Kijutsi Keledam Adim Aphuthak

Kijutsi keledamji adim aphuthak alam chethan lote, nangtum kaike ta laso aphan arsikjit pensi matha titi; lake; anparta, eson nangtum aning pen kacheraplok alam. Ajahak amonit atum longle along aphu ketongji aphan chonghong un’e, Arnam athengno akeme chekrong pen akeme adim kele longji aphan. Ne nangtum aning kekarkar pen chini un, lake pangdak teng’ai nangnelo. Lake nangtum nangbang aphan kivir along kejang pen kepajok kangtung penta apar litpik’lang, lapen ansosi nang kijut un’e adai kepho kar’i’e. Nangtum kemang ke methang aphan non masapso kejokvan pen, non masapso joichet pen kerengdun longji aphan. Lapen lasi nangtum padusi kele nangji adim pu alam klang lote asap ning siksakdet titi, kapheredam ke, jongsi nang kenangsot an chemathadamde pulote, nang Arnam aphan khamkhedet tahai lapen nang kachelonchit adai pho nangkok na. Kijutsi keledamji adim apharman nangtum ningkachiruiji aphan asapbak ta kekroikre ave, lapen nangtum angbong keongdung atum ke arnisi ahut kachongthuilok lapen kerelot atum menmen ingsamjin lapen ningkeme chemandet; nangtum keme kacheklang thuke monit aphan ha aklong an pangsamdam. Puvoiphit sitame, nang along “klarsap” aning do, lapen nangtum Nephan ning arlo doan alam chekhangkhepin pen angthun-angthun nangcheho bomlo, hala ning kephophe tahai mene, kachongthui, mate ningklarsap pen kachehodai. Kadokave pangrumpet, prangset pensi nang Nethengno “chekobir” tanglo hala nang kachepatujoi aot kaharnuknei angkang arlo kedo ason an. Chenamlo tema, Ne mantune ta halahei ason adung lelelang, athe Nephan halahei ason chinikhak saide. Nang kijut keledam nangji adim apharman me atalo along si damji Arnam akekroi chepalongji aphan chu ejengbak kachepanahok alar. Ne nangtum along chepachip mate pasik aret lapu aphan kali, lake nangtum amat ta Ne kopima keklem asai doan pen chepathengnono kevangji aning kaduredet apot. Ne nonhet kopisi kipuloma lake nangtum chininedet tahai, lasi Ne nangtum aphan isi joike pajirmidamlang: Monit atum kenangji ke ahokpet lapen chethe kali, mate nangkai aphan kosonsi kachari nangji pu aron ta kali, la ansose kijumlang Ne kachepaduk asai. Alar, nangtum kenangji ke kadokave nangtum nang’ok aphan kachepado ason an – keplang-kiphi, man kethe, hemtun, adam-asar, lapen sonsi do’olang. Nangtum ke Ne lamthe lapen sai pen cheprekdak chenam, lasi Ne nangtum akekroi aphan lamthe isi pen pajutkok un: mena-cheplangdet. Nangtum ning chethon peme ason kachepalongji aphan nangtum ajat ahoi-adui anta damdetji, bonta ne theklong’etlo nangtum Arnam aphan kekroi aphuthak kacheraplok alam along ke lasonthot chepadukde. Alar ke, nangtum masapso si ning chipi lapen masapso si padikrimchot. Laso athe si Ne kipulo kethenei akangthir aning kave atum ke Arnam aphan kekroi along keplengdunde atumlo. Matha pemetha – nangtum angbong ta keplengdunde abang doma?

