Sai keklem lapen Kelut (3)

Arnam ke monit akhei aphan ongdung anghor pitanglo lapen halatum kelutji atovar ta lakha un’e atovar pen pachini tanglo. Bonta monit atum keklem’un angdeng jumhek ajoine, ke’ongpi Arnam alam ke angkur chesak thekthe detlo. Ladak keklem’un angdeng kejumhek nangkok ke prekjam athe do, lahei ke monit ahokhe kamatha lapen ot’kelangno, lapen kepathe pading pon pameme; hako pen kekroi manghu pensi jasemet monit atum aning arlo ke’ot pathirthip bom; kaheno lapen ot’kelangno pen kaboche akai along ongdung akeso si hala monit aning angkuiso arlo chingthang pring si paman lo; matha pameme pen jutang a’kethek aphan ke’ot’thip phant throksirkep-ra-nerkep lerei arat atumke jutang a’kacharli ahin thangnat kethek ave lapen, hala pen akele, kejumhek atumsi jutang kacharli akangtui angdeng long dunchot. Laso apotsi, kecheng pen rat atum Arnam kalite Karjong kopisi kenangjima kachiniji abidi avedet, bonta kachini pameme lapen klardakde Arnam arje aphan hako kekroi manghu pensi long damchot. Kepavir detji ahin kapekroi ningkan suri pen “hala kangtuipik khei a’karjong” si monit aning a’karnukpi alongsi tekanglo. Lason thakthak si hako akematha ason si rat atum aphan ke ari pen kok’het pen masapnat kejokvanta avedetlo, thangnat ning kehang kar’i kalite ning chepadingde’pin pen kachingthurji aphan akar’i ta avepin, la anpar thangnat akam ave lapen aphi anat kacherui ason si dobom. Ban-sot kedotang kethirthip kematha lapen lahei akemang dam kethedung pensi monit akhei angbong paprai un’e kahijim’meme lapen kelangnodak arjan abi along varchor si, abidi kave, ot-adur lapen kacheklang arje anta pare pheleng ponlo. Monit atum kangtingkuk kaphirno apirthe along kedobom ason si theklong, halahei atum angbong pen baduta kebarphlotji aphan rire, lapen baduta latum angbong pen kaheman apirthe along kacheterekji mathathe; alar ke, latum lahei kedo’o ason pensi akai ning chepangsam’i lo. Latum arni kepadam ke osomar kepado lapen kepachan, kachepeduk, ang’i chepabu, latum keklemver akam heihei, karengmesen lapen ning kangsam ahemtun aphan mang kaheman, lapen pinanso angbong kaike kachinghon aphan kaheman, a’somar atum pen kesar arta ahut aning kacheparong, pon halatum ning ingsamjin akai kerenglong ason… Ha kep, asuri suri, asuri suri kep aningkan pen nonpu anta rat atum lasonsi apor pedam bom, inut kechoklim a’kai kacheplang abang avepin pen, kadokave ta kangtingkuk a’pirthe along kevirdetji aphan si ning hangchotsi, hala anong athang lapen a’kopai keme aphan kachepate lapen ning cheparung pon a’long latum hinhin angbong chedan pon rinti lo. Komatne Arnam akar’i aphan keri abang dolo ma? Inutbak Arnam akam aphan ardi kepidun abang dolo ma? Monit arpum aro-arim do’an kangtingkuk abangsi ajak kedingpi cheraidet pen tevar ponphitsi monit abe chinghoidet, lasi Arnam akam kepadengji aphan masap katora dokok, lapen rat atum’ta Arnam kopisi halatum aphan anghor kepi aphuthak ning kematha lapen ardi kepidun pini jumhek. Ajat alam seta, Ne kroilo rat atum Ne phan ning’oi’e detji, lahei alam kepu penke halahei Ne kaningje lake ningkan suri suri a’phurkimo. Phurkimo pen kaningje athe lake ahok lapen la aparta kaheno akam anta kado kave aphan paklardak lo. Lasi kopi alamthe lo labangso ahok along kepu dunji kedolang? Bonta Ne amat’ta kroi lo, kedengthek arat atum ke lahei alam kethek long pen, amek prangpo lapen kachingthurji aphan bor’I po. Arnam aning kehang ke monit akhei do’an atumta kesang adim kelut dunji aphan; lapu’an sose Arnam ahir-asang pen kesik ahavar along keplengsetji si Arnam ke ar’i parpik lo. Katherak dam meme ke monit atum kevir adim along inglimchok si amek prangpre det, lapu’an a’kaheno si Sobar paheno tanglo, lasi pini lahei atum monit apun ason avedetlo. Lasi monit la kematha, ot-adur lapen kacharli ke kenangsot kacherap, jutang a’kethek kacheseke lake adunthu akacherap, keme muchot ke monit ajutang ke’un’e aphan kangthur pon lapen karjong akai kematha aphan kelar pon.

