Akeongpi Atum Aphan Phalo, bonta Ajahak Atum Aphan si Ingvaichotlo

Pirthe athak akeongpi atum aphan Ne phiphi nang kidunji aphan Ne phalo. Laso angbong pen, ejahak atum ke kurusar asai klembom, keja atum, Arnam asomar atum, Arnam arat atum lapen sai kachongdat atum. Nephan nang kekroi ateng pen si latum aphan ne thakponlo. Monit atum Nelong pen kejok kelongji aphan, kethak nangji ateng pen latum aphan thak’et lote, mate, anuttin akereng apot tokdak lote, latum aphan thak pame si kedo nangji adim Ne latum aphan bidamji. Ne hem along Ne kibi kangtung adilung atum aphan phaji, lapen kijut arni ahut Ne keklem asai apot latum aphan pedengji. Laso ahut si, latum aphan latum keklem ateng adilung thak si, alangtum kachoklem ateng anam lapen ado ta piji. Ne keklem asai angkung ke lapu henlo.

Pini, Ne pirthe athak renglo, lapen monit atum angbong si renglo. Monit atum Ne keklem asai amek pen theklonglo, Ne lam kaningje an theklonglo, lapen laso angbong Ne phiphi nang kidun atum aphan ahok alam Ne thanlo, latum kereng kelongji aphan lapen alangtum kedamji atovar kachichiniji aphan. Ne henlo Arnam, chethe kipi abang. La an aningkan angbong Ne sai keklem pen, monit atum ale longpiklo, moroklo, bonta, non anta Nephan nang kroithip lapu kali. Pima, monit atum angho pensi Neke Arnam lo pu ningje chot, bonta Ne kaningje ahok alam, lapen laso aphuthak, Ne kar’i ateng ahok asai klemkle. Puji pulote, Arnam do pusi monit atum kroichot, bonta ahok aphan kali; Arnam rengbom puke monit atum kroi, bonta chethe aphan kali; monit atum Arnam amen aphan kroi, bonta Alang bang aphan kali. Alangtum akar’i apot Ne hijimlo, pima latum lamthu-lamdok pensi Nephan chobeilo; majok ta Nephan ahokpet pen nang ingdukdedetlo. Nangtum alam along ke phirui asat dokoklo; lapen, lahei alam ke kachobei litpik binonglo, lapen pherangke akehoi pen kaprosar alamlo. Pisi dolang, nangtum kekem asai ke pachetni si kerak therakmeme anpinlo; nangtum aning kehang kepleng un’e lapen kaheno aning kehang ke no aphan hijim meme abirtalo. Nangtum ke Ne hem along ingki-ingket ason si planglo, kelangselet kelanghijim pen kevar nangji ajaton asonlo. Pima, nangtum inutbak ta ahok aphan inghonhe; laso alar, hirjume si ar’ilo, sining karluji ninghanglo, Khrist ajakong pirthe aphan kachepherang kelangjisi ar’ilo. Bonta, nangtum ephongbak matha ma, nangtum amonit ason, tangka amek kethe, Arnam kopi ason ma pu chininepin abang le, Arnam aphi kidunji aphan a’ot kedopo? Koson si nang sining karludun longpo? Koson si nang lahai ahir kangtangrak ason, matha un’epin ason ketheklongji a’ot dopo? Nangtum angho ke kachobei lapen keter alamthe, kachongthui lapen kachipindak si plengsetlo. Komentune ta ahok alam, kangthirjir alam lapen Nephan nangkachehodai alam nang ingho pen barbe. Nangtum akekroi aphan koson si ne kirippo? Nangtum aning arlo mek plengple lapen tangka pen anpar ajat ta avedetlo, bonta pirthe amar si nangtum kamatha along plengsetlo. Arnivang ta Nelong pen kelongji si chelakha bomlo. Arnivang ta, Nelong pen ko’an akhi lapen hormu-hortar longlo ma lasi nangtum lakha chot chotlo. Arnivang ta, Nelong pen hirjume kelongji si nang chonghongdinglo lapen pirthe akhi ke’ongdung pen ning kacheparongji si nangning hanglo. Nang ning kamatha adihutin along Ne le kedo kalidetlo, lapen Nelong pen kevang ahok alam le nang ning arlo kedo kali, bonta, nangtum apenan kalite nangtum apiso, nangtum asopomar, asopimar, lapen nangtum kecho kijun, kachingthang ape-ri anchot. Koson si ansose kethedung, kangtuiving angdeng an ning kacheparongji ma si nangtum matha chotlo. Bonta, nangtum apok inghangdak anle nangtum cho sita, nangtum kithi arpum anchot kali ma? Nangtum abang athak nangtum jonghe chepalangme sita, achethe kave abang arpum le kedamvoi chot ason kali ma? Nangtum apok aphan si nangtum chepeduklo, nangtum achu ingjui’et lapen lok’et an, bonta Ne pharman nangtum achu ejengnat ta nangpi un’e. Dode-sangse pensi nangtum rengbomlo, nang ok aduk chepedolo lapen nang tarlok aphan chitilo, nang ok ajoine, lapen nang sopomar lapen nang sopimar ajoine – bonta nangtum inutbak ta Ne ning kehang ason keklemji aphan mathathe. Tangte, Nelong pen kopi kelongji si nangtum aning thebomlo?

