१. तपाईंले प्रभु मानिस बन्नुभयो, गोप्य रूपमा पृथ्वीमा ओर्लनुभयो, र परमेश्वरको घरबाट सुरु गर्दै न्यायको काम गर्दैहुनुहुन्छ भनी गवाही दिनुहुन्छ। यो कसरी सम्भव छ? बाइबलले स्पष्ट रूपमा अगमवाणी गर्दछ, “अनि त्यसपछि स्वर्गमा मानिसको पुत्रको चिन्ह देखा पर्नेछ: अनि पृथ्वीका सबै कुलले शोक गर्नेछन्, अनि तिनीहरूले मानिसको पुत्रलाई शक्ति र महान् महिमाका साथमा स्वर्गको बादलमा आइरहनुभएको देख्नेछन्” (मत्ती २४:३०)। “हेर, उहाँ बादलहरूसहित आउनुहुन्छ; अनि हरेक आँखाले उहाँलाई देख्नेछन्, र तिनीहरूले पनि, जसले उहाँलाई घोचे: र उहाँका कारण पृथ्वीका सब कुलहरूले विलाप गर्नेछन्” (प्रकाश १:७)। हामी विश्वास गर्छौं, जब प्रभु फेरि आउनुहुन्छ, उहाँ बादलहरूमा र सबै मानिसहरूले देख्ने गरी आउनुहुन्छ। तैपनि प्रभु पहिले नै मानिस बनिसक्नुभएको छ र गोप्य रूपमा पृथ्वीमा ओर्लनुभएको छ भनेर तपाईं गवाही दिनुहुन्छ, जुन हाम्रो बुझाइभन्दा बिलकुलै फरक छ। यहाँ के भइरहेको छ?
सन्दर्भका लागि बाइबलका पदहरू:
“हामीसँग पनि अझ निश्चित अगमवाणीको वचन छ; त्यसको लागि तिमीहरूले मिरमिरे उज्यालोसम्म, र तिमीहरूको हृदयमा बिहानको तारा नउदाइञ्जेलसम्म अँध्यारोमा चम्किने ज्योतिलाई जस्तै त्यसलाई ध्यान दिनु नै राम्रो हुन्छ: सबभन्दा पहिले यो जान कि पवित्रशास्त्रका कुनै पनि अगमवाणीलाई व्यक्तिगत रूपमा अर्थ्याउनु हुँदैन। किनकि पुरानो समयमा मानिसको इच्छाअनुसार अगमवाणी आएन: तर पवित्र आत्माको छुवाइद्वारा परमेश्वरका मानिसहरूले बोले” (२ पत्रुस १:१९-२१)।
“हेर, म चोरजस्तै आउँछु। त्यो आशिषित् हो, जो जागा रहन्छ, र आफ्नो वस्त्रको रक्षा गर्छ, नत्र त भने त्यो नाङ्गै हिँड्छ, र तिनीहरूले त्यसको लाज देख्छन्” (प्रकाश १६:१५)।
“त्यसकारण तिमीहरू सचेत भएनौ भने त, म तिमीहरूकहाँ चोरजस्तै आउनेछु र म कुन समय तिमीहरूकहाँ आउनेछु तिमीहरूले थाहा पाउनेछैनौ” (प्रकाश ३:३)।
“यसकारण, तिमीहरू पनि तयार होऊ: किनभने मानिसको पुत्र तिमीहरूले नसोचेको समयमा आउँछ” (लूका १२:४०)।
“किनभने जसरी बिजुली, आकाशमुनिको एउटा भागबाट चम्किँदा, आकाशमुनिको अर्को भागसम्म चम्किन्छ; मानिसको पुत्र पनि आफ्नो दिनमा त्यस्तै हुनेछ। तर सुरुमा उसले धेरै कुराहरूको कष्ट भोग्नैपर्छ, र यस पुस्ताद्वारा इन्कार गरिनैपर्छ” (लूका १७:२४-२५)।
“अनि मध्यरातमा आवाज आयो, हेर, दुलहा आइपुगे; उनलाई भेट्न जाओ” (मत्ती २५:६)।
“हेर, म ढोकामा खडा हुन्छु र ढकढक्याउँछु: यदि कसैले मेरो स्वर सुन्छ र ढोका खोल्छ भने, म उसकहाँ भित्र आउनेछु र म उसँग खानपान गर्नेछु र उसले मसँग खानपान गर्नेछ” (प्रकाश ३:२०)।
परमेश्वरका सान्दर्भिक वचनहरू:
