Sonthom Kapare Alamthe

Arnam aphan kekroi abang ateng si, nang anut kaprek aphan kali bonta ajat ason along ta Alangliphan si kroivet nangji, lapen doan ason along ta Alangli ning kehang along si thirdunthip nangji. Ajat le chethan ta, anuttin ta bangso alam chini pusitame, monit atum prekjam akisung ajoine – kachinine, athon kerore pen prekjek, lapen kachongthui-chokai ajoine, pudam sinang – lahei ahokpet alam, doan angbong pen keklardaknei lapen akenangsotnei, lahei ke Alanglilong si kangthimlim cheklangdak, lapen lasi, nangtum kijutji apor arlong along tokte aphrang, Ne nangtum aphan kechengsi nangtum aphan kenangsotnei eson-sonni alam nangthan nangji. Ne angthun ingthun ponpe aphrang, nangtum la chini nangji: Ne kaningje alamthe doan ta kadokave monit akhei aphan kejongdam ahok alam saidelo; inut jongket mate monit ajat aphan pule kejongdam pu anchot kali. La apot si, nangtum ahokpet along dothip pen Nelamthe kachiniji aphan matha parsik nangji, lapen kethakthepin aning kedo lapen sai cheklem peme a’ot do nangji; Ne kaningje athetin alamthe lapen ahokpet aphan ardi pipedetri, lapen Ne kaningje alamthe doan aphan ke pangkreve pen enri. Nangtum akai along, ahokpet pen kachetonte ason nangtum penang an klemlo, lapen lasi Ne jasemetpet pen karjuji ke nangtum ahok achakri le mannoi, abolon kave lapen kun kaheno arideng chingnang jokplot aphan, lapen hokpet aphan kengpak pen dong jokplot mate Arnam ahem nahok atok aphan ta pasa’ur jokplot aphan. Lahenlo nangtum doan aphan nehin pen nangpacheremek alam. Non abang ke erideng along kedo alam aphuthak si Ne ningjepo.

Kechengsi, nangtum ang-ang ajoine, nangtum Arnam alamthe entha. La kipudamji puke, nangtum Arnam ahem along abangphu pu nangtum chikubir’et apot, nangtum lasi Arnam along monsam chevan nangpo lapen Alangliphan ningpapleng nangpo ajat ahinta. Kenangji ke, pudam lonang, sai doan along aron kekroi peme lapen ladak ahokpet along kethirthip. Jongsi lale nangpen litjet, tangte nangke Arnam pen kakhinde lapen kiphlung nangpo lapen anuttin amonit ta nangphan ke nangdengdelo. Ephong jongsi nang lapuson aneknok along kejang lote, nangphan ke Arnam ahem along inutlo pu lakha pon un’edetpo, lahenlo jongket pen pudam lote Arnam pen nangkedengde pu.