Ne sai keklem ahut komentune ta chingkhankhe. Monit atum nangduntoi puvoiphit sita, keklem nangji ateng pen si Ne klemvet lapen kithikmek ateng si klemlo. Lasi, nangtum Nephuthak jonghe kaheno nangklem sita, ingtontepin pensi Ne sai klembomlo, lapen kaningje nangji alam an ne ningje bomlo. Ne lam nang karju dunji aphan Ne pen kangvaitang atum aphan Ne hem along chehanglo. Ne lam aphan kachehodaidet, Ne lam kang’it atum aphan, Ne inghoi angno vanpo; Ne lam aphan kapanungkuk atum aphan, Ne lam karjuje atum aphan, lapen phererepin pen nang kachedan atum aphan, Ne latum aphan ehi anat koivet si kijutsi ado kipiji aphan pachonghongkoklo. Monit atum tangka kecho lapen hi’i ari arum si renglo, lapen laso apot si Ne phi nang kidun atum ahok aphan rire. Pudam pulote, keongdung atum ahokpet pen Nephan nang ingdukde; ahok alam pen Nephan nang ardomde, bonta tangka amek lapen nangkachedandong lapen kachongthui pensi Ne kanghon kelongji bor’ilo. Laso ajoine si Ne pulo: Akeongpi atum aphan phalo, bonta ajahak atum aphan si ingvaichotlo. Kephatang atum angbong amo kevangve lapen isivet akai along si latum renglo – bonta kangvaitang atum anta latum angbong pensi ingvailo, la kangvaitang atum ke ahok alam aphan kekroi lapen kedeng peme atumlo, lapen ahok pen kereng atumlo. Bonta latum ke kadokave angbong pen aphai kijumpik atumlo, lapen latum along pensi anong-anam Ne longpo. Laso ateng pen langdam lote, kangvaitang angbong pen nangta inutlo pu nang chini ma? Nang kijut arni kosonji nang chichini ma?

Ne kiputang ateng si, Nephi nang kidun atum ke ong’o bonta Nephan ahokpet nang kanghon atum ke ing’ar’o. Ejahak atum pu tahai, “Ne nangphan nangchinghonhe te, la an ador keso Ne tuji ma? Ne nangphan nangli inghonhe te Nangli phiphi la an nangdunji ma?” ahok alam, nang kapathedam alam dopik chenam, lapen nang kanghon, ahok pen, thepik chenam, sita nang Nephan nang kanghon ko’an arnuklo? Kiputang asonthot si “Kanghon,” lake aju kavepin kangthirjir lapen aban avepin ason, nang ning doan pen si inghonlo lapen lake aning sose. Kanghon along ke anam ave, ang’ang ave lapen chehelole. Kanghon along ke chehonthe seroire, chechobeibe, lapen resakjakje. Kanghon along ke kangthirthe lapen kachehelo pu ave. Nang inghon lote, nang chobeibe, lam hoithapthe, chongthuithe, chedande, puthip lapen matne aphan ale aphanchot lapu kali. Nang inghon lote, nang ning arong pensi chehodaidetji, kisung an ning arong pen chechaksenji, Ne pen chelang thekji, Ne joine nang pima kedo che’oji, nang hem-nangrit, nang phrang, nang riso akai, nangchor-nangrup kachiri anta. Kali pulote, nang kanghon lake kanghon kali, bonta kachobei lapen kachongthuilo! Nanglong kopi akanghon si kedolo? Ahok akanghon loma? Mate ahokhe? Son ko’an ason si nang che’o theklo? Koan si nang chipidetlo? Koan akanghon si nanglong pen Ne deng longlo? Nang chinima? Nangtum aning arlo ke kahingno, kachongthui, lapen kachobei – la pulote, nangtum akanghon koan si kangthirthelo? Nangtum kamatha ke Ne pharman chipidet lo lasi la anta chokpo pulo; nangtum kamatha ke Nangtum akanghon ke dorphluplo pusi tinlo. Tangte, nangtum alam lapen keklem ason kopi apot si kaike ta kachobei lapen lam karjuje pen plengsetlo? Nangtum Ne phi nangdunlo, bonta Ne lam aphan nangtum asap ta deng ingtungtedetlo. Lason ke kanghon pu unji ma? Nangtum Ne phi nangdunlo, bonta Nephan ke nangkoiroklo. Lake kanghon pu unji ma? Nangtum Nephi ke nangdunbomlo, bonta nangtum Ne kethan alam pen apot kroimolo. La kanghon pu unji ma? Nangtum Nephi nangdunlo, bonta Ne akereng aphan kroikre tanglo. La kanghon pu unji ma? Nangtum Ne phi nangdun lo, bonta Nephan nang kedeng nangji ateng pen nangdengde, lapen kaike ta Nephan nangpasiksaklo. La kanghon pu unji ma? Nangtum nephi nangdunlo, bonta Nephan nang kachongthuiji bor’ilo lapen ajat ason ahin sita nang chobeilo. La kanghon pu unji ma? Nangtum Nephan ruthailo, bonta Nephan nang phererelo. La kanghon pu unji ma? Ajat ahin sita nangtum Nephan chedanlo. La kanghon pu unji ma? Nangtum un an pen chehodailo, lake ahoklo, bonta, nangtum kenangji ateng pen klemkle. La kanghon pu unji ma? Langpeme pen kachini ateng ke, nangtum aning arlo asapso ta Nephan kanghon ave. Koan ne aningkan lapen la an alamthe Ne nangkethan, nangtum koan ale chepelongtheklo? La chelangpeme te mesenji kali ma? Chenam si Ne nangpulang nangtum aphan: Ne kehang amonit atum ke ahok kedopik amonit atum lapu kali; sita, Ne kangvai amonit atum ke Nephan nangchinghon peme atum. Lasi, nangtum kaike ta nangtum alam kaningje, akam keklem an chere peme nangji, lapen nang kemang, ning kamatha anta ang-ang kilitledetji le chelang peme non. Kijut arni nangkele apor ahut, nangtum akanghon Ne ingno nang kachehodaiji le klem paphrang non, kalite Ne ning kithi nangtum along pen damdedetpo!