मानिसले केही सहस्राब्दीदेखि नै मुक्तिदाताको आगमन देख्ने तृष्णा गरेको छ। मानिसले मुक्तिदाता येशू व्यक्तिगत रूपमा सेतो बादलमा सवार भई हजारौँ वर्षदेखि उहाँको तृष्णा र आशा गर्नेहरूमाझ अवतरण हुनुभएको देख्ने तृष्णा गरेको छ। मानिसले मुक्तिदाताको पुनरागमन र ऊसँगको पुनर्मिलनको पनि तृष्णा गरेको छ; अर्थात्, हजारौँ वर्षदेखि मानिसहरूबाट अलग गरिनुभएको मुक्तिदाता येशू फर्केर आउनुभएको, र उहाँले यहूदीहरूमाझ गर्नुभएको छुटकाराको काम फेरि एक पटक कार्यान्वयन गर्नुभएको, उहाँ मानिसप्रति कृपालु र प्रेमिलो हुनुभएको, उहाँले मानिसको पाप क्षमा गर्नुभएको र मानिसका पापहरू वहन गर्नुभएको, साथै मानिसका सबै अपराध समेत वहन गरेर मानिसलाई पापबाट मुक्ति दिनुभएको तृष्णा गरेको छ। मानिस मुक्तिदाता येशू पहिलेको जस्तै प्रेम गर्न लायक, दयालु र सम्माननीय, मानिससँग कहिल्यै नरिसाउने, र मानिसलाई कहिल्यै नधिक्कार्ने, बरु मानिसका सबै पाप क्षमा गर्ने र बोक्ने, र यहाँसम्म कि पहिले जस्तै मानिसका निम्ति क्रूसमा मर्ने मुक्तिदाता हुनुहोस् भन्ने तृष्णा गर्छ। येशू बिदा भएर जानुभएपछि, उहाँलाई पछ्याउने चेलाहरू, साथै उहाँको नाउँमा मुक्ति पाउने सन्तहरू सबै उहाँका लागि व्यग्रतापूर्वक तड्पँदै र उहाँको प्रतीक्षा गर्दै आएका छन्। अनुग्रहको युगमा येशू ख्रीष्टको अनुग्रहद्वारा मुक्ति दिइएका सबै मानिस आखिरी दिनहरूको त्यो उल्लासित दिनको तृष्णा गर्दै आइरहेका छन्, जब मुक्तिदाता येशू अनेकौँ मानिससमक्ष देखा पर्न सेतो बादलमा अवतरण गर्नुहुन्छ। अवश्यै, आज मुक्तिदाता येशूको नाउँ स्विकार्ने सबै जनाको सामूहिक इच्छा पनि यही हो। मुक्तिदाता येशूको मुक्तिबारे थाहा हुने ब्रह्माण्डका सबैले पृथ्वीमा हुँदा येशूले “म जसरी गएको छु त्यसै गरी आउनेछु” भनेर भन्नुभएको कुरा पूरा गर्न येशू ख्रीष्ट अचानक आइपुग्नुहोस् भनी उत्कट इच्छा गर्दै आइरहेका छन्। मानिस के विश्वास गर्छ भने, क्रुसीकरण र पुनरुत्थानपछि सर्वोच्चको दाहिने हातपट्टिको आफ्नो स्थान लिन येशू सेतो बादलमा स्वर्ग फर्केर जानुभयो। त्यसरी नै, हजारौँ वर्षदेखि उत्कट रूपमा उहाँको तृष्णा गर्नेहरूमाझ, येशू सेतो बादलमा (यो बादलले येशू स्वर्ग फर्कनुहुँदा उहाँ चढ्नुभएको बादललाई जनाउँछ) फेरि अवतरण गर्नुहुनेछ, र उहाँले यहूदीहरूको स्वरूप धारण गर्नुहुनेछ र पोसाक लगाउनुहुनेछ। तिनीहरूसमक्ष देखा पर्नुभएपछि, उहाँले तिनीहरूलाई खाना दिनुहुनेछ, र तिनीहरूका लागि जिउँदो पानी खन्याइदिनुहुनेछ, अनि उहाँ अनुग्रहले पूर्ण, प्रेमिलो दयालुपनले पूर्ण, सुस्पष्ट र यथार्थ भएर मानिसमाझ जिउनुहुनेछ। मानिसहरू यस्तै सारा धारणाहरूमा विश्वास गर्छन्। तैपनि मुक्तिदाता येशूले यसो गर्नुभएन; उहाँले मानिसका धारणाहरूको ठ्याक्कै उल्टो गर्नुभयो। उत्कट रूपमा उहाँको पुनःआगमनको तृष्णा गर्नेहरूमाझ उहाँ आइपुग्नुभएन, र सेतो बादलमा सवार भएर उहाँ अनेकौँ मानिससामु देखा पर्नुभएन। उहाँ आइपुगिसक्नुभएको