Asaikeklem Arnam ke Arnam Methang Mamatlo Pu Nang Chininangji

Asaikeklem Arnam abaha kopisi nang chininangji? AKarjong, aBang, lapen aLamm pangrompet pensi saikeklem Arnam cheplang, lapen lahenlo saikeklem Arnam Methanglo pu ahok ajor-kedo alam ke. Nang jongsi bangso aBang aphan chini asonte – jongsi Alangli asema hei hei lapen atheng hei hei chini asonte – bonta Karjong keklem asai chinine, mate ok along Karjong kopisi keklem, lapen jongsi nang Karjong aphan, lapen aLamm aphansi arjuchot pulote, lapen Karjong angnosi ardomchot pulote, bonta saikeklem a Arnam along Arnam aKarjong keklem chinine, lapuson pulote, la pen ajok angthek ke lahelo nang saikeklem a’Arnam aphan chininelang. Saikeklem a’Arnam alamkachini kapangrom ke Alangli Lam kachini lapen kachomatlong, lapen aron hei hei kenepthek, lapen Karjong Kangthir aron-atang hei hei kenepthek lapen kopusonsi Arnam aKarjong ok along kam keklemma pu kenepthek. Kachini ta pangrompon, atheke Arnam ok along keklem asontin ta Karjong pensi pangrilo, lapen atheke, Alangli kaningje alamthe hei hei ke Karjong pen akapachinilo. Laapotsi, saikeklem a’Arnam kachiniji, monitakhei along kosonsi Arnam kam keklemloma lapen Arnam-aot-plengset alam kachininangji koan akenangsotneilo; la pen keplangthuke, Karjong akapachini alam mathadam nangkokpo, la pen ajoksi kadokave amonit atum klemdunpro.

Karjong akapachini hei hei kopi pi ason do? Ahut pen ahut ke Arnam monitakhei alongsi saiklem, lapen ahut pen ahut ke arnam-aot-plengset pensi saiklem – bonta la sonni aphar aphan ta Karjong si kejapon. Ajat akarjongle monit arlo do setta, lason helo halatum athak akapachini ta. Kaiateng Karjong saiklem, bonta aKarjong pen Alangli kejapon pharni hini do: Ephar ke Alangli monitakhei along keklem asai, lapen aphar kaprek abangke arnam-aot-plengset pen Alangli keklem asai helo. Nang la hei chinipeme nangji. Ahutavarsai hei hei atengsi Karjong sai keklem prekjam: Monitakhei asai keklem nangji akenang dolote, Karjong si bangso amonit aphan asai paklemtoi, lapen Alangli arnam-aot-plengset asai akengsot dolote, arnam – aot-plengset asai ke amethang mamat cheklangsi asai cheklempondet. Pima Arnam ok pen saiklem lapen ok alongsi cheklang, Alangli la hini monitakhei lapen arnam-aot-plengset along saiklem. Karjong pen si Alangli sai paklemtoilo lapen monit atum ok-ahin akenangji ason ninghangklang kapelongji aphansi paklemtoilo, Alangli pen keklem rap rap thekji aphansi, ahokchenam lapen kaiason a Arnam aphan ketheklongjisi, lapen Arnam aKarjong ok planglo lapen monit angbongsi dolo pu kachecharjisi, monit pen dorapetlo, lapen monit pen klemrapet lo. Monit akai aphan kepiji lapen kadokave ason ta kemesen ahin pen monit aphan kejaponji, monit atum akamatha-aot hei hei kelarji lapen ok along Karjong kacheklang athikpet pen kepatheklongji aphan. Alam athepi binong ke, Arnam akam pensi monit achethe ke kethe-keding longphit lapen arnam-aot-plengset alamthe hei hei pensi kelong. Arnam-aot-plengset pen jongsi monit atum Arnam asai denglo pulote halatum akamatha aot kachelar longpo, lapen an aphisi halatum akarjong aninghangklangji; jongsi, la