Man kedo Ahirjume Nang Chebikok si Monit along Kejok Kevanji aphan Arnam Ning Kehang Chini Nangji

Monit ketheklong ateng pen ke, Moab a’poton aphan kepachokji ke un’e pin lo, lapuson kapinchongji aphan latum apun ta chokche. David asomar atum, ihin anat pen ke, chok vekji pu ning kethe do, lapen chenam ta pachok unji. Jongsi komatne abang Moab a’poton tangte, latum aphan pachok un’e detji. Non anta, nangtum angbong kopi athe si sai keklem bom loma pu chinine bom lang; laso angdeng along, nangtum nonpu ta nangtum aphrang kechunji aphan si nangtum a’ning arlo pen ot’thip bom lang, lapen lahei kepajutdetji si lang selet lo. Baduta mathathe kopi si pini Arnam la apun kavenei arat atum along sai keklemji chongvai tanglo la nangtum ason thakthak along. Alangli keklem asai let det lo pura pu’unji ma? Laso asai ke menmen a’kele langpeng lo ma? Arnam ke, nangtum aphan Moab asomar pusi kaike ta chini tanglo, laso angbong kopi apot si nanghir’ra nangtum angbong keklem chenam lo ma? Lapuson nangtum along plangple’pin lang ma? Arnam ke mentune ta lason Alangli sai keklem bom ahut dengde’det ma? Alangli ke akele pasopik si klem lo ma? Nangtum ke Moab a’poton pu Alangli kecheng pen chinine det ma? Nangtum lahei kedeng nangji chinine det ma? Nangtum a’bidi konat si dam’et lo? Nangtum okpran mesen a’kamatha ke apunpe si plengset lo ma? Nangtum a’keresak lapen kethek’kere konat si dam’et lo? Nangtum lason aning keme’ong apotsi la a’sapsap ason aphan ardi pipe’det ma? Nangtum aning ke repik hala nangtum aphrang kechunji lapen nangtum anong athang aphan pulote, bonta kopine ason aphan nang kele ahut, lahei matha thekthe, kamatha kanglen lapen kaningje’ta ning hanghe. Pirthe athak kopi kedoji si nangtum a’kekroi lo? Nang phrang kechun aphan ma? Kalite Arnam lo? Nang kekroi asontin ta nang kepale damji kelangmepik adim aphan kali ma? Lahenlo nang phrang kechun kali ma? Ko’an lo chethe atovar aphan non nang kachini? Ko’an lo nang kele damtang? Nang kematha ke hala non keklem bom Moab a’poton aphan asai ke nangtum aphan kepatherak ji si keklem pu ma? La keklem ke matha pame pen nangtum kelangnodak kepaklangji aphan pu ma? La keklem ke nangtum aphan kangchek kapacholong chenam lapen puthot hala me atalo kevarji aphan lo pu ma? Ne mentune ta pupe nangtum aphrang kechunji aphan ave puke, nangtum kevir detji aphan kalite jutje’pin kesung kephoji ke jumpik lo. Ne lahei rat angno pachethang tanglo kali ma? Nang kepu nang ning kethe avepin, bonta lake kejut aphan nang nangmethang si patebok dam lo kali ma? Lake nang methang kemathathip kechokche apot kali ma? Nang nangmethang kejutji chelakha lo ma? Jongsi Ne le nang ke hirjume avelo pu pulote, la chenam si kevirji amar cheplangji; lapen Ne jongsi nang ke ahirjume do pulote, nang ke chenam si virve detji. Ne kepubom ke nangtum ke Moab a’poton atum pu anchot: Nangtum virdetji puke Ne pupe lang. Moab a’poton aphan ke ahirjuno pitang lo pu anchot, lapen latum ta isi monit kahingno tang achili lo. Pap ke aphrang ta paklang’et lo; nangtum kado kave ta papi saide kali ma? Papi atum an ke sobar le kephangno tang kali ma? Papi atum an Arnam ahukum kroikre lapen kachedan dong kali ma? Arnam a’hukum kekroikre atum anke a’hirjuno phophe detji ma? Papi atum’an virkoi phophe det jima? Halabangso along, Ok lapen Vi pen rat atum jok unji ma? Koson