छ, तर मानिस उहाँलाई चिन्दैन, र यसबारे अनजान नै छ। मानिस विनाउद्देश्य उहाँको प्रतीक्षा मात्र गरिरहेको छ—उहाँले “सेतो बादलमा” (त्यो सेतो बादल उहाँको आत्मा, उहाँका वचनहरू, उहाँको सारा स्वभाव र उहाँ जे हुनुहुन्छ त्यो सबै हो) अवतरण गरिसक्नुभएको छ, र अहिले उहाँ आखिरी दिनहरूमा उहाँले बनाउने विजेताहरूको समूहमाझ हुनुहुन्छ भन्ने कुरा उसलाई थाहै छैन। पवित्र मुक्तिदाता येशू प्रेमिलो दयालुपन र मानिसप्रतिको प्रेमले भरिएको हुनुभए पनि, उहाँ ती फोहोरले भरिएका र अशुद्ध आत्माहरूले बास गरेका “मन्दिरहरू” मा काम गर्न सक्नुहुन्न भनेर मानिसलाई कसरी थाहा हुन सक्छ? मानिसले उहाँको आगमनको प्रतीक्षा गर्दै आइरहेको भए पनि, अधर्मीको देह खाने, अधर्मीको रगत पिउने, र अधर्मीको वस्त्र धारण गर्ने, उहाँमा विश्वास गर्ने तर उहाँलाई नचिन्ने र उहाँलाई निरन्तर जबरजस्ती असुलिरहने मानिसकहाँ उहाँ कसरी देखा पर्न सक्नुहुन्थ्यो? मानिसलाई मुक्तिदाता येशू प्रेमिलो दयालुपनले भरिएको र कृपाले भरिपूर्ण हुनुहुन्छ, र उहाँ छुटकाराले भरिपूर्ण पापबलि हुनुहुन्छ भन्ने कुरा मात्र थाहा छ। तर, उहाँ स्वयम् परमेश्वर हुनुहुन्छ, जो धार्मिकता, प्रताप, क्रोध र न्यायले भरिभराउ हुनुहुन्छ, अख्तियारयुक्त, र गरिमाले भरिपूर्ण हुनुहुन्छ भन्ने कुरा मानिसलाई थाहै छैन। त्यसकारण, मानिसले उत्सुकतापूर्वक उद्धारकर्ताको पुनरागमनको तृष्णा र लालसा गरे पनि, र उसको प्रार्थनाले “स्वर्ग” नै प्रभाव पारे पनि, मुक्तिदाता येशू उहाँमा विश्वास गर्ने तर उहाँलाई नचिन्नेहरूसमक्ष देखा पर्नुहुन्न।
—वचन, खण्ड १। परमेश्वरको देखापराइ र काम। मुक्तिदाता पहिले नै “सेतो बादल” मा फर्किसक्नुभएको छ
यदि, मानिसले कल्पना गरेझैँ येशू फेरि आउनुहुनेछ र आखिरी दिनहरूमा पनि अझै येशू नै कहलाइनुहुन्छ र अझै पनि सेतो बादलमा सवार भएर येशूको स्वरूपमा मानिसमाझ ओर्लनुहुन्छ भने, के त्यो उहाँको काम दोहोरिएको हुँदैन र? के पवित्र आत्मा पुरानोसँग टाँसिरहन सक्नुहुन्छ? मानिसले विश्वास गर्ने सबै धारणाहरू हुन्, र मानिस सबै कुरा शाब्दिक अर्थअनुसार, र उसका कल्पनाहरूअनुसार पनि बुझ्छ; ती पवित्र आत्माको कामका सिद्धान्तहरूसँग मिल्दो हुँदैनन् र परमेश्वरका सोचहरूसँग मिल्दैनन्। परमेश्वरले त्यस्तो प्रकारले काम गर्नुहुन्न; परमेश्वर त्यति अबुझ र मूर्ख हुनुहुन्न, र उहाँको काम तैँले कल्पना गरेजस्तो सरल छैन। मानिसहरूको कल्पनाअनुसार, येशू बादलमा सवार भएर आउनुहुनेछ र तिमीहरूको बीचमा ओर्लनुहुनेछ। तिमीहरू उहाँलाई देख्नेछौ, जसले बादलमा सवार भएर, तिमीहरूलाई म येशू हुँ भनी भन्नुहुनेछ। तिमीहरूले उहाँको हातमा कीलका डामहरू पनि देख्नेछौ, र उहाँ येशू नै हुनुहुन्छ भनी चिन्नेछौ। अनि उहाँले तिमीहरूलाई फेरि मुक्ति दिनुहुनेछ र उहाँ तिमीहरूका