pen apar, monitakhei along asai ta do – Arnam akevi, kerap, lapen monitakhei along kepi-pador – ansi Arnam asai keklem athe long pemeji. Saiklem a Arnam Methang, pini kachethantang abangsi monitakhei lapen arnam-aot-plengset la hini along ta sai klemlo. Saiklem a Arnam nang kacheklang pen ajoksi, Alangli kaiateng amonit saiklem lapen chethe lapen Alangli arnam-aot pen keklem asai ke kelong. Alangli monitakhei lapen arnam-aot-plengset hini pen isinat asonsi peplang, lapen la hini asai kapepleng ta lam hei hei pen, bonta kepi hei hei pensi plengset, chethe pen plengset, monit akematha hei hei pen aju ave, monit aning kedok aling hei hei cheplangple, lapen lake monit akeun-e ason kali, kaiateng monitakhei ake-un-e pen angtan si do; lake ok pensi keklem kapechun, bonta lake Karjong amat akachethan lo. Monitakhei along monit atum jongsi Arnam asai dengchot asonte, halatum methang penang an angkang angbongsi dochotji, lapen ke kaiketa kachingki-chethan akenang dover nangkokpo, ingchai nangkokpo, lapen halatum along machiso kachelar kedonangji aphan setta anemke-en donangkokpo. Karjong Kangthir asai mate abangkedo avete, halatum aot barim hei hei anatsi chedamthujuipo; lahei akeso hei hei lapen akedorde hei hei anta arnam-aot-plengset asai pensi pechok unchotji, lapen laan aphisi monit aphan pechoklim unji. Ajirdingklui kechoklemrap lapen kangchai anparte, akenang kopima lake kemesen akepi helo, lamthe hei hei ensi akedorde ason an kapadorji, lamthe hei hei ensi monit atum kedo kosonma peklangji, lamthe hei hei ensi halatum akai kapejaponji, halatum asontin kaningje, halatum asontin akeklem, halatum aning akemang lapen aningakar-i hei hei kapeklangdakji aphanlo. Saikeklem a Arnam asai binong ke lahelo. Labangso apotsi, nang saikeklem a Arnam aphan kamatha ahut, Alangli monitakhei angno nang chepidet serak nangji, Alangliphan kapangthek lapen kedeng pen, lapen la anparta Alangli arnam-aot-plengset asai lapen alamthe hei hei nang dengnangji lapen kroinangji. Arnam ok along nang kacheklanglo pu atheke Arnam kadokave asai an lapen alamthe hei hei an kapechun ke Alangli kaiateng monitakhei pen lapen Alangli ok nang kacheplang pensi klemlo. Ason kaprek alam pen pulote, Arnam aKarjong si Alangli monit asai keklem japonlo lapen arnam-aot-plengset asai ta ok alongsi pachunponlo, lapen monitakhei along Arnam asai lapen Alangli kechokpet arnam-aot-plengset asai, ok nangkeplang a Arnam along la sonni ta nang theklongji. Saikeklem a’Arnam ok along nang kacheklang angthekkethe binong ke lahelo. Nang jongsi la theklong peme pulote, nang Arnam aphar prekjam doan kacherap chini thekji apotlo; arnam-aot-plengset along Alangli sai akenangsot ave pu nang kamatha ingtonpo, lapen nang monitakhei along Alangli sai thang akacheton ta ave pu nang mathathedetpo, lapen nang kelitpar an damdedetpo, mate cheruiphit ta klemklelo. Kadokave langetsi, saikeklem a Arna major ke atheke Alangli monitakhei lapen Alangli arnam-aot-plengset asai, Karjong kejadun ateng, ke Alangli ok pensi chethanlo, la pen ajok monit theklong atheke Alangli ke klangdak lapen achethedo, dobom lapen ahok.

