kachinine atum lapen halahei ahokpet alam kachini keprek si amonit atum ke Arnam aphan kekhamkhe chengpo. Mantune ta Arnam asai monit kamathap pen kacheton ave, athe Alangli sai ke kaiketa akimiver lapen matune ta banbe, lapen mantune ta Alangli mantune ta Alangli sai aban ke ruithuthe, bonta alar ke kaike keklemkle asai pensi aphrang dambom. Arnam ke Alangli sai chiruithuthe apot si, lapen monit atum ke chekhang un’epinsi Arnam pini keklem asai aphan Alangli kedamtang arni keklem asai pensi kangsai, lake Arnam aphan akimi akai along angdengtin asai kacheklemji aphan sungpik anlo. Monit atum along ke apar akung ongchet! Alang ke alang kamunthi along apar abarim kekroi ongchot! Majok ta Arnam asai chinine, sitame anuttin ta Alangliphan angkang selampidet. Alang Arnam aphan ke’o lote, monit ke achethe, ahokpet ason lapen Arnam ahirjume kachepangbolo, sitame alang chethe ta dengde mate ahokpet aphan ta dengde, la ansose si kedengdelang monit akhei aphan Arnam kipi ketheparpik ahirjume. Kadokave amonit ta Arnam aphan long ingtung, sitame alangtum Arnam asai along kachelar kedo chechak un’e. Arnam asai kimi aphan kedengde atum Arnam asai ke larno pusi kekroi, lake kaiketa ephong ateng arjapthip pu. Alangtum kekroi ateng ke, kijutjepin apor aphan kejok kachepalongji ke aron kekroi pen anchotlo, lapen alangtum apap pen ningchirui lapen chikobirtik anke, Arnam akemang kaiketa paplengpo. Alangtum kamatha ke Arnam ke aron arlo si Arnam chotji lapen thengparpan along Arnam aphan kesak ke monit apharman; lake alangtum kamathalo, lata, Arnam ke Baibel aphan lit nangne lapen lit un’e pu. Lake pudak melo alangtum kamatha si alangtum aphan akeban aron along kephanthip lapen kithitang aron along kesakhet. Lapen ansose akekroi ta dolang Arnam asai kimi ajat pusitame, lake aphrang kethanmek alam pen langpangbarvek nangji, lapen lapuson asai angdengtin along, Alangliphan “hokpet” aning pen kekroidun atum Alangli kapaklangji ason pathekdun nangji; kali pulote, lapuson asai ke Arnam asai cheman thekthe. Arnam aphan kachinilong lake monit aphan kejoike asai kali mandetlo. Monit atum along kedo kepreksi aning lapen methang aphan ardi kachipi kachedan a’ot lapen methang aphan kacheparoka a’ot pen abat keponthusi, lake alang Arnam asai kimi aphan kedeng ansose si kisungthu chemanlo. Monit mantune ta Arnam asai aphan kamatha peme apor kachipi puta ave, mate halaphan chepabidun pen kedengdun puta ave; alar ke, alang Arnam pen kacheplang ason lapen keja kachonghong ahut laphan kelangmo a’ot si chepadorong. Lake Arnam aphan kachedandong lapen kekhamkhe atum a’ot kalima? Kopusi lason amonit atum le Arnam pen kedengpon kelongji?

