ခေါင်းဆောင်များနှင့် အမှုဆောင်များ၏ တာဝန်များ (၂၄)

အချက် ၁၄- အမျိုးမျိုးသော ဆိုးယုတ်သော လူတို့နှင့် အန္တိခရစ်တို့ကို ချက်ချင်းပင် ပိုင်းခြားသိမြင်ပြီး ဖယ်ထုတ်ပစ်လော့ သို့မဟုတ် နှင်ထုတ်လော့ (အပိုင်း ၃)

အမျိုးမျိုးသော ဆိုးယုတ်သည့်လူများကို ပိုင်းခြားသိမြင်နိုင်စွမ်းအတွက် စံနှုန်းများနှင့် အခြေခံများ

၁။ ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်အပေါ် အခြေခံခြင်း

ပြီးခဲ့သည့် စုဝေးပွဲတွင် ငါတို့သည် ခေါင်းဆောင်များနှင့် အမှုဆောင်များ၏ ဆယ့်လေးခုမြောက် တာဝန်ဖြစ်သော “အမျိုးမျိုးသော ဆိုးယုတ်သည့် လူတို့နှင့် အန္တိခရစ်တို့ကို ချက်ချင်းပင် ပိုင်းခြားသိမြင်ပြီး ဖယ်ထုတ်ပစ်လော့ သို့မဟုတ် နှင်ထုတ်လော့” အကြောင်းကို မိတ်သဟာယဖွဲ့ခဲ့ကြသည်။ ဤတာဝန်၏ အကြောင်းအရာအပေါ် အခြေခံ၍ ငါတို့သည် မတူညီသော အခြေအနေများအောက်ရှိ အမျိုးမျိုးသော လူတို့၏ ကွဲပြားသော သရုပ်သကန်များကို အကျဉ်းချုပ် သုံးသပ်ခဲ့ကြပြီး ထို့နောက် ၎င်းတို့၏ သရုပ်သကန်များကို အခြေခံ၍ ဤအမျိုးမျိုးသော လူပုဂ္ဂိုလ်များကို ပိုင်းခြားသိမြင်ခဲ့ကြသည်။ ဤလူပုဂ္ဂိုလ်များကို ပိုင်းခြားသိမြင်နိုင်စွမ်းအားဖြင့် မည်သူတို့သည် ဘုရားအိမ်တော်က ပိုင်းခြားသိမြင်ပြီး ဖယ်ထုတ်ပစ်ရန် လိုအပ်သည့် ဆိုးယုတ်သောလူများဖြစ်သည်ကို ရှင်းလင်းစွာ ဖော်ထုတ်ရန် ငါတို့ ရည်ရွယ်ခဲ့ကြသည်၊ ဆိုလိုသည်မှာ ဘုရားအိမ်တော်၌ ဆက်လက်နေထိုင်ရန် ခွင့်မပြုထားသည့်သူများနှင့် ဖယ်ထုတ်ပစ်ခြင်းအတွက် ပစ်မှတ်များဖြစ်သည့် သူတို့ ဖြစ်ကြသည်။ ပြီးခဲ့သည့် နှစ်ကြိမ်တွင် ငါတို့သည် ကဏ္ဍသုံးခုမှတစ်ဆင့် အမျိုးမျိုးသော ဆိုးယုတ်သည့်လူစားမျိုးများကို ပိုင်းခြားသိမြင်နိုင်စွမ်းနှင့် အမျိုးအစား ခွဲခြားခြင်းအကြောင်းကို မိတ်သဟာယဖွဲ့ခဲ့ကြသည်။ ယနေ့တွင် ငါတို့သည် ဤကဏ္ဍသုံးခုမှတစ်ဆင့် အမျိုးမျိုးသော ဆိုးယုတ်သည့်လူစားမျိုးများကို အမျိုးအစားခွဲခြားခြင်းနှင့်ပတ်သက်သည့် အသေးစိတ်အချက်အမျိုးမျိုးကို ဆက်လက်၍ မိတ်သဟာယဖွဲ့ကြမည်။ ဦးစွာ ဆယ့်လေးခုမြောက် တာဝန်နှင့် ယင်း၌ စာရင်းပြုစုထားသော တိကျသည့် အမျိုးအစားသုံးခုကို ဖတ်လော့။ (ခေါင်းဆောင်များနှင့် အမှုဆောင်များ၏ ဆယ့်လေးခုမြောက် တာဝန် “အမျိုးမျိုးသော ဆိုးယုတ်သည့် လူတို့နှင့် အန္တိခရစ်တို့ကို ချက်ချင်းပင် ပိုင်းခြားသိမြင်ပြီး ဖယ်ထုတ်ပစ်လော့ သို့မဟုတ် နှင်ထုတ်လော့” ဟူ၍ဖြစ်သည်။ ပထမမှာ ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်၊ ဒုတိယမှာ လူတစ်ဦး၏ လူ့သဘာဝ၊ တတိယမှာ မိမိတို့၏ တာဝန်အပေါ် ထားရှိသော သဘောထားတို့ဖြစ်သည်။) ဖတ်ပြီးနောက်တွင် သင်တို့သည် ယခင် မိတ်သဟာယဖွဲ့ခြင်း နှစ်ခုမှ အခြေခံအကြောင်းအရာအချို့ကို ပြန်လည်အမှတ်ရကြသလော။ (အမှတ်ရပါသည်။) ငါတို့၏ နောက်ဆုံး မိတ်သဟာယဖွဲ့ခြင်း၏ အကြောင်းအရာကို ဦးစွာ ပြန်လည်သုံးသပ်ကြစို့။ (ပြီးခဲ့သည့်တစ်ခါက ဘုရားသခင်သည် ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်အကြောင်းကို မိတ်သဟာယဖွဲ့ခဲ့ပြီး ဤအကြောင်းအရာ၏ အချက်လေးမှ ရှစ်အထိကို ဆွေးနွေးခဲ့သည်။ စတုတ္ထမှာ အခွင့်အရေးသမားဖြစ်ရန်၊ ပဉ္စမမှာ အသင်းတော်ကို မှီခိုကပ်ရပ်ရန်၊ ဆဋ္ဌမမှာ ခိုလှုံရာ ရှာဖွေရန်၊ သတ္တမမှာ အားကိုးရာ ရှာဖွေရန်၊ အဋ္ဌမမှာ နိုင်ငံရေး ရည်မှန်းချက်များ လိုက်စားရန် ဖြစ်သည်။) ဤအချက်ငါးချက်ကို နောက်ဆုံး မိတ်သဟာယဖွဲ့ခြင်းတွင် ဆွေးနွေးခဲ့သည်။ ဤလူအမျိုးအစားငါးမျိုး၏ အခြေခံ သရုပ်သကန်များနှင့် ထုတ်ဖော်ခံရသော ဖောက်ပြန်ပျက်စီးသည့် အနှစ်သာရများအကြောင်းကို မိတ်သဟာယဖွဲ့ခြင်းအားဖြင့်လည်းကောင်း၊ ၎င်းတို့၏ အပြုအမူများနှင့် ဘုရားသခင်ကို ယုံကြည်ခြင်းရှိ ၎င်းတို့၏ ရည်ရွယ်ချက်များ၊ ရည်မှန်းချက်များအပြင် ဘုရားသခင်အပေါ် ၎င်းတို့၏ အစဉ်သဖြင့် တောင်းဆိုမှုများမှ အကဲဖြတ်ရလျှင် ဤလူတို့ကို ညီအစ်ကိုမောင်နှမများအဖြစ် မှတ်ယူပြီး အသင်းတော်၌ ဆက်လက်ရှိနေခွင့်ပြုသင့်သလော။ (မပြုသင့်ပါ၊ ထိုသို့သောလူများကို ဖယ်ရှားသင့်သည်၊ အကြောင်းမှာ ဘုရားသခင်ကို ၎င်းတို့၏ ယုံကြည်ခြင်းသည် သမ္မာတရားကို လိုက်စားရန် သို့မဟုတ် ကယ်တင်ခြင်းကို လိုက်စားရန် မဟုတ်သောကြောင့် ဖြစ်သည်။ ၎င်းတို့အားလုံးတွင် ပုဂ္ဂိုလ်ရေး ရည်ရွယ်ချက်များနှင့် အကြံအစည်များ ရှိကြပြီး ဘုရားအိမ်တော်၌ မိမိတို့ကိုယ်တိုင်အတွက် အခွင့်အရေးများနှင့် အကျိုးကျေးဇူးများကို မသမာသောနည်းဖြင့်ရယူရန် မျှော်လင့်နေကြသည်။ ၎င်းတို့သည် ဘုရားသခင်ကို အမှန်တကယ် ယုံကြည်သောလူများ မဟုတ်ကြ၊ ၎င်းတို့အားလုံးသည် မယုံကြည်သူများ ဖြစ်ကြသည်။) မယုံကြည်သူများကို အသင်းတော်မှ ရှင်းလင်းမပစ်ပါက ၎င်းတို့သည် အသင်းတော်၏အလုပ်နှင့် ညီအစ်ကိုမောင်နှမများအပေါ် မည်သည့်အန္တရာယ်ကို ကျရောက်စေသနည်း။ (၎င်းတို့သည် ဘုရားသခင်၏ နှုတ်ကပတ်တော်ကို စားသောက်ခြင်းလည်းမရှိ၊ ဘုရားသခင်၏ အမှုတော်ကို တွေ့ကြုံခံစားခြင်းလည်း မရှိပေ၊ ၎င်းတို့သည် သမ္မာတရားကို လက်မခံဘဲ အသင်းတော်၌ နေထိုင်ကြသည်။ ထို့အပြင် ၎င်းတို့သည် အပျက်သဘောဆောင်ခြင်းနှင့် အယူအဆများကို ပွင့်အံချနိုင်ကြပြီး ထိုသို့ဖြင့် အဖျက်အမှောင့်လုပ်ခြင်းများနှင့် နှောင့်ယှက်ခြင်းများကို ဖြစ်ပေါ်စေကာ အပျက်သဘောဆောင်သော အခန်းကဏ္ဍမှ ပါဝင်ကြသည်။) ဤသရုပ်သကန်များသည် အခြေခံအားဖြင့် လူတို့ မြင်နိုင်သောအရာများ ဖြစ်ကြသည်။

ပြီးခဲ့သည့် မိတ်သဟာယဖွဲ့ခြင်းတွင် ဆွေးနွေးခဲ့သော လူအမျိုးအစားငါးမျိုး၏ သရုပ်သကန်များမှ အကဲဖြတ်ကြည့်လျှင် ဤလူတို့တွင် ဘုံလက္ခဏာရပ်တစ်ခု ရှိသလော။ (ဟုတ်ပါသည်။) ၎င်းတို့၏ ဘုံလက္ခဏာရပ်မှာ အဘယ်နည်း။ (ဤလူများအားလုံးသည် မယုံကြည်သူများ ဖြစ်ကြသည်။) (၎င်းတို့သည် ဘုရားသခင် တည်ရှိခြင်းကို မယုံကြည်ကြ၊ သမ္မာတရားကို မယုံကြည်ကြ၊ သမ္မာတရားကို စိတ်မဝင်စားကြပေ။) ဤသည်မှာ ၎င်းတို့၏ အနှစ်သာရကို ထုတ်ဖော်လေသည်။ ၎င်းတို့သည် သမ္မာတရားကို မယုံကြည်သောကြောင့် သမ္မာတရားကို လက်ခံကြမည် မဟုတ်ပေ။ သမ္မာတရားကို လုံးဝလက်မခံသောသူတို့၏ အနှစ်သာရမှာ မယုံကြည်သူတစ်ဦး၏ အနှစ်သာရ ဖြစ်သည်။ မယုံကြည်သူများ၏ လက္ခဏာရပ်များမှာ အဘယ်နည်း။ ၎င်းတို့သည် အခွင့်အရေးသမားဖြစ်ရန်၊ အသင်းတော်ကို မှီခိုကပ်ရပ်ရန်၊ ဘေးအန္တရာယ်များကို ရှောင်ရှားရန်၊ အထောက်အပံ့နှင့် မြဲမြံသောဝင်ငွေကို ရှာဖွေရန် ဘုရားသခင်ကို ယုံကြည်ကြသည်။ ၎င်းတို့ထဲမှ အချို့သည် မျက်နှာသာရရှိရန်နှင့် ရာထူးတစ်ခုရရှိရန် အချို့သောကိစ္စရပ်များမှတစ်ဆင့် အစိုးရနှင့် အဆက်အသွယ်များ တည်ဆောက်လိုလျက် နိုင်ငံရေး ရည်မှန်းချက်များကိုပင် လိုက်စားကြသည်။ ထိုသို့သောလူများသည် တစ်ဦးတစ်ယောက်မကျန် မယုံကြည်သူများ ဖြစ်ကြသည်။ ၎င်းတို့သည် ဘုရားသခင်ကို ယုံကြည်ခြင်း၌ ဤလှုံ့ဆော်မှုများနှင့် ရည်ရွယ်ချက်များကို သယ်ဆောင်ထားကြပြီး ၎င်းတို့၏ စိတ်နှလုံးထဲ၌ ဘုရားသခင်တစ်ပါး ရှိသည်ကို လုံးဝသေချာမှုဖြင့် မယုံကြည်ကြပေ။ ၎င်းတို့သည် ကိုယ်တော်ကို အသိအမှတ်ပြုလျှင်ပင် သံသယဖြင့်သာ အသိအမှတ်ပြုကြသည်၊ အကြောင်းမှာ ၎င်းတို့ စွဲကိုင်ထားသော အမြင်များသည် ဘုရားမရှိဟု ယူဆသော အမြင်များ ဖြစ်သောကြောင့် ဖြစ်သည်။ ၎င်းတို့သည် ရုပ်ဝတ္ထုလောက၌ ၎င်းတို့ မြင်နိုင်သောအရာများကိုသာ ယုံကြည်ကြသည်။ ၎င်းတို့သည် ဘုရားသခင်တစ်ပါး ရှိသည်ကို မယုံကြည်ဟု ငါတို့ အဘယ်ကြောင့် ပြောဆိုရသနည်း။ အကြောင်းမှာ ဘုရားသခင်သည် ကောင်းကင်၊ မြေကြီးနှင့် အရာခပ်သိမ်းကို ဖန်ဆင်းခဲ့သည်ဟူသည့် အချက်များနှင့် လူသားမျိုးနွယ်ကို ဖန်ဆင်းပြီးနောက် ဘုရားသခင်သည် ၎င်းတို့အပေါ် ဦးဆောင်လျက် အချုပ်အခြာအာဏာ ကိုင်စွဲလျက်ရှိသည်ဟူသည့် အချက်များကို ၎င်းတို့သည် တညီတညွတ်တည်း မယုံကြည်ကြသောကြောင့် သို့မဟုတ် အသိအမှတ်မပြုကြသောကြောင့် ဖြစ်သည်။ သို့ဖြစ်၍ ၎င်းတို့သည် ဘုရားသခင်က လူ့ဇာတိခံနိုင်သည်ဟူသည့် အချက်ကို ယုံကြည်နိုင်စရာ အကြောင်းမရှိပေ။ ၎င်းတို့သည် ဘုရားသခင်က လူ့ဇာတိခံနိုင်သည်ကို မယုံကြည်ပါက ဘုရားသခင် ဖော်ပြခဲ့သော သမ္မာတရားအားလုံးကို ယုံကြည်ပြီး အသိအမှတ်ပြုနိုင်စွမ်း ရှိကြသလော။ (မရှိကြပါ။) ၎င်းတို့သည် ဘုရားသခင် ဖော်ပြခဲ့သော သမ္မာတရားများကို မယုံကြည်ပါက ဘုရားသခင်သည် လူသားမျိုးနွယ်ကို ကယ်တင်နိုင်သည်ကိုလည်းကောင်း၊ လူသားမျိုးနွယ်ကို ကယ်တင်ခြင်းအတွက် ကိုယ်တော်၏ စီမံခန့်ခွဲမှုအစီအစဉ်ကိုလည်းကောင်း ယုံကြည်ကြသလော။ (မယုံကြည်ကြပါ။) ၎င်းတို့သည် ဤအရာ တစ်ခုကိုမျှ မယုံကြည်ကြပေ။ ၎င်းတို့၏ မယုံကြည်ခြင်း၏ အရင်းအမြစ်မှာ အဘယ်နည်း။ ယင်းမှာ ၎င်းတို့သည် ဘုရားသခင် တည်ရှိသည်ကို မယုံကြည်ခြင်း ဖြစ်သည်။ ၎င်းတို့သည် ဘုရားမရှိဝါဒီများနှင့် ရုပ်ဝါဒီများ ဖြစ်ကြသည်။ ၎င်းတို့သည် ရုပ်ဝတ္ထုလောက၌ ၎င်းတို့ မြင်နိုင်သောအရာများသာလျှင် စစ်မှန်သည်ဟု ယုံကြည်ကြသည်။ ၎င်းတို့သည် ကျော်ကြားမှု၊ အကျိုးအမြတ်နှင့် အဆင့်အတန်းတို့ကို ပရိယာယ်များနှင့် မသမာသောနည်းလမ်းများမှတစ်ဆင့်သာ ရရှိနိုင်သည်ဟု ယုံကြည်ကြသည်။ ၎င်းတို့သည် ကြီးပွားတိုးတက်ပြီး ပျော်ရွှင်သောဘဝဖြင့် အသက်ရှင်ရန် တစ်ခုတည်းသောနည်းလမ်းမှာ စာတန်ဆန်သော အတွေးအခေါ်များဖြင့် အသက်ရှင်ခြင်းဖြစ်သည်ဟု ယုံကြည်ကြသည်။ ၎င်းတို့က မိမိတို့၏ ကံကြမ္မာသည် မိမိတို့၏လက်ထဲ၌သာ ရှိသည်ဟုလည်းကောင်း၊ ပျော်ရွှင်သောဘဝကို ဖန်တီးပြီး သေချာစေရန် မိမိတို့ကိုယ်ကို အားကိုးရမည်ဟုလည်းကောင်း ယုံကြည်ကြသည်။ ၎င်းတို့သည် ဘုရားသခင်၏ အချုပ်အခြာအာဏာကိုဖြစ်စေ၊ ကိုယ်တော်၏ အနန္တတန်ခိုးကိုဖြစ်စေ မယုံကြည်ကြပေ။ ၎င်းတို့သည် ဘုရားသခင်ကို အားကိုးပါက မိမိတို့၌ မည်သည့်အရာမျှ ရှိတော့မည်မဟုတ်ဟု ထင်မှတ်ကြသည်။ နောက်ဆုံး၌ ၎င်းတို့သည် ဘုရားသခင်၏ နှုတ်ကပတ်တော်များက အရာခပ်သိမ်းကို ပြီးမြောက်စေနိုင်သည်ကို မယုံကြည်ကြသကဲ့သို့ ဘုရားသခင်၏ အနန္တတန်ခိုးကိုလည်း မယုံကြည်ကြပေ။ ထိုအကြောင်းကြောင့် အခွင့်အရေးသမားဖြစ်ခြင်း၊ အသင်းတော်ကို မှီခိုကပ်ရပ်ခြင်း၊ ခိုလှုံရာ ရှာဖွေခြင်း၊ အားကိုးရာ ရှာဖွေခြင်း၊ ဆန့်ကျင်ဘက်လိင်နှင့် မိတ်ဆွေဖွဲ့ခြင်း၊ နိုင်ငံရေး ရည်မှန်းချက်များ လိုက်စားခြင်း၊ မိမိတို့ကိုယ်တိုင်အတွက် ရာထူးတစ်ခုနှင့် မြဲမြံသောဝင်ငွေကို သေချာစေခြင်းတို့ကဲ့သို့သော ရည်ရွယ်ချက်များနှင့် ရည်မှန်းချက်များသည် ဘုရားသခင်ကို ၎င်းတို့၏ ယုံကြည်ခြင်း၌ ပေါ်ပေါက်လာခြင်း ဖြစ်သည်။ ဤလူတို့သည် ဘုရားသခင်က အရာခပ်သိမ်းအပေါ် အချုပ်အခြာအာဏာ စိုးစံသည်ကို မယုံကြည်သောကြောင့် အတိအကျပင် ၎င်းတို့သည် အသင်းတော်၌ မိမိတို့၏ ပင်ကိုစွမ်းရည်များကို အသုံးချရန် သို့မဟုတ် မိမိတို့၏ ဆန္ဒများကို အကောင်အထည်ဖော်ရန် ဆန္ဒရှိလျက် မိမိတို့၏ ကိုယ်ပိုင်ရည်ရွယ်ချက်များ၊ ရည်မှန်းချက်များဖြင့် အသင်းတော်ထဲသို့ ရဲတင်းစွာနှင့် အရှက်ကင်းမဲ့စွာ ခိုးဝင်နိုင်ကြခြင်း ဖြစ်သည်။ ဤသည်မှာ ၎င်းတို့သည် ကောင်းချီးများ ရရှိရန် မိမိတို့၏ ရည်ရွယ်ချက်နှင့် လိုအင်ဆန္ဒကို ဖြည့်ဆည်းရန်အလို့ငှာ အသင်းတော်ထဲသို့ ခိုးဝင်နေကြခြင်းဖြစ်သည်ဟု ဆိုလိုသည်၊ ၎င်းတို့သည် အသင်းတော်၌ ကျော်ကြားမှု၊ အကျိုးအမြတ်နှင့် အဆင့်အတန်းတို့ကို ရယူလိုကြပြီး ထိုသို့ပြုလုပ်ခြင်းဖြင့် ၎င်းတို့၏ မြဲမြံသောဝင်ငွေကို ရရှိကြလိမ့်မည်။ ၎င်းတို့၏ အပြုအမူအပြင် ၎င်းတို့၏ သဘာဝအနှစ်သာရမှတစ်ဆင့် ကြည့်လျှင် ဘုရားသခင်ကို ယုံကြည်ခြင်းအတွက် ၎င်းတို့၏ ကြံရွယ်ချက်များ၊ လှုံ့ဆော်မှုများနှင့် ရည်ရွယ်ချက်များသည် တရားနည်းလမ်းမကျကြောင်းနှင့် ၎င်းတို့ထဲမှ တစ်ဦးတစ်ယောက်မျှ သမ္မာတရားကို လက်မခံကြ သို့မဟုတ် ဘုရားသခင်ကို စိတ်ရင်းမှန်ဖြင့် မယုံကြည်ကြကြောင်းကို မြင်တွေ့နိုင်သည်။ ၎င်းတို့သည် အသင်းတော်ထဲသို့ ခိုးဝင်လျှင်ပင် နေရာဖြည့်ရုံသက်သက်သာဖြစ်ပြီး မည်သည့်အပြုသဘောဆောင်သော အခန်းကဏ္ဍမှမျှ လုံးဝ ပါဝင်ခြင်းမရှိပေ။ သို့ဖြစ်၍ အသင်းတော်သည် ထိုသို့သောလူများကို လက်မခံသင့်ပေ။ ဤလူတို့သည် အသင်းတော်ထဲသို့ ခိုးဝင်ခဲ့ကြသော်လည်း ၎င်းတို့သည် ဘုရားသခင် ရွေးချယ်ထားသောလူများ မဟုတ်ကြဘဲ အခြားသူများ၏ ရည်ရွယ်ချက်ကောင်းများကြောင့်သာ ခေါ်ဆောင်ခြင်းခံခဲ့ရခြင်း ဖြစ်သည်။ “၎င်းတို့သည် ဘုရားသခင် ရွေးချယ်ထားသောလူများ မဟုတ်ကြ” ဟူသည့် ဤစကားကို မည်သို့ အနက်ဖွင့်သင့်သနည်း။ ယင်းမှာ ဘုရားသခင်သည် ၎င်းတို့ကို ကြိုတင်သတ်မှတ်ပြီး ရွေးချယ်ခဲ့ခြင်းမရှိဟု ဆိုလိုသည်၊ ကိုယ်တော်သည် ၎င်းတို့ကို သူ၏ အမှုတော်၏ ပစ်မှတ်များအဖြစ် မရှုမြင်ပေ၊ သို့မဟုတ် သူကယ်တင်မည့် လူသားများအဖြစ် ၎င်းတို့ကို ကြိုတင်သတ်မှတ်ထားခြင်း မရှိပေ။ ဤလူတို့သည် အသင်းတော်ထဲသို့ ခိုးဝင်ပြီးသည်နှင့်တစ်ပြိုင်နက် ငါတို့သည် ၎င်းတို့ကို ညီအစ်ကိုမောင်နှမများအဖြစ် သဘောထား၍မရနိုင်သည်မှာ သဘာဝကျသည်၊ အကြောင်းမှာ ၎င်းတို့သည် သမ္မာတရားကို စစ်မှန်စွာ လက်ခံသော သို့မဟုတ် ဘုရားသခင်၏ အမှုတော်ကို ကျိုးနွံနာခံသောသူများ မဟုတ်သောကြောင့် ဖြစ်သည်။ အချို့က “၎င်းတို့သည် ဘုရားသခင်ကို အမှန်တကယ် ယုံကြည်သော ညီအစ်ကိုမောင်နှမများ မဟုတ်ကြသည်ဖြစ်၍ အသင်းတော်သည် ၎င်းတို့ကို အဘယ်ကြောင့် ရှင်းလင်းမပစ်သနည်း သို့မဟုတ် မနှင်ထုတ်သနည်း” ဟု မေးကောင်းမေးနိုင်ကြသည်။ ဘုရားသခင်၏ ရည်ရွယ်ချက်မှာ သူ၏ ရွေးချယ်ထားသောလူများက ဤလူတို့အားဖြင့် ပိုင်းခြားသိမြင်နိုင်စွမ်းကို သင်ယူနိုင်ကြပြီး ထိုသို့ဖြင့် စာတန်၏ အကြံအစည်များကို ထွင်းဖောက်မြင်ကာ စာတန်ကို ငြင်းပယ်နိုင်ကြရန် ဖြစ်သည်။ ဘုရားသခင် ရွေးချယ်ထားသောလူများက ပိုင်းခြားသိမြင်နိုင်စွမ်း ရှိသည်နှင့်တစ်ပြိုင်နက် ဤမယုံကြည်သူများကို ဖယ်ရှားပစ်သင့်သည်။ ပိုင်းခြားသိမြင်နိုင်စွမ်း၏ ပန်းတိုင်မှာ မိမိတို့၏ ရည်မှန်းချက်များနှင့် လိုအင်ဆန္ဒများဖြင့် ဘုရားအိမ်တော်ထဲသို့ ခိုးဝင်လာသော ဤမယုံကြည်သူတို့ကို ဖော်ထုတ်ပြီး အသင်းတော်မှ ရှင်းလင်းပစ်ရန် ဖြစ်သည်၊ အကြောင်းမှာ ဤလူတို့သည် ဘုရားသခင်ကို စစ်မှန်သော ယုံကြည်သူများ မဟုတ်ကြသည့်အပြင် သမ္မာတရားကို လက်ခံပြီး လိုက်စားသောလူများ သာ၍ပင် မဟုတ်သောကြောင့် ဖြစ်သည်။ ၎င်းတို့ အသင်းတော်၌ ဆက်လက်နေထိုင်ခြင်းမှ မည်သည့်အကျိုးကျေးဇူးမျှ ရရှိမည်မဟုတ်ဘဲ ကြီးမားသော အန္တရာယ်သာ ကျရောက်လိမ့်မည်။ ပထမဦးစွာ အသင်းတော်ထဲသို့ ခိုးဝင်ပြီးနောက် ဤမယုံကြည်သူတို့သည် ဘုရားသခင်၏ နှုတ်ကပတ်တော်များကို မည်သည့်အခါမျှ စားသောက်ခြင်း မရှိသကဲ့သို့ သမ္မာတရားကိုလည်း စိုးစဉ်းမျှ လက်မခံကြပေ။ ၎င်းတို့သည် အခြားသူတို့၏ စိတ်နှလုံးများကို နှောင့်ယှက်လျက် ဘုရားသခင်၏ နှုတ်ကပတ်တော်များနှင့် သမ္မာတရားမှလွဲ၍ အခြားအရာများကို အစဉ်အမြဲ ဆွေးနွေးကြသည်။ ၎င်းတို့သည် ဘုရားသခင် ရွေးချယ်ထားသောလူများ၏ အသက်ဝင်ရောက်မှုကို ထိခိုက်နစ်နာစေလျက် အသင်းတော်၏အလုပ်ကို အဖျက်အမှောင့်လုပ်ပြီး နှောင့်ယှက်ရုံသာ ပြုကြလိမ့်မည်။ ဒုတိယအချက်မှာ ၎င်းတို့သည် အသင်းတော်၌ ဆက်လက်နေထိုင်ပါက ဘာသာတရားမရှိသူများကဲ့သို့ပင် မကောင်းမှုများကို ကျူးလွန်လျက် သောင်းကျန်းကြလိမ့်မည်ဖြစ်ပြီး အသင်းတော်၏အလုပ်ကို အဖျက်အမှောင့်လုပ်ကာ နှောင့်ယှက်လျက် အသင်းတော်ကို ပုန်းကွယ်နေသည့် အန္တရာယ်များစွာသို့ ကျရောက်စေလိမ့်မည်။ တတိယအချက်မှာ ၎င်းတို့သည် အသင်းတော်၌ ဆက်လက်နေထိုင်လျှင်ပင် အစေခံသူများအဖြစ် လိုလိုလားလား ပြုမူဆောင်ရွက်ကြမည်မဟုတ်ဘဲ အစေခံမှုအနည်းငယ်ကို ပြုလုပ်လျှင်ပင် ကောင်းချီးများ ရရှိရန်အတွက်သာ ဖြစ်လိမ့်မည်။ ကောင်းချီးများ မရရှိနိုင်ကြောင်း ၎င်းတို့ သိရှိလာသည့်နေ့ရက် ရောက်လာပါက ၎င်းတို့သည် ဒေါသပေါက်ကွဲကြပြီး အသင်းတော်၏အလုပ်ကို နှောင့်ယှက်ကာ ထိခိုက်စေလိမ့်မည်။ ယင်းကို လက်သင့်ခံမည့်အစား ၎င်းတို့ကို အသင်းတော်မှ တတ်နိုင်သမျှ စောစီးစွာ ရှင်းလင်းပစ်ခြင်းက ပိုကောင်းသည်။ စတုတ္ထအချက်မှာ ဤမယုံကြည်သူတို့သည် ဂိုဏ်းဂဏများ ဖွဲ့ကြရန်နှင့် အန္တိခရစ်တို့ကို ထောက်ခံပြီး လိုက်လျှောက်ကြရန် ဖြစ်နိုင်ချေရှိပြီး အသင်းတော်အတွင်း၌ ယင်း၏အလုပ်အပေါ် ကြီးမားသော ခြိမ်းခြောက်မှုတစ်ခု ဖြစ်စေသည့် ဆိုးယုတ်သော အင်အားစုတစ်ခုကို ဖန်တီးကြလိမ့်မည်။ ဤအချက်လေးချက်ကို ထောက်ရှု၍ ဘုရားအိမ်တော်ထဲသို့ ခိုးဝင်လာသော ဤမယုံကြည်သူတို့ကို ပိုင်းခြားသိမြင်ပြီး ဖော်ထုတ်ရန်၊ ထို့နောက် ၎င်းတို့ကို ရှင်းလင်းပစ်ရန် လိုအပ်သည်။ ဤသည်မှာ အသင်းတော်၏အလုပ်တွင် ပုံမှန်တိုးတက်မှုကို ထိန်းသိမ်းရန်နှင့် ဘုရားသခင် ရွေးချယ်ထားသောလူများက ဘုရားသခင်၏ နှုတ်ကပတ်တော်များကို စားသောက်နိုင်ပြီး အသင်းတော်အသက်တာကို ပုံမှန်အတိုင်း အသက်ရှင်နေထိုင်နိုင်ကာ ထို့ကြောင့် ဘုရားသခင်ကို ယုံကြည်ခြင်း၏ လမ်းမှန်ပေါ်သို့ ဝင်ရောက်နိုင်ကြောင်းကို ထိရောက်စွာ ကာကွယ်စောင့်ရှောက်ရန် တစ်ခုတည်းသောနည်းလမ်း ဖြစ်သည်။ ဤသည်မှာ ဤမယုံကြည်သူတို့၏ အသင်းတော်ထဲသို့ ခိုးဝင်ခြင်းသည် ဘုရားသခင် ရွေးချယ်ထားသောလူများ၏ အသက်ဝင်ရောက်မှုအတွက် ကြီးစွာသော အန္တရာယ်ဖြစ်သောကြောင့် ဖြစ်သည်။ ၎င်းတို့ကို ပိုင်းခြားသိမြင်နိုင်ခြင်းမရှိဘဲ ညီအစ်ကိုမောင်နှမများအဖြစ် သဘောထားကြသော လူများစွာ ရှိသည်။ အချို့လူများသည် ၎င်းတို့၌ ဆုကျေးဇူးအနည်းငယ် သို့မဟုတ် အားသာချက်အနည်းငယ် ရှိသည်ကို မြင်တွေ့ရသဖြင့် ၎င်းတို့ကို ခေါင်းဆောင်များနှင့် အမှုဆောင်များအဖြစ် အစေခံရန် ရွေးချယ်ကြသည်။ ဤသည်မှာ အသင်းတော်၌ အယောင်ဆောင် ခေါင်းဆောင်များနှင့် အန္တိခရစ်များ ပေါ်ပေါက်လာပုံ ဖြစ်သည်။ ၎င်းတို့၏ အနှစ်သာရကို ကြည့်လျှင် ၎င်းတို့ထဲမှ တစ်ဦးတစ်ယောက်မျှ ဘုရားသခင် တည်ရှိသည်ကိုလည်းကောင်း၊ သူ၏ နှုတ်ကပတ်တော်များသည် သမ္မာတရား ဖြစ်သည်ကိုလည်းကောင်း၊ သူသည် အရာခပ်သိမ်းအပေါ် အချုပ်အခြာအာဏာ ကိုင်စွဲသည်ကိုလည်းကောင်း မယုံကြည်ကြောင်းကို မြင်တွေ့နိုင်သည်။ ၎င်းတို့သည် ဘုရားသခင်၏ အမြင်တွင် မယုံကြည်သူများ ဖြစ်ကြသည်။ ကိုယ်တော်သည် ၎င်းတို့ကို အရေးမစိုက်သည့်အပြင် သန့်ရှင်းသော ဝိညာဉ်တော်သည်လည်း ၎င်းတို့အပေါ် အလုပ်လုပ်လိမ့်မည်မဟုတ်ပေ။ သို့ဖြစ်၍ ၎င်းတို့၏ အနှစ်သာရကို အခြေခံ၍ ၎င်းတို့သည် ဘုရားသခင်၏ ကယ်တင်ခြင်းခံရမည့်သူများ မဟုတ်ကြသည့်အပြင် ကိုယ်တော်၏ ကြိုတင်သတ်မှတ်ခြင်း သို့မဟုတ် ရွေးချယ်ခြင်းခံရသူများလည်း သေချာပေါက် မဟုတ်ကြပေ။ ဘုရားသခင်သည် ၎င်းတို့ကို ကယ်တင်နိုင်စရာ အကြောင်းမရှိပေ။ မည်သို့ပင် ကြည့်ရှုသည်ဖြစ်စေ ဤမယုံကြည်သူတို့ထဲမှ တစ်ဦးတစ်ယောက်မျှ ဘုရားသခင် ရွေးချယ်ထားသောလူများ မဟုတ်ကြပေ။ ၎င်းတို့ကို ချက်ချင်း တိကျစွာ ပိုင်းခြားသိမြင်သင့်ပြီး ထို့နောက် ရှင်းလင်းပစ်သင့်သည်။ ၎င်းတို့အား အခြားသူများကို နှောင့်ယှက်လျက် အသင်းတော်၌ ခိုအောင်းနေခွင့် မပြုသင့်ပေ။ ဤမယုံကြည်သူတို့သည် မတူညီသော ရည်ရွယ်ချက်များနှင့် လှုံ့ဆော်မှုများဖြင့် အသင်းတော်ထဲသို့ ခိုးဝင်ကြပြီး သင်တို့သည် အစပိုင်းတွင် ၎င်းတို့ကို ထွင်းဖောက်မြင်နိုင်ခြင်း သို့မဟုတ် ပိုင်းခြားသိမြင်နိုင်ခြင်း ရှိမည်မဟုတ်ပေ။ သို့သော် အချိန်ကြာလာသည်နှင့်အမျှ သင်တို့သည် ၎င်းတို့နှင့် ပို၍ မကြာခဏ အပြန်အလှန်ဆက်ဆံပြီး ၎င်းတို့နှင့် ပို၍ များများ ဆက်ဆံလာသည်နှင့်အမျှ သင်တို့သည် ၎င်းတို့ကို ပို၍ပို၍ နားလည်လာကြလိမ့်မည်ဖြစ်ပြီး ၎င်းတို့သည် မယုံကြည်သူများဖြစ်ကြောင်းကို ညွှန်ပြသော အမျိုးမျိုးသော သရုပ်သကန်များကို သင်တို့ ပို၍ပို၍ ရှင်းလင်းစွာ မြင်တွေ့လာကြလိမ့်မည်။ ထိုအခါ ဘုရားသခင်၏ နှုတ်ကပတ်တော်များကို အခြေခံ၍ ၎င်းတို့ကို ပိုင်းခြားသိမြင်ရန် ပို၍ လွယ်ကူသည် မဟုတ်လော။ (ဟုတ်ပါသည်။) ဘုရားသခင် ရွေးချယ်ထားသောလူများအားလုံးက မယုံကြည်သူများကို ပိုင်းခြားသိမြင်နိုင်ပါက ၎င်းတို့ကို ထုတ်ဖော်ပြီး ရှင်းလင်းပစ်ရန် အချိန်တန်ပြီ ဖြစ်သည်။ ၎င်းတို့၏ ကိုယ်ကျင့်စရိုက်၊ ၎င်းတို့၏ လူမှုအဆင့်အတန်း သို့မဟုတ် အသင်းတော်၌ ၎င်းတို့၏ ဝါရင့်မှု မည်မျှပင် ကြီးမားသည်ဖြစ်စေ တရားဒေသနာများကို နှစ်ပေါင်းများစွာ နားထောင်ပြီးနောက် ၎င်းတို့သည် သမ္မာတရားကို လက်မခံနိုင်သေးဘဲ ဘုရားသခင်နှင့်ပတ်သက်၍ အယူအဆများဖြင့် ပြည့်နေပါက ၎င်းတို့သည် မယုံကြည်သူများအဖြစ် ထုတ်ဖော်ခြင်းခံရပြီး ဖြစ်သည်။ ဘုရားသခင်ကို ယုံကြည်ခြင်းရှိ ၎င်းတို့၏ ရည်ရွယ်ချက်များနှင့် သရုပ်သကန်များကို သုံးသပ်ကြည့်လျှင် ၎င်းတို့သည် ရှင်းလင်းပစ်သင့်သော သို့မဟုတ် နှင်ထုတ်သင့်သောသူများ ဖြစ်သည်မှာ သံသယဖြစ်ဖွယ်မရှိပေ။ ဤသည်မှာ အသင်းတော်တစ်ခုက ကာလတိုင်း၌ လုပ်ဆောင်ရမည့် ဖယ်ရှားခြင်းအလုပ် ဖြစ်သည်။

ဘုရားသခင်ကို ယုံကြည်ခြင်းအတွက် ရည်ရွယ်ချက်ဟူသော အကြောင်းအရာသည် အချက်ရှစ်ချက်ကို ဆွေးနွေးခဲ့သည်၊ ဆိုလိုသည်မှာ လူအမျိုးအစား ရှစ်မျိုးရှိသည်၊ ၎င်းတို့၏ သရုပ်သကန်များသည် ငါတို့က အမျိုးမျိုးသော ဆိုးယုတ်သောလူစားမျိုးများကို ပိုင်းခြားသိမြင်ပြီးနောက် ၎င်းတို့အား တိကျမှန်ကန်သော စရိုက်လက္ခဏာ သရုပ်ဖော်ခြင်းများ ပြုလုပ်ကာ ထိုနှင့်အညီ ကိုင်တွယ်ရန်အတွက် လုံလောက်သည်ဟူ၍ ဖြစ်လေသည်။ အတိုချုပ်အနေဖြင့် ဤလူအမျိုးအစား ရှစ်မျိုးသည် အသင်းတော်၌ ဆက်လက်နေထိုင်၍မရပေ။ အချို့က “ဤလူအမျိုးအစား ရှစ်မျိုးမှ တစ်မျိုးစီတိုင်းသည် အပြုအမူတစ်မျိုးတည်းကိုသာ ပြသကြသလော” ဟု မေးကောင်းမေးနိုင်ကြသည်။ ထိုသို့ဖြစ်ချင်မှ ဖြစ်ပေမည်၊ ဘုရားသခင်ကို အချို့လူများ၏ ယုံကြည်ခြင်းအတွက် ရည်ရွယ်ချက်တွင် အချက်လေးချက် သို့မဟုတ် ငါးချက် ပါဝင်သည်၊ ၎င်းတို့သည် ခိုလှုံရာ ရှာဖွေသည်၊ အသင်းတော်ကို မှီခိုကပ်ရပ်သည်၊ အခွင့်အရေးသမားဖြစ်ရန် ကြိုးပမ်းသည်၊ နိုင်ငံရေး ရည်မှန်းချက်များ လိုက်စားသည်၊ အခြားသူများကို လက်လွတ်စပယ် သွေးဆောင်ဖြားယောင်းရန် အသင်းတော်ထဲသို့ ခိုးဝင်လျက် ဆန့်ကျင်ဘက်လိင်ကို ရှာဖွေကြသည်။ ဘုရားသခင်ကို အချို့လူများ၏ ယုံကြည်ခြင်းအတွက် ရည်ရွယ်ချက်တွင် အချက်နှစ်ချက် ပါဝင်နိုင်သည်၊ တစ်ခုမှာ အသင်းတော်၌ အရာရှိတစ်ဦး ဖြစ်လာရန် ကြိုးပမ်းခြင်းဖြစ်ပြီး နောက်တစ်ခုမှာ အခွင့်အရေးသမား ဖြစ်ခြင်းမှတစ်ဆင့် ကောင်းချီးများကို ရှာဖွေခြင်း ဖြစ်သည်၊ သို့မဟုတ် အချို့သည် ဆန့်ကျင်ဘက်လိင်ကို ရှာဖွေသည့်အပြင် အသင်းတော်ကို မှီခိုကပ်ရပ်ကြပေမည်။ ဤလူတို့သည် အခွင့်ကောင်းယူရန် ဘုရားအိမ်တော်သို့ လာကြသည်မှာ သိသာထင်ရှား၏၊ ၎င်းတို့အတွက် ကိစ္စရပ်များကို ပြီးမြောက်အောင် ကူညီလုပ်ဆောင်ပေးရန်၊ ၎င်းတို့အတွက် အားထုတ်ပေးရန် ဘုရားအိမ်တော် သို့မဟုတ် ညီအစ်ကိုမောင်နှမများကို အသုံးချဖို့ ရည်ရွယ်ကြသည်၊ မိမိတို့၏ ရည်ရွယ်ချက်များကို ဖြစ်မြောက်အောင်မြင်စေရန်နှင့် မိမိတို့၏ ဆန္ဒများကို ဖြည့်ဆည်းရန်အလို့ငှာ ၎င်းတို့သည် ညီအစ်ကိုမောင်နှမများက ၎င်းတို့ကို အစေခံစေရန် ဖြစ်နိုင်သမျှ နည်းလမ်းမျိုးစုံကို အသုံးပြုကြသည်။ အတိုချုပ်အနေဖြင့် အသင်းတော်ထဲသို့ ခိုးဝင်ခဲ့ပြီး ရှင်းလင်းပစ်သင့်သော သို့မဟုတ် နှင်ထုတ်သင့်သော ဤမယုံကြည်သူများနှင့် အခွင့်အရေးသမားများ၏ ဘုရားအိမ်တော်သို့ လာရောက်ခြင်းအတွက် သိသာထင်ရှားသော ရည်ရွယ်ချက်မှာ မိမိတို့၏ ကိုယ်ကျိုးအတွက် အခမဲ့စားသောက်ရန်နှင့် အခြေအနေကို အခွင့်ကောင်းယူရန် ဖြစ်သည်။ ၎င်းတို့၏ အပြောအဆိုတွင်ဖြစ်စေ၊ အပြုအမူများတွင်ဖြစ်စေ ၎င်းတို့၏ ရည်ရွယ်ချက်ကို အမြဲတစေ မထင်မရှား ပိုင်းခြားသိမြင်နိုင်သည်။ ဤလူတို့သည် သမ္မာတရားကို လုံးဝလက်မခံကြသကဲ့သို့ သမ္မာတရားကိုလည်း စိတ်ဝင်စားမှုမရှိကြပေ၊ တစ်ခါတစ်ရံတွင် ၎င်းတို့သည် ရွံရှာစက်ဆုပ်ခြင်း သို့မဟုတ် အတိုက်အခံလုပ်ခြင်း စိတ်အခြေအနေများနှင့် သဘောထားများကိုပင် ပြသကြသည်။ အသင်းတော်က ၎င်းတို့အတွက် မည်သည့်တာဝန်ကိုပင် စီစဉ်ပေးသည်ဖြစ်စေ ၎င်းတို့အတွက် အကျိုးရှိမှသာလျှင် အင်တင်တင်ဖြင့် ပူးပေါင်းဆောင်ရွက်ကြသည်။ ၎င်းတို့အတွက် အကျိုးမရှိပါက စိတ်ထဲမှ အတိုက်အခံလုပ်ကြပြီး အပျက်သဘောဆောင်ခြင်းနှင့် ဘာသိဘာသာနေခြင်း၊ ရွံရှာစက်ဆုပ်ခြင်း သို့မဟုတ် ငြင်းပယ်ခြင်းကိုပင် ပြသကြသည်။ အကျိုးရှိမှသာလျှင် အလုပ်အနည်းငယ်ကို လုပ်ဆောင်ကြသည်၊ အကျိုးမရှိပါက ရှောင်တိမ်းကြသည် သို့မဟုတ် ဘာသိဘာသာဖြင့် ဝတ်ကျေတမ်းကျေ လုပ်ကြသည်။ အလုပ်၏ အရေးကြီးသော အခိုက်အတန့်များတွင် ၎င်းတို့သည် တူတူပုန်းတမ်း ကစားကြပြီး ပျောက်ကွယ်သွားကာ အသင်းတော်၏အလုပ်ကို လျစ်လျူရှုကြသည်။ ဤသရုပ်သကန်များမှ ကြည့်လျှင် ဘုရားသခင်ကို ၎င်းတို့၏ ယုံကြည်ခြင်းသည် အခမဲ့ စားသောက်ရန်သက်သက်သာဖြစ်ကြောင်း သိသာထင်ရှားသည်၊ ၎င်းတို့ကို အစေခံရန် အသုံးပြုခြင်းသည်ပင် ကောင်းကျိုးထက် ဆိုးကျိုးက ပိုများလေသည်။

