Nang komat aphan si ahokpet kahonjatlo?

Non amat, nangtum kerengdunbom arnitin ta arsikjitlo, lapen lake nangtum akemang lapen lekha aphan akenangsot thepik, lasi nangtum along pini pima kedo ason an aphan aman pinangji, lapen kedambom asap-sap apor aphan ta rimbirti nangpo. Nangtum methang aphan akethenei ale kachipi thekji aphan un’an apor chovakdun nangji, atheke nangtum nangkai apor dotik rengnaknedetji aphan. Ne kopisi lapuson alamthe kaningjedet ma pu nangtum manghuhak tahai. Chethandak apot, Ne nangtum a’ot-adur pen asap ta ning ingsamse, atheke Ne nangtum pen kemangdam ke asap ta nangtum pini kosonma lapuson kali. Lasi Ne ningje melo: nangtum anuttin ta kisung akora along si dolo, lapen nangtum non kerap aphan kasarlang lapen aphrang ahut hokpet lapen katheang kiri aningkehang ke non kijut along patebokbomlo. Lahenlo nangtum aphan adai kachitu aphan kijutsi aporlo, lapen lake Ne komantune ta kamathathe asonlo. Ne ahokpet alam pen kachetonte ke ningje ingtungte, athe nangtum Nephan ning nangpa’oi thedung khangjanglo. Tahai nangtum bangso kachikubir deng ingtungte, ahokpet ason pen chepathengno ninghanghe – bonta Ne nangtum aphan ahir ingtangrak pen nang arju nangkokji: Lapuan aningkan angbong, ahokpet pen nangtum aning kopi ason pensi keplengtirlo? Komat aphan si nangtum honjatlo? Lahei akarju konatne pen si kevangplut pu ningjedetri, lapen kopisi Ne lahei ason nangkarjulo pu Nephan nang arjuri. La chinitha: Atheke Ne nangtum aphan apar nangchinipeme, nangtum aphan nangmatha ongmuchot, lapen nangtum choklem-chodam lapen sai along Ne methang aphan nangchetodun ongchet apot si Ne nangtum aphan apor hothepin pen lam nangchethanji aphan lapen kethedung akisung pavepinpen nangkehanglo. Bonta nangtum Nephan anam nangchetu’i ke kachelangselet lapen kachechak un’e kachepajok pen akaprek thang ason ta ave. Nangtum Nephan lapuanpin nangkapangkrelo; Ne lahei aphuthak thangnat chininedet unji puhe? Jongsi lahenlo nangtum ahokpet kekroi pulote, lake ansose si nangtum Nephan kanghon penle nangkedeng kali pu angthek si paklangbomlo. Lasi Ne pudetlo, nangtum sangti along nangphu chepipbom tanglo. Nangtum puan akerelo nangtum kopisi keklembom loma pu anta chechinine – lasi nangtum Nephan lamklar nangchipi pen kopi ale cho’enthektam po?

Ne nangtum aphan arsikkrung pen nangkarju kangtung alam ke ahokpet nangtum aning komat aphan si kahonjatlo? Ne ningthelo, lata, nangtum anuttin ta kamatha chepheraipo, nangtum komat aphan si kahonjat lapen komat apharman si rengdunbom pu mena aphan charjupo. Tahai nangtum komantune ta lahei akarju alamthe aphan ardi pipedet, lasi Ne lahei aphuthak alamthak nangjaidak te kosonji?