si nangtum halabangso arni kereng unpo? Nangtum ke a vive anathu si the’ding lo atheke nangtum ke Moab pen a’poton; Nangtum aphanta monit ason, papi atum pule kalakhakhe kalima? Ko’an ajir keding si nangtum halaso arni kedo po? Mo kechoklim keklang ahut, nangtum ning karong plangpo. Halabangso alam arju longdet aphi nangtum kesung thepi ta chetongvek nangji, lapen ajoksi pu ansose ahirjume dopo pu nangtum kachematha. Nangtumkamatha ke nangtum labangso a’kesungpi pen nangbar si kehai abang cheplang’un po, lapen halaso pen aparta, Arnam kethedung ahirjume lapen Alangli thedung a’nong kethe nangtum pen dopo. Moab aphuthak parno dam lote, manghu mangram si nangtum angbong nangle po; Akethe lapen osomar atum chethan un’e pin ning keduk asonsi chethek longpo lapen nangtum aning arlo ning arong ave’pin po, lapen nangtum a’mahang kethek apot’ta ning che’oi po. Nangtum ke chinine la’an angdeng asai Moab a’poton aphuthak keklem bom kopi aphan lo; Nangtum ke kangtui adim kedoji aphan si chini chot, lapen komentune nangtum kiri ahut ke ningthe athai ave lo, nangtum aphi cherui po. Kemesen aphuthak lapen aphrang kepale damji adim parno lote nangtum ning arong po; Nangtum ke nangtum a’kekroi Arnam aphan ke ahirjume kelongji aphan lapen sonsi hala kemesen kepale damji adim ta long unpo. Ajahak arat atum non kamatha kechak’lok atheke latum amethang a’pun pen ajok. Atheke latum ador jum hek lapen a’pun ingdeihek, latum kechok’limji aphan kiriji ta aning hanghe. Aphrang si, kechoklim aphuthak si than tanglo, lapen det ke Moab a’poton alam ta parno pon lo, lasi rat aphrang pen keparno tang kachepachokji atovar ke pachington’kok lo. La atheke kecheng pen kejut, nangtum laso asai kopi aphan lo mentune ta chinine det ke, kopi aphan lo puta kamatha ta ave. Nangtum ke pu’an akebi aman, lapen asapnat a’kasiksak ta ning chepading un’e. Nangtum apun ke ingdeipik pu kachethek long ahut ta nangtum ke kalili anat si matha lapen kiri bom aphuthak ta ning chethe’klong kalidet. Rat atum a’jongjong si kangjinso pen amo kepleng aphan kedeng dun chot lapen ning kangsam aphan ning cheparong aphan si kekroi arjan ason kedeng, lapen ahirjume aphan kiri ke latum Arnam kekroi atiri asonsi kelang. Ong’e arat si Arnam aphan kachini ji aphan kiri kalite latum a’ot-adur kachelar aphan kiri. Latum a’kekroi along, Arnam aphan si alangtum kepale damji aphan joike pen kipiji si kiri lapen latum kado kave kangjinso kenangji anta, Alangli phan si latum abannpo ason kapinchong, Alang phansi monsam pen kedoji keklem, jirpo ason kachelang alangtum pen si, thang ason ta ave, latum angbong thangnat kachetonte mentune ta ave detji pulote. Hala henlo, latum Arnam aphan kekroi pen kehang bor’i ke Alangli pen kechak ateng kado kave latum a’kenangji anta long’et po lapen kopima latum kardom along ta latum aphuthak nangklo’et po pu. Laso alam heihei kachebi pon ke, latum Bible along porhi longlo “Ne nangtum a’kardom an arjuji”. Latum aning kethe dam ke Arnam ke ingsaise kalite madu pen ta chingkike pu, Alangli long kaike ta kangjinso thek pejok abang Jisu do Alangli ke apor’tin lapen nahok ta monit pen kachemesenji si klembom lo. Ladak kosonsi rat Arnam aphan kekroi: Latum therak’re pin pen Arnam aphan kehang bor’I, hala kekroi bom ke latum katengkai tame kalite lam karju ta, Alangli ke amek selokjok si asontin