Aron Akai Ahut Asai

Israel aso atum along Jehovah keklem asai pen monit akhei along Arnam pirthe along keplangji adim pathirlo, lake ingthirpik lapen Alangli kedo adim. Aphrangsi ke Alangli Israel pen angtan sai dengde, bonta alar ke, Alangli ingvailo Alangli ateng kachelon amonit atheke Alangli sai kangdang pen kekhangji aphan. Israel henlo Adam lapen Eve aphan Arnam kasorjon adim, lapen halabangso adim aduk pen si Jehovah abang monit thip’lo; bangso adim ke pirthe along Alangli si sai thirklong adim mandetlo. Israel aso atum, Noah asumar, lapen Adam pen nangkeplang, atum henlo pirthe along Jehovah asai atiri lo.

Non apor, Israel along Jehovah asai angdeng, akenangsot lapen athe ke Alangli sai pirthe adang along kapangcheng, halabangso asai, Israel along atirpi ensi, pajo pen Gentile adet anta kapangdang nangji. Lahenlo Alangli mindarsong adang sai keklem aron – isi akumlin ason pathir pen anpar ke mindarsong adang amonit atum Alangli birta keme chininetik an angkang kapathe. Kechengsi Israel arat atum ke Noah asomar. Lahei amonit atum along Jehovah achethe anvet kedo, lapen akai along akenangsotnei ason-amung dorchit an kachinidam do, bonta alangtum Jehovah ke koson a’Arnam loma pu chinine, mate Alangli monit along pen akemang, ansose akachini kijumlang kosonsi kadokave kasorjon aHemphu aphan karcho. Pudam lonang kekroi nangji^[a] aron-ajutang doma avema, mate kasorjontang akhei atum Kasorjon Abang aphan keklempi nangji asai doma avema, Adam asomar atum lahei thangnat kachinidam ave. Alanglitum kachini tangte apenan abang ahemtun akenang kapadorji aphan ang’i chepabu lapen chepaduk nangji, lapen apiso abang apenan aphan chehodairut nangji lapen Jehovah kasorjon amonit akhei pachan nangji. Kaprek alamthe pen jongdam pulote, lahei amonit, Jehovah achethe lapen amunsin ansi kedochot atum, Arnam aron kekroiji lapen doan kasorjon aHemphu aphan aning kapangsam aphuthak thangnat kachinidam ave. Alangtum kachinidam akele jumpik. Lasi alangtum aning along kopine kekekveng lapen kachongthuiji pule ave lapen alangtum angbong kachelang un’e lapen kachithi le keklang jumpik pusitame, alangtum along Jehovah, doan kasorjon aHemphu aphuthak gian lapen kachini avepin. Lahei monit aphu-aphi atum kachini ke Jehovah ahormu kecho, lapen Jehovah ahormu pen aning cheparong, bonta alangtum Jehovah aphan karcho thekthe; alangtum chinine Jehovah aphan henlo alangtum kengphu patong pen kardom nangji Abanglo puke. Tangte lahei atumphan kosonsi Alangli kheilo pu kipu unpo? Jongsi lasonlo pu asonte, “Jehovah si doan kasorjon aHemphu lo” lapen “Alangli monit aphan kasorjon ke Alangliphan pachethangji, Alangliphan anong patheji, lapen Alangli pharman cheparjanji mene” pu alamthe ke kaningje pajoilo. Kosonsi Jehovah aphan manpeng kave amonit atum le Alangli nong ahakhi mandet? “Ne monit aphan Nemena araje ateng si sorjon” pu Jehovah kipu alamthe ke Soitan, hi’i abang arideng arisim chemandetdeji ma? Lahei alamthe Jehovah monit aphan kasorjon aphan kelangrem angthek mandetdeji ma? Halabangso asai angdeng kapachunji aphan pura, Jehovah, monit akhei sorjon tangdet aphi, alangtum aphan Adam pen Noah an kapare mate kejadun ave. Alar ke, aphrang pen kali bonta lang kethe pirthe phalangnodak aphi si Jehovah Israel arat, alangtum Noah lapen Adam asomar ta lo, aphan kejadun pangchenglo. Israel along Alangli sai lapen kethan alam Israel arat aphan bidi-sore pidunlo pudamlonang