Aron Karkan ke Monit Aphan Meherang Anat Pondetpo

Ne nangtum aphan nangkether aphong dopiklo lapen nangtum aphan nangcheraiji aphan ahokpet nangkipi dopiklo. Non anke, nangtum aphrang pen pangbar lote angthek doklong an methang along jakong kebat akamatha chelongpo, inut amonit kopuson nangjima pu aron aphuthak keongdung alam chini’etpo, lapen ningkachetheme amonit atum along kedo nangji jongjong kamatha ajakong cheparideng’et nangpo. Laso along kedoan ason ta lake keongdung aningkan arjon angbong nangtum kachorotlong asok’lo. Nang kachepalong ason aphan ne kedengde kali, bonta asap klardak pen Ne ningjethu nangkokji nangtum lapuan keongdung aningkan angbong Ne phuthak nangkeklem alam karjuje lapen kachedandong a’ot doan aphan tame Ne kedengdedet kali, atheke nangtum angbong inutbak ta kangthirjir amonit avedet. Nangtum ke, keplakvi avepin pen ta, nangtum ke Sobar arideng pen ot nangpahenotang saidelo; nangtum ke Khristo ahoturlo. Pini arni an, nangtum ahoi karkan lapen aron karkan tangte aphong dopik khangjanglo, lasi Ne Methang aphan nangtum along aphong-aphong ruithulemdet puke kepreksi alam puke pudam un’eremji. Lapuson a’ot pen ke Ne nangtum pen dorap ingtungte – bonta nang amohut kevangji arni ajoine, Ne dopo, nangtum kijutsi kapaleji adim ajoine, Ne dopo, ladak lapen non, Ne kaningjetang ason puthot ephong ruithuilipo. Ne ning chethelo nangtum Nephan nangparlo ponpo, anparta, nangtum Ne asitin kaningje alam nangkroidun thekpo lapen Nelamthe along kaharnuksi kejongdam alam nangripdun thekpo. Ne kopima kaningje along nanghonthe nangnelo, Ne lamthe along pen nangning kehang aling nanghumdun lapen ninghang aling katevar puke kaprek bivet khangjangnon; laso aphan Ne chechak un’edet si thekdam. Nelamthe aphan ingsam nangne, lapen ansose keklem nangne lake lahei aphan arjangtang pen ke’en mate Ne kaiketa nangtum aphan nangkebai-palu pu ningjeri mate, la ansose kaheno, Ne nangtum aphan nangkethan ke akechok kali pu. Atheke nangtum Nephan lapen Ne kaningje ason aphan lauson kahonthe pensi nanglanglo, mantune ta Nelamthe aphan rimre lapen Nephan nang pangkrelok, apot si Ne ahir ingtangkring pen nangtum anuttin aphan ta nangthanpo: Ne kaningje ason aphan ot-dur aphan keja aron-atang akamatha pen pachephodam nangne; Nelamthe aphan kacheparjanthap atum kapachobai alam pen pachephodamri. Ansose si keklem nangne lake Nelamthe aphan kelangselet pen alamthak kipi. Chenamlo lake mo kevangji arni ahut ke majok tame Ne nangkethan ason nangphan nangthan thekji abang avelo, mate nangtum aphan lapuan ningkeme pen nangchingki abang avelo, mate, ansose kijum, lahei angdeng along lapuan ningkiding pen kehat ponji abang avelo. Nangtum halahei arni ke apor keme aphan kachemathadam pen kapadampo, mate ase kethe pen kachiru mate keso pen kar’em, mate masapbak ahokpet mate chethe avarsai kaduredet pen akangting aningve along si kedonanglokpo, mate ning chethedam athai avepin pen kachonghong, mate halapuson nang kadokave chok-chokche kelang ajakong chepangbodet apot ning chepa’oilok aningduk pen si dopo…. Amutpi hoihoi pen ta nangtum angbong inutbak ta lahei angring pen kachepajok unji abang ave. Atheke nangtum angbong pen majok ta nangtum Arnam aphan ahokpet pen kardom anghoi kacherai abang ave, bonta methang aphan isi amo kevangvelok lapen kapahi’ilok apirthe along si chepanglimchoklo, nang kekroi ason, pharlo, karjong, lapen nangbang along, nangkai lapen ahokpet ason pen thangnat kachepho kavepin lale abinong’et ke halahei pen kachetongte ason aphan kapachingvui. Lahenlo Ne nangtum aphan ning kachethedam ason tangte lapuhenlo nangtum aphan katheang atovar along van unjilang. Ne esonvet ning kachethedam puke nangtum nangmethang aphan kachelanaji ajakong do nangji, methang aphan kachinghon thek nangji, lapen nangtum methang a’ot-adur lapen aron karkan aphan ardi pipepin pen kachelangdam ahut kijutsi kele nangji adim aphan akele ardi chipipedet nangji.

