Arnam Asai Kelangdammek (3)

Arnam monit kemancheng ahut ke Karjong Kangthir pen ajok si inghulo, lapen Alangli keklemji asai ateng pen cheton pemelo. Jisu amen pen ajok si Kanghon-Kangjinso Akai nangpangchenglo. Jisu asai keklem pangcheng ahut, Karjong Kangthir sitame Jisu amen aphan si ahakhi arjaplo, lapen Jehovah amen ke parnonedetlo; labangso alar, Jisu amen aphan si Karjong Kangthir akimi asai dengponlo. Alangliphan kekroi atum amethang alammo pen ajok Jisu Khristo apharman arjaplo, lapen asai doan ta Jisu Khristo apharman si klempilo. Aron Akai ahut kedo an Kachejok Abarim Alo kapejut puke Jehovah amen pen keklem asai doan ta pejutpon tanglo. Lasi, Arnam amen ke Jehovah kalidet ason si planglo; labangso alar Alangliphan Jisu pusi hanglo, lapen non pen apar ke Karjong Kangthir tame Jisu amen pensi sai doan ta klem pangchenglo. Tangte, pini arni anta Jehovah alam si chobom junbomlang atum, lapen nonpu ta Aron Akai ahut asai ateng asontin keklem atum – nangtum kamanghu pen si aron ateng kroilo kalima? Kedamtang arni along si chingthangloklo kalima? Apor nangle tanglo pu nangtum chinilo. Tangte, Jisu vanglo te, Alangliphan Jisu pusi hangthujima? Messiah vangji pu alam Jehovah Israel arat aphan than pachinilo, bonta Alangli kevang ahut, Alangliphan Messiah pu hanghe, bonta Jisu pusi hanglo. Jisu pulo, Alangli vangthuji, tangte Jisu kosonsi laso apirthe pen kache’oma nangtum theklonglo bo? Jisu ke inghun kelok pen si damlo, tangte, Alangli monit atum angbong kachevangthuji ta inghun pensi vangjima? Lason jongsi vangji le pute, Alangli men Jisu pusi planglo kalima? Jisu kachevangthu ahut ke, pirthe arje chelarpikpo, tangte Jisu pusi amen chethangbomlangma? Arnam amen Jisu pu ansi chinichotjima? Kai kimi ahut amen kimi pensi hangpo kalima? Inut a’Arnam aphan isi amen pen anchot si chepaklang unchotjima? Aovetin ta, Arnam sai kimi si klembomlo, lapen amen kimi chelongbomlo; koson si aovetin ta isivet asai keklempo? Koson si aban aphan kachiriphetverpo? Jisu amen ke’en lake monit aphan pap pen kelang’iji aphanchot, tangte, mo Alangli kachevangthuji ahut ta laso amen si hangpoma? Alangli halaso ahut ta pap pen kepajokji asai ke klembomlangma? Kopi apot si Jehovah lapen Jisu ke isivetlo, bonta latum amen aovetin si kehang paprekdaklo? Alanglitum asai keklem aovetin si kacheprek apot kalima? Isivet amen pen Arnam aphan thirthip pen aove le cheprekjam sita isivetpoma? Lason pulote, aovetin si Arnam amen kehang paprekjampo lapen aove along pachetondunpo. Kopima, ajat amen ta Arnam aphan puthip ave, lapen isi amen pen isi aove aphan sai keklem’iji aphan amen kachibichot; lapen Alangli sai kachepaklang’iji aphanchot. Lasi, Arnam isi akai along sai keklemji aphan ke Alangli ot-adur kachepaklang’iji aphan ajat amen le che’ir ta chok. Jehovah arni punon, mate Jisu arni punon, aovetin si amen kachepreklo. Kanghon-Kangjinso Akai kijut ahut, kijut apor nangle tanglo, lapen Jisu vang tanglo. Tangte Alangli kosonsi Jisu manbomjilangma? Koson si Alangli Jisu ason cheparjan si monit angbong dobomlangma? Jisu ke inut aNazareth asor asonben si cheklanglo kalima? Jisu ke monit aphan pap pen kelang abang pu nang chiniloma? Tangte kosonsi Alangli kijut arni ahut koson si monit aphan kepame lapen kapachoklimji asai keklempo? Jisu ke inghun pen damtanglo – lake ahok alamlo – tangte koson si Alangli inghun pen monit angbong vang si Jisu pubom helangma? Alangli jongsi inghun pen vanglo pulote, monit atum Alangliphan chininedetjima? Pirthe adang amonit atum Alangliphan chininedetjima? Lason pulote, Jisu inutpet si Arnam lo kalima? Lason pulote, Arnam arje pulote Jihudi angbong si klanglo lapen laso ateng si damverpo. Jisu pulo Alangli kedam asonthot si puthot chevangthuji, tangte Alangli laso alam aphuthak arlo alam chinima? Alangli nangtum aphan nangthanlo kalima? Nangtum kachini lake Alangli kedam asonthot si, inghun pen chevangthuji pu, tangte, Arnam Amena asai koson si cheklemloma nang chiniloma? Nang jongsi la chini lapen theklong pute, Jisu kaningje alam kosonsi than pangtakpo? Alangli pulo: Mo kijut arni monit aSopo kachevangthu ahut, Alangli mena amat ta chechinine, sining atekala atum ta chinine, sining athak apherangke atum ta chinine, lapen monit akhei atum anta chinine. Po ansi chinichot, lake, Karjong si chinichotji. Monit aSopo amena amat ta chechinine, tangte nang kosonsi kachinipo? Nang jongsi nangmek pen kachini lapen kachechar ajakong do pulote, lahei alam thangbakbe ningjethapjima? Lapen halaso ahut Jisu kopisi kipulo? “Bonta Po pen apar ke, sining apherangke atum tame, kalite Sopo sitame, baduta halabangso arni lapen apor chinine. … Lasi nangtum ta chisikding pen le donon: kopima nangtum mathathepin apor ahut si monit aSopo vangji.” Apor arni nangle lote monit aSopo Amethang amat ta chechinine. Monit asopo puke Arnam monit ason kacheparjan Abang aphan si pudamlo, monit ateng lapen monit binonglo. Monit asopo amena amat chechine, tangte kosonsi nang chinipo? Jisu Alangli kedam ahut asonthot si puthot chevangthuji pu ningjelo. Alangli kachevangji ahut, Alangli mena ta komentuma chechinine, tangte Alangli nangphan nangthanmek unjima? Nang Alangli kachevang chechar unma? Arnam pirthe kevang abataitin, Alangli arje chepharlolo, lapen asai chelarlo; Alangli sai keklem puthot ave ruithuthe. Alangli ke mirakver a’Arnam lapen aban kali. Alangli aphrang kevang ahut ke, Alangli men Jisu pulo, tangte Alangli puthot kachevangthuji ahut ke Alangli puthot Jisu pusi vangthujima? Aphrang ke Alangli sopinso si nang cheplanglo, tangte laso ateng si dopoma? Kanghon-Kangjinso Akai ahut Alangli kevang ke thengparpan athak monit aphan kepajokji aphanlo, lapen Alangli puthot chevangthu lote, Alangliphan thengparpan athak sakthupoma? Lake sai keklem ave kiruilo kalima? Arnam ke kaiketa akimirakverlo, lapen aban kali. Ajahak atum ke Arnam ke choklim. Lake ahok alamlo lapen lake alangli sai lapen alangli ot-adur choklim pu aphanlo. Alangli sai angkung kachelar lapen amen kachelar pen ajok Alangliphan pachokchedetde. Isi alamthe pen pudam lote, Arnam ke Arnam lo, lapen lake kaiketa lar un’elo. Arnam asai jongsi chelar un’e pule nang pulote, Alangli la’an ningkan suri throk arni an sai keklem kosonsi kepajut unpo? Arnam ke chelarle pusi