Arnam Asai Kelangdammek (2)

Kachekobir a’birta keme ke Kanghon-Kangjinso Akai ahut si kapachethang, lapen monit la kroi lote, ansi alang phan pajokji pusi than pachini. Pini, kejokvan alar, ladak ke kachepahai lapen kechoklim alam anchot si kachethan. Lason ningjeje’pin lang je jongsi inut abangphu kroilo pulote, alangtum hemtun isi tame hirjume longtheipo, kalite ephong le kejok lote kaiketa kejoklo. Pini, baduta lahei alamthe ningjejelo, lapen lason alam anke aban lo. Laso apor ahut, Jisu asai ke kadokave monit a’khei aphan pap pen kapajok henlo. Kadokave komatma Alangliphan kekroi atum apap anke diya tanglo; Alangliphan nang kekroi dotik anke, Alangli nangphan pajok dunji; jongsi Alangliphan nang kroi lo tangte, nang ke pap keklem abang kali tanglo, nang ke nang pap doan pen jokvanlo. Lahenlo kopima kejok pu kipudam, lapen kekroi pen angthek pulo. Non anta komatma hala kekroitang atum along, Arnam aphan chedandong lapen kekhamkhe atum dolang, lapen atheke nonpu ta pajo pen kapave nangji klemnang bom lo. Kejokvan puke monit aphan Jisu plenglim pen kelonglo pu le kipudam kali, bonta halake monit anpar ke pap avelo pu aphan, pima alang a’pap doan alangphan diya tanglo. Nangphan kekroi nangpi tanglo, nang anpar ke pap pen plengset kalidetpo. Laso apor ahut, Jisu akeongpi asai pima Alangli arisangho atum kapajirmidam un’edet an klemponlo lapen akeongpi alam ningjelo pima monit atum chinidam un’e. Lake athema, laso apor ahut, Alangli thangnat kethan kapajirmidam ave. Lasi, penang an aningkan Alangli damdet pen aphi, Matthew si Jisu aphurun selam ponlo, lapen akaprek atum ta penang an asai klemlo pima lake monit a’ninghang ateng pen henlo. Jisu ke monit aphan kepachoklimji lapen kelongji le kevang kali, bonta isi asai angdeng keklem ponji aphan: sining recho arat abirta keme kevan lapen thengparpan athak apran kachipi asai kapapleng aphan henlo. Lapen lasi, Jisu aphan thengparpan athak apran endet pen, Alangli sai anke kepajut ponlo. Bonta non kedobom angdeng along – kachepahaidet asai – ansose alamthe ningje nangjilang, ansose sai klempon nangjilang, lapen penang an amo dovek nangjilang. Lasonthot si Jisu lapen Jehovah kemanghumeme asai doan tame paklangvek nangjilang, laso ajok kadokave amonit atum tame alangtum akekroi along klardak lapen chinidunpet longji mene, athe lahenlo kijutsi arni asailo, lapen la kijutsi arni anke Arnam asai kapajut pon lo, sai heihei kangton ponji apor. Laso asai angdeng ke nangphan Jehovah aron lapen Jisu pap kepajok asai alam than paklardakpo, lapen jasemetpet laso ajok nang angton Arnam ningkan suri throk kisik-kedang a’kemangdam asai chinidun’iji meme, lapen kadokave laso ningkan suri throk kisik-kedang a’kemangdam a’kenangsot lapen atiri doan chorodunpo, lapen Jisu keklemtang asai doan lapen Alangli kaningjekang alam an ajor chinidampo, lapen anparta nang Baibel aphan mek kave pen kekroi lapen aning kedok jokjak lo. La kado kave ta nangphan angton pen pachini longpo. Nang Jisu keklem tekang asai lapen pini arni Arnam asai sonni tame chinidam’po; nang ke kadokave ahok, chethe, lapen