Monitakhei along Arnam aKarjong asai ke adihu dihu kacheterek do. Monitakhei aphan kapachoklim pen, Alangli amethang amonitakhei Karjong akeja kelongjisi ajakong pi, laaphi Alangli monitakhei ke mondoli hei hei aphan pipangkrang lapen vipon. La ke kaiateng Arnam asai akachethan isi lo. Laapotsi, monitakhei along nang jongsi Arnam asai aron-atang hei hei chechar peme pulote, anke nang monitakhei along Arnam asai abaha akekroithap hei hei ning chebibedet tahaipo. Ajat asonle do setta, Arnam a Karjong ke akechokche ave. Alangli ke chok lapen akaphola ave; ajat ason setta kechokche pen Alangli klemkle. Arnam-aot-plengset asai ke Arnam aning kehang akachethan mamatlo, monitakhei nangchephu dundepin pen. La kechoklim cheplang un-e, bonta Karjong pen amatsi vanglo. Bonsettame, Alangli kaiateng amonitakhei pen ajok Alangli atheke arnam-aot-plengset asai klem un; lake akibinei manghuhak alamta kali, lapen lake kaiateng abang pen keklemdet ason. Arnam sining pen pirthe kevang aphrangsi atheke ok pen ajok Arnam alam hei hei kachethanji aphan, ok pen ajoksi Arnam a Karjong asai kepeplengji aphanlo.

Piniarni, saikeklem a Arnam abaha monit atum kethek elep-vet khangjang, lapen halatum arnam-ok-keplang alam kachini ong-epik khangjanglang. Arnam a ok pen, Alangli sai lapen alam hei hei pen monit atum chechar atheke Arnam a Karjong ta dak do chenam, atheke Alangli ke plangpik. Laan settame, Arnam achethe-atomo, kapejutke Arnam a Karjong pensi kevang: Arnam ok along keklem, koloso aron-atang hei hei pensi keklem-i, monitakhei along Alangli kopi si keklem, lapen arnam-aot-plengset along kopi si keklem. Monit atum piniarni laso alam chinivek nangji. Piniarni, bangso abang aphan nang archo unlo, acho alam ke nang Karjong aphansi archobomlo, lapen Karjong arnam-aot-plengset pen ok along keklem chinisi, lapen hala henlo monit atum akeong-enei setta Arnam ok planglo pu alam chinivek nangji: ok pensi Karjong acho alam chinisi, Karjong arnam-aot-plengset ok along keklem chinisi, Karjong alam hei hei lapen ok along kaningje alam an dengsi, lapen Arnam a Karjong kopusonsi ok aphan paklemtoilo theklongsi lapen Alangli jakong ok along klem-chepeklanglo. La kepunangji ke lahelo atheke ok pensi sining athak kedo Karjong alam monit chinilo; saikeklem Arnam aMethang monit angbong nang kacheklang pen ajoksi monit atum checharim Arnam aphan akamatha hei hei peprei-etlo. Monit atum saikeklem a Arnam Methang aphan karcho pensi Arnam aphan halatum akekroi ta ongmuchotlo, lapen, Karjong pen arnam-aot-plengset a Arnam ok along keklem lapen Alangli ok along monit asai keklem, monit kapeklang longlo lapen kalana ta longlo, lapen monit akai aot hei hei kachelar dolo. Lahelo Karjong ok along vanglo pu athe binonglo, aphrangsi athe ke lahelo, atheke monit atum Arnam pen klemrapet tahai, Arnam aphan chiki, lapen Arnam aphan kachini long pemepo.