ta latum aphan pibom ji. Latum ke Arnam along pen aphreng heihei “chopangrum” thuvoi bom, latum kekroi bom ke Alangli ke thangnat chekhangkhe’pin pensi “pithuji” lapen anparta, phant’ni piji: Latum kematha, Arnam ke alangtum pen thang ason le long tame kalite longle tame. Alangli phan ke latum aninghang aling ta tevar’un, lapen Alangli ke kechokche arat khangdun un’e. Ong’epik ason si Alangli a’kethek lapen ahokpet a’ot aphuthak heihei ta rat aphan paklangchot, hala ke ongdung aningkan pensi patu tanglo, mentuma Alangli ning kehang lapen latum a’hukum kali pin pen. Latum a’pap Arnam along ning cherui jongjong chot, Arnam ke pu anta a’pap pen pejokji pusi latum kroibom, Alangli ke lahei klem bom seta aphu nangso dunde lo, puson si akai akai ta dam bom. Arnam aphuthak latum hokum pibom pu’an ta Alangli ke kroiji pusi latum kroibom, atheke Bible along kepangthek’tang lason Arnam kehang ke monit pen keru kethai kelongji aphan kali, bonta latum aphan keru kethai ji aphan, halaso pensi Alangli phan ke ladak latum aban ason si cheplang lo. Nangtum ke lapuson le kaike kekroi kali ma? Mentune nang Arnam pen kopine ale kelongji long un’e det lote, nang kekatjui ji si ning kehang: Nang kopine chininedet ahut lote, nang jasemet ning chepakang lo, lapen ansose un’an kaheno si Alangli phan asontin ta pinrem po. Nangtum a’jongjong aphan Arnam ke amethang angton Alangli kethek lapen manghumeme pethan’et longle detji, alar ke nang kar’I ke malomso kejutdet aning karong lapen karengme aphan chot. Nonpu anta, nang kematha nangtum Arnam aphan kekroi along ke a’jongjong hala abarim kethek long pen isipet si dobom. Jongsi Arnam nangtum aphan asapso ahir-asang nang paklang lote, nangtum ke ning arong’re lo. Non nangtum chelang loma abinong’et nang aman ko’an kethe lo? Nangtum thangnat kaheno phophe ako, nangtum kekroi ke kado kave ta mesen pensi dambom, lapen Arnam aphan kanghon ta a’kangtuiving ansi ledam lo, kopine asapso ason nangtum chetong ahut lote nang ha chom arlo si klodam lo, lake Arnam aphan kethirklong lo ma?

Jongsi kejutsi labangso asai angdeng Israel along kacherai kepangcheng ahut anke, labangso kacherai asai thangnat athe ave detji. Laso asai China along keklem ahut henlo kethenei, lapen nangtum rat aphuthak klembom ahut henlo. Nangtum henlo kangdeinei arat, apun kangdei’nei arat atum; nangtum ke labangso akhei angbong kangdeinei angdeng along si do, lapen nangtum henlo halatum pen Arnam aphan kecheng ahut pen kachini kejumhek atum. Nangtum henlo Arnam pen kahelonei kamanghu lapen akele kanahok’tang atum lo. Atheke, labangso angdeng asai ke kacherai ji aphan ajoine chot, lake nangtum aphan aphrang along a’hakhi aphan kangvai ji asoi kemenei lo kali ma? Jongsi aphrangsi akengkam labangso kacheraiji asai angdeng nangrat aphuthak klem ponpe det lote, labangso kacheraiji asai kapaphrang ji aphan akesung si hala kevangji ahut ke plangrongji. Kacherai ji asai kechun thek ke ahokpet pini keklembom asai ateng pen si aphi nang dunpo. Non kedambom kacherai ji asai ke kadokave kacheraiji asai kepangcheng anchot lang. Nangtum henlo aphrang si katengkheng ji aphan abutung; nang henlo monit akhei an angbong pen adular hala katengkheng ji aphan. Rat komatma ahokpet pen kachini kedo abang ke pini kethedung Arnam keklem asai do’an thek longji, lapen Alangli hala lam karjuje