tovar aphuthak tame chinipo lapen theklongpo. Jisu keklem tang angdeng along, kopi apot si kapajutji asai klem tekangke le Jisu damjui lo? Athema Jisu keklem asai angdeng ke kepajut pon asai kali. Alangliphan thengparpan along sakdet pen, Alangli lamthe anta kijut nanglelo; Alangli apran chipidet pen aphi, Alangli sai angton pen jutvenlo. Non kedobom angdeng ke akaprek: Lamthe kaningjepon pajutdet aphi lapen Arnam angton asai ingtondet ansi Alangli sai jut po. Jisu keklem asai angdeng ahut, penang an alamthe kaningje ponpe’det do’olang, kalite paplenglim pen kethanpon kalidetlang. Tebonta Jisu ke kopima Alangli kaningje kalite kaningjeje anta mathathelo, athe Alangli birta keme asai ke lamthe asai kali, lapen lasi Alangliphan thengparpan along sak det pen aphi, Alangli ke damjuilo. Laso angdeng asai jasemet’pet ke pap adular apran kachipidet aphanlo, lapen lake non kedobom angdeng pen cheprekjamlo. Non kedobom asai angdeng ke jasemetpet ta kepaplengji apharman lo, kechamtheiji aphan, lapen kadokave asai doan tame kangtonji along kevan henlo. Jongsi lamthe le alangtum kepajutdet an ningjeje’det lo tangte, laso asai kapajutji aphan ajat atovar ta avedetpo, athe laso asai angdeng along kadokave asai tame kejut ansi vanlo lapen lamthe akerap pen patangtheilo. Laso apor ahut, Jisu akeongpi asai klemlo halahei monit ke kachinidamthei un’e. Alangli kedam damjoilo, lapen pini arni penang atum Alangli lamthe kachini damde nonpu ta dolang, halatum kachinidam ke kechokche tebonta nonpu anta chokpet lo pusi latum kroibom lo, lapen alangtum chokche pu chinine. Kejut ahut, laso non kedobom angdeng si Arnam asai kejut an plenglim vanpo, lapen laso asai kangtonpon vanpo. Arnam kisik-kedang akemangdam kadokave tame chinidampo lapen theklongpo. Monit atum along akamunthidam, alang akemangdam, alang akechokchedet kachinidam, alang Jehovah lapen Jisu asai aphuthak akamathadam doan, alang Gentiles aso atum aphuthak kelangdam, lapen alang akaprek kekek-kisui lapen akechokchedet an tame pechoktheipo. Lapen monit ke kadokave akechokpet chethe atovar chinidunpo, lapen Arnam kadokave keklemtang asai jokjaklo, lapen angton ahok alam doanlo. Lason le keman lote, laso asai angdeng tame kepajutdamlo. Jehovah asai ke pirthe kasorjon henlo, lake kecheng ahutlo; laso asai angdeng ke kepajut asailo, lapen lake kangtonponlo. Kepangcheng ahut, Arnam asai ke Israel along kangvaitang atum angbong si sai klemponlo, lapen lake kadokave adim angbong pen kangthirnei along akimi akai aphurkimo kechengponlo. Kijutsi asai angdeng keklemponji ke kadokave adet angbong pen kangthirthenei alonglo, pirthe aphan kangsaiji lapen akai tame kepajut along kevanlo. Kechengsi angdeng along, Arnam asai ke kadokave adim pen keklarnai along si klemponlo, lapen kijutsi angdeng along ke kadokave adim pen kangtingnei along si klemponpo, lapen laso akangting aphan ke terekjuipo, katheang si vanphitpo, lapen kadokave amonit aphan tame chepahaidetpo. La kadokave adim angbong pen kangthirthenei lapen kangtingnei along amonit atum doan aphan chepahaidet lote, lapen angton