Abinong’et ke, Arnam kenangji a’monit apun ke lapu’an le kangtui kali, bonta monit atum keklem’un angdeng lapen Arnam akenangji angbong adak thepik ajoine, ejahak amonit atum ke aphu chingthursi Arnam akenangji ahin langdunlor anchot bonta kapaplengji ajakong ave. Kahache ahut penta monit atum along kedo akethek, lapen hachedet aphi latum along do’an akethek pangrumpet pen anta, Arnam akenangji ateng keleji aphan heloving lang. Bonta lahei alam kapangthekchot penke keplengvekji atovar kali. Heloving adim kedo a’lang ke tongsekot akang’it pame un’e. Monit atum amethang methang aphan sangti penta akangduk’lang pu chechini pusita, Arnam aning kapangsamji aphan latum alamrai ave pulote, Arnam kenangji ateng keleji aphan kapaphrang atovar along kedun jumpiklang, tangte lason a’kethek-kere kedo ardi kopi lo? Kaipho ajintak pen kebu aphule along lang kapangpen – chebu’et khangjang ason kali ma? Ne kopima kaningje labangso kesung angdeng lake kelutdam pensi klem unji; hala henlo kethenei athepi.

Monit atum kelut anghap kedambom ahut, akai along kaiketa ka’aini do, keplengset kachelarle’pin ason karjong akai along kedo lahei ke Kardom, Arnam alam kecho-kejun, kalite kachepangrum, laso apotsi rat atum Arnam aphan kekroi along thangnat thedung ning cheparong athai ave pusi kaiketa matha lo. Lahei Karjong keklem akam anke kaike’ta monit akhei atiri binong a’ot ateng keponji aphan, hala ke Sobar kaphangno’tang along pen. Setame ahut pen rat atum Karjong Kangthir kapathe’ang deng longbom pensi latum a’tiri binong a’kematha, a’ot-adur, kedo kethak lapen abe kachepado anta angkur chepathir pon thekbom, lapen latum kecheng a’ot chelarle si dolo. Kekroi manghu pen keklem akam’an rat atum kedeng dun helo Arnam kelang selet’nei, bonta ongdung arat atum lahei atum pen chekak un’e, lahei kekroi manghu akam anta Arnam pen aron pusi halatum matha bom, lapen pini anta lahei che’o phlak thekthe, lahei ke pangri-pangdon a’riso-nimso atum chojun amei kesik, pangri-pangdon apindeng, tangka anong’e, pangri-pangdon abolon ahem, lasonsi ning kacheparongji aphan lunkan amei, hako keklem angthun si non a’ove anta klembom. La kadokave amo kave kekroi manghu akam do’an ke kithiji aphan lapen latum kithiji aron atangsi kacheklem rinti; lahei helo ansose Arnam aphan kahijim’meme ason, anparte hala dhorom aphan kekroi arat atum kardom arni kesang arni heihei, lata Alangli phan ke hijim’meme lo; lapen aron atang pen a’kachelang lapen pirthe a’kachelang pinso hijan lahei ke Arnam ansose si jasemet langselet lo lapen dengde lo, hala barla vang barbar arong-aje heihei, lapen Kristmas arni mamatta lahei kado kave ta chini lo lata Arnam pen ason kali, la ahok kali kejui amar, lapen bolon kepi laso arong-aje arni aphan, lahei ke hirjir, methengtom, melur, Kangthir Kachelang, Kristmas anong’e lapen Kristmas arong-aje do anta monit atum aning arlo amurti kalilang ma? Kesang arni ahim kebeng, drakha lapen kangdukni keneihin linen ape heihei ke ansose ahokpet