(၉) အသင်းတော်ကို စောင့်ကြည့်စစ်ဆေးရန်

ယနေ့တွင် ငါတို့သည် ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်ဟူသော အကြောင်းအရာအပေါ် နောက်ဆုံးအချက်ကို မိတ်သဟာယဖွဲ့ကြမည်။ အထက်တွင် ဖော်ပြခဲ့သော အချက်ရှစ်ချက်အပြင် ဘုရားသခင်ကို ယုံကြည်ခြင်း၌ ရည်ရွယ်ချက်နှင့် ကြံရွယ်ချက်တို့ တရားနည်းလမ်းမကျသော နောက်ထပ် လူအမျိုးအစားတစ်မျိုး ရှိသေးသည်။ အကျိုးကျေးဇူးများ၏ လှုံ့ဆော်မှုသက်သက်သာခံရပြီး ကျော်ကြားမှု၊ အကျိုးအမြတ်နှင့် အဆင့်အတန်းတို့ကို လိုက်စားရန် အစွမ်းကုန်ကြိုးစားကြသည့် အထက်တွင် ဖော်ပြခဲ့သောသူတို့နှင့် ၎င်းတို့ကို မည်သည့်အရာက ကွဲပြားစေသနည်း။ ဤလူအမျိုးအစားသည် အရာရှိတစ်ဦး ဖြစ်လာရန်ဖြစ်စေ၊ အဆင့်အတန်း သို့မဟုတ် မြဲမြံသောအစားစာရန် လက်မှတ်အတွက်ဖြစ်စေ၊ ၎င်းတို့၏ အသက်တာများကို ပို၍ အဆင်ပြေစေရန်ဖြစ်စေ စသည်တို့အတွက် အသင်းတော်ထဲသို့ ဝင်ရောက်လာခြင်းမဟုတ်ပေ၊ ၎င်းတို့တွင် သာမန်လူများအတွက် သတိပြုမိရန် ခက်ခဲသော ရည်ရွယ်ချက်တစ်ခု ရှိသည်။ ဤရည်ရွယ်ချက်မှာ အဘယ်နည်း။ ယင်းမှာ အသင်းတော်ကို စောင့်ကြည့်စစ်ဆေးပြီး ထိန်းချုပ်ရန် ဖြစ်သည်။ အသင်းတော်ကို စောင့်ကြည့်စစ်ဆေးခြင်းသည် ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်ဟူသော အကြောင်းအရာ၌ နဝမမြောက်အချက် ဖြစ်သည်။ ဤလူတို့သည် အသင်းတော်၏ ဖွံ့ဖြိုးတိုးတက်မှု လမ်းကြောင်းကို ထိန်းချုပ်ရန် ရည်ရွယ်လျက် အသင်းတော်ကို စောင့်ကြည့်စစ်ဆေးဖို့ တာဝန်တစ်ခုဖြင့် အသင်းတော်ထဲသို့ ဝင်ရောက်လာကြသည်။ ၎င်းတို့ကို စေလွှတ်သူများ၊ ၎င်းတို့၏ ကြီးကြပ်ရေးမှူးများ သို့မဟုတ် အထက်လူကြီးများသည် အစိုးရ၊ အချို့သော ဘာသာရေးအုပ်စု သို့မဟုတ် လူ့အဖွဲ့အစည်းရှိ အဖွဲ့အစည်းတစ်ခုခုကို ကိုယ်စားပြုနိုင်ပေသည်။ ၎င်းတို့သည် အသင်းတော်နှင့် မရင်းနှီးသောကြောင့်၊ သိချင်စိတ်ပြင်းပြမှုဖြင့် ပြည့်နေသောကြောင့်၊ အသင်းတော်၏ ပေါ်ပေါက်လာမှု၊ ဖွဲ့စည်းမှုနှင့် တည်ရှိမှုတို့အပေါ် စိတ်မသက်မသာပင် ဖြစ်နေသောကြောင့် ၎င်းတို့တွင် အသင်းတော်ကို နက်နက်နဲနဲ သိကျွမ်းရန်၊ အသင်းတော်၏ ဖွဲ့စည်းပုံ၊ ယင်း၏အလုပ်နှင့် အမျိုးမျိုးသော အခြေအနေများအကြောင်းကို လေ့လာရန် ကြံရွယ်ချက်ရှိသည်။ သို့ဖြစ်၍ အချို့လူများသည် စောင့်ကြည့်စစ်ဆေးခြင်းအလုပ်ကို ဆောင်ရွက်ရန် အသင်းတော်သို့ စေလွှတ်ခြင်းခံရသည်။ အသင်းတော်ကို စောင့်ကြည့်စစ်ဆေးခြင်းအလုပ်ကို လုပ်ဆောင်သောသူတို့သည် အစိုးရမှဖြစ်စေ၊ ဘာသာရေးအုပ်စုများမှဖြစ်စေ၊ မည်သည့်လူမှုရေးအဖွဲ့အစည်းမှ လာကြသည်ဖြစ်စေ ဘုရားသခင်ကို ယုံကြည်ခြင်း၌ ၎င်းတို့၏ ရည်ရွယ်ချက်သည် စစ်မှန်သော ညီအစ်ကိုမောင်နှမများ၏ ရည်ရွယ်ချက်နှင့် လုံးဝ ကွဲပြားခြားနားသည်။ ၎င်းတို့သည် ဘုရားသခင်၏ ကယ်တင်ခြင်းကို လက်ခံရန် ဤနေရာသို့ ရောက်ရှိလာကြခြင်းမဟုတ်ပေ၊ ၎င်းတို့သည် ဘုရားသခင်ကို ယုံကြည်ပြီး အသိအမှတ်ပြုခြင်းကို အခြေခံ၍ ဘုရားသခင်၏ နှုတ်ကပတ်တော်များ၊ သမ္မာတရားနှင့် ဘုရားသခင်၏ ကယ်တင်ခြင်းကို လက်ခံရန် ရောက်ရှိလာခဲ့ကြခြင်း မဟုတ်ပေ။ ဘုရားသခင်ကို ၎င်းတို့၏ ယုံကြည်ခြင်းသည် နိုင်ငံရေး ရည်မှန်းချက်များ သို့မဟုတ် မည်သည့်အဖွဲ့အစည်းကမဆို ပေးအပ်သော တာဝန်တစ်ခုနှင့်အတူ ပါလာသည်။ သို့ဖြစ်၍ အသင်းတော်ကို စောင့်ကြည့်စစ်ဆေးခြင်းသည် အသင်းတော်ထဲသို့ ခိုးဝင်ပြီး ဘုရားသခင်ကို ယုံကြည်ခြင်းအတွက် ၎င်းတို့၏ ရည်ရွယ်ချက် ဖြစ်သကဲ့သို့ ၎င်းတို့၏ ကြီးကြပ်ရေးမှူးများက ပေးအပ်သော တာဝန်တစ်ခုလည်း ဖြစ်သည်၊ ယင်းမှာ ၎င်းတို့၏ လစာကို ရရှိရန် လုပ်ဆောင်သော အလုပ်တစ်ခု ဖြစ်သည်။

အသင်းတော်ကို စောင့်ကြည့်စစ်ဆေးရန် ခိုးဝင်လာသောသူတို့အတွက် ၎င်းတို့ စောင့်ကြည့်စစ်ဆေးသည့်အရာမှာ အဘယ်နည်း။ ၎င်းတို့သည် အသင်းတော်၏ သွန်သင်ချက်များ၊ ယင်း၏ ရည်မှန်းချက်များ၊ ယင်းထောက်ခံအားပေးသည့်အရာ၊ ယင်းက လုပ်ဆောင်သည့်အလုပ်နှင့် ယင်း၏ အသင်းသားများ၏ အတွေးအခေါ်များနှင့် အမြင်များကဲ့သို့သော ကဏ္ဍများစွာကို စောင့်ကြည့်စစ်ဆေးပြီး ယင်းက အစိုးရ၊ ဘာသာတရားများ သို့မဟုတ် လူ့အဖွဲ့အစည်းအပေါ် ထိခိုက်မှုတစ်ခုတလေ ရှိမရှိကို အကဲဖြတ်ကြသည်။ ၎င်းတို့သည် အပြောအဆိုပိုင်းတွင် လူမှုရေးကို ဆန့်ကျင်သော၊ အစိုးရကို ဆန့်ကျင်သော သို့မဟုတ် နိုင်ငံတော်ကို ဆန့်ကျင်သော ပြောဆိုချက်များ တစ်စုံတစ်ရာ ရှိမရှိကို စစ်ဆေးကြသည်။ သွန်သင်ချက်များပိုင်းတွင် ၎င်းတို့သည် အသင်းတော်က ထောက်ခံအားပေးသော အတွေးအခေါ်များမှာ အတိအကျအားဖြင့် မည်သည့်အရာများဖြစ်သည်ကို စောင့်ကြည့်စစ်ဆေးကြသည်။ ဤလူပုဂ္ဂိုလ်တို့သည် အသင်းတော်ထဲသို့ ခိုးဝင်လာသည့်အခါ သင်တို့အနေဖြင့် ၎င်းတို့ကို ပိုင်းခြားသိမြင်ရန် မလွယ်ကူနိုင်ပေ၊ အကြောင်းမှာ ၎င်းတို့သည် စုဝေးပွဲများအတွင်း မမှေးစက်ဘဲ ဂရုတစိုက် နားထောင်ပြီး အလေးအနက်ထား မှတ်စုများ ရေးမှတ်နိုင်သောကြောင့် ဖြစ်သည်။ ၎င်းတို့သည် စုဝေးပွဲတစ်ခုစီတိုင်းတွင် အမျိုးမျိုးသော လူပုဂ္ဂိုလ်တို့၏ ပြောဆိုချက်များကို လေးလေးနက်နက် အကျဉ်းချုပ်ဖော်ပြနိုင်ပြီး နောက်ဆုံးတွင် မည်သည့်အရာများက နိုင်ငံတော်အစိုးရ၏ အကျိုးစီးပွားများနှင့် သတ်မှတ်ချက်များနှင့် ကိုက်ညီသည်ကိုလည်းကောင်း၊ မည်သည့်အရာများက နိုင်ငံတော်၏ အုပ်ချုပ်ရေးအတွက် အန္တရာယ်ရှိသည်ကိုလည်းကောင်း၊ အစိုးရနှင့် ဆန့်ကျင်ဘက်ဖြစ်သည် စသည်တို့ကိုလည်းကောင်း သိရှိရန် အမျိုးမျိုးသောလူတို့၏ ကွဲပြားသော အတွေးအခေါ်များနှင့် အမြင်များကို အကျဉ်းချုပ်ကာ အမျိုးအစားခွဲခြားပေမည်။ ၎င်းတို့သည် အသင်းသားများ၏ ဤနက်ရှိုင်းစွာ အမြစ်တွယ်နေသော ရှုမြင်ပုံများကို စေ့စေ့စပ်စပ် အကျဉ်းချုပ်ပြီး အမျိုးအစားခွဲခြားကာ မှတ်တမ်းများ ထားရှိပေမည်။ ၎င်းတို့သည် အဘယ်ကြောင့် ဤသို့ပြုလုပ်ကြသနည်း။ အကြောင်းမှာ ယင်းသည် ၎င်းတို့၏အလုပ်၊ ၎င်းတို့၏ တာဝန်ဖြစ်သောကြောင့် ဖြစ်သည်၊ ၎င်းတို့သည် မိမိတို့၏ ကြီးကြပ်ရေးမှူးများထံ အစီရင်ခံရမည်။ ဤသည်မှာ ၎င်းတို့အလုပ်၏ ပထမပိုင်းဖြစ်သည်။ အသင်းတော်၏ သွန်သင်ချက်များနှင့် ၎င်း၏ အသင်းသားအားလုံး၏ အတွေးအခေါ်ပိုင်းဆိုင်ရာ လားရာများကို သဘောပေါက်ရန် ဖြစ်သည်။ ဤလားရာများတွင် လူ့အဖွဲ့အစည်း သို့မဟုတ် နိုင်ငံတော်အတွက် အန္တရာယ်ရှိသော အချက်အလက်များ ပါဝင်သည်ဟု ၎င်းတို့ ယုံကြည်သည်နှင့်တစ်ပြိုင်နက် သို့မဟုတ် အချို့သော အစွန်းရောက် အတွေးအခေါ်များနှင့် ရှုမြင်ပုံများ ပေါ်ပေါက်လာသည်ဟု ၎င်းတို့ ယုံကြည်ပါက သင့်လျော်သော အစီအမံများ ပြုလုပ်နိုင်ရန် ဤအကြောင်းကို မိမိတို့၏ အထက်လူကြီးများထံ ချက်ချင်း အစီရင်ခံပြီး ပြောပြကြလိမ့်မည်။ ၎င်းတို့ ဦးစွာ နားလည်ရန် ရည်ရွယ်သည့်အရာမှာ အသင်းတော်၏ သွန်သင်ချက်များဖြစ်သည်။ ဤသည်မှာ အသင်းတော်ကို စောင့်ကြည့်စစ်ဆေးရာတွင် ၎င်းတို့၏ အဓိကအလုပ်များထဲမှ တစ်ခုဖြစ်ပြီး ထို့နောက်တွင် အသင်းတော်၏ လူပုဂ္ဂိုလ်ဆိုင်ရာ အခြေအနေနှင့်ပတ်သက်သော သတင်းအချက်အလက်များ ဖြစ်သည်။ ဥပမာအားဖြင့် ၎င်းတို့သည် အသင်းတော်၏ အကြီးတန်း ခေါင်းဆောင်များမှာ မည်သူတို့ဖြစ်သည်ကို သတင်းအချက်အလက်များ စုဆောင်းကြသည်၊ ယင်းတွင် ၎င်းတို့၏ နေထိုင်ရာလိပ်စာများ၊ အသက်အရွယ်များ၊ ရုပ်ရည်သွင်ပြင်များ၊ ပညာရေးအဆင့်အတန်းများ၊ စိတ်ဝင်စားမှုများနှင့် ဝါသနာများ၊ ကျန်းမာရေးအခြေအနေများ၊ နေ့စဉ်အသက်တာတွင် ၎င်းတို့ ပြောဆိုသည့်အရာ၊ ၎င်းတို့ သွားရောက်သည့်နေရာ၊ ၎င်းတို့ လုပ်ဆောင်သည့်အလုပ်အပြင် ၎င်းတို့၏ နေ့စဉ်အလုပ်ချိန်များနှင့် အလုပ်အကြောင်းအရာများ ပါဝင်သည်။ ၎င်းတို့သည် ဤခေါင်းဆောင်များက အစိုးရကို ဆန့်ကျင်သော၊ ဘာသာတရားများကို ဆန့်ကျင်သော သို့မဟုတ် လူမှုရေးရေစီးကြောင်းများကို ဆန့်ကျင်သော ပြောဆိုချက်များ တစ်စုံတစ်ရာ ပြုလုပ်ခဲ့ခြင်း သို့မဟုတ် လုပ်ဆောင်ချက်များ တစ်စုံတစ်ရာ လုပ်ဆောင်ခဲ့ခြင်း ရှိမရှိအပြင် နိုင်ငံတော်၏ အုပ်ချုပ်ရေးစနစ်နှင့် လက်ရှိ နိုင်ငံရေး ဖြစ်ပေါ်တိုးတက်မှုများအပေါ် ဤခေါင်းဆောင်များ၏ တုံ့ပြန်မှုများ စသည်တို့ကိုလည်း ကြည့်ရှုကြသည်။ ဤအရာအားလုံးသည် အသင်းတော်ကို စောင့်ကြည့်စစ်ဆေးသောသူတို့ သဘောပေါက်ရန် ရည်ရွယ်သည့် ကဏ္ဍများ ဖြစ်ကြသည်။ ထို့အပြင် ၎င်းတို့သည် အသင်းတော်၏ ဖွဲ့စည်းပုံနှင့် စီမံအုပ်ချုပ်ရေးဆိုင်ရာ ဖွဲ့စည်းပုံများကိုလည်း စဉ်ဆက်မပြတ် အာရုံစိုက်ကြသည်။ ဥပမာအားဖြင့် ၎င်းတို့သည် အသင်းတော်ရှိ ခေါင်းဆောင်များနှင့် အမှုဆောင်များမှာ မည်သူတို့ဖြစ်သည်၊ မည်သည့်အဆင့်ရှိ ခေါင်းဆောင်များ ဖြုတ်ချခံခဲ့ရသည်၊ ၎င်းတို့ ဖြုတ်ချခံရပြီးနောက် ၎င်းတို့အတွက် မည်သို့သော စီစဉ်မှုများ ပြုလုပ်ခဲ့သည်၊ မည်သည့်ခေါင်းဆောင်များ အဖမ်းခံခဲ့ရသည်၊ ထို့နောက် ၎င်းတို့၏အလုပ်ကို မည်သူက ဆက်ခံခဲ့သည်တို့ကို မှတ်တမ်းတင်ထားကြသည်။ ၎င်းတို့သည် ဆက်ခံသူ၏ အသက်၊ လိင်၊ ဘုရားသခင်ကို မည်မျှနှစ်ကြာ ယုံကြည်ခဲ့သည်၊ ၎င်းတို့၏ ပညာရေးအဆင့်အတန်းများ၊ ပြီးလျှင် ၎င်းတို့သည် ပင်ကိုစွမ်းရည်ရှိသော တက္ကသိုလ်ဘွဲ့ရများဖြစ်ပါက ၎င်းတို့သည် နိုင်ငံ သို့မဟုတ် လူ့အဖွဲ့အစည်းအပေါ် မည်သည့် အပျက်လက္ခဏာဆောင်သော သက်ရောက်မှုများ ရှိမရှိနှင့် ၎င်းတို့ကို အစိုးရဌာနများတွင် အလုပ်လုပ်ရန် ခေါ်ယူစုဆောင်းနိုင်ချေရှိမရှိ စသည့် အခြားသော တိကျသည့် သတင်းအချက်အလက်များကိုလည်း စုဆောင်းကြသည်။ ၎င်းတို့သည် မည်သည့်အသင်းတော်ခေါင်းဆောင်များက အတိအကျ ရာထူး၌ အလုပ်စခြင်း သို့မဟုတ် ဖြုတ်ချခံရခြင်းကိုပင် သိရှိလိုကြသည်။ ဆိုလိုသည်မှာ အလုပ်လုပ်သည့်သူများ၏ အခြေအနေ၊ သတ်သတ်မှတ်မှတ်ဖြစ်သော စီမံအုပ်ချုပ်ရေးဆိုင်ရာအလုပ်နှင့် အသင်းတော်၏ ဖွဲ့စည်းပုံတို့အားလုံးသည် ၎င်းတို့ ရင်းနှီးကျွမ်းဝင်ရန် ရည်ရွယ်သည့် ကဏ္ဍများ ဖြစ်ကြသည်။ ထို့အပြင် ၎င်းတို့သည် အသင်းတော်၌ အလုပ်ကဏ္ဍ မည်မျှရှိသည်၊ အဖွဲ့မည်မျှရှိသည်၊ အဖွဲ့တစ်ခုစီ၏ ကြီးကြပ်ရေးမှူးများ၏ အသေးစိတ်အချက်အလက်များ စသည်တို့နှင့်ပတ်သက်သည့် သတင်းအချက်အလက်များကို အပြည့်အဝ သဘောပေါက်ရန် ရည်ရွယ်ကြသည်။ ၎င်းတို့သည် လျှောက်မေးမြန်းခြင်း၊ စောင့်ကြည့်လေ့လာခြင်းနှင့် သင်ယူခြင်းတို့ကို ပြုလုပ်ကြပြီး ၎င်းတို့၏အလုပ်ကို အလွန်အသေးစိတ်ကျစွာ ဆောင်ရွက်ကြသည်။ အသင်းတော်ထဲသို့ ခိုးဝင်လာသော ဤအမျိုးအစားဝင်လူတို့ လုပ်ဆောင်ရမည့်အလုပ်နှင့် ပြီးမြောက်အောင်မြင်ရမည့် တာဝန်မှာ အသင်းတော်ကို စောင့်ကြည့်စစ်ဆေးခြင်းဟူသော ရည်ရွယ်ချက်ကို အောင်မြင်စေရန် အသင်းတော်၏ အခြေအနေနှင့် ၎င်း၏ အမျိုးမျိုးသော ဖြစ်ပေါ်တိုးတက်မှုများ၏ ကဏ္ဍအားလုံးကို ချက်ချင်း သဘောပေါက်ရန် ဖြစ်သည်။ ဤသည်တွင် ဥပမာအားဖြင့် အသင်းတော်သည် ပင်လယ်ရပ်ခြားတွင် မည်သို့ဖွံ့ဖြိုးတိုးတက်နေသည်၊ ဧဝံဂေလိတရားသည် နိုင်ငံမည်မျှသို့ ဖြန့်ဝေခဲ့ပြီးဖြစ်သည်၊ မည်သည့်နိုင်ငံများတွင် အသင်းတော်များ တည်ထောင်ပြီးဖြစ်သည်တို့ ပါဝင်သည်။ ၎င်းတို့သည် ဤအသေးစိတ်အချက်အလက်အားလုံးကို သဘောပေါက်ရန် လိုအပ်သည်။ ဤသည်တို့မှာ အသင်းတော်ကို စောင့်ကြည့်စစ်ဆေးရာတွင် ၎င်းတို့ လုပ်ဆောင်သော အဓိကတာဝန်များ ဖြစ်ကြသည်။ ပထမမှာ အသင်းတော်၏ သွန်သင်ချက်များကို သဘောပေါက်ရန်၊ ဒုတိယမှာ အသင်းတော်၏ အလုပ်လုပ်သည့်လူများ၏ အခြေအနေကို သဘောပေါက်ရန်၊ တတိယမှာ အသင်းတော်အလုပ်၏ အခြေအနေနှင့် ယင်း၏ လတ်တလော အဓိကကျသော လှုပ်ရှားမှုများကို သဘောပေါက်ရန် ဖြစ်သည်။ ၎င်းတို့သည် စာတန်တည်းဟူသော အဆင်းနီသော နဂါးကြီး၏ ကြံရာပါများနှင့် လက်ပါးစေများအဖြစ် လုံးဝ ပြုမူဆောင်ရွက်ကြသည်၊ ၎င်းတို့သည် စာတန်၏ အစေခံများ စင်စစ်ဖြစ်ကြသည်။

အသင်းတော်ကို စောင့်ကြည့်စစ်ဆေးသော ဤအမျိုးအစားဝင်လူတို့သည် အသင်းတော်၏ သွန်သင်ချက်များ၊ လူပုဂ္ဂိုလ်ဆိုင်ရာ၊ အလုပ်၏ လားရာများ၊ အသင်းတော်၏ အတိုင်းအတာအပြင် အခြားကဏ္ဍများနှင့် သက်ဆိုင်သော သတင်းအချက်အလက်များကို သဘောပေါက်ရန် ရည်ရွယ်ချက်ဖြင့် အသင်းတော်ထဲသို့ ခိုးဝင်ကြသည်။ ၎င်းတို့သည် ဤကဏ္ဍတစ်ခုစီတိုင်းကို သဘောပေါက်ရန် ရည်ရွယ်ပြီးနောက် ၎င်းတို့၏ ကြီးကြပ်ရေးမှူးများထံ အစီရင်ခံကြသည်၊ ထိုသူတို့သည် အခြေအနေအရ အသင်းတော်ကို ကိုင်တွယ်ဖြေရှင်းရန် သက်ဆိုင်ရာ မူဝါဒအစီအစဉ်များ သို့မဟုတ် အစီအမံများကို အချိန်မရွေး ရေးဆွဲနိုင်ပေသည်။ အတိုချုပ်အားဖြင့် အသင်းတော်ကို စောင့်ကြည့်စစ်ဆေးရာတွင် ၎င်းတို့၏ ရည်ရွယ်ချက်သည် လုံးဝ ရည်ရွယ်ချက်ကောင်းဖြင့် မဟုတ်ပေ။ သို့မဟုတ်ပါက ၎င်းတို့အား ဥစ္စာဓနကိုဖြစ်စေ၊ အကျိုးကျေးဇူးကိုဖြစ်စေ မဆောင်ကြဉ်းပေးသည်ကိုထောက်သော် ၎င်းတို့သည် အသင်းတော်ကို အဘယ်ကြောင့် ဆက်လက် စောင့်ကြည့်စစ်ဆေးမည်နည်း။ ယင်းမှာ ၎င်းတို့သည် အသင်းတော် တည်ရှိမှုနှင့်ပတ်သက်၍ စိတ်မသက်မသာ ဖြစ်သောကြောင့် မဟုတ်လော။ ၎င်းတို့သည် ဘုရားသခင် တည်ထောင်ပြီး ဦးဆောင်သော အသင်းတော်၌ နိုင်ငံတော်၊ လူ့အဖွဲ့အစည်း သို့မဟုတ် နိုင်ငံရေးအုပ်စုများ၊ အဖွဲ့အစည်းများနှင့် မည်သည့်ဆက်ဆံရေးမျှမရှိဘဲ ဘုရားသခင်ကို သန့်စင်စွာ ယုံကြည်သောလူများ ပါဝင်သည်ကို မယုံကြည်ကြပေ။ သို့သော် ၎င်းတို့သည် အသင်းတော်ကို မည်သို့ပင် စုံစမ်းသည်ဖြစ်စေ စိတ်မသက်မသာ ဖြစ်နေဆဲဖြစ်သည်။ အဘယ်ကြောင့်နည်း။ အကြောင်းမှာ ၎င်းတို့သည် ဘုရားမဲ့ဝါဒီများဖြစ်ကြပြီး ဘုရားသခင်ကို အသိအမှတ်မပြုသည့်အပြင် သမ္မာတရားကိုလည်း မုန်းတီးသောကြောင့် ဖြစ်သည်။ သို့ဖြစ်၍ ၎င်းတို့သည် ယုံကြည်သူတို့ကို ဖိနှိပ်ခြင်းနှင့် ဖမ်းဆီးခြင်းအပြင် အသင်းတော်ကို စောင့်ကြည့်စစ်ဆေးခြင်းကဲ့သို့သော မိုက်မဲပြီး အဓိပ္ပာယ်မဲ့သော လုပ်ရပ်များကို လုပ်ဆောင်နိုင်စွမ်းရှိကြသည်။ ၎င်းတို့သည် အသင်းတော်ကို စောင့်ကြည့်စစ်ဆေးခြင်းနှင့် ဆန့်ကျင်တားဆီးခြင်း အစီအမံများကို အဘယ်ကြောင့် ကျင့်သုံးကြသနည်း။ အကြောင်းမှာ ၎င်းတို့၏ အကြီးမားဆုံးသော စိုးရိမ်ပူပန်မှုမှာ အသင်းတော်သည် အလွန်ကြီးမားလာပြီး အသင်းသားများ အလွန်များပြားလာခြင်းက နိုင်ငံ၊ အစိုးရနှင့် လူ့အဖွဲ့အစည်းအပေါ် သိသာထင်ရှားသော သက်ရောက်မှုတစ်ခု ရှိလာမည်ဖြစ်ပြီး ရိုးရာယဉ်ကျေးမှုများနှင့် ရိုးရာဘာသာရေးအုပ်စုများကိုပင် ခြိမ်းခြောက်ကာ ဩဇာလွှမ်းမိုးလာမည်ဖြစ်သောကြောင့် ဖြစ်သည်။ ဤသည်မှာ အသင်းတော်ကို ၎င်းတို့၏ စောင့်ကြည့်စစ်ဆေးခြင်းနှင့် အတိုက်အခံလုပ်ခြင်းတို့၏ နောက်ကွယ်ရှိ စစ်မှန်သော အကြောင်းရင်း ဖြစ်သည်။ သို့ဖြစ်၍ ၎င်းတို့သည် အသင်းတော်ကို စောင့်ကြည့်စစ်ဆေးခြင်းနှင့် ဆန့်ကျင်တားဆီးခြင်းကို အကောင်အထည်ဖော်ရမည့် နိုင်ငံရေးဆိုင်ရာ တာဝန်တစ်ခုအဖြစ် သဘောထားကြသည်။

အသင်းတော်ကို စောင့်ကြည့်စစ်ဆေးသော ဤအမျိုးအစားဝင်လူတို့ကို အသင်းတော်အတွင်း၌ ပိုင်းခြားသိမြင်ရန် မလွယ်ကူနိုင်ပေ၊ အကြောင်းမှာ ၎င်းတို့တွင် မသမာသော ရည်ရွယ်ချက်များရှိပြီး အခြားသူများက ၎င်းတို့ကို သတိမပြုမိနိုင်ရန် မိမိတို့ကိုယ်ကို နက်ရှိုင်းစွာ ဖုံးကွယ်ထားသောကြောင့် ဖြစ်သည်။ သို့ဖြစ်၍ ၎င်းတို့သည် အသင်းတော်၌ အများစုနှင့်အတူ လိုက်ပါလုပ်ဆောင်နိုင်ပြီး မည်သည့်ထူးခြားမှုမျှမရှိဘဲ အထူးသဖြင့် အကျင့်ကောင်းသူများအဖြစ် ပေါ်လာကာ အသင်းတော်က လုပ်ဆောင်သော အလုပ်နှင့်ပတ်သက်၍ မည်သည့်သဘောထားကွဲလွဲသော အမြင်များကိုမျှ မည်သည့်အခါမျှ ဖော်ပြခြင်းမရှိပေ။ သို့သော် ဤလူပုဂ္ဂိုလ်တို့တွင် ထူးခြားသည့် လက္ခဏာရပ်တစ်ခု ရှိသည်။ ၎င်းတို့သည် ဘုရားသခင်ကို ယုံကြည်ခြင်းအပေါ် မပူမအေး ဖြစ်ကြသည်၊ ယင်းနှင့်ပတ်သက်၍ အလွန်တက်ကြွခြင်းလည်းမရှိ၊ အလွန်ဘာသိဘာသာနေခြင်းလည်း မရှိပေ။ ၎င်းတို့အား ပေးအပ်သော တာဝန်များအနက် အနည်းငယ်ကို လုပ်ဆောင်နိုင်ကြသော်လည်း ၎င်းတို့ အလုပ်လုပ်သည့်နေရာ၊ ၎င်းတို့၏ မိသားစုအခြေအနေ သို့မဟုတ် ၎င်းတို့သည် ယခင်က ဘုရားသခင်ကို ယုံကြည်ခဲ့ဖူးခြင်း ရှိမရှိကဲ့သို့သော ၎င်းတို့၏ ပုဂ္ဂိုလ်ရေးအသေးစိတ်အချက်အလက်များကို မည်သည့်အခါမျှ မထုတ်ဖော်ကြပေ။ တစ်စုံတစ်ဦးက အစိုးရဌာနတစ်ခုတွင် အလုပ်လုပ်ခြင်းအကြောင်းကို ထုတ်ပြောပါက ၎င်းတို့သည် အစိုးရအပေါ်ဖြစ်စေ၊ နိုင်ငံရေးအပေါ်ဖြစ်စေ၊ မူဝါဒများအပေါ်ဖြစ်စေ၊ ဘာသာတရားအပေါ်ဖြစ်စေ ထင်မြင်ချက် တစ်ခုတလေ ပေးခြင်းကို ရှောင်ရှားလျက် အလွန် ရှောင်တိမ်းတတ်ကြသည်။ ၎င်းတို့၏ အပြုအမူသည် မည်သည့် ထိလွယ်ရှလွယ်အကြောင်းအရာများကိုမဆို ရှောင်ရှားသဖြင့် ထူးခြားသည်၊ ၎င်းတို့သည် အစိုးရကို ဝေဖန်ခြင်းလည်းမရှိ၊ ချီးမွမ်းခြင်းလည်းမရှိသကဲ့သို့ ၎င်း၏ မူဝါဒများ သို့မဟုတ် အုပ်ချုပ်ရေးစနစ်ကိုလည်း ဆွေးနွေးခြင်းမရှိပေ။ တစ်စုံတစ်ဦးက လူပုဂ္ဂိုလ်တစ်ဦးသည် သူလျှိုဖြစ်ကြောင်းကို ထောက်ပြသည့်အခါ ၎င်းတို့သည် သိသိသာသာ စိတ်လှုပ်ရှားလာပြီး မိမိတို့ကိုယ်ကို ခုခံကာကွယ်ရန် လျင်မြန်စွာ ထရပ်ကောင်းပင် ထရပ်ပေမည်။ စိုးရိမ်ပူပန်ခြင်းအပြင် သင်တို့သည် ထိုသို့သော ထိလွယ်ရှလွယ် အကြောင်းအရာများကို ရှောင်ရှားလိုသည့် သဘောထားတစ်ခုကိုလည်း ၎င်းတို့၏ အကြည့်မှ သတိပြုမိနိုင်သည်၊ ၎င်းတို့သည် မိမိတို့ကို ထွင်းဖောက်မြင်နိုင်သော မည်သူ့ကိုမဆို ရှောင်ရှားကြသည်။ ထို့အပြင် ၎င်းတို့သည် မသိသောရင်းမြစ်များမှ ဖုန်းခေါ်ဆိုမှုများကို မကြာခဏ လက်ခံရရှိတတ်သည် သို့မဟုတ် အသင်းတော်နှင့် မသက်ဆိုင်သော လျှို့ဝှက်ဆန်းကြယ်သည့် လူပုဂ္ဂိုလ်များ၏ ဆက်သွယ်ခြင်းနှင့် အပြန်အလှန် ဆက်ဆံခြင်းကို ခံရတတ်ပြီး ဤဖုန်းခေါ်ဆိုမှုများထဲမှ တစ်ခုကို ဖြေဆိုသည်နှင့်တစ်ပြိုင်နက် ၎င်းတို့သည် အခြားသူများနှင့် ခပ်ဝေးဝေးသို့ သွားကြသည်။ တစ်စုံတစ်ဦးက ဤအခိုက်အတန့်များအတွင်း ၎င်းတို့ကို မြင်တွေ့မိပါက ၎င်းတို့သည် သိသိသာသာ အလွန်အမင်း ပျာယာခတ်သွားပြီး မျက်နှာနီမြန်းလာကာ မိမိတို့၏ ပင်ကိုလက္ခဏာ ဖော်ထုတ်ခံရမည်ကို ကြောက်ရွံ့လျက် အလွန်အမင်း မသက်မသာဖြစ်နေပုံ ပေါက်သည်။ အသင်းတော်နှင့်ပတ်သက်သော သတင်းအချက်အလက်များကို တိတ်တဆိတ် စုဆောင်းခြင်းအပြင် ၎င်းတို့က “သင်သည် ဘုရားသခင်ကို နှစ်မည်မျှကြာအောင် ယုံကြည်ခဲ့ပြီးပြီနည်း။ သင်၏ မိဘများ ယုံကြည်သလော။ သင်၏ မိသားစုဝင်များသည် ပြည်မကြီးတွင် ရှိသလော။ ပြည်မကြီးရှိ သင်၏ မိသားစုဝင်များထဲမှ မည်သူတို့က ဘုရားသခင်ကို ယုံကြည်သနည်း၊ နှစ်မည်မျှကြာပြီနည်း။ ၎င်းတို့ အသက်မည်မျှရှိပြီနည်း။ သင်တို့၏ ဒေသခံအသင်းတော်တွင် လူမည်မျှရှိသနည်း။ ၎င်းတို့ ယခု မည်သို့နေကြသနည်း” ကဲ့သို့သော မေးခွန်းများကို မေးမြန်းလျက် ညီအစ်ကိုမောင်နှမများနှင့်ပတ်သက်သည့် အခြေအနေကို အခါအားလျော်စွာ စုံစမ်းကြသည်။ အခါအားလျော်စွာ ၎င်းတို့သည် လူတို့ ထုတ်ဖော်ပြောရန် မလိုလားသော ထိလွယ်ရှလွယ်နှင့် ပုဂ္ဂိုလ်ရေးဆိုင်ရာ သတင်းအချက်အလက်များကို ရှာဖွေကြသည်။ ယေဘုယျအားဖြင့် ညီအစ်ကိုမောင်နှမများကြား အပြန်အလှန်ဆက်ဆံရာတွင် တစ်စုံတစ်ဦးက မျှဝေရန် မလိုလားပါက မည်သူမျှ ထိလွယ်ရှလွယ် ပုဂ္ဂိုလ်ရေးဆိုင်ရာ သတင်းအချက်အလက်များကို တမင်တကာ သို့မဟုတ် တက်ကြွစွာ မေးမြန်းခြင်းမရှိပေ။ သို့သော် ဤလူပုဂ္ဂိုလ်သည် ထိုသို့သောကိစ္စရပ်များကို အထူးအာရုံစိုက်ပြီး အချို့သော ခေါင်းဆောင်များနှင့် အမှုဆောင်များ သို့မဟုတ် အရေးကြီးသောအလုပ်ကို တာဝန်ယူသောလူတို့၏ လှုပ်ရှားမှုများကို ခြေရာခံခြင်း၊ ဤလူတို့၏ ကွန်ပျူတာများနှင့် လက်ကိုင်ဖုန်းများပေါ်ရှိ အချက်အလက်များ သို့မဟုတ် ၎င်းတို့၏ လိပ်စာအချက်အလက်များကို ရယူရန် ကြိုးစားခြင်း၊ ဤအသေးစိတ်အချက်အလက်များကို စေ့စေ့စပ်စပ် စုံစမ်းစစ်ဆေးရန် အခိုင်အမာ တောင်းဆိုခြင်းတို့ကိုပင် ပြုလုပ်သည်။ အကယ်၍ ခေါင်းဆောင်တစ်ဦးသည် စုဝေးပွဲသို့ မတက်ရောက်သည်ကို ၎င်းတို့ သတိပြုမိပါက “မည်သူမည်ဝါက ယနေ့ စုဝေးပွဲကို မတက်ပါ။ သူတို့ မည်သည့်အရာ လုပ်ဆောင်နေသနည်း” ဟု မေးကြလိမ့်မည်။ တစ်စုံတစ်ဦးက ၎င်းတို့ အလုပ်များနေသည်ဟု ဖော်ပြပါက ၎င်းတို့က “မည်သည့်အရာဖြင့် အလုပ်များနေသနည်း။ သူတို့သည် ထိုယုံကြည်သူအသစ်များအား ထပ်၍ ရေလောင်းပေးနေသလော။ ထိုယုံကြည်သူအသစ်များက မည်သူများနည်း။ သူတို့သည် မည်သည့်အချိန်မှ စတင်၍ ယုံကြည်ခဲ့ကြသနည်း။ ကျွန်ုပ်သည် အဘယ်ကြောင့် မသိရသနည်း” ဟု ထပ်မံစုံစမ်းကြလိမ့်မည်။ ၎င်းတို့သည် ပို၍နက်ရှိုင်းစွာ တူးဆွကြသည်။ ညီအစ်ကိုမောင်နှမများက “ကျွန်ုပ်တို့ မသိသင့်လျှင် မမေးလေနှင့်။ အဘယ်ကြောင့် ဆက်၍ မေးနေသနည်း။ ဤသည်မှာ အသက်ဝင်ရောက်မှုအကြောင်း မဟုတ်၊ သမ္မာတရားနှင့် မပတ်သက်၊ သိဖို့မလို” ဟု ပြောဆိုကြသည်။ ထိုအခါ ခိုးဝင်လာသူက “သို့သော်လည်း ဤသည်တို့မှာ ဘုရားအိမ်တော်၏ ကိစ္စများဖြစ်သည်၊ အသင်းတော်၏ အလုပ်ဖြစ်သည်၊ ကျွန်ုပ်တို့ အဘယ့်ကြောင့် သိ၍မရနိုင်ရသနည်း။ ကျွန်ုပ်တို့အားလုံး ဘုရားသခင်ကို ယုံကြည်ကြခြင်းဖြစ်သည်။ သိထား၍ မထိခိုက်သွားပါ။ သင်တို့ မသိလိုလျှင် အသင်းတော်၏ အလုပ် သို့မဟုတ် အသင်းတော်ခေါင်းဆောင်များကို ဂရုမစိုက်ခြင်းဖြစ်သည်ဟု ဆိုလိုသည်။ ခေါင်းဆောင်က အတိအကျ မည်သည့်သူနှင့် သွားတွေ့ခဲ့သနည်း။ ယုံကြည်သူအသစ်ဦးရေ မည်မျှရှိသနည်း။ သူတို့ မည်သည့်နေရာတွင်ရှိသနည်း။ ကျွန်ုပ်လည်း သူတို့ကို တွေ့လိုသည်” ဟု ပြန်ပြောသည်။ ၎င်းတို့သည် ဤကိစ္စရပ်များကို အမြဲ စုံစမ်းနေကြသည်။