amuluk aphai ta chinidunlo pima Arnam do, komatma lake ahokpet a’Arnam lo, lapen anuttin abangphu tame chenam si chekroidun pemelo tangte, laso ahok alam ke angton somindar adangpi aphan kachepahaidetji asai keklempon along enponpo. Laso asai angdeng ke angthek cheklangdonglo: Laso akai along asai le tangtheilo pulote, ningkan suri throk kisik-kedang asai tame plenglim pen kapajutlo. Hala kadokave adim pen kangtingnei along kedo atum aphan chepahaidet lote, lake chenam ta ningjemelo pima alongtin nahok tame lasonthot si manpo. Lason along, China aphan kachepahaidet asai along anchot si alamjor kedo peme angthek cheklanglo. China along kadokave akangtingnei ajakong an dopetlo, lapen China along amonit atum ke kadokave hala komatma ok pen plengset, Sobar ason, lapen ok lapen vi plengset atum si kacheklang saidelo. Lake Chinese akhei atumlo komatma dragon ke’er thepo pen ajok phangnodetlo, komatma Arnam aphan kangtangkring pen abirudhe kithur atumlo, atheke latum monit atheng puke kangdeinei lapen kangthirtheneilo, lapen lasi latum anke kadokave kahenonei amonit atheng pen keprekjek atumlo. Laso kipudam ke pima akaprek adet doan along ke thangnat akisung ta avelo lapu aphan kali; monit akamathadam anke kadokave isinatlo, lapen lahei adet amonit atum le kemesen aboi-pharan dolo puvoiphit tame, jongsi latum Arnam aphan chininedet tangte, lake pima latum Alangliphan khamkheveklo. Kopi apot si Jihudi atum tame Arnam aphan khamkhelo lapen patepeklo? Kopi apot si Pharisi atum tame Alangliphan khamkhedunlo? Kopi apot si Judas tame Jisu aphan chongthuidetlo? Laso apor ahut, penang an arisangho atum ke Jisu aphan chininelo. Kopi apot, Jisu aphan thengparpan athak apran endet pen aphi, tangte monit atum nonpu ta Alangliphan kroikredetlo? Tangte monit athikpetpe anke kadokave chingbarpet kalidetma? Lake pima China along amonit atum doan pen anchot si angthek dopo, lapen latum doan aphan chepahaidet lote latum anke arpum lapen ajaton chemanpo, lapen ke akaprek atum aphan kelang pangbar’idam akerap dopo. Kopi apot si Ne kaiketa pulo pima nangtum anke Ne kisik-kedang akemang along kepabatdunlo? Lake China amonit atum along si dolo pima kahenonei, kangthirthenei, kekroi thirklong kavenei, kekhamkhenei, lapen kachedandongnei anke plenglim pen cheklang pemelo lapen kadokave alangtum prekjam amung pen chepaklanglo. Ahin kaprek pen langdam lote, alangtum akai lapen kamathadam anke paphihuplang, lapen alangtum keklemver aot, hamphang avarmon, mahang kethek ahemtun – kadokave anta dukvoklo lapen kapaphidunneilo. Alangtum aman angdeng lethot tame ingdeipiklang. Laso adim along asai ke angthek cheklangdong, lapen laso asat kelang asai angton pen klempon patangdet aphi, Arnam asai angthun pardunron keklemji memuchetpo. Jongsi laso asai akengkam le patangthei lote, angthun pardunronji asai tame ningje nangnepin pen dambompo. Laso asai akengkam ephong le pachunlong peme lote, thedung akichun si angton pen longdampo, lapen angton somindar adangpi kachepahaidet asai tame choklim pen kapajutdam nanglepo. Chenam ta, ephong le nangtum angbong