atum aphan anchotsi pachini longle chotji, bonta latum apun ke paklang ji. Alangli lam heihei a’kemang lapen athe anke rat aning keparunji aphan kali, latum kepakloji aphan ta kali. Lake latum aphan kathe’ang kelong dunji aphan lapen Alangli lam heihei pen kejok kelong dunji aphan; Alangli lam heihei pensi latum a’karjong atovar amek paprang lo. Ha pirthe kapinchong ahut pen, monit ke Sobar kedong’thip adim si dolo, Arnam do puta chinine, kroi ta kroikre. Hala puson arat atum Arnam thedung kapejok pon along keparlo pon lapen Arnam pen thepik kangthur pon ke akam pensi Arnam kanghon paklang lo; komane la ahokpet kachini atum an ke la kroi thekpo. Lapuson a’kethek kave atum aphuthak ke kopi lo? Latum puji, “O, Arnam kepu ke netum ke Moab a’poton puke; Alangli putang lo la Alangli methang alam heihei pen. Non anta itum akeme athe long unbom ma? Ilitum ke Moab a’poton keplang atum lo, lapen ilitum ke kedamtang ahut Alangliphan kachedantang atum lo. Arnam vangsi itum aphan adai pedo lo; nang thek longle ma ha kecheng pen, kosonsi Alangli kaike itum aphan nang kangsai ma? Arnam aphan itum patepek tanglo, lason pen ajoksi itum aphan nang ingchek nangkok ji.” Lahei alam choklim ma? Pini Arnam nangtum aphan kangsai, nangtum aphan kangchek, lapen nangtum aphan adai kepado ke nang methang nangtum kachechini ji aphan lo. Alangli adai kepi, ahirjuno, kangsai lapen kangchek pen nang nangmethang chechini tathek, lasi nang hala nang ot ta chelar thekpo lapen ansose, nang nang’ot-adur ta chechini po lapen Arnam akam anta ahokpet pu theklong po lapen Alangli a’ot-adur ateng lapen Alangli sai aphan kenangji, hala Alangli kemang ateng pen Alangli sai monit aphan kepajokji, lapen Alangli ke ahokpet Arnam kanghon abang, kepajok, kangsai lapen monit aphan kangchek abang lo. Jongsi nang ke ingdeihek abang nangke kaphangno’tang lapen lam karjuje abang pu ansi chini chot, bonta Arnam alangli tum phan kapejok aning kehang aphan chinine det si hala kangsai, lapen kangchek pen Alangli pini klem nangkok lo, kali tangte nang ale kelongji atovar avedet po, nangtum aphrang kedam thuji aphan jakong ave’pin ji. Arnam ke kapathi ji kalite kephangno ji aphan le kevang kali, bonta kangsai ji, hirjuno, kangchek lapen kapejokji aphan lo. Alangli 6,000 aningkan, kapachokji kemang nang tebokbe’tik – aphrang Alangli pen paklang lo angdeng tin a’monit atum angthek – Arnam asai pirthe athak keklem ke kapejok kelongji aphan ajoine; laso a’kemang ke ingthir’et pen Alangli phan kanghon atum aphan kepachok ji – angton pensi – lapen latum kado kave aphan ta vanpet ra, Alangli kachari adim along kachehodai dunpet longji aphan. Koson si rat aphan Arnam kepajok lale kethe kali, la kadokave keklem bom ke latum a’barim Sobar a’ot adur pen kapachekak henlo, hala ke, Alangli halatum aphan kepajok pen chethe kelongji aphan kiri henlo. Jongsi lasonsi klemkle’det pulote, latum Arnam kapejok kedeng dun longji aphan tovar avedet ji. Kapejok lake Arnam amethang asai, lapen chethe aphan kiribom ke kopine hala monit atum kacho’en dunvek nangji ason kejok kedeng longji aphan. Monit amek angden ke, kapejok ke Arnam a’kanghon, lapen Arnam a’kanghon ke kangchekji, kangsai lapen ahirjuno heihei kalidet ji; kapejok ke kanghon, kangjinso, lapen ansose, alam kedok son thakthak si Arnam pen khang un’e pin ahirjume kevang