kumlin ason lo. China adet along do’an ajutang arong’aje arni, hi’i hang’et aphu kangthur arani, Chehang’thepi Atelong arong-aje, Ningkreng vangjirjir arong-aje, Laba arong-aje lapen ningkan kimi arni lapen Dhorom apirthe arong-aje arni heihei, lake Easter, Baptisom Arni, lapen Kristmas Arni, lahei kado kave kangthirthe arong-aje anta hako ahut pen kevangbon angthun pini anta ongdung atum klemdunbom lang. Lake monit kangchopik a’kematha lapen chepareset pen kamathadam pensi pini anta nanglerok lo. Latum thangnat kechokche ave asonsi kacheklang, bonta ahokpet Sobar si pamanghuji aphan monit atum aphuthak klem bomlo. Konatma Sobar pen kachelang armu kedo’o adim lapen ko’an ma a’barim lapen kepaphihup adim, si hako aron atang aphan kepathir. Lahei pensi rat aphan kok’het lo, nahok ta kacheterekji athai pavepin lo. ke’ongdung dhorom arong-aje pirthe along kecheng abinong’et Arnam pen kacherap adondon asonsi kachepaklang lapen Arnam keklem akam along kacherap adondon kapaplangji si keklem, bonta lahei atum abinong ke theklonglepin pensi Sobar ke ari pen kok’het lo, Arnam aphan kachini longle detjisi kadokave ta Sobar keresak abidi alongsi donang lo. Ahokpet ke, mo Arnam asai angdeng ketang ahut ke, Alangli halabangso arni ajaton do’an lapen halaso arni kedo kethak arokom anta phalangno’etpo tanglo, thangnat kethek longji ason tekangke detji. Setame, “Dhorom aphan kekroipik atum ke hala ketheklong’dak amar heihei aphansi ingduk bomji’lang; lason ahut latum Arnam koson ma pu chemathathe pinji, thangnat ta puthot charli ponpe detji, Ketheklong ke Arnam aphan chinghonpik lo, abinong ke latum Alang phan ajak dingklui aphrang pensi hem pen toiphit tanglo lapen Sobar aphansi hongplang along pangni si ingduk lo. Jisu arjan, Thengparpan, Mary, Jisu Baptisom lapen Kepadusi akecho-kejun lahei aphan jasemet aman pilo, sining kedo Hemphu aphan ason thot. Jasemet cheru hursi ase kethe pen “Hemphu sining athak kedo netum Apo” pusi ardomlo; lahei ke kepachalai kali lang ma? Pini arni an, ke’ongdung kaningje lapen keklem pon a’kachinglit monit angbong kevangbon angthun heihei ta Arnam ke hijim det; latum jasemet si Arnam atovar aphan khangthip lo lapen anparata, monit aphan hala kelut anghap along jasemet patekuk dunlo. Soitan ke kephangnotang amonit an aphan chibi pon bomsi, halatum angbong ‘aron along Lee ahakhi’ asonsi chepaplengset lo, Lawrence akachinitang ason, kehon abang Nee akelangdun pangching, lapen Poul akeklem kedam ason. Haladak thangnat ta ave, Arnam monit akhei atum aphuthak keklem dunji atovar amatsi ave, atheke latum angbong chemathalok ason dopik, aron, hukum, kachekhang aron atang’an lapen lason thakthak lahei pen aparta puthot kebatdun ke hako akekroi manghu pen dambom si monit aphan nepcheksi chodet khangjang lo. Lake jongsi rat kematha ateng ning rungphom arjan, hi-i atomo alir acham dopik pen kethan ason, pen manghumeme api inghun athan athak kangni ason pu an ketheklong mek pen latum rat aphan kepamanghu pen cheputhekthe