Kadokave langlote, monit atum Asaikeklem a’Arnam aphan kopi akamatha donangji? Arnam ok nangkeplang alam nang kopi chini, Lamm ok along nang kacheklang alam, Asaikeklem a’Arnam keklem hei hei? Piniarni kachingvai alam athepi hei hei kopipilo? Karjong ok nangkeplang, Lamm ok along nang kedo, lapen Arnam ok along nangkeplang ke kadokave akisung hei hei atheke chini-unvek nangji. Nangtum lahei hei akisung pejo pen chinivek nangji lapen nangtum akai achethe along kachini klardak nangji, nangtum apun-achak lapen arta along paklongsi. Monit atum Arnam alam hei hei kachomatlong akaida hei hei, lapen Arnam alam hei hei ok along nang kacheklang akaida hei hei pen isinatlo. Monit atum Arnam alam chomatlong ong, laansi halatum Arnam a Karjong kachina ta ong muchotlo; Arnam alam hei hei kachomatlong pensi, monit atum Karjoing asai kelem aron-atang nepthek lapen asaikeklem a Arnam aphan chinipo. Abinong ke, Arnam monit atum aphan kapechoklim ahut, lapen latum aphan longsi, Alangli latum aphan asaikeklem Arnam akeklem hei hei pachinilo; Alangli monit atum aphan karjong ok nangkeplang alam akenangsot binong, Arnam a Karjong chenam monit angno nangcheklangtanglo pu kapaklangjisi Alangli latum aphan pachinilonglo. Monit atum ale longlote lapen Arnam halatum pechoklim lote, asaikeklem a’Arnam akachethan hei hei latum aphan haidetlo; asaikeklem a Arnam alamthe hei hei latum pachelardetlo lapen Alangli methang achethe latum along klemlo, Alangli doan pen halatum aphan peplengsi, Alangli lamthe hei hei acho peplengsi (Alangli monitakhei along settame mate Alangli arnam-aot-plengset along tame), lapen monit atum Alangli lamthe hei hei pen paperenglonglo. Arnam monit atum longlo pulote, Alangli asaikeklem a Arnam alamthei hei lapen kaningje hei hei ensi monit atum akedorde an kapedorji lapen kangsaiji lapen halatum kapatepek aot kapeklangji, halatum kopisi akenangma kapelongji lapen Arnam monit along vangtanglo pu kapetheklongji aphan Alangli la jasemet klem peonglo. Kadokave pen akenangsotnei ke, saikeklem Arnam atheke Sobar akapaphola pen anutin aphan kapejokjisi, Alangli klemtanglo, kasa-ur adim pen halatum aphan kepondet, lapen halatum kachobei aot an kapekakji si klemlo. Saikeklem Arnam pen kadokave apar akethenei kenangsot kapelong ke, monitakhei kaiateng kedolong lapen saikeklem Arnam ke arjan ason lapen isi kapeklang-arjan, lamthe hei hei ateng abekachinghoi lapen machiso akesui avepin pen mate kedamjui avepin pen, alangli kepu aling atovar pen abechinghoi, lapen kehang ateng kapelong helo. Lason atovar pensi, Arnam nang phan kelonglo. Arnam nang phan kelonglok ahut, nang Karjong Kangthir asai kelong anchot kali; akethenei alamke, nang asaikeklem Arnam nangkehang ateng pen kerenglong. Karjong Kangthir asai nanglilong kedo jongjong pen apotle nang chethe dolo lapu kali. Akenangsotnei alam ke nang saikeklem Arnam akehang ateng pen klem loma klemkleloma, nangliphan Arnam nang longloma longlema pen akacherap dolo. Lahei hei helo saikeklem Arnam ok along keklem akethenei ajorlo. Laso kepuji ke lahelo, atheke ok along ahokpen lapen chenam ok along nangkacheklang pen ajoksi Arnam monit atum aphan chepalonglo lapen thekdak lapen achethedo, monit atum ketheklong pen, abinong-et ke ok along Karjong asai keklem pen, lapen monit atum aphan arjan ason thak thak kapeklang pen. Arnam ok along nang kele athe binong ke, monit atum Arnam asai keklem hei hei kapetheklongji aphan, bangarpum kavedet aKarjong aphan ok arpum kepiji, lapen monit atum Alangliphan kapetheklongji lapen kapeot longji aphan. Lason atovar pensi, Alangli pen kapechoklim tang atum Alangliphan rengpithekpo, Alangli halatum aphan longpo, lapen Alangli ning aphan si hungpo. Jongsi Arnam sining athaksi ningjechot lapen pirthe athak chenam vangvedet, lasonlote monit atum Arnam aphan chini un-edetji; halatum Arnam akeklem hei hei lam angse pensi pachethang thekchotji lapen Arnam alam hei hei ahokpet longledetji. Arnam pirthe athak kevang athe kethenei ke arjan ason kapeklangji lapen arjan-keme Alangli kelongji atum aphan kapeklangji; laan aphisi monit atum Arnam aphan chiniji, Arnam aphan otlongji, lapen Alangliphan theklongji, lapen ansi ahokpet halatum aphan Arnam longpemeji.