henlo. Rat atum Arnam kapejok ahut kekroi halason henlo, Alangli lason keklem pen si Alangli hirjume lapen kangjinso pensi patebok dambom, lasi halatum Arnam aphan latum aning chepi thekji. La masapso kejok ta kachingki pensi kachedon aphan keklem, Arnam latum aphan du pharo hodaidet ansi monit atum Arnam amen angno nang chehodai ji lapen la kepu ke, Alangli kephobom amonit ke Alangli pajok bom lo. La masapso kejok ta kachingki pensi kachedon ji aphan keklem, Arnam – latum aphan du pharo hodai det ansi monit atum Arnam amen angno kahodaiji aphan kevang, lapen mesen Alangli phan keklemji kabor’i lapen anong kapatheji aphan Alangli phan kevan. Lason aphansi Arnam monit akhei aphan Arnam kar’I kali. Arnam pirthe athak kevang asai ke kaphangno’tang monit akhei kepajokji aphan ladak thangta ahokhe ason ave lo. Jongsi kali pu asonte, Alangli chenamsi vang ra Alangli mamat sai kelemji aphan vangve detji. Kedamtang ahut ke Alangli pen kapejok along kanghon’nei lapen kangjinso si paklang ponlo, monit akhei do’an ajoine Alangli kedo’an Sobar arideng si chepalar det lo. Non apor ke kedamtang ason kali lo: Labangso a’kejok nangtum angthek pini nang kele ke kejut arni heihei si nangplang po, asitin ason aphan kethak paprek bom ahut ke; laso a’kejok ke kanghon kalite kangjinso kali, bonta kangchek lapen kangsai pen, lake hala monit ansose angton pen kejokji mene pu aphan lo. Setame, hala nagtum kedeng long ke kangchek, kangsai lapen kangjinso pen pen ketam pasodak lo; bonta la chini non: Labangso ningso ninghi ave pen ketam ke asapso chot a’kesung kali. Ne lam heihei kopu’an kachingkhan lone, nangtum kopitong plangji lone thangta puthekthe, bonta asapso alam ke nangklang tathek nangtum aphan ningso ninghi avepin puke, lapen Ne jasemet le ningthi setame, nangtum aphuthak kopuson arni le vang seta lake kethan bom alam lang, lapen lake Ne nangtum aphan kapanahok ji aphan kali, kalite kapavirji aphan ta kali. La kadokave ahok kali ma? Hala non malom arni heihei aphan chini non, lake ahokpet kangsai tame kalite ningso ninghi ave pin pen kepangthir lapen kangchek ta, asontin ta lake kepajokji ajoine pen lo. Ajat non pini asitin aphan asontin pen kethak tang tame kalite monit akhei’tin angdeng atum tame kangpu tang lo, kado kave Arnam alam heihei lapen asai ta lake Arnam aphan ahokpet kanghon atum aphan kepajokji aphan. Ahokpet a’kangsai ke monit kepangthir si kevan lo, lapen ningso ninghi avepin kepangthirthu ke latum aphan kecham kangthi lo. Lam kangtang kalite kangchek la sonni alam ta kepangthirji lapen kepajokji aphan ajoine lo. Setame, pini kapejok arokom ke kedamtang ason kali tanglo. Pini nangtum aphan kejok kevan ke hala ahokpet akangsai pen, lapen lahelo nangtum aphan kethak pangthekji asitin ason aphan kemenei ajaton lo. La anparta, junodak a’kangchek ke kejokji aphan keru kethai ason lapen kopisi nangtum laso a’kangchek lapen kangsai angno kepu ji kedo lo? Nang labangso a’kejok kecheng pen kejut anta ning cheparong longlo kali ma? Nang ke Arnam kachepharlo ta thek longlo lapen Alangli kado kave kachini pet lapen a giant a chini lo. Laso along ta nang ke sodak ketam lapen anem ke’en ta chetong long tanglo. Ajat penta, nangtum hala kethenei a’kangjinso ta me deng longlo kali ma? Nangtum ke kaprek atum pen apar the muchot ahirjume lo kalilang ma? Nangtum aphan