शक्तिशाली परमेश्वर हुनुहुनेछ। उहाँले तिमीहरूलाई बचाउनुहुनेछ, तिमीहरूलाई एउटा नयाँ नाउँ प्रदान गर्नुहुनेछ, र तिमीहरू हरेकलाई एउटा सेतो ढुङ्गा दिनुहुनेछ, त्यसपछि तिमीहरूलाई स्वर्गको राज्यमा प्रवेश गर्ने अनुमति दिइनेछ र स्वर्गमा ग्रहण गरिनेछ। के यस्ता विश्वास मानिसका धारणाहरू होइनन् र? के परमेश्वरले मानिसको धारणाअनुसार काम गर्नुहुन्छ, वा उहाँले मानिसका धारणाहरू विपरीत काम गर्नुहुन्छ? के मानिसका धारणाहरू सबै शैतानबाट प्राप्त भएका होइनन् र? के सबै मानिस शैतानले भ्रष्ट भएका छैनन् र? यदि परमेश्वरले आफ्नो काम मानिसको धारणाअनुसार गर्नुभयो भने के उहाँ शैतान बन्नुहुन्न र? के उहाँ सृष्टि गरिएका प्राणीहरूजस्तै बन्नुहुन्न र? अहिले सृजित प्राणीहरू शैतानद्वारा अत्यन्तै भ्रष्ट तुल्याइएका हुनाले, र मानिस शैतानको मूर्त रूप बनेको हुनाले, यदि परमेश्वरले शैतानका कुराहरू अनुरूप काम गर्नुभयो भने के उहाँ शैतानको साठगाँठमा हुनुहुने थिएन र? मानिसले परमेश्वरको कामलाई कसरी बुझ्न सक्छ? त्यसकारण परमेश्वरले कहिल्यै पनि मानिसका धारणाहरू अनुसार काम गर्नुहुन्न, र तैँले कल्पना गरे अनुसार पनि काम गर्नुहुन्न। परमेश्वर स्वयम्ले उहाँ बादलमा सवार भएर आइपुग्ने भन्नुभएको छ भनेर तैँले भन्लास्। परमेश्वर आफैले त्यसो भन्नुभएको थियो भन्ने कुरा सत्य हो, तर परमेश्वरका रहस्यहरू कसैले पनि बुझ्न सक्दैन भन्ने के तँलाई थाहा छैन? के परमेश्वरका वचनहरूको व्याख्या कसैले पनि गर्न सक्दैन भन्ने तँलाई थाहा छैन? के तँ पवित्र आत्माले नै त्यो ज्ञान र प्रकाश दिनुभएको हो भन्नेमा निश्चित छस्, र तँलाई अलिकति पनि शङ्का छैन? त्यसरी तँलाई प्रत्यक्ष रूपमा देखाउने निश्चय नै पवित्र आत्मा हुनुहुन्नथियो। तँलाई निर्देशन दिने पवित्र आत्मा हुनुहुन्थ्यो, कि तेरा आफ्नै धारणहरूको कारण तैँले त्यस्तो विचार गरिस्? तैँले भन्लास्, “परमेश्वर आफैले यसो भन्नुभएको थियो।” तर परमेश्वरका वचनहरूलाई नाप्न हामीले हाम्रो आफ्नै विचार र दिमागको प्रयोग गर्न सक्दैनौं। यशैयाद्वारा बोलिएका वचनहरूको कुरा गर्दा, के तैँले तिनका वचनहरूलाई पूर्ण सुनिश्चितताको साथ व्याख्या गर्न सक्छस्? के तँ तिनका वचनहरूलाई व्याख्या गर्ने हिम्मत गर्छस्? तैँले यशैयाका वचनहरूको व्याख्या गर्ने हिम्मत गर्दैनस् भने येशूका वचनहरूको व्याख्या गर्ने हिम्मत किन गर्छस्? को बढी महान् हुनुहुन्छ, येशू कि यशैया? यसको जबाफ येशू हुनुहुन्छ भन्ने हुन्छ, त्यसकारण तैँले किन येशूले बोल्नुभएका वचनहरूको व्याख्या गर्छस्? के परमेश्वरले तँलाई उहाँको कामको बारेमा अघिबाटै बताउनुहुन्छ र? एउटै पनि सृष्टि गरिएको प्राणीले जान्न सक्दैन, स्वर्गका सन्देशवाहकहरूले पनि जान्दैनन्, न त मानिसका पुत्रले जान्नुहुन्छ, त्यसकारण तैँले कसरी जान्न सक्थिस्?
