Pap pen Kapejok Akai ahut keklem asai ahokpet atomo

Ne angton kisik-kedang kemangdam, ningkan suri throk akisik-kedang kemangdam, kadokave son thom angdeng, mate son thom akai do: Aron Akai kecheng ahut, Kanghon-Kangjinso Akai (laphan ke Pap pen Kapejok Akai puta pulo); lapen Krist Recho arat Akai kepajut arni. La sonthom akai along ne sai ke akaitin ahut aot-adur aling si athe ta kachelardun amat si cheprekjam, bonta angdengtin tame monit atum akenangjivek pen chetontedet – mate, klardak pen pulote, Ne le abirudhe kithur’i aron ahut Sobar le alang abidi kanglim ateng pen keklem’i henlo. Ne keklem asai athe ke Sobar aphan kaparemlong henlo, Ne akethek-kere lapen ajakong kethe kachepaklangdak, Sobar abidi kanglim doan kapachinipon, lapen lasonsi monit kedoan aphan kepajok henlo, pima Sobar arideng si latum dopetlo. Lake Ne akethek-kere lapen ajakong kethe kachepaklangji aphanlo, lapen kachechak un’edet kelangnodak aSobar aphuthak kejaidak henlo; laso pen anparta, lake kapinchongtang amonit atum aphan keme lapen kaheno pachongvai lonang pu kepek henlo, asontin tame Ne henlo Kechari abang pu kapachiniji aphanlo, Sobar ke monit akhei ahotur binonglo pu kapalang pemeji aphan, kahenodak, kapavirlok abang, lapen kethanji kepekpon aphan, ahokpet kechoklim pen, keme lapen kaheno, ahok lapen pachobei, kangthir lapen kangthirthe akacheprek, lapen kopilo thedung ke lapen kopilo bihek ke. Tangte kiludet monit akhei atum Ne le monit akhei aphan kaphangno kali pu Nepharman haki chodeng unpoma, lapen Ne inutnat – Pinchong-pinthi abang – henlo monit akhei aphan pajok thekchotji, monit aphan alangtum ningkarong’iji ason doan ta kepajir thekji; lapen kadokave ason doan ta Ne henlo Kechari abang pu latum chini longpo lapen Sobar ke jongjong inut abang arpum anchot jasemet laphan Ne si kapinchong lapen aphithu Ne birudhe si thurlo. Ne ningkan suri throk akisik-kedang kemangdam ke son thom angdeng kethakpon do, lapen Ne keklem kapachun ta lahenlo pima kapinchongtang amonit atum Nepharman haki chipi’un nangji, lapen Ne ninghang ateng nangkachinidun peme, lapen Ne henlo ahok pu kachinilong aphan. Lahenlo, Ne ningkan suri throk akisik-kedang akemangdam asai kepangcheng malom, aron asai si Ne klem paklanglo, Jehovah tame monit atum aphan kachejapon lason asai si klemlo. Adunthu angdeng ke Judea along arong heihui along la Kanghon-Kangjinso Akai ahut sai keklem pangchengponlo. Kanghon-Kangjinso Akai ahut doan keklem asai tame Jisu angthek chepaklanglaplo; Alangli monit nangcheparje nanglo, lapen thengparpan athak sak’lo, lapen Alangli la Kanghon-Kangjinso Akai pangchengponlo. Pap pen kepajok asai kepatang pemeji aphan si Alangli thengparpan athak apran chipi nangkoklo, Aron Akai pajutdet si anke Kanghon-Kangjinso Akai kapangcheng aphan, lapen laso apot si Alangliphan ke “Kethenei Kejabang,” “Pap Athok-Ajir” lapen “Pap pen Pajokthek Abang” pulo. Labangso angthek ke, alanglitum kejongdam athe chingbarpet bonta Jisu akeklem-kedam asai ke Jehovah akeklem-kedam pen cheprekjam. Aron Akai ke Jehovah pangchenglo, atiri adim selamlo – lake nangkeplang adim – pirthe along Arnam asai keklem aphan, lapen hukum kipiji aphan henlo. La hini amo henlo Alangli keklempon, lapen lahei Aron Akai apharman chepaklanglo. Kanghon-Kangjinso Akai ahut Jisu keklempon asai ke hokum kipithuji aphan kali, tebonta la kapachunji aphanlo, laso pen Kanghon-Kangjinso Akai ahut chepaklanglo lapen ningkan suri hini aphrang pen kedo Aron Akai kepajut longlo. Alangli ke kapinchongcheng abanglo, vang si Kanghon-Kangjinso Akai pangcheng’ilo, tebonta kenangsotnei asai Alangli keklemji ke pap pen kepajok henlo. Lapen laso apot si Alangli sai ta pahinidaklo: akimi akai kangpupon, lapen Alangli thengparpan athak pran chipi si pap pen kepajok asai pachun longlo, laso aphi Alangli chedamthulo. Halaso ahut henlo, Aron Akai ke kijutdun lapen monit akhei atum Kanghon-Kangjinso Akai lutlo.

