Kaisuri Arnam Kapangriji Nangle Tanglo

Nangtum theklongloma laso adilung amonit atum aphan Arnam kopi asai si kapachunjima? Arnam ningje tanglo, Khrist recho arat akai Arnam Kapangri ahut tame monit atum Alangli kaningje alam heihui ateng si kroidun nangji, lapen mohut ke Arnam kaningje alam heihui si jasemetpet monit achethe aphan kemesen ahavar Canaan an japonpo. Moses le kangtheidang ajo kedobom ahut, Arnam si chenam alangphan jalo lapen chingkilo. Ha sining hemrengme pen Arnam si kecho amung, lang lapen manna monit atum apharman nangpaklolo, lapen nonpu pini arni antame: Arnam amethang jongjung si monit atum akenangji kecho amung lapen kijun alang angsong pen asonson nangpibomlo, lapen Alangli methang jongjung si monit atum aphan kangchekji ta ahirjuno nangpilo. Lapen lasi, Alangli sai asontin akengkam tame Arnam jongjung si keklempon saide. Pini arni, monit atum ke kopima ahok kacheplang lasi kiri, latum akiri ke angthek lapen manghumeme ason, lapen lake pima lason amonit atum doan aphan ke kevarchorji meme kephodetji saidelo, athe ke Arnam asai nonke menmen keklemphit titi si keongbomlo. Arnam ke sining hemrengme pen si nangkisun puke madu tame chinine, Arnam si kecho amung lapen dovai anta sining hemrengme pen arum nangkelo pu latum pima chininelang – tebonta Arnam ahokpet do, lapen Kaisuri Arnam Kapangri aphar nangkeklangbom apot monit atum kamathadam tame Arnam jongjung pen kaningje alam saidelo. Lake chenam ta, lapen pirthe along Arnam pen kachejalinrap pusi pudetlo. Arnam pen pirthe along kachejalinrap puke ok aphan jongdamlo. Pima lason ok kalidet anke pirthe along avedet, lapen lasi komatmat ma kethom asining hemrengme an kidunji pu kabor’i atum doan ke un’edetlo. Arnisi, angton somindar adangpi ta Arnam along chelethu lote, pirthe-sining along Alangli sai keklem angbongchit ke Alangli kaningje alam ateng si kroidunpo; nahokhok lasonsi, ajahak amonit atum ke telephone si enpo, ajahak atum ke rot ahem si ingjar ponpo, ajahak atum ke talo angkangpi telong si vekponpo, lapen ajahak atum ke atur sirik pen si Arnam kaningje alam heihui longpo. Anuttin tame inghonrippo, lapen ar’irippo, Arnam adung latum doan ta patebokpo, lapen Arnam along chingrumdunpo, lapen doan ta Arnam aphan archopo – lapen la kedoan tame Arnam asai-amo saidelo. Ningchibinoi lake! Chenam ta Arnam nahok tame puthot pangchengthuthelo. Laso ahok ke Arnam pachekokvekpo: Alangli ingno kapavang’etji si bangso somindar adangpi monit kedoan atum aphan Alangli pemanpo lapen pirthe along Arnam aphan parchopo, lapen prekjam adim Alangli sai keklem ke ington’etpo, lapen monit atum saijokje si ahok atovar ri nangkokpo. Lake Joseph ason thakthakpo: Anuttin tame kecho aphan si alanglong vanglo, lapen alangliphan angphun patongkilo, pima alanglong kecho amung dolo. Kangchir pen kachepajokji aphan, monit atum ahok atovar kiri nangkokji si pemandetpo. Angton dhoromi ahamphang atum kangchirpik akisung phoji, lapen pini arni Arnam anchot si kereng alang kapangbop atirilo, monit atum aningkarongji aphan kijut un’e kangbop alang kili long si padorlo, lapen monit atum vanglo lapen Alangliphan si chikilo. Halaso apor ahut henlo Arnam asai-amo kachepaklangji lapen Arnam aphan anong petheji; somindar adangpi kadokave amonit atum laso aningkedokderi “amonit” aphan archopo. Tangte lake Arnam anongthe arni kalijilang puhe? Arnisi, kurusar barim atum telegram pen kido lo si kangbop kereng alang along pen lang chohangji. Latum abarim kesarlo, tebonta laso abangphu aphan latum karchoji vangvek nangpo, latum kelangrop abang aphan. Alangtum angho pen Alangphan latum choropo lapen alangtum aning pen si Alangphan kroipo – lake