—वचन, खण्ड १। परमेश्वरको देखापराइ र काम। परमेश्वरको कामको दर्शन (३)
परमेश्वर देखा पर्नुले उहाँ आफै व्यक्तिगत रूपमा उपस्थित भई उहाँको काम गर्नको निम्ति पृथ्वीमा उहाँको आगमनलाई जनाउँछ। उहाँको आफ्नै पहिचान र स्वभावको साथमा, र उहाँको आफ्नै अन्तर्निहित शैलीमा, उहाँ मानिसहरूको बीचमा युगको सुरुवात गर्ने र युगको अन्त गर्ने काम गर्न ओर्ली आउनुहुन्छ। यस्तो देखापराइ चाहिँ एक प्रकारको समारोह भने होइन। यो कुनै चिन्ह, तस्वीर, अचम्मको काम वा कुनै किसिमको ठूलो दर्शन होइन; यो कुनै प्रकारको धार्मिक प्रक्रिया हुने त कुरै छौडौं। यो जो कसैले पनि छुन र हेर्न सक्ने वास्तविक र यथार्थ तथ्य हो। यस्तो देखापराइ चाहिँ झारा टार्नका लागि वा कुनै छोटो समयको कामका निम्ति होइन; बरु, यो त उहाँको व्यवस्थापन योजनाको कामको एउटा चरणको निम्ति हो। परमेश्वरको देखापराइ जहिले पनि अर्थपूर्ण हुन्छ र यसले सँधै उहाँको व्यवस्थापनको योजनासँग केही सम्बन्ध राख्छ। यहाँ भनिएको “देखापराइ” त्यस्तो “देखापराइ” भन्दा पूर्ण रूपले भिन्न छ, जसमा परमेश्वरले मानिसलाई अगुवाइ गर्नुहुन्छ, मार्गदर्शन र अन्तर्दृष्टि दिनुहुन्छ। प्रत्येक चोटि उहाँले आफैलाई प्रकट गर्नुहुँदा परमेश्वरले उहाँको महान कामको चरणलाई अघि बढाउनुहुन्छ। यो कार्य अरू कुनै युगको भन्दा भिन्न हुन्छ। यो मानिसको निम्ति अकल्पनीय छ र मानिसले कहिल्यै अनुभव गरेको छैन। यो काम नयाँ युगलाई सुरुवात गर्ने र पुरानो युगलाई अन्त्य गर्ने काम हो, र यो मानवजातिको मुक्तिको निम्ति कामको नयाँ र उच्च रूप हो; अझ भन्ने हो भने, यो मानवजातिलाई नयाँ युगमा ल्याउने काम हो। परमेश्वरको देखापराइले यही कुरालाई नै जनाउँछ।
—वचन, खण्ड १। परमेश्वरको देखापराइ र काम। परिशिष्ट १: परमेश्वरको देखा पराइले नयाँ युगलाई प्रारम्भ गरेको छ
अब परमेश्वरको नयाँ काम सुरु भएको छ, र यो नयाँ युगको सुरुवात पनि हो। परमेश्वरले मुक्तिको नयाँ काम सुरु गर्न छुट्कारा पाएकाहरूलाई उहाँको घरमा ल्याउनुहुन्छ। यस समय, मुक्तिको काम बितेको समयको भन्दा विस्तृत छ। यो, मानिसलाई आफै परिवर्तन गर्न लगाउन मानिसमा पवित्र आत्माले गर्नुहुने काम होइन, न त यो काम गर्न मानिसहरूमाझ देखापर्ने येशूको शरीर नै हो, र झन् यो अरू माध्यमद्वारा गरिने काम हुने त परै जाओस्। बरु, यो, देहधारी परमेश्वरले गर्नुहुने काम र आफूलाई निर्देशित गर्ने काम हो। उहाँले यसलाई यसरी नयाँ काममा मानिसलाई डोऱ्याउनको लागि गर्नुहुन्छ। के यो महान् कुरा होइन? परमेश्वरले यो काम मानवताको अंशमार्फत वा भविष्यवाणीहरूको माध्यमबाट गर्नुहुन्न; बरु, परमेश्वर आफैले यो गर्नुहुन्छ। कसैले भन्लान्, यो महान् कुरा होइन, र यसले मानिसमा परमानन्द ल्याउन सक्दैन। तर म तँलाई भन्नेछु, परमेश्वरको काम यो मात्र होइन, तर योभन्दा धेरै महान् र धैरै बढी अरू केही छन्।