Aning kachibi atum an ke bangso alam kroivekji: Monit ke methang apharman si kereng lapen methang aphan si chehonjat. Nangtum alamthak kechoklimlo pu Ne nangkroidunde, atheke nangtum anuttin ta methang-methang akai along si rengdunbom lapen anuttin si methang-methang akisung pen chesongbom. Lason apot si, nangtum kahonjat ke nangtum kachinghon atum lapen nangtumphan ningpangsam ahormu doan aphan; nangtum nangmethang aphan le akangthimlim pen kachehonjat kali. Atheke nangtumphan nangkanghum-kangkatevar ke kaprek amonit atum, kopine esonbak asai keman lapen nangtum adung-arai kedo ahormu, nangtum nangmena aphan le chehonjat kali. Ne lahei kaningje ke nangtum ahonjat kapachetak aphan kali, athe puan aningkan keong angbong ta, Ne nangtum angbong inutbak penta honjat longlelang. Lapuan aningkan nangtum Nephi nangdunlo, voiphit sita Nephan asapbak ahonjat ta nangpipe. Alar nangtum ke kachinghon amonit lapen nangphan ningpangsam ahormu adung-arai si artingchen – lapuanpin si chemanlo nangtum ajat apor ahut, lapen nahok le nang dam ta, nang halahei aphan nangning adunghet si chibi lapen komantune ta che’o’e. Komantu ma ta nangtum kopine ningkehang ason dolo te ning kar-kar lapen mon’e titi, lason ke nangtum Nephi nangdunbom ahut si cheplang, mate nangtum Nelamthe nang’arjudunbom ahut. Lasi, Ne puji nangtum pen Ne nangkehang ahonjat aphan ke alar nangtum “kapangreng api” aphan kapahonjatji aphan si asai enrong. Nangtum Nepharman eson-sonni ahormu dan chipi tahailo mene sitame, lake nangtum along kedoan ason le kapaklang kali, lapen nangtum Nephan henlo ahokpet kahonjat pu ladak cheklangkle. Nangtum nangning kehangpik asai along ke methang aphan chetodunji: Ajahak amonit atum chehonjat ke asopo-asopi aphan, kaprek atum ke apenan, apiso, keplang, sai, kethe-keding, akangtui angdeng, kalite arloso. Nangtum kahonjat ason apharman ke komantune ta ningsiksak lapen kelak ave; nang ansose kar’i lapen ningkarik’rak chapabatji halahei ason aphai keong, ansose akeme kepalongthuji aphan, lapen nang komantune ta ingtonte. Ne lapen Nelamthe aphan ke nangtum kar’i ason anung si nangdoi’et titi. Lapen nangtum lahei aphan aphisi kibi pen anpar ke kaprek abidi avelo. Ajahak atum ke aphisi adim ta alangtum kachelong thekthe kahonjat ason aphan si sikpidet titi. Komantune ta alangtum aning along asapbak ta Ne kedo angthek avelang. Ne nangtum pen anpar nanghangdetlo pu nangtum matha tahai mate nangtum aphan thangbakbe si nangkebok pu tahai – bonta nangtum ephongbak kamatha apor chipiloma bangso alam aphan, nangtum nanghem asor atum pen ningkarong pen apor padambom ahut, nangtum ephongbak ta Nephan honjat doloma pu alam? Non ason apor ahut, lahei alam nangtum aphan ningpadonone ma? Nangtum aning karengme pen plengset ahut, lapen nangtum asai apharman anam kelong ahut, nangtum methang aphan kenangsot ahok alam kachepaklangkle apot ning cherunre ma? Komantu si nangtum Nelamrai kelongle ajok kachirulo? Nangtum nangphutarlok chephalangnoji lapen chepadukpratji la nangsopo-nangsopi ajoine, antame nangtum dorlo pupe; nang kekroi ke nang alangtum apharman klemsipselang, nang alangtum apharman nang un’an asai klem’etlo kalilang. Nenat ke, bonta, kaiketa cherere lapen mathakrang; ne ke nangtum kakimo alam along si dochot, bonta nangtum aning along ke nanglutdunde. Ne nangkachesotrut lapen kachepaduk ke kaike ta nangtum munthi un’e, lapen nangtum lahei aphan ephongbak ta kachoro ave. Nangtum elomso aphan munthi chotpo lapen la an ta dorpo pusi mathakok. Lason kahonjat le ne ajirdingklui pen kar’idam kali, bonta lake ne ajirdingklui pen kakhinde asonlo. Ajatnon, Ne ajatle ningje, nangtum eson-sonni alam si non an ta chekubirbom; nangtum laphan kroithip un’e, atheke nangtum “ningchethepik”, lapen nangtum kaike ta Nelamthe along pen si kihum lapen kachongvai. Jongsi nangtum pini anta lasonlang pulote, Nelong nangtum methang aphan ningkachethe aphan kanghumji abidi nelong do – lapen, anpar ke kopilang, Ne nangtum aphan Nelamthe doan ke ahok, lapen lahei angbong isibak ta ahok alam aphan kapakekdam ave pu nangpachekubirpo.