Halabangso akai ahut monit atum aphan akenang ateng asai si Jisu klempilo. Alangli asai ke monit akhei aphan pap pen kepajok, pap kadiyaji aphan, lapen apot si Alanglilong ke doan kachepabithek, ningkiding, kanghon, kangjinso, kachechak’un, kadiya lapen kanghon-jinso pensi plengset. Alangli monit akhei along keongdung adak-atur lapen hirjume vanlo, lapen monit atum joike pen aning cheparong thekji aphan vanlo, Alangli monit atum ningkarongji aphan pilo: monsam lapen ningkarong, Alangli kachechak’un lapen akanghon, Alangli akadiya lapen kanghon-jinso pilo. Ahut isi apor, keongdung ason monit atum ningkarongji aphan kachetong ke – monsam avarmon lapen jokvan si do pusi anuttin aning arlo padolo, alangtum akarjong joklongji pu ningpathethip kepado lapen Kapejokbang Jisu along kacharchunglong – lapuson henlo kerengbomtik akai ahut kedolong. Kanghon-Kangjinso Akai ahut, monit atum aphan Hi-i si paphangno’etlo, lasi pap pen kejok kelongji aphan asai ke monit akhei atum keongdung adak-atur, kemesen kachechak’un lapen ningkiding, lapen anpar ta kedorchit athok-ajir pen monit akhei doan apap kepajokji aphan chipidetlo, jasemetpet angthek kedoji aphanlo. Kanghon-Kangjinso Akai ahut kopima monit akhei atum kethek’long ke monit apap kejok longji aphan kachipidet athok-ajir henlo: Jisu. Latum kadokave kachinilong ke Arnam akangjinso thepik lapen aningdingpik, lapen latum kadokave kethek’long ke Jisu akadiya lapen kanghon-jinso henlo. Laheihui doan ke alangtum Kanghon-Kangjinso Akai ahut kedolong apot. Lapen lasi, laso aphrang latum jongsi pap pen chepajokji pulote, Jisu pen kipitang alangtum ale kedoji aphan pura alangtum prekjam adak-atur longdunvek nangjilang. Lapuson pensi, adak-atur kelongpon pen ajoine latum methang apap pen kadiya long’unji, lapen Jisu aning kachekhang’un lapen aningkiding kelongdun pen apot latum pap pen kejok kelong’iji atovar dopo. Jisu kachechak’un lapen aningkiding pen apot si latum kadiya kelong nangji ajakong chepahai longlo lapen Jisu pen kapanong ongdung adak-atur longdunlo. Jisu lasonsi pulo: Dhoromi atum kali, bonta papi atum aning kecheruiji aphan kephajisi ne vang-lo. Jongsi, ok pen keplengset ahut Alangli, Jisu si kangsai, ahirjuno lapen monit atum kekroi un’edet akechokche doan tame chechakdetde asonte, monit atum pap pen kejok kelongji atovar si avedetji apotlo, lapen kijut un’epin pap pen si plengsetpo. Lason le cheman asonte, ningkan suri throk akisik-kedang kemangdam ke Aron Akai ahut si chingtonkokpo, lapen bangso Aron Akai puthot ningkan suri throk an pabatthudetpo. Monit apap ansose si batthupo lapen pherememe si plangpo, lapen monit akhei aphan kapinchong ke thangnat ale avelo. Monit atum Jehovah aphan aron ateng pen kiru-kethai anchotpo unji, tebonta hala kechengsi ahut kapinchong amonit atum anpar latum apap si batthu muchotpo. Koan akeong Jisu monit aphan kachinghon, latum apap doan ta diyalo lapen dorphlup akanghon lapen kangjinso angbong si vanlo, Jisu pen ajok si monit akhei ke jokji pu pacheplanglo, kangbotang abiresak aso pu nang’irpon si kethedung anam pen Jisu chevanlo. Hi-i bangso asai along masap ta chejokdun un’edetlo, pima Jisu Alangliphan kekroi atum doan aphan kanghonthek apei cheman si aso aphan charbakvetlo. Alangli sedengde mate man kipipe ta klemkle, bonta kerengmesensi pemanlo; alangtum angbong prungset aningkithi ta ave, bonta alangtum apap doan charsilunlo lapen alangtum kilu lapen kamathakrang apot kavedet amek si pemanlo, la ansi ningjelo, “Bang aphan batai throksi anchot kali, bonta batai throksi kep ra batai throksi aphong an diyanon.” Alangli ning pen ajok bang kaprek aning tame pachelar unlo, lapen lason pen ajoine Alangli kachechak’un aning si monit atum amethang apap pen apot kadiya longlo.