यसपालि, परमेश्वर आत्मिक शरीरमा नभई अति साधारण शरीरमा काम गर्नका लागि आउनुहुन्छ। त्यसमाथि, यो परमेश्वरको दोस्रो देहधारणको शरीर हो, र त्यो शरीर पनि हो जसमार्फत परमेश्वर देहमा फर्किनुहुन्छ। यो अति साधारण देह हो। उहाँलाई हेर्दा, तँ उहाँलाई अरूबाट फरक देखाउने त्यस्तो कुनै कुरा पनि देख्न सक्दैनस्, तर तैँले उहाँबाट पहिले नसुनिएका सत्यताहरू पाउन सक्छस्। यो फगत नगण्य देह नै परमेश्वरका समस्त सत्यताका वचनको मूर्त रूप, आखिरी दिनहरूमा परमेश्वरका कामको वाहक, र मानिसले परमेश्वरको सम्पूर्ण स्वभाव बुझ्ने अभिव्यक्ति हो। के तँ स्वर्गमा हुनुहुने परमेश्वरलाई देख्ने चाहना बिछट्टै राख्दैनस्? के तँ स्वर्गमा हुनुहुने परमेश्वरलाई बुझ्ने चाहना बिछट्टै राख्दैनस्? के तँ मानवजातिको गन्तव्य देख्ने चाहना बिछट्टै राख्दैनस्? उहाँले तँलाई यी सबै रहस्यहरू—कुनै पनि मानिसले कहिल्यै तँलाई बताउन नसकेका रहस्यहरू—बताउनुहुनेछ र उहाँले तँलाई तैँले नबुझ्ने सत्यताहरू पनि बताउनुहुनेछ। उहाँ राज्यको तेरो प्रवेशद्वार र नयाँ युगमा प्रवेश गर्नका लागि तेरो मार्गदर्शक हुनुहुन्छ। यो साधारण देहसँग मानिसका निम्ति बुझ्न नसकिने धेरै रहस्य हुन्छन्। उहाँका कार्यहरू तेरा लागि दुर्बोध छन्, तर उहाँले गर्ने कामको सम्पूर्ण लक्ष्य नै तँलाई उहाँ मानिसहरूले विश्वास गरेजस्तो साधारण देह हुनुहुन्न भनेर देख्न सक्षम बनाउन पर्याप्त छ, किनकि उहाँ आखिरी दिनहरूमा परमेश्वरका अभिप्राय, र आखिरी दिनहरूमा मानवजातिप्रति परमेश्वरको हेरविचारको प्रतिनिधित्व गर्नुहुन्छ। तैँले उहाँका वचनहरूले स्वर्ग र पृथ्वी हल्लाएको झैँ सुन्न नसके पनि, तैँले उहाँका आँखाहरू अग्निका ज्वालाहरूजस्ता देख्न नसके पनि, र तैँले उहाँको फलामे डन्डाको अनुशासन प्राप्त गर्न नसके पनि, तँ उहाँका वचनहरूबाट परमेश्वर क्रोधी भइरहनुभएको सुन्न सक्छस् र परमेश्वरले मानवजातिका लागि कृपा देखाइरहनुभएको थाहा पाउन सक्छस् र तैँले परमेश्वरको धर्मी स्वभाव र उहाँको बुद्धि देख्न सक्छस्, र त्यसभन्दा पनि बढी, सबै मानवजातिका लागि परमेश्वरको हेरविचार बोध गर्न सक्छस्। आखिरी दिनहरूमा परमेश्वरको काम मानिसलाई पृथ्वीमा मानिसहरूमाझ जिइरहनुभएको स्वर्गमा हुनुहुने परमेश्वरलाई देख्ने तुल्याउनु हो, र परमेश्वरलाई जान्न, उहाँप्रति समर्पित हुन, उहाँको डर मान्न र उहाँलाई प्रेम गर्न सक्षम बनाउनु हो। यसैको लागि उहाँ दोस्रो पटक देहमा फर्किनुभएको छ।
—वचन, खण्ड १। परमेश्वरको देखापराइ र काम। के तँलाई थाहा थियो? परमेश्वरले मानिसको बीचमा महान् काम गर्नुभएको छ
यस्तो कुरालाई जाँच्न त्यत्ति कठिन हुँदैन, तर यसका निम्ति हामी प्रत्येकले पहिला यो एउटा सत्यता जान्नु माग गरिएको हुन्छ: जो देहधारी परमेश्वर हुनुहुन्छ, उहाँसँग परमेश्वरको सार हुन्छ, र जो देहधारी परमेश्वर हुनुहुन्छ उहाँसँग परमेश्वरको अभिव्यक्ति हुन्छ। परमेश्वर देह बन्नुभएको हुनाले, उहाँले आफूले गर्ने अभिप्राय राख्नुभएको काम आफूसँगै ल्याउनुहुन्छ, र उहाँ देहधारी परमेश्वर भएको हुनाले, उहाँले उहाँ जे हुनुहुन्छ त्यो अभिव्यक्त गर्नुहुन्छ, र सत्यतालाई मानिसकहाँ ल्याउन, उसलाई जीवन प्रदान गर्न, र उसलाई मार्ग देखाउन सक्नुहुन्छ। परमेश्वरको सार नभएको देह निश्चित रूपमा देहधारी परमेश्वर होइन; यसमा कुनै शङ्का छैन। यदि