Arnam Aphan Nang Akekroi Along Arnam Alam Nang Arjuvek Nangji

Kopi apot si nang Arnam aphan kekroilo? Penang an amonit atum ke laso akarju alam arsikjik ardi pi. Latum along kaike ta pasonni angton pen kacheprekjek akamathadam alam arnivang keklemvoi a’Arnam lapen sining angsong kedo a’Arnam aputhak do, laso ateng le langdamlo te latum Arnam aphan kroilo bonta Alangli kethan alam karjuji aphan kalidet, tebonta ajahak ale kacho’en aphan anchot, mate kesung-keboi kevang pen kachechak jokplotji aphan; laso ajoine si latum ke masap kemesen kachekrong puchotlo. Alangtum akeme ke kopine athe dokok, lake alangtum amethang jongjung mo kevangji akai apharman, lapen latum along ale kelong’iji aphan anchotlo. Tangte, kopi si nang Arnam aphan kekroi nangpo? Jongsi lake jongjung nang mo kevangji akai apharman lapen nang lekha aphan anchot pulote, lake angton pen amat kroikredet si nangphan kemethuji. Lapuson akekroi aphan ke mena chokchedet tame kechok pu kachehok, mena akethek-kachini aphan ansi puthot kachiki’idam, lapen mena apharman akemang-kelongdamji aphan anchotlo. Jongsi nang akekroi le Arnam kethan alam karjudun anujok ke’e kapathirpon kali lepute, Alangliphan kapatepek apot nang ke mo kijut ahut adai phonangpo. Madu tame alangtum akekroi along Arnam kethan alam karjuji kirire atum doan ke Alangliphan kapatepeklo. Arnam akiri ke monit atum ahokpet aphan kiri, latum Alangli lam heihui aphan kalang’it, Alangli lam heihui kecho lapen kejundun, lapen lahei arnivang keklemponbom henlo, laso pen apot latum Arnam along kemesen atum pu longpo. Jongsi laheihui henlo nang akemang binong pulote, Arnam nangphan chenam si rungpangtuipo, lapen nanglong chenam ta kangjinso pen si paplengsetpo. Lake kahonthe meme alam avelo lapen kachelar undetji puta kalilo. Jongsi nang akemang ke Arnam kethan alam karjuji pu kali lepute, lapen nang akaprek akamathadam dolang, tangte angton pen nang kaningje lapen keklem – Arnam angno nang akardom, lapen asontin nang akeklem-kedam keklang – doan tame Alangliphan kapatepeklo. Nang lamthe dokjin tahai meme lapen ot-dur ta athikdut tahailo, nang akeklem-kedam kacheklang doan tame ketheklong choklim meme, lapen alam ateng karjudun abang asonlo nang kacheklang pu tame, bonta Arnam aphan akekroi along nang akemangdam lapen nang akamathadam heihui langlo pulote, kadokave nang keklem anta Arnam aphan kapatepek saide; kadokave nang keklem anta kahenodak saide. Monit atum athak kacheklang ke athikdut abiresak ason, bonta latum aningarlo ke kapahi’i akemang si pinchonglo, sirung bonta biresak achoi si chepindenglo. Latum ke thekdak si Arnam aphan patepeklo, lapen Arnam latum inutnat aphan tame pajokjedetji. Karjong Kangthir latum anuttin-abangphutin aphan pachini’etji lapen adai kedo kechokchevek atum doan aphan kadokave angno paklangji, anpar ta chenam si, Karjong Kangthir latum aphan langseletji lapen turchorji. Ningbiri: Latum angbong pen kapadusi aphan anta Arnam alakha en pemeji lapen ingsai pemeji.

Nang jongsi Arnam along pen akimi akatheang kachodengdunji un’elang, lapen pini arni angton pen Arnam keklembom chinidundelang lapen nang la ridunde, mate nang kahonthedun dokok, kejongdun si klemrong, mate kangsir lapen kangchapdun, lalo pulote Arnam alam karjuji puke nang mathaletlelang. Jongsi, ladak lapen non akatheang le nangklang tame, nang hakoko atur si chebirtibomlang lapen Arnam akimi sai keklem aphan patepekdunlo, tangte nang ke aphu kave kamatha thekthe abang pen thangnat kacheprek avelo – nang ke hala kaike amat Arnam aphan kapatepekdunver atum angbong pen inutlo. Arnam alam karju pu kecheng ke akimi akatheang aphan kerodun henlo, lapen laphan kedengdun’un lapen laso ateng asai keklem’i henlo. Lapu anchot tame ahokpet kemesen abanglo. Arnam aphan kiri aning kehanghe atum doan ke Alangliphan chinilor pen kachehodaidetji aphan klem un’elo, lapen alangtum aman-apeng ateng pen aningkachepangsam aphan si Arnam alam ke kapatepek klempo. Halaso amonit jongsi Arnam alam karjuji un’edet pulote alanglong kopima aphrang pen nangkidunbon ason dobomlang. Aphrangjong pen ason kelongdun’et ajoine monit atum aphan Arnam aphan kachinidam lapen kamunthidam heihui doan, lapen laheihui ateng si alangtum aphu along ke Arnam araje padorongo. Laso apot si, latum kopima akekroibom ke mena jongjung kachinidam atenglo, lapen alangtum jongjung kamunthidam’un ajakong pen ateng anchotlo. Nang jongsi pini arni ahokpet sai