အသင်းတော်ကို စောင့်ကြည့်စစ်ဆေးသူတို့ အလေးအနက်ထားဆုံးသော နောက်ထပ်အလုပ်တစ်ခု ရှိသေးသည်၊ ယင်းမှာ အသင်းတော်၏ ဘဏ္ဍာရေးအခြေအနေကို သိရှိနားလည်ရန် ဖြစ်သည်။ တစ်ဖက်တွင် ၎င်းတို့သည် အသင်းတော်၏ ဘဏ္ဍာငွေ ရင်းမြစ်များကို နားလည်ရန် ကြိုးပမ်းကြသည်။ အသင်းတော်သည် စက်ရုံများ သို့မဟုတ် စီးပွားရေးလုပ်ငန်းများ တည်ထောင်ထားခြင်း ရှိမရှိ၊ အလုပ်သမားများကို မဝရေစာပေးပြီး ခိုင်းသည့်လုပ်ငန်းများ ပိုင်ဆိုင်ခြင်း ရှိမရှိ၊ ကလေးအလုပ်သမားများ အသုံးပြုခြင်း ရှိမရှိနှင့် အသင်းတော်၏ အမျိုးမျိုးသော အလုပ်ကဏ္ဍများတွင် စွန့်စားမှုပြုရသည့် အကျိုးအမြတ်ရှိသော စီးပွားရေးလုပ်ငန်းများ ပါဝင်ခြင်း ရှိမရှိတို့ကို ၎င်းတို့ သိလိုကြသည်။ ဥပမာအားဖြင့် အသင်းတော်၏ ဗီဒီယိုများ၊ ရုပ်ရှင်များ၊ ဓမ္မသီချင်းများနှင့် ဘုရားသခင်၏ နှုတ်ကပတ်တော်စာအုပ်များ ပုံနှိပ်ထုတ်ဝေခြင်းသည် အကျိုးအမြတ် ရရှိခြင်း ရှိမရှိ သို့မဟုတ် အလွန်အကျွံ အကျိုးအမြတ်များ ဖြစ်ပေါ်စေခြင်း ရှိမရှိ၊ အသင်းတော်၏ ဘဏ္ဍာငွေ ရင်းမြစ်များမှာ အဘယ်အရာများဖြစ်သည်၊ အသင်းတော်ကို ထောက်ပံ့ရန် လှူဒါန်းနေသည့် ချမ်းသာကြွယ်ဝသော လူပုဂ္ဂိုလ်များ ရှိမရှိ၊ ဤလူပုဂ္ဂိုလ်များတွင် နိုင်ငံရေး အထက်တန်းလွှာများ သို့မဟုတ် သန်းကြွယ်သူဌေးများနှင့် ဘီလီယံနာသူဌေးများ ပါဝင်ခြင်း ရှိမရှိ၊ ဤသည်တို့မှာ ၎င်းတို့ သိရှိနားလည်လိုသော အသေးစိတ်အချက်များ ဖြစ်ကြသည်။ အသင်းတော်၏ အုပ်ချုပ်ရေးဆိုင်ရာ ဖွဲ့စည်းပုံများနှင့် ဘဏ္ဍာငွေ ရင်းမြစ်များကို ရှာဖွေဖော်ထုတ်ခြင်းအပြင် ၎င်းတို့သည် အသင်းတော်၏ ဘဏ္ဍာငွေများကို ထိန်းသိမ်းစောင့်ရှောက်မှုကိုလည်း သိရှိနားလည်ရန် ရည်ရွယ်ကြပြီး ၎င်းတို့၏ ရည်မှန်းချက်မှာ ဤရန်ပုံငွေများ၏ ဦးတည်ချက်ကို ခြေရာခံရန် ဖြစ်သည်။ အသင်းတော်သည် မိမိ၏ငွေကို မည်သို့သုံးစွဲသည်၊ တရားမဝင်သော လှုပ်ရှားမှု တစ်ခုခုတွင် ပါဝင်ခြင်း ရှိမရှိ၊ အာဏာရှင်အစိုးရများကို ပူးတွဲဆန့်ကျင်ရန်နှင့် လူ့အခွင့်အရေးများကို ထိန်းသိမ်းရန် လူမှုရေး အထက်လွှာများကို စုစည်းခြင်း သို့မဟုတ် အမျိုးမျိုးသော လူမှုရေးအဖွဲ့အစည်းများ၊ အုပ်စုများနှင့် ပူးပေါင်းဆောင်ရွက်ခြင်း ရှိမရှိ စသည့် ဤသည်တို့မှာလည်း ၎င်းတို့ သိရှိနားလည်ရန် ရည်ရွယ်သည့် အရေးကြီးသော အခြေအနေအချို့ ဖြစ်ကြသည်။ အချို့လူများက “အသင်းတော်ကို စောင့်ကြည့်စစ်ဆေးသည့်အလုပ်ကို အဆင်းနီသော နဂါးကြီး၏ နိုင်ငံကသာ တာဝန်ယူလုပ်ဆောင်ခြင်း ဖြစ်သလော” ဟု မေးခွန်းထုတ်ကြသည်။ ဤပြောဆိုချက်သည် တိကျမှန်ကန်သလော။ အမှန်တွင် တစ်လောကလုံးနှင့် လူ့အဖွဲ့အစည်းတစ်ခုလုံးသည် ဘုရားသခင်ကို အတိုက်အခံလုပ်ကြသည်။ အာဏာရှင်အုပ်ချုပ်မှုအောက်ရှိ နိုင်ငံများသာ ဘုရားသခင်ကို အတိုက်အခံလုပ်ကြသည်မဟုတ်၊ ခရစ်ယာန်နိုင်ငံများဟုခေါ်သော နိုင်ငံများ၌ပင် အာဏာရှိသူအများစုသည် ဘုရားမဲ့ဝါဒီများနှင့် ဘာသာတရားမရှိသူများ ဖြစ်ကြပြီး ယုံကြည်ခြင်းရှိသော သို့မဟုတ် ခရစ်ယာန်ဘာသာကို ယုံကြည်ကြောင်း ထုတ်ဖော်ပြောဆိုသော အာဏာရှိသူများထဲ၌ပင် သမ္မာတရားကို လက်ခံနိုင်သောသူတို့၏ အရေအတွက်မှာ လူနည်းစုသာ ဖြစ်သည်။ လူအများစုသည် သမ္မာတရားကို အသိအမှတ်မပြုကြသည့်အပြင် လက်ခံရန်မှာ သာ၍ပင် ဝေးသေးသည်။ သို့ဆိုလျှင် ဤလူတို့သည် ဘုရားသခင်ကို ယုံကြည်သည့်တိုင် ကိုယ်တော်ကို အတိုက်အခံလုပ်သူများ မဟုတ်ကြလော။ ဥပမာအားဖြင့် ခရစ်ယာန်ဘာသာ၊ ကက်သလစ်ဘာသာနှင့် အစ္စရေးနိုင်ငံရှိ ဂျူးဘာသာကဲ့သို့သော ဘာသာတရားများတွင် အထက်တန်းလွှာများသည် သမ္မာတရားကို လက်ခံသောလူများဖြင့် ဖွဲ့စည်းထားသလော။ လုံးဝမဟုတ်ပေ။ ၎င်းတို့ထဲမှ တစ်ဦးတစ်ယောက်မျှ ဘုရားသခင်၏ အမှုတော်ကို စုံစမ်းစစ်ဆေးရန် မလာကြပေ၊ တစ်ဦးတစ်ယောက်မျှ သမ္မာတရားကို လက်မခံနိုင်ပေ။ တိတိကျကျပြောရလျှင် ၎င်းတို့အားလုံးသည် မယုံကြည်သူများ ဖြစ်ကြသည်၊ ၎င်းတို့အားလုံးသည် ဘုရားသခင်ကို အတိုက်အခံလုပ်ကြပြီး အန္တိခရစ်များ ဖြစ်ကြသည်။ ၎င်းတို့သည် ဘုရားသခင်၏ အမှုတော်ကို နှောင့်ယှက်ပြီး ဖျက်လိုဖျက်ဆီး လုပ်သည့်အပြင် ဘုရားသခင်နောက်သို့ လိုက်သောသူတို့ကို လူမဆန်စွာ နှိပ်ကွပ်ပြီး ညှဉ်းပန်းနှိပ်စက်ကြသည်၊ ဤအချက်ကို နောက်ဆုံးသောကာလ၌ ဘုရားသခင်၏ အမှုတော်အပေါ် ၎င်းတို့၏ ဆက်ဆံပုံအားဖြင့် သက်သေပြပြီးဖြစ်သည်။ မည်သည့်ဂိုဏ်းဂဏက မိမိ၏ယုံကြည်သူများကို မှန်သော လမ်းခရီးကို လွတ်လပ်စွာ စုံစမ်းစစ်ဆေးရန်၊ အပြင်မှ တရားဟောသူများကို နားထောင်ရန် သို့မဟုတ် သူစိမ်းများကို လက်ခံတွေ့ဆုံရန် ခွင့်ပြုသနည်း။ တစ်ခုတစ်လေမျှ ဤသို့ပြုလုပ်နိုင်ခြင်းမရှိပေ။ မည်သည့်လူမျိုး သို့မဟုတ် မည်သည့်နိုင်ငံက အသင်းတော်အပေါ် ဖော်ရွေသနည်း။ (မည်သည့်လူမျိုး၊ နိုင်ငံမျှ မဖော်ရွေပါ။) ၎င်းတို့က သင့်ကို ဘာသာရေးလွတ်လပ်ခွင့် အနည်းငယ်နှင့် နားနားနေနေ နေထိုင်ခွင့်တစ်ခုခု ပေးလျှင် ချီးကျူးထိုက်လှပေပြီ။ ဤမျှသာမက သင်သည် ၎င်းတို့က သင့်ကို ထောက်ပံ့ရန် မျှော်လင့်နေကြသေးသလော။ ဘုရားသခင်၏ အသင်းတော် ပေါ်ထွန်းလာသည့်အခါ သို့မဟုတ် အသင်းတော်က စတင်၍ ဧဝံဂေလိတရားဟောသည့်အခါ ဘုရားသခင် တည်ရှိခြင်းကို လုံးဝမယုံကြည်သော ဤလူတို့နှင့် ဘုရားသခင် ဖော်ပြသော သမ္မာတရားများအပေါ် အထူးစက်ဆုပ်ရွံရှာခြင်းနှင့် မုန်းတီးခြင်းကို ခံစားရသော ဤလူတို့သည် အထူးအလုပ်တစ်ခုကို လုပ်ဆောင်ကြသည်၊ ယင်းမှာ အသင်းတော်ကို အနီးကပ် စောင့်ကြည့်စစ်ဆေးရန် လူပုဂ္ဂိုလ်များကို တာဝန်ပေးခြင်း ဖြစ်သည်။ ဤနေရာ၌ “စောင့်ကြည့်စစ်ဆေးသည်” ဆိုသည်မှာ ထောက်လှမ်းစောင့်ကြည့်ခြင်း၊ သိရှိနားလည်ပြီး ထိန်းချုပ်ခြင်းကို ဆိုလိုသည်၊ ဆိုလိုသည်မှာ အချိန်ကာလတိုင်း၌ အသင်းတော်၏ ကဏ္ဍအားလုံးကို မျက်ခြည်မပြတ် ထောက်လှမ်းစောင့်ကြည့်ခြင်း၊ သိရှိနားလည်ခြင်းနှင့် ထိန်းချုပ်ခြင်း ဖြစ်သည်။ အချို့လူများက “၎င်းတို့သည် ဘုရားသခင်၏ အမှုတော်ကို လူသိရှင်ကြား ပြစ်တင်ရှုတ်ချခြင်း သို့မဟုတ် ဆန့်ကျင်ခြင်း မပြုခဲ့ကြသကဲ့သို့ ကျွန်ုပ်တို့၏ ဒေသခံအသက်တာ၌လည်း ညှဉ်းပန်းနှိပ်စက်ခြင်း သို့မဟုတ် နှောင့်ယှက်ခြင်းကို ကျွန်ုပ်တို့ မခံစားခဲ့ကြရပါ။ နိုင်ငံရပ်ခြားတွင် ဘုရားသခင်ကို ယုံကြည်ခြင်း၊ စုဝေးခြင်း၊ ကျွန်ုပ်တို့၏ တာဝန်ကို ထမ်းဆောင်ခြင်းနှင့် ဧဝံဂေလိတရားကို ဖြန့်ဝေခြင်းသည် အဆင်းနီသော နဂါးကြီး၏ နိုင်ငံ၌ထက် များစွာ ပို၍ကောင်းမွန်ပြီး ပို၍လုံခြုံသည်ဟု ကျွန်ုပ်တို့ ခံစားရပါသည်။ ကျွန်ုပ်တို့သည် မည်သည့်ကြားဝင်နှောင့်ယှက်မှုကိုမျှ မကြုံတွေ့ခဲ့ရပါ” ဟု ပြောဆိုကြသည်။ ကြားဝင်နှောင့်ယှက်မှု မရှိခဲ့ရုံဖြင့်လည်းကောင်း၊ လွတ်လပ်မှုအချို့ကို သင်တို့အား ပေးသနားခဲ့ရုံဖြင့်လည်းကောင်း အသင်းတော်ကို စောင့်ကြည့်စစ်ဆေးသည့် ၎င်းတို့၏အလုပ်ကို သင်မငြင်းပယ်သင့်ပေ။ သင့်အား ပေးထားသော ဘာသာရေးလွတ်လပ်ခွင့် အနည်းငယ်သည် အခြေခံ လူမှုရေးဆိုင်ရာ စနစ်တစ်ခုသာ ဖြစ်သည်၊ သင် မွေ့လျော်ခံစားနေရသည့်အရာမှာ သင်နေထိုင်သော နိုင်ငံရှိ မည်သည့်နိုင်ငံသားမဆို၏ အခြေခံ အခွင့်အရေးများမျှသာ ဖြစ်သည်။ ဤအခြေခံအခွင့်အရေးများကို ခံစားခြင်းသည် နိုင်ငံတော်အစိုးရ၊ လူမှုရေးအဖွဲ့အစည်းများ သို့မဟုတ် ဘာသာရေးလောကက ဘုရားသခင်၏ အမှုတော်နှင့် အသင်းတော်၏ အလုပ်ကို လက်ခံပြီး အသိအမှတ် ပြုခဲ့ပြီးဖြစ်ကြောင်းဖြစ်စေ၊ မိတ်ဖြစ်ဆွေဖြစ် ဖြစ်လာခဲ့ပြီးဖြစ်ကြောင်းဖြစ်စေ၊ ရန်လိုမုန်းတီးမှုနှင့် စောင့်ကြည့်စစ်ဆေးမှုတို့ မရှိတော့ကြောင်းကိုဖြစ်စေ မဆိုလိုပေ။ ယင်းမှာ မမှန်ကန်သလော။ (မှန်ကန်ပါသည်။) ဤကိစ္စသည် စိတ်ကူးသက်သက်သာ မဟုတ်ချေ၊ ဟုတ်သလော။ (မဟုတ်ပါ။)

စာတန်ဆန်သော အစိုးရစနစ်များ၏ ရန်လိုမုန်းတီးမှုနှင့် စောင့်ကြည့်စစ်ဆေးမှုအပေါ် ငါတို့၏ သဘောထားသည် မည်သို့ဖြစ်သင့်သနည်း။ ငါတို့သည် ယင်းကို ငြင်းပယ်ပြီး ရှောင်ရှားသင့်သလော သို့မဟုတ် ရိုးရှင်းစွာ လျစ်လျူရှုသင့်သလော။ ပထမဦးစွာ ဤအရာကို စဉ်းစားကြည့်လော့၊ အသင်းတော်သည် မိမိလုပ်ဆောင်သော အလုပ်တစ်ခုခုကို ၎င်းတို့ စောင့်ကြည့်စစ်ဆေးမည်ကို ကြောက်ရွံ့သလော။ (မကြောက်ရွံ့ပါ။) ငါတို့တွင် လျှို့ဝှက်သော လှုပ်ရှားမှုများ တစ်ခုခု ရှိသလော။ ငါတို့သည် နိုင်ငံတော်ကို ဆန့်ကျင်သော သို့မဟုတ် အစိုးရကို ဆန့်ကျင်သော နိုင်ငံရေးဆိုင်ရာ စကားတစ်ခွန်းခွန်းကို ပြောဆိုသလော။ (မပြောဆိုပါ။) ဤအချက်ကို အတည်ပြုနိုင်သည်။ ဘုရားသခင်ကို ယုံကြည်ခြင်းသည် နိုင်ငံရေးတွင် ပါဝင်ခြင်းနှင့် လုံးဝမသက်ဆိုင်ပေ။ သင်တို့အများစုသည် ဘုရားသခင်ကို သုံးနှစ်ကျော် ယုံကြည်ခဲ့ကြပြီးဖြစ်သည်၊ အချို့ဆိုလျှင် နှစ်နှစ်ဆယ် သို့မဟုတ် သုံးဆယ်ပင် ယုံကြည်ခဲ့ကြပြီးဖြစ်သည်။ ဤမျှနှစ်များတစ်လျှောက် တရားဒေသနာများကို နားထောင်ခဲ့ရာတွင် အသင်းတော်က နိုင်ငံတော်ကို ဆန့်ကျင်သော သို့မဟုတ် လူ့အဖွဲ့အစည်းကို ဆန့်ကျင်သော ပြောဆိုချက်များ ပြုလုပ်သည်ကို တစ်စုံတစ်ဦး တွေ့ရှိခဲ့ဖူးသလော။ (မတွေ့ရှိခဲ့ဖူးပါ။) စိုးစဉ်းမျှပင် မရှိပါ၊ ဘုရားအိမ်တော်သည် နိုင်ငံရေးကို မည်သည့်အခါမျှ မဆွေးနွေးပေ။ ထို့အပြင် အနန္တတန်ခိုးရှင် ဘုရားသခင် အသင်းတော်သည် ဘုရားသခင်က တည်ထောင်ထားခြင်းဖြစ်သည်၊ ယင်းသည် မြေကြီးပေါ်ရှိ ဘုရားသခင်၏ နိုင်ငံတော်ကို ကြိုတင်မြည်းစမ်းခြင်းဖြစ်သည်၊ မည်သည့်လူပုဂ္ဂိုလ်ကမျှ ဖွဲ့စည်းထားသော အဖွဲ့အစည်းမဟုတ်၊ မည်သည့်လူတစ်ဦးတစ်ယောက်ကမျှ တည်ထောင်ထားခြင်း မဟုတ်ပေ။ သို့ဆိုလျှင် ဘုရားသခင်က အသင်းတော်ကို တည်ထောင်၍ လုပ်ဆောင်စေသည့်အလုပ်မှာ အဘယ်နည်း။ ယင်းမှာ လူမှုရေးကို ဆန့်ကျင်သော၊ ဘာသာရေးကို ဆန့်ကျင်သော သို့မဟုတ် နိုင်ငံရေးကို ဆန့်ကျင်သော အလုပ်တွင် ပါဝင်ဆောင်ရွက်ရန် မဟုတ်ပေ။ သို့ဆိုလျှင် အသင်းတော်၏အလုပ်မှာ အဘယ်နည်း။ ပထမဦးစွာ ယင်း၏ အဓိကအလုပ်မှာ နောက်ဆုံးသောကာလ၌ လူသားမျိုးနွယ်ကို ကယ်တင်ရန် ဘုရားသခင် လူ့ဇာတိခံယူခြင်းနှင့်ဆိုင်သော သတင်းကောင်းကို လူသားမျိုးနွယ်ထံ ဖြန့်ဝေရန်ဖြစ်ပြီး လူသားမျိုးနွယ်က ဘုရားသခင်ထံ လှည့်ပြန်လာပြီး ကိုယ်တော့်ကို ဝတ်ပြုကိုးကွယ်နိုင်ကြစေရန်အလို့ငှာ ဘုရားသခင် ဖော်ပြသော သမ္မာတရားအားလုံးကို လက်ခံစေဖို့ ဖြစ်သည်။ ဒုတိယအချက်မှာ ယင်းတွင် သမ္မာတရားကို တောင့်တသောသူတို့ကို ဘုရားသခင်၏ နှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံရန်နှင့် သန့်စင်ခြင်းခံရရန်၊ နောက်ဆုံးတွင် ကယ်တင်ခြင်းကို ရရှိရန် ဘုရားသခင်ရှေ့မှောက်သို့ ဆောင်ကြဉ်းခြင်း ပါဝင်သည်။ ဤသည်မှာ ဘုရားသခင် တည်ထောင်ထားသည့်အတိုင်း အသင်းတော်က လုပ်ဆောင်သောအလုပ်ဖြစ်ပြီး ယင်းသည် အသင်းတော် တည်ရှိခြင်း၏ အရေးပါမှုနှင့် တန်ဖိုးဖြစ်သည်။ ဤသည်မှာ နိုင်ငံရေး၊ စီးပွားရေး၊ စက်မှုလုပ်ငန်း၊ နည်းပညာ သို့မဟုတ် လူ့အဖွဲ့အစည်း၏ အခြားမည်သည့်ကဏ္ဍနှင့်မျှ မသက်ဆိုင်သည့်အပြင် ဆက်စပ်မှုလည်းမရှိပေ၊ ဤအရာများနှင့် လုံးဝမပတ်သက်ပေ။ သို့ဆိုလျှင် အသင်းတော်အတွင်း၌ ဘုရားသခင်၏ ကယ်တင်ခြင်းအမှုတော်၏ အနှစ်သာရမှာ အဘယ်နည်း။ အရိုးရှင်းဆုံးနှင့် အပြတ်သားဆုံးသော စကားလုံးများဖြင့် ဆိုရလျှင် ယင်းမှာ လူသားမျိုးနွယ်ကို စီမံခန့်ခွဲခြင်း ဖြစ်သည်။ လူသားမျိုးနွယ်ကို စီမံခန့်ခွဲခြင်း၏ တိကျသောအကြောင်းအရာတွင် လူတို့ကို ဘုရားသခင်ရှေ့မှောက်သို့၊ ဘုရားသခင်၏ နှုတ်ကပတ်တော်များ၏ လက်တွေ့ကျမှုထဲသို့ ဆောင်ကြဉ်းခြင်း၊ သန့်စင်ခြင်းခံရရန်နှင့် ကယ်တင်ခြင်းကို ရရှိရန် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို ၎င်းတို့အား လက်ခံစေခြင်းတို့ ပါဝင်သည်။ ဤသည်မှာ လူသားမျိုးနွယ်ကို စီမံခန့်ခွဲခြင်း၏ တိကျသောအလုပ် ဖြစ်သည်။ အသင်းတော်က ပါဝင်ဆောင်ရွက်သော မည်သည့်အလုပ်မဆိုသည် ဘုရားသခင်၏ စီမံခန့်ခွဲမှု၊ ဘုရားသခင်၏ အစီအစဉ်တို့နှင့် သက်ဆိုင်ပြီး ဘုရားသခင် ဖော်ပြသော နှုတ်ကပတ်တော်များနှင့်လည်း သက်ဆိုင်သည်မှာ ပြောစရာမလိုပေ၊ ယင်းသည် လောကီလူတို့ လုပ်ဆောင်သော အမျိုးမျိုးသောအလုပ်များနှင့် မည်သို့မျှ ဆက်စပ်မှုမရှိပေ။ သို့ဖြစ်၍ အသင်းတော်နှင့်ပတ်သက်သော မည်သည့်သတင်းအချက်အလက်မဆိုသည် ယင်း၏ သွန်သင်ချက်များ၊ အလုပ်လုပ်သည့်လူများဆိုင်ရာ၊ အုပ်ချုပ်ရေးဆိုင်ရာ ဖွဲ့စည်းပုံများ၊ ယင်းအလုပ်၏ အခြေအနေ သို့မဟုတ် အသင်းတော်၏ ဘဏ္ဍာရေးအခြေအနေနှင့်ပင် သက်ဆိုင်သည်ဖြစ်စေ မည်သည့်နိုင်ငံ၊ မည်သည့်လူ့အဖွဲ့အစည်း၊ မည်သည့်လူမျိုး၊ မည်သည့်ဘာသာတရား သို့မဟုတ် မည်သည့်လူ့အုပ်စုနှင့်မျှ လုံးဝဆက်စပ်မှုမရှိပေ၊ စိုးစဉ်းမျှပင် ဆက်စပ်မှုမရှိပေ။ သို့ဖြစ်၍ ဤအချက်များကို စိတ်ထဲတွင် ထားရှိလျက် ၎င်းတို့သည် အာဏာရပါတီဖြစ်စေ၊ ဘာသာရေးအုပ်စုများဖြစ်စေ သို့မဟုတ် လူမှုရေးအုပ်စုများဖြစ်စေ အသင်းတော်ကို စောင့်ကြည့်စစ်ဆေးရန် လူများကို စေလွှတ်သည့် ၎င်းတို့၏လုပ်ရပ်သည် လုံးလုံးလျားလျား မည်သည့်အရာနှင့် ညီမျှသနည်း။ (မလိုအပ်သော လုပ်ရပ်တစ်ခု ဖြစ်ပါသည်။) “မလိုအပ်သော လုပ်ရပ်တစ်ခု” သည် နည်းလမ်းတကျ အသုံးအနှုန်းတစ်ခု ဖြစ်သည်။ သာမန်ပြောရိုးစကားမှာ အဘယ်နည်း။ ယင်းမှာ အလုပ်မရှိ အလုပ်ရှာခြင်း ဖြစ်သည်၊ ဟုတ်သလော။ ငါ၏အမြင်တွင် ယင်းမှာ အလုပ်မရှိ အလုပ်ရှာခြင်းပင် ဖြစ်သည်၊ ၎င်းတို့၏ နေ့ရက်များသည် သက်သောင့်သက်သာရှိမှုနှင့် လွယ်ကူမှုတို့ဖြင့် အလွန်အကျွံ ပြည့်နှက်နေသောကြောင့် ၎င်းတို့သည် ဤအလုပ်မရှိသော လူအနည်းငယ်ကို အသင်းတော်အား စောင့်ကြည့်စစ်ဆေးရန် စေလွှတ်ကြပြီး ဤအရာကို နိုင်ငံရေးတာဝန်တစ်ခုအဖြစ်၊ အလေးအနက်ထားရမည့် အလုပ်တစ်ခုအဖြစ်ပင် သဘောထားကြသည်၊ ယင်းမှာ လုံးဝ အဓိပ္ပာယ်မရှိပေ။ ထိုအားထုတ်မှုဖြင့် ပညာရေးဆိုင်ရာ သို့မဟုတ် ပရဟိတအဖွဲ့အစည်းများကို ဖွင့်လှစ်ခြင်းက များစွာ ပို၍ကောင်းပေမည်။ ဤသည်မှာ လုပ်သင့်လုပ်ထိုက်သော အလုပ်များအပေါ် အာရုံမစိုက်ဘဲ အလုပ်မရှိခြင်းသို့ ဦးတည်စေသည့် ဇာတိပကတိဆိုင်ရာ သက်သောင့်သက်သာရှိမှု အလွန်အကျွံရှိခြင်း၏ သာဓကတစ်ခုမျှသာ ဖြစ်သည်။ လူသားမျိုးနွယ်တစ်ရပ်လုံးသာ ဘုရားသခင်၏ အသင်းတော်ကဲ့သို့ ဘုရားသခင် ကိုယ်တိုင် ထိန်းကျောင်းခြင်းနှင့် ဦးဆောင်ခြင်းကို ခံရမည်ဆိုလျှင် ဤလောက၊ ဤလူသားမျိုးနွယ်သည် မလိုအပ်သော အဖွဲ့အစည်းများ၊ အသုံးစရိတ်များနှင့် ဒုက္ခများစွာကို သက်သာစေမည်ဖြစ်သည်။ အနည်းဆုံးအနေဖြင့် သူလျှိုအဖွဲ့အစည်းများနှင့် ရဲဌာနများကဲ့သို့သော အဖွဲ့အစည်းများ၊ ဤလုံခြုံရေးကဏ္ဍများသည် အသုံးဝင်တော့မည်မဟုတ်ဘဲ ဖျက်သိမ်းခြင်းခံရပြီး အခြားအလုပ်များသို့ ပြောင်းလဲတာဝန်ချထားခြင်း ခံရပေမည်။

အသင်းတော်ကို စောင့်ကြည့်စစ်ဆေးရန် တာဝန်ပေးအပ်ခြင်းခံရသော လူပုဂ္ဂိုလ်များသည် အထူးတာဝန်တစ်ခုဖြင့် လာကြခြင်းဖြစ်သည်။ အသင်းတော်ထဲသို့ ခိုးဝင်လာပြီးနောက် ၎င်းတို့၏ အဓိကတာဝန်မှာ ငါတို့ မိတ်သဟာယဖွဲ့ခဲ့ပြီးသော ဤကဏ္ဍအနည်းငယ်ပင် ဖြစ်သည်၊ အသင်းတော်အတွင်းရှိ အခြေခံကျပြီး အရေးကြီးသော အခြေအနေအနည်းငယ်ကို ၎င်းတို့ သိရှိနားလည်ပြီးနောက် မိမိတို့၏ အထက်လူကြီးများထံ ပြန်လည်သတင်းပို့ကြသည်။ ၎င်းတို့၏ အတွေးအခေါ်များ၊ ထင်မြင်ယူဆချက်များ သို့မဟုတ် ၎င်းတို့၏အလုပ်နောက်ကွယ်မှ ရည်ရွယ်ချက်တို့ မည်သို့ပင်ဖြစ်စေ အသင်းတော်အတွင်း ဤစောင့်ကြည့်စစ်ဆေးသူများ ရှိနေခြင်းသည် ညီအစ်ကိုမောင်နှမများကို သတိဝီရိယရှိစေပြီး ၎င်းတို့ကို ဉာဏ်ပညာဖြင့် ကိုင်တွယ်စေရန် စေ့ဆော်သင့်သည်။ ဤလုပ်နည်းကိုင်နည်းသည် မှန်ကန်သလော။ (မှန်ကန်ပါသည်။) သို့ဆိုလျှင် အလွန်အကျွံ ထိတ်လန့်ကြောက်ရွံ့ရန် လိုအပ်သလော။ (မလိုအပ်ပါ။) ထိုသို့သော လူပုဂ္ဂိုလ်များ ပေါ်ပေါက်လာခြင်းကို ငါတို့ မည်သို့ ကိုင်တွယ်သင့်သနည်း။ စည်းမျဉ်းနှစ်ခုရှိသည်၊ အလွန်ရိုးရှင်းပါသည်။ ၎င်းတို့သည် သတင်းအချက်အလက်များကို စုံစမ်းမေးမြန်းပြီး ရှာဖွေလျက် နေရာအနှံ့သွားလာနေပါက ဤအချက်က ၎င်းတို့ကို သူလျှို သို့မဟုတ် ကင်းထောက်တစ်ဦးဖြစ်ကြောင်း ရှင်းလင်းစွာ ဖော်ပြနေသည်။ ထိုသို့သော လူပုဂ္ဂိုလ်များသည် လူ့သဘာဝအားဖြင့် အလွန်ယုတ်မာပြီး မောက်မာကြသည်၊ ၎င်းတို့သည် အသင်းတော်ကို ကြီးမားသော အနှောင့်အယှက်များ ဖြစ်စေသည်။ ၎င်းတို့ ရှိနေခြင်းကပင် လူတို့ကြားတွင် မငြိမ်မသက်မှုကို ဖြစ်စေပြီး ဘုရားသခင်ရှေ့မှောက်သို့ လာခြင်းမှ ၎င်းတို့ကို ဟန့်တားသည်။ စုဝေးပွဲများနှင့် တာဝန်များကို ထမ်းဆောင်ခြင်းတို့သည်လည်း နှောင့်ယှက်ခြင်းနှင့် ထိခိုက်မှုခံရသည့်အပြင် လုံခြုံရေးသည်လည်း ထိပါးခံရသည်။ ထိုသို့သောလူကို မည်သို့ ကိုင်တွယ်သင့်သနည်း။ (သူ့ကို အသင်းတော်မှ ရှင်းလင်းပစ်သင့်ပါသည်။) မှန်ပေသည်၊ ၎င်းတို့သည် အသင်းတော်အသက်တာ သို့မဟုတ် အသင်းတော်၏အလုပ်ကို အနှောင့်အယှက်များ ဖြစ်စေပါက ၎င်းတို့ကို တိုက်ရိုက် ရှင်းလင်းပစ်သင့်သည်။ သို့ဆိုလျှင် ၎င်းတို့ထံမှ ပုန်းရှောင်ရန် သို့မဟုတ် ၎င်းတို့ကို ကြောက်ရွံ့ရန် လိုအပ်သလော။ (မလိုအပ်ပါ။) အချို့လူများသည် နိုင်ငံရပ်ခြားတွင် သူလျှိုများနှင့် ကြုံတွေ့ရသည့်အခါ ပြည်မကြီးတွင် ရဲကို မြင်တွေ့ခဲ့ရသကဲ့သို့ပင် ထိတ်လန့်ပြီး နေရာအနှံ့ ပုန်းရှောင်ကြသည်။ အချို့ညီအစ်ကိုမောင်နှမများသည် အပြင်သို့ အရေးကိစ္စများဖြင့် သွားသောအခါ ၎င်းတို့အား မေးခွန်းများ မေးမြန်းသည့် သူလျှိုများနှင့် ကြုံတွေ့ရပြီး မေးမြန်းသည့်လေသံသည့် ရဲက စစ်စေးမေးမြန်းသကဲ့သို့ မည်မျှခြိမ်းခြောက်ပုံကို ကြားရသောအခါ အလွန်ကြောက်လန့်သွားကြပြီး အရေးကိစ္စများကိုပင် မပြီးမြောက်စေဘဲ ထွက်ပြေးကြသည်။ ငါက “သင်သည် အဘယ်သို့ ဤမျှ သူကြောက်တစ်ဦး ဖြစ်နိုင်ရသနည်း။ အဘယ်ကြောင့် ပြေးရသနည်း။ ကြောက်ရွံ့စရာ အဘယ်အရာရှိသနည်း။ အဆင်းနီသော နဂါးကြီး၏ နိုင်ငံတွင် ညီအစ်ကိုမောင်နှမများစွာတို့သည် ဖမ်းဆီးခြင်းခံခဲ့ရသော်လည်း မကြောက်မရွံ့ ရှိနေခဲ့ကြသည်၊ ၎င်းတို့သည် ယုဒများ ဖြစ်မသွားခဲ့ကြဘဲ မိမိတို့၏ သက်သေခံချက်တွင် ခိုင်မာစွာ ရပ်တည်ခဲ့ကြသည်။ သို့ဆိုလျှင် နိုင်ငံရပ်ခြားသို့ ရောက်ရှိပြီးဖြစ်ပြီးမှ သင်သည် အဘယ်ကြောင့် ဤမျှ ကြောက်ရွံ့နေနိုင်သေးသနည်း။ သင်သည် မည်သည့်ဥပဒေကိုမျှ မချိုးဖောက်ခဲ့ပါ၊ ကြောက်ရွံ့စရာ အဘယ်အရာရှိသနည်း” ဟု ပြောဆိုသည်။ အချို့လူများက “၎င်းတို့သည် ကျွန်ုပ်ထံ အစဉ် ချဉ်းကပ်ရန် ကြိုးစားကြပြီး ကျွန်ုပ်ကို အစဉ် စစ်ဆေးမေးမြန်းကြသည်” ဟု ပြောဆိုကြသည်။ သင်သည် ၎င်းတို့ကို ပြန်၍ မေးခွန်းမထုတ်နိုင်သလော။ သင်က “သင်သည် ကျွန်ုပ်ကို စစ်မေးရန် မည်သည့်အခွင့်အရေး ရှိသနည်း။ ကျွန်ုပ်သည် သင့်ကို သိပါသလော။ သင်သည် မှတ်ပုံတင်စစ်ဆေးနေသော အဆင်းနီသော နဂါးကြီး၏ အရာရှိတစ်ဦးလော။ သင်သည် မည်သူ့ကို ကိုယ်စားပြုသနည်း။ ကျွန်ုပ်ကို ဆက်၍မေးနေပါက သင့်ကို ကျွန်ုပ် တရားစွဲမည်” ဟု ပြောဆိုနိုင်သည်။ ၎င်းတို့ကို ကြောက်ရွံ့ရန် လိုအပ်သလော။ (မလိုအပ်ပါ။) အချို့လူများသည် ထိုသို့သော သူလျှိုများနှင့် ကြုံတွေ့ရသည့်အခါ စကားမပြောရဲဘဲ ကြောက်လန့်တကြားဖြင့် လျင်မြန်စွာ ထွက်ပြေးကြသည်။ အချို့သော နားဝေတိမ်တောင် ဖြစ်သောလူများသည် လုံးဝ ပိုင်းခြားသိမြင်နိုင်ခြင်းမရှိဘဲ ဤစာတန်ဆန်သော သူလျှိုများနှင့် ခိုင်းဖတ်များကို ဧဝံဂေလိတရားဟောရန်ပင် ကြိုးစားကြသည်။ အကြိမ်အနည်းငယ် ကြိုးစားပြီးနောက် ၎င်းတို့က “ဤသူသည် ဘုရားသခင် တည်ရှိသည်ကို ယုံကြည်သောသူတစ်ဦး မဟုတ်။ အဘယ်ကြောင့် သူတို့သည် အဆင်းနီသော နဂါးကြီး၏ အရာရှိတစ်ဦးနှင့် တူနေရသနည်း” ဟု သိရှိနားလည်သွားကြသည်။ တစ်စုံတစ်ခု လွဲချော်နေသည်ဟု ခံစားရသောအခါ ၎င်းတို့သည် လက်လျှော့လိုက်ကြသည်။ နောက်ပိုင်းတွင် ၎င်းတို့က “ဘုရားသခင်သည် ကျွန်ုပ်ကို ကာကွယ်တော်မူနေပါသည်၊ ကျေးဇူးတော်ကြောင့် ကျွန်ုပ်သည် မည်သည့်ကိုယ်ရေးကိုယ်တာ အချက်အလက်ကိုမျှ ၎င်းတို့ထံ မပေါက်ကြားစေခဲ့မိပါ။ စိုးရိမ်စရာ မဟုတ်ခဲ့ပါတကား” ဟု ပြန်လည်စဉ်းစားကြသည်။ ၎င်းတို့သည် အလွန်ကြောက်လန့်သွားကြပြီး နောင်တွင် တွေ့ဆုံသည့် မည်သူ့ကိုမဆို ကြုံရာကျပန်း ဧဝံဂေလိတရားဟောရန် မရဲတော့ပေ။ အမှန်တွင် တရားဟောခြင်းမှတစ်ဆင့် အသင်းတော်ထဲသို့ ခေါ်ဆောင်လာခဲ့သော သူလျှိုများ အမှန်တကယ် ရှိခဲ့ပြီးဖြစ်သည်။ ၎င်းတို့သည် အဆင်းနီသော နဂါးကြီးက အသင်းတော်ထဲသို့ ထည့်သွင်းထားသော ကင်းထောက်များ ဖြစ်ကြသည်၊ ၎င်းတို့ကို စာတန်က တမင်တကာ စီစဉ်ထားခြင်းဖြစ်သည်။ ၎င်းတို့သည် သိုးရေခြုံထားသော ဝံပုလွေများကဲ့သို့ဖြစ်ပြီး ဘုရားသခင်၏ နှုတ်ကပတ်တော်များကို စားသောက်ခြင်း သို့မဟုတ် သမ္မာတရားကို မိတ်သဟာယဖွဲ့ခြင်းမရှိဘဲ အသင်းတော်ထဲသို့ ခိုးဝင်လာကြကာ အသင်းတော်နှင့်ပတ်သက်သော သတင်းအချက်အလက်များကို အစဉ်အမြဲ ချောင်းမြောင်းစုံစမ်းပြီး ကိုယ်ရေးကိုယ်တာ အသေးစိတ် အချက်အလက်များကို စူးစမ်းကြသည်။ ၎င်းတို့၏ အပြုအမူသည် သံသယဖြစ်ဖွယ် ကောင်းကြောင်း သို့မဟုတ် ၎င်းတို့သည် အသင်းတော်အတွင်း အနှောင့်အယှက်များ ဖြစ်စေပြီးဖြစ်ကြောင်း တွေ့ရှိသည်နှင့်တစ်ပြိုင်နက် ၎င်းတို့ကို ချက်ချင်း ရှင်းလင်းပစ်သင့်သည်၊ အဆင်းနီသော နဂါးကြီး၏ ကင်းထောက်များ၊ စာတန်၏ အစေခံများကို အသင်းတော်အား နှောင့်ယှက်ရန် လုံးဝ ခွင့်မပြုသင့်ပေ။ သင်တွေ့ရှိသော တစ်ဦးစီတိုင်းကို ရှင်းလင်းပစ်လော့၊ ၎င်းတို့အား မည်သည့်သက်ညှာမှုမျှ မပြနှင့်။ တစ်စုံတစ်ဦးသည် သူလျှိုတစ်ဦးနှင့် ကောင်းမွန်စွာ ဆက်ဆံပြီး မေးသမျှမေးခွန်းများကို ဖြေကြားလျက် ချစ်ခြင်းမေတ္တာစိတ်ဖြင့် သူလျှိုကို ကြင်နာစွာ ဆက်ဆံလိုစိတ် အစဉ်ရှိကာ သူလျှိုအတွက် ခိုင်းဖတ်တစ်ဦး၏ အခန်းကဏ္ဍမှ ပါဝင်ဆောင်ရွက်ပါက ထိုသို့သော စက်ဆုပ်ဖွယ်လူကို တိုက်ရိုက် နှင်ထုတ်ရမည်။ သံသယဖြစ်ဖွယ်ရှိသော လူပုဂ္ဂိုလ်များကို အနီးကပ် စောင့်ကြည့်လေ့လာသင့်သည်၊ အသင်းတော်နှင့်ပတ်သက်သော အသေးစိတ်အချက်အလက် တစ်ခုမျှ ၎င်းတို့အား မထုတ်ဖော်သင့်ပေ၊ အထူးသဖြင့် ခေါင်းဆောင်များနှင့် အမှုဆောင်များ မည်သူဖြစ်သည်ကို မထုတ်ဖော်သင့်ပေ။ သူလျှိုတစ်ဦးအား မည်သည့်သတင်းအချက်အလက်ကိုမဆို ရရှိခွင့်ပြုလိုက်ပါက ယင်းသည် အသင်းတော်နှင့် ညီအစ်ကိုမောင်နှမများထံသို့ မည်သည့်အချိန်တွင်မဆို ပုန်းကွယ်နေသော ခြိမ်းခြောက်မှု သို့မဟုတ် ဘေးအန္တရာယ်ကို ဆောင်ကြဉ်းပေးနိုင်သည်။ သို့ဖြစ်၍ တစ်စုံတစ်ဦးသည် သံသယဖြစ်ဖွယ်ကောင်းကြောင်း တွေ့ရှိသည့်အခါ ၎င်းတို့သည် ဘုရားသခင်၏ နှုတ်ကပတ်တော်များကို မည်သည့်အခါမျှ စားသောက်ခြင်း သို့မဟုတ် သမ္မာတရားကို မိတ်သဟာယဖွဲ့ခြင်း မရှိနေသမျှကာလပတ်လုံး ၎င်းတို့သည် ဧကန်မုချ မယုံကြည်သူတစ်ဦးဖြစ်ပြီး ၎င်းတို့ကို ချက်ချင်း ရှင်းလင်းပစ်ခြင်းသည် မှန်ကန်ပေသည်။ ထိုသို့သောလူသည် သူလျှိုတစ်ဦး မဟုတ်လျှင်ပင် သူသည် လူကောင်းတစ်ဦး မဟုတ်ပေ၊ ၎င်းတို့ကို ရှင်းလင်းပစ်ခြင်းသည် မည်သို့မျှ မတရားသောအမှု မဟုတ်ပေ။ တစ်စုံတစ်ဦးသည် သူလျှိုတစ်ဦးနှင့် ရင်းနှီးစွာ ပေါင်းသင်းပြီး အသင်းတော်ကို သစ္စာဖောကနိုင်စွမ်းရှိကြောင်း တွေ့ရှိပါက မည်သည့်အခြေအနေတွင်မဆို ၎င်းတို့ကို ချက်ချင်း ရှင်းလင်းပစ်သင့်သည်။ ထိုသို့သော စက်ဆုပ်ဖွယ်လူ လူယုတ်မာသည် အသင်းတော်နှင့် ညီအစ်ကိုမောင်နှမများထံ ဘေးအန္တရာယ်ကိုသာ ဆောင်ကြဉ်းပေးနိုင်သည်။ ၎င်းတို့သည် အိမ်စောင့်ခွေးများထက်ပင် ဆိုးရွားသည်၊ ၎င်းတို့သည် ဒုစရိုက်အမှုများကို မကျူးလွန်လျှင်ပင် ရှင်းလင်းပစ်ရမည်သာ ဖြစ်သည်။ ယခုအခါ အဆင်းနီသော နဂါးကြီးသည် ပြိုလဲလုနီးပါး ဖြစ်နေပြီဖြစ်သော်လည်း ၎င်းတို့သည် မိမိတို့၏ ရှုံးနိမ့်မှုနှင့် ပျက်စီးခြင်းကို လက်ခံရန် မလိုလားကြပေ။ ၎င်းတို့သည် ဘုရားသခင် ရွေးချယ်ထားသောလူများကို ဆက်လက်ဖမ်းဆီးပြီး ညှဉ်းပန်းနှိပ်စက်နေကြဆဲ ဖြစ်သည့်အပြင် ဘုရားအိမ်တော်အတွင်းသို့ ခိုးဝင်ရန် သူလျှိုလုပ်ငန်းများကို လုပ်ဆောင်နေကြဆဲဖြစ်သည်။ အသင်းတော်၏အလုပ်ကို ၎င်းတို့၏ နှောင့်ယှက်ခြင်းနှင့် ဖျက်လိုဖျက်ဆီးလုပ်ခြင်းသည် မည်သည့်အခါမျှ မရပ်တန့်ခဲ့ပေ။ ယခုအခါ အချို့သော သိသာထင်ရှားစွာ သံသယဖြစ်ဖွယ်ရှိသော လူပုဂ္ဂိုလ်များသည် ဖော်ထုတ်ခြင်းခံခဲ့ရပြီးဖြစ်သည်။ ၎င်းတို့၏ သတင်းအချက်အလက်များ စုဆောင်းရန် ကြိုးပမ်းမှုများသည် အုတ်အော်သောင်းတင်း ဖြစ်စေခဲ့ပြီး အခြားသူများက ၎င်းတို့ကို အလွယ်တကူ ထွင်းဖောက်မြင်နိုင်စေခဲ့သည်။ ၎င်းတို့သည် မိမိတို့ကိုယ်ကို ဖော်ထုတ်ပြီးသည်နှင့်တစ်ပြိုင်နက် အသင်းတော်က ၎င်းတို့ကို ရှင်းလင်းပစ်ခဲ့သည်။ သို့သော် စဉ်းလဲကောက်ကျစ်သော သူလျှိုအားလုံးသည် ဖော်ထုတ်ခြင်း ခံခဲ့ရပြီးပြီလော။ မဖြစ်နိုင်ပေ။ နေရာတိုင်းရှိ အသင်းတော်များသည် အဆင်းနီသော နဂါးကြီး၏ သူလျှိုများ ခိုးဝင်ခြင်းကို ခံရနိုင်ချေရှိသည်။ အချို့သော လူပုဂ္ဂိုလ်များသည် အဆင်းနီသော နဂါးကြီးက ဖမ်းဆီးပြီးနောက် စာတန်၏ ခြိမ်းခြောက်မှုများ၊ သွေးဆောင်မှုများနှင့် အခြားနည်းလမ်း အမျိုးမျိုးမှတစ်ဆင့် ၎င်းတို့ကိုယ်စား ဆောင်ရွက်ရန်နှင့် ထို့နောက် အသင်းတော်ထဲသို့ ခိုးဝင်ရန် အတင်းအကျပ်ခိုင်းစေခြင်းကို ခံရသည်။ ဤသည်တို့မှာ ပုန်းကွယ်နေသော သူလျှိုများ ဖြစ်ကြသည်။ ထိုသို့သော ကင်းထောက်များသည် သစ္စာမဲ့ပြီး စဉ်းလဲကြသည်၊ အချို့သော ပါးနပ်မှုနှင့် ဉာဏ်ရည်ဉာဏ်သွေးကို ပိုင်ဆိုင်ကြသည်။ ဘာသာတရားမရှိသူများ၏ စကားဖြင့်ဆိုရလျှင် ၎င်းတို့တွင် အစွမ်းအစအချို့ ရှိသည်။ အသင်းတော်ကို စောင့်ကြည့်စစ်ဆေးသည့်အခါ ၎င်းတို့သည် မိမိတို့၏ အပြန်အလှန်ဆက်ဆံမှုများတွင် မိမိတို့၏ စစ်မှန်သော ရည်ရွယ်ချက်များကို မည်သည့်အခါမျှ မထုတ်ဖော်ဘဲ မသိမသာ၊ တိတ်တဆိတ်နှင့် လျှို့ဝှက်စွာ ပြုမူဆောင်ရွက်ကြသည်။ လူအများစုသည် ၎င်းတို့နှင့် အပြန်အလှန်ဆက်ဆံသည့်အခါ မည်သည့်အရာကိုမျှ မခံစားမိကြပေ၊ ၎င်းတို့သည် ထိုသူလျှိုက သတင်းအချက်အလက်များ စုဆောင်းနေသည်ကို သတိမထားမိကြသကဲ့သို့ ဘုရားသခင်ကို ယုံကြည်ခြင်းအပေါ် ထိုသူလျှို၏ စက်ဆုပ်ရွံရှာမှုကိုလည်း မခံစားမိကြပေ။ ၎င်းတို့ အသင်းတော်ကို စောင့်ကြည့်စစ်ဆေးရန် ထိုနေရာသို့ ရောက်ရှိနေသည်ကိုပင် လူအများစု မသိရှိမီတွင် ထိုသူလျှိုသည် အသင်းတော်၏ အခြေခံအခြေအနေကို သိရှိနားလည်ပြီးဖြစ်ကောင်း ဖြစ်ပေမည်။ အပြင်ပန်းအားဖြင့် ထိုသို့သော လူပုဂ္ဂိုလ်များသည် အသင်းတော်ကို သို့မဟုတ် လူအများစုကို မည်သည့်အနှောင့်အယှက်မျှ မဖြစ်စေပေ၊ သို့ဆိုလျှင် ၎င်းတို့ကို မည်သို့ ကိုင်တွယ်သင့်သနည်း။ ငါတို့သည် အသင်းတော်အပေါ် ၎င်းတို့၏ စောင့်ကြည့်စစ်ဆေးမှုကို ကိုင်တွယ်ဖြေရှင်းရန် မည်သည့်ဆောင်ရွက်ချက်များ သို့မဟုတ် ဖြေရှင်းနည်းများကိုမဆို လုပ်ဆောင်သင့်သလော။ အစောပိုင်းတွင် ဖော်ပြခဲ့သည့်အတိုင်း အသင်းတော်သည် မည်သည့်ကဏ္ဍတွင်မဆို ၎င်းတို့၏ စောင့်ကြည့်စစ်ဆေးမှုကို ကြောက်ရွံ့သလော။ (မကြောက်ရွံ့ပါ။) ငါတို့၏ အသင်းတော် တည်ရှိခြင်းနှင့် ယင်းပါဝင်ဆောင်ရွက်သော အမျိုးမျိုးသော အလုပ်ကဏ္ဍများသည် ပွင့်လင်းမြင်သာပြီး မှန်ကန်ဖြောင့်မတ်သည်၊ ဤအလုပ်ကဏ္ဍများသည် လူသားမျိုးနွယ်ကြားတွင် အဖြောင့်မတ်ဆုံးသော အမှုကိစ္စများ ဖြစ်ကြသည်။ မည်သည့်အဖွဲ့အစည်းမဆို အသင်းတော်၏ မည်သည့်ကဏ္ဍကိုမဆို နားလည်လိုပါက အသင်းတော်၏ အတွေ့အကြုံဆိုင်ရာ သက်သေခံချက်များကို အွန်လိုင်းတွင် လူသိရှင်ကြား ထုတ်လွှင့်ထားသည်၊ လူတိုင်းသည် ၎င်းတို့ကို မိမိတို့အလိုရှိသလို ကြည့်ရှုနိုင်သည်။ လျှို့ဝှက်ချက်များမရှိ၊ တရားမဝင်သော လှုပ်ရှားမှုများမရှိသည့်အပြင် လူမှုရေးဆိုင်ရာ တည်ငြိမ်အေးချမ်းမှုကို နှောင့်ယှက်ခြင်းများ သို့မဟုတ် ဆန့်ကျင်ဘက်ဖြစ်သော အပြောအဆို သို့မဟုတ် လုပ်ရပ်များလည်း သေချာပေါက် မရှိပေ။ သို့ဖြစ်၍ အကယ်၍ ၎င်းတို့သည် အသင်းတော်၏ အခြေအနေကို လျှို့ဝှက်စွာ စုံစမ်းစစ်ဆေးပြီး စောင့်ကြည့်စစ်ဆေးပါက ၎င်းတို့ကို လွှတ်ပေးလော့။ ငါအဘယ်ကြောင့် ဤသို့ပြောရသနည်း။ သူလျှိုများအဖြစ် လုပ်ဆောင်နေသော ဤလူပုဂ္ဂိုလ်များသည် အတတ်ပညာဆိုင်ရာ စံနှုန်းတစ်ခုကို ပိုင်ဆိုင်ကြပြီး သာမန်လူများသည် ၎င်းတို့ နောက်ကွယ်တွင် လုပ်ဆောင်နေသော တာဝန်များမှာ အတိအကျ မည်သည့်အရာဖြစ်သည်ကို မသိရှိနိုင်ပေ။ သို့ဖြစ်၍ ၎င်းတို့ အနှောင့်အယှက်များ မဖြစ်စေသမျှ ကာလပတ်လုံး ၎င်းတို့နှင့်ပတ်သက်၍ စိတ်အနှောင့်အယှက် အဖြစ်ခံရန် မလိုအပ်ပေ၊ ၎င်းတို့ကို လွှတ်ထားလိုက်ရုံသာ ဖြစ်သည်။ ထို့အပြင် ဤမယုံကြည်သူများ၊ ဘုရားမဲ့ဝါဒီများနှင့် နိုင်ငံရေးတွင် ပါဝင်ဆောင်ရွက်သော လူပုဂ္ဂိုလ်များသည် အသင်းတော်အသက်တာကို အကျွမ်းတဝင်မရှိသည့်အပြင် စိတ်ဝင်စားခြင်းလည်း မရှိကြပေ။ နေ့စဉ်နေ့တိုင်း လူတို့သည် ဘုရားသခင်၏ နှုတ်ကပတ်တော်များကို ဖတ်ရှုကြပြီး တရားစီရင်ခြင်းနှင့် ပြစ်တင်ဆုံးမခြင်းကို လက်ခံကြကာ မိမိကိုယ်ကိုသိခြင်း၊ ဘုရားသခင်ကိုသိခြင်းနှင့် စိတ်သဘောထား ပြောင်းလဲခြင်းတို့ကို ဆွေးနွေးကြသည့် အသင်းတော်၌ ၎င်းတို့သည် ဆူးပုံပေါ်ထိုင်ရသလို သို့မဟုတ် ညှဉ်းပန်းခြင်းကို ခံနေရသကဲ့သို့ မည်သို့ မခံစားရဘဲ နေနိုင်မည်နည်း။ စုဝေးပွဲတိုင်းတွင် ၎င်းတို့သည် ဒယ်အိုးပူပေါ်မှ ပုရွက်ဆိတ်များကဲ့သို့ ဂနာမငြိမ် ဖြစ်ကြသည်၊ ၎င်းတို့သည် အသင်းတော်၌ မဖြစ်မနေ ဆက်၍နေရန် မလိုလားမှုကို ခံစားကြရသည်။ အသင်းတော်သည် အသင်းတော်တစ်ခုမျှသာဖြစ်ပြီး နိုင်ငံရေးတွင် ပါဝင်ဆောင်ရွက်သော အဖွဲ့အစည်းတစ်ခု လုံးဝမဟုတ်ကြောင်းကို ၎င်းတို့၏ စိတ်နှလုံးထဲတွင် နားလည်ကြသည်။ အသင်းတော်ကို စောင့်ကြည့်စစ်ဆေးပြီး လေ့လာခြင်းအားဖြင့်နှင့် အသင်းတော်က အတိအကျ မည်သည့်အရာကို လုပ်ဆောင်သည်ကို သိရှိလာခြင်းအားဖြင့် ၎င်းတို့သည် ဘုရားသခင်က အရာခပ်သိမ်းအပေါ်နှင့် လူသားမျိုးနွယ်၏ ကံကြမ္မာအပေါ် အချုပ်အခြာအာဏာ ကိုင်စွဲသည်ဟူသည့်အချက်နှင့်ပတ်သက်၍ ပညာပေးခြင်းခံရပြီး ဤမျှ အသိဉာဏ်မဲ့စွာ မနေထိုင်ရန် မိမိတို့၏ အမြင်ကို ကျယ်ပြန့်စေသည်။ ၎င်းတို့သည်လည်း ဖန်ဆင်းခံများ ဖြစ်ကြသည့်တိုင် လူကို ဘုရားသခင်က ဖန်ဆင်းခဲ့သည်ကိုပင် ၎င်းတို့မသိကြပေ၊ ဤအချက်က ၎င်းတို့သည် မည်မျှ မိုက်မဲပြီး သေးနုပ်ကြောင်းကို ပြသနေသည်။ ၎င်းတို့ကို အသင်းတော်၌ နေခွင့်ပြုခြင်းတွင် အန္တရာယ်တစ်ခုခု ရှိသလော။ ၎င်းတို့သည် အသင်းတော်ကို သို့မဟုတ် ညီအစ်ကိုမောင်နှမများကို မည်သည့်ခြိမ်းခြောက်မှု သို့မဟုတ် အနှောင့်အယှက်မျှ မဖြစ်စေပါက ၎င်းတို့ကို လွှတ်ထားလိုက်လော့။ အနှောင့်အယှက်ဖြစ်စေသော တစ်စုံတစ်ခုကို ၎င်းတို့ လုပ်ဆောင်သည်နှင့်တစ်ပြိုင်နက် ယင်းသည် ၎င်းတို့၏ ဖော်ထုတ်ခံရသည့်အချိန်ဖြစ်ပြီး ၎င်းတို့ကို ကိုင်တွယ်ရန် အချိန်အခါကောင်းပင် ဖြစ်သည်။ အချက်အလက်များနှင့် သက်သေအထောက်အထားများအရ ၎င်းတို့ကို ချက်ချင်း ပိုင်းခြားသိမြင်ပြီး စရိုက်လက္ခဏာကို သရုပ်ဖော်လော့၊ ၎င်းတို့၏ အထူးတာဝန်သည် အဆုံးသတ်သွားပြီး အသင်းတော်က ၎င်းတို့ကို သဘာဝကျကျ နှင်ထုတ်ပေမည်။ ဤချဉ်းကပ်နည်းသည် ကောင်းသလော။ (ဟုတ်ပါသည်။) အချို့လူများက “အသင်းတော်၏အလုပ်သည် ပွင့်လင်းမြင်သာပြီး မှန်ကန်ဖြောင့်မတ်သည် မဟုတ်လော။ လူတို့၏ စောင့်ကြည့်စစ်ဆေးမှုကို အဘယ်ကြောင့် ကန့်သတ်ရသနည်း” ဟု မေးကြသည်။ ဤသည်မှာ အဓိကအားဖြင့် အဆင်းနီသော နဂါးကြီး၊ စာတန်၏ အစိုးရစနစ်ကို ရည်ရွယ်ခြင်းဖြစ်သည်။ ၎င်း၏ အသင်းတော်ကို စောင့်ကြည့်စစ်ဆေးခြင်းသည် ဘုရားသခင် ရွေးချယ်ထားသောလူများကို နှိပ်ကွပ်ရန်၊ ဖမ်းဆီးရန်နှင့် ထိခိုက်နစ်နာစေရန် ရည်ရွယ်သည်၊ သို့ဖြစ်၍ ဘုရားအိမ်တော်သည် ဘုရားသခင် ရွေးချယ်ထားသောလူများ ညှဉ်းပန်းနှိပ်စက်ခြင်းနှင့် သတ်ဖြတ်ခြင်းတို့ကို ခံရခြင်းမှ ကာကွယ်ရန်အလို့ငှာ ၎င်း၏ စောင့်ကြည့်စစ်ဆေးမှုကို ခွင့်မပြုခြင်းဖြစ်သည်။ ဒီမိုကရေစီနိုင်ငံများမှ လူပုဂ္ဂိုလ်များ သို့မဟုတ် ဘာသာရေးအုပ်စုများသည် မှန်သော လမ်းခရီးကို စုံစမ်းစစ်ဆေးရန် လာရောက်ပါက ၎င်းတို့သည် အွန်လိုင်းတွင် ရှာဖွေကြည့်ရှုနိုင်သည် သို့မဟုတ် အသင်းတော်ကို ဆက်သွယ်နိုင်သည်။ အသင်းတော်သည် သမ္မာတရားကို စိတ်ရင်းမှန်ဖြင့် ရှာဖွေသော မည်သူ့ကိုမဆို လက်ခံသည်။ သို့သော် တစ်ဖက်လူက မကောင်းသော ရည်ရွယ်ချက်များကို သိုထားပြီး အမှားနှင့်အမှန်ကို လွဲချော်စေရန်နှင့် အသင်းတော်ကို အသရေဖျက်ရန် ကြိုးပမ်းပါက ဘုရားအိမ်တော်သည် ၎င်းတို့၏ စောင့်ကြည့်စစ်ဆေးမှုကို မည်သို့ ခွင့်ပြုနိုင်မည်နည်း။ ၎င်းတို့၏ စောင့်ကြည့်စစ်ဆေးမှုကို ခွင့်ပြုခြင်းသည် အလွန်မိုက်မဲရာ ကျမည်မဟုတ်လော။ ယင်းသည် မိုက်မဲပြီး အသိဉာဏ်မဲ့ရာ ကျမည်မဟုတ်လော။ (ဟုတ်ပါသည်။) ဘုရားအိမ်တော်သည် သမ္မာတရားကို ရှာဖွေသောသူတို့ကို အစဉ်အမြဲ ကြိုဆိုခဲ့ပြီး ၎င်းတို့ကို နွေးထွေးစွာ လက်ခံသည်၊ ဤသည်မှာ ဘုရားသခင်၏ ရည်ရွယ်ချက်များနှင့် လုံးဝကိုက်ညီသည်။ လူတို့သည် ဤအချက်ကို နားမလည်ပါက ယင်းမှာ ၎င်းတို့၏ မိုက်မဲခြင်းနှင့် အသိဉာဏ်မဲ့ခြင်းကြောင့် ဖြစ်သည်။ အသင်းတော်၏ ပြင်ပမူဝါဒသည် ပွင့်လင်းမြင်သာပြီး မှန်ကန်ဖြောင့်မတ်သည်၊ သမ္မာတရား စည်းမျဉ်းများနှင့် အပြည့်အဝ ကိုက်ညီသည့်အပြင် အသိဉာဏ်၊ ဉာဏ်ပညာတို့နှင့် ပြည့်စုံသည်။ တစ်စုံတစ်ဦးသည် ဤအပြုသဘောဆောင်သော အရာများကို သဘောပေါက်နားလည်နိုင်ခြင်း မရှိပါက ၎င်းသည် အဓိပ္ပာယ်မရှိသောသူ၊ နားဝေတိမ်တောင် ဖြစ်သောသူတစ်ဦး ဖြစ်သည်။ အချို့လူများက “ကင်းထောက်များ သို့မဟုတ် စာတန်၏ အစေခံများသည် အသင်းတော်အကြောင်း လေ့လာရန် လာရောက်ပါက ကျွန်ုပ်တို့သည် ရိုးသားသောလူများဖြစ်သင့်ပြီး ၎င်းတို့၏မေးခွန်းများကို အမှန်အတိုင်း ဖြေကြားသင့်သလော” ဟု ပြောဆိုကြသည်။ နတ်ဆိုးများနှင့် စာတန်များကို အမှန်တရားကို ပြောဆိုခြင်းသည် မိုက်မဲခြင်းဖြစ်သည်၊ ဤသည်မှာ လူတစ်ဦးကို ရိုးသားသောသူ ဖြစ်စေခြင်းမဟုတ်ဘဲ စာတန်၏ ခိုင်းဖတ်တစ်ဦးအဖြစ်သို့ ပြောင်းလဲစေသည်။ စာတန်၏အမျိုးအနွယ်က အသင်းတော်၏ အခြေအနေများကို လေ့လာပြီး သိရှိနားလည်လိုသည့်အခါ ဘုရားသခင် ရွေးချယ်ထားသောလူများတွင် ၎င်းတို့အား ပြောပြရန် တာဝန်မရှိပေ။ ၎င်းတို့သည် သမ္မာတရားကို လက်မခံနိုင်ဘဲ စေတနာကောင်းလည်း မရှိကြပေ၊ သို့ဖြစ်၍ ငါတို့သည် ၎င်းတို့အား ပြောစရာအကြောင်းမရှိပေ။ ဤသို့ပြုလုပ်ခြင်းသည် စိတ်မြန်လက်မြန်လုပ်ခြင်းမဟုတ်ဘဲ ဉာဏ်ပညာရှိခြင်း ဖြစ်သည်။ အချို့လူများက “သူတို့က ငါအား ‘သင်တို့အသင်းတော်ကို မည်သူဦးဆောင်သနည်း။ သူတို့ ယုံကြည်သည်မှာ နှစ်မည်မျှရှိပြီနည်း’ ဟု မေးပါက ကျွန်ုပ် သူတို့ကို ပြောပြနိုင်သလော” ဟု မေးကြသည်။ သင်သည် ၎င်းတို့ကို “ကျွန်ုပ်တို့၏ ခေါင်းဆောင်အကြောင်း သိရှိခြင်း၌ သင်၏ရည်ရွယ်ချက်မှာ အဘယ်နည်း။ ကျွန်ုပ်ကို ဦးစွာပြောပြပါ၊ ကျွန်ုပ် စဉ်းစားပြီးနောက် သင့်အား အသိပေးသင့် မပေးသင့်ကို ဆုံးဖြတ်မည်” ဟု မေးသင့်သည်။ ဤအဖြေသည် ဉာဏ်ပညာရှိသလော။ (ရှိပါသည်။) ဤသည်ကို စည်းမျဉ်းများအတိုင်း ဆောင်ရွက်ခြင်းဟု ခေါ်သည်။ သင်နားလည်ပြီလော။ ဧဝံဂေလိအလုပ် ပျံ့နှံ့လာသည်နှင့်အမျှနှင့် အသင်းတော်ရှိ လူဦးရေ တဖြည်းဖြည်း တိုးပွားလာသည်နှင့်အမျှ ကင်းထောက်များနှင့် သူလျှိုများသည် အမျိုးမျိုးသော နိုင်ငံများနှင့် ဒေသများရှိ အသင်းတော်များတွင် အခါအားလျော်စွာ ပေါ်ပေါက်လာနိုင်သည်။ ထိုသို့သော လူပုဂ္ဂိုလ်များအတွက်မူ ဘုရားသခင် ရွေးချယ်ထားသောလူများအား ၎င်းတို့ကို ဉာဏ်ပညာရှိစွာ ကိုင်တွယ်ရန် အသိပေးလိုက်ရုံဖြင့် လုံလောက်ပေမည်။ အကယ်၍ ၎င်းတို့သည် အနှောင့်အယှက်များ သို့မဟုတ် အဖျက်အမှောင့်လုပ်ခြင်းများကို ဖြစ်စေကြောင်း တွေ့ရှိပါက ၎င်းတို့ကို ချက်ချင်း ရှင်းလင်းပစ်သင့်သည်။ လူအများစုသည် ဤသူလျှိုများ စကားပြောဆိုပုံနှင့် ပြုမူပုံ သို့မဟုတ် ၎င်းတို့၏ အမူအရာနှင့်ပတ်သက်၍ အချို့သော နားလည်မှုနှင့် ပိုင်းခြားသိမြင်နိုင်စွမ်း ရှိသင့်ပြီး ၎င်းတို့နှင့် အပြန်အလှန် ဆက်ဆံသည့်အခါတွင် အချို့သော သတိပြုမိခြင်း သို့မဟုတ် သိမြင်ခြင်းကို သေချာပေါက် ရရှိကြလိမ့်မည်။ အသင်းတော်တစ်ခုရှိ ညီအစ်ကိုမောင်နှမ အနည်းငယ်မျှသာ ထိုသို့သော လူပုဂ္ဂိုလ်များကို သတိပြုမိသော်လည်း ၎င်းတို့သည် သူလျှိုများ သို့မဟုတ် ကင်းထောက်များ ဟုတ်မဟုတ်ကို မသေချာပါက ၎င်းတို့ကို သတိဖြင့်လည်းကောင်း၊ ဉာဏ်ပညာရှိသော ချဉ်းကပ်နည်းဖြင့်လည်းကောင်း ဆက်ဆံသင့်သည်။ လူအများစုက သတိပြုမိခဲ့ပါက ၎င်းတို့သည် အချင်းချင်း အသိပေးနိုင်ပြီး ကြိုတင်ကာကွယ်သည့် ဆောင်ရွက်ချက်များကို လုပ်ဆောင်နိုင်သည်။ သံသယရှိသော သူလျှိုများသည် အသင်းတော်ကို သို့မဟုတ် ညီအစ်ကိုမောင်နှမများကို မည်သည့်ဖော်ရွေရင်းနှီးမှုကိုမျှ မပြဘဲ ညီအစ်ကိုမောင်နှမများကို ထောင်ချောက်ဆင်ရန်နှင့် အသင်းတော်ကို နှောင့်ယှက်ရန် အစဉ်အမြဲ ကြိုးပမ်းနေပြီး အသင်းတော်ကို အသရေဖျက်ရန် သက်သေအထောက်အထားများကို အစဉ်အမြဲ ရှာဖွေနေကာ ညီအစ်ကိုမောင်နှမများကို ဓာတ်ပုံများ သို့မဟုတ် အသံသွင်းမှုများ ပြုလုပ်သည်အထိပင်ဖြစ်စေ၊ ၎င်းတို့ သိလိုသော သတင်းအချက်အလက်များကို အစ်အောက်ယူရန် ဆွဲဆောင်ခြင်းနှင့် စုံစမ်းသွေးဆောင်ခြင်းကို အသုံးပြုပါက ထိုသို့သော လူပုဂ္ဂိုလ်များကို တွေ့ရှိသည်နှင့်တစ်ပြိုင်နက် လျစ်လျူရှုထားခွင့်မပြုသင့်ပေ၊ ၎င်းတို့ကို အသင်းတော်မှ ချက်ချင်း ရှင်းလင်းပစ်ရမည်။ သင်တို့သည် ဤအခြေအနေများကို ယခင်က ကြုံတွေ့ဖူးသည်မှာ ဖြစ်ကောင်း ဖြစ်နိုင်သည်၊ ထို့ကြောင့် ငါသည် သင်တို့ကို ကြိုတင် သတိပေးနေခြင်းဖြစ်သည်။ ဤသည်မှာ သင်တို့၏ နားလည်မှုကို ကျယ်ပြန့်စေခြင်း၊ လူသားမျိုးနွယ်၊ လူ့အဖွဲ့အစည်း၊ နိုင်ငံရေးနှင့် လောကကို သိရှိခြင်းနှင့်ပတ်သက်သည်၊ ယင်းသည် ထိုမျှ မှောင်မိုက်ပြီး ထိုမျှ ဆိုးယုတ်လှသည်။