Jisu pulo Jehovah asai ke Kanghon-Kangjinso Akai anung dodamkoklo, Ne pini kipu asonsi, Jisu asai ta anung dodamkoklo pu. Jongsi Aron Akai ansi dochot Kanghon-Kangjinso Akai avedet, pulote Jisu aphan thengparpan along apran en’edetji lapen monit akhei doan aphan pap pen pajokjedetji. Jongsi Aron Akai ansi dochot pu asonte, monit akhei mantune ta pini arni an kahelo nanglejima? Phurkimo ke aphrang dambom, lapen phurkimo ke Arnam asai amena keplang aron kalima? Lake Alangli somindar adang monit aphan kelangchari aphan le kepaklang kalima? Phurkimo ke aphrang dambom, lasonsi Arnam asai ta dambomlo. Arnam akemang kaiketa chekirlabom. Alangli ningkan suri-throk aphan ke isivet angdeng asai along dover thekthe, atheke majok ta chini, Arnam ke kaiketa akimi lapen mantune ta banbe, lapen Alangli thengparpan along apran kedam asai asonson ke aphongphong klemver un’e, thengparpan along ephong, phongni, phongthom…. Lapuson kamatha ke therak memelo. Lapuson kamatha ke ingnek memepo. Arnam isivet asai klem lethot-lethot puke vive; Alanglisai ke kaiketa chelarbom lapen kaiketa akimi, Ne le nangtum aphan lamthe kimi pen nangkangki lapen arnivang akimi asai keklem asonthotsi. Lahenlo Ne keklem asai ke, lapen akenangsot alamthe ke “akimi” lapen “jakong kethe asai.” “Arnam aphan ke kirla un’e, lapen Arnam ke kaiketa Arnam po”: lake ahokpet chenam; Arnam akedoivet ke chelarle, Arnam ke kaiketa Arnam lo, lapen Alangli ke mantune ta Sobar manme, bonta ladak pen ke Alanglisai ke Alangli tiri ateng dambon lapen chekirla un’e kali. Nang Alangliphan chekirla thekthe pusi pangdaklo, bonta kosonlo, tangte, nang than pajirmi thekjima Arnam ke kaiketa akimi lapen mantune ta banbe pu? Arnam asai ke chingtontepin pensi kangdang lapen chrkirlaponvoi, lapen Alangli kemang ke chingtontepin pensi kapaklang lapen monit aphan kapachinipon. Monit atum Arnam asai chetongbom ahut, alang kun jutjepinsi chelarbomji, alang kachini ason talo. Konat pensi, tangte, lahei kachelar nangketet? Lake kaike-kachekirlavoi Arnam asai along pen kalima? Jongsi monit akun chelar tahai pulote, kopi apot si monit atum Nesai lapen Nelamthe aphan ta kachekirlavoi longledet? Neta monit atum kisik angkang along dodun nangjima? Laso along, nang lamthe kachipidun bor’i lapen kachehotang alamrai le asai ke’en kalima?

Alangli thengparpan along apran kedam aphi, Jisu hala kacharlidun atum aphan cheklanglo lapen pulo, “Ne nangtum along Nepo aseme nanglolo: bonta nangtum Jerusalem alongri along kedo ajir padingtha, mo nangtum aphan akangtui pen jakong nangpaledet apor an.” Nang chinima lahei alamthe kosonsi than pajirmiji? Nang, nonke, Alangli jakong angthek chelongloma? Nang chiniloma “jakong” pu kopi aphansi kipu? Ahokpet Akarjong monit atum along kijut arni malom si pajirji pusi Jisu kapachethak. La kijut arni ke non henlo; nang chinima kosonsi ahokpet Akarjong lamthe kapaklang? Konat ahokpet Akarjong kacheklang lapen sai keklem? Kethanmek abang Isaiah ketok kethanmek akitap along, laso along ke Kachejok Alo Kimi apor ahut Jisu pu amen a’oso nanghacheji pu alam ketokpon ave; hadak ke inut Emmanuel pu pinso oso nanghacheji pu ansi ketok dochot. Kopi apot si “Jisu” pu amen kisungpon avedet? Kachejok Alo Aban along ta nahok ta klangdunde, lasi pipot, tangte, nang Jisu aphan kekroibom? Chenam penta nang Jisu aphan nangmek pen ketheklong ansi Alangliphan kekroi kechenglo, lasonma nang? Mate nang kapaklangdak kedengdun aphi ansi kekroi kechengma? Arnam lapuson akanghon-kangjinso nangphan nangpiji puhe? Alangli lapuan akethe ahirjume nangphan nangpiji puhe? Nang Jisu aphan kekroi atiri kopilo? Pini Arnam ta ok-vi chemandetlo pu kopi apotsi nang kekroilo? Kopipot si nang Arnam kapaklang kave ke Alangli ok-vi pen monit nangcheparjeje pu kipulo? Arnam Alangli sai chechengche aphrang monit atumphan nangparju nangjilang puma? Alangli latum pen alamrai en nanglang puhe? Isaiah kapachetak tekang ke chainong aroi arlo longhong along inut pinso oso nanghacheji pu anvet; alang matuneta