pin lapen alamthe pavepin an. Ahok alam kethanji ke Arnam pini keklemji akam lake jasemet monit kekroi manghu pen lapen kacherap a’ot-adur an kepavirji aphan lapen latum kamunthi ason anta kelar pamithuji aphan. Arnam akam ke pini arni an ajak dingde, atheke halatum angthun ke monit akhei a’ove-ove si chepachon ponbom. Labangso akam ke Alangli methang si kepangcheng lapen kepatang sita Alangli methang mamat, komatne thedung karjong amonit angthun aphan akenang thangta ave pin pen, kalite Arnam alanglilar akam angthun keklemji aphan akaprek mentune akai aphan akenang ave. Monit akhei atum lahei aphuthak thangta amethang chepasung nangne, Arnam ke pini akaprek anat pensi ningje bomlo lapen klem bomlo, tangte kopisi monit atum amethang chepasung nangji lang? Jongsi monit atum pini kedam atovar kedambom angbong latum “aphusar angthun” pen si pangchengthubom lote ke’ang adim le damde detji. Arnam ke arsik’krung lahei monit kedo a’ot aphuthak aning kedokde, hala pirthe amonit atum aningkan, acheklo lapen arni heihei aphan kahijim ason thakthak Alangli hijim lo.

Monit a’ot-adur kelarji aphan kemenei atovar ke hala aning aklong karnuknei adim along bikar kero pen kepame helo, la ansi rat akematha lapen a’ot anta chelar pangcheng pon bompo. Aphrangsi ke rat atum hala dhorom ajutang’an, dhorom asai heihei, a’ningkan lapen a’chiklo, lapen rong-aje anta Arnam aning dokdepik pu klardak theklong nangji. Latum aphan hako a’kematha kekok’het pen pajoksi halatum kethirkluk kekroi manghu angthek do’an pavir nangji. Lahei do’an ta monit akhei kelut anghap alongsi do’et lo. Nangtum chini pame nangji kopi athesi monit akhei aphan Arnam hala dhorom kave apirthe pen nang keja lo, lapen kopi athesi hala Hukum aron lapen kekhang aron atang pen Alangli nang kevan detlo. Lahelo nangtum kelut dun nangji adonri, lapen bonsita lahei pen thangnat ta nang karjong apharman keklemtang ason aphan klem thekthe detlo. Lahei atumke nangphan thedung kapatekuk, nangtum anghap kanghap dun, Arnam aphan kachiniji pen nangkhang dunbom lo. Latum honjar apham selamsi rat aphan pachingnanghet lo. Ke’ongdung atum ke Baibel ta porhipik lapen ongdung angdeng ning kachibi’tang ta puthek. Pini latum anghap along, rat atum thangnat chechinine’pin si Baibel pen Arnam akam apun pun’i lo, jongsi Arnam akam kecheng angdeng along Baibel ason pulote lake Baibel si atiri lo. Arnam akam along Baibel pen chengrap tik angbong ke, rat atum jasemet Arnam akam along cheto dun lapen Alangli phan kachetongcheng aman apeng si pilo; mentune Arnam akam along Baibel pen keplangji ason dokok pulote rat atum aning chepaduk si ang’i chepajangset an Arnam kepangcheng akam aphan ridam rintipo; jongsi Arnam akam Baibel along paklang ponpe’det lote, Arnam aphan ta latum panungthip po. Lason ta pudam un, pini Arnam keklem akam mathadamtik ke, ongdung arat atum ke pajo pen latum chereju pensi deng dunlo, latum lam karjuji aphan chepareset pensi pipo, lapen kachinidamji aphan kacheprek ave