Adunthu, nangtum chini nangji Arnam ke ahokpet atum aphan si aningkedok. Kemandam’i ke, Arnam ke hokpet, lapen Alangli lamthe aphan kaiketa kroi’un; Alangli sai, anparta, kaiketa kechokche ave lapen jongdun jokplot, lahenlo Arnam kopisi Alangliphan chenam-chenum ahokpet atum aphan aning kedok ke. Ahokpet pulote Arnam aphan ning kachipi, Arnam along ajat ason penta ahokpet, Alanglilong ajat ason along ta klardak, komantune ta ahok alam kapatute, nangpen angsong lapen arum kedo atum aphan kachongthuiji kabor’i’e, lapen Arnam pen ale kachepalongji aphanchot le sai keklem kali aphan henlo. Thihek pen pulote, hokpet keman pulote lamthe lapen sai penta kangthir’et, lapen Arnam punon monit aphan punon kachongthuithe. Ne kopisi kipuma ke thangta kali, bonta nangtum aphan ke phantni akisung. Ongdung amonit atum ke ahokpet alam kaningje lapen ahokpet asai keklem alar kedengji ke chom ameherang along kedam. Asapso kahonthe ke do Ne kabirti angsom along ahokhe atum aphan kepameji abidi dolang. Kalanglo, Ne chini nangtum ahokpet kemanji aphan koan si kisung loma, atheke nangtum kadokave ta repik, nangtum methang kacheselam apun akaibong abeng pen monit aphan kilin koan kethek, lahei si Nesai ke ansose nangpajoi. Lapen nangtum ahokpet alam abang aklong along chidiphet titi tangdet, laso apotsi, Ne nangtoipo nangtum aphan, inut aphi inut, kisung along me akar pen “anem nangpa’enji” aphan, laso aphi nangtum Nelamthe kekroi along kithiklak ason dothip thekji aphan. Kijut ke, Ne nangtum angho pen nangherekpo “Arnam ke kekroithip Arnam” pu alamthe, konat pensi nangtum nangning chetheng pen ningripo, “Kachongthuiver ke monit aning!” Halason apor nangtum aning a’ot kosonji? Ne kamathadam ke nang non ason ateng ingtangkring kalidetji. Lapen ansose si non ateng pen “kamatha karnuk lapen kamanghu” kijumlang. Arnam kedo along, ajahak atum ke ajat ahin penta choklim lapen mesen, latum “do-thak mesenji” aphan chepasungdet, bonta latum Karjong athengno ke aso kangchim nangtetpo lapen achimi padingpo. Nangtum lason amonit atum aphan ahokpet pu atum angbong anghoi pidunji ma? Jongsi nang ta kachongthui abang, anut kaprek pen kachepamethek abang, “anut kaprek pen chepamethek” abang, tangte ne pupo nang ke chenamta inut Arnam pen chepakloji kabor’i abanglo. Jongsi nanglamthe heihui kachepalam lapen amo kave alamklar si chingvuinok, tangte ne pupo nang ke inut ahokpet ason aphan asai along kevan aning kehanghe abanglo. Jongsi nanglong kachepachoi kangtungte ningchetheklong ason do’o, jongsi nang nangmethang along kachepatujoi karsik’o alam angtan jai ingtungte – nang kisung ason – bang athengno atur kedo aloti kiri, tangte ne pupo nang ke inut joikeke kejok kelongji abang kalilo, lapen joike pen akangting pen nangketetji abang kali. Jongsi hokpet atovar kiri nangphan ning nangparong peme, pulote nang inut kaiketa katheang along si kedo abanglo. Jongsi nang Arnam ahem along sai keklem abang keman pen ning chingsam, kangting along cheroktok lapen cherepik pen sai keklem, kaiketa kipi lapen mantune ta en’e, tangte ne pupo nang ke inut ningchetheme akurusarlo, athe ke nang anam hanghe lapen inut ningkeme abangphu si kemanchot. Jongsi nang prangset cheman ingtung, jongsi nangmena kangthimlim amat chepadam et ingtung, jongsi nang nangmena akai aphan Arnam apharman chipidet ingtung lapen alangli hakhi along thirkluk pen arjap, jongsi nang Arnam aphan aning kepapleng along ansi ning chepaklarsap lapen methang apharman chelangle mate methang apharman en’e, tangte ne pupo lapuson amonit atum henlo katheang along jakong kelong lapen halabangso alongri along kijut un’e akai an kerengji atum. Nang chechini nangji nangmena along ahokpet kekroi lapen ahokpet ningchetheme doma avema, nanglong Arnam apharman kisung kachechak alammo doma ave, lapen nang ingthimlim pen Arnam along chethon loma chethonthe. Jongsi nang lahei duredet, tangte nanglong kedo jilang ke lam karjuje, kachongthui, mek adang kethe lapen lamhoi. Nangning ke keklarsap pen kachehelo tangdet apot nang mantune ta Arnam pen mesen akedeng longlelang lapen mantunte ta katheang along dodamdelang. Kijut ahut inut abangphu a’ang-ang kekek dunji ke inut abangphu aning ingthirma lapen avi pen ke’er avibong doma ave, lapen akarjong ingthir ma ingthirthe. Jongsi nang inut ning kangthirthe abang, aning arlo kelang selet kedo abang, inut akarjong kangthirthe abang, tangte theklorlo nangke monit aphan adai ke’en adim si jutdampo, nang ing’ang alammo along ketok’ang ateng. Jongsi nang ning ingthirpik pu chipu, bonta mantune ta ahokpet ateng sai klem un’e mate ahokpet alamthe kaningje ave, tangte nangke Arnam nangphan nongnam nangpapinang pusi kachonghong loma? Arnam nangphan Alangli kachinghon parpik abanglo pu nanghokji pusi ningchethebomlang ma nang? Lason kamatha ke ingnek meme kali? Nang ajat ason along ta Arnam aphan kachongthui; kosonsi Arnam ahem nang ason abangphu aphan kechakpo, ari ningke kangthirthe abang?