ဘုရားသခင်ကို ယုံကြည်ခြင်းအတွက် လူတစ်ဦး၌ရှိသော နဝမမြောက်ရည်ရွယ်ချက်ဖြစ်သည့် အသင်းတော်ကို စောင့်ကြည့်စစ်ဆေးခြင်းနှင့်ပတ်သက်၍ အခြေခံအကြောင်းအရာအပေါ် မိတ်သဟာယဖွဲ့ခြင်းကို ဤနေရာတွင် နိဂုံးချုပ်သည်။ အရာအားလုံးကို ရှင်းလင်းစွာ မိတ်သဟာယဖွဲ့ပြီးပြီလော။ (ဖွဲ့ပြီးပါပြီ။) အသင်းတော်ကို စောင့်ကြည့်စစ်ဆေးသူတို့က စောင့်ကြည့်စစ်ဆေးရန် ရည်ရွယ်သည့် အကြောင်းအရာများမှာ အဘယ်နည်း။ (အသင်းတော်၏ သွန်သင်ချက်များ၊ လူပုဂ္ဂိုလ်ဆိုင်ရာ အခြေအနေများ၊ အလုပ်၏ အခြေအနေများနှင့် ဘဏ္ဍာရေးအခြေအနေတို့ ဖြစ်ပါသည်။) အခြေခံအားဖြင့် ဤနယ်ပယ်လေးခုသည် ၎င်းတို့ အစိုးရိမ်ဆုံးသောအရာများ ဖြစ်ကြသည်။ ဤကဏ္ဍလေးခုတွင် အဘယ်အရာများ ပါဝင်သနည်း။ ဤကဏ္ဍလေးခုတွင် မည်သည့်အရာ ပါဝင်သနည်း။ ၎င်းတို့ အစိုးရိမ်ဆုံးသောအရာများ ပါဝင်သည်၊ ယင်းတွင် အသင်းတော် တည်ရှိခြင်းက လူ့အဖွဲ့အစည်း၊ နိုင်ငံတော်နှင့် ဘာသာရေးလောကအပေါ် သက်ရောက်မှု ဖြစ်သည်။ အသင်းတော်သည် နိုင်ငံရေးတွင် ပါဝင်ဆောင်ရွက်ရန်နှင့် အစိုးရကို ဖြုတ်ချရန် ဘာသာရေးကို အကာအကွယ်အဖြစ် အသုံးပြုနိုင်သည်ကိုလည်း ၎င်းတို့ စိုးရိမ်ကြပြီး ဤအရာကို အကြီးမားဆုံးသော ပုန်းကွယ်နေသည့် အန္တရာယ်အဖြစ် ရှုမြင်ကြသည်။ သို့ဖြစ်၍ ၎င်းတို့သည် အသင်းတော်ကို နှိပ်ကွပ်ပြီး ညှဉ်းပန်းနှိပ်စက်ကာ တားမြစ်သည့်အပြင် ယင်း၏အသင်းသားများကိုလည်း ဖမ်းဆီးကြသည်။ အဆင်းနီသော နဂါးကြီး၏ နိုင်ငံသည် ဘာသာရေးယုံကြည်ချက်အားလုံးကို တားမြစ်သည်၊ အချို့နိုင်ငံများသည် အချို့သော ယုံကြည်ချက်များကို တားမြစ်ပြီး နိုင်ငံအများစုသည် အာဏာကိုင်စွဲထားသော သမ္မာတရားကို ကြောက်ရွံ့ကြသည့်အပြင် ၎င်းတို့၏ အုပ်ချုပ်မှုကို ခြိမ်းခြောက်သည့် သမ္မာတရားကို လူတို့ လက်ခံမည်ကိုလည်း ကြောက်ရွံ့ကြသည်။ အတိုချုပ်အားဖြင့် နေရာတစ်ခုတွင် ဘုရားသခင် အမှုပြုခြင်းနှင့် သမ္မာတရားကို ဖော်ပြခြင်း ပို၍ရှိလေ၊ အသင်းတော်တစ်ခုတွင် သန့်ရှင်းသောဝိညာဉ်တော်၏ အမှုတော် ပို၍ရှိလေဖြစ်ကာ ယင်းသည် အမျိုးမျိုးသော အစိုးရများ၏ စောင့်ကြည့်စစ်ဆေးခြင်းနှင့် ရန်လိုမုန်းတီးစွာ ရှုမြင်ခြင်းကို ခံရနိုင်ချေ ပို၍များလေ ဖြစ်သည်။ သို့ဖြစ်၍ အစိုးရများသည် အသင်းတော်၏ အခြေအနေကို လေ့လာပြီး သိရှိနားလည်ရန်၊ အသင်းတော်၏ လှုပ်ရှားမှုအားလုံးကို စောင့်ကြည့်စစ်ဆေးရန်အလို့ငှာ မှန်သော လမ်းခရီးကို စုံစမ်းစစ်ဆေးသောလူများအဖြစ် အယောင်ဆောင်ထားသော သူလျှိုများကို မကြာခဏ စေလွှတ်ကြသည်။ ထို့အပြင် ၎င်းတို့က အသင်းတော်သည် နိုင်ငံရေးတွင် ပါဝင်ခြင်း ရှိမရှိ၊ အသင်းတော်အလုပ်ကို လုပ်ဆောင်ခြင်းဟူသော အကာအကွယ်အောက်တွင် အခြားစိုးရိမ်မှုများအပြင် အချို့သော နိုင်ငံရေးလှုပ်ရှားမှုများတွင် ပါဝင်နေခြင်း ရှိမရှိ သို့မဟုတ် နိုင်ငံရပ်ခြား ဘာသာရေးအင်အားစုများနှင့် ဆက်သွယ်မှု တစ်ခုခု ရှိမရှိ စသည့် အသင်းတော်၏အလုပ်၏ လားရာများကို သိရှိနားလည်ရန် ကြိုးပမ်းကြသည်။ ဤသည်တို့မှာ ၎င်းတို့ သိရှိနားလည်လိုပြီး စိုးရိမ်နေကြသည့်အရာများ ဖြစ်ကြသည်။ ထို့အပြင် အသင်းတော်၏ ဘဏ္ဍာရေးအခြေအနေသည်လည်း ၎င်းတို့ သိရှိနားလည်လိုသော အရာတစ်ခု ဖြစ်သည်။ ၎င်းတို့က “ဤအသင်းတော်သည် အရေအတွက် တိုးပွားလာပြီး လျင်မြန်စွာ ဖွံ့ဖြိုးတိုးတက်ခဲ့သည်၊ ၎င်းတို့၏ငွေသည် အဘယ်မှ လာသနည်း။ မည်သည့်အဖွဲ့အစည်းများ သို့မဟုတ် ချမ်းသာသော လူပုဂ္ဂိုလ်များက ၎င်းတို့ထံ လှူဒါန်းနေကြသနည်း” ဟု စဉ်းစားကြသည်။ အတိုချုပ်အားဖြင့် ၎င်းတို့ မစဉ်းစားမိသည့်အရာကို ငါတို့ စဉ်းစားမိနိုင်မည်မဟုတ်ပေ။ အဘယ်ကြောင့်နည်း။ အကြောင်းမှာ ၎င်းတို့သည် ဆိုးယုတ်သောကြောင့် ဖြစ်သည်၊ ၎င်းတို့သည် ဆိုးယုတ်သော လူသားများ ဖြစ်ကြသည်။ အသင်းတော်၏ အခြေအနေကို သိရှိနားလည်ရန် ၎င်းတို့၏ ကြိုးပမ်းမှုများသည် အသင်းတော် တည်ရှိခြင်းနှင့်ပတ်သက်၍ ၎င်းတို့၏ ကြီးမားသော စိုးရိမ်ပူပန်မှုမှ ပေါက်ဖွားလာခြင်းဖြစ်ပြီး အသင်းတော်သည် လူအများကို ပို၍ ဩဇာလွှမ်းမိုးနိုင်မည်ကို ကြောက်ရွံ့ခြင်းကြောင့် ဖြစ်သည်၊ ယင်းက ၎င်းတို့၏ အုပ်ချုပ်မှုကို ခြိမ်းခြောက်မှုတစ်ခု ဖြစ်စေမည်ဖြစ်သည်၊ ဤသည်မှာ အသင်းတော်နှင့်ပတ်သက်၍ ၎င်းတို့ စိုးရိမ်နေကြသည့်အရာ အတိအကျပင် ဖြစ်သည်။ အသင်းတော်က လုပ်ဆောင်သော အလုပ်သည် မည်မျှ တရားမျှတသည် သို့မဟုတ် တရားဝင်သည်ဖြစ်စေ ၎င်းတို့သည် ယုံကြည်ဆဲ မဟုတ်ပေ။ အဘယ်ကြောင့်နည်း။ အကြောင်းမှာ ၎င်းတို့သည် မယုံကြည်သူများ၊ ဘုရားမဲ့ဝါဒီများနှင့် ရုပ်ဝါဒီများ ဖြစ်ကြသောကြောင့် ဖြစ်သည်၊ ရုပ်ဝါဒီများ လုပ်ဆောင်နိုင်သည့်အရာမှာ ဤမျှသာ ဖြစ်သည်။ ဤသည်တို့မှာ ၎င်းတို့ စိုးရိမ်သော အခြေအနေလေးခု ဖြစ်ကြသည်။ ဤအခြေအနေလေးခုနှင့်ပတ်သက်၍ ၎င်းတို့၏ စိုးရိမ်ပူပန်မှုများနောက်ကွယ်မှ အကြောင်းရင်းများနှင့် ရည်ရွယ်ချက်များကို နားလည်ပြီးနောက် ထိုသို့သော လူပုဂ္ဂိုလ်များကို ကိုင်တွယ်ရန် သင့်လျော်သောနည်းလမ်းနှင့်ပတ်သက်၍ စည်းမျဉ်းနှစ်ခုကို ငါတို့ အခုလေးတင် မိတ်သဟာယဖွဲ့ခဲ့ပြီးဖြစ်သည်။ ဤစည်းမျဉ်းများကို ရိုးရှင်းစွာ အကျဉ်းချုပ်ပြီး ယင်းတို့နှင့်ပတ်သက်၍ ရှင်းပြကြလော့။ (၎င်းတို့သည် အသင်းတော်၌ အနှောင့်အယှက်များ ဖြစ်စေပါက ၎င်းတို့ကို ရှင်းလင်းပစ်ပါ၊ ၎င်းတို့သည် အနှောင့်အယှက်များ မဖြစ်စေပါက ၎င်းတို့နှင့်ပတ်သက်၍ စိတ်အနှောင့်အယှက်ခံရန် မလိုအပ်ပါ။) ၎င်းတို့သည် အနှောင့်အယှက်များ ဖြစ်စေပြီး နေရာအနှံ့ ချောင်းမြောင်းစုံစမ်းကာ ထိတ်လန့်မှုကို ဖြစ်စေပါက ၎င်းတို့ကို မသက်ညှာဘဲ ရှင်းလင်းပစ်လော့၊ ၎င်းတို့သည် အနှောင့်အယှက်များ မဖြစ်စေဘဲ လူအများစုက သတိမပြုမိပါက၊ သို့မဟုတ် ပိုင်းခြားသိမြင်နိုင်ခြင်း မရှိပါက ၎င်းတို့ကို လျစ်လျူရှုလော့။ ဤသည်မှာ အမှန်တကယ် အသင်းတော်အလုပ်ဖြစ်ကြောင်း၊ ဘာသာရေးလှုပ်ရှားမှုများအားလုံးဖြစ်ပြီး နိုင်ငံရေးတွင် လုံးဝမပါဝင်ကြောင်းကို ၎င်းတို့ ရှင်းလင်းစွာ မြင်တွေ့သည်နှင့်တစ်ပြိုင်နက် ဤအချက်ကို အတည်ပြုလိုက်ရုံဖြင့် ၎င်းတို့သည် မိမိတို့သဘောအလျောက် ထွက်ခွာသွားကြလိမ့်မည်။ ဤသည်မှာ ဒီမိုကရေစီနိုင်ငံများက ဘာသာရေးအခြေအနေများကို နားလည်ရန် အသုံးပြုသည့် လုပ်နည်းကိုင်နည်းဖြစ်သည်။ လူသားမျိုးနွယ်သည် အလွန်ရှုပ်ထွေးကြောင်းကိုလည်း အစောပိုင်းတွင် ဖော်ပြခဲ့ပြီးဖြစ်သည်။ လူသားမျိုးနွယ်၏ ရှုပ်ထွေးမှုအတွက် အကြောင်းရင်းမှာ အဘယ်နည်း။ ယင်းသည် လူသားမျိုးနွယ်၏ ဆိုးယုတ်မှုမှ ဆင်းသက်လာခြင်း မဟုတ်လော။ (ဟုတ်ပါသည်။) လူသားမျိုးနွယ်၏ ဆိုးယုတ်မှုသည် မည်သို့ အစပြုခဲ့သနည်း။ လူသားမျိုးနွယ်သည် ဆိုးယုတ်သည်ဟု အဘယ်ကြောင့် ဆိုရသနည်း။ အကြောင်းမှာ စာတန်သည် လူသားမျိုးနွယ်ကို အလွန်နက်ရှိုင်းစွာ ဖောက်ပြန်ပျက်စီးစေခဲ့သောကြောင့် ဖြစ်သည်။ သာမန်စကားဖြင့် မည်သို့ဆိုသနည်း။ ယင်းမှာ စာတန်သည် လူတို့ကို မကောင်းဆိုးဝါးများအဖြစ်သို့ ပြောင်းလဲခဲ့ခြင်း ဖြစ်သည်၊ လူသားမျိုးနွယ်အားလုံးသည် နတ်ဆိုးများ၏ အုပ်ချုပ်မှုအောက်တွင် ရှိနေပြီး အလွန်များပြားသော နတ်ဆိုးကြီးများနှင့် နတ်ဆိုးငယ်များ ရှိနေသောကြောင့် လူတို့ စုဝေးရာနေရာများသည် မကောင်းဆိုးဝါးများ၏ မြို့များ ဖြစ်လာခဲ့သည်။ နတ်ဆိုးများစွာ စုဝေးကြသည့်အခါ ရှုပ်ထွေးလာသည်၊ ၎င်းတို့သည် ဒုစရိုက်အမှုအမျိုးမျိုးကို ကျူးလွန်နိုင်စွမ်းရှိပြီး မတရားသော လှုပ်ရှားမှုအမျိုးမျိုးတွင် ပါဝင်နိုင်စွမ်းရှိသည်။ အကြောင်းမှာ နတ်ဆိုးအားလုံးသည် ဆိုးယုတ်ကြပြီး ၎င်းတို့ကြားတွင် အစဉ်အမြဲ ပဋိပက္ခရှိနေကာ ၎င်းတို့သည် တစ်ဦးနှင့်တစ်ဦး မည်သည့်အခါမျှ သဟဇာတမဖြစ်နိုင်သောကြောင့် ဤအရာက ကိစ္စရပ်များကို ရှုပ်ထွေးစေသည်။ ဘုရားသခင်ကို စိတ်ရင်းမှန်ဖြင့် ယုံကြည်သောလူတို့ အတူတကွ စုဝေးကြသည့်အခါ များစွာ ပို၍ရိုးရှင်းသည်၊ ၎င်းတို့အားလုံးသည် ဘုရားသခင်၏ နှုတ်ကပတ်တော်များကို ဖတ်ရှုလိုစိတ်ရှိပြီး အသင်းတော်အသက်တာကို အသက်ရှင်နေထိုင်လိုစိတ် ရှိကြကာ ၎င်းတို့အားလုံးသည် မိမိတို့၏ တာဝန်များကို ထမ်းဆောင်ခြင်းနှင့် လုပ်သင့်လုပ်ထိုက်သော အလုပ်များကို လုပ်ဆောင်ခြင်းတို့၌ ပျော်မွေ့ကြသည်။ ၎င်းတို့သည် ကလိမ်ကကျစ်ကျသော၊ မတရားသော လှုပ်ရှားမှုများတွင် မပါဝင်ကြပေ၊ အများဆုံးအနေဖြင့် ၎င်းတို့သည် ဖောက်ပြန်ပျက်စီးမှုအချို့ကို ထုတ်ဖော်ကောင်း ထုတ်ဖော်နိုင်ပေမည်။ ထိုသို့သောလူများသာလျှင် ဘုရားသခင်ကို ယုံကြည်ခြင်းမှတစ်ဆင့် ကယ်တင်ခြင်းကို ရရှိနိုင်သည်။ နတ်ဆိုးများသည် ဘုရားသခင်ကို ယုံကြည်ခြင်းမှတစ်ဆင့် မည်သည့်အခါမျှ ကယ်တင်ခြင်းမခံရနိုင်ပေ၊ အကြောင်းမှာ ကျားသစ်သည် သူ၏ အစက်အပြောက်များကို မပြောင်းလဲနိုင်သောကြောင့် ဖြစ်သည်။ နတ်ဆိုးများသည် ဘုရားသခင်ကို ဆယ်စုနှစ်များစွာ သို့မဟုတ် ရာစုနှစ်များစွာ ယုံကြည်ခဲ့လျှင်ပင် ၎င်းတို့သည် ပြောင်းလဲကြမည်မဟုတ်ပေ၊ ဤသည်မှာ အားလုံးမြင်နိုင်သော အချက်အလက်တစ်ခု ဖြစ်သည်။ ယခုအခါ အသင်းတော်များစွာတို့သည် နတ်ဆိုးများဖြစ်သောသူတို့ကို ရှင်းလင်းပစ်ခဲ့ပြီးဖြစ်သည်၊ ဤသည်မှာ ကောင်းသောအရာဖြစ်ပြီး ဘုရားသခင်၏ ရည်ရွယ်ချက်များနှင့် လုံးဝကိုက်ညီသည်။ အချို့အသင်းတော်များတွင် လူတစ်ဝက်သည် နတ်ဆိုးများဖြစ်ကြပြီး အခြားအသင်းတော်များတွင်မူ လူနည်းစုသည် နတ်ဆိုးများဖြစ်ကြသည်။ ထိုသို့သောအသင်းတော်များတွင် အသင်းတော်၏ အလုပ်ကို လုပ်ဆောင်ရန် လွယ်ကူသလော။ သေချာပေါက် မလွယ်ကူပါ။ နတ်ဆိုးများကို ရှင်းလင်းပစ်လိုက်ပြီး ဖောက်ပြန်ပျက်စီးသော လူသားမျိုးနွယ်သာ ကျန်ရှိပါက အသင်းတော်အလုပ်သည် လုပ်ဆောင်ရန် များစွာ ပို၍လွယ်ကူလာသည်။ အသနားစရာအကောင်းဆုံးသော အခြေအနေမှာ အချို့အသင်းတော်များတွင် အယောင်ဆောင်ခေါင်းဆောင်များ သို့မဟုတ် အန္တိခရစ်များက အာဏာကိုင်စွဲထားပြီး နတ်ဆိုးများက ခေါင်းဆောင်ပိုင်းအခန်းကဏ္ဍကို ယူထားသည့်အချိန်တွင် ဖြစ်သည်၊ ထိုအခါ ထိုအသင်းတော်များရှိ ဘုရားသခင် ရွေးချယ်ထားသောလူများသည် အမှန်တကယ် ဒုက္ခရောက်ကြလေသည်။ ငါ့ကို ပြောလော့၊ အယောင်ဆောင်ခေါင်းဆောင်များ သို့မဟုတ် အန္တိခရစ်များ အာဏာကိုင်စွဲထားခြင်းက ဘုရားသခင် ရွေးချယ်ထားသောလူများထံ ငြိမ်သက်ခြင်းနှင့် ဝမ်းမြောက်ခြင်းကို ဆောင်ကြဉ်းပေးနိုင်သလော။ အယောင်ဆောင်ခေါင်းဆောင်များနှင့် အန္တိခရစ်များ၏ အတွေးအခေါ်များနှင့် စိတ်ကူးများသည် လုံးဝ ဆိုးယုတ်ပြီး သမ္မာတရားနှင့် ဆန့်ကျင်သည်။ ၎င်းတို့ကို ထောက်ခံသော သက်ရှိနတ်ဆိုး ဆယ်ဦး သို့မဟုတ် အဦးနှစ်ဆယ် ရှိနေပါက ထိုသို့သောအသင်းတော်၌ နေထိုင်ခြင်းသည် နတ်ဆိုးများ စုဝေးရာနေရာတစ်ခု၌၊ နတ်ဆိုးဘုရင်တစ်ပါးက ထိန်းချုပ်ထားသော နတ်ဆိုးတွင်းတစ်ခု၌ နေထိုင်ခြင်းနှင့် တူသည်၊ ယင်းသည် သင်၏စိတ်နှင့် ဝိညာဉ်ကို မငြိမ်မသက်ဖြစ်စေလျက် အသားကြိတ်စက်ထဲတွင် နေထိုင်ရခြင်းနှင့် တူသည်။ နေ့စဉ်နေ့တိုင်း သင်၏အတွေးများကို လွှမ်းမိုးထားသည့်အရာများမှာ မည်သူ့ကို တိုက်ခိုက်ရမည် သို့မဟုတ် ရုန်းကန်ရမည်၊ မည်သူ့ကို မိတ်ဆွေဖွဲ့ပြီး ချဉ်းကပ်ရမည်၊ မည်သူ့ကို ရှောင်ရှားပြီး သတိထားရှောင်ရမည် စသည့်အရာများ ဖြစ်နေပြီး သင့်တွင် ငြိမ်သက်သော ပတ်ဝန်းကျင်တစ်ခုပင် မရှိဘဲ စိုးစဉ်းမျှသော ငြိမ်သက်ခြင်းမရှိဘဲ အစဉ်မပြတ် ကြောက်ရွံ့မှုနှင့် ထိတ်လန့်မှုတို့ဖြင့် နေထိုင်နေရသည်။ ဤသည်မှာ အသားကြိတ်စက်ထဲတွင် ရှိနေခြင်းနှင့် မတူပေလော။ (တူပါသည်။) ဤဆိုးယုတ်သော လူ့အဖွဲ့အစည်း၊ ဤဆိုးယုတ်သော လူသားမျိုးနွယ်သည် လူတိုင်းနှင့် အုပ်စု သို့မဟုတ် အဖွဲ့အစည်းတိုင်းကို တစ်ပုံစံတည်း ဆက်ဆံပြီး အားလုံးအပေါ် တစ်ပုံစံတ်းသော ထင်မြင်ယူဆချက်များနှင့် အမြင်ရှုထောင့်များကို ထားရှိသည်။ အလားတူပင် ၎င်းတို့သည် အတော်အတန် အပြုသဘောဆောင်သော အဖွဲ့အစည်းဖြစ်သည့် အသင်းတော်ကိုပင် စိတ်မသက်မသာဖြစ်ကြပြီး လျှော့မပေးကြပေ။ မည်သို့ပင်ဖြစ်စေ ၎င်းတို့ကို ငါတို့ ဆက်ဆံသည့်ပုံစံသည် စည်းမျဉ်းရှိသည်၊ ဟုတ်သလော။

ဘုရားသခင်ကို ယုံကြည်ခြင်းအတွက် နဝမမြောက်ရည်ရွယ်ချက်ဖြစ်သည့် အသင်းတော်ကို စောင့်ကြည့်စစ်ဆေးခြင်းနှင့်ပတ်သက်သော အခြေခံအကြောင်းအရာကို မိတ်သဟာယဖွဲ့ခြင်းသည် ဤနေရာတွင် အလုံးစုံ ပြီးဆုံးသွားပြီဖြစ်ပြီး ခေါင်းဆောင်များနှင့် အမှုဆောင်များ၏ ဆယ့်လေးခုမြောက် တာဝန်ဝတ္တရား၏ ပထမအမျိုးအစား၏ အကြောင်းအရာအားလုံးကိုလည်း အခြေခံအားဖြင့် မိတ်သဟာယဖွဲ့ပြီးဖြစ်သည်။ ဤမယုံကြည်သူများနှင့် ဘုရားမဲ့ဝါဒီများ၏ ဘုရားသခင်ကို ယုံကြည်ခြင်းဆိုင်ရာ ရည်ရွယ်ချက်များ၏ အကျဉ်းချုပ်တွင် ဤအချက်များ အခြေခံအားဖြင့် ပါဝင်သည်။ နောက်ဆုံး မိတ်သဟာယဖွဲ့ခဲ့သော ရည်ရွယ်ချက်သည် အကြောင်းအရာအားဖြင့် ယခင်ရည်ရွယ်ချက်များနှင့် အနည်းငယ် ကွဲပြားသည်။ အသင်းတော်ကို စောင့်ကြည့်စစ်ဆေးသောသူတို့သည် အသင်းတော်ထဲသို့ ခိုးဝင်လာသည့်အခါ ၎င်းတို့သည် စားဝတ်နေရေးအတွက်၊ အဆင့်အတန်း သို့မဟုတ် အသက်တာနှင့် အလုပ်တွင် အဆင်ပြေမှုများကို လိုက်လံရှာဖွေနေခြင်းမဟုတ်ဘဲ နိုင်ငံရေး ရည်ရွယ်ချက်များဖြင့် လာကြခြင်းဖြစ်သည်။ ၎င်းတို့၏ ရည်ရွယ်ချက်များ မည်သို့ပင်ဖြစ်စေ ငါတို့သည် ၎င်းတို့ကို ထွင်းဖောက်မြင်ပြီး ပိုင်းခြားသိမြင်သည်နှင့်တစ်ပြိုင်နက် ဤလူပုဂ္ဂိုလ်များကို ရှင်းလင်းပစ်ခြင်း သို့မဟုတ် နှင်ထုတ်ခြင်းဟူသော သင့်လျော်သည့်အရေးယူမှုကို ချက်ချင်း လုပ်ဆောင်သင့်ပြီး ၎င်းတို့ကို အသင်းတော်၌ အချိန်ကြာမြင့်စွာ ခိုအောင်းနေရန် လုံးဝ ခွင့်မပြုသင့်ပေ။ ဤသည်မှာ ခေါင်းဆောင်များနှင့် အမှုဆောင်များအတွက် အရေးကြီးသော တာဝန်တစ်ရပ် ဖြစ်သည်။ ၎င်းတို့၏ ဘုရားသခင်ကို ယုံကြည်ခြင်းဆိုင်ရာ ရည်ရွယ်ချက်ကို အခြေခံ၍ မည်သူတို့သည် စစ်မှန်သော ညီအစ်ကိုမောင်နှမများဖြစ်သည့် ဘုရားသခင် ရွေးချယ်ထားသောလူများဖြစ်သည်ကိုလည်းကောင်း၊ မည်သူတို့သည် အသင်းတော်က ရှင်းလင်းပစ်သင့်သော သို့မဟုတ် နှင်ထုတ်သင့်သော အမျိုးမျိုးသော ဆိုးယုတ်သည့်လူစားများဖြစ်သည်ကိုလည်းကောင်း ပိုင်းခြားသိမြင်ပြီး ဆုံးဖြတ်လော့၊ ဤဆိုးယုတ်သောလူများကို ချက်ချင်း ပိုင်းခြားသိမြင်ပြီးနောက် ၎င်းတို့ကို ရှင်းလင်းပစ်ရန် သို့မဟုတ် နှင်ထုတ်ရန် သက်ဆိုင်ရာ ချဉ်းကပ်နည်းတစ်ခုကို ချက်ချင်း ကျင့်သုံးလော့။ ဤသည်မှာ အမျိုးမျိုးသော ဆိုးယုတ်သည့်လူစားများကို ပိုင်းခြားသိမြင်ပြီး အမျိုးအစားခွဲခြားခြင်း၏ ပထမအမျိုးအစားဖြစ်သည်။ ၎င်းမှာ ဘုရားသခင်ကို ယုံကြည်ခြင်းအတွက် လူတစ်ဦး၏ ရည်ရွယ်ချက်ပင် ဖြစ်သည်။ ငါတို့သည် ၎င်းနှင့်ပတ်သက်၍ မိတ်သဟာယဖွဲ့ခြင်းကို အဆုံးသတ်ပြီးဖြစ်သည်။