lo pusi matha po; kedamtang amar aphan asonsi, latum isi-ra-achitim baksi otchot po akaprek anke che’o etpo. Ente lake kelutlo pu unji ma? Akaprek alo heihei si amethang akhi ason ot’thip lapen hala Recho arat anghap a’ser angkir asonsi matha lo, rat atum Arnam latum aphan pini kenangji alamke kematha’krang si cheklangpo. La anparta, ke’ongdung akereset, kethek atum ta Arnam alam ke ari arvi si otpo lapen hala akaprek kethekser akam aphan ke ari-ar’e anat, jongsi Arnam pen kepangcheng alam aphan kepalongji ninghang asonte lahei kethekser akam angbong pensi Arnam alam ke choklim pusi chini dam pame po, lapen latum akaprek aphanta Arnam alam than paklar si kethekser akam ta chethan rappetji, jongsi latum akam keklem bom atum asonte. Ahokpet kethanji aphan, ladak keongdung “sonthan keritarlip atum ta do” monit akhei angbong mentune ta pini akangtuiving sonthan pen a’kechun aphuthak matha damde. Sonthan, pen kapechun anke thangnat kacharli dun meme ason ave (lahei Arnam akam Arnam alam lapen chethe kedam atovar) lasi rat kado kave amethang si chepadorrep, kepakroithek ajakong, kedo ade pensi angkang kethepi heloving adim anta pachethang ponlo lapen Arnam amen kajume pensi anong pathe ponlo, lason ahut, alangtum kelut anghap ke pherememe parpik lapen latum kepinchong ahut pen kachepahelo asonsi Arnam akenangji ason pen chepahelo bomsi theklonglo. Arnam akam keklemji aphan kopu’an akejoi lo? Kethek dam long ateng ke, latum aning arlo chepathik tanglo achetim ke atumi aphansi bi tekanglo, achitim pini aphan si chevan lo, achitim Sobar aphan hodai lo lapen achitim Arnam aphan, lapuson atovar pen jongsi joike pen kamunthi lapen rengmesen si chethek long pulote monit arlo apirthe along kopu’an kapherememe, latum penap akevirji aphan anchot le kaphere kali bonta patumi aphanta lo. Arnam lapen Sobar banghini along penta aning kapaplengple’detji aphan jasemet kaphere do, pini komat aphansi kalang lapen kali pu kepupo. Atheke rat atum latum akamatha lapen aot’adur anta cheseke pame avedet lo, latum akeme kaheno kangsai thekji akethek abang jumhek lo, lapen latum joike pen pini la Arnam akam ma kali puta than thekthe detlo. Atheke monit hako akekroimanghu akematha pu an akarnuk lo latum ajak dingpi kekroi manghu lapen ahok angbongsi bikoklo. Arnam lapen kumlin heihei isivet angdeng si bilo, la hini angbong ta kethakji aphan pangthek’the detlo, lapen latum a’tarlok phangno etlo klardak chechini damde detlo. Halaso ajoine si monit akhei doan atovar akrong chingtonkok si aphrang dam thekthe detlo. Lahei akatora kevang lake monit atum choklim abidi kacharli kejumhek ajoine lo, laso pensi latum kelutji anghap along thedung akesung cheplanglo. Bangso athesi ahok Arnam akam aphan monit atum klemji ninghanghe detlo, bonta monit keklem akam aphansi jasemet ot’thip lo (halatum thedung pu ketheklong amonit atum pen). Jongsi latum lasonsi pangthek bom, lahei ke hala monit akhei kelut damji aphuthak non mamat kachethan nangji alamthe kali ma?