nang chinilo, tangte Arnam ke kaike ta akimi, lapen akeban kali pu nang chinima? Alangli sai keklem amo chelarle pute pini arni an monit aphan vanbon unjima? Arnam jongsi choklim pulote, kopi apot si Alangli aove ove anta sai klembomlo? Alangli sai komentune ta aphrang anat kedam ingtonte, lapen la kopiloma pulote, Alangli ot-adur ke monit aphan pajo pen chepaklangbomlo, kachepaklangtang ason lake Alangli ot-adur henlo. Kecheng ahut ke, Arnam aot-adur monit atum along pen patujoilo, Alangli monit atum angno komentune ta Alangli ot chepaklangkle, lapen monit atum thangnat ta Alangli phuthak chinine. Laso ajok si, pajo pen Alangli la chepaklangbomlo, bonta la kachepaklang pen ajok Arnam aot-adur aovetin si chelarvoilo lapu kali. Alangli kar’i ason prekjam pu aling si Alangli ot-adur ta chelarvoilo lapu ta kali. Sita, alam abang ke, Alangli aot-adur ke choklim lapen, pejo pejo pen, monit aphan chepaklangbomlo, lapen ajok monit atum Alangliphan kachini thekji aphan. Bonta lake Arnam aovetin si aot-adur chelarvoi lapen Arnam aot ke dovetve pu kapaklangji aphan kali – lason chelarvoi pu kachini lake kechokche thektiklo. Arnam monit aphan Alangli ot-adur abinong si chepaklanglo – Alangli kopima – aovetin ta lasi chepaklanglo; isi aove asai keklem pen ajok si Arnam aot-adur kapaklang ke ingthimlimlo lapu kali. Lasi, “Arnam ke kaike ta akimi lapen akeban kali” pu alamthe lake la ketoktang atenglo. Ajatnon sita, ningkan suri throk keklem asai pen apot nang pangrom’et un’e, mate thangbakbe alamthe pen pangtak’i un’e. Monit atum akilu ke lapu henlo. Arnam lake monit atum aning kamatha ason kali, lapen Alangli sai lake isi aove along chingthangling ason cheplangple. Langdam sinang, Jehovah puke kaiketa Arnam amen aphan thirthip lapu kali; Jisu amen pen ajok Arnam sai klem’un. Laso pen ajok si Arnam asai lake aphrang anat si dambom pulo.

Arnam lake kaiketa Arnam lo, lapen Alangli komentune ta Sobar chepharlolelo. Sobar lake kaike ta Sobarlo, lapen lake komentune ta Arnam cheplang un’elo. Arnam agian, Arnam akamanghumeme, Arnam akeme, Arnam aman lake komentune ta chelarlelo. Alangli akedoivet lapen Alangli kopi ason ma kedo an ke chelarlelo. Bonta, Alangli sai lake, kaiketa aphrang anat si dambomlo lapen arnukbomlo, kopima Alangli ke kaike ta akimi, lapen aban kali. Aovetin tame, Arnam akimi amen enlo, lapen akimi aovetin sai tame akimi klemlo, lapen aovetin sita, Alangli sai pen apot Alangli kapinchongtang ahormu aphan Alangli ot-adur patheklonglo, tangte, latum Alangliphan thengparpan athak sakjima? La keklem pen ajok, Arnam aphan latum chini unjima? Arnam jongsi pinso ason nangcheplang pulote, monit atum Alangliphan pinso pusi chinipo, pinso pen si cheparjanlo apot si, arloso pulote kroi ingtungtelo. Lapu lote, Arnam ke monit along pinso ason thakthak pusi kroipo, Arnam ke monit atum aphuthak kachari abang pusi chinipo – tangte soarlo atum ke? Lake chokche; plakvi-plakvong asonlo kalima? Lason pulote, Arnam pen kepajoktang amonit atum an lake Alangli sonthotpo, lapen inutnat asoarlo ta kejok longledetpo. Alangli si Adam lapen Eve aphan ta pinchonglo, bonta pinso lapen arloso si pinchonglo. Lason pulote Alangli ke arloso atum a’Arnam tamelo. Arnam kijut apor ahut si sai kimi pangchenglo. Alangli ot-adur ansose chepaklanglang, lapen lake, Jisu akai ahut a kanghon lapen kangjinso kachepaklang ason kali. Alangli sai keklemji dokok apot si, laso asai kimi lake akimi aot-adur pen si cherappo. Lasi, laso asai jongsi Karjong pensi klemji pulote, Arnam jongsi ok cheplangple pulote – lapen Karjong si sining kangder ason ben monit aphan chingki lote, monit atum Alangli pen kachingkiji adim avedetpo, tangte monit atum Alangli ot-adur kosonsi kachini unpo? Laso asai lake Karjong anchot si klempo pulote, tangte monit atum Arnam aot-adur kachiniji atovar avelo. Alangli monit cheparjandet ansi monit atum Alangli ot-adur an theklongji, Lamm jongsi monit cheplang lote, lapen Alangli ot-adur an ok pen chepaklang lote monit atum chinipo. Arnam monit atum angbong si renglo. Alangliphan ili papholong; monit atum Alangli ot ason charli dunlong; anlote, monit atum Alangliphan chini unpo. Lason thakthak si, “Arnam ke pinso lapen arloso a’Arnam lo” pu chepaklangdaklo lapen asai angdeng chun pamelo. Kedamtang aove keklemtang asai pen apot Alangli lasonthot klemklelo. Kijut arni nangle tanglo apot si, kijut arni ahut keklem nangji asai si Alangli klemlo lapen aot-adur tame chepaklanglo. Kijut arni alam ningje lote, akaprek aove aphuthak si ningjelo, lake Jisu kiputang asonthot si, nangtum kisung chetongvekpo, lapen chiklithepi, kangchir akhim, avur-akrem heihui chetong lote, kai kimi nang cheklangpo, lapen lake kedamtang Kanghon-Kangjinso Akai kalilo pu chini nangpo. Langdam sinang, monit atum kipu ason si, Arnam ke kaiketa chelarle, Alangli ot-adur ke kaike ta kanghon-kangjinso pen plengsetlo, lapen Alangli anuttin amonit aphan ta kejok atovar paklanglo lapen monit aphan langseletle pulote, Alangli sai jut unjima? Jisu pirthe kevang pen thengparpan athak nang kithi ahut, Alangli kadokave apap apharman si charklidetlo, lapen dovan athak dan ason si chipidetlo, lapen ajok Alangli kejok kevan asai ke tang pamelo lapen Kanghon-Kangjinso Akai ke kijutlo. Tangte, halaso ahut keklemtang asai kopi apot si puthot Alangli klemthujilangma? Lasonthot klemthulo pulote, Jisu keklemtang asai apot kekroi damdelo kalima? Arnam jongsi laso akai ahut thengparpan athak kithi asai paplangpledet, bonta kanghon – kangjinso pen plengset pulote, isi aove aphan sai keklem pajut unjima? Kanghon lapen kangjinso keplengset a’Arnam isi aove aphan pajutkokjima? Alangli isi a’ove aphan kepajut pu kirip asai keklem ahut, Arnam aot-adur lake ado kipi lapen kangsai henlo, ladak Alangli kechokche atum aphan ingsaiji, lapen Alangliphan kanghon pame atum aphan pakengji. Lason aot-adur pen ajok si isi aove pajut unji. Kijut arni nangle tanglo. Kapinchongtang an ahormu ta aot-adur, ajat ateng si thakreppo. Laso apor ahut ke Arnam monit atum kedam paduji adim paklango. Arnam jongsi kangsai lapen ado kipi asai klemkle pulote, latum lamm karjuje lapen kaheno aning paklanglongledetpo. Kangsai lapen ado kipi pen ajok si, kapinchongtang ahormu an aphan anong’e pi thekji. Monit