laso asai chun peme lote, lake angton somindar adangpi si kichundamlo pu pen chingbarpetlo. Lahenlo akenangsotnei athe kopi apot si Ne nangtum aphan arpum lapen ajaton ason kapamanpon loma. Kachedandong, kekhamkhedun, kangthirthedet, kekroi kavenei – kadokave ta lahei amonit atum along si longlo, lapen latum along si kadokave monit akhei kachedandong aot cheklangponlo. Latum anke chenam ta esonlo. Lasi, latum anke kachepahaiji aphan kelang pangbardam’iji angthek si pamanlo, lapen ephong le latum aphan chepahailong lote latum ke amethang amat si ajaton lapen arpum anut kaprek aphan chemantheipo. Kechengsi angdeng ahut Israel along asai keklempon pen alar ansose angthek cheklangdong lason avelo: Israel aso atum anke kangthirnei lapen kadokave amonit pen kahenonenei atumlo, lapen lasi laso alongri aphan akimi akai aphurkimo kepangcheng ajok akenangsotnei ajor kedo pu bikoklo. Lake pudammelo pima monit akhei aphusar anke Israel pen si vanglo, lapen pima Israel along henlo Arnam asai amahang kethek adimlo. Kecheng ahut, lahei amonit atum anke kangthineilo, lapen latum anke Jehovah aphan si ro-archolo, lapen latum along Arnam asai keklem ke kethedung angthek longdam’ilo. Baibel along kedoan ketokpon ke la hini akai ahut asailo: Isi ke Aron Akai ahut asailo, lapen isi ke Kanghon-Kangjinso Akai ahut asailo. Kachejok Abarim Alo along ke Jehovah alamthe Israel asor aphan lapen Israel along Alangli sai ansi tokponlo; Kachejok Akimi Alo along ke Judea along Jisu asai keklem ansi tokponlo. Bonta kopi apot si Baibel along Chinese atum amen thangnat ta pavedetlo? Athema aphrangsi sonni aphar Arnam asai keklempon anke Israel along, athema Israel along amonit atum anke kangvaitang atumlo – atheke pudam lote pima latum anke aphrangsi Jehovah asai kedengdun atumlo. Latum anke kadokave amonit akhei angbong pen kahenonenei atumlo, lapen kecheng ahut, latum anke Arnam aphan kelang nangji lapen Alangliphan karchover nangji aning atumlo. Latum ke Jehovah alam doan kroidunpetlo, lapen kaiketa kardomhem along ru-thailo, lapen kurusar apindeng lapen aphukup chingthanglo. Latum anke Arnam aphan kero-karcho kebannei amonit atumlo, lapen Alangli sai apharman ajaton kebanneilo. Lahei amonit atum anke ajaton lapen arpumlo atheke angton monit akhei aphan. Latum anke kangthirjir lapen kekroi thirklong ajaton lapen arpum saidelo. Monit atum lason si Job, Abarham, Lot, mate Peter lapen Timothy – latum anke kadokave ta Israel asorlo, lapen kangthirnei ajaton lapen arpumlo. Israel henlo monit akhei angbong pen Arnam aphan kero-karcho kechengsi adetlo, lapen nahok adim pen anpar ladak pen henlo kangthirnei amonit atum kevanglo. Latum along Arnam sai keklem ke pima Alangli mohut along pirthe adangpi monit akhei aphan kepangri mesenji pu aphan ajoklo. Alangtum akichun doan lapen alangtum Jehovah aphan kero-karcho akangthirjir anke tokponlo, laso ajok latum ke Kanghon-Kangjinso Akai ahut Israel pen angtan amonit atum doan aphan ajaton lapen arpum cheman longlo; lapen alangtum asai amo anke penang an aningkan suri asai si sikvetlo, pini arni aphan anlo.