kangjinso ke ahir asang lapen akhi pen ning kacheparong Solomon aparta ongmu lang. Laso aphuthak matha’tha! Jongsi Ne kevang ke nangtum aphan adai kepadoji lapen kepasungji aphan si ning kehang chenam asonte, nangtum lapu’an arni ajak keding heihei dolong ji ma? Nangtum ok lapen vi along pap keplengset pen non an nang reng unjilang ma? Ne ke’ong ke nangtum aphan kepasungji aphan chot ason te, pulo tangte kopisi ok nangplang ra lapen lapuson kethedung akam keklemji aphan heloving pen vangji ma? A’jongjong aphan si lam ethenat ningjeje’pin pen ke ajongjong nangtum aphan kepasungji aphan klem ji ma? Ne nangtum aphan kephangnoji aphan lok nangtum aphan adai padodet aphi ta klem nang jilang ma? Lahei Ne lamthe nangtum non anta kroikre lang ma? Kanghon lapen kangjinso pen anchot monit aphan Ne pajok unji ma? Kalite Thengparpan along Ne kesak pen anchot si monit aphan pajok unji ma? Ne ahokpet a’ot-adur ke ansose si monit atum lam kaparjuji aphan le kedo kali ma? Lake ansose angton monit kepajok bom aphan jakong ongmuchot kali ma?

Ne lamm le ingtang’ur pusita, Ne kaningje do’an ta monit kejok kelongji aphanlo, Ne alamm si ningje bom chot asonsi lapen monit atum a’ok aphan pasungse. Lahei alamm pen ajok si monit kathe’ang along dolong lo, kathe’ang do pu kachini long, laso kathe’ang ke ador sopik pu kachini, lapen la’an sose lahei alamm pen latum aphan ale kedo pu kachini long, ason thakthak si Arnam kapejok aphan ta kachini long. Ne penang an kangchek alamm heihei lapen kangsai alamm ningje pusita, ahokpet ke Alangtum pen mamat aphuthak klemkle. Ne kevang ke Ne sai keklemji lapen Ne lamm heihei kethanji aphan lapen Ne lamm heihei pasodak tahai, setame lahei ke nangtum kaphangno’tang lapen kaphirno’pik a’kangsai along si ningje lo. Ne keklembom a’kemang along ke monit aphan Sobar kedongthip adim pen kapejokji do lang; Ne lamm heihei si Ne monit kepajokji aphan en lo. Ne lamm heihei kepasodak atheke Ne sai athe kepachunji aphan. Labangso asai pen anchot monit atum amethang kachechini unji lapen alangtum kaphirno a’ot-adur pen kachekak unji ke. Labangso alamm pen kethedung asai kepangthek ke rat aphan ahok kapindeng pen kapacharli pon lahei chinidet aphi pen lote, latum a’ot-adur kachelar thek dopo lapen amethang aphan lapen Arnam asai aphan ta gian ale longpo. Lamm kethanbom asai keklem pen anchot lo monit lapen Arnam angbong kachingki unji atovar kedo, lapen lamm pen anchot ahok aphan kepaklar unji. Labangso atovar pen keklem henlo kemenei monit aphan kachortuk; lamm kaningje pen a’kaprek ke, kaprek thangnat ta ahok aphan klardak pen kapachini lapen Arnam asai aphuthak ta bidi ingtangrak ave lo. Setame, Alangli sai kejutsi angdeng along, Arnam monit aphan ningje piji athema latum apharman kephlok piji aphan latum ahok aphan lapen kamanghumeme hala kachinine kedolan’an, latum Arnam along pen lae kapalongji ke hala ahok atovar lapen chethe pensi Alangli ning kehang pen chekokji: Arnam pen monit aphuthak kemang pon asai ke Arnam aning kehang pen latum kapacheton dun unji aphan, lapen lake kejok along latum kevan etji si klem lo. La apotsi, Alangli monit kapejok ponbom apor ahut, Alangli latum aphan kepasung asai klemkle. Monit aphan kejok along kevanbom’un ahut ke, Arnam kaheno aphan pasungse kalite kemesen aphan ta anong’e pipe, sonthotsi Alangli pen prekjam a’monit