aphuthak kangsai lapen ado pi lote ahok aot-adur chepaklangdakpo. Kaheno atum kaheno along si thakdakpo lapen keme atum aphan keme adim, lapen monit atum anta alangtum kachoklem ateng si thakdakpo. Ado kipi lapen kangsai pen ajok si, kapinchongtang an ahormu aphuthak kijut vangpo, laso pen ajok akeheno atum anke ado phopo lapen akeme atum anke nong’e longpo, lapen monit atum anke Arnam kachari apirthe along dodunlongpo. Lahei asai lake ahokpet akangsai lapen ado kipi pen si pleng unchotji. Kopima, monit atum akaheno batpik anlo lapen la lamm karjuje ang-ang kilit anlo, lasi Arnam ahokpet aot-adur, ahokpet akangsai lapen ado kipi kijut arni kapaklang pen ajok si, monit aphan larphit si pachoklim unpo. Lasi, laso aot-adur lake isi aove aphanchot, lapen laso aot-adur kapaklang lake aovetin asai angdeng aphan si klemlo. Arnam thangbakbe ke Alangli ot-adur chepaklangthapthe. Pudamlo pulote, kijut arni ahut monit aphan kijut apor kapaklang lake, monit aphuthak Arnam kijut un’e akanghon lapen akangjinso pibomlang lapen inghonbomlang pu aphanlo, lapen kangsai aphanchot kali, bonta Alangli monit aphan ning keding, kadiya chepaklangji lapen monit apap koanma arthat sita la tengnebup si, asapsonat ta la ahokpet akangsai pipedetji: tangte Arnam asai angkung komentu si kijutpo? Komentu si laso aot-adur pen ajok monit atum kele nangjivek adim kele dampo? Langdam sinang, kangsai abangphu kanghon pen plengsetlo, kangsai abangphu jongsi aning mesen lapen ingnekhingver ason thakthak. Alangli monit aphan inghonlo, latum jonghe kechokche do sitame, lapen Alangli ke badu aphan sitame kanghon-kangjinso pen plengsetlo. Lason pulote, komentu si Alangli isi akangsai aphan kepajut thekpo? Kijut arni ahut ke, ahokpet akangsai anchot si monit aphan amena atum kachoklem pen apot thakdak thekchotji lapen monit aphan akimi akai along van thekji. Lason pulote, isi akai lake Arnam ahokpet aot-adur lapen akangsai, ado kipi pen ajok si pajut unpo.

Lahei asai angkung an angbong Arnam sai keklem lake chinidaklo: Kanghon-Kangjinso Akai lake Kanghon-Kangjinso Akai pulo, lapen kijut arni lake kijut arnilo. Akai mate aovetin si kacheprek thepiklo, kopima Arnam isi aove along sai keklem lake akai pen pacheton si klemlo. Kijut arni ahut sai keklemji lake, kangsai, ado kipi, ning kithi, me kecho, kanahok kethetan pen ajok si isi akai jutpo. Kijut arni puke kapadusi aove aphan si pulo kapadusi akai ahut lake, Arnam laso akai aphan pajutjedetpoma? Arnam ado kipi lapen kangsai asai Alangli pen vanpo. Lason pen ajok si Alangli isi aove pajutvet unpo. Jisu aning kehang lake monit atum rengbom nangji, dobom nangji, lapen Alangli mesen atovar pen dobomji. Alangli monit aphan pap pen pajoklo, latum meherang along kedo jokphlotji aphan. Laso ajok si Jisu monit aphan parengbom longlo. Nonke kijut apor nangle tanglo. Arnam monit aphan pavirkok si monit akhei aphan phangdodetji, lake, Alangli monit atum akachedan pharlepphitpo. Laso ajoine si, kedamtang akanghon lapen kangjinso aot-adur ke, nonke chokchelo, kopima Arnam isi akai aphan kepajut mate ningkan suri throk sai angdeng keklem kepajutpo lapen athe kerotpo. Aovetin lapen akaitin ta Arnam aot-adur akeme chepaklanglo, lapen aovetin asai tame Arnam si keklem nangji asai si plengsetlo. Lasi, Arnam aovetin keklem asai an tame Alangli ahokpet aot-adur si chepaklanglo, lapen Alangli men lapen asai Alangli pen keklem ason anta aove pen si chelarlo – lahei an akimi saidelo. Aron Akai ke, monit aphan kejapon aBang lake Jehovah arideng pensi klemlo, lapen kechengsi asai angdeng lake pirthe athak si klemlo. Laso arni ahut ke, sai angdeng ason-amung lake kardom ahem lapen dovan kikim, lapen aron-atang pen ajok si Israel akhei aphuthak charilo. Israel akhei aphan kachari pen ajok, Alangli pirthe athak sai keklemji aphan along’e chesomlo. Alangli sai angdeng Israel ahavar pen angtan anta pangdanglo, Alangli sai angtan anat si damlo, laso pen ajok aphi aove atum Jehovah helo Arnam binonglo pu kachiniji aphan, lapen Jehovah si sining, pirthe lapen ajat ason ta pinchonglo, lapen Jehovah si hormu anta pinchonglo pu kapachiniji aphan. Alangli sai angdeng Israel akhei atum pen anpar angtan anat ta ingdanglo. Israel ahavar lake Jehovah sai keklemcheng adimlo lapen kangthir’et adimlo. Lake Aron Akai asai angdenglo. Kanghon-Kangjinso Akai arni ahut lake, Jisu lake inut monit aphan kejok kevanpi a’Arnam lo. Alanglilong kedo lake kangjinso, kanghon, ning keme, ning kiding, kachepabithek, kachechak’un ajakong heihui si dolo lapen lahei aot-adur lake monit aphan pap pen kepajokji aphanlo. Alangli ot-adur lake kanghon-kangjinso pen keplengset henlo, kopima Alangli ke kanghon lapen kangjinsothek aBanglo, lapen Alangliphan monit ajoine thengparpan athak saklo, lake Arnam monit aphan amena aphan asonthot chinghonlo pu kachepaklangji aphan, Amethang amat charklidetlo. Kanghon-Kangjinso Akai ahut ke, Arnam amen lake Jisu henlo, la pudam lote, Arnam lake monit aphan kepajok a’Arnam lo, lapen Alangli ke chingkimepik lapen kanghon pen keplengset a’Arnam lo. Arnam monit along dolo. Alangli kanghon, Alangli kachingkime, lapen Alangli pen kejok kevan lake anuttin amonit atum along ta dunkrilo. Jisu amen kedeng lapen Alangli do pu kedeng atum ansi ning karong, ning kangsam, hirjume lapen keongdung akangjinso, lapen Alangli pen kevan akejok longchotlo. Jisu thengparpan athak kithi pen ajok, Alangli phiphi kidun atum anke kejok longlo lapen pap anta diya tanglo. Kanghon-Kangjinso Akai ahut lake, Jisu lake Arnam amenlo. Kaprek alamthe pen pudamlo pulote, Kanghon-Kangjinso Akai ahut sai angdeng keklem lake Jisu amen pen ajok si klemlo. Aban aron pen anpar angkang pathe si sai akimi Alangli pen pangchenglo, lapen Alangli sai angdeng lake thengparpan athak kithi pen ajok si pajutdetlo. Alangli sai angdeng keklem kangthimlim ke lahenlo. Lasi, Jehovah Aron Akai lake Arnam amen pen si sai klemlo, lapen Kanghon-Kangjinso Akai lake Jisu amen pen ajok si sai klemlo. Kijut arni ahut ke, Alangli men lake Arnam Jakongkethe – Jakongkethe Abang, Alangli jakong pen ajok monit aphuthak langcharilo, ron chepahailo, lapen monit aphan chepalonglo, lapen ha kijut ahut ke, isi aove inghaplo. Aovetin tame, Alangli sai angdengtin sita, Arnam aot-adur lake tok pame.