၂။ လူ့သဘာဝကို အခြေခံ၍

ယခု ငါတို့သည် ဒုတိယအမျိုးအစားဖြစ်သည့် ၎င်းတို့၏ လူ့သဘာဝကို ဆက်လက်ဆွေးနွေးကြမည်။ လူတစ်ဦး၏ လူ့သဘာဝဆိုင်ရာ သရုပ်သကန်များမှတစ်ဆင့် ဤလူပုဂ္ဂိုလ်သည် ဘုရားသခင်ကို အမှန်တကယ် ယုံကြည်ခြင်း ရှိမရှိနှင့် ၎င်းတို့သည် အသင်းတော်၌ ဆက်လက်နေထိုင်ရန် သင့်တော်ခြင်း ရှိမရှိကို ငါတို့ ပိုင်းခြားသိမြင်ပြီး အဆုံးအဖြတ်ပေးသည်။ ၎င်းတို့၏ လူ့သဘာဝဆိုင်ရာ သရုပ်သကန်များ၊ ထုတ်ဖော်ပြချက်များနှင့် ၎င်းတို့၏ လူ့သဘာဝ အနှစ်သာရတို့အရ ၎င်းတို့သည် စစ်မှန်သော ညီအစ်ကိုမောင်နှမများ မဟုတ်ပါက၊ အသင်းတော်၌ နေထိုင်ရန် မသင့်တော်ပါက၊ ၎င်းတို့၏ တည်ရှိမှုက ညီအစ်ကိုမောင်နှမများကို နှောင့်ယှက်ပါက၊ ပြီးလျှင် ၎င်းတို့၏ အပြုအမူအရ အသင်းတော်မှ ရှင်းလင်းပစ်သင့်သော သို့မဟုတ် နှင်ထုတ်သင့်သောသူများတွင် ပါဝင်နေပါက အသင်းတော်သည် ဤလူပုဂ္ဂိုလ်များကို ရှင်းလင်းပစ်ရန် သို့မဟုတ် နှင်ထုတ်ရန် သက်ဆိုင်ရာ အစီအစဉ်များကို လျင်မြန်စွာ ရေးဆွဲသင့်သည်။ ခေါင်းဆောင်များနှင့် အမှုဆောင်များ၏ ဆယ့်လေးခုမြောက် တာဝန်နှင့်ပတ်သက်သော မိတ်သဟာယဖွဲ့ခြင်းသည် ဆိုးယုတ်သူအမျိုးမျိုးကို ရှင်းလင်းပစ်ခြင်း သို့မဟုတ် နှင်ထုတ်ခြင်းအကြောင်း ဖြစ်သည်။ လူ့သဘာဝ၏ ရှုထောင့်မှ ကြည့်လျှင် ဤလူပုဂ္ဂိုလ်များ၏ လူ့သဘာဝသည် မကောင်းသည့်အပြင် ဆိုးယုတ်သည်မှာ သေချာသည်၊ ရိုးရိုးရှင်းရှင်းပြောရလျှင် ၎င်းတို့သည် လုံးဝမကောင်းသောသူများ ဖြစ်ကြသည်။ ၎င်းတို့၏ လူ့သဘာဝဆိုင်ရာ သရုပ်သကန်များအရ ၎င်းတို့အား အသင်းတော်၌ ဆက်လက်၍ အနှောင့်အယှက်များ ဖြစ်စေခြင်းမှလည်းကောင်း၊ ဘုရားသခင် ရွေးချယ်ထားသောလူများ၏ အသင်းတော်အသက်တာနှင့် ၎င်းတို့၏ တာဝန်ထမ်းဆောင်ခြင်းဆိုင်ရာ ပုံမှန်စည်းစနစ်ကို ထိခိုက်စေခြင်းမှလည်းကောင်း ကာကွယ်ရန် ၎င်းတို့ကို အသင်းတော်မှ ရှင်းလင်းပစ်သင့်သည် သို့မဟုတ် နှင်ထုတ်သင့်သည်။ သို့ဆိုလျှင် လူတစ်ဦး၏ လူ့သဘာဝကို ကောင်းသည် သို့မဟုတ် ဆိုးသည်ဟု ငါတို့သည် မည်သည့်သရုပ်သကန်များမှတစ်ဆင့် တရားစီရင်ပြီး ထိုသို့ဖြင့် အသင်းတော်က ၎င်းတို့ကို ရှင်းလင်းပစ်သင့်သည် သို့မဟုတ် နှင်ထုတ်သင့်သည်ကို ဆုံးဖြတ်ကြသနည်း။ ဒုတိယအမျိုးအစားဖြစ်သော လူ့သဘာဝတွင် အကျဉ်းချုပ်အားဖြင့် အချက်များစွာ ပါဝင်သော်လည်း ပထမအချက်ကို ဦးစွာ မိတ်သဟာယဖွဲ့ကြစို့။

က။ အမှားနှင့် အမှန်ကို ပြောင်းပြန်လှန် ပြောဆိုရသည်ကို နှစ်သက်ခြင်း

ပထမအချက်မှာ အမှားနှင့် အမှန်ကို ပြောင်းပြန်လှန် ပြောဆိုရသည်ကို နှစ်သက်သောသူတို့အကြောင်း ဖြစ်သည်။ သင်တို့အားလုံးသည် ဤလူစားမျိုးကို မကြာခဏဆိုသလို မုချ မြင်ဖူးကြပေမည်။ အမှားနှင့် အမှန်ကို ပြောင်းပြန်လှန် ပြောဆိုရသည်ကို နှစ်သက်ခြင်း၏ အဓိကသရုပ်သကန်မှာ အဘယ်နည်း။ ယင်းမှာ စည်းမျဉ်းများမရှိဘဲ စကားပြောဆိုခြင်း၊ မကောင်းသောအကျိုးဆက်များကို ဖြစ်ပေါ်စေလျက် ရည်ရွယ်ချက်များ၊ ကြံရွယ်ချက်များဖြင့် အငြင်းပွားမှုများကို အစဉ်အမြဲ လှုံ့ဆော်ခြင်း ဖြစ်သည်။ ထိုသို့သောလူတို့သည် ၎င်းတို့၏ ပြောဆိုသောစကား၌ ဆိုးရွားသော ပြဿနာများရှိသည်မှာ ရှင်းလင်းသည်၊ ယင်းမှာ ညံ့ဖျင်းသော စိတ်သဘောထားနှင့် လူ့သဘာဝကင်းမဲ့ခြင်းတို့၌ အမြစ်တွယ်နေပြီး ၎င်းတို့ကို အမှားနှင့် အမှန်ကို ပြောင်းပြန်လှန် ပြောဆိုရသည်ကို နှစ်သက်စေရန် ဦးဆောင်သည်။ ဤဝေါဟာရ၏ ရှုထောင့်မှ ကြည့်လျှင် “အမှားနှင့် အမှန်ကို ပြောင်းပြန်လှန် ပြောဆိုခြင်း” ဆိုသည်မှာ အမှန်ကို အမှားဖြစ်သည်ဟုလည်းကောင်း၊ အမှားကို အမှန်ဖြစ်သည်ဟုလည်းကောင်း မကြာခဏ အခိုင်အမာဆိုခြင်းကို ဆိုလိုသည်၊ ယင်းမှာ အဖြူအမည်း ပြောင်းပြန်လှန်ခြင်းအကြောင်းဖြစ်ပြီး အဖြစ်မှန်များကို မမှန်ကန်သောအသေးစိတ်အချက်များဖြင့် မွမ်းမံခြယ်သခြင်း၊ အခြေအမြစ်မရှိသော စွပ်စွဲချက်များကို ပြုလုပ်ခြင်း၊ အခြေအမြစ်မရှိသော ဝေဖန်မှုများ ပြုလုပ်ခြင်းနှင့် မိမိနှစ်သက်သလို ပြောဆိုခြင်းတို့ပင် ဖြစ်သည်။ ထိုသို့သောလူတို့သည် အမှုအရာများကို အပြုသဘောဆောင်သော ရှုထောင့်မှ မည်သည့်အခါမျှ မတင်ပြပေ၊ ၎င်းတို့ပြောဆိုသည့်အရာသည် လူတို့ကို မတည်ဆောက်ပေးသည့်အပြင် လူတို့အတွက် မည်သည့်အကျိုးကျေးဇူး သို့မဟုတ် အကူအညီကိုမျှ လုံးဝမပေးပေ။ ၎င်းတို့နှင့် အပြန်အလှန်ဆက်ဆံခြင်း၊ ပေါင်းသင်းဆက်ဆံခြင်းနှင့် ပြောဆိုဆက်သွယ်ခြင်း ပြုလုပ်စဉ်တွင် ၎င်းတို့ပြောဆိုသည်ကို နားထောင်ခြင်းသည် လူတို့၏ စိတ်နှလုံးများကို မှောင်မိုက်ခြင်းနှင့် မကြည်လင်ခြင်းထဲသို့ မကြာခဏ ကျဆင်းသွားစေပြီး ၎င်းတို့၏ ယုံကြည်ခြင်း၌ ယုံကြည်မှုကိုပင် ပျောက်ဆုံးသွားစေကာ ၎င်းတို့၌ ဘုရားသခင်ကို ယုံကြည်ရန် မည်သည့်စိတ်ဆန္ဒမျှ မရှိတော့ဘဲ ဝိညာဉ်ရေးရာ ဆက်ကပ်ခြင်းများနှင့် စုဝေးပွဲများအတွင်း မိမိတို့၏ စိတ်များကို ငြိမ်သက်အောင် မထားနိုင်တော့ပေ။ ၎င်းတို့သည် ထိုသို့သော လူပုဂ္ဂိုလ်များ ဖြန့်ဝေသော အမှားအမှန်နှင့်ပတ်သက်သည့် အခိုင်အမာဆိုချက်များနှင့် အတင်းအဖျင်းများကြောင့် စိတ်နှလုံးနှင့် ဝိညာဉ်၌ မကြာခဏ တည်ငြိမ်မှုမရှိကြဘဲ လူတိုင်းကို မနှစ်မြို့ဖွယ်အဖြစ် ရှုမြင်လာကြပြီး အခြားသူများ၌ အမှားများမှလွဲ၍ မည်သည့်အရာကိုမျှ မမြင်တော့ပေ။ အမှားနှင့် အမှန်ကို ပြောင်းပြန်လှန် ပြောဆိုသည်ကို ကြားပြီးနောက်တွင် လူတို့၏ ပုံမှန်စဉ်းစားတွေးခေါ်မှုသည် မကြာခဏ နှောင့်ယှက်ခြင်းခံရပြီး ကိစ္စရပ်များအပေါ် ၎င်းတို့၏ မှန်ကန်သော အမြင်ရှုထောင့်များပင် နှောင့်ယှက်ခြင်းခံရကာ အမှားနှင့်အမှန်ကို ပိုင်းခြားသိမြင်ရန် ခက်ခဲစေသည်။ ပိုင်းခြားသိမြင်နိုင်စွမ်း ကင်းမဲ့သောသူတို့သည် အမှားနှင့် အမှန်ကို ပြောင်းပြန်လှန် ပြောဆိုသောလူတို့ ပြောဆိုသည့် အချို့အရာများကြောင့် သတိပင်မထားမိဘဲ မကြာခဏ ဖြားယောင်းခြင်းနှင့် စုံစမ်းသွေးဆောင်ခြင်းထဲသို့ ကျရောက်သွားကြသည်။ ၎င်းတို့က “ထိုလူတို့သည် မည်သူ့ကိုမျှ မထိခိုက်စေခဲ့ပါ၊ ၎င်းတို့သည် စုဝေးပွဲများတွင် ပုံမှန်ပါဝင်ကြသည်၊ တစ်ခါတစ်ရံတွင် ၎င်းတို့သည် အလှူဒါနများပင် ပေးကမ်းပြီး အခြားသူများကို ကူညီကြကာ မည်သည့်မကောင်းမှုကိုမျှ မလုပ်ဆောင်ခဲ့ပါ” ဟု တွေးထင်ကြသည်။ သို့သော် ထိုသို့သော လူပုဂ္ဂိုလ်များနှင့် ၎င်းတို့၏ အပြန်အလှန်ဆက်ဆံမှုများ၏ အကျိုးဆက်များမှာ ၎င်းတို့သည် အမှားအမှန် ကိစ္စရပ်များ၌ နစ်မွန်းသွားကြပြီး စုံစမ်းသွေးဆောင်ခြင်း၌ နစ်မွန်းသွားကြကာ လူအချင်းချင်းကြားရှိ စိတ်ခံစားမှုဆိုင်ရာ ရှုပ်ထွေးမှုများနှင့် မသင့်လျော်သော လူအချင်းချင်း ဆက်ဆံရေးများအလယ်၌ နစ်မွန်းသွားကြခြင်း ဖြစ်သည်။ အမှားနှင့် အမှန်ကို ပြောင်းပြန်လှန် ပြောဆိုသော ဤလူတို့သည် လူအချင်းချင်းကြားရှိ သင့်လျော်သော ဆက်ဆံရေးများကို နှောင့်ယှက်ရာ၌လည်းကောင်း၊ လူတို့၏ စိတ်ထဲရှိ သန့်စင်သော နားလည်သဘောပေါက်မှုအချို့ကို ဖျက်ဆီးရာ၌လည်းကောင်း အထူးကျွမ်းကျင်ကြသည်။ ၎င်းတို့၏ အမြင်၌ မည်သည့်လူပုဂ္ဂိုလ်များမဆို ကောင်းမွန်သော ဆက်ဆံရေးရှိပြီး အချင်းချင်း အထောက်အကူပြုကာ ကူညီနိုင်ပါက ၎င်းတို့၏ လျှို့ဝှက်တိုက်ခိုက်မှုများနှင့် ဝေဖန်သုံးသပ်မှုများအတွက် ပစ်မှတ်များ ဖြစ်လာကြသည်။ အလားတူပင် မိမိ၏တာဝန်ကို သစ္စာစောင့်သိမှုအချို့ဖြင့် ထမ်းဆောင်ပြီး မိမိကိုယ်ကို အနည်းငယ် အသုံးခံသော မည်သူမဆိုသည်လည်း ၎င်းတို့၏ တိုက်ခိုက်မှုများအတွက် ပစ်မှတ်တစ်ခု ဖြစ်သည်။ မည်သည့်အရာမဆို မည်မျှပင် ကောင်းမွန်သည် သို့မဟုတ် အပြုသဘောဆောင်သည်ဖြစ်စေ ၎င်းတို့သည် ယင်းကို အသရေဖျက်ရန် နည်းလမ်းများ ရှာဖွေကြသည်။ ၎င်းတို့သည် အရာရာတိုင်းအပေါ် သွယ်ဝိုက်သော ဝေဖန်သုံးသပ်မှုများ ပြုလုပ်ကြသည်၊ ကိစ္စရပ်တိုင်းအပေါ် မှတ်ချက်ပေးကြပြီး အရေးကိစ္စအားလုံးအပေါ် မိမိတို့၏ ကိုယ်ပိုင်အမြင်ရှုထောင့်များကို ကိုင်စွဲထားကြသည်။ ဤအမြင်ရှုထောင့်များသည် စစ်မှန်သော အမြင်ရှုထောင့်များ လုံးဝမဟုတ်ပေ၊ ထိုအစား ၎င်းတို့သည် အဓိပ္ပာယ်မရှိသောစကားများ ပြောဆိုကြသည်၊ အမှန်တရားများနှင့် အမှားများကို ရောထွေးစေကြပြီး အဖြူအမည်းကို ပြောင်းပြန်လှန်ကြသည်၊ ပန်းတိုင်တစ်ခုကို ဖြစ်မြောက်အောင်မြင်စေခြင်းငှာ သို့မဟုတ် လူအချင်းချင်းကြား ရန်တိုက်ပေးခြင်းငှာ သို့မဟုတ် အချို့သော လူပုဂ္ဂိုလ်များကို အသရေဖျက်ခြင်းငှာ ၎င်းတို့သည် အဖြစ်မှန်များကို မမှန်ကန်သော အသေးစိတ်အချက်များဖြင့် မွမ်းမံခြယ်သခြင်းနှင့် အခြေအမြစ်မရှိသော စွပ်စွဲချက်များ ပြုလုပ်ခြင်းအားဖြင့် အမှုအရာများကို တမင်တကာနှင့် မဆင်မခြင် လုပ်ကြံဖန်တီးသည်အထိပင် ပြုလုပ်ကြပြီး မရှိသည်ကို အရှိလုပ်ကြသည်။ အဖြစ်မှန်များကို မသိရှိသောသူတို့သည် ၎င်းတို့ပြောဆိုသည်ကို နားထောင်ပြီး ၎င်းတို့၏ အခိုင်အမာဆိုချက်များသည် ကျိုးကြောင်းဆီလျော်ပုံရပြီး မှားယွင်းနိုင်ဖွယ်မရှိဟု ထင်မှတ်ကြကာ ထိုသို့ဖြင့် အထင်အမြင်မှားစေခြင်းကို ခံကြရသည်။ အမှားနှင့် အမှန်ကို ပြောင်းပြန်လှန် ပြောဆိုဆိုခြင်းကို နှစ်သက်သော ဤလူစားမျိုးသည် မည်သည့်အပြုသဘောဆောင်သော ကိစ္စရပ်ကိုမဆို သွယ်ဝိုက်သော ဝေဖန်မှုများ ပြုလုပ်ကြသည်။ ယင်းမှာ ၎င်းတို့၌ တရားမျှတစိတ် ရှိသောကြောင့်လော။ (မဟုတ်ပါ။) ၎င်းတို့သည် မိမိတို့၏ တာဝန်ကို တက်ကြွစွာ ထမ်းဆောင်သောသူများ၊ သစ္စာစောင့်သိသောသူများ၊ မိမိတို့ကိုယ်ကို စိတ်အားထက်သန်စွာ အသုံးခံသောသူများနှင့် အသိတရားနှင့် ဆင်ခြင်တုံတရားရှိသောသူတို့ကို အာခံပြီး အထင်မကြီးကြပေ။ သို့ဆိုလျှင် ဤလူပုဂ္ဂိုလ်များ၏ မဆင်မခြင် ပြောဆိုခြင်းအတွက် အကြောင်းရင်းမှာ အဘယ်နည်း။ အရင်းအမြစ်သည် အဘယ်မှာရှိသနည်း။ ၎င်းတို့သည် အဘယ်ကြောင့် အမှားနှင့် အမှန်ကို ပြောင်းပြန်လှန် ပြောဆိုခြင်းကို အစဉ်အမြဲ နှစ်သက်ကြသနည်း။ (အဘယ်ကြောင့်ဆိုသော် ၎င်းတို့၏ လူ့သဘာဝသည် မကောင်းသောကြောင့် ဖြစ်ပါသည်။) မှန်ပေသည်၊ ယင်းမှာ မကောင်းသော လူ့သဘာဝကြောင့် ဖြစ်သည်။ ၎င်းတို့၏ လူ့သဘာဝသည် ကောင်းမွန်ပါက ၎င်းတို့သည် အမှားနှင့် အမှန်ကို ပြောင်းပြန်လှန် ပြောဆိုကြမည်မဟုတ်ပေ။ စကားပြောဆိုခြင်းသည် အသိတရားနှင့် ဆင်ခြင်တုံတရားအပေါ် အခြေခံသင့်သည်၊ လူတစ်ဦးသည် ကောက်ကျစ်သော သီအိုရီများနှင့် မိစ္ဆာဒိဋ္ဌိအယူဝါဒများကို အခွင့်သာတိုင်း ကရားရေလွှတ် မပြောဆိုသင့်ပေ။ အမှားနှင့် အမှန်ကို ပြောင်းပြန်လှန် ပြောဆိုခြင်း၏ အရင်းအမြစ်မှာ မကောင်းသော လူ့သဘာဝ ဖြစ်သည်။ ထိုသို့သောလူတို့ ပြောဆိုသည့် မည်သည့်အရာမဆိုသည် မနှစ်မြို့ဖွယ်ကောင်းကာ ယဉ်ကျေးစွာဆိုရလျှင် ၎င်းတို့သည် အခြားသူများကို ဝေဖန်သုံးသပ်နေခြင်း ဖြစ်သော်လည်း အမှန်တကယ်တွင် ၎င်းတို့၏ စကားများ၌ ပြစ်တင်ရှုတ်ချရန်နှင့် ကျိန်ဆဲရန် မလိုမုန်းထားသော ရည်ရွယ်ချက် အစိတ်အပိုင်းအချို့ ပါဝင်ပြီး သွေးထိုးလှုံ့ဆော်ခြင်း၊ မနာလိုခြင်း၊ အာခံခြင်း၊ မုန်းတီးခြင်းတို့၏ အရိပ်အယောင်များ ပါဝင်သည့်အပြင် လဲရာသူကို ထပ်ကန်သည့် အရိပ်အယောင်များပင် ပါဝင်သည်။ အတိုချုပ်အားဖြင့် ဤသည်တို့မှာ ၎င်းတို့၏ အမှားနှင့် အမှန်ကို ပြောင်းပြန်လှန် ပြောဆိုခြင်း၏ အဓိကလက္ခဏာများ ဖြစ်ကြသည်။ ဤထူးခြားသည့်လက္ခဏာများအပြင် ထိုသို့သော လူပုဂ္ဂိုလ်များ၌ နောက်ထပ် ဘုံလက္ခဏာတစ်ခု ရှိသေးသည်၊ ၎င်းတို့ မရှိသည့်အရာ သူတစ်ပါး၌ ရှိလျှင် မနာလိုဖြစ်၍ မိမိ၌ ရှိသည့်အရာ ထိုလူများတွင် မရှိပါက လှောင်ပြောင်ကြသည်။ ၎င်းတို့၏ လူ့သဘာဝသည် ကောင်းမွန်သလော။ (မကောင်းမွန်ပါ။) မိမိတို့တွင် မရှိသည့်အရာ သူတစ်ပါး၌ ရှိလျှင် မကျေမချမ်းဖြစ်၍ မိမိ၌ ရှိသည့်အရာ ထိုလူများတွင် မရှိပါက လှောင်ပြောင်ကြသော ဤအမျိုးအစားဝင် လူပုဂ္ဂိုလ်များသည် မိမိတို့ထက် သာလွန်သော မည်သူ့ကိုမဆို မနာလိုဖြစ်ကြပြီး ထိုလူတို့၏ ကွယ်ရာတွင် မကောင်းပြောဆိုကာ ဝေဖန်သုံးသပ်ပြီး ပြစ်တင်ရှုတ်ချကြသည်၊ တစ်ဖက်တွင်မူ တစ်စုံတစ်ဦးသည် ၎င်းတို့ထက် နိမ့်ကျပါက ၎င်းတို့သည် ထိုလူကို ကဲ့ရဲ့လှောင်ပြောင်ရန်၊ သရော်ရန်နှင့် အထင်သေးရန် အသင့်ရှိလျက် နှာခေါင်းရှုံ့ကာ ရယ်မောကြသည်။ ၎င်းတို့သည် မည်သည့်ကိစ္စရပ်ကိုမဆို မှန်ကန်စွာ နားလည်နိုင်ခြင်းမရှိသကဲ့သို့ အခြေခံအကျဆုံးသော လူ့ကိုယ်ကျင့်တရားများအပေါ် အခြေခံ၍ ချဉ်းကပ်နိုင်ခြင်းလည်း မရှိပေ။ ၎င်းတို့သည် မည်သူ့ကိုမျှ ကောင်းချီးပေးရန် မလိုအပ်သကဲ့သို့ မည်သူ၏ ကောင်းကျိုးကိုမျှ လိုလားရန် သို့မဟုတ် အရာရာတိုင်း ၎င်းတို့အလိုရှိသည့်အတိုင်း ဖြစ်မြောက်ပါစေဟု ဆန္ဒပြုရန် သို့မဟုတ် မှန်သောလမ်းကြောင်းကို လျှောက်လှမ်းပါစေဟု ဆန္ဒပြုရန်လည်း မလိုအပ်ပေ၊ သို့သော် အနည်းဆုံးအနေဖြင့် ၎င်းတို့သည် အခြားသူများကို မည်သည့်မလိုမုန်းထားစိတ်မျှ မထားဘဲ မှန်ကန်စွာ အကဲဖြတ်သင့်သည်၊ ၎င်းတို့သည် ဤအရာကိုပင် လုပ်ဆောင်ရန်ပင် အရေးနိမ့်ကြ၏။ ၎င်းတို့၏ အမှားနှင့် အမှန်ကို ပြောင်းပြန်လှန် ပြောဆိုခြင်း၏ နောက်ကွယ်ရှိ အကြောင်းရင်းမှာ အဘယ်နည်း။ ၎င်းတို့၏ ပြောဆိုသောစကားမှတစ်ဆင့် အခြားသူများအပေါ် ၎င်းတို့၏ သဘောထားမှတစ်ဆင့်၊ ၎င်းတို့ တွေးထင်သောအရာနှင့် ၎င်းတို့၏ စိတ်နှလုံးနက်ရှိုင်းရာ၌ အခြားသူများကို ဆက်ဆံသည့် နည်းလမ်းမှတစ်ဆင့် ဤလူစားမျိုးတို့၏ လူ့သဘာဝသည် မလိုမုန်းထားသောသဘောရှိသည်မှာ သိသာထင်ရှားသည်။ ဤလူစားမျိုးသည် အမှားနှင့် အမှန်ကို ပြောင်းပြန်လှန် ပြောဆိုရန် ၎င်းတို့၏ နှုတ်ကိုသာ အသုံးပြုကြသော်လည်း ဤလုပ်ဆောင်ချက်များ၏ နောက်ကွယ်၌ ၎င်းတို့ အောင်မြင်စေလိုသော ပြီးမြောက်မှုများနှင့် ပန်းတိုင်များအပြင် ၎င်းတို့၏ စိတ်နှလုံးနက်ရှိုင်းရာ၌ လူများနှင့် ကိစ္စရပ်များအပေါ် ၎င်းတို့၏ စစ်မှန်သော အမြင်များနှင့် သဘောထားများလည်း တည်ရှိနေသည်။ အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သောသူတို့သည် သမ္မာတရားကို ကောင်းစွာ သဘောပေါက်နားလည်ခြင်း ရှိမရှိနှင့် ၎င်းတို့သည် သမ္မာတရားကို နှစ်သက်သောလူများ ဖြစ်မဖြစ်ကို ယခုလောလောဆယ် ဘေးဖယ်ထားလျက် ၎င်းတို့၏ လူ့သဘာဝ၏ ဤလက္ခဏာဖြစ်သည့် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်ခြင်းအပေါ် အခြေခံ၍ ၎င်းတို့သည် အသင်းတော်ရှိ ညီအစ်ကိုမောင်နှမများအပေါ် ကောင်းမွန်သော သို့မဟုတ် အပြုသဘောဆောင်သော ဩဇာလွှမ်းမိုးမှု တစ်ခုခု ရှိနိုင်သလော။ (မရှိနိုင်ပါ။) လုံးဝ မရှိနိုင်ပါတကား။

အမှန်နှင့် အမှားကို လွဲချော်အောင် ပြောသောသူတို့တွင် မည်သည့်သရုပ်သကန်များ ရှိသည်ကို ကြည့်ရှုရန် တိကျသော ဥပမာအချို့ကို ကြည့်ကြစို့။ ဥပမာအားဖြင့် ညီအစ်မတစ်ဦးရှိသည်ဆိုပါစို့၊ သူ၏မိသားစုသည် အလွန်ချမ်းသာသော်လည်း ဧဝံဂေလိတရားကို ဟောပြောခြင်းနှင့် ဘုရားသခင်အကြောင်း သက်သေခံခြင်းငှာ သူသည် ဇာတိပကတိ၏ သာယာမှုများကို စွန့်လွှတ်ပြီး သူ၏တာဝန်ကို ထမ်းဆောင်ရန် အိမ်မှ ထွက်ခွာခဲ့သည်။ ငါ့ကို ပြောလော့၊ ပုံမှန်လူတို့သည် ဤအခြေအနေကို မည်သို့ ရှုမြင်မည်နည်း။ ၎င်းတို့သည် သူ့ကို အားကျကြမည် မဟုတ်လော။ အနည်းဆုံးအနေဖြင့် ၎င်းတို့က ထိုညီအစ်မသည် သူ၏တာဝန်ကို ထမ်းဆောင်ရန် ဇာတိပကတိ၏ သာယာမှုများကို စွန့်လွှတ်နိုင်သည့်အတွက် ချီးကျူးထိုက်ပြီး အတုယူထိုက်သည်ဟု ထင်မှတ်ကြပေမည်။ သို့သော် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သောသူတို့သည် သူ၏အကြောင်းကို မည်သို့ မှတ်ချက်ပေးကြသနည်း။ ၎င်းတို့က “သူသည် တစ်နေ့လုံး အပြင်ထွက်ပြီး ဧဝံဂေလိတရား ဟောပြောရန် ချမ်းသာသောသူတစ်ဦး၏ ဘဝကို စွန့်လွှတ်နေသည်၊ သူ ဤအတိုင်း ဆက်သွားနေပါက မကြာမီ သို့မဟုတ် နောင်တွင် သူ၏ခင်ပွန်းက သူ့ကို ကန်ထုတ်လိမ့်မည်။ ဘုရားသခင်ကို ယုံကြည်ခြင်းသည် ကောင်းချီးမင်္ဂလာများ လက်ခံရရှိခြင်းနှင့် ပျော်ရွှင်စွာ နေထိုင်ခြင်းအကြောင်းသာ မဟုတ်လော။ သူ့ကို ကြည့်ပါဦး၊ ကောင်းချီးမင်္ဂလာများ ရှိသော်လည်း မည်သို့ ခံစားရမည်ကို မသိဘဲ မိမိ၏တာဝန်ကို စိတ်နှလုံးအကြွင်းမဲ့ ထမ်းဆောင်ရန် မိမိ၏မိသားစုနှင့် အသက်မွေးဝမ်းကျောင်းကို စွန့်လွှတ်နေသည်၊ ယင်းမှာ မိုက်မဲသည် မဟုတ်လော။ ကျွန်ုပ်၏မိသားစုသာ ထိုမျှ ချမ်းသာပါက ကျွန်ုပ်သည် ကိုယ့်အိမ်၌ကိုယ် ပျော်ရွှင်စွာနေမည်” ဟု ပြောဆိုကြသည်။ ငါ့ကို ပြောလော့၊ ထိုစကားများထဲတွင် လူ့သဘာဝနှင့် ကိုက်ညီသော၊ အခြားသူများကို တည်ဆောက်ပေးသော ဝါကျတစ်ကြောင်းမျှ ရှိသလော။ (မရှိပါ။) ပိုင်းခြားသိမြင်နိုင်စွမ်း အနည်းငယ် ရှိသောသူတို့သည် ဤသည်ကို ကြားလျှင် “ဤသည်မှာ အဖြစ်မှန်များကို လိမ်လည်ပြောဆိုခြင်း မဟုတ်လော။ ယုံကြည်သူတစ်ဦးအနေဖြင့် ဘုရားသခင်အတွက် မိမိကိုယ်ကို အသုံးခံရန် အရာခပ်သိမ်းကို စွန့်လွှတ်ခြင်းနှင့် ရုပ်ဝတ္ထုဆိုင်ရာ သာယာမှုများကို မလိုက်စားခြင်းသည် ပင်ကိုအားဖြင့် အပြုသဘောဆောင်သော အရာတစ်ခုဖြစ်သော်လည်း ၎င်းတို့က ယင်းကို ပြစ်တင်ရှုတ်ချနေပါသည်” ဟု တွေးထင်ကြပေမည်။ ပိုင်းခြားသိမြင်နိုင်စွမ်းမရှိသော တစ်စုံတစ်ဦးသည် ဤသည်ကို ကြားပါက ၎င်းတို့သည် အထင်အမြင်မှားစေခြင်းနှင့် နှောင့်ယှက်ခြင်းကို ခံရလိမ့်မည်၊ ဘုရားသခင်ကို ယုံကြည်ခြင်းအတွက် ၎င်းတို့၏ စိတ်အားထက်သန်မှုနှင့် မိမိတို့၏ တာဝန်ကို ထမ်းဆောင်ရန် အမှုအရာများကို စွန့်လွှတ်ပြီး မိမိတို့ကိုယ်ကို အသုံးခံခြင်းအတွက် ၎င်းတို့၏ စိတ်အားထက်သန်မှုသည် ချက်ချင်းပင် အကြီးအကျယ် လျော့ကျသွားလိမ့်မည်။ အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သောသူတို့၏ စကားများသည် နည်းပါးသော်လည်း ၎င်းတို့သည် အခြားသူများအပေါ် သက်ရောက်စေသည့် အပျက်သဘောဆောင်သော အကျိုးသက်ရောက်မှုမှာ သိသာထင်ရှားပြီး တစ်စုံတစ်ဦးကို အတန်ကြာ အပျက်သဘောဆောင်စေကာ ပြန်လည် နာလန်ထူနိုင်ခြင်းမရှိစေရန် လုံလောက်သည်။ ဤသည်မှာ အမှန်ပင် မဟုတ်လော။ (ဟုတ်ပါသည်။) ဖြစ်နိုင်ဖွယ်ရှိပုံရသော စကားအနည်းငယ်မျှသည် အချို့လူတို့ကို ကြားရုံမျှဖြင့် အဆိပ်သင့်စေနိုင်သည်။ ထိုသို့သော အဆိပ်သင့်စေသည့်စကားများကို ပြောဆိုနိုင်သောသူတို့၏ လူ့သဘာဝနှင့်ပတ်သက်၍ မည်သို့ဆိုနိုင်သနည်း။ (မကောင်းပါ။) ၎င်းတို့၏ စကားများထဲတွင် ကြားပြီးနောက် တစ်စုံတစ်ဦး၏ ယုံကြည်ခြင်းကို တိုးပွားစေနိုင်သည့် ဝါကျတစ်ကြောင်းမျှ ရှိသလော။ (မရှိပါ။) ဤစကားများအားလုံးသည် အဘယ်နည်း။ ယေဘုယျအားဖြင့် ပြောရလျှင် ၎င်းတို့အားလုံးသည် မယုံကြည်သူများ၏ စကားများသာ ဖြစ်ကြသည်၊ ဝါကျတစ်ကြောင်းမျှ ဘုရားသခင်နောက်သို့ လိုက်သောသူတို့ ပြောဆိုသင့်သည့်စကား မဟုတ်ပေ။ ပို၍ တိတိကျကျဆိုရလျှင် ဤလူတို့ ပြောဆိုသော ဝါကျတစ်ကြောင်းမျှ မည်သည့်လူ့သဘာဝကိုမျှ ထင်ဟပ်ခြင်းမရှိပေ။ လူ့သဘာဝကင်းမဲ့သည်ဟု ဆိုရာ၌ မည်သည့်အရာကို ဆိုလိုသနည်း။ ယင်းမှာ ကိုယ်ကျင့်တရားပင် မပိုင်ဆိုင်ခြင်းကို ဆိုလိုသည်။ ကိုယ်ကျင့်တရားကင်းမဲ့သည်ဟု ဆိုရာ၌ မည်သည့်အရာကို ဆိုလိုသနည်း။ ထိုညီအစ်မသည် ကောင်းမွန်သော နေထိုင်မှုအခြေအနေများနှင့် ချမ်းသာသော မိသားစုတစ်ခု ရှိသည်၊ ပြီးလျှင် ဤလူတို့၏ သဘောထားမှာ အဘယ်နည်း။ ယင်းမှာ အားကျပြီးနောက် ကောင်းကျိုးအတွက် ဆန္ဒပြုကာ မေ့ထားလိုက်ခြင်းမျှသာလော။ (မဟုတ်ပါ။) သို့ဆိုလျှင် ၎င်းတို့၏ သဘောထားမှာ အဘယ်နည်း။ မနာလိုခြင်း၊ ဒေါသထွက်ခြင်း၊ မကျေမချမ်းဖြစ်ခြင်းနှင့် ၎င်းတို့၏ စိတ်နှလုံးထဲ၌ စောဒကတက်ခြင်းများကို သိုထားခြင်း ဖြစ်သည်။ “သူသည် ထိုမျှများသောငွေကို ပိုင်ဆိုင်ထိုက်ပါသလော။ အဘယ်ကြောင့် ငါ့ထံတွင် ထိုမျှများသောငွေ မရှိရသနည်း။ အဘယ်ကြောင့် ဘုရားသခင်သည် သူ့ကို ကောင်းချီးပေးပြီး ကျွန်ုပ်ကို မပေးသနည်း” ဟူ၍ ဖြစ်၏။ ထိုညီအစ်မသည် ချမ်းသာပြီး ပြည့်စုံသောကြောင့် ၎င်းတို့သည် စစ်မှန်သော အားကျမှု သို့မဟုတ် ကောင်းကျိုးအတွက် ဆန္ဒပြုခြင်း စကားတစ်ခွန်းမျှ မရှိဘဲ မနာလိုခြင်းနှင့် မုန်းတီးခြင်းကို ခံစားကြရသည်။ ဤသည်မှာ အခြေခံအကျဆုံးသော ကိုယ်ကျင့်တရားများပင် လုံးဝမရှိခြင်းကို ညွှန်ပြသည်။ ထိုညီအစ်မသည် ချမ်းသာသောကြောင့် ၎င်းတို့သည် သူ၏ဥစ္စာပစ္စည်းများကို လုယက်ရန် သို့မဟုတ် လိမ်လည်လှည့်ဖြားရန် ကြိုးစားသည့် အခြေအနေနီးပါးအထိ အမုန်းတရားကို သိုထားကြသည်။ ထို့အပြင် ဤညီအစ်မသည် ချမ်းသာသော မိသားစုတစ်ခု၌ အသက်ရှင်နေထိုင်သည့်တိုင် သူသည် ကောင်းမွန်သော နေထိုင်မှုအခြေအနေများနှင့် ရုပ်ဝတ္ထုဆိုင်ရာ သက်သောင့်သက်သာမှုများကို စွန့်လွှတ်ပြီး သူ၏တာဝန်ကို ထမ်းဆောင်ရန် ထွက်ခွာသွားနိုင်သည်၊ ဘုရားသခင်ကို ယုံကြည်သူတစ်ဦးအတွက် ဤသည်မှာ ချီးမွမ်းဂုဏ်ပြုထိုက်သောအရာတစ်ခုဖြစ်သည်၊ ယင်းမှာ လေးစားပြီး အားကျထိုက်သည်။ လူတို့သည် သူ့အား ကောင်းကျိုးအတွက် ဆန္ဒပြုသင့်ပြီး သူ့ထံ ချဉ်းကပ်ကာ သူ့ကို အတုယူရန် ကြိုးစားသင့်သည်။ သို့သော် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သော ဤလူတို့တွင် ဤကဲ့သို့သော ပြောစရာတစ်ခုခု ရှိပါသလော။ (မရှိပါ။) ၎င်းတို့သည် မည်သို့ ပြောဆိုကြသနည်း။ ဝါကျတိုင်းသည် ကြမ်းတမ်းသော စကားလုံးများနှင့် မုန်းတီးခြင်း၏ အရိပ်အယောင်တို့ဖြင့် ပြည့်နှက်နေသည်။ ၎င်းတို့သည် အဘယ်ကြောင့် ဤသို့ ပြောဆိုနိုင်ကြသနည်း။ ယင်းမှာ ၎င်းတို့သည် မိမိတို့၏ ကိုယ်ပိုင်အခြေအနေနှင့်ပတ်သက်၍ မရောင့်ရဲနိုင်ဘဲ မကျေမနပ်ဖြစ်ပြီး မကျေမချမ်းမှုကို သိုထားသောကြောင့် ဖြစ်၍ ထိုသို့ဖြင့် ၎င်းတို့သည် မိမိတို့၏ ဒေါသကို ဤချမ်းသာသော ညီအစ်မအပေါ် ပုံချကြခြင်း ဖြစ်သည်။ ဘုရားသခင်ကို ယုံကြည်သူတစ်ဦးအနေဖြင့် မိမိ၏တာဝန်ကို တက်ကြွစွာ ထမ်းဆောင်နိုင်ပြီး သမ္မာတရားကို လိုက်စားနိုင်သောသူတို့ကို အထူးတလည် တန်ဖိုးထားခြင်း၊ လေးစားအားကျခြင်း၊ ၎င်းတို့ထံမှ သင်ယူခြင်းနှင့် အတုယူခြင်းတို့ကို ပြုလုပ်သင့်သည်။ ထိုညီအစ်မ၏ အားသာချက်များမှ သင်ယူပြီး မိမိတို့၏ အားနည်းချက်များကို ဖြည့်ဆည်းမည့်အစား ဤလူတို့သည် သူ့ကို မိုက်မဲသည်ဟု လှောင်ပြောင်ကြပြီး သူ၏ခင်ပွန်းက သူ့ကို ကွာရှင်းမည့်အရေးကို မျှော်လင့်ကြသည်၊ ၎င်းတို့သည် သူ၏ ကျဆုံးခန်းကို မြင်တွေ့ရန် စောင့်ဆိုင်းနေကြသည်။ ထိုညီအစ်မသည် သူ၏ခင်ပွန်း၏ အမှန်တကယ် ကွာရှင်းခြင်းကို ခံရပါက ၎င်းတို့သည် ဝမ်းမြောက်ကြမည် မဟုတ်လော။ ၎င်းတို့၏ ဆန္ဒသည် ပြည့်စုံသွားမည် မဟုတ်လော။ ဤသည်မှာ ၎င်းတို့၏ စစ်မှန်သော ခံစားချက်များနှင့် ၎င်းတို့၏ ကြံရွယ်ချက်နှင့် ရည်ရွယ်ချက်ကိုလည်း ထင်ဟပ်စေသည်။ ၎င်းတို့သည် အခြားသူများကို ကောင်းသော ဆန္ဒမပြုကြပေ။ ကောင်းစားနေသော သို့မဟုတ် မိမိတို့ထက် သာလွန်သော မည်သူ့ကိုမဆို မြင်တွေ့ခြင်းသည် ၎င်းတို့ကို မနာလိုခြင်းနှင့် မကျေမနပ်ဖြစ်ခြင်းတို့ဖြင့် ပြည့်စေသည်။ ဘုရားသခင်အပေါ် အခြားတစ်စုံတစ်ဦး၏ ယုံကြည်ခြင်းသည် မည်မျှပင် ခိုင်မာသည်ဖြစ်စေ ထိုလူပုဂ္ဂိုလ်သည် ၎င်းတို့ထက် သာလွန်ပါက လက်ခံနိုင်မည်မဟုတ်ပေ။ ၎င်းတို့သည် လူ့သဘာဝ လုံးဝကင်းမဲ့ပြီး ကောင်းချီးပေးခြင်း သို့မဟုတ် တည်ဆောက်ပေးခြင်း စကားတစ်ခွန်းကိုမျှ ပြောဆိုနိုင်စွမ်းမရှိကြပေ။ ၎င်းတို့သည် အဘယ်ကြောင့် ထိုသို့သောစကားများကို မပြောဆိုနိုင်ကြသနည်း။ အဘယ်ကြောင့်ဆိုသော် ၎င်းတို့၏ လူ့သဘာဝသည် အလွန်ဆိုးယုတ်သောကြောင့် ဖြစ်သည်။ ၎င်းတို့သည် မပြောဆိုလိုခြင်းကြောင့် မဟုတ်သကဲ့သို့ မှန်ကန်သောစကားလုံးများ ကင်းမဲ့နေခြင်းကြောင့်လည်း မဟုတ်ပေ၊ ထိုအစား ၎င်းတို့၏ စိတ်နှလုံးများသည် မနာလိုခြင်း၊ မကျေမချမ်းဖြစ်ခြင်းနှင့် ဒေါသထွက်ခြင်းတို့ဖြင့် ပြည့်နှက်နေသောကြောင့် ကောင်းချီးပေးခြင်းစကားများကို ပြောဆိုရန် မဖြစ်နိုင်ခြင်း ဖြစ်သည်။ သို့ဆိုလျှင် ၎င်းတို့၏ စိတ်နှလုံးများသည် ထိုသို့သော ဖောက်ပြန်ပျက်စီးသည့်အရာများဖြင့် ပြည့်နှက်နေသည်ဟူသောအချက်က ၎င်းတို့၏ လူ့သဘာဝသည် မလိုမုန်းထားသောသဘောရှိကြောင်းကို ညွှန်ပြနိုင်သလော။ (ဟုတ်ပါသည်။) ညွှန်ပြနိုင်ပါသည်။ အဘယ်ကြောင့်ဆိုသော် ၎င်းတို့သည် ထိုသို့သော ဖောက်ပြန်ပျက်စီးသည့် စိတ်သဘောထားများကို ထုတ်ဖော်ပြသသောကြောင့် အခြားသူများအတွက် ပိုင်းခြားသိမြင်ရန် လွယ်ကူသွားပြီး အခြားသူများသည် ၎င်းတို့၏ ဖောက်ပြန်ပျက်စီးသော အနှစ်သာရကို ထွင်းဖောက်မြင်နိုင်သောကြောင့် ဖြစ်သည်။