Mary henlo Jisu aphan mahang pathekji pu alam thanmekme. Nang abinong’etke kopi aphuthak si Jisu ke Mary along pensi mahang nangkethek pu akekroi atiri kacheselamlo? Nang kekroi ke chingvuinok chenamlo puke kalilang! Ajahak atum kipu ke Arnam amen ke chelarle. Kopipot, tangte, Jehovah amen Jisu kacheplangdet? Messiah vangji puke kethanmek dolo, lasi kopipot si Jisu pu amen monit kevanglo? Kopi apotsi Arnam amen kachelarphlot? Lapuson si ajir dingklui aphrang le kedengpon kalima? Arnam pini arni akimi muchot asai klem thekthedetloma? Patumi asai parlimphit un, lapen Jisu asai tame Jehovah asai along pen chengdunphit un. Un’ema, tangte, Jisu asai ta kaprek asai pen angthun kedengdun? Jongsi Jehovah amen ta Jisu pu chelarphit un, tangte Jisu amen ta chelarphit un’edetjima? Lahei kadokave ta kechokche kali; lake monit atum kamatha inglang ongchot apot. Arnam ke kaiketa Arnam si chedothotpo. Alangli sai ajat le chekirlapon sitame, lapen Alanglimen kosonsi kachelarbom loma langdamdedet sitame, Alangli kun lapen kachini ason ke kaiketa chelarle. Jongsi nang ke Arnam aphan ke Jisu pu amen pensi hang unchotji pulote nang kekroi ke apar angkang bi ongchotlo. Arnam amen ke kaiketa Jisu pusi doverpo pu nang ningjethip haijima, Arnam ke kijutjepin lapen kaiketa Jisu pu amen pensi dambompo pu, lapen lake mantune ta chelarlelo pu ningje pangtangkring haima? Jisu pu amen lale Kanghon-Kangjinso Akai asai keklem abang kijutji akai along ta sai keklemji abanglo pu nang jongthip pen ningjethip haijima? Komatsi puthekji Jisu akanghon ta akai aphan kijut an ponthekji pu? Jongsi nang laso aphuthak klardak kachini duredet, pulo tangte nang ke birta keme kapachetakji aphan anchot le apun kavedetji kali, bonta nang ke nangmethang amat si karjap pathir thekthedetji. Mo arni nangkele ahut nang halahei nim abangphu atum doan akisung pajutlo lapen alangtum nangkejaponthap alam dengdunde tanglote, lake ahakhipo nang ke chenam-chenum si bangso asai angdeng chini pemelo lapen ing’arjir anta kahonthe-kamanghudam ave. Jongsi nang alangtum nangkejathap alam pen chepajokdun thekthe, tangte alangtum nangphan me-heno asai nangpadengpo lapen nangnong nangpajunopo. Lake therakmeme kalidetjima?

Jihudi atum ke Kachejok Alo Aban porhi’etlo lapen chainong along pinso oso mahang nangthekji pu Isaiah kethanmek alam chini. Kopipot, tangte, kethanmek alam kachini peme tangdet le, alangtum Jisu aphan adai ke’enthudet? Lake alangtum kachedandong a’ot lapen Karjong Kangthir aphan kachinine apot kalima? Halaso apor ahut, Pharisee atum Jisu asai ke hala kethanmek pinso oso alam alangtum kachini pen cheprekdak, lapen pini arni monit atum Arnam asai kedengde athe ke monit nangcheparje a’Arnam asai doan lake Baibel ateng kalidet. Alangtum Arnam aphuthak kachedandong atiri ke tangdet isivet kalima? Nang dengjima, thangnat patartepin pen, Karjong Kangthir asai doan? Jongsi lake Karjong Kangthir asailo, pulote lake kechok alangroisolo, lapen thangnat kahonthe chepavepin pensi nang dengdun nangpo; nang chohum lapen chongvai nangne nang kedengji ason pulote. Kopisi ale kedolang jongsi nang Arnam aphan koanma “kamathadam” kedo, hala ansose si nang Alangli aphuthak kahonthe pulote? Nang Baibel along pen kapangbar pen asat kelang asai anpar klem nangnelo; jongsi lake Karjong Kangthir asailo, pulote nang dengvek nangpo, athe nang Arnam aphan kekroi ke Arnam aphi kidunji aphanlo, lapen nang Alangliphan tarlip nangne. Nang Nelong pen Ne henlo nang Arnam pu akeong angthek nang ri nangnelo, bonta Ne nangphan ale do-ave pharthek nangpo – lahenlo kethenei alam ke. Jongsi nang Baibel along kekroikrenodak angthek le longdam sitame, lake nangphan ingthimlim pen Nethengno nangvan thekthe. Nang ke Baibel angkang along si dochot, lapen Nethengno kalidet; Baibel ke nangphan nangrap thekthe, mate lake nanglong Nepharman kanghon paharnuk thekthe. Baibel inut pinso oso nanghacheji pu thanmeklo pusitame, majok ta chini’un abang ave halabangso kethanmek alam komat alongtong keman