Pirthe kikim kecheng anujok somdet aphi, kechengsi Arnam asai angdeng ke Israel along si klemponlo, lapen lasi Israel ke pirthe along Arnam asai amahang kethek adimlo, lapen pirthe athak Arnam asai keklem atirilo. Jisu asai angkang ke Judea adet angton pen pangromtheilo. Alangli sai keklem ahut, Judea pen angtan kedo hala masapso atum ansi chinidunchotlo, athe Alangli ke Judea pen angtan ke thangnat asai klemklelo. Pini arni, Arnam asai ke China along si vandetlo, lapen lake laso angkang ansi ingthirjir pen klemponlo. Laso angdeng ahut, China pen angtan ke thangnat asai ta chengchelo; laso China pen abat kangdang asai ke pima mo aphi si nanglepo. Laso asai angdeng ke Jisu asai angdeng angthun penlo. Jisu ke pap kadiya asai klemponlo, lapen laso angdeng along asai ke pima halaso asai pen angthunlo; pap kadiya asai ke patang pemelo, lapen laso angdeng along ke Karjong Kangthir ahin pen akamathapon akenang avelo, athema laso asai angdeng ke kedamtang angdeng pen chingbarbelo, lapen, anpartame, athema China ke Israel ason kalilo. Laso asai angdeng Jisu keklempon ke pap kadiyapon asai henlo. Monit atum Jisu aphan theklonglo, lapen arjidingklui aphi kali, Alangli sai Gentile asor atum along kangdang chenglo. Pini arni, penang an komatma America along ta Arnam aphan kekroi dolo, lason si UK lapen Russia along antalo, lasi kopi apot tangte komatma China aphan kekroidun amonit aphai jumheklo? Athema China ke kadokave pen kachingkirhetnei adet pinak. Lason along, China henlo Arnam atovar kedengdun kapadusi atumlo, lapen non anta lake lason asai klemdet aphi ningkan pharo isi pen akijumlang – America lapen UK adet pen paphipiklang. Arnam asai angdeng kapadusi ke China alongri along si klemponlo atheke Alangli sai kapajutponji aphanlo, lapen atheke pima kadokave Alangli sai kichun pemeji aphanlo. Israel along amonit atum kadokave ta Jehovah aphan alangtum aHemphu pusi hanglo. Laso apor ahut, latum Alangliphan ke alangtum ahemtun ahemphulo pusi hoklo, lapen angton Israel adangpi anke isi thedung ahemtun chemanlo atheke anuttin tame alangtum aHemphu Jehovah aphan si ingduk-ardomlo. Jehovah Akarjong kaiketa latum along cheklanglo, lapen Alangli ningjelo lapen latum aphan Alangli ase chepadolo, lapen alangtum akai-achethe kachejaponji aphan inghun angpong lapen arki akerap si enlo. Laso apor ahut, Karjong si Alangli akejapon Israel along padorlo, monit atum aphan Alangli ase si chepadolo lapen ningjelo, lapen latum inghun aphan theklonglo lapen sining kangder arki arjulonglo, lapen lason pen ajok Alangli alangtum akai-achethe aphan ningkan suri sose an chejaponlo. Lasi, Israel along amonit atum anchot si kaiketa Jehovah aphan ingduk-ardomlo. Latum kroilo pima Jehovah ke alangtum a’Arnam lo, lapen pima Alangli ke Gentiles atum aphan a’Arnam kalilo pulo. Lake manghumeme alam kalilo: Jehovah, ajatnon, latum anglum si ningkan suri phli lekai an sai klemponlo. China alongri along ke, kelak amek kejang kithu ningkan suri aphi, non ansi kahenotang atum chinidamlo pima sining lapen pirthe lapen kadokave ahormu anke amethang si kacheman kali, bonta Kapinchong Abang si kasorjonlo. Athema laso abirta keme ke angtan adim pen si vanglo, halahei abarim aron otthip atum, kekhamkhe aning atum anke kroilo pima kadokave halahei komatma laso abirta keme kedengdun atum anke kachongthuilo, latum anke pinrem meme atumlo komatma Buddha aphan, alangtum aphusar-phisar aphan chongthuidetlo. Anpartame, penang an lahei abarim aron otthip aning atum arjulo, “Koson si Chinese amonit atum le angtan a’Arnam aphan kekroidun thekpo? Tangte latum ke alangtum aphusar-phisar aphan kachongthui kalima? Tangte latum ke kaheno keklem kalilangma?” Pini arni, monit atum pima Jehovah ke alangtum a’Arnam lo pu katengnetang arjidingpik anlo. Latum ke Kapinchong Abang aphan alangtum aning kamatha along pen kahelo kangdoi pen kibitang arjidingpik anlo, lapen latum alar ke kachekirla along si kroilo, alamjor ke pima monit ke thero akhei pen si nangkeplang pulo, lapen pima plangmena apirthe apum ke apor ateng pen ajok si nangcheman pulo. Monit akhei atum kadokave kemesen a’an-ahan kecholong anke plangmena apirbi pen si nangpadorlo, monit achethe kereng lapen kithi aphan ahukum dolo, lapen laso along ke Arnam avelo komatma kadokave ahormu kachepahemphu abang. Anpartame, penang an Arnam aphan kekroikredet atum komatma akekroi ke pima Arnam asontin aphan kachepahemphu puke kapachobailo lapen lake sonthan pen chekengkepin pulo. Bonta sonthan ke Arnam asai adular klem unjima? Tangte sonthan ke monit akhei aphan chepahemphu unjima? Arnam aphan kekroikredet atum kacharipon adet along birta keme kapachethangpon ke kejoike asai kali, lapen laso along ke thedung akebeng-kephan doveklo. Pini arni, tangte penang an komatma laso atovar along Arnam aphan kekhamkhe atum do kalima?