alangtum Israel adet angkangpi nahok le dodam tame, lapen si amonit akhei along Jehovah ke monit along chethe kibut detle kethek kali pu cheklanglo, atheke alangtum Alanglilong pen akai chelong tahai lapen aduk penta kasorjon amonit nangthurthek, anchot kalisi Alangli monit akhei aphan plongdet ta thek, lapen monit akhei aphan hirjuno kipi, lapen Alangli chin pen nangchari ta thek. Lasi, lason thakthak, alangtum theklonglo Jehovah pirthe along monit akai japonthek pu, lapen ajo-anerlo apor atengsi monit akhei angbong ningje lapen sai klem pu. Alangli keklem asai lake Alangli kasorjon ason doan ke Alangli kihum aduk-abet pensi kevang pu pachininang aphan anvet, lapen anpar ta monit aphan Alangli si kapinchong. La anchot kalilang, bonta Alangli Israel along si asai kecheng keklemcheng atheke kaprek amonit lapen adet (komatsi ahokpet ke Israel pen kacheprekpre, bonta alar ke Israel arat pensi kachekakdun aro, antame Adam lapen Eve aso pinak) Jehovah abirta keme Israel along pen dengdunji mene, atheke mindar along doan kasorjon api ta Jehovah aphan kardomthek lapen Alangliphan jakong thepik pu hokji mene pu. Jehovah jongsi Israel along asai cheng paphrangpre, bonta alar ke, monit aphan kasorjon tangdet, alangtum aphan mathaphlot pen pirthe along padodun, lapuson pulotangte, monit abang arpum a’ot ajoine (a’ot alamjor ke monit atum ke ketheklongle ason an ke chini thekthe, ladak kipudamji puke Jehovah si monit akhei aphan kasorjon pu alang chininelo, anpar ta kopi aphan si Alang sorjon loma pu ansose si kachini jumlang), Jehovah si monit aphan sorjon lapen Alangli henlo doan kasorjon ason aHemphu pu alang mononphi ta chininelo. Jongsi Jehovah le monit aphan sorjon lapen pirthe along pasun si, monit akhei anglum dodun pen penang an apor aphan kejadun alar, pu amat Alangli ari chehekphlot si damjui, lapu ason te monit akhei puthot thangnat kali angdeng along chedamthu’etpo; Sining lapen pirthe lapen hala lakha un’epin akeongpi Alangli kasorjon ason doan ta lo; lapen monit akhei doan thangnat kali angdeng along chedamthu’etpo lapen anparta Soitan si akengpak pen sak’etpo. Lasonsi “Pirthe along, atheke, Alangli kasorjon anglum along, Alangli karjap adim donangji, isi kangthir’et adim” pu Jehovah kemang alam ke ruhup’po. Anke lasi, monit akhei aphan sorjondet aphi, alangtum anglum Alangli doduntheklo lapen akai along jadun theklo, lapen alangtum pen ingkidun theklo – lahei doan ta Alangli kemang kapachekok, lapen Alangli kehot asai kapaplengji aphanlo. Alangli Israel along keklem asai ke Alangli kadokave ason sorjonje aphrang Alangli kehot asai kacheklem, lapen laso apot si Alangli Israel along sai keklem kecheng lapen Alangli doan ason kasorjon angbong thangnat kachetonte ave, bonta sonni asai keklem ta Alangli kelang-kelana, Alangli sai, lapen Alangli nong apharman, lapen Alangli monit akhei aphan kasorjon athepi ansose kapathir mate kapaharnuk aphansi keklem. Noah pen aphi ningkan suri hini aphan Alangli monit akhei aphan japonlo, laso ahutsi Alangli monit akhei aphan thanlo kosonsi Jehovah, doan kasorjon aHemphu, aphan karcho nangji pu kachiniji, kosonsi amethang akai along do-thak nangji, lapen kosonji rengbomji ma, lapen anpar akenangsot, kosonsi Jehovah ahakhi ason ben kedoji, Alangliphan kekroiji, lapen Alangliphan man-peng pen kipiji, lapen mirdong-prakso pen tame Alangliphan kosonji David lapen alanglilong kedodun akurusar atum ason kero-archo.