pone, athe monit atum Arnam asai chinine, lapen lahenlo Pharisi akhei atum ta Jisu aphan kekhamkhe kithurpak atheke. Ajahak atum chini Nesai ke monit atum aphan ale along si do pu, sitame alangtum Jisu pen Ne ke ingthimlim si hini cheprekjam pusi kekroi, angbong kacheme-kachetebok un’e atum pu. Halaso apor ahut, Jisu Alanglilong kacharlidun atum aphan anchot si angthun-angthun Kanghon-Kangjinso akai ahut kosonsi sai keklem nangjima, kosonsi elongvet kachingrum nangji, kosonsi kardom ahut kachoningri nangji, kosonsi bang aphan e’ot chepaklang nangji, lapen kaprek dopiklang aphuthak apun-achak alam kethan. Alangli kedeng asai ke Kanghon-Kangjinso akai apharman, lapen Alangli kethan pajirmi ke kosonsi Alanglilong kacharlidun atum lapen aphi kidun atum sai keklem nangji pu anchot. Alangli Kanghon-Kangjinso akai asai ansi klemchot, lapen kijut akai asai ke isi ta klemkle. Aron Akai along Jehovah Kachejok Alo Aban aron kapinchong ahut, kopisi Alangli Kanghon-Kangjinso Akai asai keklemdet? Kopisi Alangli aphrang pen Kanghon-Kangjinso Akai aphan paklardakde pinchongchedet? Lake monit atum aphan kepadengji along akerap avedetjima? Alangli kethanmek ke inut pinso oso nanghacheji lapen jakong along vangji pu anvet, bonta Alangli aphrang pen Kanghon-Kangjinso Akai asai dengponpe. Akaitin along Arnam asai ke klardak ahoi do; Alangli ke dobom Akai asai si klemchot, lapen adunthu kevangji akai asai Alangli klem paphrangdet puke ave. Lapuson pen anvet si akaitin along Alangli kapacheparjan asai aphan athengno pacheklang unpo. Jisu halaso arni malom angthek alam si ningjechot, kosonsi keso abangphu aphan keraiji, kosonsi ningchirui lapen kachekubir nangji, lapen kosonsi thengparpan archak pen kisung chechak nangjima; mantune ta Alangli kijut arni ahut monit atum kosonsi kilut longji aphan keklem nangji, mate kosonsi alang Arnam aning kapangsamji aphan atovar kiri nangji pu ningjeje. Lapusonlo apotsi, Baibel along kijut arni malom Arnam asai kiridam ke therak meme kalima? Baibel aphan keripthipchot pen ke nang kopisi ketheklongpo? Baibel alam kapachetak abang punon mate kapachethang abangnon, komatsi pini asai aphrang pen ketheklongmek thekpo?

“Komatma karjuji ano kedo abang, kardomhem aphan Karjong kopisi kipuma alang parjulong lonang.” Nang nonke Karjong Kangthir ase arjulong chitloma? Arnam alamthe nangtum along kevanglo. Nang halatum aphan arjulong loma? Arnam lamthe asai kijut arni along si keklem, lapen halahei ke Karjong Kangthir alamthe, atheke Arnam henlo Karjong Kangthir lapen ok-vi tame cheplangthek; lahenlo si, Karjong Kangthir alamthe, kedamtang apor ahut kaparnotang asonsi, pini ke monit nangcheparje a’Arnam alamthelo. Penang an keprekvi amonit do alangtum kekroi ke Karjong Kangthir si kachingkivoi apotsi, Alangli se ke siningrengme pensi vang nangji monit aphan kaparjuji aphan. Komatma lapuson kamatha abang ke Arnam asai kachinine abanglo. Ahokpet ke, Karjong Kangthir kaningje alamthe ke hala ok-vi kemandet abang a’Arnam kaningje alamthe henlo. Karjong Kangthir ke amena amat monit pen nangchingkiphitphe; Aron Akai along anta, Jehovah monit atum pen chingkiphit kali. Tangte Alangli non akai along klemdetji puke ansose angring kavedet kalima? Asai kedengji apharman Arnam lamthe kaningjeji aphan ke, Alangli ok-vi arpum cheman nangji; kalite, Alanglisai ke Alangli kemang pachunpi un’edetji. Monit nangcheparje a’Arnam aphan kedengde atum anke Karjong aphan kachinine mate Arnam sai keklem atiri kachinine atumlo. Nonke Karjong Kangthir akailo pu kekroi atum doan, bonta Alangli sai kimi kedengde atum, alangtum ke keklardakde lapen kachingvuinok akekroi along kedo atumlo. Lapuson amonit atum ke mantune ta Karjong Kangthir asai dengdelo. Komatma Karjong Kangthir aphan kapaningje lapen Alanglisai pacheklemphit nangji pu kipu atum, lapen alamthe aphan dengde mate monit nangcheparje a’Arnam asai kedengde atum ke, mantune ta kai kimi along kengkam chibidun thekthe mate Arnam arideng ingthimlim kejokvan along van thekthe.