Kecheng ahut ke, monit Kachejok Abarim Alo monit aphan kelangchari lake oso aphan kelangchari atenglo. Kechengsi amonit atum ke Jehovah arideng kahachemi atumlo, lapen latum ke Israel akhei atum henlo. Latum kosonsi Arnam aphan aman kipi nangjima lapen kosonsi pirthe athak kereng nangjima chininedetlo. Pudamlo pulote, Jehovah si monit akhei aphan pinchonglo, lake, Alangli Adam lapen Eve aphan pinchonglo, bonta, Alangli latum aphan kachini’un ajakong lapen kosonsi Jehovah aphan aman kipi nangjima lapen kosonsi pirthe athak Jehovah aron kirimdun nangjima latum aphan pipedetlo. Jehovah pen ajok kerap vangve pulote, badu ta laso aphuthak chini un’edetji, kopi apotma, kecheng ahut ke monit atum along lahei agian ave. Monit atum kachini lake Jehovah ke Arnam lo, bonta Alangliphan kosonsi kardom nangji, koson aot-adur pen kedo si Alangliphan man kipima, mate kopi si Alangliphan man kipi angthek pi nangjima, lahei ke monit atum aphu along avedetlo. Monit atum kachini lake koson si Jehovah kapinchongtang ahormu aphuthak ning arong kachipi nangjima ansi chini chotlo, bonta Arnam asomar pulote koson aot-adur pen si dothak nangjima, lapen kosonsi Arnam asomar apun achak kechokjima lake monit atum chininedetlo. Latum aphan kethan abang avedetlo pulote, lapen inutnut aphan kethanjir abang avedetlo pulote, lahei monit akhei atum komentune ta monit apun-achak ateng reng thekthe detji apotlo, bonta Sobar aban si latum cheplangpo. Jehovah monit aphan pinchonglo, la kopima pu lote, Alangli monit aphisar-aphusar, Adam lapen Eve aphan pinchonglo, bonta latum aphu tarlok arlo ajat agian lapen kachini’un ajakong ta pipedetlo. Latum pirthe athak si bochelo tema, bonta latum ajat ason ta chinine. Lasi, Jehovah monit aphan kapinchong asai angdeng lake plenglim lapen choklim kalilang, lapen kechoklimji aphan helovinglang. Alangli monit aphan isi akumlin ason longle pen pinchong si Alangli chethe chipilo, bonta monit aphuthak Alangliphan kosonsi man kipijima pu aning kepahangji akamatha ajakong abang ke pipedetlo. Kecheng ahut ke, monit atum Alangliphan aman kipiji lapen kaphereji anta kosonma chininedetlo. Monit atum kachini lake Alangli lam karju anchotlo bonta pirthe athak chethe kedo aputhak mate pirthe athak monit apun-achak ateng kedoji aphan aron-atang ajat ta chininedetlo. Lasi, Jehovah pinso lapen arloso aphan ni throksi Alangli sai angdeng keklem angbong patanglo tema, bonta, monit aphan kapinchong abang ke choklim kalilang, kopima monit lake phe’e asonbenchot lapen ahokpet amonit ason cheplangplelang. Monit atum kachini lake Jehovah si monit akhei aphan pinchonglo, bonta alangli kosonsi Jehovah aron-atang ateng kekroi dunpoma thangnat ta chininedetlo. Lasi, monit akhei pirthe athak dokok aphi sita, Jehovah asai angdeng lake kijutji aphan tongtongtelang. Alangli monit aphan langchari si Alanglilong kevangji aphan sai klem nangkok, lapen ajok latum pirthe athak reng rappet thekji aphan lapen Alangliphan man tame kipi thekji aphan, laso pen ajok latum, Alangli kachari pen ajok si monit apun-achak ateng kerengthekji aphan si Alangli la klemlo. Lason pen ajok si Jehovah arideng sai keklem kapangcheng anke tang pamelo; la ke, lason pen ajok si Jehovah pirthe kapinchong asai angdeng jut pamepo. Lasi monit aphan kapinchong pen, Alangli pirthe monit atum aphan suri suri aningkan langchari nangkoklo, lapen ajok monit atum Alangli kibipontang aron-atang an kekroi thekji aphan, lapen pirthe athak monit apun-achak ateng sai keklem thekji aphan. Ansi, Jehovah asai chun pameji. Alangli laso asai monit aphan pinchongdet pen amat klemlo lapen Jacob arni an klemlo, laso apor ahut Jacob asomar bang krehini aphan Israel akhei krehini pinchonglo. Halaso ahut pen amat, Israel akhei atum anke Alangli kejapon amonit atum planglo, lapen Israel ahavar ke Alangli sai keklem adim planglo. Israel aso atum pen ajok pirthe athak Alangli pen kejapon akhei planglo lapen latum angbong Alangli sai klemlo, lapen Israel ahavar along ke Alangli pe sai kapangcheng adim planglo, latum pen ajok kethedung asai klemlo, laso pen ajok pirthe athak Alangli pen kahache atum anke Alangliphan man pithekpo lapen Alangliphan man-peng pithekpo. Lasi, Israel aso atum pen ajok pirthe kekroikrelang mate Gentile adet atum anta Israel ahavar along charlidun meme adet ason planglo, lapen Israel akhei atum angbong kachipu alam an sitame Gentile mate kekroikrelang akhei atum adet an ta latum alam kroilo. Kopima, latum henlo Jehovah along pen kechengsi aron-atang kedenglong atumlo, lapen latum henlo kosonsi Jehovah aning kehang atovar aphan aman kipithek atumlo. Latum ke pirthe athak monit akhei angbong Jehovah aning kehang ason kachinidun atumlo lapen Jehovah pen kangvaitang akhei atumlo. Kanghon-Kangjinso Akai nangkele ahut anke, Jehovah monit aphan halaso ahut anke langcharirelo. Monit atum pap klemlo lapen pap anat si chingbe dunchoklo, lapen, laso ajoksi Alangli monit aphan pap pen kepajokji asai klemlo. Lason pen si, Alangli monit aphuthak sai klemlo lapen monit aphan pap pen pajokphlotlo. Kijut apor ahut ke, monit atum sai amo pen la an si kisui lapen keklo karnuklo, kangsai lapen ado kipi asai deng nangkoklo. Lason pen anchot si sai angdeng chun unchotlo. Kaprek alamthe pen pulote, Arnam Alangli men, Alangli sai pen ajok sai klem si, aove ove angbong sai keklem thakreplo lapen araje chelarvoilo; Arnam Alangli men lapen Alangli sai, lapen Alangli prekjam araje pen ajok si aove ove anta helatvoilo lapen sai angdeng pachunbomlo; Arnam amen lapen Alangli sai lake Alangli kai lapen Alangli sai aovetin aphan chepaklanglo. Langdam sinang, Arnam asai keklem jongsi aovetin ta isivet pulote, Alangliphan ke kaike ta isivet amen pen si hangpo, tangte kosonsi monit atum Alangliphan kachinipo? Arnam aphan ke Jehovah hangvek nangji, lapen kaprek amen pen kehang pulote Arnam kalilo. Mate, Jisu si Arnam chot, lapen Jisu pu amen pen anpar ke kaprek amen Alangliphan hanghelo; Jisu pen anpar, Jehovah ke Arnam kali, lapen Arnam jakongkethe ta Arnam kalidetlo, bonta Arnam ke Arnam lo lapen Alangli ke monit atum angbong dolo, lapen Alangliphan ke Jisu hangvek nangji, kopima Arnam ke monit atum angbong dolo. La klemji pulote aron-atang aphan kroivek nangpo, lapen Arnam aphan isi angkang angbong si bi nangpo. Tangte, aovetin sitame, Arnam sai keklem ason an ke, lapen Alangliphan kehang amen, lapen Alangli kacheparjan araje – Alangli amotin sai keklem pini arni anta – lahei ke isi aron aphan ta kroidundelo, lapen kechokche