Jisu monit ason arje kacheparjan nang ke aning kiduk thangta ave, bonta Alangli sangho atum aphan ke kaiketa aning pethebom, kenangji an pedorbom, lapen rapbom. Alangli la an sai keme keklem lapen kisung kachechak angbong sita Alangli monit along pen long’o nangji pu mathathe bonta monit apap charsilun pen inghorlo. Laso ajok Kanghon-Kangjinso Akai ahut amonit atum “netum aphan nangkanghonthek Kapejok Abang Jisu” pusi kanghon pen Alangliphan hanglo. Halaso akai ahut amonit atum – kedoan kedobom monit aphan – sita Jisu ke kanghon lapen kangjinso si plengset. Monit aso atum akechokche apot Alangli matha’e’e lapen monit adai apot tonkri si langremji lapu kali. Athema lake keprekjek akai apot, Alangli monit atum kangkranglongji aphan kecho-kijun ason dorphlup an kipi aphong do’o. Alangliphan kekroi atum aphan kanghon-kangjinso plengsetlo, keso kepame, hi-i kiplung lapen kithi aphan kangthur anta klemlo. Alangli keklem asai lake ahokpet pu monit amek angden kapeklangji aphan Alangli kithitang arpum anta ingthurlo lapen Alangli pen ajok kithi atum anta rengthu’un pu ajakong chepaklanglo. Lasonsi Alangli ning kiding pen monit aphan kapejokji si monit atum angbong sai klembomlo. Alangliphan thengparpan athak sakse aphrang penta monit apap an inghor si pap kecham adan cheplanglo. Alangli thithe aphrang pen ta thengparpan athak thivek nangji pu chichini si lamchak kapachekokji aphan thengparpan athak kithiji si tovar cholangdinglo. Alangli charklidet si thengparpan athak thilo lapen Alangli kanghon, kangjinso lapen kangthir’et aman anta monit apharman chipidetlo. Thengparpan ajok monit apap an Alangli dia’et lapen pap pen apot monit aphan alar huihe bonta monit aphan ning kiding, kachechak’un, lapen kanghon, Alangli kengkam ateng kidunji aphan lapen thengparpan aphan kachipidet ajakong kacharli dunji aphan thanlo. Mary apar Alangliphan kekroi akorte-ingjir atum aphan chinghon mulo. Keso kepame, hi-i kiplung asai keklem lake monit aphan kapejokji aphan isi keklemvek nangji asonsi chemanlo. Alangli nahok le dam sita Alangliphan kekroi atum aphan Alangli kangjinso pensi lana bomlo. Alangli kiduk atum aphan paplanglo, thiklak atum aphan akeng pedamlo, kaselok atum aphan pachecharlo lapen kangthong atum aphan parjulonglo. La anchot kali kiduk, kangdeinei lapen ahem-arit kavedet atum aphan langremre si chorap-junraplo lapen biresak alamlir than si inut biresak kivi abang jon pharo abi angbong ejon ingbodet te la jon throksirkep ra sirkep aphan o’tekang si ejon kangbotang abi aphan chiri damji, lapen longlok lote aning arongpikji. Bi kivi abang abi ahur aphan kachinghon ason si Alangli rat aphan chinghon peme. Alangli mek angden along lahei amonit atum ke kaheno, kilu, kachinine lapen pap pensi plengset lapen pirthe amek angden along ta kangdeinei atum lo, bonta pirthe monit atum kelangrem, kahijim atum aphan Alangli inghonpik. Lahei amonit atum aphan kachinghon ajok biresak le dovan athak charklidet ason si latum apharman Alangli apran chipidetlo. La anchot kali ban ason ben si papi atum angbong dodunlo lapen monit atum