tangte angthek lapen manghumeme kalilang ma? Arnam kapangri angkangpi doan chehoklo pulote Arnam anongthe arni chemanpo, lapen nangtum along madu le vang tame lapen Arnam abirta keme longlo te Arnam si ahirjume pipo, lapen adet doan lapen monit atum doan lason klem lote ahirjume longpo lapen Arnam chinghonpo. Mohut akethan akrong ke lason henlo: Komatmat ma Arnam angho pen kaningje alam kelongdun atum anke pirthe along kedamji aphan atovar dopo, lapen lake latum beha-bepar klembang mate sonthankuru, mate lo thekser abang mate akorkruru tahai, komatmat ma Arnam alamthe pen kacherappet kalidet atum doan ke kengkam isi kachejor anta akisunglo, lapen ahok atovar aphan kiri si nangkokpo. Lake kopilo putangte, “Ahok pen si nang pirthe angkangpi tame dampo; ahok pen kali pute, nang nahok ta lelelo.” Angthek ke lahei henlo: Tovar pen si Arnam enpo (pima lake kadokave ta Alangli lamthelo) somindar angkangpi aphan hukum pipo lapen charipo lapen monit akhei aphan chepahaidetpo. Monit akhei atum ke kaiketa thedung kacheprekji si Arnam asai pen ajok ningthebom titi do. Athak ningjeprui ke, lake alamthe heihui pen si Arnam monit atum aphan pangrilo, lapen Alangli kaningje ateng si nang klem nangpo nang le ninghang mate ninghanghe tame; lake kethandak angtheklo, lapen kadokave tame kroivek nangpo, lapen lasi, lasonsi, lake khang un’elo, lapen kadokave ta chinilaplo.

Karjong Kangthir si monit atum aphan isi pamathalo. Arnam alam porhidet pen aphi, alangtum aning arlo monit atum athikdut kithirthip lapen ningkangsamjin si chemathalong, bontame komatmat si Arnam alam kelongledet atum doan ke thangnat ta ave. Lason henlo Arnam alamthe ajakong puke. Monit atum laheihui porhi nangji, lapen lahei porhidet pen aphi lote latum ingchoklonglo, lapen latum lahei penpete thangnat ta klem un’e. Lake tangte monit atum le kani ke’en asonlo: Lake latum aphan jakong pilo, lapen la avete ajakong kebopdet asonsi latum chemathapo, lapen ajakong si avedetpo. Lason akamatha kedo si nonlom amonit atum angbong dolo. Arnam alam kaporhi pen monit aphan jakong nangpi. Jongsi latum lahei porhihe tangte, latum prangsetsedet ason si chitin, bonta lahei porhidet pen aphi lote, latum alangtum “keso kabebe apahong” along pen memen thurjetpo. Lake pirthe along Arnam alam ajakong arisim ke’otlo lapen pirthe aphan Arnam akachejalo. Ajahak amonit atum ke kache’o kangtunglo, mate Arnam asai aphan kelak do tanglo. Tebonta, Arnam alam heihui pen latum amethang aphan chepaprek un’edetji; jonghele latum koan ma boidet sita, latum kerengji aphan ke Arnam alam along si chiki nangji, lapen jonghele latum koan ma kachedanji doma, latum Arnam alamthe heihui pen kache’oji aphan haihedetji. Arnam alamthe heihui ahokpet ajakong lahei kachepaklang ke Arnam akacheja lapen jakong arisim ke’ot ahut henlo, lake Arnam asai keklem lason henlo. Arnam alam ke kalakha un’edet ahemtun angbong pachetakpo, latum la kadokave chinipetpo, lapen laso pen si Alangli sai somindar angkangpi chetakponpo. Lake pulo tangte, Arnam asai jongsi somindar angkangpi kapachetakji pulote, Arnam alam heihui ajakong lapen kacheparideng akeja cheklangji. Anuttin tame Alangli lamthe apot ha hako ahut pen pini arni an chun pemepo lapen la chemanpo. Lason pen si, pirthe along Arnam aphan anong pethepo – lake pulo tangte, Alangli lamthe heihui pirthe charipo. Kadokave matmat si kahenodak atum doan aphan ke Arnam angho pen nangkebar alamthe heihui pen ingchekpo, kadokave matmat si kangthir’et choklim atum doan ke Alangli ingho pen nangkebar alamthe heihui pen ahirjume longpo, lapen kadokave tame pathirthipo lapen Alangli angho pen nangkebar alamthe heihui pen si pachoklim