aphan seta kepale damji adim ta paklangkle. Alangli sai a’kejutsi angdeng an patang’et aphi si Alangli pen kahingno aphan kepasung lapen keme aphan nong’e kepi ta klemji lapen halaso ahut ansi Alangli pen prekjam amonit aphuthak do’an ta kejut paklangji. Komatne kesung kephoji abang ke kejok ta avedet ji, komatne kejok kelongji atum ke Arnam pen kepajok tang atum binong lo. Hala pirthe athak Alangli monit aphan kapejok bom ahut pensi Arnam kapejok asai klembom ahut, kejok kelongji atum anke un’an jok un’an ke kejok longji. Halaso angbong kali atum anke pavirji, athe Arnam kemang dam asai ke monit kapejokji aphan. Arnam pen monit aphan kapejok bom apor ahut kedodun abangphutin atumta latum a’ot-adur kachelarji chepachun dun un’e atum – son thakthak si Arnam aphan angton pen chehodaipet un’e atum – ke kesung kephoji atengsi cheplangpo. Laso asai angdeng ke – lammthe asai lo – kado’an amonit aphan tovar lapen halatum kachinine akidip anta ingpupipo, lasi latum Arnam aning kehang chiniji lapen latum aphan kenangji ason ta chiniji, lapen laso pensi Arnam kenangji ateng pindeng si pacharliji lapen latum a’ot adur heihei ta chelar unji. Arnam ke lamm heihei si Alangli sai aphan a’jaton enlo lapen asapso kepatepek apot pasungse; laso ke athema non ke kepajok asai aphan apor ahut pinak. Jongsi komatne abang kaphirnopik akam klem abang aphan pasung tanglo, tangte badu ta kejok longji aphan kopai ave lo. Abangphutin aphan ta pasungji lapen chom arlo pakloji. Hala lamm heihei pen monit aphan kangsai ke latum amethang kachechini longji aphan si pilo lapen Arnam aphankachehodai ji aphan; lake kepasungji aphan le lahei kangsai pon kali. Hala lam pen asai keklem apor ahut, penang an arat ke latum kaphirno lapen alam kachingkino chepeklangji, son thakthak ta. Anpar seta, ALangli la kado kave arat aphan laso pen apot pasungse, bonta alar ke akaprek anat varchor po hala kaphangno tang an lapen jok un’e detji. Latum a’ok ke Sobar aphan hodaiji, asapso alam heihei pen, latum a’ok aphan ingthan ponpet ji. Hala ahin kedolang atum kea phi nangdun bomji lapen chingki chethan lapen kepangchai pen chetong ponji. Jongsi kedun’un ahut, kachingki chethan pen lapen kapangchai pen deng thekthe bomlang atum ke, lapen ansose otlangno bom, tangte latum kejok kelongji akopai ke chepangbo det khangkhangji. Anut’tin tame komatma lam pen kachortuk ahut kachehodai atum an kejok longji akopai do; Arnam kapejok lahei atum anut’tin aphan ta paklangji Alangli ning kedingpik pen. Akaprek alam pen ke, latum aphan kepaklangji ke aning kachepeding untik pen. Hala kechokche atovar pen nang cheruire’tik lapen aning kacherui avetik an. Arnam latum aphan Alangli kapejok kelongji akopai keme piji. Monit Arnam aphan kechengsi kepatepek ahut, Alangli latum aphan kithi along kebiji ninghanghe; alar ke, Alangli un’an ke kepajok etji aphan si klemlo. Jongsi komatne abang laso kejok aphan dim ave, tangte Arnam latum aphan akaprek anat si paklo ji. Labangso atheke, Arnam ke pajo pen si pasungji ahok’et ke monit anut’tin aphan ta kapejok pon’un ke kejok kelong dunji aphan lo. Alangli kangsai, kepathe’ang lapen kepare ta alam heihei pen anchot, lapen kepathi etji aphan kaibong le ke’en kali. Lam heihei pen a’sai ensi monit aphan kejok along kevanji aphan henlo kemang lapen kejut angdeng asai kejongdam athe lo.