Nang chini nangji Arnam aphan kekroi along keplengdam kelong lake monit atum methang asai angthek pensi chepalong; monit atum chepachun un’e bonta alar plengplerong, hala ta amethang asai angtheklo, lapen kaprek ason pen ke thangnat asai ta kacheparjandun avelo. Ne kroilo nangtum ning kehang ason chepalongji aphan Arnam aphan kekroi along pen abat akisung-keboi kedo asai tame klemdetji, lapen nangtum halaso aphan arsikkrung pensi mathaji, lapu anpin si manpo nangtum asapbak kechokche anta chechak ingtungtedetji; lahei henlo kachemitmepin kachepaduk lapen kabor’i nangtum nangmethang akai along kachipi. Nangtum Ne’ok-vi aphan chongthuidethai halason apor ahut nangtum nangmethang ahemtun abangphu aphan ta chechongthuitheji. Lapuson henlo nangtum kachepaklangver a’ot lapen nangtum nangkai kabochebom aron. Nangtum methang kijutsi keledamji adim apharman Nephan nangchothuiji aphan ahokhe araje le chepaklangbom kalilang ma, nangtum kijutsi keledamji adim kepamepikji lapen nangtum kemang aling kepachunji aphan? Ne chinilo nangtum akanghon lapen kekroi ke ihutso aphan anchot, lasonthot si nangtum aning keklar ta lo. Nangtum alamrai lapen nangtum kitu anam non kedobom apor aphan anchot lapen mohut aphan kali puhe? Nangtum ningkehang ke ejaivet pensi kemepik kijutsi keledamji adim kachepalong kangtung, beha keklemji pu isinat akemang pen. Nangtum laso asai keklem ke ahokpet along preng chepadonang pu aphan kali, lapen ansose si kalilang Ne nangtum apharman kipi anam nangkachituji aphan. Thihek pen, nangtum methang kere-kethek abidi pen sai keklem ke methang ningkehang ason kachepalongji aphan anchot, bonta halaso apharman kachesongji kali. Lake nangtum ning aklong pen akar’i kali puhe? Nangtum methang aphan cheparjanthap nangne, mate methang aphutarlok aphan kijutsi keledamji adim apharman cho thekthe mate mekjang thekthe anset anke kamatha chepasung nangne. Nangtum kelong nangji ason doan mo kijut ahut lin etsi paklangpo pu ahok kali puhe? Nangtum anuttin ta nethang arpu thek-an ke pamesen pen cheklem nangpo, klarsap lapen kangpuvang aning pen, lapen kopima anam ta kituji aphan ning hang nangji. Nangtum kipu asonsi, mo arni nangle lote, Arnam ke majok le kisung kephotang mate anam kitutang atum aphan anke lang pangkre ponpelo. Lapuson ningkepathe ke kroime, lapen nangtum tengne nangne puke ahok chenamlo. Lason pen anvet si Ne nangtum aphuthak kamatha Nemethang aphan chepadome unpo. Kali tangte, mononphit tame Ne nangtum aphan ke Nemethang kamatha chepangsam un’e amonit si nangtum mandetpo, lapen kaiketa nangtum Ne ningkedokde ahormu mandetpo. Jongsi nangtum kadokave ta methang keme-kaheno keplak ajakong ateng klemdunthek lapen Nephan kadokave nangchipidet, Ne sai apharman ajat kabor’i ta bikokke, lapen isi ingthimlim akai ajakong Ne birta kapachetak asai aphan chipidet, tangte Nening nangtum apharman kachehok si aphong-phong thurthejima? Lasonsi, Ne nangtum aphuthak Nening aphan chepangsam unpo, un’ejima Ne? Nangtum Ne kamatha ateng pen asapso ning’oi meme achet ansi keklem unchot puke therak meme alam. Alam si lason tangdet aphi ta, kosonsi nangtum Nelong pen nangtum ningkehang ason nangkachohang aning kedolang?

Nangtum kijutsi keledamji adim lapen nangtum alekha ke nangtum aphan kenangsotlo – halahei ke nangtum chematha parsikponvek nangji. Nangtum kekroi ke, jongsi nangtum cherepik penle sai klemkle, lake nangtum kijutsi kele adim kedoji kangtonlo, nangtum methang si nanglekha kachephalangnolo. Bonta hala methang kijutsi keleji adim apharman si jakong chepadamchot atum aduk chepadonak pu nangtum ephongbak mathathe ma? Halapuson kachepaduk ke ahokpet kali – halahei ke pachobai lapen kachongthui. Alam halapusonlo pulote, kijutsi keledamji adim apharman sai keklemchot atum ke kerem ajarkan along si dolo, atheke inut amonit Arnam aphan kekroi along kerem lake kachongthui ajoine pen. Ne aphrang ningje etlo Neke kero phartar mate kepalu, mate kopine ning aklong kemang kedo pensi kachepame ning dokde. Ne ke ningklarsap abangphu atum Nelong kedo ahokpet ason lapen Ne kemang ason pen chepathengnohai atum aphan si ning kedok. Lapen anparta, monit atum Nening aphan kangtuinei kalana lapen kamatha dolote, lapen alangtum apharman ajat ason ta chipidet un lote Nening hanglo. Lapuson abidi pen anvet si Nening aphan padome unji. Non amat ke, nangtum aphuthak Ne ningkedokde ason koan do? Nening kedok ason koan do? Nangtum kijutsi keledamji adim ajoine lapuan prekjam kelangmememe angthek kacheklang nangtum angbong majok ta chininelang pu pu unji puhe?