နောက်ထပ် ဥပမာတစ်ခု ရှိသည်။ ညီအစ်မတစ်ဦးသည် ဘုရားသခင်ကို မယုံကြည်မီက သူ၏ယောက်မနှင့် အစဉ်အမြဲ ပဋိပက္ခဖြစ်ခဲ့သည်။ နောက်ပိုင်းတွင် ၎င်းတို့နှစ်ဦးစလုံး ဘုရားသခင်ကို ယုံကြည်လာကြပြီး ဘုရားသခင်၏ နှုတ်ကပတ်တော်များကို စားသောက်ခြင်းမှတစ်ဆင့် သမ္မာတရားအချို့ကို နားလည်လာကြသည်။ ၎င်းတို့သည် လူတစ်ဦးအနေဖြင့် မည်သို့ ကျင့်ကြံပြုမူသင့်သည်နှင့် အခြားသူများနှင့် မည်သို့သင့်မြတ်သင့်သည်ကို သိရှိနားလည်ခဲ့ကြပြီး ၎င်းတို့၏ ဖောက်ပြန်ပျက်စီးခြင်း ထုတ်ဖော်ခံရသည့်အခါ အချင်းချင်း ပွင့်လင်းစွာ ပြောဆိုနိုင်ခဲ့ကြကာ မိမိတို့ကိုယ်ကို သိရန် ကြိုးစားနိုင်ခဲ့ကြသည်၊ ယင်းက ၎င်းတို့၏ ဆက်ဆံရေးကို တိုး၍ သဟဇာတဖြစ်စေခဲ့သည်။ အချို့လူတို့သည် ၎င်းတို့ကို အားကျပြီး “သူတို့ကို ကြည့်ပါဦး၊ မိသားစုတစ်စုလုံး ဘုရားသခင်ကို ယုံကြည်ကြပြီး ယောက်မများက ညီအစ်မအရင်းများကဲ့သို့ပင်ဖြစ်သည်။ ဤအရာအားလုံးက ဘုရားသခင်အပေါ် သူတို့၏ ယုံကြည်ခြင်းကြောင့် ဖြစ်သည် မဟုတ်လား။ ဘာသာတရားမရှိသူများ၏ မိသားစုများသည် လုံးဝ အဆင်မပြေနိုင်ကြပါ၊ အစဉ်သဖြင့် ရန်ဖြစ်ပြီး အချင်းချင်း ပြိုင်ဆိုင်နေကြသည်။ တစ်မအေတည်းမှ မွေးသည့်မောင်နှမအရင်းများတွင်ပင် ဖြစ်လေ့ရှိသည်။ ယုံကြည်သူများက များစွာ ပို၍ ကောင်းသည်။ ယောက်မများသည် ညီအစ်မအရင်းများ မဟုတ်လျှင်ပင် ၎င်းတို့ ဘုရားသခင်ကို ယုံကြည်သရွေ့ လိုက်စားရန် တူညီသောပန်းတိုင်များဖြင့်၊ တူညီသောလမ်းကြောင်းကို လျှောက်ပြီး စိတ်တူကိုယ်တူရှိသဖြင့် ၎င်းတို့သည် ဝိညာဉ်တွင် သဟဇာတဖြစ်ကြသည်၊ ယင်းမှာ အံ့ဩစရာပင်” ဟု ပြောဆိုကြပေမည်။ ဤသည်က ဘုရားသခင်ကို စစ်မှန်စွာ ယုံကြည်သောသူတို့သည် ဘာသာတရားမရှိသူများနှင့် ကွဲပြားကြောင်း ပြသသည်။ မတူညီသော မိသားစုများမှ လူတို့သည် ဘုံပန်းတိုင်များနှင့် လိုက်စားမှုများဖြင့် အတူတကွ စုစည်းကြပြီး ဘုရားသခင်၏ အိမ်တော်၌လည်းကောင်း၊ ဘုရားသခင်၏ ရှေ့မှောက်၌လည်းကောင်း သဟဇာတဖြစ်ကြသည်။ ဤသို့ပြောဆိုရခြင်း၏ ရည်ရွယ်ချက်မှာ ဤသည်မှာ ဘုရားသခင်၏ နှုတ်ကပတ်တော်များနှင့် အမှုတော်၏ အကျိုးသက်ရောက်မှုဖြစ်ကြောင်း၊ ဘုရားသခင်က လူတို့အား ပေးသနားသော ကျေးဇူးတော်ဖြစ်ကြောင်း လူတို့ကို သိစေရန် ဖြစ်သည်။ ဤသည်မှာ မယုံကြည်သူတို့ မပိုင်ဆိုင်သော၊ မခံစားနိုင်သော အရာတစ်ခု ဖြစ်သည်။ အနည်းဆုံးအားဖြင့် ဤသည်ကို ကြားပြီးနောက် လူတစ်ဦးသည် ဘုရားသခင်ကို ယုံကြည်ခြင်းသည် ကောင်းမွန်သည်ဟု ခံစားရမည်ဖြစ်ပြီး ဘုရားသခင်အပေါ် ယုံကြည်ခြင်းနှင့်ပတ်သက်၍ နှစ်သက်ဖွယ်သော အထင်အမြင်တစ်ခု ရှိလာမည်ဖြစ်သည်။ သို့သော် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သောသူသည် ဤအကြောင်းနှင့်ပတ်သက်၍ မည်သို့ပြောဆိုသည်ကို နားထောင်ကြည့်လော့။ “ဟွန်း။ ထိုယောက်မများသည် အပြင်ပန်းတွင် သင့်မြတ်ပုံရပြီး စုဝေးပွဲများအတွင်းတွင် အကုန် သဟဇာတ ဖြစ်နေကြပုံရသည်ဟု သင် မြင်ကောင်းမြင်နိုင်သည်။ သို့သော်လည်း တစ်ခါတစ်ရံတွင် ၎င်းတို့သည် တစ်ယောက်နှင့်တစ်ယောက် ကတောက်ကဆ မဖြစ်ကြသလော။ သင်မသိပါ၊ ၎င်းတို့သည် ယခင်က အလွန်ပင် ဆိုးရွားစွာ ရန်ဖြစ်ခဲ့ဖူးသည်” ဟူ၍ ဖြစ်လေသည်။ အခြားသူများက “အတိတ်က ၎င်းတို့၏ အငြင်းပွားမှုများနှင့် အချေအတင်ဖြစ်မှုများမှာ ၎င်းတို့သည် ဘုရားသခင်ကို မယုံကြည်ခဲ့ကြခြင်းနှင့် သမ္မာတရားကို နားမလည်ခဲ့ကြခြင်းတို့ကြောင့် ဖြစ်သည်။ ယခုအခါတွင် ၎င်းတို့သည် အလွန်အမင်း သင့်မြတ်နေကြပြီ။ ဤသည်မှာ ယခုအခါ ၎င်းတို့နှစ်ဦးစလုံး ဘုရားသခင်ကို ယုံကြည်ကြခြင်း၊ သမ္မာတရားအချို့ကို နားလည်ကြခြင်း၊ မိတ်သဟာယဖွဲ့ခြင်းတွင် တစ်ဦးနှင့်တစ်ဦး ပွင့်လင်းစွာ ပြောဆိုနိုင်ကြခြင်း၊ မိမိတို့၏ ဖောက်ပြန်ပျက်စီးမှုများကို သိရှိကြခြင်းနှင့် တာဝန်များကို မကြာခဏဆိုသလို အတူတကွ ထမ်းဆောင်ကြခြင်းတို့ကြောင့် ဖြစ်သည်။ ၎င်းတို့ကြားတွင် ကတောက်ကဆဖြစ်ခြင်းအချို့ ရှိနေသေးသော်လည်း ၎င်းတို့သည် ယေဘုယျအားဖြင့် တစ်ဦးနှင့်တစ်ဦး မိမိတို့၏ အမှားများကို ဝန်ခံနိုင်ကြပြီး မိမိတို့ လုပ်ဆောင်သမျှအပေါ် တစ်ဦးနှင့်တစ်ဦး တိုင်ပင်ဆွေးနွေးနိုင်ကြသည်။ ဤသည်မှာ မည်သည့် ဘာသာတရားမရှိသူမျှ ၎င်းတို့၏ သွေးသားတော်စပ်သူများနှင့်ပင်လျှင် မရရှိနိုင်သော အရာတစ်ခု ဖြစ်လေသည်” ဟု ပြောဆိုကြသည်။ သို့တိုင် အမှားနှင့် အမှန်ကို ပြောင်းပြန်လှန် ပြောဆိုသောသူက “မည်သည့်မိသားစုတွင်များ ရန်မဖြစ်ဘဲ ရှိသနည်း။ ယောက်မတွေဆိုသည်ကို ထားဘိဦး၊ မွေးချင်း ညီအစ်မအရင်းအချာများပင် ရန်ဖြစ်ကြသည် မဟုတ်လော။ ယခု ၎င်းတို့ သင့်မြတ်နေပုံမှာ အခြားသူများကို ပြသရန် ဟန်ဆောင်ခြင်းမျှသာ ဖြစ်သည်။ ၎င်းတို့၏ ယောက္ခထီး သေဆုံးသွားသည်နှင့် ၎င်းတို့ အမွေလုကြမည် မဟုတ်ဟူသည်ကို ကျွန်ုပ် အလျှင်းမယုံကြည်ပါ။ ဘုရားသခင်ကို ယုံကြည်ခြင်းဆိုသည်မှာ ဆန္ဒတစ်ခု၊ ဝိညာဉ်ရေးရာ နှစ်သိမ့်မှုတစ်မျိုးမျှသာ မဟုတ်လော။ ထိုအရာကြောင့် ၎င်းတို့သည် ဤမျှလောက်များသော စည်းစိမ်ဥစ္စာကို အမှန်တကယ် စွန့်လွှတ်နိုင်မည်လော။ လုံးဝ မဖြစ်နိုင်ပေ” ဟု ပြောဆိုသည်။ ဤစကားများထဲတွင် အဖြစ်မှန်များနှင့် ကိုက်ညီသော ပြောဆိုချက်တစ်ကြောင်းမျှ ရှိသလော။ လူတို့၏ ကောင်းကျိုးချမ်းသာအတွက် ဆန္ဒပြုခြင်း၊ ကောင်းချီးပေးခြင်း တစ်ခုခု ရှိသလော။ (မရှိပါ။) အခြားသူများ မိမိတို့ကဲ့သို့ပင် ဘုရားသခင်၏ ကျေးဇူးတော်ကို ခံစားနေရသည်ကို မြင်တွေ့ပြီးနောက် ဘုရားသခင်ကို ယုံကြည်ခြင်းသည် အမှန်တကယ် ကောင်းမွန်သည်ဟူသော ပုဂ္ဂိုလ်ရေးဆိုင်ရာ ခံစားချက်ကို ဖော်ပြသည့်အရာ တစ်ခုခု ရှိပါသလော။ (မရှိပါ။) အမှားနှင့် အမှန်ကို ပြောင်းပြန်လှန် ပြောဆိုသောသူတို့၏ အမြင်၌ ညီအစ်ကိုမောင်နှမများကြားတွင် ဖြစ်ပေါ်သော ဤပုဂ္ဂိုလ်ရေးဆိုင်ရာ ပြောင်းလဲမှုများအားလုံးသည် လိမ်လည်လှည့်ဖြားခြင်းသာ ဖြစ်သည်၊ ဘုရားသခင်ကို ယုံကြည်ခြင်းမှ ရရှိသော သမ္မာတရားကို ဆည်းပူးခြင်းနှင့် စိတ်သဘောထားများ ပြောင်းလဲခြင်းတို့အားလုံးသည် အတုအယောင်များသာ ဖြစ်သည်၊ ဘုရားသခင်သည် လူတို့ကို သန့်စင်ပေးနိုင်သည်၊ ဘုရားသခင်သည် လူတို့ကို ပြောင်းလဲပေးနိုင်သည်ဟု ၎င်းတို့ မယုံကြည်ကြပေ။ ၎င်းတို့၏ စကားများမှနေ၍ လူတို့အပေါ် ၎င်းတို့၏ မဆင်မခြင် ဝေဖန်ခြင်း၊ မုန်းတီးခြင်းနှင့် ကျိန်ဆဲခြင်းတို့ကို မြင်တွေ့နိုင်ရုံသာမက လူတို့အပေါ် ဘုရားသခင်၏ အမှုတော်နှင့် နှုတ်ကပတ်တော်တို့ဖြင့် ရရှိခဲ့သော အကျိုးသက်ရောက်မှုကို ၎င်းတို့၏ မယုံကြည်ခြင်းနှင့် ငြင်းပယ်ခြင်းကိုလည်း မြင်တွေ့နိုင်သည်။ ထိုယောက်မများသည် ကောင်းမွန်သော ဆက်ဆံရေးရှိကြပြီး ဘုရားသခင်အပေါ် ၎င်းတို့၏ ယုံကြည်ခြင်းကြောင့် အတူရှိသည့်အခါ အချင်းချင်း သည်းခံခြင်းနှင့် စိတ်ရှည်ခြင်းကို ပြသကြသည်။ အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သော ဤလူသည် သူ၏စိတ်နှလုံးထဲ၌ မသက်မသာဖြစ်ပြီး မကျေမနပ်ဖြစ်ကာ ထိုညီအစ်မများအကြား ရန်တိုက်ပေးရန် ဖြစ်နိုင်သမျှ နည်းလမ်းတိုင်းကို ကြိုးစားသည်၊ ထိုယောက်မများ တွေ့ဆုံသည့်အခါ ရန်ဖြစ်ပြီး တိုက်ခိုက်ကြအောင် လုပ်နိုင်ပါက သူသည် ပျော်ရွှင်သွားသည်။ ဤသည်မှာ မည်သို့သော အမူအရာမျိုးနည်း။ ဤသည်မှာ မည်သို့သော စိတ်နေသဘောထားမျိုးနည်း။ သူ၏ စိတ်နေသဘောထားမှ အကဲဖြတ်လျှင် ဤသည်မှာ အနည်းငယ် စိတ်ဖောက်ပြန်ခြင်း မဟုတ်လော။ (ဟုတ်ပါသည်။) သူ၏ အမူအရာအားဖြင့်ဆိုလျှင် ယင်းမှာ ရုပ်ဆိုးအကျည်းတန်သော အမူအရာတစ်ခု မဟုတ်လော။ (ဟုတ်ပါသည်။) သို့တိုင် ဤလူစားမျိုးသည် အသင်းတော်အသက်တာ၌ ပါဝင်နေဆဲဖြစ်ပြီး မိမိတို့၏ တာဝန်များကို ထမ်းဆောင်သောသူတို့တွင်လည်း ဤကဲ့သို့သောလူများ မရှားပါးပေ။ ဤလူတို့ကို “အဆိပ်အတောက်ရှိသောလျှာ” ရှိသည်ဟု အများအားဖြင့် ရည်ညွှန်းကြသည်။ အမှန်တကယ်တွင် ၎င်းတို့၏ လျှာသည် အဆိပ်အတောက်ရှိရုံသာမက ၎င်းတို့၏ အတွင်းစိတ်ကမ္ဘာသည် မယုံနိုင်လောက်အောင် မှောင်မိုက်ပြီး အဆိပ်အတောက်ပြင်းလှသည်။ ညီအစ်ကိုမောင်နှမများ မည်မျှပင် ကောင်းမွန်သော အတွေ့အကြုံဆိုင်ရာ သက်သေခံချက်များကို မျှဝေကြပါစေ ၎င်းတို့၏ အမြင်၌ ဤအရာများအားလုံးသည် လူမှဖန်တီးထားခြင်းဖြစ်ပြီး စိတ်ကူးယဉ်ထားခြင်းသာဖြစ်ကာ ၎င်းတို့နှင့်ပတ်သက်၍ ထူးခြားသောအရာ တစ်ခုမျှမရှိပေ။ ဘုရားသခင်သည် မည်သူ့အပေါ်၌မဆို တရားစီရင်ခြင်းနှင့် ပြစ်တင်ဆုံးမခြင်းအမှုကို ပြုလုပ်ပြီး သိသာထင်ရှားသော အကျိုးကျေးဇူးများကို ဖြစ်ပေါ်စေကာ ထိုသူတို့သည် မတ်တပ်ရပ်ပြီး မိမိတို့၏ အတွေ့အကြုံကို မျှဝေကာ ဘုရားသခင်ကို သက်သေခံနိုင်သည့်တိုင် ဤလူစားမျိုးသည် စိတ်နှလုံးထဲ၌ ယင်းကို မထီမဲ့မြင်ပြုပြီး “ထိုအရာက မည်သည့်အရာများ ထူးကဲနေပါသနည်း။ တရားဒေသနာများစွာကို ကြားနာပြီးနောက် မည်သူမဆို နားလည်မှု အနည်းငယ်တော့ ရှိမည် မဟုတ်လော။ အတွေ့အကြုံဆိုင်ရာ သက်သေခံချက် ဆောင်းပါးတစ်ပုဒ် ရေးလိုက်ရုံမျှဖြင့် မိမိကိုယ်ကို အောင်နိုင်သူဟု သတ်မှတ်ကာ ကျေနပ်နေကြသလော။ အနာဂတ်တွင် အမှုအရာများ မှားယွင်းလာသည့်အခါ သင်တို့သည် ဘုရားကို စောဒကတက်ဦးမည်လော ဆိုသည်ကို ကျွန်ုပ် မြင်လိုလှသည်။ ဘုရားက သင်တို့၏ သားသမီးကို ယူသွားခဲ့လျှင် သင်တို့ ငိုကြွေးမည်လော၊ ထိုအခါတွင် ဘုရားသခင်ကို ဆက်၍ ယုံကြည်နိုင်ဦးမည်လော ဆိုသည်ကို ကျွန်ုပ် မြင်လိုလှသည်” ဟု စဉ်းစားကြသည်။ သင်တို့၏ အထင်၌ ၎င်းတို့၏ စိတ်နှလုံးထဲတွင် မည်သည့်အရာများ ပြည့်နှက်နေသနည်း။ ယင်းမှာ လောကကြီးတစ်ခုလုံး ဖရိုဖရဲဖြစ်စေလိုသော ဆန္ဒ၊ လူတို့ မှန်သောလမ်းခရီးကို လျှောက်လှမ်းမည်ကို ကြောက်ရွံ့ခြင်း မဟုတ်လော။ အတိုချုပ်အားဖြင့် မည်သူ့မိသားစု၌မဆို မည်သည့်အရာ ဖြစ်ပျက်ပါစေ ၎င်းတို့သည် ယင်းအပေါ် မှတ်ချက်အချို့ ပေးရမည်ဖြစ်သော်လည်း ၎င်းတို့ မည်သို့ပင် ပြောဆိုပါစေ ဤလူတို့အားလုံး၌ လက္ခဏာတစ်ခုရှိသည်၊ ယင်းမှာ မည်သူမျှ ကောင်းစားသည်ကို မလိုလားခြင်း ဖြစ်သည်၊ ၎င်းတို့သည် လူတိုင်းကို လုံးဝ အသုံးမကျသကဲ့သို့ ပြောဆိုကြသည်၊ အခြားသူများကို အမှိုက်သရိုက်ကဲ့သို့ ပြောဆိုခြင်းက ၎င်းတို့ကို ပျော်ရွှင်စေပြီး ၎င်းတို့သည် အခြားသူများ၏ ကံဆိုးမိုးမှောင်ကျခြင်း၌ အစဉ်အမြဲ ပျော်မွေ့ကြသည်။ တစ်စုံတစ်ဦးသည် ချမ်းသာသော မိသားစုတစ်ခု ရှိပါက ၎င်းတို့သည် မနာလိုဖြစ်ကြသည်၊ ဒေါသထွက်ကြသည်၊ မုန်းတီးကြပြီး ၎င်းတို့၏ စိတ်နှလုံးထဲ၌ အစဉ်မပြတ် စောဒကတက်ကြကာ ဘုရားသခင်သည် ထိုလူ၏ ဥစ္စာဓနနှင့် သူခံစားရသော ကျေးဇူးတော်ကို ချွတ်ယူပြီး မိမိတို့အား ပေးသနားပါရန် ဆန္ဒရှိကြသည်။ ဤလူပုဂ္ဂိုလ်များ လူတို့၏ ကွယ်ရာတွင် ပြောဆိုသော စောဒကတက်သည့်စကားများကို နားထောင်၍ပင် မရနိုင်ပေ။ ၎င်းတို့သည် မည်သည့်နည်းနှင့်မဆို ဘုရားသခင်ကို ယုံကြည်သူများနှင့် တူသလော။ ဤလူစားမျိုးသည် မိမိတို့ကိုယ်ကို ဟန်ဆောင်ရာ၌လည်း ကျွမ်းကျင်ကြသည်မှာ ပြောစရာမလိုပေ။ ၎င်းတို့၏ စိတ်နှလုံးများသည် မည်မျှပင် မလိုမုန်းထားစိတ်ရှိသည် သို့မဟုတ် မှောင်မိုက်သည်ဖြစ်စေ စုဝေးပွဲများအတွင်း ညီအစ်ကိုမောင်နှမများ၏ ရှေ့မှောက်၌ ၎င်းတို့သည်လည်း မိမိတို့၏ နားလည်မှုနှင့် ထိုးထွင်းသိမြင်မှုများကို မိတ်သဟာယဖွဲ့ကြမည်ဖြစ်ပြီး မိမိတို့ကိုယ်ကို ဟန်ဆောင်ရန်၊ မိမိတို့အတွက် “ထွန်းလင်းတောက်ပသော” ပုံရိပ်ကောင်းတစ်ခုကို ဖန်တီးရန် ကြီးကျယ်သော အယူဝါဒများကို ကရားရေလွှတ် ပြောကြလိမ့်မည်။ သို့သော် ကွယ်ရာတွင်မူ ၎င်းတို့သည် လူကဲ့သို့ မပြောဆိုကြ၊ မပြုမူကြပေ။ လူအများစုသည် ဤလူပုဂ္ဂိုလ်များနှင့် အပြန်အလှန် ဆက်ဆံဖူးခြင်းမရှိပါက ၎င်းတို့၏ စစ်မှန်သော သရုပ်သကန်များ သို့မဟုတ် ၎င်းတို့၏ စိတ်နှလုံးနက်ရှိုင်းရာ၌ ရှိသောအရာကို မသိရှိပါက စုဝေးပွဲများအတွင်း ၎င်းတို့ မှန်ကန်စွာ ပြောဆိုသည်ကို ကြားရုံမျှဖြင့် ၎င်းတို့၏ လူ့သဘာဝသည် မည်မျှ ယုတ်မာသည် သို့မဟုတ် ရက်စက်ကြမ်းကြုတ်သည်ကို သတိပြုမိကြမည်မဟုတ်သကဲ့သို့ ၎င်းတို့၏ ကိုယ်ကျင့်တရားသည် မည်မျှ နိမ့်ကျသည်ကိုလည်း သတိပြုမိကြမည်မဟုတ်ဘဲ ၎င်းတို့ကို ကောင်းသည်ဟုပင် ထင်မှတ်ကြလိမ့်မည်။ ၎င်းတို့နှင့် အချိန်ပို၍ကြာကြာ နေထိုင်ပြီး ကွယ်ရာရှိ အသက်တာ၌ ၎င်းတို့၏ လုပ်ဆောင်ချက်များနှင့် အပြုအမူများကို နားလည်လာပြီးမှသာလျှင် လူတို့သည် ၎င်းတို့အပေါ် တဖြည်းဖြည်း ပိုင်းခြားသိမြင်လာကြပြီး စက်ဆုပ်ရွံရှာမှုကို ခံစားလာကြသည်။ သို့ဖြစ်၍ တစ်စုံတစ်ဦးကို ပိုင်းခြားသိမြင်ခြင်းသည် ၎င်းတို့ စုဝေးပွဲများအတွင်း ပြောဆိုသော နှစ်သက်ဖွယ်စကားများအပေါ်၌သာ အခြေမခံသင့်ပေ၊ ၎င်းတို့၏ အနှစ်သာရနှင့် စရိုက်မှန်ကို ထွင်းဖောက်မြင်နိုင်ရန် ကွယ်ရာရှိ အသက်တာ၌ ၎င်းတို့၏ လုပ်ဆောင်ချက်များနှင့် စကားများကိုလည်း စောင့်ကြည့်လေ့လာရမည်။

လူကဲ့သို့ မပြောဆိုခြင်းအပြင် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သော လူစားမျိုးတွင် နောက်ထပ် လက္ခဏာတစ်ခု ရှိသည်။ ၎င်းတို့သည် လူတိုင်းနှင့် အရာရာတိုင်းအပေါ် မှတ်ချက်ပေးလိုကြသည်၊ ၎င်းတို့ မရင်းနှီးသော သို့မဟုတ် တစ်ခါမျှ အပြန်အလှန် ဆက်ဆံဖူးခြင်းမရှိသောသူတို့ကိုပင် မှတ်ချက် ပေးလိုကြပြီး အခြားလူများ၏ ဘဝထဲရှိ အသေးငယ်ဆုံးသော ကိစ္စရပ်များကိုပင် ချမ်းသာမပေးကြပေ။ ၎င်းတို့၏ မှတ်ချက်ပေးခြင်း၏ ရလဒ်မှာ မည်မျှပင် အပြုသဘောဆောင်သော အရာတစ်ခုဖြစ်ပါစေ ၎င်းတို့၏ ပြောဆိုသောစကားအားဖြင့် အပျက်သဘောဆောင်သော အရာများအဖြစ်သို့ လိုရာဆွဲပြောခြင်းခံရသည်၊ မည်မျှပင် သင့်လျော်သော အရာတစ်ခုဖြစ်ပါစေ ၎င်းတို့၏ ယုတ်မာသောနှုတ်မှ ထွက်လာသည့်အခါ အပျက်သဘောဆောင်သော အရာတစ်ခုအဖြစ်သို့ လွဲချော်သွားသည်။ ဤသည်က ၎င်းတို့ကို ပျော်ရွှင်စေပြီး ကောင်းစွာ စားဝင်အိပ်ပျော်စေသည်။ ငါ့ကို ပြောလော့၊ ဤသည်မှာ မည်သို့သော သတ္တဝါမျိုးနည်း။ ဥပမာအားဖြင့် အချို့ညီအစ်ကိုမောင်နှမများသည် ယခုနှစ်တွင် ဝင်ငွေကောင်းခဲ့ပြီး ငွေရေးကြေးရေး ပိုမိုကောင်းမွန်လာကာ ဆယ်ဖို့တစ်ဖို့ထက် ကျော်လွန်၍ အနည်းငယ်ပို၍ ပူဇော်ဆက်ကပ်ကြလျှင် ၎င်းတို့သည် မနာလိုဖြစ်လာပြီး “ယခုနှစ်တွင် သင်တို့သည် အဘယ်ကြောင့် ဤမျှလောက်များစွာ ပူဇော်ဆက်ကပ်ကြသနည်း။ လူတစ်ဦးတစ်ယောက်သည် ကောင်းမြတ်သည် သို့မဟုတ် ဆိုးယုတ်သည်ကို ဘုရား ဆုံးဖြတ်တော်မူခြင်းမှာ သင်တို့ မည်မျှ ပူဇော်ဆက်ကပ်သည်ဟူသည့်အပေါ်၌ အခြေမခံပေ။ သင်တို့၏ စိတ်အားထက်သန်မှုက အဘယ်အကျိုးရှိမည်နည်း။ ဘုရားအိမ်တော်သည် ငွေကြေး မလိုအပ်ပေ” ဟု ပြောဆိုကြသည်။ မနှစ်မြို့ဖွယ်သော စကားများသည် တစ်ဖန် ထွက်ပေါ်လာပြန်သည် မဟုတ်လော။ မည်သူမဆို သင့်လျော်သော အရာတစ်ခုခုကို လုပ်ဆောင်သည်ဖြစ်စေ၊ သမ္မာတရားနှင့် ကိုက်ညီသော အရာတစ်ခုခုကို လုပ်ဆောင်သည်ဖြစ်စေ ၎င်းတို့သည် ယင်းကို ကန့်ကွက်ဖွယ်အဖြစ် တွေ့ရှိကြပြီး ၎င်းတို့၏ စိတ်နှလုံးထဲ၌ အလွန်အမင်း စက်ဆုပ်ရွံရှာမှုကို ခံစားကြရသည်။ ၎င်းတို့သည် သင်တို့ကို ချုပ်ကိုင်နိုင်ရန် ဖြစ်နိုင်သမျှ နည်းလမ်းအားလုံးကို ကြိုးစားကြသည်၊ သင်တို့ကို တိုက်ခိုက်ရန်၊ စွပ်စွဲရန်နှင့် ပြစ်တင်ရှုတ်ချရန် ဆင်ခြေများကို ရှာဖွေကြသည်၊ သင်တို့ကို အလဲထိုးပြီး သင်တို့ထံမှ အပြုသဘောဆောင်ခြင်းကို ဖယ်ရှားကာ သင်တို့ကို လုံးဝ ရှုပ်ထွေးသွားစေပြီး အမှားနှင့်အမှန်ကို မခွဲခြားနိုင်တော့သည်အထိ ပြုလုပ်ကြသည်။ ထို့နောက် ၎င်းတို့သည် အားရပါးရ ရယ်မောကြပြီး စိတ်ထဲ၌ သင်တို့ကို လှောင်ပြောင်ကာ မိမိတို့ကိုယ်ကို “သင်သည် ထိုမျှသာ ထိုက်တန်သည်၊ သို့တိုင်အောင် သင်သည် အတွေ့အကြုံဆိုင်ရာ သက်သေခံချက်အကြောင်း ပြောသေးသည်” ဟု ပြောဆိုကြသည်။ ဤသည်မှာ မိမိ၏ စရိုက်မှန်ကိုပြနေသော နတ်ဆိုးတစ်ကောင် မဟုတ်လော။ ဤသည်တို့မှာ စာတန်၏အစေခံတစ်ဦး၊ အန္တိခရစ်တစ်ဦး၏ စကားများ မဟုတ်လော။ (ဟုတ်ပါသည်။) ဤလူစားမျိုးအကြောင်းကို ငါ ပြောလေလေ၊ ဒေါသထွက်လေလေ၊ ပို၍ စက်ဆုပ်ရွံရှာလေလေ ဖြစ်လာသည်။ သင်တို့သည် ထိုသို့သော လူပုဂ္ဂိုလ်များကို ကြုံတွေ့ဖူးသလော။ ၎င်းတို့၏ အသွင်အပြင် သို့မဟုတ် မျက်နှာအသွင်အပြင် မည်သို့ပင်ဖြစ်စေ ၎င်းတို့သည် အမှားနှင့် အမှန်ကို ပြောင်းပြန်လှန် ပြောဆိုတော့မည်ဆိုလျှင် ၎င်းတို့၏ အမူအရာများသည် ထူးဆန်းလာသည်။ နှုတ်ခမ်းများ ရှုံ့မဲ့သွားသည်၊ မျက်လုံးများ စွေစောင်းလာသည်၊ အခြားသူများကို တည့်တည့်မကြည့်တော့ပေ၊ အချို့လူများ၏ မျက်နှာအသွင်အပြင်များသည် နေရာမှပင် ရွေ့သွားပုံရသည်။ ဤသည်မှာ ၎င်းတို့သည် လူကဲ့သို့ မပြောဆိုတော့မည်ဖြစ်ကြောင်း သင်တို့ကို ပြောပြနေသည့် သင်တို့ထံသို့ ပေးပို့နေသော အချက်ပြမှုတစ်ခု ဖြစ်သည်။ သို့ဆိုလျှင် သင်တို့ မည်သို့ပြုလုပ်မည်နည်း။ သင်တို့သည် ဤအချက်ပြမှုကို လက်ခံမည်လော သို့မဟုတ် ပိတ်ဆို့လိုက်မည်လော။ (ပိတ်ဆို့လိုက်ပါမည်။) သင်တို့သည် ခပ်ခွာခွာနေရမည်ဖြစ်ပြီး ၎င်းတို့အား “စကားမပြောနှင့်။ ကျွန်ုပ် နားမထောင်လို။ သင်တို့သည် အတင်းအဖျင်း လွန်စွာပြောတတ်ကြသည်။ လူပီသစွာ စကားမပြောတတ်လျှင် ကျွန်ုပ်နှင့် ဝေးဝေးတွင်နေပါ။ ကျွန်ုပ်သည် သင်တို့၏ အနှောင့်အယှက်ကို မခံလို၊ ဤသို့သော မလျော်ကန်သည့် လူမှုဆက်ဆံရေးများတွင်လည်း မပါဝင်ပတ်သက်လိုပေ။ သင်တို့ကဲ့သို့သော သူကို ကျွန်ုပ် အရေးစိုက်မည် မဟုတ်” ဟု ပြောဆိုရမည်။ သင်တို့အထဲတွင် မည်သူတို့သည် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သည်၊ မည်သူတို့သည် ထိုသို့သော အမူအရာမျိုး ပိုင်ဆိုင်သည်ကို စောင့်ကြည့်လေ့လာပြီး ထို့နောက် ၎င်းတို့ထံမှ လျင်မြန်စွာ ခပ်ခွာခွာနေကြလော့။ ဤလူပုဂ္ဂိုလ်များ၏ လူ့သဘာဝ၏ လက္ခဏာမှာ အဘယ်နည်း။ ယင်းမှာ အဆိပ်အတောက်ပြင်းစွာ ပြောဆိုခြင်း သို့မဟုတ် ပို၍ အရပ်သုံးစကားဖြင့်ဆိုသော် “အဆိပ်အတောက်ရှိသောလျှာ” ရှိခြင်း ဖြစ်သည်။ ၎င်းတို့၏ အဆိပ်အတောက်ပြင်းသော စကားများကို ဖော်ထုတ်ခြင်းအားဖြင့် ၎င်းတို့ ထုတ်လွှင့်သော အမျိုးမျိုးသော ပြောဆိုချက်များကို သင်တို့ မြင်တွေ့နိုင်သည်၊ ၎င်းတို့၏ ပြောဆိုချက်များမှတစ်ဆင့် ၎င်းတို့၏ အတွင်းစိတ်ကမ္ဘာကို သင်တို့ မြင်တွေ့နိုင်ပြီး ၎င်းတို့၏ လူ့သဘာဝ အနှစ်သာရသည် အတိအကျ မည်သို့ဖြစ်သည်ကိုနှင့် ၎င်းတို့သည် ဆိုးယုတ်သောလူများ ဟုတ်မဟုတ်ကို ဆုံးဖြတ်နိုင်သည်။ အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သော ဤလူစားမျိုးသည် ၎င်းတို့ ထုတ်လွှင့်သော အမျိုးမျိုးသော အချက်ပြမှုများနှင့် ပြောဆိုချက်များမှတစ်ဆင့် အခြားသူများအား ၎င်းတို့ကို ဆိုးယုတ်သောလူများအဖြစ် ရှင်းလင်းစွာ သတ်မှတ်စေသည်။ ဤလူစားမျိုးသည် ရှင်းလင်းပစ်ခြင်း သို့မဟုတ် နှင်ထုတ်ခြင်းအတွက် စံနှုန်းနှင့် အပြည့်အဝ ကိုက်ညီသည်၊ ၎င်းတို့အပေါ် သနားကရုဏာ မထားနိုင်ပေ။ ၎င်းတို့ကို ရှင်းလင်းပစ်ရမည်ဖြစ်ပြီး အသင်းတော်အတွင်း၌ အနှောင့်အယှက်များ ဖြစ်စေရန် ခွင့်မပြုသင့်ပေ။

ငါတို့သည် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သော လူစားမျိုးတို့၏ လက္ခဏာများအပေါ် ယခုလေးတင် မိတ်သဟာယဖွဲ့ခဲ့ပြီးဖြစ်သည်၊ ပြီးလျှင် ၎င်းတို့၏ ဘုရားသခင်အပေါ် ယုံကြည်ခြင်းနှင့်ဆိုင်သော အခြေအနေမှလည်းကောင်း၊ ၎င်းတို့၏ လူ့သဘာဝဆိုင်ရာ သရုပ်သကန်များမှလည်းကောင်း ၎င်းတို့သည် သမ္မာတရားကို အလွန်အမင်း မနှစ်မြို့သော၊ သမ္မာတရားကို မနှစ်သက်သော လူစားမျိုးတစ်ဦး ဖြစ်သည်မှာ ထင်ရှားသင့်သည်။ ၎င်းတို့၏ လူ့သဘာဝသည် ၎င်းတို့ အကျိုးအကြောင်း မသိသည့်အခြေအနေအထိ ညံ့ဖျင်းပြီး အခြေခံအကျဆုံးသော လူ့ကိုယ်ကျင့်တရားများပင် ကင်းမဲ့သည်၊ ၎င်းတို့၏ ထူးခြားသော ကိစ္စရပ်တွင် ၎င်းတို့၏ ညံ့ဖျင်းသော လူ့သဘာဝ၏ လက္ခဏာမှာ ၎င်းတို့သည် အထူးသဖြင့် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်ခြင်းသာ ဖြစ်သည်။ ၎င်းတို့ ပြောဆိုသော စကားများမှတစ်ဆင့် လူတစ်ဦးသည် ၎င်းတို့၏ လူ့သဘာဝ၏ လက္ခဏာနှင့် ၎င်းတို့၏ လူ့သဘာဝ အနှစ်သာရကို စောင့်ကြည့်လေ့လာနိုင်သည်၊ ဤလူစားမျိုးသည် ညံ့ဖျင်းသော လူ့သဘာဝရှိသည့် လူပုဂ္ဂိုလ်များဖြစ်သည်မှာ ရှင်းလင်းသည်။ ၎င်းတို့၏ လူ့သဘာဝသည် မည်သည့်အတိုင်းအတာအထိ ညံ့ဖျင်းသနည်း။ ယင်းမှာ ဆိုးယုတ်သည့် အတိုင်းအတာအထိ ညံ့ဖျင်းသည်၊ သို့ဖြစ်၍ ၎င်းတို့ကို ဆိုးယုတ်သောလူများ အမျိုးအစားထဲသို့ ထည့်သွင်းသည်။ ဤသည်မှာ အဘယ်ကြောင့်ဆိုသော် ၎င်းတို့ ပုံမှန်အားဖြင့် ပြောဆိုသော စကားများသည် ရံဖန်ရံခါ မြည်တမ်းခြင်း၊ မနာလိုမှုအနည်းငယ်ကို ဖော်ပြခြင်း သို့မဟုတ် ရံဖန်ရံခါ လူ့အားနည်းချက်အနည်းငယ်ကို ပြသခြင်းတို့ မဟုတ်ဘဲ၊ ၎င်းတို့၏ သရုပ်သကန်များသည် သာမန်ဖြစ်သော၊ ဖောက်ပြန်ပျက်စီးသော စိတ်သဘောထားတစ်ခု၏ သရုပ်သကန်များ မဟုတ်ဘဲ ၎င်းတို့ကို ဆိုးယုတ်သော လူများအဖြစ် အမျိုးအစားခွဲခြားနိုင်ကြောင်း သက်သေပြရန် လုံလောက်သော သရုပ်သကန်များ ဖြစ်သည်။ ဤသည်မှာ ပထမဆုံးသော လူစားမျိုးဖြစ်သည့် အမှားနှင့် အမှန်ကို ပြောင်းပြန်လှန် ပြောဆိုခြင်းကို နှစ်သက်သောသူတို့ ဖြစ်သည်။