Hala Jehovah asai kacheklem aningkan suri hini pen aphrang ke, monit thangta chinine, lapen kadokave amonit akhei amat si kapangkre along klo’etlo, komentu an pulote, lang kethe pirthe pahalangnonetik an, alangtum mek’langno asai ahin lapen chopanglim-chobai ahin penang akaharnuk lelo lapen alangtum aning along Jehovah duredetlo, lapen ansose si avebomlo. Alangtum mantune ta Jehovah keklemji asai chinine; alangtum me-heno kelang ajakong duredet, ansose si kethek-kere ta kadure, lapen, kor asonsi alangtum chethe enbom, latum monit, Arnam, pirthe, kereng, lapen do’olang ason aphuthak kachinine peme. Laso pirthe along, alangtum ongdung kemoi asai klemlo, halaso aphurui ason, lapen Jehovah aphan kapanahok kedo alamthe penang an ningjelo, bonta alangtum kachininedet ajoine, Jehovah alangtum aphan ingchekche lapen pakeng bor’i’e. Hala lang kethepi aphi, Noah ta arta ningkan 601 kepleng an, Jehovah apun choklim pen Noah lapen ahembang doan athengno cheklanglo, lang kethe along pen kejokdun amarat-mareng, vo lapen Noah lapen asomar aphan kejapon, ningkan 2,500 anbak ajak kiding, Aron Akai jutjetik an. Alangli Israel along sai keklem, lake, aron-atang pen asai, pangrumpet ningkan 2,000 ajak aphan, lapen Israel lapen angtan ta klemrappet ke ningkan 500, pangrumpet pen ningkan 2,500 an. Laso ahut Alangli Israel arat aphan Jehovah aphan sai klempi nangji pu thanlo, alangtum kardom ahem kim nangji, kurusar asor apindeng chingthang nangji, lapen adapphrang lote kengpak angse kardom ahem arlo lut nangji, mo ke alangtum akeng’op kardom ahem paterdetna lapen kardom ahem aphuchong along pen arum’an me akar nangtoi ra alangtum aphan thithetik an kaidet na. Alangtum methang asai cheklemlo lapen Jehovah kehotmek asai ateng kroilo. Alangtum Jehovah aphan kardom ahem along ardom lo, lapen Jehovah chepachinidet aphi, mate, lake Jehovah ningjedet aphi, alangtum adilung-dilung amuluk chejapon si Jehovah – alangtum a’Arnam aphan ardom nangji pu kethandam barlo. Lapen Jehovah alangtum aphan kardom ahem lapen dovan kim nangji pu thanlo, lapen ahut pen Jehovah adung chongnidun, lake, Passover (Arnam Egypt adet pen Israel aso aphan ban-sot pen kapajok alam kachikimodam) ahut, alangtum amahang thek mirak abi aso lapen chainong aso sik si dovan along Jehovah aphan sai keklempiji aphan dan pi nangji, lake alangtum aphan kekhangthip lapen aning along Jehovah aphan man-peng padoverji aphan. Alangtum laso aron kroi-kroikre along pen alangtum Jehovah aphan kekroi angthek klanglo. Jehovah alangtum aphan Sabbath arni kangthir ta selamlo, Alangsi kasorjon ni throksi arni. Sabbath pen puthot arni, Alangli kechengsi arni pinchonglo, alangtum Jehovah aphan ro-archoji arni, Alangphan dan kapajir arni, lapen Alangli pharman lun-kan kaselampi arni. Laso arni, Jehovah doan kurusar aphan pangrum si hala dovan along doan dan kipi ason pathakpo rat atum kapacho longji aphan, atheke alangtum ta Jehovah adovan along adan pen aning pacheparong longnang pu aphan. Lapen Jehovah pulo alangtum hirjume kelongtanglo, alangtum Alangli pen asap apharman dorapraplo, lapen alangtum ke Alangli pharman kangvaitang amonit lo (lake Israel arat atum pen Jehovah kachechak alamdonlo). Laso ajoine si, nonpu arni anta, Jehovah ke alangtum a’Arnam anvet, lapen Gentil arat a’Arnam kali.