thangnat ta avelo. Alangli henlo Jehovah, bonta Alangli ke Jisu tamelo, lapen Messiah ta kalanglo lapen Arnam jakongkethelo. Alangli sai keklem asap chepharlo’un, Alangli men kachelar pen ajok. Isivet amen pen ajok Alangli doverve, bonta Alangli pen ajok kaprek kaprek amen ta chepharlo unlo, lapen Alangli aovetin sai keklem lake Alangli ot-adur chepaklanglo. Langdam sinang, kijut arani nang kele ahut, nang kekroi a’Arnam lake Jisu silang, lapen Alangli inghun kelok athak pensi vanglo, lapen Jisu araje si chepindenglo, lapen Alangli lam kaningje anta Jisu kaningje ateng: “Nangtum nangmethang asonthot le tebok-terei aphan chinghonnon, nangtum choche-junje pen ardomnon, nangtum ahotur aphan nang methang asonthot chinghonnon, bang aphan putotri, lapen ning kiding pen chepabiheknon. Nangtum Ne sangho plangple aphrang lahei asai nangtum klemvek nangji. Lahei asai nangtum klem lote, nangtum Ne rat lutdun longji,” pusi ningjekonglo. Tangte lahei alam lake Kanghon-Kangjinso Akai asai angdeng kalima? Nangtum lahei alam karju pen kopilo kamatha? Tangte lahei asai lake Jisu si klembomlo pu nangtum mathathejima? La keklemtang asai si puthot keklemthu kalima? Monit atum la aning arongjima? Nangtum kamatha lake Arnam asai keklem lake akaprek angdeng dam un’elo pusi mathalo. Alangli la anvet si jakong dolo, lapen sai keklemji ason avelo, lapen Alangli jakong kachepaklang la anvetlo pusi mathalo. Ningkan suri hini aphrang lake Kanghon-Kangjinso Akai pulo, lapen ningkan suri hini aphi anta Alangli ke Kanghon-Kangjinso Akai asonthot si lam thanbomlo lapen monit aphan aning pachirui bomlo. Monit atum pupo, “Arnam, Nangli jakong thepik binong. Ne kroilo Nangli ke gian pen plengset, bonta Nangli ke ning kacheber lapen ning kiding pen anchot si dolo. Nangli hotur aphan si chinghon thekchot lapen kaprek thangnat ta ave.” Monit aning arlo lake, Arnam ke kaike sitame Kanghon-Kangjinso Akai arni ason thakthak si dopo, lapen monit atum kekroi lake Arnam lake kaike ta kanghon lapen kangjinso pen plengsetlo. Arnam alam ke isivet angdeng adim ansi doverpo pusi nang mathaloma? Tangte, laso asai angdeng along lake Alangliphan thengparpan athak sakselo, lapen nangtum ketheklongji lapen ke’ot longji lake nangtum arjulonglepinlang lapen theklonglepin ason cheplangpo. Pini arni lake, Arnam Pharisi atum pen thangnat kacherap ave, lapen Alangli pirthe aphan ta pachinine, lapen Alangliphan kachini atum lake Alangli phi kidun atum chotlo, pima Alangliphan thengparpan athak puthot sak thuthelo. Kanghon-Kangjinso Akai ahut ke, Jisu pirthe athak Alangli birta keme kapachethangji aphan kadokave angno palelo. Alangli thengparpan athak kithiji aphanchot si Pharisi atum aphan akai along chepatip ponlo; Alangli jongsi Pharisi atum pen kacherap ave pulote, jakong kethe atum Alangliphan chini abang avedetpo, tangte kosonsi Alangliphan kepathiji ahukum kelongpo, lapen thengparpan athak kepasak longpo? Laso ajoine si Alangli thengparpan athak kithiji ajoine si Pharisi atum pen kacherap chepadolo. Pini arni, Alangli sai klemjoilo, asat pen kejokji aphan. Arnam batai hini aphong arje kachepharlo ahut, Alangli sai lapen Alangli ot-adur cheprekdaklo, lapen sai amo ta cheprekdaklo, tangte kosonsi Alangli sai angton pen isivetpo?

Tangte, Jisu amen – “Arnam itum along do” – pu alamthe lake Arnam aot-adur cheklangdaklo kalima? La Arnam aphan si pudaklo kalima? Monit atum jongsi Arnam ke Jisu anchotji pule pudet lote lapen akaprek amen avedetlo kopima Arnam ke aot-adur chelar un’e pule pulote la koson si mepo? Nangtum Jisu amen aphan kroi pameloma, Arnam itum along do, lapen la inutpet si Alangli men pen cheparjan unchotji pu kroiloma? Arnam aphan kaprek amen pen ta hang’un kalima, bonta lahei amen angbong, inutnat ta Arnam aot-adur ateng pen ingthimlim pu ave, lapen badu ta Arnam ateng ke man un’e. Lasi Arnam amen ke dopik, bonseta inutnat ta Arnam aot-adur choklim cheplang un’e, kopima Arnam aot-adur ke ingthirpik lapen ingchopik lapen monit kachini’un ajakong pen anchot kali. Monit agian pen chot ke lapen monit alamthe pen chot ke, Arnam aphan amen ke’en pachoklim un’e. Monit atum alamthe jumhek binong, lapen Arnam aot-adur aphan kipu kapachoklimji aphan lamthe avedet binong: Jakong kethe, aman kethe, manghumeme, karnuk, kerengver, kangthir, kechoklim, gian plengset, lapen kaprek kaprek anchotlo. Alamthe dopik khangjang! Bonta, la anvet alamthe kijumhek pen ke monit atum Arnam aphan aot-adur lakhadam un’e. Apor arni dambom pen, penang an amonit atum lamthe pangchopon bomlo lapen aning arlo pen Arnam aphan amen ke’en meponbomlo pusi latum mathalo: Arnam ke ajakong thepik! Arnam lake ingthir’et! Arnam lake mepik! Pini arni, monit atum lahei alam kaningje ang-ang kilit anlo, bonta monit atum amena angho pen lamthe pachoklim thekthelang. Lasi, monit aphan ke, Arnam ke amen dopik, bonta Alangli kaprek amen avelo, lapen la kopi apot loma pulote, Arnam Alangli amat lake ason ajat dopik khangjang, lapen monit atum along Alangli phuthak amen kipuji alamthe avedet binonglo. Isi alamthe lapen amen pen ajok ke Arnam Alangli methang aphuthak kipu pachoklimlo lapu kali, tangte laso aphuthak pachok unjima? Arnam lake ajakong thepik lapen ingthir’et, bonta aove kimitin along nang Alangliphan Alangli men pachelarvoi longjima? Lasi, aovetin along Arnam Alangli sai keklem angbong, Alangli isi amen isi aove pen chetonchit enpon si, Alangli keklem nangji asai klembompo. Alangli laso amen che’ir si, isi ajakong kedo, lapen isi aove along kacheparjanji aphan klempo. Lake Arnam monit atum aning angthin lapen alamthe ke’endun pen ajok si Alangli ot-adur chepaklangpo. Bonta, keongdung amonit karjong aphan kachomatlongtang lapen Arnam aphan kachinitang atum lake laso amen pen ajok Arnam puthot cheparjanthuji pu kroikredetlo – bonta, lake chininedetlo – lasi, monit atum Arnam aphan Alangli men pen ajok hanghe’etlo, bonta Arnam pusi hangchotlo. Lake monit atum aning arlo ke kanghon pen plengsetlo bonta kachedondunde aning ta thap’e asonbenlo kopima monit atum Arnam ke kosonma pu kethanji abidi jutdetlo. Arnam ajakong ketheong ke monit atum angho pen kethanji alamthe avedetlo. Arnam aot-adur aphan kethanji aphan lamthe isi pen puji pu sita lamthe avedet binonglo, lapen isi amen pen ajok Arnam aphan kipu mate kachethan’iji alamthe avedetlo. Komatne jongsi, “Nangli ketheklong binong ke kopi alamthelo?” pu nephan arju lote, ne kethakji lake, “Arnam lake Arnam lo!” pu ansi thakthek chotpo. Arnam aphan amen karjumenai lake