Ajak dinglen apor pen, Arnam aphan kekroi amonit doan atum kadokave tame mesen kijutsi adim kelongji aphan si ning kachethe saidelo, lapen Arnam aphan kekroi atum doan ta aning kachethedam ke alangtum along menmen kopai keme vangji. Alangtum aning kachethe ke alangtum chini longle aphrang pen si, alangtum methang aphan sining hemrengme along elong kalite elong adim along kapangnitang chetheklongpo. Bonta Ne pudetji lapuson amonit atum ke, alangtum along kedopik kamatha ason pen, mantune ta chininelang alangtum ke sining hemrengme pen nangkeklo kopai keme kachodeng longji mate hadak kedo isibak anghoi kelong dunji apun-achak dolone mate avene. Nangtum, non apor ahut, methang aphuthak ongdung kachichinidam dolo, sitame nangtum kijutsi arni akanahok lapen Jakongtheparpik Abang ari pen Alangli otlangno atum aphan adiya ke’en ahut chepajok longji aphan ningchethebomlang. Kethekdamlong ateng pulote mang keme kedo lapen alangtum aning kedok ateng si ajat ason ta kar’idun heihui ke Sobar pen a’ot kapahenotang amonit atum along kedopet a’otlo, lapen asapbak ningchetheklong ason puta inutbak amonit along thekdam longle. Lapuson aphi ta, Ne nangtum along kedo akele amo kevangve akemang, lapenpen nangtum along hala hirjume kelong kangtung aningkarkar a’ot aphan nangpajutkok ingtung’olang. Nangtum aron karkan aphong keongpik tangdet apot si, lapen nangtum along kachedandong a’ot kaike aphi’ong nangkebat’ong tangdet apot si, kosonsi lahei ason le nangtum kachibi mohut arni akai aphan kangjangdong arjan pen kachetondam unpo? Jongsi nangtum nangning kehang ateng si kedambomji pu kemang, nangtum aphan aphi nangkivungdun pen akechokche along kedo, sitame laso apor ahut si nangtum kaheman amang nangtum kapachekok ninghang, pulote Ne nangpudetpo nangtum mek kaselok angthun paphlutrinon lapen mantune ta mekphrang nangnelo – atheke kechokpik Arnam kedo athengno nangtum amang ke ingthaidang pinak, lapen nangtum aphan nangkeplakvong pu ta avedetji. Jongsi thangbakbe nang nangmang kapachekok si kar’i, pulote mangtune ta mang heman nangne; alar ke, kijut un’epin apor aphan le ahokpet lapen abinong’et ason aphan chepathengnonon. Lahenlo nang kejok unji isivet atovar kedolang pulote. Kopilo, kithirklong aron pen, laso abidi aphan angdeng heihuike?

Aphrangsi ke nang aron karkan doan aphan chelangdamnon, lapen ahokpet pen kachetondamde isibak a’ot lapen kamatha doma-avema pu chelangdampemenon.

Lake nang joike pen keklem unji eson asailo, lapen Ne kroilo kadokave kamatha thekser amonit atum anta laso asai klem thekji. Bonsitame, aron karkan lapen ahokpet puke kopi aphan si kipudam loma pu kachininepin atum aphan ke parlo ponpe, atheke kenangsotnei angdeng along ke, alangtum kamatha thekser amonit atum kalidet. Ne hala Arnam kedengtang amonit atum, kachongthuithe, esonbak anta kachari aron ahir ingtangrak pen karkan ke, lapen alangtum aron karkan aphan joike pen chesorphlot thekdet atum pensi kachingki. Lake Ne nangtum along pen kenangji esonlo pusitame, lapen lake nangtum aphan keklem kejoike asailo pusitame, la anchot le Ne nangtum along pen kenangji asonlo pu kalidet. Ajat le nangman pusitame, Ne ningthelo nangtum inutvet kedo ahut lahei akenang ason aphuthak ingnekchoichepo, lapen jatsemetpet ke nangtum laso aphan langremrelo mate arjangphoi ason pinak le pu mathadamdelo. Nangtum laso aphan ardi pivek nangji, lapen laphan tengnedet nangne.

Hini angdeng asai, nang asitin aron karkan lapen lam karjuje apharman, nang kapachokji aphan kacheton ahokpet aphan ridam nangpo, lapen laso aphi halaso ahokpet aphan enpon si alamki kapajutji aphan klem nangpo. Halaso aphi, nang aron karkan a’ot lapen lam ateng keklem kangtungte akamatha a’ot lapen asai aphan ahokpet asai keklem pen larphit nangpo.

