अध्याय ३१
मलाई निष्कपट रूपमा चाहने सबैलाई म प्रेम गर्छु। यदि तिमीहरू मलाई पूर्ण हृदयले प्रेम गर्छौ भने, म निश्चय नै तिमीहरूलाई प्रशस्त आशिष् दिनेछु। के तिमीहरू मेरा अभिप्रायहरू बुझ्छौ? मेरो घरमा, उच्च र नीच हैसियतको बीचमा कुनै भिन्नता छैन। हरेक व्यक्ति मेरो पुत्र हो, र म तिमीहरूको पिता, तिमीहरूको परमेश्वर हुँ! म सर्वोच्च र अद्वितीय छु। म ब्रह्माण्ड र यावत् थोकमाथि शासन गर्छु!
तैँले मेरो घरमा “दीनता र अज्ञातताका साथ मेरो सेवा गर्नु” पर्छ। यो भनाइ तेरो आदर्श वाक्य हुनुपर्छ। रूखको पात नबन्, बरु रूखको जरा बन् र जीवनमा गहिरोसँग जरा गाड्। साँचो जीवन अनुभवमा प्रवेश गर्। मेरा वचनहरूका आधारमा बाँच्। सबै कुरामा, मलाई अझ धेरै खोज्, मेरो नजिक आइज, र मसँग सङ्गति र अन्तरक्रिया गर्। कुनै पनि बाहिरी कुराहरूमा ध्यान नदे, र कुनै पनि व्यक्ति, घटना, वा कामकुराद्वारा नियन्त्रित नहो, तर म के हुँ भन्ने बारेमा आत्मिक मानिसहरूसँग मात्र सङ्गति गर्। मेरा अभिप्रायहरू बुझ्, मेरो जीवनलाई तिमीहरूबीच बग्न दे, मेरा वचनहरू जिउनू र मेरा मागहरूअनुरूप हुनू।
तेरा सबै सामर्थ्य मैले तँलाई आज्ञा गरेका विषयहरूमा समर्पित गर्; मेरो हृदयलाई सन्तुष्ट तुल्याउनको निम्ति तैँले गर्न सक्ने जति सबै गर्। म तेरो शक्ति हुँ र म तेरो आनन्द हुँ…। म तेरो सबै थोक हुँ। मेरो पछि लाग्। तेरो हृदयको साँचो इच्छाहरूका बारेमा र तैँले आफैलाई मेरो निम्ति इमानदारीताको साथ समर्पित गर्छस् भन्ने मलाई थाहा छ, तर मेरो घरमा मलाई कसरी बफादारीता देखाउनुपर्छ र मलाई कसरी अन्त्यसम्मै पछ्याउनुपर्छ भन्ने कुरा तँलाई थाहा हुनुपर्छ।
मण्डली मेरो मुटु हो र मेरो मण्डली निर्माणको लागि मलाई आतुरीले पोलिरहेको छ। तैँले अलिकति पनि बाँकी नराखी आफूलाई मप्रति समर्पित गर्नुपर्छ, र मेरा अभिप्रायहरूलाई बुझ्नुपर्छ, ताकि मेरो हृदय सन्तुष्ट हुन सकोस्।