pemanpo. Alangli kopine angthek mate manghumeme ason chepaklangkledetpo; kadokave doan tame Alangli lamthe pen si paplengpo, lapen Alangli lamthe heihui si angthek binong pemanpo. Pirthe along anuttin tame Arnam alamthe aphan chehokpo, latum thedung mate osomar tahai, pinso, arloso, akesar mate ariso, kadokave amonit atum doan Arnam alamthe aber si chehodaidetpo. Arnam alamthe ok along cheklanglo, pirthe along monit atum aphan la patheklonglo, klardak lapen chethe ason ben. Lahenlo kopima Lamthe le ok keman puke kipudam. Arnam pirthe along kevang ke chenam si “Lamthe le ok keman” laso angthek ahok kapaplengji aphan, lake pulo tangte, Alangli kevang athe ke Alangli lamthe ok along pen ketoiji aphan (Abarim Kejok Alo ahut Moses akai ason kali, Arnam ase le ha sining angsong pen ketoi). Laso aphi, kadokave Alangli lamthe doan ke Kaisuri Arnam Kapangri Akai ahut si plengpo, latum doan tame monit amek angden cheklangdak angthek patheklongpo, lapen monit atum alangtum mena amek pen masapso tame akeprek avepin si lahei theklongpo. Lake tangte Arnam ok nangkachepharlo athaksi ajorlo. Lake pulo tangte, Karjong asai ke ok pen ajok si pachunponlo, lapen lamthe heihui penlo. Lahenlo “Lamthe le ok keman” lapen “Lamthe le ok along kacheklang” pu ahokpet ajorlo. Karjong aninghang ateng Arnam anchot si ningje unji, lapen Karjong adular ok along Arnam anchot si ningje unji; Arnam ok nangkachepharlo along ke Arnam alam heihui pangdeiselo, lapen anuttin aphan tame lahei si chejaponlo. Madu aphan ta padarde, latum kadokave tame laso angkang along si do’etlo. Laheihui kaningje alam pen anchot si monit atum chini unji; lapuson komatmat si kelong dunde atum anke anarlo amang asonlo jongsi latum kamatha le sining hemrengme pen la kaningje alam longji pulote. Lason henlo Arnam ok nangkachepharlo abang kachepahemphu kachepaklangpon, kadokave aphan ta kekroivek nangji ahukum kithirthip pemanlo. Man-peng kedonei thekser abang lapen dhoromi akurusar atum pu tame laheihui alamthe ningje longle. Lahei along latum kadokave tame chehodai nangji, lapen madu tame akaprek kapangchengji aphan un’elo. Somindar adang kachepahemphuji aphan lamthe pen si Arnam enpo. Alangli laso keklemji ke Alangli ok kachepharlotang pen kaliji, bonta ok kemantang Arnam angho pen kebar alamthe pen ningje si somindar angkangpi kadokave amonit atum aphan chepahemphupo; la anchot si Lamthe le ok kemanlo, lapen ok along Lamthe la anchot si kacheklangponlo. Chenam ta, monit atum along, kacheklang ke keongdung asai Arnam keklemkledet asonlo – bonta Arnam ke pima Alangli lamthe heihui pen si ningjelo, lapen latum doan ke arsikjik pen pachekroidun lapen pamanghumemelo. Angthek binong avepin pen, monit atum hang lapen chechek; Arnam alamthe pen ajok, latum doan ingsamrilo. Laso angthek Arnam ke chenam si paplengvekpo, pima lake Arnam arjidingklui pen kithirthip akemang: pirthe along Lamthe nangkele angthek kapachun henlo. Athema, Ne nangkethan aretji akenang ta avelo – pirthe along Kaisuri Arnam Kapangri nangkele puke Arnam alamthe pirthe along nangkele pu aphanlo. Akimi Jerusalem sining hemrengme pen nangkisun puke Arnam almthe nnagkelelo monit atum angbong kedoji aphan, monit atum asontin keklem-kedam along kachelangdunji aphan lapen alang kadokave aklong’et akamatha along doan. Lake isi angthek binonglo Arnam kapaplengji aphan; lahenlo Kaisuri Arnam Kapangri akemenei ason. Lake Arnam si kisiktang akemanglo: kai suri apharman pirthe along Alangli lamthe cheklangpo, lapen latum doan kadokave ta Alangli asai-amo cheklangpo, lapen pirthe along Alangli sai doan pachunponpo, laso aphi ansi monit akhei atum laso angdeng ke kijut nanglepo.