Kethom angdeng alam Ne nangtum aphan nangkethanji puke lahenlo: Anuttin ta, Arnam aphan kroi pen akai along rengbom ahut, Arnam aphan kekhang lapen kachongthui ason klemlo. Ajahak akelet asai kechokche pu hok ponpe ta chok, bonta ajahak ke diya un’e; atheke kachari aron karkan penang asai do, Arnam akun aphan kapanahok asai. Ongdung methang ang-ang aphan kachematha atum ke lahei kopi asailo pu nang arju tahai. Nangtum chini nangji nangtum ke nang’ot pen cheparoka lapen chepindak atum, lapen ahokpet along kachehodai kangtungte atum. Laso ajoine, nangtum methang aphan chelang-chemunthi peme aphi Ne nangtum aphan nangthanpo echet aphi echet. Ne nangtum aphan pinkhatlo kachari aron alamthe aphuthak ansose mesen pen kachini thekji aphan, lapen Arnam akun kachiniji aphan bor’i padikrim noi. Jongsi kali pulote, nangtum nang-ingtur kachinghipthip pen kedoji aphan sungkrungji, nangtum ade apar kejokvan pen klemvoipo ase thedung alam pen, lapen chiputhekthepin pen Arnam akun aphan panahokdetpo lapen kangting along jangchokpo, Karjong Kangthir lapen katheang do pu chepangbodetpo. Athe ke nangtum nangsai along aronre saide, atheke nang keklem lapen kaningje ke kenangnedet ason, nang chelonchit alar kachehui phopo. Nangtum chini nangji nangle nangsai lapen lamthe along aronre saide, Arnam ke la sonni along ta aron’et. Nang alar kachehui kepho nangkok atheke nang Arnam aphan si kekhamkhe, monit aphan kali. Jongsi, nangkai along, nang Arnam akun aphan kekhamkhe asai klempik, tangte nang ke chom-meherang aso manvek nangkokpo. Monit athengno ke nang ahokpet pen kachetonte asai jumhek si klemlang, lapen abat thangnat kali pusi cheklang tahai. Nang chiniloma, bonsitame, Arnam amek athengno ke nang anpar apap kepabat melang abang kalilo si chemanlo pu? Atheke nang Arnam kachari aron karkan ephong soselo lapen dothulang, anapar ta, ningcherui angthek cheklangklepinlang, kaprek atovar ke avelo bonta nangphan chom-meherang along nangkejok henlo, Arnam adai nangke’enji adim. Asapso aphai amonit, Arnam aphi dunbom ahut, ajahak aron karkan asai klemlo, bonta la chelangdet lapen paredet aphi, latum pajopen amena chongthui-chobai ason chetheklonglo, hadak pen aphi latum ahokpet atovar keme lutdunlo, lapen latum pini ke aklong along thirthip si dolo. Lapuson amonit atum henlo ha kijut ahut an ta kedoji. Ajatnon, lahenlo Ne kiri aningkangthir; jongsi nang inut ningkangthir’et abang lapen aron-ateng si sai keklem, tangte nang Arnam aphan ning chetheklong ta chok. Jongsi nang keklem asai along nang Arnam akun aphan kekhamkhe ave, lapen Arnam akar’i ridun, lapen Arnam aphan karcho lapen kardom aning do, tangte nang ningkekroi ta apun an ledunlo. Komatsi Arnam aphan karchoche lapen kaphere ajok keklemhur aning kave atum ke Arnam kachari aron karkanji angring ingtuipiklo. Ongdung atum ke amena aning kehang pensi Arnam aphan sai keklempi bonta Arnam kachari aron aphuthak kachinidam ave, ansose kijumlang Alangli lamthe kethandamji ason angthek. Lapen lasi, alangtum mesen aphan kimindam pen, latum ongdung apor ke Arnam kisik-kedang ason aphan kekhamkhedun si cheplangrong titi. Ahir ingtangrak alam along, latum aphan ke varphit titi, kevangji apor ahut Alanglilong kidun longji avarsai ta piponpe, lapen chom-meherang along si jok’et, Arnam ahem pen kacherap ason doan jutkok. Lahei amonit atum Arnam ahem along sai keklemdun ke alangtum kachitin kemesen kimindam pen, lapen kijutji ke Arnam akun aphan aning kapathi pen. Monit atum saiphu lapen recho atumphan sai keklempi a’ot si Arnam ahem along chevanpo lapen kapathu cheng’ipo, halahei ta ladak joike pen asai enmeji pu mathapla pen. Mantune ta alangtum mathathe Arnam along biresak akun le kedo kali, bonta teke akun. La apotsi, Arnam pen kachepatebokchenglang atum ke Alanglipen chingki-chethan thekthedet, athe Arnam aning ke monit aning ason kali. Ongdung ahokpet ason chinidet ansi nang chingtontepinpen Arnam aphan chini unji. Labangso agian lamthe lapen dhorom aron alam kethan penle keman kali bonta ador kethedung ahormu asonben ensi nang Arnam pen ningchethe seroi kachepho along lut longpo, lapen Alangli nanglong ning cheparong pu ahakhilo. Jongsi nang gian araje binong kachinidam duredet lapen ahokpet ason kacheparisim ave, tangte nang nangning kehangpik asai keklem pen kevangji ke Arnam nangkelang selet lapen aning kithi anvetlo. Non anke nang pangthek thek nangpo Arnam aphan kekroi ke dhorom lapen Arnam alam kacharli ason kali.

Ne nangtum aphan nangpare’i alamthe le thihek pusitame, Ne kapajirmi ason henlo nangtum along kadureneilo. Nangtum chini nangji kopima Ne non kaningje alam an ke nangtum angbong Nesai kijutsi aphanlo, monit kijut kosonji ma kapatiniji aphanlo. Thangnat ale kevangve asai ne anpar klem ingtungtelo, lapente Ne thengpi thithu ason ningchethe henono amonit atumphan japonbom ninghanghe tanglo, lapen ansose ningkehanghe ke joijoi pen akun kaheno kedo atum aphan kejapon. Arnisi ke nangtum Nelamthe anung kimindam padikrim ason lapen monit akhei aphan ne kapajir doan chiniji mene. Arnisi ke nangtum nangmethang kosonji kijut ma pu kacheparai unji alam paridengji mene.