Nang Kemang Adim Apharman Dorplup Asai Keme Chisiknon

Ne nangtum angbong sai keklem dopik lapen chenam si, lam ta penang an nangthan longlo. Sitame, Ne sai lapen Ne lam kaningje an ta kemanglor ang-ang an ledam un’edet ason si theklong. Pima, apor kijut ahut anke, inut amonit mate ejahak atum ajoine le Ne sai keklem lapu kali, bonta Ne kereng achethe kachepaklangji aphan chot. Bonta ason keongdung ajoine – mate apor kadure ajoine mate sai kanglum ajoine – Ne kachepeklang pen monit atum ale nanglong dundedet ason. Lasi, Ne akimi asai denglo, Ne keklem padu, lapen Ne sai amo akimi aphar along pur si, Ne kereng achethe ketheklong pen ajok Nephan nang ketheklong amonit atum an aning cheteng si sangsepin pen chiru charnapji. Pima, monit akhei aphuthak Ne kivir vanlo, lapen laso pen ajok, monit akhei aphan Ne kedo an chepeklangdaklo, lapen Nephan nangkachini lapen nangkachinine atum an aphan si Ne monit apirthe along vanglo lapen kechan-kejar apirthe along si vanglo pu pachinipo. Ne monit aphan pinchongdet pen Ne kemang lapen Ne “kachekobir” alamthe la henlo. Ne do-dam aling ta nang nanglang dunkri tame, pima Ne chin ke Nephan nang kakhamkhe lapen monit akhei aphan ber bomlo.

Sining pen cherap si, Ne keklem nangji asai ne pangchenglo. Lasi, majok ta ne kedo-kedam nangpangthek un’epin pen lapen Ne lam aphan mathathepin pen rat alangroi along ne honjeng hingpet si pirthe lapen sining angbong ne halatvoilo. Lasi, ne kemang asonchimitme si chunbomlo. Bonta, nang ning kamatha pamangklipik ajok Ne keklem-kedam asai amo nang nangchini dundedetlo. Bonta Ne kemang asai arnisi arni nangtum chinivekji. Pini, Ne nangtum pen reng rapraplo lapen kisung ta chechak rapraplo, lapen monit akhei atum Nephan nang kachini lapen aning kamatha ason ne kachini ajir dingpiklo. Laso aphuthak Ne ningje ingtungtelo, lapen lahai ningoidet meme alam phurthu si nangtum aphan nangpatherak ingtungtelo. Mo ili kachetongthuji arni isi-isi nangtum kachoklem asai an lakhaji, lasi nangtum kachoklem asai an nang ningarlo chibi pemelo pusi ningthelo. Nangtum angbong badu aphan ta chobei ahakhi pen nang arbokthap ingtungte, pima ahokpet, choklim lapen man pen si Ne kaiketa sai klemlo. Kalang, nangtum ahokpet pen do si, sining, longle lapen nang mena kamatha’un ajakong aphan arkankeji puta ningkethe do. Nangtum aphan Ne nang kar’inei ason ke la henlo. Keongdung amonit atum alangtum keklem kechokche ajok dothekthe-thakthekthe asonsi theklong, lapen keongdung amonit atum ke isinat ta akeme asai keklemkle ajok chetheraklo. Bonta, keongdung atum ke, amena apap apot kachetherakji kali si, ansose henothu muchot si alangtum aning kamatha kaheno kachepatu ason an inglanglo – lapen Ne ning asat nangkelangjisi – latum chepeklangdak dedetlo. Ne ajat ta mathathe, lapen inutbak amonit kachoklem asai ta ne no cheden dunde. Bonta, ne keklem nangji asai amo an, birta kapangrum, havar kachijui lapen Ne ningkangsam asai an ne klemlo. Apor mesen kelong ahut, pederchot lapen peprapchot kalipin pen, bonta keklem nangji ateng pensi monit atum angbong Ne kemang ateng si sai klembomlo. Bontame keklem asai asektin along, ejahak atum aphan ke sei ponbomlo, pima Ne alangtum keklem asai lapen kalili apot kacheparjan ne hijimlo. Nephan nang kelang un’e atum aphan an ke keklem chenam pen lapen kalidet seta o’buppo. Thihek pen pulote, Ne kahijim atum an nedung do nangnelo. Pudamlo pulo tangte, Ne hem along kedo akaheno atum aphan ne langdingde. Kopima, monit aphan kisung arni nang tebok bomlo, Ne hem along kedo kahenodak akarjong atum aphan ne kiphlungji chingkhankhe, pima akaprek akemang nelong do.