ခ။ အခွင့်ကောင်းယူရသည်ကို နှစ်သက်ခြင်း

ဒုတိယအမျိုးအစား လူတို့သည် အခွင့်ကောင်းယူခြင်းကို နှစ်သက်သောသူများ ဖြစ်ကြသည်။ အခွင့်ကောင်းယူရသည်ကို နှစ်သက်ခြင်းနှင့်ပတ်သက်၍ မိတ်သဟာယဖွဲ့သည့်အခါ အချို့သောသူတို့၌ အယူအဆများ မုချဧကန်ရှိကြပြီး “မည်သည့် ဖောက်ပြန်ပျက်စီးသော လူသားက အခွင့်ကောင်းယူခြင်းကို မနှစ်သက်ဘဲ ရှိမည်နည်း။ ၎င်းသည် လူ့သဘာဝ ဖြစ်သည်၊ ဒုစရိုက်အမှုကို မပြုလုပ်သရွေ့ အနည်းငယ် အခွင့်ကောင်းယူခြင်းက မည်သည့်အရာများ အလွန် ဆိုးရွားနေသနည်း” ဟု တွေးထင်ကြသည်။ ငါတို့ ဤနေရာ၌ မိတ်သဟာယဖွဲ့နေသည့် အခွင့်ကောင်းယူရခြင်းကို နှစ်သက်ခြင်းမှာ သာမန်လူတို့၏ အခွင့်ကောင်းယူတတ်သည့် နယ်ပယ်ကို ကျော်လွန်သည်၊ ယင်းသည် ဆိုးယုတ်မှု အတိုင်းအတာအထိ ရောက်ရှိသည်။ အသင်းတော်၌ ဤအမျိုးအစား လူအတော်များများ ရှိလောက်သည် သို့မဟုတ် အနည်းဆုံး တစ်စိတ်တစ်ပိုင်း ရှိပေမည်။ “ငါတို့အားလုံး ညီအစ်ကိုမောင်နှမများ ဖြစ်ကြသည်” ဟူသော အကြောင်းပြချက်ကို ခုတုံးလုပ်၍ ၎င်းတို့သည် နေရာတိုင်း၌ အခွင့်ကောင်းယူကြသည်၊ ညီအစ်ကိုမောင်နှမများကြားထဲတွင်လည်းကောင်း၊ ဘုရားအိမ်တော်၌လည်းကောင်း၊ အသင်းတော်၌လည်းကောင်း အခွင့်ကောင်းယူကြသည်။ ၎င်းတို့သည် မည်သည့်အခွင့်ကောင်းများကို ယူကြသနည်း။ ဥပမာအားဖြင့် ၎င်းတို့၏ မိသားစုက အိမ်တစ်လုံးဝယ်ရန် လိုအပ်သော်လည်း ငွေအလုံအလောက် မရှိပါက ၎င်းတို့သည် ဆွေမျိုးများ သို့မဟုတ် မိတ်ဆွေများထံမှ မချေးငှားကြသကဲ့သို့ ဘဏ်သို့လည်း သွား၍မချေးကြပေ။ ၎င်းတို့သည် အတိုးအကြောင်းကိုဖြစ်စေ၊ ချေးငွေကို မည်သည့်အချိန်တွင် ပြန်ဆပ်မည်ကိုဖြစ်စေ ဖော်ပြခြင်းမရှိဘဲ ညီအစ်ကိုမောင်နှမများထံမှ ချေးငှားကြသည်၊ ၎င်းတို့သည် ချေးငှားရုံသာ ဖြစ်သည်။ ၎င်းတို့က “ချေးငှားသည်” ဟု ဆိုခြင်းမှာ ကြားကောင်းအောင် ပြောခြင်းဖြစ်သည်၊ အမှန်တရားမှာ ၎င်းတို့သည် ထိုငွေကို ပြန်ဆပ်ရန် သို့မဟုတ် အတိုးပေးရန် မည်သည့်အခါမျှ ရည်ရွယ်ခြင်းမရှိသောကြောင့် ၎င်းတို့သည် ယူလိုက်ရုံသာ ဖြစ်သည်။ ၎င်းတို့သည် ညီအစ်ကိုမောင်နှမများကို အဘယ်ကြောင့် ပစ်မှတ်ထားကြသနည်း။ ၎င်းတို့အားလုံးသည် ညီအစ်ကိုမောင်နှမများ ဖြစ်ကြသောကြောင့် အခက်အခဲ ကြုံသည့်အချိန်များတွင် ကူညီသင့်သည်ဟုလည်းကောင်း၊ တစ်စုံတစ်ဦးက မကူညီပါက ထိုသူသည် ညီအစ်ကို သို့မဟုတ် ညီအစ်မတစ်ဦး မဟုတ်ဟုလည်းကောင်း ၎င်းတို့က ထင်မှတ်ကြသည်။ သို့ဖြစ်၍ ၎င်းတို့သည် ညီအစ်ကိုမောင်နှမများထံ ငွေချေးရန် သွားကြပြီး ညီအစ်ကိုမောင်နှမများက ၎င်းတို့အား ငွေချေးပေးခြင်းသည်သာ မှန်ကန်ပြီး သင့်လျော်သည်ဟု ခံစားရစေရန် အကြောင်းပြချက်များ ရှာကြံပြောဆိုကြသည်။ အခြားလူအချို့တို့သည် ညီအစ်ကို သို့မဟုတ် ညီအစ်မတစ်ဦး၏ မိသားစုက ကားတစ်စီး ပိုင်ဆိုင်သည်ကို မြင်တွေ့ပြီး ထိုအကြောင်းကို ဆက်လက်တွေးတောနေကြကာ ရက်အနည်းငယ်ကြာလိုက်တိုင်း ငှားရန် အဆက်မပြတ် တောင်းဆိုကြသည်။ ၎င်းတို့သည် ကားကို ငှားသော်လည်း ပြန်မပေးကြသည့်အပြင် ဆီပြန်မဖြည့်ပေးကြဘဲ တစ်ခါတစ်ရံတွင် ကားကို ချိုင့်ဝင်အောင်လုပ်ခြင်း သို့မဟုတ် တိုက်မိအောင်ပင် လုပ်ဆောင်ကြသည်။ ၎င်းတို့သည် အခြားသူများ၏ အိမ်များ၌ တွေ့မြင်ရသော မည်သည့်အစားအစာကောင်း၊ အသုံးဝင်သော ပစ္စည်း သို့မဟုတ် တန်ဖိုးရှိသည့် မည်သည့်အရာကိုမဆို မိမိတို့အတွက် တပ်မက်လျက် လိုချင်တောင့်တကာ လျှို့ဝှက်ကြံစည်ကြသည်။ မည်သူ့အိမ်သို့ပင် ၎င်းတို့ သွားသည်ဖြစ်စေ ၎င်းတို့၏ မျက်လုံးများသည် သူခိုးကဲ့သို့ လောဘဖြင့် အရောင်တောက်နေပြီး ရယူနိုင်မည့် အခွင့်အရေးတစ်ခုခု သို့မဟုတ် ယူသွားနိုင်မည့် ပစ္စည်းတစ်ခုခုကို ရှာဖွေလျက် နေရာတိုင်းတွင် ရှာဖွေ ကြည့်ရှုကြသည်၊ သေးငယ်သော ပန်းအိုးတစ်လုံးပင် ၎င်းတို့၏ လက်မှ မလွတ်မြောက်ပေ။ အခြားသူများနှင့် အပြင်သွားသည့်အခါ သို့မဟုတ် အတူစားသောက်သည့်အခါ ၎င်းတို့သည် သယ်ယူပို့ဆောင်ရေးစရိတ် သို့မဟုတ် အစားအသောက်ဖိုးကို ပေးချေရန် မည်သည့်အခါမျှ ကမ်းလှမ်းခြင်းမရှိပေ။ သူတို့သည် ကောင်းမွန်သောအရာတစ်ခုခုကို မြင်သည့်အခါတိုင်း ဝယ်ယူလိုကြသော်လည်း ငွေပေးချေရမည့်အချိန်သို့ ရောက်သောအခါ သူတို့အတွက် အခြားသူများကို ငွေရှင်းစေကြပြီး နောက်ပိုင်းတွင် ထိုသူတို့ကို ငွေပြန်ပေးရမည့်ကိစ္စကို စကားထဲထည့်ပင်မပြောကြပေ၊ ၎င်းတို့သည် တစ်ပြားနှင့် တစ်မတ်ဖြစ်လျှင်ပင် အခွင့်ကောင်းယူလိုကြခြင်းသာ ဖြစ်သည်။ သင်သည် ကောင်းမွန်သောအရာများကို ရလိုပါက သင်ကိုယ်တိုင် ပေးချေနိုင်သည်၊ သင်သည် သင်၏ကိုယ်ပိုင်ငွေဖြင့် မပေးချေလိုပါက အခြားသူများကိုလည်း အခွင့်ကောင်းယူရန် မရှာဖွေနှင့်၊ ထိုမျှလောက်လည်း လောဘမကြီးနှင့်၊ သင်သည် အခြားလူများထံမှ လေးစားမှုကို ရရှိရန် တည်ကြည်မှုအချို့ ရှိသင့်သည်။ သို့သော် ဤလူစားမျိုးတွင် တည်ကြည်မှု ကင်းမဲ့ပြီး အခွင့်ကောင်းယူရန်သာ လိုလားကာ ၎င်းတို့ အခွင့်အရေး ပိုယူလေ ပို၍ ရွှင်လန်းဝမ်းမြောက်လေ ဖြစ်သည်။ အသင်းတော်၌ ထိုသို့သောလူများ ပေါ်ပေါက်လာခြင်းသည် ရှက်ဖွယ်ကောင်းခြင်းလော သို့မဟုတ် ဂုဏ်ကျက်သရေရှိခြင်းလော။ (ရှက်ဖွယ်ကောင်းခြင်း ဖြစ်ပါသည်။) ယင်းမှာ ရှက်ဖွယ်ကောင်းခြင်း ဖြစ်သည်။ ၎င်းတို့ ဤသို့ အခွင့်ကောင်းယူခြင်းသည် လိုအပ်သည်ဟု သင်တို့ ဆိုမည်လော။ ၎င်းတို့သည် အစားအသောက် မတတ်နိုင်သောကြောင့် သို့မဟုတ် ၎င်းတို့၏ မိသားစု စားသောက်ရန် ငွေမရှာနိုင်သောကြောင့်လော။ လုံးဝမဟုတ်ပေ။ အမှန်တကယ်တွင် ၎င်းတို့၌ သုံးစွဲရန် ငွေအလုံအလောက်နှင့် စားသောက်ရန် အစားအစာ အလုံအလောက် ရှိသည်၊ ၎င်းတို့၏ လောဘသည် အလွန်ကြီးမားပြီး ၎င်းတို့၏ တည်ကြည်မှုကို ဖယ်ရှားသည့်အဆင့်အထိ၊ အခြားသူများထံမှ စက်ဆုပ်ရွံရှာခြင်းနှင့် ရွံမုန်းခြင်းတို့ကို ဖြစ်ပေါ်စေသည့်အဆင့်အထိ ရောက်ရှိနေခြင်းသာ ဖြစ်သည်။ ထိုသို့သောလူသည် ကောင်းသလော။ (မဟုတ်ပါ။) အချို့လူတို့သည် မိမိတို့၏ တာဝန်များကို ထမ်းဆောင်သည့်အခါ အစဉ်အမြဲ အခွင့်ကောင်းယူရန် ကြည့်တတ်ကြပြီး အနည်းငယ်မျှ ဆုံးရှုံးသွားလျှင်ပင် စိတ်မကျေမနပ်ဖြစ်ကာ ထိုအကြောင်းကို မပြောဘဲမနေနိုင်ကြပေ။ တာဝန်တစ်ခုကို ခန့်အပ်သည့်အခါ ၎င်းတို့သည် ငွေအကြောင်းကို အစဉ်အမြဲ ထည့်ပြောကြသည်၊ “ခရီးတစ်ခေါက်အတွက် ခရီးစရိတ်က မည်မျှဖြစ်မည်၊ တည်းခိုခက မည်မျှကျမည်၊ အစားအသောက်ဖိုးက မည်မျှကျမည် စသည်ဖြင့် ဖြစ်သည်” ဟု ပြောဆိုကြသည်။ ၎င်းတို့အား “ငွေအတွက် စိတ်မပူပါနှင့်၊ အသင်းတော်က ပေးပါလိမ့်မည်” ဟု ပြောဆိုကြသည်။ သို့သော် ငွေလက်ခံရရှိပြီးနောက် ၎င်းတို့သည် ထိုအကြောင်းကို စိတ်မချမ်းမသာဖြင့် တွေးတောကြပြီး “ဤမျှနှင့် မလုံလောက်ပါ။ အပြင်၌ ယွမ် ၂၀၀ မျှဖြင့် ကျွန်ုပ် အဘယ်အရာကို ပြုလုပ်နိုင်မည်နည်း။ ‘အိမ်တွင် ခြိုးခြံသော်လည်း ခရီးသွားသော် ငွေလောက်ငအောင် ယူရမည်’ ဟူသော ဆိုရိုးစကားတစ်ခု ရှိသည်။ ကျွန်ုပ်သည် အပိုငွေ အနည်းငယ် ထပ်၍ ယူဆောင်သွားရမည်။ အားလုံး မသုံးဖြစ်ခဲ့ပါက လက်ကျန်ငွေကို အသင်းတော်သို့ ပြန်လည်ပေးအပ်မည်” ဟု ပြောဆိုကြသည်။ ၎င်းတို့ ပြန်ရောက်လာသည့်အခါတွင်မူ ပိုလျှံသောငွေ ရှိသည့်အကြောင်းကို တစ်စုံတစ်ရာ မပြောကြသကဲ့သို့ ၎င်းတို့၏ အသုံးစရိတ်များကိုလည်း အစီရင်မခံကြပေ။ ၎င်းတို့သည် အသင်းတော်ကိုပင် အခွင့်ကောင်းယူဝံ့ကြသည်၊ ဘုရားသခင်၏ ပူဇော်သက္ကာများကို အလွဲသုံးစားလုပ်ဝံ့မည်မဟုတ်လော။ (ဟုတ်ပါသည်။) ၎င်းတို့သည် မည်သို့သော သတ္တဝါများ ဖြစ်ကြသနည်း။ ၎င်းတို့တွင် တည်ကြည်မှုအပြင် အသိစိတ်နှင့် ဆင်ခြင်တုံတရားလည်း ကင်းမဲ့ကြသည်။ ဘုရားသခင်သည် ထိုသို့သောလူများကို လက်ခံနိုင်မည်လော။ အချို့သောအခြားသူတို့သည် ရေချိုးရန်၊ ခေါင်းလျှော်ရန်နှင့် အဝတ်လျှော်ရန်အတွက်ပင် စုဝေးသည့်နေရာများ သို့မဟုတ် ဧည့်ခံသည့်နေရာများသို့ သွားကြပြီး အသင်းတော်၏ အဝတ်လျှော်စက်၊ ရေပူပေးစက်၊ ခေါင်းလျှော်ရည်၊ အဝတ်လျှော်ဆပ်ပြာရည် စသည်တို့ကို အသုံးပြုကြသည်၊ ၎င်းတို့သည် မိမိတို့၏ ကိုယ်ပိုင်ပစ္စည်းများကို ချွေတာရန် အသင်းတော်၏ ပစ္စည်းများကို အသုံးပြုလျက် ဤအသုံးအဆောင်ပစ္စည်းများကိုပင် အခွင့်ကောင်းယူကြသည်။ ၎င်းတို့သည် ဘုရားသခင်ကို ယုံကြည်သောကြောင့် ဘုရားအိမ်တော်၏ အစိတ်အပိုင်းတစ်ခုဖြစ်သည်ဟု ထင်မှတ်ကြပြီး ထို့ကြောင့် ဘုရားအိမ်တော်ပိုင် မည်သည့်ပစ္စည်းမဆိုသည် ၎င်းတို့ လွတ်လပ်စွာ အသုံးပြုနိုင်သည့် ၎င်းတို့၏ ပစ္စည်းဖြစ်သည်ဟု ထင်မှတ်ကြကာ အသုံးမပြုလျှင် သို့မဟုတ် မယူလျှင် သို့မဟုတ် ယင်းမှ အကျိုးအမြတ်အနည်းငယ် မရရှိလျှင် နှမြောစရာဖြစ်မည်ဟု တွေးထင်ကြသည်၊ ပြီးလျှင် ၎င်းတို့ ထိုပစ္စည်းကို ဖျက်ဆီးမိလျှင်ပင် လျော်ကြေးပေးရန် ရည်ရွယ်ချက်မရှိကြပေ။ ၎င်းတို့၏ ကိုယ်ပိုင်ပစ္စည်းများနှင့် ပတ်သက်လာလျှင် ၎င်းတို့ကို ချွေတာစွာ အသုံးပြုရန်နှင့် စေ့စေ့စပ်စပ် ဂရုစိုက်ရန် ၎င်းတို့ သိကြသော်လည်း ဘုရားအိမ်တော်၏ စက်ပစ္စည်းများနှင့် ပစ္စည်းများကိုမူ မိမိတို့အလိုရှိသလို အသုံးပြုကြပြီး ဖျက်ဆီးလိုက်လျှင်လည်း လျော်ကြေးပေးခြင်းမရှိပေ။ ဤသူတို့သည် လူကောင်းများလော။ ၎င်းတို့သည် ကောင်းသောအရာများ သေချာပေါက် မဟုတ်ကြပေ။ အထူးသဖြင့် အသင်းတော်က ပစ္စည်းအချို့ကို ဝယ်ယူရန် လိုအပ်သည့် အချို့သောကိစ္စများတွင် ၎င်းတို့သည် ထိုသို့သော တာဝန်များကို ကိုင်တွယ်ရန် အထူးတလည် လိုလားလျက် တက်ကြွစွာ စေတနာ့ဝန်ထမ်း လုပ်ဆောင်ကြသည်။ ၎င်းတို့သည် အဘယ်ကြောင့် စိတ်အားထက်သန်ကြသနည်း။ အကျိုးအမြတ် ရရှိနိုင်ပြီး အခွင့်အရေးများ ယူနိုင်သည်ဟု ၎င်းတို့ ယုံကြည်ကြသည်၊ ပစ္စည်းများကို ဝယ်ယူပြီးနောက် ပိုလျှံသောငွေမှန်သမျှကို မိမိတို့အတွက် အိတ်ထဲထည့်လိုက်ကြသည်။ ၎င်းတို့သည် မိမိတို့ တတ်နိုင်သမျှကို အခွင့်ကောင်းယူလိုကြပြီး အခွင့်ကောင်းမယူလျှင် အလဟဿဖြစ်မည်ဟု တွေးထင်ကြသည်၊ ဤသည်မှာ ၎င်းတို့ လိုက်နာသော ကျိုးကြောင်းဆင်ခြင်မှု ဖြစ်သည်။ ၎င်းတို့ အခွင့်ကောင်းမယူနိုင်ပါက ညီအစ်ကိုမောင်နှမများကို ကျိန်ဆဲပြီး ဘုရားအိမ်တော်ကို ကျိန်ဆဲကြသည်၊ ၎င်းတို့သည် လူတိုင်းကို ကျိန်ဆဲကြသည်၊ ၎င်းတို့သည် ဆိုးယုတ်သော မကောင်းဆိုးဝါးများ၊ နံစော်နေသော သူတောင်းစားများ၊ သူတောင်းစားဂိုဏ်းဝင်စစ်စစ်များသာ ဖြစ်ကြသည်။ ၎င်းတို့သည် အကျိုးအမြတ်များ ရယူရန်နှင့် အခွင့်ကောင်းယူရန် နေရာတိုင်း၌ မိမိတို့၏ ဇလုံများကို ကိုင်ဆောင်ထားကြသော သူတောင်းစားများသာ ဖြစ်ကြသည်။ လူတို့က “သင်က အစဉ်သဖြင့် တစ်စုံတစ်ခုကို တောင်းဆိုနေသည်၊ သင်သည် နံစော်နေသော သူတောင်းစားသာ ဖြစ်သည် မဟုတ်လော” ဟု ပြောဆိုကြသည်။ ၎င်းတို့က “ရပါသည်။ ကျွန်ုပ်အား ကပ်စေးနဲ၊ လက်ခက်သောသူ၊ နံစော်နေသော သူတောင်းစား၊ သူတောင်းစားတစ်ယောက်၊ ဆင်းရဲသားတစ်ယောက်ဟူ၍ မည်သည့်အမည်မဆိုခေါ်ပါ၊ ကျွန်ုပ် အခွင့်ကောင်းတစ်ခု ရနိုင်သရွေ့ အဆင်ပြေပါသည်” ဟု ပြန်ပြောကြသည်။ ဤလူစားမျိုးတွင် တည်ကြည်မှု တစ်ခုခု ရှိသလော။ (မရှိပါ။) ထိုသို့သောလူများသည် ညီအစ်ကိုမောင်နှမများအတွက် အတိုင်းအတာတစ်ခုအထိ အနှောင့်အယှက် ဖြစ်စေသည်မဟုတ်လော။ အထူးသဖြင့် ခက်ခဲသော အခြေအနေများတွင် နေထိုင်ကြသော၊ ငွေရေးကြေးရေးအခြေအနေ ဆိုးရွားသော ထိုမိသားစုများအတွက် ၎င်းတို့သည် အနှောင့်အယှက်နှင့် အန္တရာယ် အတိုင်းအတာတစ်ခုအထိ ဖြစ်စေသည်မဟုတ်လော။ (ဟုတ်ပါသည်။) ၎င်းတို့သည် ဝိညာဉ်ရင့်ကျက်မှုနုနယ်သေးပြီး အထူးသဖြင့် အားနည်းသောသူတို့အပေါ် အပျက်သဘောဆောင်သော လွှမ်းမိုးမှု ရှိနိုင်သလော။ (ရှိနိုင်ပါသည်။) လူတို့သည် ၎င်းတို့ကို မြင်ရုံမျှဖြင့် စက်ဆုပ်ရွံရှာမှုကို ခံစားကြရသည်၊ ၎င်းတို့ကို မြင်သောသူတိုင်း စိတ်အနှောင့်အယှက် ဖြစ်ကြသည့်တိုင် ၎င်းတို့အားလုံးသည် ငြင်းဆန်ရန် အလွန်ရှက်ကြပြီး ထိုသို့ဖြင့် ၎င်းတို့၏ ဗြောင်ကျကျ ခြိမ်းခြောက်ငွေညှစ်ခြင်းကို ခံကြရသည်။ လူတိုင်းက ၎င်းတို့တွင် ဆိုးယုတ်သော လူ့သဘာဝနှင့် နိမ့်ကျသော ကိုယ်ကျင့်စရိုက်ရှိသည်ကို သိကြသော်လည်း ၎င်းတို့အားလုံးသည် ညီအစ်ကိုမောင်နှမများ ဖြစ်ကြသည်ဟု ယူဆကာ ၎င်းတို့သည် တစ်ခါတစ်ရံတွင် တာဝန်အချို့ကို ထမ်းဆောင်နိုင်သည်ကိုလည်းကောင်း၊ ယုံကြည်ခြင်း အနည်းငယ်ရှိသည်ကိုလည်းကောင်း၊ တစ်ခါတစ်ရံတွင် ၎င်းတို့၏ အိမ်၌ ဧည့်ခံခြင်းဖြင့် အားထုတ်မှုအနည်းငယ်ကို စိုက်ထုတ်နိုင်သည်ကိုလည်းကောင်း မြင်တွေ့ကြလျက် ဤအရာများအတွက်ကြောင့် လူအများစုသည် ၎င်းတို့ နေရာတိုင်း၌ အခွင့်ကောင်းယူသည့် အပြုအမူကို မသိကျိုးကျွန်ပြုလိုက်ကြပြီး အလေးအနက် မထားကြပေ။ သို့သော် အသင်းတော်အတွင်း၌ ၎င်းတို့ ဖြစ်ပေါ်စေသော အနှောင့်အယှက်များသည် လူအများစုကို စိတ်မသက်မသာ ဖြစ်စေရန် လုံလောက်သည်အထိ တိုး၍ သိသာထင်ရှားလာသည်၊ ဤသည်မှာ ပြဿနာတစ်ခု မဟုတ်လော။ (ဟုတ်ပါသည်။) ဤလူပုဂ္ဂိုလ်များသည် နေရာတိုင်း၌ လူတို့ကို ကိုက်ပြီး သေစေနိုင်သော ခွေးရူးများ မဟုတ်လျှင်ပင် ၎င်းတို့၏ နှောင့်ယှက်မှုက လူတို့ကို အနားမရစေဘဲ နားပူသည့် မနှစ်မြို့ဖွယ် ယင်ကောင်များကဲ့သို့ ဖြစ်ကြသည်။ ၎င်းတို့ကို မရှင်းလင်းပစ်ပါက ၎င်းတို့သည် အဆုံးမရှိသော အနှောင့်အယှက်ကို ဖြစ်စေလိမ့်မည်။ ၎င်းတို့ အသင်းတော်၌ ကျန်ရှိနေခြင်းသည် လူတို့ကို ငြိမ်သက်ခြင်းမှ ကင်းမဲ့စေလျက် ဘေးအန္တရာယ်ကို အစဉ်မပြတ် ဖြစ်ပေါ်စေလိမ့်မည်။ အနှောင့်အယှက်ခံရပြီးနောက် လူတို့သည် အတော်အတန် စိတ်တိုကြပြီး ထိုသို့သော လူပုဂ္ဂိုလ်များအပေါ် အလွန်အမင်း မနှစ်မြို့ခြင်းကို မကြာခဏ သိုထားကြသည်၊ သို့တိုင်အောင် ဖြေရှင်းခြင်းမရှိဘဲ အကြိမ်ကြိမ်အခါခါ သည်းညည်းသာ ခံလိုက်ကြသည်။ ၎င်းတို့သည် မည်သို့သော လူပုဂ္ဂိုလ်စားမျိုးများ ဖြစ်ကြသနည်း။ လူတို့ကြားထဲတွင် ထိုသို့သော စက်ဆုပ်ဖွယ်ကောင်းသည့် လူယုတ်မာများပင် ရှိသေးသည်၊ ထိုသို့သော လူပုဂ္ဂိုလ်များသည် အဘယ်ကြောင့် ဘုရားသခင်ကိုပင် ယုံကြည်ကြသေးသနည်း။ ၎င်းတို့သည် အသက်ရှင်ရန်ပင် မထိုက်တန်ကြပေ။ မိမိတို့ တတ်နိုင်သမျှကို အခွင့်ကောင်းယူခြင်းသည် အလွန် ရှက်ဖွယ်ကောင်းလှသည်။ သင်၏ စွမ်းရည်များ ခွင့်ပြုသလောက်သာ ရုပ်ဝတ္ထုပစ္စည်းများကို ခံစားလော့၊ သင်၌ ထိုစွမ်းရည် ကင်းမဲ့ပါက မခံစားနှင့်၊ သို့မဟုတ် အခြားသူများပိုင်ဆိုင်သည့်အရာကို အလွဲသုံးစားမလုပ်နှင့်။ အခြားသူများက တစ်ခါတလေ တစ်စုံတစ်ခုကို အခမဲ့ စေတနာအလျောက် ပေးသောကြောင့်ဖြစ်စေ၊ သင်သည် တစ်စုံတစ်ခုကို အထူးတလည် ကြိုက်နှစ်သက်သောကြောင့်ဖြစ်စေ၊ တစ်စုံတစ်ခုကို မြတ်နိုးမိသောကြောင့်ဖြစ်စေ သင်သည် သေးငယ်ပြီး အရေးမပါသည့်နည်းလမ်းဖြင့် အခွင့်ကောင်းယူပါက လူတိုင်းက ထိုအရာကို ခွင့်လွှတ်နိုင်ကြသည်။ “ဆင်းရဲခြင်းသည် ရည်မှန်းချက်ကို ကန့်သတ်သည်” ဟု ဆိုရိုးစကားရှိသည့်အတိုင်း ယင်းမှာ ပြဿနာကြီးကြီးမားမားတစ်ခု မဟုတ်ပေ။ သို့သော် သင်သည် ဤကဲ့သို့ အစဉ်အမြဲ အခွင့်အရေးများ ရှာဖွေနေသည်မှာ အရှက်ကင်းမဲ့ပြီး မထီမဲ့မြင်ပြုသည့် အဆင့်အထိ ရောက်ရှိကာ နံစော်နေသော သူတောင်းစားတစ်ဦးအဖြစ်သို့ ပြောင်းလဲသွားပြီး လူတိုင်း၏ အမြင်တွင် ခွေးရူးတစ်ကောင် သို့မဟုတ် ယင်ကောင်တစ်ကောင်အဖြစ်သို့ ပြောင်းလဲသွားပါက သင့်ကို ချက်ချင်း ရှင်းလင်းပစ်သင့်သည်။ ဤပြဿနာများအားလုံးကို အဆုံးသတ်ရန်အလို့ငှာ ဤလူစားမျိုးတို့ကို အပြီးတိုင် ကိုင်တွယ်ဖြေရှင်းသင့်သည်။

အခွင့်ကောင်းယူတတ်သောသူတို့အတွက်မူ ၎င်းတို့ကို သင်တို့ မည်မျှ သည်းခံနိုင်သနည်း။ သင်တို့သည် ၎င်းတို့ကို အမှန်တကယ် မခံရပ်နိုင်တော့ပါက ၎င်းတို့၏ အခွင့်ကောင်းယူခြင်းကို ခံရပြီးနောက် ယင်ကောင်သေတစ်ကောင်ကို မျိုချလိုက်ရသကဲ့သို့ ခံစားရပြီး သင်တို့အတူရှိသည့်အခါ သင်တို့အများစုသည် ထိန်းချုပ်မရနိုင်အောင် ဒေါသထွက်ကာ ၎င်းတို့အကြောင်းကို အဆက်မပြတ် မကျေမနပ် ပြောဆိုနေကြပါက ဤအချိန်တွင် ၎င်းတို့ကို ဖယ်ရှားပြီးသား ဖြစ်သင့်သည်မဟုတ်လော။ (ဟုတ်ပါသည်။) သည်းမခံနိုင်တော့သည့်အခါ၊ အတိုင်းအတာတစ်ခုသို့ ရောက်ရှိသည့်အခါ လူတိုင်းသည် ၎င်းတို့ကို ရှင်းလင်းပစ်ရန် လက်တွဲညီညီဖြင့် လုပ်ဆောင်သင့်သည်။ ဤသည်မှာ ဘုရားအိမ်တော်အတွက် ဘေးဥပဒ်တစ်ခုကို ဖယ်ရှားခြင်းဖြစ်သည်၊ ယင်းသည် လူတို့ကို အလွန်ဝမ်းမြောက်စေသော ကိစ္စတစ်ရပ် ဖြစ်သည်။ ထိုသို့သောလူသည် လူအများစုကြားတွင် မငြိမ်မသက်မှုကို ဖြစ်စေသော လူယုတ်မာတစ်ဦးသာ ဖြစ်သည်။ ဤသည်မှာ အသင်းတော်အသက်တာကို နှောင့်ယှက်ပြီး အဖျက်အမှောင့်လုပ်သည့် ဆိုးဝါးသော ဖြစ်ရပ်တစ်ခုဖြစ်ပြီး လူတို့ကို ဤလူနှင့်ပတ်သက်သော ပြဿနာကို မိတ်သဟာယဖွဲ့ပြီး ဖြေရှင်းရန် အတူတကွ စုဝေးစေဖို့ ဖိအားပေးသည်။ ဤလက်တွေ့လုပ်ဆောင်မှုသည် တရားနည်းလမ်းကျသည်၊ အကြောင်းမှာ ဆိုးယုတ်သောလူကြောင့် ဖြစ်ပေါ်လာသော အနှောင့်အယှက်သည် အချို့သောလူတို့ကို ထိခိုက်စေပြီး ဖြစ်သောကြောင့်တည်း။ ဆိုးယုတ်သောလူသည် မကောင်းမှုကို ဆက်လက်မပြုလုပ်စေဖို့ တားဆီးရန်၊ အသင်းတော်အသက်တာ၏ ပုံမှန်အစီအစဉ်ကို ထိန်းသိမ်းရန်နှင့် ဘုရားသခင် ရွေးချယ်ထားသောလူများ နောက်ထပ် ထိခိုက်ခြင်းမခံရစေရန် တားဆီးဖို့အလို့ငှာ ထိုဆိုးယုတ်သောလူကို လျင်မြန်စွာ ကိုင်တွယ်ပြီး ရှင်းလင်းဖယ်ရှားသင့်သည်။ ၎င်းတို့သည် ရှင်းလင်းပစ်ခြင်းခံရပြီးနောက် အသင်းတော်ကို တိုင်ကြားနိုင်ပါက ၎င်းတို့အား ဤသို့ ဉာဏ်ပညာရှိစွာ ပြောကြားသင့်သည်၊ “သင့်ကို ရှင်းလင်းပစ်ခြင်း သို့မဟုတ် နှင်ထုတ်ခြင်း မဟုတ်ပါ။ အိမ်ပြန်ပြီး သီးခြားခွဲနေကာ သင့်ကိုယ်သင် ဆင်ခြင်သုံးသပ်လော့။ သင် ကောင်းစွာ ဆင်ခြင်သုံးသပ်ပြီးသည်နှင့်တစ်ပြိုင်နက် နောင်တရစာတစ်စောင်ကို ရေးပါ၊ ထို့နောက် သင့်ကို အသင်းတော်သို့ ပြန်လည်ကြိုဆိုနိုင်ပါသည်။ ယခုလောလောဆယ်တွင် သင်သည် ပိုမို၍ ငွေရှာပြီး ဘဝကို ပျော်မွေ့ရန် ကြိုးစားသင့်သည်၊ ထို့အပြင် ဘုရားသခင်ကို ယုံကြည်ခြင်းကိစ္စကိုလည်း စဉ်းစားသုံးသပ်လော့။ ဤနည်းအားဖြင့် သင်သည် ကဏ္ဍနှစ်ခုစလုံးကို လျစ်လျူရှုခြင်း ရှိမည်မဟုတ်ပါ” ဟူ၍ ဖြစ်သည်။ ထိုသို့ဆိုလျှင် မည်သို့နည်း။ (ကောင်းပါသည်။) ငါတို့သည် ၎င်းတို့ကို ရှင်းလင်းပစ်ခြင်း သို့မဟုတ် နှင်ထုတ်ခြင်းဖြစ်သည်ဟု ပြောမည်မဟုတ်၊ ယနေ့မှစ၍ ဤလူသည် အသင်းတော်၌ နောက်ထပ် ရှိတော့မည်မဟုတ်ဟူ၍သာ ဖြစ်သည်။ ဤသို့ ကိုင်တွယ်ခြင်းက မည်သို့နည်း။ (ကောင်းပါသည်။) အလွန်ကောင်းလှသည်။ ငြင်းခုံရန် သို့မဟုတ် စာရင်းရှင်းရန် မလိုအပ်ပေ၊ ၎င်းတို့ကို လောကသို့ပြန်၍ အလုပ်လုပ်ရန်၊ ငွေရှာရန်နှင့် ၎င်းတို့၏ ကိုယ်ပိုင်ဘဝကို အသက်ရှင်နေထိုင်ရန် ခွင့်ပြုလိုက်သည့် ရိုးရှင်းပြီး ရှင်းလင်းသော ဖြေရှင်းနည်းတစ်ခုသာ ဖြစ်သည်။ အတိုချုပ်အားဖြင့် အခွင့်ကောင်းယူတတ်သောသူတို့၏ လူ့သဘာဝသည် ထိုမျှလောက် မကောင်းမွန်လှပေ။ ယင်းကို ဆိုးယုတ်သည်ဟု မဆိုနိုင်သော်လည်း ၎င်းတို့၏ အခွင့်ကောင်းယူခြင်းကို နှစ်သက်သော ကိုယ်ကျင့်စရိုက်သည် ၎င်းတို့ကို အတော်အတန် စိတ်အနှောင့်အယှက်ဖြစ်ဖွယ်နှင့် စက်ဆုပ်ဖွယ်ဖြစ်စေသည်။ အခွင့်သာသည့်နေရာတိုင်းကို မလွတ်တမ်း အခွင့်ကောင်းယူတတ်ကြသည်တကား။ ထိုသို့သောလူတို့သည် တရားမဝင်သော သို့မဟုတ် ရာဇဝတ်မှုဆိုင်ရာ လုပ်ဆောင်ချက်များတွင် မပါဝင်လျှင်ပင် ၎င်းတို့၏ လုပ်ဆောင်ချက်များနှင့် အပြုအမူများက အသင်းတော်အသက်တာသို့ ဆောင်ကြဉ်းပေးသော နှစ်ရှည်လများ အဖျက်အမှောင့်လုပ်ခြင်းများနှင့် နှောင့်ယှက်ခြင်းများတည်းဟူသော ဤအကျိုးဆက်များသည် မည်သည့်ဒုစရိုက်အမှုထက်မဆို ပို၍ ဆိုးရွားသည်၊ ၎င်းတို့ကို မယုံကြည်သူများ သို့မဟုတ် အသင်းတော်မှ ရှင်းလင်းပစ်ရမည့် ဆိုးယုတ်သောလူများအဖြစ် သတ်မှတ်ရန် လုံလောက်သည်။ ဤသို့ပြုလုပ်ခြင်းသည် မယုံကြည်သူများ အသင်းတော်ကို အဖျက်အမှောင့်လုပ်ခြင်းများနှင့် ညီအစ်ကိုမောင်နှမများကို နှောင့်ယှက်ခြင်းများတို့ကို လုံးဝ ရပ်တန့်စေသည်။

အခွင့်ကောင်းယူတတ်သောသူတို့ကို ကိုင်တွယ်ဖြေရှင်းသည့် အထူးနည်းလမ်းတစ်ခု၊ တရုတ်ပြည်မကြီးရှိ ညှဉ်းပန်းနှိပ်စက်မှု၏ အထူးအခြေအနေများအပေါ် အခြေခံ၍ ရေးဆွဲခဲ့သော နည်းလမ်းတစ်ခုအကြောင်းကို ငါတို့ ယခင်က မိတ်သဟာယဖွဲ့ခဲ့ပြီးဖြစ်သည်။ နိုင်ငံရပ်ခြားရှိ အသင်းတော်များတွင်မူ ၎င်းတို့ကို တိုက်ရိုက်ရှင်းလင်းပစ်လိုက်ရုံဖြင့် အဆင်ပြေသည်။ သို့သော် ကိုင်တွယ်ဖြေရှင်းသည့်နည်းလမ်းသည် မည်သို့သောလူစားမျိုးကို ဦးတည်သည်ဖြစ်စေ ယင်းသည် စည်းမျဉ်းနှင့်ညီပြီး ဉာဏ်ပညာလည်း ရှိရန်မှာ မရှိမဖြစ်လိုအပ်သည်။ အသင်းတော်၌ စီမံအုပ်ချုပ်ရေးဆိုင်ရာ အမိန့်များနှင့် စည်းမျဉ်းများ ရှိသည်၊ အားလုံးမှာ ညီအစ်ကိုမောင်နှမများအတွက် ပုံမှန်အသင်းတော်အသက်တာနှင့် တာဝန်များထမ်းဆောင်ခြင်း၏ ပုံမှန်အစီအစဉ်ကို ကာကွယ်ရန် ရည်ရွယ်သည်။ တစ်စုံတစ်ဦးသည် ညီအစ်ကိုမောင်နှမများ၏ အသင်းတော်အသက်တာ သို့မဟုတ် ၎င်းတို့၏ တာဝန်ထမ်းဆောင်မှုကို နှောင့်ယှက်ပါက ဤသည်ကို ခွင့်မပြုပေ၊ ထိုလူသည် ဘုရားသခင်၏ ပစ်ပစ်ခါခါငြင်းခြင်းကို ခံရမည်။ အမှန်ပင် ညီအစ်ကိုမောင်နှမများ၏ နေ့စဉ်အသက်တာများကို မည်သည့်နှောင့်ယှက်မှု သို့မဟုတ် ကြားဝင်စွက်ဖက်မှုကိုမျှ ခွင့်မပြုပေ။ ဤသည်မှာ ခေါင်းဆောင်များနှင့် အမှုဆောင်များက ဖြေရှင်းရန် တာဝန်ရှိသင့်သည့် ပြဿနာတစ်ရပ် ဖြစ်သည်။ ညီအစ်ကိုမောင်နှမများ၏ ဆွေမျိုးများ၊ မိတ်ဆွေများ သို့မဟုတ် အသိအကျွမ်းများဖြစ်သော လူပုဂ္ဂိုလ်များ ရှိနိုင်သည်၊ ၎င်းတို့သည် “ညီအစ်ကိုမောင်နှမများ” ဟူ၍ ဟန်ဆောင်ကာ ညီအစ်ကိုမောင်နှမများကို သိမ်းသွင်းပြီး အထင်အမြင်မှားစေရန် ကြိုးပမ်းလျက် ၎င်းတို့ကို မိမိတို့၏ တာဝန်များထမ်းဆောင်ခြင်းမှ တားဆီးကြသည်။ ခေါင်းဆောင်များနှင့် အမှုဆောင်များ သို့မဟုတ် ညီအစ်ကိုမောင်နှမများတွင် ထိုသို့သော လူပုဂ္ဂိုလ်များကို ကိုင်တွယ်ရန် တာဝန်နှင့် ဝတ္တရားရှိသည်။ ၎င်းတို့၏ အပြုအမူနှင့် လုပ်ဆောင်ချက်များသည် အခြားသူများကို မိမိတို့၏ တာဝန်များထမ်းဆောင်ခြင်းနှင့် ဘုရားသခင်နောက် လိုက်ခြင်းမှ တားဆီးပြီး အသင်းတော်၏အလုပ်အတွက် နှောင့်ယှက်မှုများကိုလည်း ဖြစ်စေသည်၊ သို့ဖြစ်၍ ခေါင်းဆောင်များနှင့် အမှုဆောင်များသည် အခြေအနေကို ဖြေရှင်းရန်နှင့် ကန့်သတ်ချက်များ ချမှတ်ရန် ရှေ့ထွက်သင့်သည်။ ထိုသို့သော လူပုဂ္ဂိုလ်များကို ကိုင်တွယ်ဖြေရှင်းခြင်းနှင့် စီမံခန့်ခွဲခြင်းအတွက် သင့်လျော်သော နည်းလမ်းများ ငါတို့၌ ရှိသည်မှာ သေချာပါသည်။ ရိုက်နှက်ခြင်း သို့မဟုတ် ဆူပူကြိမ်းမောင်းခြင်းကို အားကိုးရန် မလိုအပ်ပေ၊ ငါတို့သည် ၎င်းတို့၏ ပြဿနာ၏အနှစ်သာရနှင့် ၎င်းတို့အား ဆန့်ကျင်သည့် ဘုရားသခင် ရွေးချယ်ထားသောလူများ အများစုထံမှ စွပ်စွဲချက်များနှင့် ပြစ်တင်မှုများကို ၎င်းတို့အား ရှင်းလင်းစွာ ပြောကြားရုံသာဖြစ်ပြီး နောက်ဆုံးတွင် ၎င်းတို့အား ဤသို့ပြောကြားသည်၊ “သင့်ကို ရှင်းလင်းပစ်ခြင်းသည် အများစုက ပြုလုပ်ပြီး လက်မှတ်ရေးထိုး အတည်ပြုခဲ့သော ဆုံးဖြတ်ချက်တစ်ခု ဖြစ်သည်။ သင် သဘောတူသည်ဖြစ်စေ၊ မတူသည်ဖြစ်စေ အသင်းတော်၌ ဤဆုံးဖြတ်ချက်ကို ချမှတ်ရန်နှင့် သင့်ကို ထိုအတိုင်း ကိုင်တွယ်ရန် အခွင့်အာဏာရှိသည်။ သင်သည် နာခံသင့်သည်” ဟူ၍ ဖြစ်သည်။ ဤပြဿနာသည် ဤသို့ဖြင့် ဖြေရှင်းပြီးဖြစ်သည်၊ ထိုသို့ ကိုင်တွယ်ခြင်းသည် စည်းမျဉ်းစည်းကမ်းနှင့် လုံးဝကိုက်ညီသည်။ အခွင့်ကောင်းယူတတ်သောသူတို့အတွက်မူ ၎င်းတို့ကို စည်းမျဉ်းများအတိုင်း ဆက်ဆံပြီး ကိုင်တွယ်သင့်သည်။ ၎င်းတို့သည် သင့်ထံမှ တစ်စုံတစ်ခုကို ချေးငှားပြီး သင့်ကို အခွင့်ကောင်းယူလိုပါက သင်အလိုရှိလျှင် ၎င်းတို့အား ချေးငှားနိုင်သည် သို့မဟုတ် သင်မလိုလားပါက ငြင်းပယ်နိုင်သည်၊ ဆုံးဖြတ်ချက်သည် သင့်လက်ထဲတွင် ရှိသည်။ ၎င်းတို့အား ချေးငှားခြင်းသည် ကြင်နာမှုပြသည့် လုပ်ရပ်ဖြစ်သည်၊ ငြင်းပယ်ခြင်းသည် သင်၏ အခွင့်အရေးဖြစ်သည်။ ၎င်းတို့က “ကျွန်ုပ်တို့အားလုံး ညီအစ်ကိုမောင်နှမများဖြစ်သည် မဟုတ်လား။ ကပ်စေးနှဲလိုက်လေခြင်း၊ တစ်စုံတစ်ခုကိုပင် ချေးငှားရန် လိုလားမှုမရှိ” ဟု ပြောဆိုပါက သင်သည် ဤသို့ ပြန်ပြောနိုင်သည်၊ “ဤသည်မှာ ကျွန်ုပ်၏အပိုင်ဖြစ်သည်၊ ပြီးလျှင် ကျွန်ုပ်တွင် မချေးငှားပိုင်ခွင့်ရှိသည်။ ဤသည်မှာ စည်းမျဉ်းနှင့်ကိုက်ညီသည်။ ‘ကျွန်ုပ်တို့အားလုံး ညီအစ်ကိုမောင်နှမများ ဖြစ်ကြသည်’ ဆိုသည်နှင့် ကျွန်ုပ်အား ဖိအားမပေးနှင့်။ သင်ပြောနေသည့်အရာသည် သမ္မာတရားမဟုတ်။ ‘သူ့ကို သင်ချေးငှားရမည်’ဟု ဘုရားသခင် မပြောမချင်း၊ ပြောလာမှသာ သင့်အား ကျွန်ုပ် ချေးငှားမည်” ဟူ၍ ဖြစ်သည်။ မည်သူမျှ အသင်းတော်၏ ဟန်ဆောင်မှုဖြင့် သို့မဟုတ် “ငါတို့အားလုံး ယုံကြည်သူတွေဖြစ်ပြီး ညီအစ်ကိုမောင်နှမတွေပါ” ဟူသော အတွေးအခေါ်ဖြင့် ပုဂ္ဂိုလ်ရေးပိုင်ဆိုင်မှုကို ခြိမ်းခြောက်တောင်းယူပိုင်ခွင့် သို့မဟုတ် ချေးငှားပိုင်ခွင့် မရှိပေ။ ဤသည်မှာ သမ္မာတရားလော။ (ဟုတ်ပါသည်။) ဤသည်မှာ သမ္မာတရားဖြစ်သည်။ ဤသမ္မာတရားကို လိုက်နာခြင်းအားဖြင့်သာ လူတိုင်းအတွက် တရားမျှတမှုကို သေချာစေနိုင်ပြီး လူတိုင်းသည် ၎င်းတို့၏ စစ်မှန်သော အခွင့်အရေးများကို ခံစားနိုင်ကြမည်ဖြစ်သည်။ သို့သော် တစ်စုံတစ်ဦးက “ဘုရားအိမ်တော်၏ အလုပ် လိုအပ်ချက်များ”၊ “အသင်းတော်၏ အလုပ် လိုအပ်ချက်များ” သို့မဟုတ် “ညီအစ်ကိုမောင်နှမများ၏ လိုအပ်ချက်များ” ဟူသော ဆင်ခြေများကို အသုံးပြု၍ ပုဂ္ဂိုလ်ရေးပစ္စည်းများကို ခြိမ်းခြောက်တောင်းယူခြင်း သို့မဟုတ် ချေးငှားခြင်း ပြုပါက ဤသည်မှာ သမ္မာတရားနှင့် ကိုက်ညီပါသလော။ (မကိုက်ညီပါ။) သမ္မာတရားနှင့် မကိုက်ညီသော တောင်းဆိုမှုများကို ငြင်းပယ်ပိုင်ခွင့် သင်၌ ရှိသလော။ (ရှိပါသည်။) ငြင်းပယ်သည့်အတွက် တစ်စုံတစ်ဦးက သင့်ကို ကပ်စေးနဲသူ သို့မဟုတ် စေးခြင်ကုပ်သူဟု သမုတ်တပ်ပါက သင် ကြောက်မည်လော။ (မကြောက်ပါ။) တစ်စုံတစ်ဦးက ဤကိစ္စကို ပွဲကြီးပွဲကောင်းလုပ်ပြီး သင်သည် အသင်းတော်၏ အလုပ်ကို မထောက်ပံ့ဟုဖြစ်စေ၊ သင်၌ ညီအစ်ကိုမောင်နှမများအပေါ် ချစ်ခြင်းမေတ္တာ ကင်းမဲ့သည်ဟုဖြစ်စေ ဆိုကာ ညီအစ်ကိုမောင်နှမများကို သင့်အား ပယ်ချပြီး တစ်ယောက်တည်း ဝိုင်းပယ်စေပါက သင် ကြောက်မည်လော။ သင်သည် နောက်ဆုတ်သွားလိမ့်မည်။ ထိုအခိုက်အတန့်တွင် သင်သည် ဤသို့ တွေးလိမ့်မည်၊ “ကားတစ်စီးငှားသည် အဘယ်အရေးကြီးသနည်း။ အသင်းတော်ဖြစ်စေ၊ ဘုရားအိမ်တော်ဖြစ်စေ၊ ညီအစ်ကိုမောင်နမများဖြစ်စေ ငှားလျှင် အဆင်ပြေသည်။ ညီအစ်ကိုမောင်နှမများကို စိတ်အနှောင့်အယှက်ဖြစ်အောင် မလုပ်သည်မှာ ကောင်းသည်။ လူတစ်ဦးကို စိတ်အနှောင့်အယှက်ပေးခြင်းသည် ကြောက်မက်ဖွယ်ကောင်းသော်လည်း ညီအစ်ကိုမောင်နှမများအားလုံးသည် စိတ်အနှောင့်အယှက်ဖြစ်ပြီး ၎င်းတို့က ငါ့အပေါ် အေးစက်လာကာ ငါ့ကို သီးသန့်ခွဲထားပါက ငါမည်သည့်အရာကိုလုပ်သင့်သနည်း” ဟူ၍ ဖြစ်သည်။ သင်သည် ဘုရားသခင်ကို ယုံကြည်သောကြောင့် အဘယ်အရာကို ကြောက်စရာရှိသနည်း။ ၎င်းတို့ သင့်ကို ဝိုင်းပယ်ခြင်းက ၎င်းတို့တွင် သမ္မာတရား ပိုင်ဆိုင်သည်ဟု မဆိုလိုသကဲ့သို့ ၎င်းတို့၏ လုပ်ဆောင်ချက်များသည် သမ္မာတရားနှင့် ကိုက်ညီသည်ဟုလည်း မဆိုလိုပေ။ သမ္မာတရားသည် အစဉ်အမြဲ သမ္မာတရားသာ ဖြစ်သည်။ လူနည်းစုက သဘောတူသည်ဖြစ်စေ လူများစုက သဘောတူသည်ဖြစ်စေ ယင်းမှာ သမ္မာတရားသာ ဖြစ်သည်။ သမ္မာတရားမရှိဘဲ လူနည်းစုက လူများစုကို နာခံလျှင်ပင် ယင်းမှာ သမ္မာတရား မဟုတ်ပေ။ ဤသည်မှာ မည်သူမျှ မငြင်းပယ်နိုင်သော အချက်တစ်ချက် ဖြစ်သည်။ တစ်စုံတစ်ဦးတွင် သမ္မာတရား လက်တွေ့ကျမှု ရှိမရှိသည် ၎င်းတို့ မည်မျှ သာယာချိုအီစွာ ပြောဆိုသည်အပေါ်တွင် မမူတည်ဘဲ ၎င်းတို့သည် သမ္မာတရားကို လက်တွေ့လုပ်ဆောင်နိုင်ခြင်း ရှိမရှိနှင့် စည်းမျဉ်းများအတိုင်း ပြုမူဆောင်ရွက်နိုင်ခြင်း ရှိမရှိအပေါ်တွင် မူတည်သည်။ ဥပမာအားဖြင့် သင်သည် သင်၏တာဝန်ကို ထမ်းဆောင်ရန်အလို့ငှာ ကွန်ပျူတာအသစ်တစ်လုံးကို ဝယ်ခဲ့ပြီး တစ်စုံတစ်ဦးက အသင်းတော်၏အလုပ်အတွက်ဟု အခိုင်အမာဆိုကာ ယင်းကို ချေးငှားလိုသည်။ သင်သည် ၎င်းတို့အား မချေးငှားဘဲ ငြင်းပယ်လိုက်ရာ ၎င်းတို့က “သင်၌ ချစ်ခြင်းမေတ္တာ ကင်းမဲ့သည်၊ သင်သည် ဘုရားသခင်ကို မချစ်၊ သင်သည် ကိုယ်ကျိုးမစွန့်တတ်ပေ။ ဤမျှလောက် စွန့်လွှတ်ခြင်းသည်ပင် သင့်အတွက် မတတ်နိုင်ပေ” ဟု ပြောဆိုသည်။ ဤစကားများသည် မှန်ကန်ပါသလော။ ၎င်းတို့သည် သမ္မာတရားနှင့် ကိုက်ညီပါသလော။ (မကိုက်ညီပါ။) သင်သည် ဤသို့ တုံ့ပြန်သင့်သည်၊ “ကွန်ပျူတာသည် ကျွန်ုပ်၏တာဝန်ကို ထမ်းဆောင်ရန်အတွက် ဖြစ်သည်။ ကျွန်ုပ်သည် လက်ရှိတွင် ကျွန်ုပ်၏တာဝန်ကို ထမ်းဆောင်နေသောကြောင့် ကျွန်ုပ်၏ ကွန်ပျူတာမရှိဘဲ မနေနိုင်ပါ။ သင်သည် ကျွန်ုပ်၏ ကွန်ပျူတာကို ချေးငှားလိုက်ပါက ကျွန်ုပ်၏ တာဝန်ထမ်းဆောင်မှုကို ထိခိုက်စေမည် မဟုတ်လော။ ထိုအရာသည် သမ္မာတရားနှင့် ကိုက်ညီမည်လော။ သင်သည် ကွန်ပျူတာကို အတိအကျ မည်သည့်အရာအတွက် လိုအပ်သနည်း။ သင်က အသင်းတော်အလုပ်အတွက်ဟု ဆိုသည်၊ ထိုသို့ဖြစ်ပါက သင်သည် သက်သေပြရန် တစ်စုံတစ်ဦးကို ရှာဖွေရန် လိုအပ်သည်။ ထို့အပြင် အသင်းတော်အလုပ်အတွက် ဖြစ်လျှင်ပင် သင်သည် ကျွန်ုပ်ထံမှ မချေးငှားသင့်ပေ။ သင်သည် ကျွန်ုပ်၏ ကွန်ပျူတာကို ယူသွားပါက ကျွန်ုပ်၏ တာဝန်ကို ထမ်းဆောင်ရန် မည်သည့်အရာကို အသုံးပြုရမည်နည်း။ သင်သည် မယုံနိုင်လောက်အောင် တစ်ကိုယ်ကောင်းဆန်လှသည်။ အခွင့်ကောင်းယူရန် အကြောင်းပြချက်အဖြစ် အသင်းတော်အလုပ်၏ လိုအပ်ချက်များကို အသုံးမချနှင့်၊ သင်၏ ထိုအကွက်ကို ကျွန်ုပ် လက်ခံမည်မဟုတ်။ ကျွန်ုပ်သည် ပိုင်းခြားသိမြင်နိုင်စွမ်းမရှိသော နားဝေတိမ်တောင် ဖြစ်သောသူတစ်ဦးဟု မထင်နှင့်၊ သင်တို့ အခွင့်ကောင်းယူရန် ကြည့်နေသော်လည်း သင်တို့အကြံအောင်မည် မဟုတ်” ဟူ၍ ဖြစ်သည်။ စာတန်၏ ထောင်ချောက်ထဲသို့ မကျရောက်စေရန် ရှောင်ရှားဖို့ ထိုသို့သောလူတို့အား ဤနည်းလမ်းဖြင့် ပြောဆိုရန် လိုအပ်သည်။ ဤပြဿနာသည် ဖြေရှင်းရန် လွယ်ကူပါသလော။ သင်သည် သမ္မာတရားကို နားလည်ပြီး စည်းမျဉ်းများအတိုင်း ပြုမူသည်နှင့်တစ်ပြိုင်နက် မည်သူပြောဆိုသည့်စကားကိုမျှ သင် ကြောက်ရန် မလိုအပ်တော့ပေ။ ၎င်းတို့ သင့်ကို မှားယွင်းစွာ တံဆိပ်တပ်ခြင်းကို ဂရုမစိုက်နှင့်၊ ၎င်းတို့ အာဘောင်အာရင်းသန်သန်နှင့် ပြောနေသော ထိုအယူဝါဒအနည်းငယ်သည် မည်သူ့ကိုမျှ လုံးဝ ဖျောင်းဖျနိုင်မည် မဟုတ်ပေ။ အခွင့်ကောင်းယူတတ်သောသူတို့၏ လူ့သဘာဝ၏ သရုပ်သကန်များနှင့် ၎င်းတို့ကို ကိုင်တွယ်ဖြေရှင်းခြင်းအတွက် စည်းမျဉ်းများကို ဤသို့ ရိုးရှင်းစွာ မိတ်သဟာယဖွဲ့ခဲ့ပြီးဖြစ်သည်။