Nening along, Ne majok aning le akeme matha lapen aprang kedamji akemang kedo atum aphan’an ke aduk kepado abang cheman ingtungte, lapen anparta klem ingtung thuthelang hala ningklarsap pen methang asai cheklembom atum ajakong kepajumdun. Ajat le pu sitame, Ne nangtum anuttin aphan ta nangtum along kedorde lapen nangning aklongsi adim along kedo kasa’ur akarjong aklam ning nangpavang nangkok. Ne lapuson keklem ke nangtum Nelamthe pen chepathengnono ahut nangning nangchipi dunji mene pu akemang pen, atheke Ne kelang seletnei ke monit atum Nephan nangkachongthui. Ne esonnat akemang ke, Ne sai kijutsi angdeng along, nangtum kemepik asai chepaklangthekji, lapen nangtum methang aphan ingthinlim aling pensi chipidetji, ning-ebeng kachipi asai ke kangtonpo. Ahok tema, nangtum kadokave ta kemesen kijutsi keleji adim kelongji aphan ta Ne kemang do. Ajat sitame, Ne kenangji ason dolang, lake nangtum methang aphan isivet lapen kijutji kachehodai Nephan si nangchipipo pu akemenei alamrai. Komatne jongsi isivet aphan aning chipivet ave, tangte alang ke Sobar kachobivet kachinghon asonlo, lapen Ne anpar ke alangphan asai ke’enji aphan chobibelo bonta api-apo atum kapachelanathuji aphan hem toijuipo. Nesai ke nangtum aphan kerapji aphan mepiklo; Ne nangtum along pen kelongji pu kemang lake klarsap lapen angsong kedam kangtung aning, bonta non anta Neri ingthaidanglang. Laso aphuthak mathatha: Jongsi arnisi Ne non ateng si ningkangbom, lamthe pen kethan un angkang pen angtan an, monit atum aphan Ne kopi a’ot doji? Ne non asonsi nangtum aphan chingnek-chingniji ma? Non ateng si Nening ingsamjinji ma? Nangtum halabangso amonit aning kepho alam chini thekma, lale alang ahidi ke bai’et aphi ta, sok imu ta chorot longle? Nangtum chinima inut amonit aning koan si aduk dothek jongsi alangphan isi thedung ajai ro lote. Ephong ning chethe pen keplengsetpi, alangphan akaheno angdeng along bikok abangphu aning keho nangtum chomat unma? Nangtum inut aning kachoteng pen kapathurplut abangphu aningkithi theklongloma? Nangtum inut kachongthui lapen kelangselet kachetongnang abangphu alar kihui’oji aphan aning kekarkar koan lone chini thekjima? Jongsi nangtum lahei amonit atum aphu along kachethap’e alam chini, tangte Ne kamatha ke Arnam mo alar kachehui arni monit atumphan kopi a’ot pensi kelangji laso kachiniji ke nangtum aphan sungse nangji! Kijutsi, Ne ningthelo nangtum kadokave ta methang kijutsi keledamji adim apharman arsikjik pen mathapo pusi, nangtum kabor’i along kachongthui asai le jokponpe pusitame, kalite Neke nangtum aphuthak Nening arlo ning kejangje dobompo. Lapen lason ning kejangje kopi anatsi nangjaponji? Nangtum methang aphanle kachepalu kalima? Hala methang kijutsi keleji adim aphan chematha sitame amethang si chephalangnodak titi atum henlo kepajok henoneiji atumlo. Jongsi alang aning kithi lapen ning kejangje le cheman nangkok pusitame, komatsi lason abangphu aphan kangjinsopo? Amutpi, Ne nonpu ta nangtum kijutsi keledamji adim chelonchit lapen kemesen kelongji aphan kar’i do, lapen, anparta, Ne kemang ke nangtum angbong majok ta laso kanahok along klokledet nangji.