Non lake monit angbong Ne sai keklem akai kachelakhaji apor kali, bonta anuttin a monit akai kijutji aphan kalakha aporlo. Anuttin amonit atum alam kaningje, sai keklem, Ne phiphi nang kidun, alangtum aning angthin, lapen alangtum aning kachepathebom alam, isi-isi Ne kangsai alo along tok tanglo. Lasonlo pulote, bangjok amonit atum sita, Ne rideng pen chepejok un’e, lapen Ne kiputang ateng si chekokvekji. Monit atum arta, akleng-akebi, kisung aphai lapen kangjinso kaningri aphai penle alangtum kedam nangji adim Ne kelang kali, bonta latum along ahok koan doloma lasi Ne langji. Lapen anpar akaprek atovar avelo. Arnam aning kehang ateng keklemkle atum kisung phovekji pu nangtum chini vek nangji. Lake kevar un’epin alamlo. Lasi, kisung kepho atum an ta Arnam ingthir’et lapen alangtum kaheno asai kachoklem kanglumpik ajoine si kisung phonanglo. Ne keklem asai ke keplangcheng arni pen nonpu anta isinat ta kelar pu avelang. Ne lam karjulong atum, lapen mesen amonit lo pu ahokpet pen Ne kipu atum an ke aphai nangjum bomlo pu alam chot. Bonta, Ne keklem asai ke kaike ta chelarle; sita monit atum akekroi lapen akanghon ke chelar bomlo, lake pherememe, lapen Nephan nangkekroi anpar Nephan nanglang selet si nangphlunglo. Ne nangtum aphan akamatha ke sodak ta kali ingsamhek ta kali asonsi mandetji, lapen nangtum aphan nanglangselet lapen nanghijim si, kisung nang paphovekji. Bonta, nangtum kisung kepho arni, Ne nangtum aphan nang chechar’etji, sita nangtum Nephan nang checharchedetji. Ne ingno nangtum akereng ke amo vangvedet lapen krenghak ason si man tanglo, lasi, nangtum Nephan nang chongthuithe aphrang, Ne kedoji aphan akaprek adim aklong ingvai tanglo, nangtum kaningje akaheno alam apot Ne ning kidukdedetji lapen hijim meme asai kachoklem an kelang pemeji aphan. Ne nangtum aphan nang’o tekangke aphrang, ahokpet kali an pen kachepaheloji aphan nang choningrilo. Bonta, kadokave aphan aning kapangsam lapen ale aphan le klemnon, lapen nang methang keleji adim aphan ale kedojile klemnon, pima kisung apor ahut aduk kedoji ke nang pen anpar badu ta kalidetji.

Nelong kedo akangjinso ke Nephan nang kanghon atum lapen Nephan nang kekroikre atum angbong si klangji. Kaheno atum aphuthak kisung kevang, lake, Ne akeme lapen akechok kachepeklang lapen, laso anpar, Ne ning kithi angthek’lo. Kisung kevang ahut, Nephan nangkachedan atum an keso lapen kangchir arideng klo si chiru-charnapji. Kaheno asai keklem litpik, sita Ne phi-phi nang kidunkri atum atum alangtum keklem kechokche apot alar chituvek nangji; latum ta, kisung along varchuipo, suri suri aningkan angbong ta kethek’longlepinlang apot plangpo, lapen kaike amat kaphere, kathirik angbong si dopo. Lapen, Nephan nang kekroithip lapen kedothip atum an chehok si Ne jakong aphan anong petheji. Lakha un’epin aning kangsam, lapen monit atum aphan Ne pajirjepinlang aningkarong angbong si latum reng longji. Pima, monit atum akeme asai keklem an ne rim peme bonta alangtum akaheno asai an ne hijimlo. Monit akhei aphan ne keja poncheng ahut pen, Ne kamatha ason thakthak aning kamatha atum aphan kelongji Ne ar’ilo. Sita, Ne pen aning kamatha kachingbarbe atum, lason ahut, Ne kaiketa tengnene; Ne kaiketa latum aphan hijimlo, lapen latum aphuthak alar kehuiji si Ne inghongdinglo, Ne ning arong pen langdunpo. Ne arni non nangle tanglo, lapen Ne inghongding nangnelo!