အသင်းတော်ထဲ၌ အခွင့်ကောင်းယူတတ်သော ထိုသူတို့နှင့်ပတ်သက်၍ တစ်ဖက်တွင် လူတို့သည် ၎င်းတို့ကို ပို၍ တိကျစွာနှင့် လက်တွေ့ကျကျ ပိုင်းခြားသိမြင်ရန် လိုအပ်ပြီး အခြားတစ်ဖက်တွင် လူတို့သည် သမ္မာတရားကို နားလည်ရမည်၊ ၎င်းတို့သည် ဘုရားသခင်ကို ယုံကြည်ခြင်းအပေါ် မိမိတို့ထားရှိသင့်သော ရပ်တည်ချက်၊ မိမိတို့လုပ်ဆောင်သင့်သော အလုပ်၊ မိမိတို့စောင့်ထိန်းသင့်သော စည်းမျဉ်းများနှင့် လူများ၊ ဖြစ်ရပ်များနှင့် အမှုအရာများအပေါ် မိမိတို့ထားရှိသင့်သော သဘောထားတို့ကို မိမိတို့၏ စိတ်နှလုံးထဲတွင် ရှင်းလင်းစွာ သိရှိထားရမည်။ လူအုပ်နောက်မလိုက်နှင့်၊ လူတို့ကို စိတအနှောင့်အယှက်ပေးမိရန်လည်း မကြောက်ရွံ့နှင့်၊ အထူးသဖြင့် အချို့သော လူပုဂ္ဂိုလ်များကို ကျေနပ်စေရန်အလို့ငှာ သင်၌ရှိသင့်သော စည်းမျဉ်းများနှင့် ရပ်တည်ချက်ကို မစွန့်လွှတ်နှင့်၊ အဆုံး၌ လူတို့ကို ကျေနပ်စေသော်လည်း ဘုရားသခင်၏ စိတ်နှလုံးတော်ကို နာကျင်စေကာ ဘုရားသခင်၏ စက်ဆုပ်ရွံရှာခြင်းကို ခံရလိမ့်မည်။ အကယ်၍ ယင်းက စည်းမျဉ်းများနှင့်ကိုက်ညီသည့် လုပ်ရပ်တစ်ခုဖြစ်ပါက ယင်းကို သင်လုပ်ဆောင်ခြင်းက လူများကို ပြစ်မှားစော်ကားမိလျှင်ဖြစ်စေ၊ သင့်ကို နောက်ကွယ်တွင် ပြင်းထန်စွာ ဝေဖန်ခံရဖို့ ဖြစ်စေလျှင်ပင် အရေးမကြီးပေ။ သို့ရာတွင် ယင်းက စည်းမျဉ်းများနှင့်မကိုက်ညီသည့် လုပ်ရပ်တစ်ခုဖြစ်ပါက ယင်းကို လုပ်ဆောင်ခြင်းဖြင့် လူတိုင်းထံမှ အသိအမှတ်ပြုခြင်းနှင့် ထောက်ခံခြင်းတို့ကို သင်ရပြီး လူတိုင်းနှင့် အဆင်ပြေနေသော်လည်း တစ်ခုမှာ ဘုရားသခင်၏ ရှေ့မှောက်တွင် ယင်းကို အကြောင်းပြ စာရင်းရှင်းနိုင်ခြင်း မရှိပါက သင်သည် ဆုံးရှုံးနစ်နာမှုတစ်ခုကို ခံစားရပြီဖြစ်သည်။ အကယ်၍ သင်သည် လူအများစုနှင့် ဆက်ဆံရေးများကို ထိန်းသိမ်းထားပြီး ၎င်းတို့ကို ပျော်ရွှင်အောင်နှင့် စိတ်ကျေနပ်အောင် လုပ်ဆောင်ကာ ၎င်းတို့၏ချီးမွမ်းခြင်းကို ရထားသော်လည်း ဖန်ဆင်းရှင်ဖြစ်သည့် ဘုရားသခင်ကို ပုန်ကန်ပြစ်မှားပါက သင်သည် အဆုံးစွန် မိုက်မဲသောလူတစ်ဦး ဖြစ်သည်။ ထို့ကြောင့် သင် မည်သည့်အရာကိုလုပ်ပါစေ ယင်းက စည်းမျဉ်းများနှင့်ကိုက်ညီခြင်း ရှိမရှိ၊ ယင်းက ဘုရားသခင်ကို စိတ်ကျေနပ်စေခြင်း ရှိမရှိ ယင်းနှင့်ပတ်သက်သည့် ဘုရားသခင်၏သဘောထားက မည်သည့်အရာဖြစ်သည်၊ မည်သည့်ရပ်တည်ချက်ကို လူတို့ခံယူသင့်သည်၊ မည်သည့်စည်းမျဉ်းများကို လူတို့ထိန်းသိမ်းသင့်သည်၊ ဘုရားသခင်က မည်သို့ညွှန်ကြားထားသည်နှင့် ယင်းကို သင်မည်သို့လုပ်ဆောင်သင့်သည်တို့ကို သင် ရှင်းလင်းစွာ နားလည်ရမည်ဖြစ်သည်။ သင်သည် ဤအကြောင်းနှင့်ပတ်သက်၍ ရှေးဦးစွာ ရှင်းရှင်းလင်းလင်း သိထားသင့်သည်။ သင်၏ အခြားသူများနှင့် ပေါင်းသင်းဆက်ဆံမှုများ၊ သင်၏ ရုပ်ဝတ္ထုဆိုင်ရာ ဖလှယ်မှုများနှင့် အခြားသူများနှင့် ဆက်ဆံမှုများသည် စည်းမျဉ်းများနှင့် ကိုက်ညီခြင်းဟူသော အခြေခံအုတ်မြစ်တစ်ခုအပေါ်တွင် တည်ဆောက်ထားသလော။ ၎င်းတို့သည် ဘုရားသခင် နှစ်သက်ခြင်းဟူသော အခြေခံအုတ်မြစ်တစ်ခုအပေါ်တွင် တည်ဆောက်ထားသလော။ ထိုသို့မဟုတ်ပါက သင်လုပ်ဆောင်သမျှအားလုံးသည် သင်မည်မျှပင် ကောင်းမွန်စွာ ထိန်းသိမ်းပါစေ၊ မည်မျှပင် စုံလင်စွာ လုပ်ဆောင်ပါစေ သို့မဟုတ် အခြားသူများထံမှ ချီးမွမ်းခြင်းကို မည်မျှပင် ရရှိပါစေ ဘုရားသခင်က အမှတ်ရတော်မူမည် မဟုတ်ပေ။ သို့ဖြစ်၍ မည်သူနှင့်မဆို သင်၏ ပေါင်းသင်းဆက်ဆံမှုများနှင့် အပြန်အလှန်ဆက်ဆံမှုများ၏ စည်းမျဉ်းများသည် ၎င်းတို့က သင့်ကို အခွင့်ကောင်းယူခြင်း ရှိမရှိ သို့မဟုတ် သင်က ၎င်းတို့ကို အခွင့်ကောင်းယူခြင်း ရှိမရှိကို အလေးမထားသင့်ပေ၊ ၎င်းတို့သည် ဤအခြေခံအုတ်မြစ်အပေါ်တွင် တည်ဆောက်ထားခြင်း မဖြစ်သင့်ပေ။ ထိုအစား ဤစည်းမျဉ်းများသည် သင်တို့လုပ်ဆောင်သည့်အရာသည် သမ္မာတရား စည်းမျဉ်းများနှင့် ကိုက်ညီခြင်း ရှိမရှိကို အလေးထားသင့်သည်။ သို့မှသာလျှင် ယင်းကို “ကျွန်ုပ်တို့၏ ဘုရားသခင်ကို ယုံကြည်ခြင်းကို ထောက်ထား၍” ဟု အမှန်တကယ် မှတ်ယူနိုင်မည်ဖြစ်သည်၊ သို့မှသာလျှင် သင်က “ကျွန်ုပ်တို့အားလုံးသည် ယုံကြည်သူများ၊ ညီအစ်ကိုမောင်နှမများ ဖြစ်ကြသည်” ဟု ပြောဆိုနိုင်မည်ဖြစ်သည်၊ သို့မှသာလျှင် သင်သည် ဤအရာကို အကြောင်းအရင်းအဖြစ် မှတ်ယူနိုင်မည်ဖြစ်သည်။ အသက်ဝင်ရောက်မှု၊ တာဝန်နှင့် အသင်းတော်အလုပ်တို့နှင့် သက်ဆိုင်သော ကိစ္စရပ်များမှလွဲ၍ အခြားမည်သည့် အပြန်အလှန်ဆက်ဆံမှုမဆိုသည် “ညီအစ်ကိုမောင်နှမများ” ဟူသော အကြောင်းအရင်းအပေါ်တွင် အခြေမခံသင့်ပေ။ ယင်းသည် တာဝန်၊ အသက်ဝင်ရောက်မှု သို့မဟုတ် လူအချင်းချင်းကြား ပုံမှန်အပြန်အလှန်ဆက်ဆံမှုတို့နှင့် မသက်ဆိုင်ဘဲ တစ်စုံတစ်ဦးက အချို့သော ပန်းတိုင်တစ်ခုကို ဖြစ်မြောက်အောင်မြင်စေရန် “ညီအစ်ကိုမောင်နှမများ” ဟူသော ဟန်ဆောင်မှုကို အကြောင်းပြချက်တစ်ခုအဖြစ် အစဉ်အမြဲ အသုံးပြုပါက ၎င်းတို့သည် အခွင့်ကောင်းယူရန်နှင့် ၎င်းတို့၏ ပုဂ္ဂိုလ်ရေးအကျိုးအမြတ်များအတွက် လျှို့ဝှက်ကြံစည်ရန် ထိုသို့သော ပြောဆိုချက်များ၊ နည်းလမ်းများနှင့် အကျိုးရှိသော အခြေအနေများကို အကြောင်းပြချက်တစ်ခုအဖြစ် အသုံးပြုဖို့ ကြိုးပမ်းနေခြင်းဖြစ်သည်မှာ သံသယဖြစ်ဖွယ်မရှိပေ။ ဘုရားသခင် ရွေးချယ်ထားသောလူများသည် ဤအရာနှင့်ပတ်သက်၍ သတိဝီရိယရှိသင့်ပြီး လှည့်ဖြားခြင်းမခံရစေရန် ထိုသို့သောကိစ္စရပ်များကို ဉာဏ်ပညာဖြင့် ကိုင်တွယ်ဖြေရှင်းသင့်သည်။ အဘယ်ကြောင့်ဆိုသော် အသင်းတော်ရှိ လူအများစုသည် သမ္မာတရားကို နားမလည်ကြသည့်အပြင် အချို့မှာမူ စည်းမျဉ်းများမရှိဘဲ ပြုမူကာ မကောင်းမှုများကို မဆင်မခြင်သော ကျူးလွန်သည့် မယုံကြည်သူများပင် ဖြစ်ကြသောကြောင့် ဖြစ်သည်။ ၎င်းတို့က “ညီအစ်ကိုမောင်နှမများ” ဟူ၍ ဟန်ဆောင်ကာ အမှုအရာများကို လုပ်ဆောင်ခြင်းသည် အသင်းတော်၏အလုပ်ကို အလွယ်ကူဆုံး ဩဇာလွှမ်းမိုးပြီး နှောင့်ယှက်သည့်အရာ ဖြစ်သည်။ ယနေ့ ဤအရာအားလုံးကို ပြောဆိုရခြင်း၏ ရည်ရွယ်ချက်မှာ အဘယ်နည်း။ ယင်းမှာ အခြားသူများနှင့် ဆက်သွယ်ပြောဆိုရာတွင်ဖြစ်စေ၊ အပြန်အလှန်ဆက်ဆံရာတွင်ဖြစ်စေ အခြေခံအုတ်မြစ်သည် သမ္မာတရား စည်းမျဉ်းများအပေါ်တွင် အခြေခံသင့်ကြောင်းကို ရှင်းလင်းစေရန် ဖြစ်သည်။ ဤသည်မှာ လူအချင်းချင်းကြား မလျော်ကန်သော ဆက်ဆံမှုများကို တားဆီးပေးသည်၊ ဤသည်မှာ အခွင့်ကောင်းယူတတ်သောသူတို့အား အမြတ်ထုတ်ရန် ဟာကွက်များကို ရှာဖွေခြင်းမှလည်း တားဆီးပေးသည့်အပြင် တစ်ချိန်တည်းတွင် မိမိတို့၏ သိက္ခာကို အလွန်အမင်း အလေးထားသောသူများ သို့မဟုတ် လူ့သဘာဝ၌ အားနည်းသောသူတို့အား အစဉ်အမြဲ အခွင့်ကောင်းယူခံရခြင်း၊ အစဉ်အမြဲ လှည့်စားခံရခြင်းနှင့် အစဉ်အမြဲ ဆုံးရှုံးမှုများ ခံစားရခြင်းတို့မှလည်း တားဆီးပေးသည်မှာ ပြောစရာမလိုပေ။ အချို့လူများသည် မိမိတို့၏ ကိုယ်ပိုင်မိသားစု အခြေအနေများ၏ သိသာထင်ရှားသော အခက်အခဲရှိနေသော်လည်း အခွင့်ကောင်းယူရသည်ကို နှစ်သက်သော တစ်စုံတစ်ဦးက ၎င်းတို့အား အထင်ကြီးသောကြောင့် ၎င်းတို့ကို ရွေးချယ်ခဲ့သည်ဟု အခိုင်အမာဆိုလျက် ငွေချေးရန် တောင်းဆိုသောကြောင့် မိမိတို့ကိုယ်တိုင် ဒုက္ခခံကာ ဣန္ဒြေဆည်ပြီး မိမိတို့၏ ချွေးနည်းစာဖြင့် ရရှိထားသောငွေကို ချေးငှားလိုက်ကြသည်။ ငွေချေးပြီးနောက်တွင် မည်သို့ဖြစ်သွားသနည်း။ ငွေချေးသူသည် ပျောက်ကွယ်သွားသည်။ ထို့နောက် ငွေချေးပေးသူက မိမိကို မကာကွယ်သည့်အတွက် ဘုရားသခင်ကို စောဒကတက်သည်။ ဤသည်မှာ ဆင်ခြင်တုံတရား ရှိခြင်းလော။ ဘုရားသခင်ကို ယုံကြည်ခြင်းသည် တစ်စုံတစ်ခုကို လုပ်ဆောင်သည့်အခါ သင် စဉ်းစားရန်မလိုအပ်ဘဲ ဘုရားသခင်က အရာအားလုံးကို တာဝန်ယူလိမ့်မည်ဟု ဆိုလိုသည်ဟူ၍များ သင်ထင်မှတ်ခဲ့သလော။ ယင်းက သင့်ကို အသုံးမကျသောသူတစ်ဦး ဖြစ်သွားစေသည် မဟုတ်လော။ ဘုရားသခင်သည် လူတို့အား ရိုးသားရန်၊ ပညာရှိရန်နှင့် သမ္မာတရား စည်းမျဉ်းများအတိုင်း ပြုမူရန် တောင်းဆိုတော်မူသည်။ သင်သည် ဤအရာကို နားမလည်နိုင်သလော။ သင်သည် ဤသမ္မာတရား စည်းမျဉ်းများအတိုင်း မပြုမူပါက သင်သည် အစဉ်အမြဲ ဆုံးရှုံးမှုများ ခံစားရပြီး လှည့်ဖြားခြင်းခံရရန် ထိုက်တန်ပေသည်။ အဆုံးတွင် သင်၏အသက်တာ၌ ထွက်ပေါက်မရှိသည့်အခါ သင်သည် မည်သူ့ကို အပြစ်တင်နိုင်မည်နည်း။ သင်သည် ကိုယ့်ဒုက္ခကိုယ်ရှာခြင်း ဖြစ်သည်။ သင်၏ လုပ်ဆောင်ချက်များသည် ချစ်ခြင်းမေတ္တာကြောင့် မဟုတ်ပေ၊ ယင်းတို့သည် မိုက်မဲခြင်းသာ ဖြစ်သည်။ သင်သည် ၎င်းတို့ကို ကျေနပ်စေရန် လူလိမ်တစ်ဦးအား ငွေချေးငှားခဲ့သည်၊ သို့သော် သင် ငွေလိုအပ်သည့်အခါ ဘုရားအိမ်တော်ထံမှ တောင်းနိုင်မည်လော။ ဘုရားအိမ်တော်သည် သင့်အတွက် ဤတာဝန်ကို ထမ်းဆောင်သင့်သလော။ ဤကုန်ကျစရိတ်ကို ဘုရားအိမ်တော်က ကျခံပေးရန် မျှော်လင့်ခြင်းအားဖြင့် သင်သည် ဘုရားသခင်ကို အကြွေးတင်ရှိခြင်း မဟုတ်လော။ အသက်တာ၌ ထွက်ပေါက်မရှိဘဲ သင်သည် သင်၏တာဝန်ကို မည်သို့ ထမ်းဆောင်နိုင်မည်နည်း။ သင်သည် ဘုရားသခင်ထံ ဆုတောင်းပါက ဘုရားသခင်သည် သင့်ကို ဖြည့်ဆည်းပေးမည် မဟုတ်ပေ၊ ဤသည်မှာ ကိုယ်ပြုသောကံ ကိုယ်ခံရခြင်းဖြစ်ပြီး ထိုက်တန်လှပေသည်။ သင့်ကို ထိုမျှ မိုက်မဲရန် မည်သူက ပြောခဲ့သနည်း။ ထိုလူကို ယုံကြည်ရန် ဘုရားသခင်က သင့်ကို ပြောခဲ့သလော။ ၎င်းတို့အား ငွေချေးရန် ကိုယ်တော်က သင့်ကို ပြောခဲ့သလော။ ကိုယ်တော် မပြောခဲ့ပေ၊ ယင်းမှာ ဘုရားသခင်၏ ရည်ရွယ်ချက်ကို ကိုယ်စားမပြုဘဲ သင်၏ ပုဂ္ဂိုလ်ရေးဆိုင်ရာ လုပ်ဆောင်ချက်သာ ဖြစ်သည်။ သင်၏ ပုဂ္ဂိုလ်ရေးဆိုင်ရာ လုပ်ဆောင်ချက်များက မှားယွင်းပြီး ဆိုးကျိုးများကို ဖြစ်ပေါ်စေပါက သင်သည် တာဝန်ကို သင်ကိုယ်တိုင်သာ ခံယူနိုင်မည်ဖြစ်သည်။ သင်သည် အဘယ်ကြောင့် ဘုရားအိမ်တော်ကို တာဝန်ယူစေသင့်သနည်း၊ သို့မဟုတ် ဘုရားသခင်ကို သင့်အတွက် ခေါင်းခံစေသင့်သနည်း။ သင့်ကို မကာကွယ်သည့်အတွက် ဘုရားသခင်ကို အဘယ်ကြောင့် စောဒကတက်ရသနည်း။ သင်သည် အရွယ်ရောက်ပြီးသူတစ်ဦး ဖြစ်သည်၊ အဘယ်ကြောင့် လူကြီးတစ်ဦးအနေဖြင့် ရှိသင့်သော ပိုင်းခြားဝေဖန်နိုင်စွမ်း ကင်းမဲ့ရသနည်း။ လူ့အဖွဲ့အစည်းထဲ၌ တောင်းဆိုသော မည်သူ့ကိုမဆို သင် ငွေချေးမည်လော။ သင်သည် ယင်းကို စဉ်းစားရမည် မဟုတ်လော။ တစ်စုံတစ်ဦးက ၎င်းတို့၏ တောင်းဆိုချက်တွင် “ညီအစ်ကိုမောင်နှမများ” ဟူသော အမည်ကို ထည့်သွင်းပြောဆိုရုံမျှဖြင့် သင်သည် အဘယ်ကြောင့် ထိုသူအား ငွေချေးမည်နည်း။ ဤသည်မှာ သင် မိုက်မဲကြောင်းကို မပြသပေလော။ သင်သည် မိုက်မဲရုံသာမက တုံးအပေသည်၊ အလွန်အမင်း တုံးအလှပေသည်။ ညီအစ်ကိုမောင်နှမများအားလုံးသည် ဘုရားသခင်ကို စိတ်ရင်းမှန်ဖြင့် ယုံကြည်ကြသည်၊ ၎င်းတို့အားလုံးသည် သမ္မာတရားကို နားလည်ကြသည်ဟု သင်ထင်မှတ်သလော။ ၎င်းတို့ထဲမှ အနည်းဆုံး သုံးပုံတစ်ပုံသည် သမ္မာတရားကို မချစ်မြတ်နိုးကြဘဲ မယုံကြည်သူများ ဖြစ်ကြသည်။ သင်သည် ဤအရာကို ပိုင်းခြားသိမြင်နိုင်ခြင်း မရှိသလော။ ညီအစ်ကိုမောင်နှမများ အားလုံးသည် ဘုရားသခင်၏ ကယ်တင်ခြင်းခံရမည့်သူများ၊ ဘုရားသခင်က အမှန်တကယ် ရွေးချယ်ထားသောသူများ ဖြစ်သည်ဟု သင်ထင်မှတ်သလော။ “ခေါ်တော်မူသောသူတို့သည် များသော်လည်း၊ ရွေးချယ်တော်မူသောသူတို့သည် နည်းကြ၏” ဟူသည်ကို သင်မသိသလော။ ညီအစ်ကိုမောင်နှမများက မည်သူ့ကို ကိုယ်စားပြုသနည်း။ ၎င်းတို့သည် ဖောက်ပြန်ပျက်စီးသော လူသားမျိုးနွယ်ကို ကိုယ်စားပြုသည်။ သင်သည် ၎င်းတို့ကို ယုံကြည်ပါက သင်သည် မိုက်မဲနေခြင်း မဟုတ်လော။ သင်၏ ပုဂ္ဂိုလ်ရေးဆိုင်ရာ လုပ်ဆောင်ချက်များက မည်သို့သော ဆိုးကျိုးများကိုပင် ဖြစ်ပေါ်စေပါစေ ဘုရားအိမ်တော်ကို သို့မဟုတ် ညီအစ်ကိုမောင်နှမများကို သွားမရှာနှင့်၊ မည်သူမျှ သင့်အတွက် ဖုံးကွယ်ပေးနိုင်မည်မဟုတ်သကဲ့သို့ မည်သူမျှ သင့်အတွက် တာဝန်ခံရန် ဝတ္တရားမရှိပေ။ သင်သည် ခါးသီးမှုကို ဖန်တီးခဲ့သည်၊ သင်သည် ယင်းကို ခံယူလော့၊ သင်၌သာ တာဝန်ရှိသည်။ ထို့အပြင် ဤကိစ္စရပ်များကို မိတ်သဟာယဖွဲ့ခြင်းနှင့် ဆွေးနွေးခြင်းအတွက် အသင်းတော်အသက်တာထဲသို့ မယူဆောင်လာနှင့်၊ မည်သူမျှ ယင်းကို ကြားလိုခြင်းမရှိသည့်အပြင် အခြားသူများသည် သင်၏ ရှုပ်ထွေးသော ကိစ္စရပ်များကို ကိုင်တွယ်ဖြေရှင်းရန် တာဝန်မရှိပေ။ တစ်စုံတစ်ဦးက သင့်ကို အမှန်တကယ် ကူညီလိုပါက သင်တို့နှစ်ဦးသည် ယင်းကို သီးသန့် ဖြေရှင်းနိုင်သည်။ နားလည်ပြီလော။

ဤကိစ္စရပ်များအပေါ် မိတ်သဟာယဖွဲ့ခြင်းသည် လူတို့အတွက် သတိပေးချက်တစ်ခုအဖြစ် ဆောင်ရွက်ပေးပြီး ၎င်းတို့၏ အသိပညာကို ကျယ်ပြန့်စေကာ ဘုရားသခင်ကို ယုံကြည်သောသူတို့တွင် လူအမျိုးမျိုး ရှိကြောင်းကို ရှင်းလင်းစေလျက် ၎င်းတို့အတွက် သတိပေးနှိုးဆော်လျက် ရှိသည်။ သင်တို့ မှတ်သားထားရမည့် အရေးကြီးသော အချက်တစ်ချက်ရှိသည်၊ ယင်းကို ငါသည် ယခင်က အကြိမ်များစွာ ပြောခဲ့ပြီးဖြစ်သည်၊ ဘုရားသခင်ကို ယုံကြည်သောသူတို့သည် ဖောက်ပြန်ပျက်စီးသော လူသားမျိုးနွယ်ထဲမှ ရွေးချယ်ခံရခြင်း ဖြစ်သည်။ ဤသည်မှာ မည်သည့်အရာကို ဆိုလိုသနည်း။ ယင်းမှာ လူတစ်ဦးချင်းစီတိုင်းသည် စာတန်၏ ဖောက်ပြန်ပျက်စီးစေခြင်းကို ခံခဲ့ရပြီးဖြစ်ကြောင်း၊ လူတိုင်းတွင် ဖောက်ပြန်ပျက်စီးသော စိတ်သဘောထားများရှိပြီး အတိုင်းအတာအမျိုးမျိုးဖြင့် မကောင်းမှုကို ပြုလုပ်နိုင်စွမ်းရှိကြောင်း၊ သင့်လျော်သော အခြေအနေတွင် ဘုရားသခင်ကို အတိုက်အခံလုပ်သော အမှုအရာများကို လုပ်ဆောင်နိုင်စွမ်းရှိကြောင်းကို ဆိုလိုသည်။ ငါတို့ ယခုလေးတင် မိတ်သဟာယဖွဲ့ခဲ့သည့် အဖြစ်မှန်များနှင့် အမှန်နှင့် အမှားကို လွဲချော်အောင်ပြောခြင်းနှင့် အခွင့်ကောင်းယူတတ်ခြင်းတို့ကို ယုံကြည်သူတို့က လုပ်ဆောင်ကြခြင်းဖြစ်သည်၊ ဘာသာတရားမရှိသူတို့သည် ငါတို့နှင့် မသက်ဆိုင်သောကြောင့် ၎င်းတို့အကြောင်းကို ဤနေရာတွင် ငါတို့ ဖော်ပြမည်မဟုတ်ပေ။ ငါတို့မိတ်သဟာယဖွဲ့ခဲ့သော လူ့သဘာဝ၏ ဤသရုပ်သကန်များသည် ဘုရားသခင်ကို ယုံကြည်သောသူတို့၏ သရုပ်သကန်များ အတိအကျပင် ဖြစ်သည်။ သို့ဖြစ်၍ “ညီအစ်ကိုမောင်နှမများ” ဟူသော အမည်ကို ကြီးကျယ်သော၊ မြင့်မြတ်သော သို့မဟုတ် အထွတ်အမြတ်ထားပြီး မချိုးဖောက်အပ်သော အရာတစ်ခုအဖြစ် မမှတ်ယူနှင့်။ သင်သည် ထိုသို့မှတ်ယူပါက ယင်းမှာ သင်၏ မိုက်မဲခြင်းသာ ဖြစ်သည်။ ဘုရားသခင်က “ညီအစ်ကိုမောင်နှမများသည် အဖိုးတန်၏။ ၎င်းတို့သည် ညီအစ်ကိုမောင်နှမများ ဖြစ်လာသည်နှင့်တစ်ပြိုင်နက် သန့်ရှင်းစင်ကြယ်ခြင်းသို့ ရောက်ကြ၏၊ ၎င်းတို့သည် ဘုရားသခင်၏ လူယုံများ၊ လုံးဝယုံကြည်စိတ်ချရသောသူများ ဖြစ်လာကြ၏၊ သင်သည် ၎င်းတို့ကို အပြည့်အဝ ယုံကြည်နိုင်ပြီး ၎င်းတို့ပြောဆိုသမျှ သို့မဟုတ် လုပ်ဆောင်သမျှသည် သမ္မာတရားဖြစ်၏” ဟု မည်သည့်အခါမျှ မိန့်တော်မမူခဲ့ပေ။ ဤသည်မှာ မည်သည့်အခါမျှ မဖြစ်ပေါ်ခဲ့ပေ၊ ဤသည်တို့မှာ သင်၏ အယူအဆများနှင့် စိတ်ကူးများသာ ဖြစ်သည်။ ယခုအချိန်အထိ သင်သည် “ညီအစ်ကိုမောင်နှမများ” ဟူသော အမည်နောက်ကွယ်ရှိ တကယ့်အနက်အဓိပ္ပာယ်ကို မမြင်နိုင်သေးပါက သင်သည် အမှန်တကယ် မိုက်မဲပေသည်၊ သင်သည် ဤနှစ်များတစ်လျှောက်လုံး တရားဒေသနာများကို အချည်းနှီး နားထောင်ခဲ့ခြင်းသာ ဖြစ်သည်။ သင်သည် သင်ကိုယ်တိုင် မည်သို့သောလူစားမျိုးဖြစ်သည်ကိုပင် မသိရှိသေးသည့်တိုင် အခြားသူများကို အလွန်ယုံကြည်လျက် ၎င်းတို့ကို၊ ညီအစ်ကိုမောင်နှမများကို အလွန်မြင့်မြတ်ပြီး ကြီးကျယ်သည်ဟု မှတ်ယူကာ “ညီအစ်ကိုမောင်နှမများက ဤအရာကို မကြိုက်”၊ “ညီအစ်ကိုမောင်နှမများက ဒေါသထွက်နေသည်”၊ “ညီအစ်ကိုမောင်နှမများက ဆင်းရဲဒုက္ခခံနေရသည်”၊ “ညီအစ်ကိုမောင်နှမများက ဤအရာဖြစ်သည်၊ ထိုအရာဖြစ်သည်” ဟူ၍ ညီအစ်ကိုမောင်နှမများအကြောင်းကို ထိုသို့သော ချစ်ခင်တွယ်တာမှုဖြင့် အဆက်မပြတ် တဖွဖွ ပြောဆိုနေသည်။ ညီအစ်ကိုမောင်နှမများသည် အလွန်မြင့်မြတ်ပြီး အထွတ်အမြတ်ထားကာ အလွန်ယုံကြည်စိတ်ချရကြောင်းကို ဘုရားသခင်၏ နှုတ်ကပတ်တော်များထဲတွင် မည်သည့်နေရာ၌မဆို သင်မြင်ဖူးသလော။ တစ်ကြောင်းမျှပင် မရှိပါ၊ ဟုတ်သည် မဟုတ်လော။ သို့ဆိုလျှင် သင်သည် ၎င်းတို့ကို အဘယ်ကြောင့် ထိုသို့ ရှုမြင်မည်နည်း။ ယင်းက သင့်ကို လုံးလုံးလျားလျား မိုက်မဲသူတစ်ဦး ဖြစ်စေသည်။ သို့ဖြစ်၍ ညီအစ်ကိုမောင်နှမများထံမှ သင်သည် မည်မျှပင် အခွင့်ကောင်းယူခံရမှု သို့မဟုတ် ဆုံးရှုံးမှုကို ခံစားရပါစေ ယင်းမှာ လုံးဝ သင်၏ ကိုယ်ပိုင်အမှားသာ ဖြစ်သည်။ အဆုံးတွင် သင်တို့ခံစားရသော ဆုံးရှုံးမှုများနှင့် အခွင့်ကောင်းယူခံရမှုများကို ကျောင်းလခအဖြစ် မှတ်ယူလော့။ ဤသည်မှာ သင် မှတ်သားရန် သင်ခန်းစာတစ်ခု ဖြစ်သည်။ သင်တို့သည် အစဉ်အမြဲ မှတ်သားထားရမည်၊ ညီအစ်ကိုမောင်နှမများသည် သမ္မာတရားကို ကိုယ်စားမပြုသကဲ့သို့ ဘုရားသခင်ကို သာ၍ပင် ကိုယ်စားမပြုပေ၊ ၎င်းတို့သည် ဘုရားသခင်၏ ရင်းနှီးသောမိတ်ဆွေများ၊ ဘုရားသခင်၏ သက်သေခံသူများ သို့မဟုတ် ဘုရားသခင်၏ ချစ်သားများနှင့် ညီမျှခြင်းမရှိပေ။ ညီအစ်ကိုမောင်နှမများကား မည်သူတို့နည်း။ ၎င်းတို့သည် သင်တို့ကဲ့သို့ပင် ဖောက်ပြန်ပျက်စီးသော လူသားများ ဖြစ်ကြသည်၊ ၎င်းတို့တွင် ဘုရားသခင်နှင့်ပတ်သက်၍ အယူအဆများရှိသည်၊ သမ္မာတရားကို မချစ်မြတ်နိုးကြ၊ သမ္မာတရားကို အလွန်အမင်း မနှစ်မြို့ကြ၊ မာနထောင်လွှားသော စိတ်သဘောထားကို ပိုင်ဆိုင်ကြသည်၊ ရက်စက်ကြမ်းကြုတ်ပြီး ကောက်ကျစ်ဆိုးယုတ်သော စိတ်သဘောထားများကို ပိုင်ဆိုင်ကြသည်၊ ကဏ္ဍတိုင်းတွင် မိမိတို့ကိုယ်ကို ဘုရားသခင်၏ ရန်သူများအဖြစ် ခန့်အပ်နိုင်စွမ်းရှိကြသည်၊ မိမိတို့၏ တာဝန်များကို ဝတ်ကျေတမ်းကျေ ထမ်းဆောင်ကြပြီး ဘုရားသခင်ကို ယုံကြည်ခြင်းဟူ၍ ဟန်ဆောင်ကာ အခြားညီအစ်ကိုမောင်နှမများကိုပင် အခွင့်ကောင်းယူကြသည်။ ဤအရာအားလုံးကို ပြောဆိုရခြင်း၏ ရည်ရွယ်ချက်မှာ အဘယ်နည်း။ ယင်းမှာ သင်နှင့် ညီအစ်ကိုမောင်နှမများကြားတွင် သပ်လျှိုသွေးခွဲရန်မဟုတ်ဘဲ လူတိုင်း၏ စရိုက်မှန်ကို ရှင်းလင်းစွာ မြင်တွေ့စေရန်၊ “ညီအစ်ကိုမောင်နှမများ” ဟူသော အမည်ကို မှန်ကန်စွာ သဘောထားရန်၊ သင်၏ ပတ်ဝန်းကျင်ရှိလူတို့ကို မှန်ကန်စွာ သဘောထားရန်နှင့် လူတိုင်းနှင့်အတူ သင့်လျော်သော လူအချင်းချင်း ဆက်ဆံရေးကို တည်ထောင်ရန် ကူညီပေးဖို့ ဖြစ်သည်။ သင်သည် ညီအစ်ကိုမောင်နှမများကြားထဲသို့ မိမိကိုယ်ကို ပေါင်းစည်းရန် ရည်ရွယ်ချက်ဖြင့် ပုဂ္ဂိုလ်ရေးဆိုင်ရာ မျက်နှာသာပေးခြင်း၊ ရုပ်ဝတ္ထုဆိုင်ရာ ဖလှယ်ခြင်း၊ မြှောက်ပင့်ခြင်း၊ မျက်နှာချိုသွေးခြင်း၊ အလျှော့ပေး လိုက်လျောခြင်း သို့မဟုတ် အခြားထိုသို့သော နည်းလမ်းများမှတစ်ဆင့် အခြားသူများနှင့် ကောင်းမွန်သော ဆက်ဆံရေးများကို တည်ထောင်ရန် သို့မဟုတ် ထိန်းသိမ်းရန် မကြိုးစားနှင့်။ ဤသည်မှာ မလိုအပ်သည့်အပြင် ဤကိစ္စနှင့်ပတ်သက်၍ သင်လုပ်ဆောင်သမျှအားလုံးသည် ဘုရားသခင်အတွက် စက်ဆုပ်ရွံရှာဖွယ်ဖြစ်ပြီး ရွံမုန်းဖွယ်ဖြစ်သည်။ သို့ဆိုလျှင် လူတို့ကြားတွင် အသက်ရှင်နေထိုင်ရန် အကောင်းဆုံးသော နည်းလမ်း၊ အသက်ရှင်နေထိုင်ရန် အကောင်းဆုံးသော သဘောထားနှင့် စည်းမျဉ်းမှာ အဘယ်နည်း။ ယင်းမှာ ဘုရားသခင်၏ နှုတ်ကပတ်တော် ဖြစ်သည်။ ဘုရားသခင်၏ နှုတ်ကပတ်တော်များက မည်သို့ မိန့်တော်မူသနည်း။ ၎င်းတို့က သင့်လျော်ပြီး ပုံမှန်ဖြစ်သော လူအချင်းချင်းဆက်ဆံရေးကို တည်ထောင်ရန် မိန့်တော်မူသည်။ ဤဆက်ဆံရေးများကို မည်သို့ တည်ထောင်သနည်း။ ဘုရားသခင်၏ နှုတ်ကပတ်တော်များကို အခြေခံ၍ အခြားသူများနှင့် အပြန်အလှန်ဆက်ဆံလော့၊ စကားပြောလော့၊ ပေါင်းသင်းလော့။ ဥပမာအားဖြင့် တစ်စုံတစ်ဦးက အိမ်ပြောင်းပြီး သင့်အား ကူညီရန် အချိန်ရှိမရှိ မေးမြန်းပါက သင်သည် ဆန္ဒရှိလျှင် သွားနိုင်သည်၊ သင်၏တာဝန်ကို ထိခိုက်မည်ကို ကြောက်သောကြောင့် ဆန္ဒမရှိပါက သင် ငြင်းဆိုနိုင်သည်။ ဤသည်မှာ သင်၏ အခွင့်အရေးဖြစ်ပြီး သင်လိုက်နာသင့်သော စည်းမျဉ်းလည်း ဖြစ်သည်မှာ ပြောစရာမလိုပေ။ သင်သည် ၎င်းတို့ကို စိတ်ထိခိုက်စေမည်ကို သို့မဟုတ် ညီအစ်ကိုမောင်နှမများကြားရှိ သဟဇာတဖြစ်မှုကို ပျက်ပြားစေမည်ကို ကြောက်ရွံ့သည့်အတွက် အလျှော့ပေးလိုက်လျောရန်၊ စိတ်မပါဘဲနှင့် သဘောတူရန် မလိုအပ်ပေ၊ ထို့နောက်တွင် သင်၏ စိတ်နှလုံးထဲ၌ ဆန္ဒမရှိဖြစ်ကာ သင်၏ တာဝန်များကို ထမ်းဆောင်ခြင်းအပေါ် ထိခိုက်စေလိမ့်မည်။ ထိုသို့ပြုလုပ်ခြင်းသည် စည်းမျဉ်းများကို ဆန့်ကျင်ကြောင်း သင် ကောင်းစွာ သိရှိလျက်နှင့်ပင် ၎င်းတို့ကို ကျေနပ်စေရန်နှင့် ကောင်းမွန်သော ဆက်ဆံရေးများကို ထိန်းသိမ်းရန်အလို့ငှာ အခြားသူတို့အား သင့်ကို ငွေညှစ်ခွင့်နှင့် ကျွန်တစ်ဦးကဲ့သို့ ခိုင်းစေခွင့်ကို သင် ဆက်လက်ခွင့်ပြုနေဆဲ ဖြစ်သည်။ သင်က အခြားလူတို့ကို ကျေနပ်စေခြင်းသည် ကောင်းမှုတစ်ခုမဟုတ်ဘဲ ဘုရားသခင်က အမှတ်ရမည် မဟုတ်ပေ။ သင်လုပ်ဆောင်နေသည့်အရာသည် လူအချင်းချင်း ဆက်ဆံရေးကို ထိန်းသိမ်းရန်သာဖြစ်သည်၊ သင်သည် အသင်းတော်၏အလုပ်အတွက် သို့မဟုတ် သင်၏တာဝန်ကို ထမ်းဆောင်ရန် ပြုမူနေခြင်း မဟုတ်သကဲ့သို့ ယင်းမှာ သင်၏ တာဝန် သို့မဟုတ် ဝတ္တရား သာ၍ပင် မဟုတ်ပေ။ ဘုရားသခင်သည် ထိုသို့သော လုပ်ဆောင်ချက်များကို မည်သည့်အခါမျှ အမှတ်ရမည်မဟုတ်ဘဲ သင်သည် ယင်းတို့ကို လုပ်ဆောင်လျှင်ပင် အချည်းနှီးဖြစ်သော လုပ်ဆောင်ခြင်း ဖြစ်သည်။ သို့ဖြစ်၍ ထိုသို့သော ကိစ္စရပ်များနှင့် ကြုံတွေ့ရသည့်အခါ သင်သည် မည်သို့ရွေးချယ်ရမည်ကို အလေးအနက်ထားပြီး ဂရုတစိုက် စဉ်းစားသင့်သည် မဟုတ်လော။ အချို့လူများသည် အကူအညီ အတောင်းခံရသော်လည်း ၎င်းတို့၏ တာဝန်များက အမှန်တကယ်တွင် ၎င်းတို့ကို အလွန်အလုပ်များစေပြီး စုဝေးပွဲတစ်ခု တက်ရောက်ရန် သို့မဟုတ် ဝိညာဉ်ရေးရာ ဆက်ကပ်ခြင်းအချို့ကို လုပ်ဆောင်ရန် အချိန်ကို ခဲခဲယဉ်းယဉ်း ရှာတွေ့ခဲ့ရုံသာ ဖြစ်သည်။ ၎င်းတို့သည် မသွားလိုကြသည်မှာ သိသာထင်ရှားပြီး စည်းမျဉ်းများအရလည်း မသွားသင့်ပေ။ သို့သော် ဂုဏ်သိက္ခာကို အလွန်အမင်း အလေးထားသောကြောင့် ငြင်းဆိုရန် အားမထုတ်နိုင်ကြပေ။ အဆုံးတွင် မည်သည့်အရာ ဖြစ်သွားသနည်း။ ၎င်းတို့သည် မိမိတို့၏ အသက်ဝင်ရောက်မှုအတွက် ရည်စူးဆက်ကပ်ထားသင့်သော အချိန်ကို ဖြုန်းတီးလျက် ထိုနိမ့်ကျပြီး အခွင့်ကောင်းယူတတ်သော လူပုဂ္ဂိုလ်တို့အား ၎င်းတို့ကို အခွင့်ကောင်းယူခွင့် ပြုလိုက်ကြသည်။ ယင်းမှာ ဆုံးရှုံးမှုတစ်ခု မဟုတ်လော။ ယင်းမှာ ထိုက်တန်လှသော ဆုံးရှုံးမှုတစ်ခု ဖြစ်သည်။ ထိုသို့သော ဆုံးရှုံးမှုကို ခံစားရခြင်းသည် အခြားသူတို့၏ ကရုဏာ သို့မဟုတ် သနားမှုကို တစ်စက်မျှပင် မခံစားထိုက်ပေ။ အဘယ်ကြောင့် ယင်းကို ထိုက်တန်သော ဆုံးရှုံးမှုဟု ဆိုရသနည်း။ သင့်ကို ဘုရားသခင်၏ နှုတ်ကပတ်တော်များကို လျစ်လျူရှုစေခဲ့သူမှာ မည်သူနည်း။ သင့်ကို လူတို့ကို စိတ်ထိခိုက်စေရန် ကြောက်ရွံ့စေခဲ့သူမှာ မည်သူနည်း။ သင်သည် ဘုရားသခင်၏ နှုတ်ကပတ်တော်များကို နားထောင်ခြင်းထက် လူတို့ကို စိတ်မထိခိုက်စေရန် ပို၍နှစ်သက်ပါက သင်သည် ဤဆုံးရှုံးမှုကို တရားနည်းလမ်းကျကျ ခံစားထိုက်ပေသည်။ အချို့က “လူတို့သည် လေဟာနယ်ထဲတွင် အသက်ရှင်နေကြသည် မဟုတ်၊ လူအချင်းချင်းကြားတွင် အပြန်အလှန် ဆက်ဆံမှုများ ရှိရမည်” ဟု ဆိုကြသည်။ အရေးကြီးသည်မှာ သင်သည် မည်သို့ အပြန်အလှန် ဆက်ဆံသနည်း ဟူ၍ ဖြစ်သည်။ စည်းမျဉ်းများအပေါ် အခြေခံသော အပြန်အလှန်ဆက်ဆံမှုများနှင့် စည်းမျဉ်းများမရှိဘဲ အရာအားလုံးကို ညှိနှိုင်းပေးရန် ကြိုးစားသော လူ့အကြိုက်လိုက်သူတစ်ဦးဖြစ်ခြင်းဟူသော အပြန်အလှန်ဆက်ဆံမှုများထဲမှ မည်သည့်အရာက သမ္မာတရား စည်းမျဉ်းများနှင့် ကိုက်ညီပြီး ဘုရားသခင်၏ ရည်ရွယ်ချက်များနှင့် ညီညွတ်ကာ သင်၏ အသက်ဝင်ရောက်မှုကို ပို၍ အကျိုးပြုသနည်း။ သင်သည် မည်သည့်အရာကို ရွေးချယ်ရမည်ကို သိသည် မဟုတ်လော။ သင်သည် မည်သို့ရွေးချယ်ရမည်ကို သိလျက်နှင့်ပင် ရွှံ့နွံထဲသို့ ဆက်၍ ပိတ်မိနေပါက အဆုံးစွန်သော အကျိုးဆက်ကို သင်တစ်ဦးတည်းသာ ခံရမည်ဖြစ်သည်။ ယင်းမှာ သိသာထင်ရှားသည် မဟုတ်လော။ (ဟုတ်ပါသည်။)

ဆိုးယုတ်သောလူများ၏ လူ့သဘာဝနှင့်ဆိုင်သော သရုပ်သကန်များမှာ နောက်ထပ်များစွာ ရှိနေသေးပြီး ယနေ့ အမှန်နှင့် အမှားကို လွဲချော်အောင်ပြောရသည်ကို နှစ်သက်ခြင်းနှင့် အခြားသူများကို အခွင့်ကောင်းယူခြင်းကို နှစ်သက်ခြင်းဟူသော ကဏ္ဍများကိုသာ အာရုံစိုက်လျက် မိတ်သဟာယဖွဲ့ခြင်းမှာ နည်းပါးခဲ့သည်။ ဤကဏ္ဍနှစ်ခုအကြောင်းကို ကြားသိပြီးနောက်မှသာလျှင် လူအများစုသည် “သို့ဆိုလျှင် ဤသည်မှာ ဆိုးယုတ်သော လူ့သဘာဝ၏ အကျင့်ပင်တကား” ဟု ပြောဆိုလျက် သဘောပေါက်မှုနှင့် ပိုင်းခြားသိမြင်နိုင်စွမ်းအချို့ကို စတင်ရရှိကြသည်။ သို့သော် ထိုသို့သောလူများသည် အသင်းတော်၌ အမှန်တကယ် တည်ရှိနေကြသည်၊ သို့ဖြစ်လျှင် မည်သို့လုပ်ဆောင်သင့်သနည်း။ အသင်းတော်၌ စည်းမျဉ်းများနှင့် စည်းကမ်းများ ရှိသောကြောင့် ၎င်းတို့၏ တည်ရှိနေခြင်းသည် အရေးကြီးသော ပြဿနာတစ်ခု မဟုတ်ပေ၊ အသင်းတော်သည် ထိုသို့သော လူပုဂ္ဂိုလ်များကို ကိုင်တွယ်ရန် သင့်လျော်သော အစီအမံများကို ချမှတ်နိုင်ပါသည်။ ဤကိစ္စရပ်များအပေါ် ယနေ့ မိတ်သဟာယဖွဲ့ခြင်း၏ ရည်ရွယ်ချက်မှာ လူအများစုကို ဤဆိုးယုတ်သောလူစားနှစ်မျိုးအပေါ် ရှင်းလင်းသော နားလည်မှုနှင့် ပိုင်းခြားသိမြင်နိုင်စွမ်း ရှိစေရန်၊ ထို့နောက်တွင် ၎င်းတို့ကို ရှင်းလင်းပစ်ရန် အတူတကွ လုပ်ဆောင်ဖို့ ဖြစ်သည်။

၂၀၂၁ ခုနှစ်၊ နိုဝင်ဘာလ ၂၀ ရက်