Aron Akai ahut, Jehovah abang Moses aphan ake’ongdung ahukum alanglong Egypt angtan kidun a’Israel arat atum along kapaleji aphan bipilo. Lahei ke Jehovah ahin pen Israel arat aphan kipidun ahukum lapen Egypt arat aphan thangta phophe; atheke lahei ahukum ke Israel arat aphan kekhangthipji aphan lapen Alangli alangtum alongpen kenangji ason kehang aphan anchot. Alangtum Sabbath kroima-kroikre, api-apo aphan man chipi ma chipipe, alangtum kumlin ardom ma ardomde, lapen, lason si dopik – lahei pen henlo alangtum aphan pap keklem lapen kechoklim abang pu kangsaiji aronlo. Alangtum angbong, ajahak atum aphan ke Jehovah ame akar kero ta dolo, ajahak atum ke arlong pen apran ta damnanglo, lapen ajahak atum Jehovah ahirjume kelong atum, lapen lahei ahukum ke alangtum kroi-kroikre pensi kelangdam. Sabbath kekroikre atum aphan ke arlong pen varboppo. Sabbath kekroikre akurusar atum aphan ke Jehovah ame akarlo keropo. Komat si api-apo aphan man kachipipe atum aphan ta arlong pen apran armutdetpo. Lahei ta Jehovah pen kepi dun ahukum saidelo. Jehovah lapuson Alangli aron lapen hukum kaselam atheke, Alangli alangtum aphan akai along japonbom ahut, halahei monit atum Alanglilamm arjupo lapen komentune ta Alangliphan chedandelo. Alangli lahei aron kahachemi amonit aphan Alangli kachari ajakong arlo kibiji aphan si enlo, lapen Alangli kevangji arni sai aphan ansose akeme atiri pinchonglo. Lapen lasi, Jehovah keklem asai ateng langdam pensi, kechengsi akai aphan ke Aron Akai pulo. Jehovah kethan lapen keklem asai dopik pusitame, Alangli monit aphan keme ahin si kejalok, lahei thangnat kachinine amonit aphan kosonsi monit a’ot ma pu kethan, kosonsi rengdun nangji, kosonsi Jehovah a’ot kachiniji. Penang anke, Alangli keklem asai anta monit atum Alangli ot nangpathekdun lonang lapen Alangli kaselam aron parimthek lonang pu aphan saide. Halahei asai asapso aning kahenotang abangphu atum along si klemlo; lahei alangtum keklem-kedam pachekirlaphit mate akai along chingthur anle kapaledam kalidet. Alangli lahei aron kerim ke monit aphan kekhamkhe lapen ke’otthipji pu ansi munthichot. Israel asor aphan halaso apor ahut, Jehovah ke kardom ahem arlo isi Arnam, ha sining along isi Arnam pu anchot. Alangli ke inghun anujok, me anujok. Jehovah alangtum kenang ke non monit atum Alangli kaselam aron lapen ahukum – aron puta pume – kekroi henlo atheke Jehovah kopima keklem ke alangtum aphan pachikirlaji aphan kali bonta monit atum along kedo nangji kaprek ason ansose kipiji lapen Alangli methang angho pen kethan-pareji, atheke sorjondet pen, monit along alanglong kedo nangji ason thangnat ave. Lapen lasi, Jehovah amonit atum pirthe along kedoji aphan kopipi kenangji ason doan pilo, monit aphan aphu-aphi, Adam lapen Eve atum pen palitchet pinchonglo, atheke Jehovah alangtumphan kipi ason-amung kecheng ahut Adam lapen Eve aphan kipi ason pen litjetlo. Lahei anpar ta, Jehovah le Israel along keklem asai ke monit akhei aphan kejapon lapen monit akhei atum alangtumphan Kasorjon Abang aphan kapachichini. Alangli alangtum aphan domthipthe mate pachekirlaphitphe, bonta kejapon anchot. Lahenlo Aron Akai ahut amutpi Jehovah asai. Lahenlo kibinjoi aklong alamthe, ahokpet alammo, akenangsotnei alamthe Alangli Israel angkang along keklem asai, lapen Alangli ningkan suri throk sai keklem kecheng – monit akhei aphan Jehovah kachari aron arlo kibiji aphan asai along ke. Laso along pensi Alangli ningkan suri throk kisik-kedang kemangdam along ansose asai nangklanglo.

Kapachini:

a. Abinong’et alamjir along ke “Kekroi nangji” pu alamseng ave.