Kethom angdeng asai abang ke, nang ning kemesen abang man nangji, kaike amat resak amat bang aphan chongthuiver abang kalidet nangji. (Ladak Ne nangtum aphan puthot ning kemesen abang man nangji pusi nangputhulilo.)

Jongsi nang la sonthom asai klemdet theklo pulote, nang ke akopai keme atum angbong pen inutlo – inut kemang kachekokji lapen kopai keme kelongji abangphu. Chenam ta nangtum la sonthom alon kedo kali akenangsot ason aphan ardi pivekpo, mate nangtum mathapla pen si langji tahai. Lanon-lanon, Ne kemang ke nangtum amang kepapleng lapen nangtum kamatha ason aphan asai pen nangkepaklang, nangtum aphan nangkangnekchoiji kali mate nangtum aphan nangkepaluji pu kali.

Ne nangkehang ason ke keprekpik ason kali, bonta Ne nangtum aphan kopima nangkethan lake isi pen isi pangrum lote hini manpo pu ason kangdaiplang ason kali. Jongsi nangtum keklem ke laso aphuthak ardi pipepin pen kachethandam, mate kangthaidang, kethedung alamseng aphuthak si lam kepadamthap, pulote nangtum anoksa lapen nangtum akemang asonke mononphi kijut un’e apor aphan ta kangthaidang aphar si doverpo. Nangtum angbong pen hala keongdung aningkan aphan kisung kachechaktang lapen sai keklem kachepaduktang aphi tame kapaklangji aphan thangnat kavedet atum aphan ne ajat kangjinsoji a’ot avedetji. Laso alar ke, Ne kehang ason kapapleng thekthe atum aphan an Ne adai pen si paphoji, nong’e pen kali, ansose si kijumlang kangjinsoji puke. Nang la mathadamthek tahai, lapuan keongdung aningkan aphi nangkidun abang tangdet apot, ajat le punon tame nang chepadukpik anlo, lapen nangphan ke inut sai keklem abang pu kehok pen Arnam ahem along harlung isi asang nangpi nangji. Ne pudetji nangtum angbong keongdung atum ke lapuson si kamatha, atheke nangtum kaike kachoridun ta ajat ason along ta ale kacho’endunji aron, ale nangkapa’endetji abang kachemanji pu kali. Lasi, Ne nangtum aphan ardi pi peme pen si nangthanpo: nangtum keklem kachepaduk jonghe le mepiiklo pusitame, nangtum kacharli angdeng jonghe ingtui pusitame, Nephan jonghe katebok penle nangchiridun pusitame, nangnong jonghe chethan, mate nangtum jonghe le nang’ot chepamelo pusitame; nangtum Ne nangkehang ason paplengpletik anke, nangtum Nelong pen kero chepalong thekthedetji. Halahei nang bidi lapen kalakha ason doan koanma kapaprap’un pen paprailapnon, lapen Ne kenangji ason doan aphan ardi kipi pangchengnon; kali pulote, nangtum aphan Nesai aphan kijut along keponji aphan Ne nangtum aphan mepun nangpamanlapji lapen, akemenai pusitame keongdung aningkan angbong Nesai aphan thangnat kalidet along vandetpo, atheke Neke Ne hotur lapen kapahi’i a’ot pen kangnimphlung lapen Sobar araje kedo atum aphan Ne kepangri arat along chevan thekthe mate alangtum aphan kaprek akai along pon thekthe.