Jisu le Alangli sai keklemji aphan kevang ahut, penang an amonit atum Alangli sai pen Jehovah asai angbong lang pachingbar si khamkhelo, lapen, lahei kachetontedet kelong ajok, latum thengparpan athak Jisu aphan saklo. Kopi apot si latum thangnat ta kachetontedet Alangtum asai angbong pu kelongdamlo? Lake, ephar along, athema Jisu ke akimi asai si keklempon, lapen athema, Jisu Alangli sai chengche aphrang, inutnat tame Alangli aphurun angthun tok abang avedet. Jongsi komatne along do pu asonte, thangnat ta kaningri nangji alam avedetpo, lapen komat si tangte Jisu aphan thengparpan athak kesak abang dopo? Jongsi Matthew le arjidingklui aphrangjong pen Jisu kevang aphurun angthun tokthei asonte, Jisu ke lapuan kethedung akiduk-kesung chechak jokplotji apotlo. Tangte lason kalima? Jisu aphurun angthun monit atum kaporhilong pen ke – pima Alangli ke Abraham asopolo, lapen David angkurlo – tangte latum Alangliphan kiduk-kisung alangtum kipi chingtonkokji. Tangte lake ningduk meme kalima atheke Alangli aphurun angthun ketok paphi ongchotlo? Lapen kopuan ningduk meme kalima atheke Arnam asai sonni angdeng ansi Baibel along tokpon chotlo: isi angdeng ke pima Aron Akai ahut asai, lapen isi ke pima Kanghon-Kangjinso Akai ahut asailo; isi angdeng ke pima Jehovah keklem asai, lapen isi ke pima Jisu keklem asailo. Koan akemeji jongsi kethedung amontri le pini arni asai kethanmek do pu asonte. Baibel along isi angkung “Kijutsi Arni ahut Asai” pu ketokpon dokokji apotlo – lasonlo pu asonte pima akemepikji kalima? Kopi apot si monit atum pini arni lapuanpin akesung-keboi kepho nangkoklo? Nangtum sitame lason akisungpik apor pholo! Jongsi madu tame kelangselet pho nangji pulote, lake Isaiah lapen Daniel atumlo athe kijutsi arni ahut asai alam nangthanmekmedetlo, lapen jongsi madu tame akoi kipi nangji pulote, lake Kachejok Akimi Alo ketok atumlo athe komatma aphrang a’Arnam adunthu nangkachepharlothuji aphurun angthun tokponpedetlo. Lake kopuan katherak meme loma! Nangtum kadokave angthek aphan si kiri nangkoklo, lapen masap alamthe pen ajahak achet-abet kiri longlo tame nang ke nonpu ta lahei anke ahok kalima-kalang pu thandak thekthelo. Koan katherak meme alam! Kopi apot si Arnam Alangli sai along puan kachepatu karsiklo? Pini arni, penang an amonit atum ke kepadusi angthek kelong nangji dolang, tebonta latum anke kroikredet tame un’elo. Lasi kopilo tangte latum keklem nangpo? Latum kemangdam’e pen Arnam aphiphi dun thekthelo, lason si latum ke lason aningkibidam pen tame paphrang dam thekthelo. Lapen lasi, penang an “kereset