Ne keklem padu asai ke monit aphuthak kisung kevan anchot lapu kali, bonta laso aphuthak ke monit atum aphan dim ta sikpi nangji. Anke, monit atum Ne keklem asai nangdengpo. Ne keklem anke choklim lapen lake Ne kereng aronlo pu anuttin amonit ta pethek’longnang. Monit akhei aphan pirthe athak kibi ke, monit atum keklem asai kali, purthimi asai ta kali, bonta Ne si la kereng amar do’an ta lanalo. Ne le ave te, monit akhei atum an pirthe athak akiduk-kisung pensi vir’etji. Inutnat amonit ta chiklo lapen arni atur kadoivet, lapen kilirseng apirthe thek’longledetji; bonta monit akhei atum kangsamhet akangtingpi lapen jut un’epin karnuknei kithi apam si chetongpo. Monit akhei kejokji atovar ke Ne anchot. Monit akhei ning kachethe adim lake Ne anchot, lapen anpar, monit akhei atum achethe atiri ke Ne henlo. Ne pen kali te, monit akhei menmen chingtonkokji. Ne pen kali te, monit akhei kisung phopikji lapen hi-i sobar atum kedong-kesak pen chenekji, bonta badu ta Nephan Nelamm nang arjuje. Majok ta keklem un’epin asai si ne klemlo, lapen sai keme keklem pen si monit atum nangchitupo pusi ne ningthelo. Ejahak atum ansi Nephan nang chitu’un chot, bonta monit atum kaboche apirthe along Ne kedam ingtonpo lapen akaprek asai angdeng si ne pangchengpo, pima la an ajir kiding monit atum angbong Ne kedam-kevang apot athe pathelo, lapen Ne ning ingsamparlo. Monit aphai ko’an ong ma lale ne kelang kali, bonta alangtum keklem asai keme apot si langlo. Ajat non sita, Ne ningthelo, nangtum kesangji adim apharman sai keme ake’ongdung chisik’lo pusi. Anke Ne ning ingsampo; kali pute, nangtum aphuthak kisung kevang nangtum inutnat ta chepajok un’edetji. Kisung lake Ne pen si klanglo lapen Ne si la peplanglo. Nangtum jongsi Ne mek angden along mesen pu nang chepeklang thekthe te, kisung kepho along nangtum jok un’e detji. Kisungpik apor ahut, nangtum keklem asai an choklim kali, pima nangtum akekroi ke khurungvanglo, lapen nangtum pherepik kalite kangtangpik ason si chepeklanglo. Lasi, laso aphuthak ke keme lapen kaheno ansi ne ingsai chotji. Ne kamathanei ke, nangtum nang kachepeklang lapen kaningjeji kosonma, laso ateng pensi nangtum aphan nang ingsai nangkokji. Bonta, Ne la klardak pen nangpulang: kisungpik kepho ahut Nelam asap ta nang karjuje atum aphan ke, Ne ingjinsosedetji, pima Ne kangjinso ajir dingpiklo. Lapen anpar, Nephan ihut isi nang kachongthui atum aphan Ne Nening dokdelo, lapen jirpi-jirpo angbong kachechobei atum pen Ne chelang ingtungte. Ne kereng apun ke lason henlo. Ne nangtum aphan nangpulang: Nephan ning nang pe’oilak atum Nelong pen phongni akadia longledetji, lapen Ne lam nang karju atum jut un’epin akai anta Ne chemathaverji.