Arnam pu amatlo kalima? Laso alamthe pen ajok Arnam aot-adur ta cheton’ilo kalima? La jongsi kalanglo pulote, kopi apot si nangtum Arnam aphuthak lamthe kiri chepaduk varetloma? Kopi apot si nangtum aphu tarlok aphan aduk inghoi nangpoma, mate mek-no jangjeset, choche-junje an, laso amen aphan ri chepaduk nangpoma? Isi apor nangleji Arnam aphan Jehovah, Jisu mate Messiah pu amen hanghedetji. Alangliphan Kapinchong Abang pusi puchotji. Halaso apor ahut lake, pirthe athak Alangli kache’ir amen anta jutpo, lapen Alangli pirthe athak sai keklem angdeng ta jutpo, laso aphi lote Alangli men anta prai’etlo. Kedoan ahormu ta Kapinchong Abang arideng dokok aphi lote, isi amen Alangliphan ke’irji kopi aphanlo? Tangte non anta nang Arnam amen si ribomlangma? Tangte Arnam ke Jehovah anchotloma? Mate Alangli Jisu anchotloma? Arnam amen pen nang chobei haijima? Nang chini nangji, Arnam ke isi amen chibivet abang lapu kali. Alangli isi, hini mate kaprek kaprek amen kache’ir lake Alangli monit atum aphan kelangchari nangkok ajoklo. Ajat amen le Alangliphan hang sitame – Alangli mena si lahei amen chingvailo kalima? Alangli kopi amen che’irji la nangphan nang arju jilangma? Arnam isi amen kache’ir lake monit atum chini unchit lapen monit atum kachini alamthe si enji, bonta laso amen lake monit atum isivet alamthe pen kapangrom unpetji amen kali. Nang kepu’un lake Arnam sining athak dolo, Alangli ke Arnam lo, Alangli ke Arnam amatlo lapen ajakong thepiklo, Alangli ke gian plengset, anong thepik, manghumemepik, kamatha bidi jutdet, lapen aman thepik binonglo, lapen anpar ke nang kipuji aot avelo. La pudamlo pulote, Jisu amen pen Arnam plang unma? Kijut arni nangkele ahut lake, Arnam si sai klembomlang sitame, Alangli men chelardetpo, kopima lake akimi aovelo.

Arnam lake pirthe sining angbong ta aketheneilo, tangte Alangli ok ajakong pen Amethang aphan chethanthek pamejima? Arnam monit arje ason cheparjanlo Alangli pirthe athak sai keklemji aphan. La sai keklemji aphan arje kachepharlo lake thangnat aphan kapajirmidam ave, la kedambom aove aphan thangnat kachephodam ave lapen Arnam aot-adur pen thangnat kacherap ave. Kopi apot si Jisu amena araje chepadovervedetlo? Kopi apot si Alangli monit atum aphan Alangli raje asonthot arjan hi pen aove ove aphan kepaklangji asai toitedetlo? Arnam arje monit along cheklanglo tema, bonta Arnam araje monit along kacheparjan pen monit araje pen ajok Arnam araje chepaklangdak binong loma? Arnam monit ason kacheparje ahut, Alangli sining angsong pen nangsun si monit along chepa’okdet lapu kali. Lake Alangli Karjong si nangsunlo lapen ok along dolo, lapen ajok si Alangli Karjong asai klemlo. Alangli karjong si ok along chepaklanglo, lapen Karjong si ok along sai klemlo. Ok pen sai keklem along Karjong kacherap thepik binonglo, lapen monit kacheparjan lake sai ajoine chotlo, bonta la monit araje pen ajok si Arnam ahok araje cheparjanlo lapu kali; lapen Alangli monit ason kacheparjan lake laso ajoine kali. Alangli monit ason kacheparjan lake Alangli karjong kesang adim ri si sai keklem kapangchengji aphanchot, monit kacheplang pen monit angbong sai keklem ke’un muchotji aphan, lapen ajok monit atum Alangli ot-adur theklong si, Alangliphan ansose chinipo, Alangli lam arjuo, lapen Alangli sai koan manghu memeloma chinipo pu aphan. Alangli men lake Alangli ot-adur chepaklanglo, Alangli sai pen ajok Alangli komatma pu chepaklanglo, bonta Alangli monit ason kacheparjan araje lake Alangli araje binong si cheparjanlo pu Alangli ningjeje; lake monit atum kamathachot. Lasi, monit ason Arnam kacheparje lake Alangli men, Alangli sai, Alangli ot-adur, lapen ke Alangli pinso-arloso kepatini henlo. Lahei pen ajok si Alangli laso aove along sai klemlo. Alangli monit ason kacheparjan araje pen ajok ke Alangli sai amo pen thangnat kachepho ave, bonta lahei ke halaso apor ahut Alangli sai keklem’i aphanchot. Bonta, Arnam monit ason kacheparjan abang aphan isi araje avedet puke chokchedetji, laso ajok si Alangli isi ahemtun chongvai si isi araje kachibiji aphan klemlo. Arnam araje jongsi isi abangphu ason kangvaitang mate kisiktang do pulote, Alangli pen kachinglit araje abangphu atum anke Arnam amen pen si vanglo pusi ningjepo. Tangte la chokchedetpo kalima? Jisu araje lake monit atum si arjan kihi pen semarlo monit atum Alangliphan kapardomji aphan. Halaso apor ahut ke, Karjong kangthir pen ajat ta latum aphan palamso dunde, lapen monit atum amena aning kamatha pen ajok si semarlo lapen pini arani anta laso arjan vanbonlo. Ahok alam pudamlo pulote, Arnam aning kehang ateng le langdam pulote, monit atum lason asai ke klemkledet nangji apotlo. Jisu arjan pini arni anta pirthe athak kedokok lake monit atum aning kehang alam apot puchot. Arnam lake karjong, lapen monit atum a’arjan kihi penchot ke komentune ta Arnam araje aphan lasonveklo pu ripthip un’e. Alangli raje lake Alangli ot-adur pen anchot si paklang unchotji. Alangli nokan kosonma, mate Alangli ingho, Alangli mek, lapen Alangli chu heihui aphan kipudamji lake ili monit atum kamatha pen ledam amat si un’e. John aphan kepaklang ahut, monit aSopo ason si Alangli cheklanglo: Alangli ingho pen hini akangchim anok ason si nang chonlo, Alangli mek lake me ade ason thakthaklo, Alangli phu lapen Alangli chu lake biresak angmi ason thakthak lok klinglo, Alangli keng lake acham kipitang aingchin ason thakthaklo, lapen Alangli ning along ser achong asonben chepindenglo. Alangli lamthe lake alir acham pen plengsetlo sitame, Alangli pen Arnam araje aphuthak arjan kilirdam lake kapinchongtang amonit asonben kalidetlo. Alangli ketheklong lake mangben ason chotlo, lapen pirthe athak amonit araje pen thangnat kacheton avedetlo. John lake amang si ketheklong, bonta Alangli ahokpet Arnam araje theklongledetlo. Arnam monit ason kacheplang araje, lake monit araje ason si kachepindeng apot si, angton pen Arnam aot-adur an laso araje kachepindeng along ingthimlim un’e. Jehovah monit aphan kapinchong ahut, Alangli monit aphan Amethang araje ason si pinchonglo lapen pinso lapen arloso pu thiplo. Halaso apor ahut, Alangli kipu alam lake Alangli pinso lapen arloso aphan Amethang araje ason si pinchonglo. Monit araje lake Arnam araje asonben si pinchonglo tema, bonta monit araje lake Arnam araje choklim binonglo pu jongthip un’e. Lapen monit alamthe penchot ke Arnam araje lapu henlo pu ili kipudamji aphan elamthe ave, kopima Arnam ke ajakong thepik binong, ahir-asang thepik, manghumeme lapen matha un’epin an.