मानिसले त्यो परमेश्वरको देहधारी देह हो कि होइन भनी जाँच गर्ने अभिप्राय राख्छ भने, उसले त्यसलाई उहाँले व्यक्त गर्ने स्वभाव र उहाँले बोल्ने वचनहरूबाट नै निर्धारण गर्नुपर्छ। भन्नुको अर्थ, यो देहधारी परमेश्वरको देह हो कि होइन, र यो साँचो मार्ग हो कि होइन भनी निर्धारण गर्न उसले उहाँको सारकै आधारमा भिन्नता छुट्ट्याउनुपर्छ। त्यसैले, यो देहधारी परमेश्वरको देह हो कि होइन भन्ने कुराको कडी बाहिरी स्वरूपभन्दा उहाँको सार (उहाँको काम, उहाँका वचनहरू, उहाँको स्वभाव, र अन्य धेरै पक्षहरू) मा निहित हुन्छ। यदि मानिसले उहाँको बाहिरी स्वरूपलाई मात्र जाँच्छ, र त्यसको फलस्वरूप उहाँको सारलाई बेवास्ता गर्छ भने, यसले मानिस मूर्ख र अज्ञानी छ भन्ने देखाउँछ। बाहिरी स्वरूपले सार निर्धारण गर्न सक्दैन; अझ भन्ने हो भने, परमेश्वरको काम मानिसका धारणाहरूसँग कहिल्यै पनि मेल खाँदैन। के येशूको बाहिरी स्वरूप मानिसका धारणाहरूभन्दा विपरीत थिएन र? के उहाँको अनुहार र पोसाकले उहाँको वास्तविक पहिचान प्रदर्शन गर्न नसकेका थिएनन् र? के फरिसीहरूले त्यतिबेला येशूको बाहिरी स्वरूपलाई मात्र हेरेकाले र ध्यान दिएर उहाँको मुखका वचनहरू स्वीकार नगरेकाले नै उहाँको विरोध गरेका थिएनन् र? परमेश्वरको देखापराइ खोज्ने हरेक दाजुभाइ-दिदीबहिनीले इतिहासको दुःखद घटना नदोहोर्याओस् र आधुनिक समयको फरिसी बनेर परमेश्वरलाई फेरि क्रूसमा नटाँगोस् भन्ने मेरो आशा छ। तिमीहरूले परमेश्वरको पुनरागमनलाई कसरी स्वागत गर्ने भनी होसियारीका साथ ख्याल गर्नुपर्छ र सत्यताप्रति समर्पित हुने व्यक्ति कसरी बन्ने भन्ने विषयमा तिमीहरूको दिमाग स्पष्ट हुनुपर्छ। यो येशू बादलको सवारीमा फर्कनुहुनेछ भनी पर्खिरहेका सबैको जिम्मेवारी हो। हामीले आफ्ना आत्मिक आँखाहरू सफा गर्नुपर्छ र हामी काल्पनिक शब्दहरूमा फस्नु हुँदैन। हामीले परमेश्वरको वास्तविक कामका बारेमा सोच्नुपर्छ, र परमेश्वरको व्यावहारिक पक्षलाई हेर्नुपर्छ। सधैँ प्रभु येशू अचानक बादलको सवारीमा तिमीहरूमाझ ओर्लनुहुनेछ र उहाँलाई कहिल्यै नचिनेका वा नदेखेका अनि उहाँको इच्छा कसरी पछ्याउने भनी नजान्ने तिमीहरूलाई लैजानुहुनेछ भन्ने आशा गर्दै, दिवास्वप्नमा डुब्ने वा हराउने नगर। अलि बढी वास्तविक मामिलाहरूका बारेमा सोच्नु नै राम्रो हो!
—वचन, खण्ड १। परमेश्वरको देखापराइ र काम। प्रस्तावना
तिमीहरूलाई परमेश्वर के हुनुहुन्छ थाहा छैन, ख्रीष्ट के हुनुहुन्छ थाहा छैन, कसरी यहोवाको डर मान्ने थाहा छैन, पवित्र आत्माको काममा कसरी प्रवेश गर्ने थाहा छैन, र परमेश्वर स्वयम्को काम र मानिसको बहकाउलाई कसरी छुट्ट्याउने थाहा छैन। तँ त परमेश्वरले व्यक्त गर्नुभएको तेरो विचारसित नमिल्ने सत्यको जुनसुकै वचनको निन्दा गर्न मात्र जान्दछस्। तेरो नम्रता कहाँ छ? तेरो समर्पण कहाँ छ? तेरो बफादारिता कहाँ छ? सत्यता खोजी गर्ने तेरो मनोवृत्ति कहाँ छ? परमेश्वरको डर मान्ने तेरो हृदय कहाँ छ? म तिमीहरूलाई बताउँछु, चिन्हहरूका कारणले परमेश्वरमा विश्वास गर्नेहरू निश्चय नै नष्ट पारिने श्रेणीका हुन्। देहमा फर्किआउनुभएका