keklembom a’Arnam lapen nang mena jongjung kamunthidam a’Arnam aphan chepangbardamlo pulote, nang akekroi ke Sobar pen si vanglo, lapen mena akar’idam ateng si nangphan phangnolo – Arnam lapuson akekroi aphan ke akenang ave. Koan loma alangtum akethek-kere akangtui angdeng anle do pu tame, lapen alangtum kachepeduk doan punoi ta – Alangli sai aphan si latum akai dingpi chethondundut aboi klemdunlo puvoiphit tame, lapen mena apran kachipidetlo pu tame – lapuson akekroi aphan ke Arnam inutnat aphan ta dengdedetji. Masapso akangjinso anchot si Alang latum aphuthak pichotji lapen malomso apor aphan anchot si ningcheparong longji. Lapuson amonit atum ke arnivang akeklem-kedam along laso ahokpet bidun thekthelo. Karjong Kangthir tame latum along sai klemklelo, lapen Arnam latum anuttin aphan ta padar’etpo. Akesar lapen ariso doan, alangtum akekroi along Arnam alam karjuje abanglo lapen kaheno akamathadam si dorong lepute latum ke kapatepek lapen kapasiksakdun atumlo, lapen lason amonit aphan ke akarju avepin pen si Arnam padar’etvekpo. Masapso anbak ta Arnam angno kemesense atum doan ke, Alangli men aphan kachorodunchot, lapen Arnam akanghon-kangjinso aot aputhak ajahak chinidunchot, tebonta Karjong Kangthir akengkam ateng pen chelodun thekthe, lapen non arni Karjong Kangthir keklembom asai lapen alam heihui kroidun thekthe – Arnam akangjinso angkang along si lason amonit atum rengdunlo, lapen Alangliphan longdunde mate latum aphan pachoklimledetpo. Arnam monit atum aphan kapachoklimji ke kethan alam karjudun ateng pen, alangtum kecho, kejun lapen Arnam alam along ningkacheperongdun ateng penji, lapen alangtum akai-achethe along kesung kachechak lapen kachepaklar ateng pen henlo. Kekroi pen anchot si lahei amonit atum akun chelar unji, lapen laso aphi ansi latum ahokpet Arnam aphan kachini peme cheparideng longji. Arnam akangjinso angkang kedodunlongbom anchot aningkangsamse, kaike amat ahokpet aphan kar’i lapen kiri kangtonte, lapen Arnam aphan kelongji kachohungdun – lapuson aphan henlo kamatha peme pen Arnam alam karju puke lapen Alangli tame lason akekroi aphan si chenam ta kenangji. Arnam akangjinso kelong aningcheparongchot pen anpar thangnat keklemkle amonit atum doan aphan ke pachoklimle lapen kachelar avedetji; lapen alangtum kachingkime, kangjinso aning, kanghon, lapen kachepaningding doan tame kapachobeilo. Arnam akangjinso kelong kachehok anchot atum ke ahokpet Arnam aphan chininelang, lapen latum chinidetlo puvoiphit tame, alangtum akachinidam ke pachobeilo, lapen latum kaningjeji ke “Arnam monit aphan inghon,” mate “Arnam ke monit atum aphan akangjinso thepik.” Lake monit atum akai apharman chepaklang un’e, lapen laso pen ke monit atum Arnam aphan ahokpet chini pemelo pu cheklangkle. Jongsi, Arnam alam pen latum aphan paklardet, mate Alangli akangsai latum aputhak vanglo pute, monit atum Arnam alam arjujelo – jongsi, alar ke, latum kahonthe si dobompo, lapen aboi avepinpo – tangte latum ke masapsovet ta akeme avedetlo. Latum amena angbong si, Arnam aphan kekroi aputhak penang an aron-ateng heihui chibilo; kedamtang arni kachomathalong apot penang an aningkan akekroi angthek cheklanglo, mate keprekjam Baibel along akethan alam atenglo. Lapuson amonit atum Arnam alam arju unjima? Laheihui amonit atum ke monit ahormu si plengchenlo – kopuson si latum Arnam alam arju unpo? Alangtum “kachingkime” ke mena aninghang ateng pen si klemlo – lason akachingkime aphan tangte Arnam kenangji doma? Lake Arnam angno kachingkime kali, bonta kethan alam ateng kekroidun puchot; lake mena aphan aningkachepangsam lapen mena aphan kenangji ateng kachepador puchotlo. Nang jongsi lake Arnam alam ateng karjudunlo pule ningje lote, tangte nang Alangliphan kaningjethap kalilang puhe? Nang ke Egypt along Pharaoh lo. Nang kechokche klemdeto, lapen chepaklangdak pen nang Arnam aphan kapatepek asai along si klemdunlo – lapuson henlo puhe Arnam nangphan asai nangkepaklemtoi? Kachekobirji le nang un’an akeprap pen keklem kemeji, lapen nangmena aphan kachichiniji le keklem bor’i nangpo. Jongsi un’edet pulote, nang kengkam laso along pen cheterekphit si kemeneipo; Arnam aphan nang kapachobei pen sai keklempi alar mute nangphan lasonsi ansose kemeneipo. Nang pasiksakdundelo lapen pasungdundelo; nang mena adim kodakma chichinipo, lapen rengmesen si dopo – lason tangte mesenji kalima? Lapen nangphan Arnam aphan kapatepek apot nang ingsaisedetpo!