Jisu pirthe athak sai nang keklemcheng ahut, Karjong Kangthir akacherap pen si Alangli lahei klemlo; Karjong Kangthir kejapon aling si Alangli sai klemlo, lapen Aron Akai along ketok Kachejok Abarim Alo mate Jehovah keklem asai ateng penle Alangli sai keklem kali. Bonta Jisu keklem asai lake Jehovah pen kibi pontang ateng pen klemkle pu sitame, Alanglitum sai keklem angkur kangthumdam lake elongvet. Jisu pen keklempon asai lake Jisu pen amat si klemlo, lapen lake Kanghon-Kangjinso Akai arni aphan panongvetlo; lapen Jehovah pen keklempon asai lake, Aron Akai aphan si panongvetlo. Bonta latum asai lake hini aove along sai keklem sita isinat aKarjong pensi sai klemlo. Jisu keklembom asai lake Kanghon-Kangjinso Akai arni aphan si klemlo, lapen Jehovah keklem asai lake Kachejok Abarim Alo along Aron Akai arni aphanlo. Jehovah lake Israel lapen Egypt adet amonit atum aphan si charilo, lapen Israel pen tebok-terai adet aphan charilo. Aron kimi mate Kanghon-Kangjinso Akai ahut Jisu sai keklem lake Arnam asailo lapen Jisu amen pen si Alangli sai klemlo pima Alangli si la japonbomlo. Nang jongsi Arnam keklem asai lake Jehovah keklem ateng pen si klemlo pule pulote, Alangli jongsi ajat asai kimi ta klemkledetlo, lapen Jehovah alam ateng penchot lapen Isaiah kamontri kapachetaktang ateng si Alangli sai pachunbom chotlo pulote, Jisu ke monit ason kacheparjan abang kalidetpo. Alangli jongsi lason si sai cheklemlo pulote, Alangli Aron Akai ahut inut asangho si plangchotpo. Nang kipu ateng chot pulote, Jisu ke isi aove aphan Alangli pen pangchengchedetji, lapen kaprek asai angdeng Alangli pen klemponpedetji apotlo. Lason thakthak si, Karjong Kangthir ta amena asai Jehovah pen amat si klemlo, lapen Jehovah penpete Karjong Kangthir ajat asai kimi ta klem un’edetji apotlo. Monit atum Jisu asai keklem amo aphan lason kamathadun lake kechokche asailo. Monit atum jongsi Jisu keklem asai lake Jehovah alamthe ateng lapen Isaiah montri kapachethangtang ateng si klemlo pulote, Jisu lake Arnam le monit ason kacheparjan abangphu loma mate Alangli inut athekkerelo? Laso ateng pen langdam lote, Kanghon-Kangjinso Akai pu amat si avedetpo, lapen Jisu ke Arnam monit ason nang cheplang jokplotpo, kopima Alangli keklem asai lake Kanghon-Kangjinso Akai apharman kalidetpo bonta Kachejok Abarim Alo along Aron Akai arni apharman karjap Abang plangrongpo. Jisu sai nang keklem ahut isi akimi aove do tahailo, isi aove ke pangchengji aphan, lapen kedamtang Israel along keklemtang asai puthot keklemthuji aphan bonta Jehovah Israel along kachari ason kali, mate Alangli aron barim pen kali, mate aron-atang pangchokling pen kali, bonta Alangli keklem nangji asai kimi si Alangli klempo. Arnam amat akimi aove nang ingpulo lapen Arnam amat isi aove nang inghappo. Monit atum ke isi aove aphan pangcheng un’e lapen pajut ta un’e. Jisu jongsi Jehovah asai Alangli kevang pen ajok pajutje pulote, Alangli inut amonit chot lapen Arnam amen pen kevang aot ave pusi pudetpo. Bonta Jisu pirthe athak vang pen Jehovah asai nang kepajut, Jehovah asai keklempi, lapen, Amethang asai ta cheklemlo, sai kimi, lapen ajok isi aove kimi nangle tanglo, lapen Jisu ke Arnam amena amatlo pu tokdaklo. Latum sai angdeng ingdeng hini keklem cheprekdaklo. Isi angdeng lake kardom ahem along si klemlo, lapen isi asai angdeng lake kardom ahem pen angtan si klemlo. Isi angdeng lake monit atum achethe aron-atang ateng pen kejapon henlo, lapen akaprek abang lake pap alar kacharkli henlo. La ingdeng hini asai keklem lake aron prekdaklo; la ove akimi lapen ove barim pu thakdaklo, lapen la hini cheprekdak pu kipu ke kaheno alam kalilo. Latum sai keklem adim ta prekjamlo, latum sai keklemji pu kihum amo ta cheprekdaklo. Lason thakthak si, latum asai ingdeng hini an thakmelo: isi lake Kachejok Akimi Alo lapen hini abang ke Kachejok Abarim Alo henlo, la pudamlo pulote akimi lapen abarim aron henlo. Jisu kevang ahut Alangli kardom ahem arlo lutle, la Jehovah kardom ahem arlo sai keklem arni ke kijutlo pu paklanglo, lapen la puthot klemthu voivelo. Kardom ahem thepi pen kebar lake, isi a sai kimi mate kardomhem angtan isi atovar kimi kapangchenglo, lapen Alangli pen ajok Arnam asai aphuchong akangtuipik adim an vanlo, lapen Arnam asai kardom ahem angkur mate along’e along an chingthanglokpo. Lasi, Jisu kevang ahut anke, Alangli kardomhem arlo doklungkledetlo, lapen Alangli kardomhem arlo sai klemkledetlo. Alangli kardomhem pen angtan si sai klemlo, lapen, asangho atum aphan tovar japonbomlo, lapen Alangli sai angdeng jokvan pen klemlo. Arnam kardomhem pen kebar Alangli sai keklemji aphan pulote Alangli sai kimi kapangchengji aning kehang do’etlo. Alangli sai lake kardomhem pen angtan si keklemji chisiklo, lapen lake akimi aron lapen joike-jokvan pensi la sai angdeng pachunlo. Jisu kevang pen amat, Jehovah arni kedobom aron barim arni pajut pamelo. Latum aphan amen kehang paprekjamlo tema, bonta la hini asai angdeng ta Karjong Kangthir pen amat si klemlo, lapen sai angdeng jutjepin si dambomlo. Amen ke prekdaklo, lapen sai angdeng amo ta prekdaklo, lapen aove ta prekdaklo. Jehovah kevang ahut ke, hala ke Jehovah arnilo, lapen Jisu kevang ahut anke, lake Jisu aranilo. Lasi, kevang aportin si, Arnam aphan isi amen pen