Ne ning kachethedam dopik. Ne ning chethelo nangtum methang aphan mesen lapen choklim a’ot pen chepadodun thekji, ning mesen pen methang adeng kachepapleng, ahokpet lapen amonit a’ot chepadoji, Arnam apharman alangtum along kedoan ason lapen achethe anta kache’odet’un abang, lapen sonsi dopiklang, amonit manpo. Lahei kadokave ningchethe ke nangtum along keplengple ason kedokok lapen nangtum chongthui-chopanglim a’ot langno lapen lam kekroikre ajoinelo. Jongsi lahei kachingki-chethan angbong lale nangtum pen isibak tame nangtum aphan nangkangsipji aphan keplenglim dolo pulote, non Ne keklem unjilang ason ke anpar avelo pu kaningje anchotji memelo. Sitame, nangtum chinilo laso angthek kopijima puke. Ne mantune ta sangse, lasi jongsi Ne ningjeje tame, Ne monit atum kepalangphrongji aphan esonbak klemji. Ne komatne ade pathuvok thek, mate komatne aphan pangjethang pen pathilot ta thek, mate monit aphan tekok-teki tame pithek lapen alangtum aphan keprekjam ahin pen ahir ingtangrak ason patheklong thek. Lasonsi puthot, Ne monit aphan alangtum aphan si jatsemet kapathur akeso pachechakthek. Lasonsi abidi pensi Ne ning ingasmpo, ning arongpik po, lapen akele domesenpo. Lake kaiketa kaningjever alamlo “Akeme aphan ke akeme pensi kitu, lapen kaheno aphan ke kaheno pen,” lasi non kopipot kalidet? Jongsi nang Nephan kekhamkheji ninghang, lapen Ne phuthak ajahak alamrai kangsai ingtung do, pulote Ne nangde nangpathuthe, lapen lake Nephan nahok ahin pen ta ning nangpangsamse. Laso atheke kijutsi ahut ke, nang kopisi keklem loma lake ahokpet kalidet, la ansose si kijumlang lake chethe pen kopine kachephodam puke, halapu Ne keklem ason doan tame ahokpet saide; Ne keklem-kedam doan tame Nesai aron pen chephosap saide lapen Ne kapathir kachari aron pen chephosap. Lahenlo si, Ne nangpulo nangtum anuttin aphan ta, nangtum asapbak apun-achak chepangrumdunnon, lapuson kapahi’i asai kachoklem ingtonnon, lapen apor kejoi ahut Ne nangkehang ason aphuthak matha parsiknon. Halaso ahut anke ne ning arongchenpo. Jongsi nang nangtum le methang ok-vi apharman kachepadukpi suri angbong pen isi amui anta ahokpet along chirungdunji (mate dan pi dunji), tangte nang aphong panglumtet pen aron arkankejima lapen kithutang ade chepadodejima? Lake keklangdak alam kalima?

Nang koanma aron karkan kachoklem keong, hala ansi nang kemesen kijutsi kele nangji adim kelongji pu avarsai kjumbompo. Laso pen kaparlin abang ke, nang koanma aron karkan asai keklem kijum, hala ansi nang Arnam pen kero kelongji angring abang nangkethepo. Jongsi nang aron karkan ang-ang abang ahoi litpik si Ne anta nangdiya un’edet anlo, pulote nang ke diya kachodeng longji avarsai amutpi pensi padamjui nangmandetpo. Lasonlo apot si, nang kijutsi keleji adim ke angsong kalilo, arumpo. Jongsi nang Nephan nangkroikre, pulote nang ingthin chepathenon lapen kechokche asai klemnon, lapen chelangnon nang kopisi kelongjima. Jongsi nang ke inut ardi kipipik abangphu lale ahokpet asai keklem abang, pulote nang ke aron karkan kachoklem asai aphuthak nangphan diya kelongji avarsai dovekji, lapen nang ke lam karjuje aphong jumji lapen aphong inghaipik anji. Jongsi nang ke inut ahokpet asai keklem kangtungte abang pinak, pulote Arnam athengno nang aron karkan ke aphai nangbatvekji lapen ansose si lam karjujepo lapen aphong ta inglumbompo, mo nang isi angdeng kele, hala ke nang amutpi pen kijutkokji aporlo puan keledam an. Lake nang hirjume kelongji pu amang keme kivirdetji ahutlo. Nang aron karkan doan aphan thangbakbe arta kave mate kiludet amonit kachoklem kechokche asaichot pura chemathadetri; nanglong kedo kijumdet ajakong si nangphan ahokpet asai nangpaklem un’edet pu kachepajokji aphan alam pinchong nangne. Ansose si, thangbakbe nang aron karkan aphan inut kaprek asai klem thekthedetlo pu abangphu si kachoklemchot pura mathari. Jongsi nang le methang aphan kadiya chelang thekser lapen methang aphan kachinghon thekser, pulote Ne pudetji nang ke inut aphon ketanpik abanglo lale mantune ta ahokpet aphan chepalong thekthelo, mate nang aron karkan tame nangphan aphi nangkidunkri nangjutjelo; alangtum nangphan ahokpet akemang kapaplengji aphan nangkhangdun chekpo, lapen nangphan kijunjepin apor aphan Sobar aning kachethe arisangho nangpamanverpo. Antame Ne nangphan nangparedunji ke: Nang mena aron karkan asai aphan kachepangthek thekthedet ahut nang kijutsi keleji adim aphan chepamathadetri; aron karkan aphan le ardi pipen matha pemenon, lapen methang kijutsi keleji adim aphan kachematha pen lahei aphan langkai nangne.