lapen kethektang kethanthek atum” Arnam aphiphi kidun ahut latum “lang langlang sinang” pu akamatha pen ajat si dolo. Lake puan si akasiksak dolo! Jongsi Matthew, Mark, Luke lapen John le mohut keplangji alam thanmek thekdet pu asonte puanpin asontin tame kejoikeji apotlo kalima? Lake jongsi John le Khristo kepangri arat ahavar along ahok achethe aklong’et alam thekdamlong pu asonte mepikji apotlo – koan ningoi meme alam pima alang ke kelangdammek si theklongchotlo lapen abinong’et ke theklongledetlo, pirthe athak hormu-hortar asai chotlo. Lake puanpin katherak memelo! Kopi chonghoidetlo Arnam ke? Kopi apotlo, Alangli sai Israel along keklempon an akeme tangdet aphi, Alangli le China along non vang asonte, lapen, kopi apot Alangli ok nangcheparje nangkoklo, lapen salajong si sai klemlo lapen monit atum anglum nangdolo? Arnam ke puanpin monit aphan kamathakranglo! Alangli monit atum aphan aphrang pen thankoikedet anchot kali, bonta menmen si Alangli ke Alangli ado kipi lapen kangsai vanlo. Lake chenam ta thangnat chetondamdepinlo! Kechengsi Arnam ok nangcheparje pen, Alangli kisung-keboi chechak nangpiklo atheke monit aphan aphrang pen kadokave aklong’et ahok alam thankoikedet apotlo. Chenam ta Alangli pima chetengne un’edetlo? Lapen lasi kopi apot Alangli nonpu apor antame monit aphan thanthedetlo? Pini arni, koan kopai kelangno loma lake pima Baibel along throksikep ra throk alo ansi dochotlo. Ladak eson kijutsi arni ahut asai aphuthak kethanmek alam do nangjilang! Nang mathadamtha nangnema? Jehovah, Isaiah lapen David atum anta pini arni asai aphuthak thanponpedetlo. Latum aphan anke non ahut pen pavethu muchotlo, ningkan suri phli apor along pen chekakdaklo. Jisu sitame pini arni asai alam thanmekmelo, masapso ansi ningjedam chotlo, lapen nonpu ta monit ke dorphlup angthek longdamdedetlo. Jongsi nang le pini arni asai aphrang ahut pen pangbardam lote, koson si la sonni lahinhin angbong kalakhapo? Jehovah asai angdeng ke Israel along si jongdamvetlo, lasi jongsi nang le pini arni asai pen la pangbar’idam lote ladak ke thedung kachetonte dokokpo; latum sonni angbong ke pachingbardam un’elo. Nang ke Israel asor ta kali, mate Jihudi ta kalilo; nang boi-pharan lapen asontin aphuthak nang akadure an – koson si nang methang aphan latum pen nang chepangbar unpo? Lake tangte unjima? Chininon pima pini arni ke Khristo Arat Kepangri Akai, lapen lake Aron Akai lapen Kanghon-Kangjinso Akai pen cheprekjamlo. Ajat along tame, thangnat adichi ta keklemji bor’idetri; Arnam aphan ke lason adichi along thangnat ta longdamdelo.