si hanglo, lapen Alangli isi aove amen pen vanglo, lapen Alangli tovar kimi paklanglo; lapen atovar akimi aphongtin, Alangli men kimi che’irlo, la pen ajok Arnam ke akimiver lapen aban kali pu paklanglo, lapen Alangli sai angdeng kaike ta sangselo lapen aphrang anat si damlo. Tomo ke kaiketa aphrang anat si dambomlo. Arni kedambom aling Alangli sai kimi klembom nangpo, aningkan kimi aling Alangli sai kimi klem nangpo; Alangli tovar kimi paklang nangpo, akimi aove paklang nangpo, akimi lapen akethe muchot asai angdeng deng nangpo, lahei pen lote, akimi amen lapen akimi asai van longpo. Apor pen apor, Arnam akarjong akimi asai klemlo, abarim aphan riphethelo. Alangli sai kaike ta sangselo, bonta apor kedam aling lapu si dambomlo. Nang kamatha jongsi Karjong Kangthir aphan ingthimlim pulote, kopi apot si Jehovah ke kurusar atum aphan Alangliphan paruthai ronglo, bonta lahei aphuthak ta, Jisu kardomhem arlo lutledetlo, lapen Alangli kevang pen, Alangli ke kurusar akethelo pusi monit atum pu rinti, lapen Alangli ke David ahemtun pen si vanglo lapen kurusar kethelo lapen Recho akethelo pu pipot si pulo? Tangte kopi apot si Alangli karkli-kaphejo asai klemkledetlo? Kardomhem arlo lutnon lutlenon sita – la Arnam asailo kalima? Monit atum kamatha, Jisu puthot chevangthuji lapen, kijut arni ahut anta, Alangli puthot Jisu si cheplangthupo, lapen inghun kelok athak pensi vanglo, lapen Jisu arje asonthot si monit atum angbong nangsunpo: tangte la keklemtang asai puthot keruithu kalima? Karjong Kangthir abarim along si kaike amat dover unjima? Monit atum kekroi lake amena aning kamatha alam chotlo, lapen monit atum kachini lake isi kekroidamthap lapen amena aning kamatha aling si kroilo; latum Karjong Kangthir keklem asai pen chetontelo lapen Arnam aning kehang ateng damdelo. Arnam lason asai klemkle; Arnam ke luvok kali, lapen Alangli sai lake nang kamatha ason kali. Monit atum kamatha ateng pulote, Jisu ke inghun pen vang si nangtum angbong nangsunji. Nangtum la aphan deng dunpo, inghun pen kevang abang aphan, Alangli ke Jisulo pu nangchethanpo. Nangtum Alangli ripak along thengparpan along ingchin pen kesak amek theklongpo, lapen Jisu pu chinipo. Alangli nangtum aphan puthot nang pajokthuji, lapen nangtum a’Arnam cheplangthupo. Alangli monit aphan pajokthupo, nangtum aphan amen kimi nangpipo, lapen nangtum aphan akelok arlong nangpipo, lapen lote nangtum Sining arat Alanglilong lutdunlongpo lapen sining hemrengme along nangdengpo. Lahei akekroi monit atum aning kamatha alam kalima? Monit aning kamatha ateng si Arnam sai klemjima? Tangte monit aning kamatha Sobar penle kevang kalima? Monit aphan anke Sobar si chongthuidetlo kalima? Arnam jongsi monit aning kamatha ateng si sai klemlo pulote, Alangsi Sobar abe si dunlo kalima? Alangli Amethang kapinchongtang ahormu ason si matharongpo kalima? Alangli kapinchongtang ahormu an Sobar pachobailaplo apotsi, monit atum ke Sobar along chepa’ok duntanglo, tangte Sobar kamatha ateng si Arnam sai klemlo pulote, Alangli Sobar pensi chepajirpolo kalima? Tangte kosonsi Arnam asai pen apot monit atum matha unjima? Lasi, Arnam ke komentune ta monit aning kamatha ateng sai klemkle, lapen nang kamatha ateng pen komentune ta sai klemkle. Ajahak atum kamatha lake Arnam amena amat si inghun athak pen vangji pulo. Kalang, ahok lake Arnam ningjevek alamlo, nonta monit atum Arnam akamanghumeme aphuthak mathadun un’e kalima? Monit atum ke komentune ta Arnam alam ke than pangtak un’e pu nang chininema? Nang puthip unma, lapen, ning pahininepin pen ningje haima, nang phuthak Karjong si sai klemlo pu? Karjong Kangthir nangphan lapu nangthan dakdakjima? Nangphan Karjong si nangpalamso loma mate nang ning kamatha pen ajok si la’an mathalo? Nang pulo, “Lake Arnam Amethang amat si ningjelo.” Bonta lahei pen ajok ilitum aning kamatha aling Arnam aning aphan lakha dam un’e. Isaiah montri pen kipu alam aphuthak lake, Alangli kopi aphuthak si kipudamma nang chini pameloma? Isaiah montri alamthe nang kethan pangtakji ajakong ave pulote, kosonsi nang Jisu alam kethan pangtak haipoma? Komat si jakong themuchotlo, Isaiah montri ma Jisulo? Arnam aphan Alangli sai klemkle aphrang nang si Alangliphan thanpoma? Ajat ahormu sita chini un’e, sining athak apherangke atum anta chinine, Monit aSopo amat ta chinine, tangte nang kosonsi chinipoma? Monit atum ke kachini ajakong jumpik khangjanglo. Nang non amat kachini nangji lake sai ingdeng kethom aphuthak henlo. Jehovah arni lapen Jisu arni, lapen Jisu arni pen pini arani an, la kethom asai angdeng lake Arnam asai keklem amo isi ahonjeng ason si chihinglamlo, lapen lahei ke Karjong pen keklem asailo. Pirthe kapinchong pangcheng ahut pen ta, monit aphan kelangchari lake Arnam si klemlo. Alangli ke Kecheng lapen Kijutlo, lapen Alangli ke Aphrangsi lapen Kepadusi antalo, lapen Alangli henlo isi aove kapangcheng lapen isi aove kepajut tamelo. Sai amo ingdeng kethom, la prekjam aovelo lapen adim kaprek adim planglo, lapen la pensi sai klemlo. La ingdeng kethom aphan kethakdak atum lake Arnam pen karjap chetontelo. Non ke, nang kachini nangji alamm lake kecheng asai angdeng pen non pini arni anta Arnam si sai klembomlo, lapen la isivet aKarjong pen si sai klemlo. La ning kibiji adim avelo.