Jongsi Ne nangtum athengno asapso atangka non amat bipo lapen nangtum aphan kachongvai ajakong nangpipo – lapen jongsi Ne nangtumphan kachongvai apot nangpinremre – tangte nangtum angbong ongdung ke tangka aphan si ingvai pen hokpet aphan ke panungkukji. Nangtum angbong memuchot atum ke tangka aphan padokok si hokpet aphan ingvaipo ninghangherem sitame, sonsi hala angbong dokok atum abang ke ari ehong pen tangka chothidunpo lapen kaprek pen abang ke hokpet aphan otpo. Nangtum a’ot alir ahokpet emethang amat nangcheklangdakdedetji ma? Ahokpet lapen kaprek nangtum kahonjat ason angbong kangvai ahut, nangtum kaike ta lasonsi chonvaipo, lapen nangtum a’ot ke lasonsi doverji. Lason kali puhe? Nangtum angbong kechok lapen kechokche adak kechonvoi atum do’o’e ma? Laso keme-kaheno, ake’ik-akelok angbong kachepate along, nangtum jonghe ta chinivekpo nangtum kachongvai hemtun lapen Arnam angbong, osomar lapen Arnam angbong, monsam lapen kekhamkhe angbong, keplang lapen kiduk angbong, kangtuiving manpeng angthek lapen bang pen thangnat kacheprekpre angthek angbong, bang nangkarchakdun lapen bang nangke’o’et angbong, lapen kaprek do’olang. Isi ningkarong hemtun lapen kachekak ahemtun angbong, nangtum aphrang abang si chongvailo thangnat kekroikrerem avepin pen; keplang ason lapen keklem nangji arpu angbong, dak lethot ta nangtum aphrang abang si chongvaililo, mononphi akung along nangkacherui^[a] aning kehang avedet an; karengme lapen kiduk angbong, nangtum aphrang abang si chongvailo; nangpiso, nangpenan, nangsopo, nangsopi lapen Ne angbong kachongvai ahut an ta, nangtum aphrang aphan si chongvailo; lapen kamathathap alam lapen ahokpet alam angbong, nangtum puthot aphrang aphan si chongvaililo. Nangtum kapahi’i a’ot doan pen chetongdet aphi nonke Ne nangtum aphan kekroidam avepin khangjanglo. Nephan lapu amat si nangpamanghuhak titi kosonsi nangtum aning lapuanset kangdukjom kacheman pen kachingrai un aret lone. Koan lone aningkan kachetothip lapen kachepaduk ke Nephan ale puke nangtum nangkachekak lapen ningkachethethe pen anpar thangta ave, bonta Ne nangtum aphan ningchethe ke arni kedamtin si kebat, athe a’arni ke kadokave athengno si patutepinpen jaidaklo. Bontame nangtum ke kangting lapen kapahi’i ason si kiri si nija chepasolang, lapen halahei aphan ke’ot achiki pavebom ingtungte. Kopilo, tangte, angthek keklangpo ke? Nangtum komantune laso aphuthak kamunthi peme dolo ma? Jongsi nangtum aphan non ephong kachongvai apor nangpi pulote, nangtum adim konatpo? Nonta aphrang abang jilang ma? Nangtum Nephan nonta ningkejangje lapen kedononei ningkiduktong nangvanpi jilang ma? Nangtum aning nonta isinat akar’om akedome asapso si dochotliji ma? Nangtum non ta Nening nangpadomeji aphan keklem nangji asai chinine jilang ma? Non apor along, nangtum kopilo kachongvai? Nangtum Nelamthe along nangchehodai poma mate latum aphan karju seletji? Ne’arni ke nangtum amek athengno jaidaklo, lapen nangtum kopima kachetong ke kai kimi lapen kechengmi adimlo. Sitame, Ne nangtumphan nangthan nangji laso kechengmi adim ke kedamtang asai kimi kecheng adim kali, bonta akeban kejut adim. Atheke, lake kejutsi asai lo. Ne kamatha ateng te nangtum ta laso kecheng adim along kopisi kepreksi doma chinipo. Arnisi arni prapjin pen, sitame, nangtum laso kecheng adim ahokpet alamjor chinipemepo, lasi itum laphan kap’rappet lonang lapen ingthum-arne lonang angdung-kiti kapavangji aphan! Bontame, Nephan nangtum aphuthak nangpamatha aret’lang alam ke lahenlo, nangtum aronre akangsai lapen aron lapen akangsai pen chepathengno lote, nangtum kaike ta aphrang aphan si chongvairong. Hala ke, sitame, nangtum kedamtang alam saide. Ne, lasonsi, kedamtang arni nangtum alam doan tengne’etpo, lason keklem ke sungkrung sitame. Ajatnon, Nelong lahei keklem aphan mesen atovar do: Chuhut adim mohut pacherai lonang, lapen nangchuhut aharchi aphan nang nonhut hokpet abangphu pen kapapraiji ahovang thonon. Sonsi Ne nangtum aphan non ephong kachongvaiji aphan nangpasiksak’lipo: Chenam’et pen nangtum komat aphansi chehodailo?

Kapachini:

a. Akung along nangkacherui: Kahingno akrong da’an pen nangkacheruithu.