kachenek, kaholo lapen apran endet anta Alangli chechak’lunlo. Alangliphan kekroi atum an aphan ke Alangli ke Kapejok Abang Jisu lo, bonta kacheparoka keplengset aPharisee atum aphan Alangli hijimlo lapen ingjinsose. Pharisee atum angbong Alangli sai klemparpe. Ahut pen latum keklem-kedam, kamatha kechokche apot jong lapen ingchek titi. Pharisee atum angbong Alangli kejok alam ta thanthe lapen kamanghumeme asai ta klemkle. Alanglilong kedoan akanghon lapen kangjinso ta Alangliphan kekroi atum aphan si pilo lapen papi atum ajok si Alangli kithi arni anta kesung, kiduk lapen kelangrem anta thengparpan athak chechak’lun si Alangli choklim pen monit akhei an aphan pejok pemelo. Alangli keklem asai pangrumpet ke lahei henlo.

Jisu pen ajok pap pen kejok longle asonte, monit akhei pap along si kaike ta bocheji apotlo lapen pap pen nangkeplang atum pusi chemanpo, hi’i asomar pusi pupo. Lason le dobom asonte, pirthe adangpi amat si Sobar kedo alongle chemandetpo, kaboche ahem adim si plangpo. Pap pen kepajok asai, chenam ta, monit akhei aphan kadiya lapen kanghon-kangjinso chepaklangvek nangkokji, lapuson ateng si monit akhei ahok akadiya longpo lapen kepajut ke ahokpet kehai peman si kechoklim lapen angton Arnam si ale longpo. Lapuson asai angdeng klemkle pu asonte, ningkan suri throk akisik-kedang kemangdam ke paphrang un’edetji apotlo. Jisu jongsi thengparpan athak apran chipipe pu asonte, Alangli jongsi keso aphan pamemedet lapen sobar aphan hai’un’edet pu asonte, tangte monit atum kechoklim pen methang apap apot kadiya long pememedetji apotlo. Ningkan kethom ra ebeng an Jisu bangso pirthe along Alangli sai amo kacheklem ahut, Alangli sai pap pen kapejok ke Alangli pabenghoi ansi klem unchotlo; laso aphi, thengparpan along kesakkling pen apot lapen pen kedo abang asonthot cheplangdet, hi’i atum arideng hodaidet pen apot, Alangli thengparpan athak pran kachipi ke pachokvetlo lapen monit akhei kepaledam nangji aphan sikdang pemelo. Sobar arideng Alangliphan hodaidet aphi si monit akhei aphan Alangli pajoklo. Ningkan thomkep ra kethom lapen ebeng an Alangli pirthe along kesung chechaklo, pinremlo, nongno pilo, lapen angtan si bilo, chenam si Alangli phu kachibiji adim anta Alangli longledetlo, kesangji adim avedetlo, lapen Alangliphan aphi ke thengparpan athak pran endetlo, Alangli angton abang arpum – ingthir’et lapen adai avepin abang – thengparpan along sakklinglo. Ajat akeso-kesung ta Alangli chechak pemelo. Jakong kedo atum Alangliphan ingnekchoilo lapen saplo, lapen chakri-chakor atum Alangliphan amahang along ingthoklo; lapuan tame Alangli dojoi lapen kejut an tame chechakding, kithi ahut an tame thangnat arjujepin pen chipidet, laso ajoine si Alangli monit akhei aphan pap pen pajok’unlo. Ansi laso aphi Alangliphan pasanglong pemelo. Jisu keklempon asai ke Kanghon-Kangjinso Akai si chepaklanglo; Aron Akai le kachepaklangpon kalilo, mate mo kejut arni asai adular puta kalilo. Lake Kanghon-Kangjinso Akai ahut Jisu keklempon asai kemesen amunglo, monit akhei atum kelitponnang adunthu akai lo – Pap pen Kapejok Akai.