येशूका वचनहरू स्विकार्न नसक्नेहरू निश्चय नै नरकका सन्तान, प्रधान स्वर्गदूतका सन्तती हुन्, र यिनीहरू सदाका लागि नष्ट पारिने श्रेणीमा पर्छन्। धेरै मानिसहरूले मैले भन्ने कुरालाई वास्ता नगर्न सक्छन्, तर येशूलाई पछ्याउने हरेक तथाकथित सन्तलाई म अझै भन्न चाहन्छु कि, जब तिमीहरूले येशू स्वर्गबाट सेतो बादलमा ओर्लनुभएको आफ्नै आँखाले देख्छौ, त्यो सार्वजनिक रूपमा धार्मिकताको सूर्य देखा पर्ने समय हुनेछ। सायद त्यो क्षण तेरो निम्ति ठूलो उत्साहको समय हुनेछ। तैपनि तैँले येशू स्वर्गबाट ओर्लनुभएको देख्ने समय तँ दण्ड भोग्न नरक जाने समय, परमेश्वरको व्यवस्थापन योजनाको अन्त्यको घोषणा भएको समय, र परमेश्वरले असललाई इनाम र दुष्टलाई दण्ड दिनुहुने समय पनि हुनेछ भनी जान्नुपर्छ। किनकि सत्यताको अभिव्यक्ति मात्र हुँदा, मानिसले चिन्हहरू देख्नुअघि नै परमेश्वरको न्याय अन्त्य भइसकेको हुनेछ। सत्यता स्विकार्ने र चिन्हहरू नखोज्ने अनि यसरी शुद्ध गरिएकाहरू परमेश्वरको सिंहासनसामु ल्याइएका र सृष्टिकर्ताको अङ्गालोमा प्रवेश गरेका हुनेछन्। “सेतो बादलमा सवार नहुने येशू झूटो ख्रीष्ट हो” भन्ने विश्वासमा अड्डी कस्नेहरूले मात्र अनन्त दण्ड भोग्नेछन्, किनभने तिनीहरू चिन्ह प्रदर्शन गर्नुहुने येशूमा मात्र विश्वास गर्छन्, तर कठोर न्याय व्यक्त गर्नुहुने अनि जीवन र साँचो मार्ग प्रदान गर्नुहुने येशूलाई मान्दैनन्। अनि यसकारण, के मात्र हुन सक्छ भने, सेतो बादलमा येशू खुल्लमखुल्ला फर्कनुहुँदा उहाँले तिनीहरूलाई ठेगान लगाउनुहुनेछ। तिनीहरू अति जिद्दी, आफैँमा अति आत्मविश्वासी, अति अहङ्कारी छन्। यस्ता घटियाहरूले येशूबाट कसरी इनाम पाउन सक्छन्? सत्यता स्वीकार गर्न सक्नेहरूका निम्ति येशूको पुनरागमन ठूलो मुक्ति हो, तर सत्यता स्वीकार गर्न नसक्नेहरूका निम्ति यो दोषी ठहराइनुको चिन्ह हो। तिमीहरूले आफ्नै मार्ग चुन्नुपर्छ र पवित्र आत्माको निन्दा र सत्यतालाई इन्कार गर्नु हुँदैन। तिमीहरू अज्ञानी र अहङ्कारी व्यक्ति हुनु हुँदैन, बरु पवित्र आत्माको मार्गदर्शनप्रति समर्पित हुने, सत्यताका लागि तिर्खाउने र त्यसको खोजी गर्ने व्यक्ति हुनु पर्छ; तिमीहरू यसरी मात्र लाभान्वित हुनेछौ। म तिमीहरूलाई परमेश्वरप्रतिको विश्वासको मार्ग निकै होसियारीपूर्वक हिँड्न सल्लाह दिन्छु। मनमानी रूपमा निचोडमा नपुग; त्योभन्दा बढी, परमेश्वरमाथिको विश्वासमा बेफिक्र र लापरवाह नबन। तिमीहरूले परमेश्वरमा विश्वास गर्नेहरूमा कम्तीमा पनि विनम्र र परमेश्वरको डर मान्ने हृदय हुनैपर्छ भन्ने कुरा जान्नुपर्छ। सत्यता सुनेर पनि यसलाई अवहेलना गर्नेहरू मूर्ख र अज्ञानी हुन्। सत्यता सुनेर पनि लापरवाह रूपमा निचोडमा पुग्ने वा यसलाइ दोषी ठहराउनेहरू अहङ्कारी मानिस हुन्। येशूमा विश्वास गर्ने कोही पनि अरूलाई सराप्न वा दोषी ठहराउन योग्य हुँदैन। तिमीहरू सबै नै समझ भएका र सत्यता स्विकार्ने व्यक्ति हुनुपर्छ।
—वचन, खण्ड १। परमेश्वरको देखापराइ र काम। तैँले येशूको आत्मिक शरीरलाई देख्दासम्ममा, परमेश्वरले स्वर्ग र पृथ्वीलाई नवीकरण गरिसक्नुभएको हुनेछ