Koson si Jisu la ningkan 29 an Alangli mahang thekdet pen aphi kerenglo? Alangli kibihek ahut lapen pariso alam anke Baibel along thangnat ta tokponpelo; nang chinima lahei anke kopipoma? Lake lasonjima atheke Alangli osomar mate pariso akai ke avedetlo, lapen pima Alangli amahang kethek ahut ke Alangli ningkan 30 pleng’etloma? Nang masapso alam si chinilo, lasi nang kamatha kachini alam kethandam along puanpin kapangkreve ke klemdetrinon. Lake nangphan thangnat akeme avelo! Baibel along ketokpon ke pima Jisu arta ningkan 30 plengple aphrang anchotlo, Alangliphan baptisom pilo lapen ke Karjong Kangthir kachejapon pen si kajejangtang ajo hi’i sarpo asat kelang chetongnanglo. Lapen Phli Birta keme Alo along Alangli ningkan kethom lapen abeng an asai si tokponlo. Alangli osomar lapen pariso akai aphuthak ke thangnat ta toktelo, bonta lake pima Alangli osomar lapen pariso akai avelo pu aphan le kipudam kali; lake lasonlo pima, kecheng ahut, Alangli thangnat asai ta klemkledetlo, lapen ke jongjung abangphu ason si dolo. Nang ningje unjima, tangte, Jisu ke pariso mate osomar akai avepin si ningkan 33 an arta rengdunlo? Tangte Alangli menmen pen si arta ningkan 33 lapen ebeng an ledamrokjima? La kadokave monit atum Alangliphan akamathadam anke mekbin asonlo lapen abinong’et kalilo. Ningbidam athai avelo pima Arnam ok nangcheparje abang ke jongjong lapen mesen monit atheng si cheparidenglo, bonta Alangli sai Alangli keklem ahut ke Alangli jasemetpet keplenglimle monit atheng lapen choklim kangthirjir pen henlo. Lake athema laso ajok pima monit atum pini arni asai lapen Jisu asai aphuthak tame kahonthe dokoklo. Arnam asai le Alangli batai phongni ok nangkachepharlo angbong kacheprek do puvoiphit tame, Alangli kenangsot atiri ke isinatlo. Ahoklo, jongsi nang le Phli Birta keme Alo along ketok an porhidam lote, akacheprek doan ta thedung. Koson si nang Jisu akai le Alangli oso lapen pariso apor ahut pachiruidam unpoma? Koson si nang Jisu aphan jongjung amonit atheng pu kachinidam unpoma? Nang pini arni a’Arnam monit atheng aphuthak kachinidam ingtangrak do tahailo, tebonta nang ke Jisu monit atheng aphuthak thangnat ta kelongdam avelo, nang kachinidamji puke durepiklang. Jongsi lake Matthew le tokponpedet pu asonte, nang ke masapsonat ta Jisu monit atheng aphuthak chinidamdelo. Tahailo, Ne le nangphan Jisu Alangli kai dotik atomo nangkethan ahut, lapen Jisu osomar lapen pariso akai dotik ahut aklong’et ahok alam nangthanlo te, nang ke nangphu chihijukpo lapen pupo, “Kali! Alangli ke lason kaliji. Alanglilong ke thangnat akeboi aveji, Alangli ke monit atheng cheparidengji nangji puke durepiklang!” Nang hangserji lapen chechekji. Lake athema nang Jisu aphuthak chinidamdelang pima nanglong ke Nephan alam akamathadam ansi dolo. Nang Jisu aphan akekroidam ke ingthirpetnei pulo, Alangli aphuthak ke thangnat ta ok kacheparje ave pulo. Bonta ahokpet alam ke nonpu ta ahok dothiplo. Inutnat tame ahok alam kedothip aphan ke kapatepek alam kaningjeji ninghanghelo, athe Ne le ningjedam lote lake ahok pen si cheraploklo; lake kapahanchadam alam kalilo, mate lake mohut kephoji alam kelangdam lapu ta kalilo. Chininon pima Arnam ke ingtuiving adim an chingthur theklo, lapen, anpartame, pima Alangli ke arnukkrung adim antame chepatudamjoi ta theklo. Alangliphan ke nang akethek-kere pen mangmun hemandam un’elo, Alangli ke kadokave api a’Arnam lo, lapen komatne inut jongdamvet abangphu kapaplang salajong a’Arnam kalilo.